Chronological
Munamiktia ne ichkakunetzin
19 Tipan nikakik tay ken se sujsul wey miaktal tik ne ilwikak inat:
Halelu-Ya, shinakan ka wey Tutajwan!
Ne Teut techmakishtia,
tzitzinaka, n' itajpal wey!
2 Ken tejkia wan melawak kichiwa juzgar;
kichijki juzgar ne wey siwapala
ne kishpuluj ne tal iwan n' itatzinhejenchiwalis
wan kitzunkwij n' iesyu n' itejtekitini
ne yaja kishinijtuk.
3 Wan inaket senpa:
Halelu-Ya, shinakan ka wey Tutajwan!
Wan n' ipukyu tejku ka ilwikak
pal senpa wan senpa.
4 Wan ne senpual-nawi noymet wan ne nawi tay yujyultuk mutamutaket talchi wan mutankwaketzket iishpan ne Teut, ne muetztuk ijpak ne kuijpal, wan inat katka:
"Amen, Halelu-Ya."
5 Wan itech ne kuijpal mukakik ina se:
"Shinakan ka wey ne tuTeut
muchi n' itejtekitini
wan ne kitakamatit
chijchikitik wan wejwey."
6 Wan nikakik tay ken se wey miaktal tzajtzi wan ken miak ajat mutaluat wan ken sujsul wey tikwini, wan inat muchi:
Halelu-Ya, pejki techtekimaka
tutajtzin Teut ne muchi weli!
7 Tipajpakikan, timuyulkwesukan
wan tinakan ka yaja wey!
Munamiktia n' ichkakunetzin,
n' isiwaw muekchijkia,
8 wan kimakatiwit ma mutakenti
ikwajkwach yektzin chipawak!"
Ika ne kwajkwachti yektzin ne melaknajyu ipal ne tayulmatit.
9 Wan nechilwia: "Shitajkwilu: Suertej kipiat ne ká munutztiwit pal ajsit sentakwat kan yawi munamiktia ne ichkakunetzin." Wan nechilwia: "Ini ne ipajpalabraj yekkaya ne Teut." 10 Wan nimutamutak talchi nimutankwaketza itech ne ijikshi, wan nechilwia: "Maka! Shikita, naja nimutekitini wan niintekitini ne mukniwan ne kipiat tay inatuk Yeshu. Ishpan ne Teut shimutankwaketza, ika tay inatuk Yeshu, yajaya ne iijiu ne teutaketzalis."
Ne mil shiwit
11 Wan nikitak ka tapuik ne ilwikak, wan muitak se caballoj istak wan ne ijpak muetztuk ne munutza yek wan yekkaya, wan ne kichiwa juzgar wan musuma iwan tamelakchiwalis. 12 Ne ijish ken tit, wan ijpak ne itzuntekun kipia miak yawalilpika, wan kipia se itukay ijkwilujtuk ne inte aka kimati, semaya yajasan, 13 wan mutakentijtuk ijtik ikwajkwach ne ajwitiwit iwan esti, wan ne itukay munutza Ipalabraj ne Teut.
14 Wan ne tasumanimet tik ne ilwikak yajket ipan ijpak caballojmet ijistak wan mutakentijtiwit tik inkwajkwach yektzin istak, chijchipawak. 15 Wan tik ne iten kisa se espadaj tzuntamej pal iwan kinchalua ne tejtechan, wan iwan itupil ipal tepusti yaja yawi kintajpia. Wan yaja taksa tik ne shaput kan muchiwa ne atata ipal ne ikwalan wey ne Teut ne weli muchi. 16 Wan kipia ijpak ne ikwajkwach wan ijpak ne imetzkuyu ijkwilujtuk itukay: Tatuktiani ipal Tatuktianimet wan Tajtzin ipal Tajtzitzinmet.
17 Wan nikitak se tanawatiani ejkatuk tik ne tunal wan tzajtzik wey, kinhilwia muchi ne tujtutut patanit tik itajku ne ilwikak:
"Shalmusentepewakan tik ne iyualu wey ne Teut 18 pal ankikwat innajnakayu tatuktianimet, wan innajnakayu miaktuktianimet, wan innajnakayu hojhombron, wan innajnakayu cajcaballoj wan ne inhijpak muejmuetztuk, wan innajnakayu muchi ne insel intejtekuyu wan tepaltekitinimet, chijchikitik wan wejwey!"
