Chronological
1 Naja, Pawlo, ititanijtuk ne Mawaltijtuk Yeshu ipanpa itaelewilis Teut, wan ne tuiknew Timoteo, 2 tiktuktiat ini tajkwilul itech ne tukniwan tik Kolosay ne kiyulmatit ne Mawaltijtuk Yeshu. Ma metzinmaka ne Teut, ká ne tuteku, tetasujtalis wan nejmachnemilis.
3 Tikilwiat padiush ne Teut ká ne iteku ne tutajtzin Yeshu Mawaltijtuk, wan senpa tiktajtanit ne Teut ka anmumaku. 4 Titakaktiwit ken ankiyulmatit ne Mawaltijtuk Yeshu wan ankipiat tetasujtalis ipal muchi ne tayulmatit 5 ipanpa ne anmutejchialis ne muantuk anmupal tik ne ilwikak, ken antakaktiwita tik ne palabraj yekkaya ipal ne yeknawatilis, 6 ne ajsituk tik anmutakakilis, kenha ken nujme takiltamaka, wan weya ken nusan anmutzalan pejki weya kwak antakakket wan ankishmatket ne itetasujtalis ne Teut tik tejkia. 7 Ijkiuni anmumachtijket itech Epapras, ne tusentekitini yektasujtatuk ká tekiti iwan tayulmatilis ipal ne Mawaltijtuk ka anmumaku, 8 wan ká nusan techneshtilijtuk ne anmutetasujtalis tik ne Ijiutzin.
9 Yajika tejemet nusan, tik ne tunal kwak titakakket anmupanpa, tipejket tiktajtanit ne Teut ka anmumaku ma shitemikan iwan taishmatilis ipal ne itaelewilis wan ma shikpiakan muchi ijiumatilis, 10 pal kiane anmuwikat ken kineki ne Tajtzin wan ankimakat tay igustoj, wan antakiltamakat tik muchi anmutekiw yek, wan anweyat tik taishmatilis ipal Teut. 11 Ma shichikawayakan tik muchi ipanpa ne itajpal tzitzinaka, pal antejchiat nejnejmach iwan pakilis.
Takwikalis
12 Shikilwikan padiush ne Teteku ká kichijtuk ka welit ankipiat ne anmutakutun ipal tay yawi ipal ne tayulmatit tik ne tawil. 13 Yaja techishtijtuk ijtik ne itatuktilis ne takumi, wan techpanultijtuk tik ne itatekimakalis ne itelpuch yektasujtatuk. 14 Ijtik yaja tikpiat ne tamakishtilis; yajaya kitapupulwia tay titateyekchijtiwit:
15 Yaja n' itachialis
ne ká inte weli muita,
wan ne achtupunijtuk
ipal muchi tay muchijtuk.
16 Ika ipanpa muchijki muchi
tik ilwikak wan pak tal,
tay weli muita wan tay inte:
ne kujkuijpal, tajtajtzinkayu,
wan muchi ne tajtatuktilis:
muchi muchijki ipanpa,
muchi ka imaku.
17 Wan yaja nemi ne achtu,
wan muchi nemit ipanpa,
18 wan yaja n' itzuntekun
ne tuweyka, ne sennemit.
Iwan pewa, achtupunijtuk
ijtik ne miktiwit,
pal yaja kipia achtukayu
ijtik muchi;
19 ika ijtik yaja kiwelitak
ma muchanti muchi yekawilis,
20 wan ma musenputzu muchi
ipanpa, ka imaku,
wan ma kalwika nejmachnemilis
iwan n' iesyu tik ne cruz
pak ne tal wan tik ne ilwikak.
Ne itekitilis Pawlo
21 Wan anmejemet ká ikman te ankishmatit wan ankisumat katka tik anmuyulu ipanpa anmutekiw teyek, 22 ashan anmusenputzujtiwit tik ne iweyka itech ne mikilis pal anmuishpanuat ken sejse tayulmatit ká te kipiat nian se ipelech wan te kichijtiwit tatka tay teyek tik itachialis, 23 asu annakat iwan tayulmatilis, wan ankipiat tetzilnaj wan anchikawayat wan te ankiajkawat ne tejchialis ipal ne yeknawatilis ne ankikaktiwit, ne munajnawatij ijtik muchi ká muchijtiwit itan ne ilwikak, wan ijkiuni naja Pawlo nimuchijtuk tekitini.
