Chronological
Ne tekitit tik ne shukumekamil
20 [Wan inak:]
—Ika ne tatekimakalis ipal ne ilwikak kenha ken se kipiatuya se shukumekamil, wan keman tatwik yaja kiski pal kintekimaka takamet pal tekitit tik ne imil.
2 Mukawki inwan pal kintashtawia se tumin wan kintuktij tik ne mil. 3 Wan kwak yaja kiski senpa ka chiknawi horaj, kinhitak sejseuk inte kipiat intekiw tejchiat tik ne tiankis, 4 wan kinhilwij:
"Shumet nusan tik ne nushukumekamil wan san nimetzinmakas anmupatiw."
5 Yajket.
Ka tajkutunal mukwepki kisa, wan ka yey horaj kenhaya.
6 Ka makwil horaj ka teutak, kiski uksenpa wan kiajsik sejseuk tejchiat, wan kinhilwia:
"Tay ankichiwat ka nikan, muchi ne tunal antejchishtiwit wan teuk ankipiat anmutekiw?"
7 Kilwiat:
"Inte techmakaket tatka."
Kinhilwia:
"Shumet nusan anmejemet ka numil."
8 Kwak tayuakik, ne itekuyu ne mil kilwia ne ikalpiani:
"Shalinnutza ne takamet wan shikintashtawi. Shipewa wan ne walajket tipan wan ma wikikan muchi hasta ma ajsikan ne ajachtu."
9 Ne walajtuyat ka makwil horaj kikwijket sejse ne itumin. 10 Wan kwak ajsiket ne walajtiwit achtu, kikwijket sejse itumin nusan, melka kimatit katka ka yejemet yawit kikwit mas. 11 Kwak tamiket kikwit inpatiw, pejket kikinakat ipanpa tay ne kichijtuya ne intekuyu, 12 inat:
"Uni tijtipan sema se horaj tekitket wan tikintashtaw kenha ken tejemet ká tikselijket tukimil muchi ne tunal wan sujsul timitunket!"
13 Yaja nankilij, kilwij se yejemet:
"Kunpalej! Inte nimetzchiwilia tatka. Timukawki nuwan ka se tumin! 14 Asu ijkiuni, shikana tay mupal wan shiawa. Nikneki nikmaka yajuni walaj tipan kenha ken taja. 15 Ken tina, inte niweli nikchiwa tay nikneki ijtik tay nupal? Anka taja inte tikita yek ma naja niyek?"
16 Ijkiuni ne tijtipan yawit ajachtu wan ne ajachtu tijtipan.
Tay yawi muchiwa tik Yerushalem
17 Kwak Yeshu yawi Yerushalem kikwij ne majtakti-ume ikwaj tik ne ujti wan kinhilwij:
18 —Nikan titejkut tiawit ka Yerushalem, wan ne weypalejmet wan tajkwiluanimet yawit temakat ne Itelpuch ne Takat, wan tatuktisket ma miki, 19 wan yawit kintemakat iwan ne tejtechan pal ajkawetzkat wan kiwitekit wan kicruzpiluat, wan kwak panut yey tunal yawi muyulkwi.
Ne ipilawan Zabday
20 Kwakuni ne innan ne ipilawan Zabday ajsik itech, wan ne ipilawan iwan, wan mutankwaketza ne innan wan kitajtanilia se. 21 Yeshu kilwij:
—Tay tikneki?
Kilwia:
—Ma mutalikan ini nupilawan inhumeshtin tik ne mutatekimakalis, ne se ka mumayekkan wan ne seuk ka seuk ladoj.
22 Nankilij ne Yeshu, inak:
—Inte ankimatit tay antajtanit! Tay inat anmejemet, ka anwelit atit tik ne atiluni kan najasan niaw niati?
Kilwiat:
—Tiwelit.
23 Kinhilwia:
—Melka anhatisket tik nuatiluni, inte niweli nimetzinhilwia ma shimutalikan ka né, ika uni mujmutalijka inpal ká ipal kinhajshitilijtuk ne Nuteku.
24 Wan kwak ne majtakti takakket, kwalanket inwan. 25 Ne Yeshu kalinnutzki muchi wan inak:
—Ankimatit ka ne tatuktianimet pal sejse techan muchiwat tajtzitzinmet wan ne weymet kipiat tatuktilis ijpak muchi. 26 Inte yawi ijkiuni ijtik anmejemet: ká anmutzalan kielewiskia muchiwa wey, anmupal yawi tekiti, 27 wan ká muchiwaskia achtu, anmutekitini yawi muchiwa, 28 kenha ken iwan ne Itelpuch ne Takat: yaja inte walaj pal tatekimaka asunte pal kintekipanua sejseuk wan pal temaka ne ialmaj pal kiane muchi welit mumakishtiat.
