Chronological
9 Naja te ninutekuyu? Te se titanijtuk? Te nikitztuk Yeshu, ne tutajtzin? Anmejemet te nutekiw tik ne Tajtzin? 2 Su ipal sekit naja te se titanijtuk, anmupal ijkia, ika anmejemet ne nuselloj ipal tetitanilis tik ne Tajtzin. 3 Ini tay ninankilia kwak nechtajtaniliat.
4 Anka te welit titakwat wan tiatit? 5 Anka te welit tinejnemit iwan se tusiwaw ká tuiknew ken ne uksejse titanijtuk wan ne ikniwan ne Tajtzin wan Kepas? 6 Semaya naja wan Bar-Naba te welit tinat ka te tiawit titekitit? 7 Katiawel ne tasumani niakeman tasuma wan yajasan mutashtawia isel ne ipatiw? Ká kituka se mil wan te kikwa ne itakil? Wan ká ne tajpia takwalmet wan te kikwa ne ilechayu ne ichkatal?
8 Anka nina uni ika nitakat? Te ina nusan ijkiuni ne tajtuli? 9 Muijkwilujtuk tik ne itajtuli Moshe: "Inte shiktzakwa ne iten ne wakash kwak taksa nemi pal tauya." Tay anhinat, ka ne wajwakash ne kipiat ipatiw ipal ne Teut? 10 O semaya ina ka tumaku? Ka tumaku muijkwiluj, ka muneki ma talichkwa ne talichkwa ipanpa ne tay tejchia, wan ne tauya ika tejchia ka yawi kikwi chiupi. 11 Su tejemet tiktukatiwit tay ipal ne tuijiu anmupal, anka titajtanit wey su tejemet tikpishkaskiat sejse ipal ne tuweyka tay anmupal? 12 Su sejseuk welit ijkiuni anmujpak, taika te tejemet?
Melka uni, te titajtantiwit tatka; mas yek tikseliat muchi pal te tikchiwat mas uij ne ujti ipal ne iyeknawatilis ne Mawaltijtuk. 13 Te ankimatit ka ne ká tekitit tik ne teupan kikwat tay ipal ne teupan wan ne tajpiat ne tikashit kikwit tay ipal ne tikashit? 14 Wan ijkiuni ne Tajtzin kintuktijtuk ne kinawatiat ne yeknawatilis ma mutekipanukan iwan ne yeknawatilis.
15 Melka uni, naja te nikwijtuk tatka. Nusan te nitajkwilujtuk ini pal ma muchiwa ijkiuni! Mas niknekiskia nimiki que su aka nechishtiliskia tay nikpia pal nimumati wey. 16 Su nitayeknawatia, te nikpia taika nimumati wey ika nikchiwa tay muneki. Ika ay naja! tay nimuchiwaskia su te nitayeknawatiskia! 17 Ika su nikchiwa uni ika nikneki, nikpiaya nupatiw; wan melka nikchiwa wan te nikneki, nikpia ne tajpialis. 18 Tay nupatiw tel? Yaja ka kwak nitayeknawatia, nitamaka ne yeknawatilis ipatka te tatka, pal te nikwi nupal tay niweli ipanpa ne yeknawatilis.
19 Kiane, melka te ninemi itan aka, nimuchijtuk intekitini muchi pal kiane niweli nikmakishtia miak, 20 wan ipal ne Yudayujmet nimuchijki ken se Yudayuj pal nikmakishtia Yudayujmet; ipal ne nemit itan tajtuli nimuchijki ken itan tajtuli, melka naja te ninemi itan tajtuli, pal nikmakishtia ne nemit itan tajtuli; 21 wan ipal ne te nemit itan tajtuli ken se te nemi itan tajtuli (melka naja ijkia ninemi itan itajtuli Teut: ninemi itan itajtuli ne Mawaltijtuk), pal nikmakishtia ne te nemit itan tajtuli; 22 nimuchijki ipal ne te welit tatka ken se te weli tatka pal nikmakishtia ne te welit tatka. Nimuchijtuk muchi ipal muchi, pal nujme niweli nikpalewia sejse. 23 Muchi ini nikchiwa ipanpa ne yeknawatilis pal naja nusan nikana.