24 Ashan nipaki ipanpa ne tajtaekulis anmumaku wan nipanu ne ujuijkayu ne munekit ipal ne Mawaltijtuk tik nuweyka ka imaku ne iweyka: yaja ne Sennemit. 25 Wan naja nimuchijtuk itekitini ipanpa ne ikaltajpialis ne Teut ne nechmakak anmupal pal yekawi ne ipalabraj ne Teut, 26 ne ichtaka ne minashki kwak pejki muchi wan tukniwan pejket muchiwat, wan ashan muneshtijtuk ipal ne tayulmatit. 27 Ne Teut kinekik kinneshtilia ken wey ne itawilyu ini ichtaka ijtik ne tejtechan: yaja ne Mawaltijtuk ijtik anmejemet, ne tejchialis ipal ne itawilyu. 28 Tejemet tiknawatiat, tiknawatiat ipal muchi ne takamet wan tikmachtiat muchi ne takamet iwan muchi ne tamatilis, pal tikishpanuat muchi ne takamet ken muneki ijtik ne Mawaltijtuk. 29 Nusan nikujkutia yajika: nimutatejtemuilia pal nikchiwa ne itekiw ne kichiwa ijtik naja iwan itajpal.
2 Ika nikneki ma shikmatikan keski tasumalis nikpia anmupanpa wan ipanpa ne tukniwan ipal Laodikea wan sejseuk ká te kitztiwit ne nuishkalyu, 2 pal muyulpaktiat, sejsenputzujtuk ijtik tetasujtalis wan ijtik muchi tay tikpiat kwak tikmatit ne yekkaya, pal muishmati ne ichtaka ipal ne Teut Mawaltijtuk. 3 Ijtik yaja nemit muchi ne chajchalchiwit ipal ne tamatilis wan taishmatilis mijminashtuk. 4 Ini nina pal te aka metzinshijshikua iwan inpajpalabraj, 5 ika melka te ninemi iwan nuweyka, iwan nuijiu ninemi anmutech wan nipaki nikita ken annemit wan ken chikawaya ne anmutayulmatilis ipal ne Mawaltijtuk.
6 Yajika, kenha ken ankikwijtiwit ne Mawaltijtuk Yeshu, ne Tajtzin, ijkiuni shinejnemikan ijtik Yaja. 7 Shikpiakan anmunelwayu ijtik Yaja, wan shimukejketzakan ijpak Yaja, wan ma wey anmutayulmatilis, ken metzinmachtijtiwit, wan shitamakakan panpadiush wey.
8 Shiktalikan cuidadoj ma inte aka metzinhitzki iwan ne tamatilis wan tashijshikulis te tatka ipatiw, ne kistuk itech tay ne inat katka ne takamet wan tay ne nemi tik ne taltikpak, wan te itech ne Mawaltijtuk, 9 ika ijtik Yaja muchantia muchi ne yekawilis ipal ne Teukayu ken se kipia iweyka; 10 wan shimuchiwakan yejyekawtuk tik Yaja ká ne itzuntekun ipal muchi ne tajtajtuli wan muchi ne tatuktilis. 11 Anmejemet nusan anmuyawaltektiwit ijtik Yaja iwan ne tayawaltekilis ne inte techishtiliat itech ne inakayu ne tuweyka iwan ijimey se sute iwan ne itayawaltekilis ne Mawaltijtuk. 12 Anmusentalpachujtiwit iwan Yaja tik ne teulyujmakalis, wan ijkiuni nusan anmusenyulkwijtiwit ika ankiyulmatit ne itekitilis ne Teut ne kiyulkwiltij kwak miktuk. 13 Wan anmejemet ká miktuyat ipanpa tay ankichijtiwit tay teyek wan ne anmutzuntepul ipal ne anmunakayu, Yaja metzinyulkweptuk iwan wan kitapupulwijtuk muchi tay ankichijtiwit. 14 Kipulujtuk ne tay mutuktij wan mujkwiluj anmupal tay teyek wan kishtij uni tatajku wan kitepustukak tik ne cruz. 15 Kipetztilijtuk ne tatuktianimet wan ne tatekimakat, ken muchi kimatket wan tajtaketzket ipanpa, wan ijkiuni kipishki victoriaj inhijpak.