Kipajtij ume pupuyut tik Yerijo
29 Wan kisket tik Yerijo, wan miak yajket yajket iipan. 30 Wan pejket tzajtzit ume pupuyut muejmuetztuk itech ne ujti kwak takakket ka Yeshu panu witz, inat:
—Shitechpalewi, itelpuch Dawid!
31 Melka kinhajwaket ma takaktumet, yejemet pejket tzajtzit mas wan inat senpa:
—Shitechpalewi, Tajtzin itelpuch Dawid!
32 Wan Yeshu muketzki wan kintzajtzalij:
—Tay ankinekit ma nikchiwa anmupal?
33 Kilwiat:
—Tajtzin, ma tapuikan ne tujtuish.
34 Ne Yeshu kintasujtak wan kichijchimik ne inhijish wan nemanha tachishket, wan yajket iwan.
Kalaki tik Yerushalem
21 Wan kwak tzinkisket Yerushalem wan ajsiket Bet-Page inawak ne Olivajtepet, Yeshu kintuktij ume mumachtiani 2 kienej:
—Shumet uni techan né anmumelawka. San ankiajsisket se burroj ilpituk itech se burrojtzin. Shiksutumakan wan shalwikakan. 3 Wan asu aka metzinhilwiskia tatka, shinakan:
"Muneki ne intekuyu."
Wan yawia kintuktia.
4 Muchijki ini pal yekawi tay inak ne taketzani, ina:
5 "Shikilwikan ne siwapiltzin ipal Tzion:
Uni witz mutatuktiani
nejmachnemi pak se burroj
wan pak se burrojtzin."
6 Ne mumachtianimet yajket wan kichijket ijkiunisan ken Yeshu kintuktijtuya. 7 Kalinwikaket ne burroj wan ne burrojtzin wan kintalilijket kwajkwachti wan inhijpak kitalijket ne Yeshu. 8 Sekit kichayajket inkwajkwach tik ne ujti; sekit tamajmajtzalkutunket wan kitenket ne ujti wan majmajtzal. 9 Tzajtziket yajket ne takamet wan siwatket iishpan wan iipan, inat:
—Hosha-na ne itelpuch Dawid! Teutasujtatuk ne witz tik itukay Tutajwan! Hosha-na tik ne wejwejkapan!
10 Wan kwak kalak tik Yerushalem, mukumuntijket muchi ne techanchanejket inat:
—Ká ini?
11 Inat muchi:
—Yajini ne taketzani Yeshu ipal Nazaret tik Galilaya.
12 Wan ajsik Yeshu ne teupan wan kinhishtij muchi ne tanamakanimet wan ne takuanimet nemituyat itech ne teupan wan kishtapachuj ne mejmesaj pal ne tuminpatanimet wan ne kujkuijpal pal ne kinamakat wijwilut, 13 kinhilwia:
—Nemi tajkwilujtuk: "Ne nukal munutzas se kal ipal teutajtanilis". Anmuwan mukweptuk se ustut pal techtekinimet!
14 Ajsiket itech ka teupan pupuyumet wan metzkelumet, wan kinpajtij.
15 Kwak ne weypalejmet wan ne tajkwiluanimet kitaket muchi tay kichijki wan ken ne pijpipiltzitzinmet tik ne teupan tzajtzit nemit wan inat "Hosha-na ne itelpuch Dawid!", sujsul kwalanket 16 wan kilwijket:
—Taja titakaki tay inat?
Yeshu kinhilwia:
—Nikinkaki. Niakeman antakaktiwit ka "itech inten sujsulin wan shujshulut timunutzki wey"?
17 Wan kinhajkaw wan kiski tik ne techan wan yajki Bet-Anya, wan ka né panuk ne tayua.
Ne kwawit inte tamaka itakil
18 Kwak mukwepki yajki tik ne techan peyna, yaja mayanki 19 wan kitak se ikuyu amat tik ne ujti, wan kwak ajsik itech te kiajsik tatka, sema ijiswat, wan kilwia:
—Ma intea keman kisa mutech nian se mutakil!
Wan ne kwawit kuwakik nemanhachin. 20 Wan ne mumachtianimet kitaket wan ishpuyawiket, inat:
—Ken ka ne kuyu amat kuwakik nemanhachin?
21 Ne Yeshu nankilij, kinhilwij:
—Kia nimetzinhilwia: asu antayulmatiskiat, inte sema anweliskiat kichiwat ijkiuni iwan ne amat; nusan weliskiat ankilwiat uni tepet ma muketza wan ma mutamuta tik ne wey at wan kiuni muchiwaskia! 22 Wan muchi tay ankitajtanit kwak ankinutzat ne Teut, asu antayulmatit tik anmuteutajtanilis, san ankipiasket.
Kanka witz ne itatuktilis Yeshu?