24 Te ankimatit ka ne mutaluanimet muchi mutaluat wan sema se kiana ne premioj? Shimutalukan ijkiuni pal ankianat. 25 Muchi ne muejekuat kipiat itajpal pal inat te iwan muchi. Yejemet kichiwat ijkiuni pal kianat se yawal ne wilewi, wan tejemet ipanpa se te yawi wilewi. 26 Yajika naja nimutalua tesu ken te nikmatiskia; ijkiuni nimusuma, te ken su nikwitekiskia ejekat, 27 sute nikakasua ne nuweyka wan nikchiwa ka tekiti, pal kwak najasan nitanajnawatia ma te nimuchiwa se ká te muita yek.
10 Te nikneki, nukniwan, ma te shikmatikan ka muchi ne tutejteku nemiket itan ne mishti wan muchi panuket ijtik ne weyat 2 wan Moshe kinmakak ulyuj muchi tik ne mishti wan ne weyat, 3 wan muchi kikwajket sanse takwal ipal tuijiu 4 wan muchi kiuniket sanse at ipal tuijiu: ika atiket itech ne tesual ipal tuijiu ne yajki inhipan. Uni tesual ne Mawaltijtuk. 5 Wan ne Teut te kinhitak yek miak pal yejemet ika mutajkalket tik ne kojtan.
6 Muchi uni panuk ken ejemploj tupal pal tejemet te tikelewikan tay teyek ijkiunisan ken yejemet kichijket, 7 nian tiktennamikit teutzitzinmet ken sejse yejemet, ken muijkwilujtuk:
"Mutalijket ne chinamit takwat wan atit wan muketzket mawiltiat."
8 Nusan te titatzinhejenchiwakan ken sejse yejemet kichijket wan tik se tunal wetzket veintitres mil. 9 Nusan te tikejekukan ne Mawaltijtuk ken sejse yejemet kiejekujket wan kujkuat kinwilewat katka. 10 Nusan maka shikikinakakan ken tikmatit ka sejse yejemet kikinakaket wan ne tawilewani kinwilej.
11 Muchi uni panuk inwan ken se ejemploj. Muijkwiluj pal technawatia tejemet ken ká ne itamilis ne taltikpak ajsituk tutech. 12 Yajika, ká ina ka yaja naka ejkatuk, ma kitali cuidadoj ma te yawi wetzi!
13 Nian se taejekulis metzinhitzkijtuk sute tay ipal takamet. Yek ne Teut, wan semaya yawi kiajkawa ma metzinhejeku ne tay anwelit, wan yawi kichiwa iwan ne taejekulis nusan ne ujti kan welit anchuluat pal ankiseliat.
14 Neka nina, nukunpawan yektasujtatuk: shinakakan wejka ne teutzintankwaketzalis. 15 Nimetzinhilwia ken sejse kimatit tay muneki muchiwa: shiyultaketzakan anmejemet tay nina. 16 Ne atiluni ipal ne teteuchiwalis ne tikteuchiwat, te ankimatit ka yaja ne tasentepewalis ipal ne iesyu ne Mawaltijtuk? Ne tamal ne tikpitzakuat, te ankimatit ka yaja ne tasentepewalis ipal ne iweyka ne Mawaltijtuk? 17 Melka timijmiak, tejemet sanse tamal, sanse tuweyka, ika muchi tikwat sanse tamal.