16 Yajika, ma te aka metzintenewa ipanpa tay ankikwat nian tay ankiunit nian ipanpa se ilwit nian ne Selekmetzti nian ne tunal ipal sewilis. 17 Muchi uni iekawyu ne musta, ne iweyka ne Mawaltijtuk. 18 Ma te aka metzinhishtili anmupatiw ká kineki mutalia iwan kanawakmatilis wan tayulmatilis ipal tanawatianimet ne kinhitztuk pashaluat: ne tamatilis ipal inakayu kishpitza iwan te-tatka, 19 wan te weli kipachua ne itzuntekun, wan muchi ne iweyka kishtia itakwal wan nemi piktuk itech ne itzuntekun iwan ne tajtakutun ijilpituk, wan weya ken weya ne Teut. 20 Su anmiktiwit iwan ne Mawaltijtuk ipal muchi tay ipal ne taltikpak, taika anmutuktiat ken su yujyultuk tik ne taltikpak: 21 maka shitzinkisa, maka shikejeku, maka shikmatuka? 22 Muchi uni nemi pal puliwi ken mukwi ken inat ne intajtatuktilis wan intajtamachtilis ne takamet. 23 Melka yajuni muita ken kipiaskia tamatilis ipanpa tayulmatilis wan kanawakmatilis wan ika takwawak ipal ne iweyka, tesu tatka ipatiw wan sema ne tunakayu ishwi.
3 Yajika, su anmusenyulkwiltijtiwit iwan ne Mawaltijtuk, shiktemukan ne tay ipal ne ajku kan ne Mawaltijtuk nemi muetztuk ka imayekkan ne Teut. 2 Shikishkejketzakan tay ipal ne ajku, tesu tay ipal ne taltikpak, 3 ika anmiktiwit wan ne anmunemilis minashtuk inawak ne Mawaltijtuk itech ne Teut. 4 Kwak ne Mawaltijtuk yawi muneshtia, yaja kwak anyawit yujyultuk; kwakuni anmejemet nusan yawit muneshtiat tzitzinakat.
5 Yajika, shikpulukan ne tajtakutun ipal ne taltikpak: tatzinhejenchiwalis, susulkayu, tanekilis, taelewilis teyek, wan taelewilis ipal tay tepal, yaja teutzintankwaketzalis. 6 Ipanpa muchi ini witz ne ikwalan ne Teut. 7 Nusan anmejemet niakeman annejnentiwit kwak anyujyultuk katka ijkiuni. 8 Ashan shiktamimakanha muchi, anmejemet nusan: kwalan, inteyek, kukujtaketzalis, muchi pal tishpinawat tay kisa itech anmuten. 9 Maka shimuilwikan sajsanka, ika ankishtijtiwita ne takat ne achtu nemituya iwan muchi tay yaja kichiwa katka 10 wan ankitalijtiwit ne yankwik, ká yankwikisa tik taishmatilis ken itachialis ne ká kichijki, 11 kan ne tesu kanaj Greciajtakat wan Yudayuj, yawaltektuk wan tzuntepul, Indioj, ejkuni, tepaltekitini, isel itekuyu, sute muchi ne Mawaltijtuk wan tik muchi.
12 Shimutakentikan tel, ken tayulmatinit ijishpejpentuk ipal ne Teut wan tajtasujtatuk, iwan yulkukulis ipal taeknelilis, yek, kanawakmatilis, yulyamanikayu, weytejchialis, 13 wan shimuselikan ne se iwan ne seuk, wan shimutapupulwikan su aka kipia se taika kiajwaskia se, ijkiunisan ken nusan ne Tajtzin metzintapupulwijtuk, anmejemet kenha. 14 Wan ijpak muchi ini, ne tetasujtalis: yaja iilpika ne yekawilis. 15 Wan ne inejmachnemilis ne Mawaltijtuk ma tatukti ijtik anmuyujyulu. Yajika nusan anmunutztiwit pal anmuchiwat ken sanse anmuweyka, wan shipajpakikan.