23 Wan kwak yaja yajki tamachtia itech ne teupan, ajsiket ne weypalejmet wan ne noymet ipal ne techan, inat:
—Katiawel ne tatuktilis pal taja tiweli tikchiwa muchi uni, wan ká ne metzmakak?
24 Ne Yeshu nankilij; kinhilwij:
—Naja nusan nikpia se pal nimetzintajtanilia, wan asu annechilwiat naja nusan niaw nimetzinhilwia katiawel ne tatuktilis pal weli nikchiwa tay nikchiwa. 25 Ne iteulyujmakalis Yojan kan walkiski: ka ilwikak o itech takamet?
Yejemet inat tik inyujyulu:
—Asu tejemet tinat ka ilwikak, yawi techilwia: taika tel inte ankiyulmatket? 26 Asu tinat ka itech takamet, kimatit muchi ne miaktal ka Yojan se taketzani pal ne Teut, yajika timajmawit.
27 Yejemet nankilijket:
Te tikmatit.
Kinhilwij:
—Naja nusan inte niaw nimetzinhilwia katiawel ne tatuktilis pal nikchiwa uni! 28 Tay anhinat? Se takat kipiatuya ume piltzintzin, wan ajsik itech ne achtu wan inak:
"Pipil, shu-shitekiti tik ne mil."
29 Yaja nankilij:
"Te nikneki."
Tipan kipatak iyulu wan yajki tekiti. 30 Ajsik itech ne seuk, wan kilwij kenha. Yaja nankilij:
"Niasneki, tajtzin!"
Melka uni inte yajki. 31 Katiawel pal yejemet kichijki tay kinekituya iteku?
Inat:
—Ne achtu.
Ne Yeshu kinhilwia:
—Kia nimetzinhilwia ka ne tumintepewanimet wan ne siwapalamet yasnekit tik ne itatekimakalis ne Teut achtu ka anmejemet, 32 ika walaj anmutech Yojan tik ne ujti yek, wan te ankiyulmatket. Ne tumintepewanimet wan ne siwapalamet kia kiyulmatket. Anmejemet kwak ankitaket uni inte ankipataket anmuyujyulu nian pejket ankiyulmatit.
Ne talchiwanimet tik ne shukumekamil
33 [Wan inak:]
—Shitakakikan seuk casoj: Nemik se takat kipia tajtal, wan kitukak se ishukumekamil, wan kiyawaluj uni shukumekamil iwan se kulal, wan nusan kikuyun ne shaput kan weli mupachua ne itakil ne shukumekat pal muishtia ne iayu pal muchiwa kushushaj, wan kiketzki se tepekal pal tapachiwiat, wan kiajkaw ne mil tik inmejmey talchiwanimet wan yajki wejka. 34 Kwak ajsiket ne tujtunal pal muana ne itakil, kintuktij itejtekitini pal kalkwit tay ipal. 35 Ne talchiwanimet kitzkijket uni tekitinimet, wan se kichalujket, seuk kimiktijket wan ukseuk kitejteminket. 36 Senpa kintuktij miak tekitini, wan ijkiasan kinchiwilijket. 37 Kwakuni kituktij ne itelpuch, ka inak: "Kitakamatisket ne nutelpuch." 38 Kwak ne talchiwanimet kitaket ne piltzin, muilwijket:
"Yajini yawi itekuyu muchi ipalwan kwak yawi miki tutekuyu! Tikmiktikan tel wan muchi yawi tupal!"
39 Wan kitzkijket wan kishtijket tik ne shukumekamil wan kimiktijket. 40 Kwak ajsi ne itekuyu ipal ne mil, tay yawi kichiwa iwan uni talchiwanimet?
41 Kilwiat:
—Yawi kinwilewa tetekia sea, wan yawi kinmaka ne mil sejseuk talchiwani ká kikwepilisket ne itajtakil kwak nemit pal kimakat.
42 Ne Yeshu kinhilwia:
—Niakeman ankitaket ka nemi tajkwilujtuk:
"Ne tet ne kitejtenejket ne kalketzanimet
mukwepki n' itzinteu kal!
Tutajwan yajasan kichijki,
wan titachiat wan tishpuyawit."
43 Neka nimetzinhilwia ka yawit metzinhishtiliat ne itatekimakalis ne Teut pal kimakat se techan tamaka itajtakil. 44 Muchi ká wetzi pak uni tet yawi keluni, wan asu ne tet wetzi ijpak se, yawi kikwechua.
45 Wan kwak ne weypalejmet wan ne Parishayujmet kikakket ini cajcasoj ne kinhilwij, kimatket ka ina inpanpa 46 wan tatejtemuat pal kitzkiat. Melka uni majmawket ika muchi inat ka yaja se taketzani ipal ne Teut.
Ne Bibliaj Tik Nawat · © 2008, 2012 Jan Morrow