18 Shikita ne Israel tik iweyka: anka yejemet te ká ne kikwat ne tejtetakulis ipal ne tikashit? 19 Tay nina tel? Ka se takulijtuk ipal ne teujteutzitzin kineki ina se? Ka se teutzin kineki ina se? 20 Tesu, naja nina ka tay ne kitakuliat, ipal nawalmet wan tesu ipal Teut. Te nikneki ma shimusentepewakan iwan nawalmet. 21 Te anwelit atit tik ne iatiluni ne Tajtzin wan tik ne iatiluni ne nawalmet. Te anwelit takwat itech ne imesaj ne Tajtzin wan itech ne imesaj ne nawalmet. 22 Anka tikwalantiat ne Tajtzin? Anka tejemet mas tajtajpaltik que yaja?
23 Tiwelit muchi; melka uni, te muchi yek. Tiwelit muchi; melka uni, te muchi techketza. 24 Ma te aka kitemu tay yek ipal, sute sejse ma kitemu tay yek tepal.
25 Shikuakan wan shikwakan tay nemi ka tiankis; maka shitajtanikan tatka ipanpa ne tasenmatilis, 26 ika ipal ne Tajtzin ne tal, wan ipal ne itepewilis.
27 Su se ká te tayulmati metzinnutza pal ansentakwat wan su ankinekit ajsit ichan, shikwakan muchi tay metzintaliliat wan maka shitajtanikan ipanpa tasenmatilis. 28 Su metzinhilwia ajaka: "Ini takwal mutakulij ka teupan", maka shikwakan, ka imaku yajane ká taneshtij wan ipanpa ne tasenmatilis: 29 tesu nikneki nina mutasenmatilis sute ne itasenmatilis ne seuk; ika taika te niweli nikchiwa tay nikneki ipanpa tay ina ne itasenmatilis seuk? 30 Su naja nina panpadiush ipanpa tay ne nikwa, taika kukujtaketzat ipanpa ne tay ipanpa ninatuk panpadiush?
31 Yajika, kwak antakwat, kwak anhatit wan kwak ankichiwat muchi, shikchiwakan pal inat ka wey ne Teut. 32 Shimuwikakan ken yek iwan Yudayujmet wan Greciajtakamet kenha, wan nusan iwan ne sennemit ipal Teut, 33 ijkiunisan ken naja nikchiwa muchi tay muchi kitat yek, tesu pal niktemua tay yek nupal sute ipal muchi, ma mumakishtikan.
11 Shimuchiwakan ken naja, ijkiunisan ken naja nimuchiwa ken ne Mawaltijtuk.
Takamet wan siwatket
2 Yek ankichijtiwit, ika ankielnamikit muchi tay nupal, wan ankichiwat muchi ijkiunisan ken nimetzinhilwij.
3 Nikneki ma shikmatikan ka ne Mawaltijtuk kitekimaka muchi ne takamet; ne takat kitekimaka isiwaw; ne Teut kitekimaka ne Mawaltijtuk. 4 Su se takat kitajtani Teut o tanutza ipal Teut tzuntzaktuk, kichiwa se pal ishpinawa ne itzuntekun. 5 Su se siwat kitajtani Teut o tanutza ipal Teut wan te nemi tzuntzaktuk, kichiwa se pal ishpinawa ne itzuntekun ika kenha ken su yaja mushintuskia, 6 ika su te mutzuntzakwa se siwat, ma mutzunshima nusan. Su se siwat nemi pal ishpinawa su mutzunshima, ma mutzuntzakwa.
7 Te yek ma mutzuntzakwa se ukich ika yaja ne itachialis wan ne itzitzinakalis ne Teut. Ne siwat, yaja ne itzitzinakalis wey ne ishulejyu, 8 ika te kiski ukich itech siwat sute siwat itech ukich, 9 wan ika ne Teut te kiketzki se ukich ipanpa ne siwat, sute se siwat ipanpa ne ukich. 10 Yajika ne siwat nemi pal kipia tatuktilis ijpak ne itzuntekun ipanpa ne tanawatianimet. 11 Melka uni, te kanaj siwat su te kanaj ukich, nian nemi se ukich su te nemi se siwat, tik ne Tajtzin, 12 ika ijkiunisan ken ne siwat kiski itech ne ukich, ijkiuni nusan ne ukich nemi ipanpa ne siwat, wan muchi kistuk itech ne Teut.