16 Ma nemi ijtik anmejemet ne ipalabraj ne Mawaltijtuk iwan muchi ne tamatilis; shitamachtikan wan shimunawatikan ne se iwan ne seuk iwan sajsalmoj wan tajtakwikalis ipal ne Teut; shitakwikakan iwan tetasujtalis ijtik anmuyujyulu ipal ne Teut. 17 Wan muchi tay anhinat wan ankichiwat, shinakan wan shikchiwakan muchi uni tik itukay ne Tajtzin Yeshu wan shikilwikan panpadiush ne Teut tuteku ipanpa.
18 Ne siwatket: shikintakamatikan ne anmushujshulejyu ken muneki ipal ne Tajtzin.
19 Ne takamet: shikintasujtakan ne anmusiwawan wan maka shikinhajwakan sujsul.
20 Ne kukunet: shikintakamatikan ne anmutejteku ijtik muchi, ika uni ajwiak ipal ne Tajtzin.
21 Ne tetejteku: maka shikwalanikan inwan ne anmukukunew pal te kipuluat intaelewilis.
22 Ne tepaltekitinimet: shikintakamatikan ne ká anmutejtekuyu ipal anmuweyka, wan maka shitekitikan sema pal metzinhitat ken kichiwa ne ká kineki ma kitakan yek ne sekit, sute shimuchiwakan yujyulkanawak wan shiktakamatikan ne Tajtzin, 23 ika ne tay ankichiwat iwan muchi anmuyulu, ankichiwat ken ipal ne Tajtzin wan tesu ipal takamet, 24 wan ankimatit ka ne Tajtzin yawi metzintashtawia. Shitekitikan ipal ne Tajtzin Mawaltijtuk!
25 Ká ne kichiwa tay te yek, yawi kikwi kenha, wan uni kenha ipal muchi.
4 Ne tetejtekuyu: shikinmakakan ne tekitinimet ne tay yek wan ne tay muneki ika ankimatit ka anmejemet nusan kipiat Tajtzin ka ikajku.
Tami
2 Shimutalikan kitajtanit ne Teut wan kwak ankichiwat shikishpelwikan iwan panpadiush, 3 wan shiktajtanikan ne Teut ka numaku kenhaya, pal ne Teut techtapuili ne tentzakka ipal ne palabraj ma tinakan ne ichtaka ipal ne Mawaltijtuk, ka tejemet nusan timuilpijtiwit itech uni ichtaka, 4 pal nitaneshtia ken muneki ma nitanutza.
5 Shimuwikakan iwan tamatilis iishpan ká ne nemit tatenpan, wan maka shikpulukan ne tiempoj. 6 Shitaketzakan senpa iwan tetasujtalis wan pajpalabraj ajwiak, pal ankimatit ken muneki ma shinankilikan ipal sejse.
7 Tukikos yawi metzinhilwia ken ijtuk nuwan. Yaja ne tuiknew tasujtatuk wan se yek tekitini wan sentekitini tik ne Tajtzin. 8 Niktuktijtuk anmutech pal kichiwa kenha, pal ankimatit ken ijtuk tuwan wan pal mupalewiat ne anmuyujyulu, 9 iwan Onesimos, tuiknew yek wan tasujtatuk, ká ne se anmejemet. Yawit metzinneshtiliat muchi tay muchiwa ka nikan.
10 Metzintajpalua Aristarkos, ká nuwan nemi ilpituk, wan Marcus ne iiknew Bar-Naba; ipanpa yajuni ankikwijtiwit tatuktilis, su ajsi anmutech shikwikan; 11 wan Yeshu ne itukay Yustus. Yejemet insel, ká yajyawaltektuk, sentekitinimet ipal ne itatekimakalis ne Teut wan muchijtiwit nutejtepalewiani. 12 Metzintajpalua Epapras, se anmejemet ká itekitini ne Mawaltijtuk Yeshu. Senpa mutatejtemuilia anmumaku kwak kitajtani ne Teut, ma shinakakan yejyek wan yejyekawtuk ijtik muchi tay kineki ne Teut. 13 Niweli nimetzinhilwia ka yaja muejekua sujsul ka anmumaku wan ka inmaku ne tukniwan tik Laodikea wan tik Yerapolis. 14 Metzintajpalua Lukas ne tapajtiani tasujtatuk, wan Demas.