19 Wan nikitak ne tekwani wan ne tatuktianimet ipal ne taltikpak wan ne intajtasumani ne musentepewtiwit pal kisumat ne muetztuk ijpak ne caballoj wan ne itajtasumani. 20 Wan kipewijket ne tekwani wan iwan ne sankataketzani ne kichijki sejse pal muishmati tik itachialis, wan ijkiuni kinshijshikuj ne kikwijtuyat ne ikwikwil ne tekwani wan ne mutankwaketzat iishpan ne itachialis. Kitamutilijket ne ujume ne timil ne tata iwan azufrej. 21 Mumiktijket ne sekit iwan ne iespadaj ne muetztuk ijpak ne caballoj ne kiski tik ne iten, wan muchi ne tujtutut kikwajket ne innajnakayu.
20 Wan nikitak se tanawatiani waltemu tik ne ilwikak ne kipiatuya ne tay iwan mutentzakwa ne miktan, wan tik ne imey kipiatuya se wey tepusilpika. 2 Wan kitzkij ne kuat majwey, ne kuat ipal ikman, yaja ne Tamintuk wan ne Tenewani, wan kilpij pal mil shiwit, 3 wan kitamutak ijtik ne miktan wan kitentzak wan kitetilij ne tentzakka pal kiane intea yawi kinshijshikua ne tejtechan hasta ma tamikan ne mil shiwit. Tipan nemi pal kiajkawat yawi chiupi tiempoj.
4 Wan nikitak kujkuijpal, wan inhijpak mutalijket sejse, wan kinmakaket ma welikan kichiwat juzgar. Nusan nikitak ne inhajalmaj ne mutzunkutuntiwit ka imaku Yeshu wan ipanpa ne ipalabraj ne Teut; yejemet inte mutankwaketzket iishpan ne tekwani nian ne itachialis wan te kikwijket ne kwikwil ijpak ne inkwatapal wan ijpak ne inmey. Wan nemiket yultuk wan tatekimakaket mil shiwit iwan ne Mawaltijtuk. 5 Ne uksejse mikini inte muyulkwijket hasta tamit ne mil shiwit.
Ini ne achtu muyulkwepalis. 6 Kipiat suertej, wan sujsul yejyek, ne nemit tik ne achtu muyulkwepalis. Inhijpak ne ukse mikilis inte yawi kipia tatuktilis, wan yejemet muchiwasket palejmet ipal ne Teut wan ne Mawaltijtuk, wan iwan yawit tatekimakat ijtik ne mil shiwit.
Kwak panut mil shiwit
7 Wan kwak panut ne mil shiwit, yawit kishtiat ne Tenewani tik itetzakwiluyan, 8 wan yawi walkisa kinshijshikua ne tejtechan nujme ne taltikpak, Gog wan Magog, pal kinsentepewa pal musumat. Wey mupujket ken ne ashal itan ne weyat. 9 Wan muchayawket nujme ne tal wan kiyawalujket ne cuartel ipal ne tayulmatit wan ne techan tasujtatuk. Wan kiski tit tik ne ilwikak wan kintuluj. 10 Wan ne Tamintuk ne kinshijshikua, kitamutaket tik ne timil ipal azufrej kan ne yawit chichinakat ne tekwani wan ne sankataketza nusan ka tunal wan ka tayua pal senpa wan senpa.
11 Wan nikitak se wey kuijpal istak, wan ne ijpak muetztuk, wan ne tal wan ne ilwikak chulujket wejka ne itachialis, wan te kanaj kan weliskiat nemit.
12 Wan nikinhitak ne miktiwit, ne wejwey wan ne chijchikitik, ejejkatuk iishpan ne kuijpal, wan mutapujket sejse amat, wan nemanha mutapuj ukse amat, yaja ne amat yultuk, wan ne mikinit muchijket juzgar iwan ne tay nemi ijkwilujtuk tik ne ajamat wan kitaket su kichijtiwit tay yek o inte.
13 Wan ne weyat temakak ne miktiwit ijtik yaja, wan ne mikilis wan ne Miktanshaput temakaket ne miktiwit ijtik yejemet, wan kitaket tay ne kichijtuya sejse wan muchijket juzgar muchi ne mikinimet. 14 Wan kimutilijket ne mikilis wan ne Miktanshaput ne timil. Ini inte ne achtu mikilis, yaja ne seuk. Wan ne timil.
15 Wan su aka inte muajsik tawawasujtuk tik ne amat yultuk, kitamutaket ijtik ne timil.
Ne yankwik ilwikak wan ne yankwik tal
21 Wan nikitak se yankwik ilwikak wan se yankwik tal, ika ne achtu ilwikak wan ne achtu tal panutiwit wan ne weyat intea nemi. 2 Nusan nikitak ne itechan Teut, Yerushalem, waltemu tik ne ilwikak itech ne Teut, ajshitijtuk ken se siwamunti yektzinchijtuk ipal ne ishulejyu. 3 Wan nikakik se tzajtzi tik ne kuijpal ina:
"Né nemi ne tawipanti ipal ne Teut iwan ne takamet, wan yaja muchantis inwan wan yejemet muchiwasket itechan, wan ne Teut yajasan inwan nemis ken inTeut. 4 Wan kiwatzas muchi ne inhishayu tik ne inhijish wan ne mikilis intea kanaj, nian mutechtilis, nian tzajtzilis, nian yulpitzinilis intea kanaj ika muchi tay pal ikman panuk."