13 Ijtik anmejemet tay anhinat? Nemi yek ma kinutza ne Teut se siwat ká te mutzuntzakwa? 14 Hasta ne naturalezaj metzinmachtia ka su se takat kipia weyak itzunkal, tesu yek, 15 wan su se siwat kipia weyak itzunkal, muchi inat ka yek ika yaja kipia ne itzunkal ken tzuntzakka. 16 Su muita se ka kineki tasuma, tejemet te tikchiwat ijkiuni ijtik tejemet nian tik ne isejsennemit ne Teut.
Kwak anmusentepewat pal sentakwat
17 Tik ne tay niaw nitatuktia ashan, te nina ka ankichijtiwit tay yek: kwak anmusentepewat, te yek ankichiwat sute teyek. 18 Pal tipewat, nitakaki ka kwak anmusentepewat tik ne sennemit anmutakutuntiat, wan nina ka achi tejkia, 19 ika nusan muneki ma muchiwakan sejse sectaj anmutzalan pal kiane yawi muita ká ne muitat yek ijtik anmejemet.
20 Yajika, kwak anmusentepewat pal sentakwat, te pal antakwat tik ne iyualu ne Tajtzin: 21 su sejse kitzkia tay ipal pal kikwa wan ne se mayana wan ne seuk tawana! 22 Anmukajkal te ankipiat pal takwat wan atit? Ankijilwiat ne isennemit ne Teut wan ankinekit ma ishpinawakan ne te kipiat? Tay niaw nimetzinhilwia? Niaw nina ka nemi yek? Te nina.
23 Naja nimumachtijtuk itech ne Tajtzin ne tay nusan nimetzinmachtijtuk, ka ne tajtzin Yeshu, tik ne tayua kan mutemakak, kikwij se tamal 24 wan kiteuchij wan kipitzakuj wan inak:
"Ini ne nuweyka ne anmupatka. Shikchiwakan ini pal annechelnamikit."
25 Nusan kikwij ne atiluni kwak tamik takwa wan inak:
"Ini atiluni ne yankwik sentaketzat tik ne nuesyu; shikchiwakan ini, senpa kwak anhatit, pal annechelnamikit."
26 Ika senpa kwak ankikwat ini tamal wan anhatit tik ini atiluni, ankinawatiat ne imikilis ne Tajtzin hasta ma wiki.
27 Yajika, ká ne kikwa ne tamal wan ati tik ne iatiluni ne Tajtzin, su yaja te kichiwa ken yek, kipia culpaj ipanpa ne iweyka wan ne iesyu ne Tajtzin. 28 Ma tachia se ken yajasan wan ijkiuni ma kikwa ne tamal wan ma ati tik ne atiluni, 29 ika ká ne takwa wan ati wan te kimati ka yaja ne iweyka, yaja kikwa wan kiuni ne tay yawit kichiwa juzgar. 30 Neka ijtik anmejemet miak ankukuyat wan miak nusan miktiwit. 31 Su timuchiwaskiat juzgar tejemetsan, tesu techchiwaskiat juzgar. 32 Ne Tajtzin techchiwa juzgar wan timuwitekit pal kiane te yawit inat ka te tiyejyek iwan muchi ne taltikpak.
33 Yajika nukniwan, kwak anmusentepewat pal sentakwat, shimuchiakan. 34 Su aka mayana, ma takwa ka ichan, pal te anmusentepewat ma shimuchiwakan juzgar. Ne sejseuk nitatuktis kwak niajsi.
Ne Bibliaj Tik Nawat · © 2008, 2012 Jan Morrow