5 Wan ne muetztuk ijpak ne kuijpal inak: "Shikita, muchi nikchiwa yankwik." Wan ina: "Shitajkwilu, ka ini ne pajpalabraj yek wan yekkaya." 6 Wan nechilwij:
"Muchijkia. Naja ne A wan ne Z, ne pewalis wan ne tamilis. Naja ne niktakulis ma ati ne amiki tik ne apunian ipal ne at yultuk. 7 Ká ne weli ijpak muchi, yawi kipia muchi ini, wan naja niiTeut wan yaja nukunew. 8 Ne sajsaytit wan te kipiat tayulmatilis wan ijijyak wan tamiktianimet, wan tatzinhejenchiwanimet, wan brujbrujoj, wan teutzintennamikinimet, wan muchi ne taketzat sajsanka, muchi yejemet yawit nemit tik ne timil kan tata wan nemi azufrej. Uni ne ukse mikilis, ne ume."
9 Wan walaj se ipal ne chikume tanawatiani ne kipiatuyat ne chikume wajkal tejtentuk iwan ne tipan chikume kukulis, wan nechnutzki, ina: "Shiwi, ma nimetzilwiti ne siwamunti, ne isiwaw ne ichkakunetzin." 10 Wan nechwikak iwan iijiu ijpak se wey tepet sea kojtik wan nechilwitij ne techan ipal ne Teut, Yerushalem. Yaja temu witz tik ne ilwikak, itech ne Teut. 11 Kipia ne itzitzinakalis wey ne Teut. Ne itawilyu muita ken se kusti sujsul wey ipatiw, ne sujsul tzitzinaka. 12 Kipia se wey tepanti sea kojtik. Kipia majtakti-ume tentzakka, wan ijpak ne tejtentzakka majtakti-ume tanawatiani, wan ijpak muijkwilujtiwit ne intujtukay ne majtakti-ume tribuj ipal ne ipilawan Israel: 13 ka taneskan yey tentzakka, ka ajkuik yey tentzakka, ka tatzinu yey tentzakka, wan kan kalaki ne tunal uk yey tentzakka. 14 Wan ne tepanti ipal ne techan kipia majtakti-ume tetzilnaj, wan inhijpak nemit ne majtakti-ume intukay ne majtakti-ume ititanijtuk ne ichkakunetzin.
15 Wan ne nuwan taketza kipiatuya se akat ipal teukwit pal tatamachiwa, pal yaja kitamachiwa ne techan wan ne itejtentzakka wan ne tepanti. 16 Wan ne techan kipia nawi itzin wan ne iweyak kenha ken ne ipatawak. Wan kitamachij ne techan iwan ne akat wan kipia dos mil kilometroj iweyak, wan ne ipatawak wan ne ikojtik kenha. 17 Nusan kitamachijki ne tepanti: yeshpual-majtakti-ume metroj ken tatamachiwa se takat, kineki ina se tanawatiani. 18 Wan ne tejtepanti muchijtuyat iwan ikujkus yaspej, wan ne techan ipal teukwit chipawak ken se vidrioj chipawak. 19 Ne tejtetzilnaj ipal ne tejtepanti ipal ne techan muekchijtuyat iwan muchi ne kujkusti: ne achtu ikus yaspej, ne ume zafiroj, ne yey calcedoniaj, ne nawi esmeraldaj, 20 ne makwil ikus sardonicaj, ne chikwasen sardioj, ne chikume ikus teukwit, ne chikwey beriloj, ne chiknawi topacioj, ne majtakti ikus crisoprasoj, ne majtakti-se jacintoj, ne majtakti-ume amatistaj. 21 Wan ne majtakti-ume tentzakka, yejemet majtakti-ume perlaj, sejse ipal ne tejtentzakka se perlaj. Wan tik itajku ne techan muchi ipal teukwit chipawak ne muita ken cristal.
22 Wan te nikitak se teupantzin ka né, ika ne tajtzin Teut ne weli muchi yaja ne teupantzin, wan nusan ne ichkakunetzin. 23 Wan ne techan inte muneki ne tunal nian ne metzti pal tajtawiat ka né ika ne itzitzinakalis ne Teut kitawiluj, wan ne itawil ne ichkakunet. 24 Wan nejnemisket ne tejtechan iwan ne itawilyu, wan ne tatuktianimet ipal ne taltikpak kalwikat ne intzitzinakalis, 25 wan ne tejtenkal ipal ne techan inte yawit mutzakwat ka tunal (ika inte keman yawi tayuaki ka ikuni), 26 wan kalwikasket ka né ne intzitzinakalis wan ne inhonor ne tejtechan, 27 wan te yawi kalaki ijtik yaja muchi tay susulnaj, wan kichiwa tay ijyak, wan taketza sanka, semaya ne ijijkwilujtuk ijtik ne iamaw yultuk ne ichkakunetzin.
22 Wan nechilwitij se apan ipal yektzin at yultuk ne muita ken cristal, ne kisa itech ne ikuijpal ne Teut wan ne ichkakunetzin. 2 Tik itajku ne weytechan wan ne apan, ka nikan wan ka ikuni, se kwawit yultuk ne kichiwa majtakti-ume itakil, muchi ne mejmetzti se itakil tekenha, wan ne ijiswayu ne kwawit welit kinpajtiat ne tejtechan. 3 Wan tea yawi naka nian se maldicion. Wan ne ikuijpal ne Teut wan ne ichkakunetzin yawi nemi ka né, wan ne itejtekitini tekitisket ipal. 4 Wan kitasket ne iishkalyu, wan ne itukay nemis ijpak inkwajkwatapal. 5 Wan tea yawi tayuaki ka né wan te munekisket itawilyu se tawil wan itawilyu tunal ika ne tajtzin Teut yawi kintawilua, wan yawit tatekimakat pal senpa wan senpa.
Tami
6 Wan nechilwij:
"Ini ne pajpalabraj yek wan yekkaya. Wan ne tajtzin ne Teut ipal ne inhijijiu ne taketzanimet kititanij ne itanawatiani kinhilwitia ne itejtekitini ne tay yawia panu nemanha. 7 Wan naja niaw niwitz nemanha. Suertej kipia ne tajpia ne pajpalabraj ipal ne teutaketzalis ipal ini amat."
8 Wan naja, Yojan, ne nitakaki wan nikita muchi ini. Wan kwak tamik nitakaki wan nitachia, nimutamutak talchi nimutankwaketza itech ne ijikshi ne tanawatiani ne nechilwitij muchi, 9 wan nechilwia:
"Maka! Shikita, naja nimutekitini wan intekitini ne mukniwan ne taketzanimet wan ne tajpiat ne pajpalabraj ipal ini amatzin. Ma shimutankwaketza iishpan ne Teut."
10 Wan nechilwia:
"Maka shiktzakwa iwan sajti ne pajpalabraj ipal ne teutaketzalis ipal ini amatzin, ika ne horaj witzaya. 11 Ká ne kichiwa tay te yek, ma kichiwa senpa, wan ká ne kichiwa tay susul, ma mususulwi senpa, wan ne yulmelawak ma kichiwa tamelakchiwalis senpa, wan ne tayulmati ma muteuchiwa senpa. 12 Nikan niwitz nemanha wan nuwan nalwika nutashtawilis pal nimetzintashtawia muchi, sejse kan itekiw. 13 Naja ne A wan ne Z, ne achtu wan ne tipan, ne pewalis wan ne tamilis. 14 Suertej kipiat ne kipakat ne inwijwipil pal welit kipiat ne kwawit yultuk wan kalakit tik ne tejtentzakka ipal ne techan. 15 Tatenpan nemit ne pejpelumet, wan ne brujojmet, wan ne tamiktianimet, wan ne teutzintennamikinimet, wan ne kitasujtat wan kichiwat sanka. 16 Naja, Yeshu, niktuktij ne nutanawatiani pal metzinhilwia muchi ini tik ne sejsennemit. Naja n' inelwayu wan n' itechan Dawid, ne yektzin sital ipal ne tapuyawa."
17 Wan ne Ijiutzin wan ne siwamunti inat: "Shiwi!" Wan ne kikaki ma ina: "Shiwi!" Wan ká ne amiki, ma wiki; ne kineki, ma kikwi at yultuk takulijtuk.
18 Nikinhilwia muchi ne takakit ne pajpalabraj ipal teutaketzalis ipal ini amat. Asu aka kitaliliskia tatka, ne Teut yawi kitalilia ne kujkukulis ne mujkwilujtiwit tik ini amat, 19 wan asu aka kishtiliskia sejse pal ne pajpalabraj ipal ini teutaketzalis, ne Teut yawi kishtilia ne itakutun ipal ne kwawit yultuk wan ipal ne itechan Teut ipal ne mujkwilujtiwit ijtik ini amat.
20 Ne ina muchi ini ina: "Ijkia, niwitz nemanha." Amen, shiwi, tajtzin Yeshu! 21 Ma nemi ne teutasujtalis ipal ne tajtzin Yeshu iwan muchi.
Ne Bibliaj Tik Nawat · © 2008, 2012 Jan Morrow