15 Shiktajpalukan ne tukniwan tik Laodikea, wan Numpas wan ne sennemit ka ichan. 16 Wan kwak tamit ankitat ne tajkwilul, shikchiwakan ma muita tik ne sennemit ipal Laodikea nusan, wan ne tajkwilul kisa tik Laodikea nusan ma shikitakan anmejemet. 17 Wan shikilwikan Arkipos: "Shiktalili cuidadoj ne tekitilis ne tikwijtuk ipanpa ne Tajtzin pal tiu-tikchiwa yek."
18 Naja Pawlo nikijkwilua ini iwan ne numey pal nimetzintajpalua. Shikelnamikikan ne nuijilpika. Ma nemi ne teutasujtalis anmuwan.
1 Naja, Pawlo, ilpituk ipal ne Mawaltijtuk Yeshu, wan ne tuiknew Timoteo, tiktuktiat ini tajkwilul itech Pilemon tutepalewiani yektasujtatuk, 2 wan tueltiw Apia, wan ne tukunpalej tasumani Arkipos, wan ne sennemit ijtik mukal. 3 Ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.
4 Nikmaka padiush wan senpa nimetzelnamiki kwak niteutajtani. 5 Nitakaki ken taja tiktasujta wan tikyulmati ne tajtzin Yeshu wan muchi ne tayulmatit, 6 wan ken ne tasentepewalis ipal ne mutayulmatilis tekiti iwan taishmatilis ipal muchi tay yek, tay ne nemi ijtik tejemet ipanpa ne Mawaltijtuk. 7 Ika sujsul nipakik wan nimupalewij ipanpa ne mutetasujtalis, ika taja tikchijtuk ka tea kikukua iyulu ne tayulmatit, nuiknew!
8 Ipanpa uni, melka niweliskia nimetztuktia melaknaj ipanpa ne Mawaltijtuk ne tay muneki, 9 mas yek nimutajtawelia ipanpa tetasujtalis naja, Pawlo, ká chuleta, wan ashan nusan ilpituk ipal ne Mawaltijtuk Yeshu.
10 Nimutajtawelia muwan pal tikpalewia ne nukunew ká nikpishtuk tik ijilpika: Onesimos. 11 Melka achtu yaja te metzpalewij, ashan yawi techpalewia taja wan naja. 12 Niktuktijtuk mutech, yaja ká sujsul nikneki.
13 Melka naja niknektuskia nikilwia ma naka nutech pal nechpalewia ka mupatka nikan tik ne ijilpika ipal ne yeknawatilis, 14 te niknekik nikchiwa tatka su te tinatuya ka yek, pal ma te shinechchiwili se tay yek ipanpa munekilis sute ipanpa taelewilis. 15 Ika ká kimati su yaja metzajkaw achi tunal sema pal kiane ma shikpiaya pal senpa, 16 tea ken tekitini, sute mas que se tekitini, ken se muikaw yektasujtatuk, ika su nupal ijkiuni, mupal keski mas, tik iweyka wan nusan tik ne Tajtzin!
17 Yajika, su tinechpia ken mukunpa, yaja shikwi ken naja tinechkwiskia. 18 Su metzchiwilijtuk se tay te yek o metzwikilia, shikpua ken nujaranaj. 19 Naja, Pawlo, nitajkwiluj iwan ne numey. Naja nimetzkwepilis, wan te niaw nimetzilwia ka taja nusan tinechwikilia. 20 Ijkiasan, nuiknew! Ma nimetztajtanili ini tik itukay ne Tajtzin; shiksewi nuyulu ipanpa ne Mawaltijtuk.
21 Nikmatiaya ka tiaw tinechtakamati, yajika nitajkwilujtuk mupal wan nina ka tiaw tikchiwa tay nimetzilwia.
22 Wan shinechajshitili se kan niweli ninaka, ika nitejchia ka su niktajtani ne Teut yawit nechtemakat anmuwan.
23 Metztajpalua Epapras ká iwan ninentuk ilpituk ipanpa ne Mawaltijtuk Yeshu, 24 Marcus, Aristarkos, Demas, Lukas, nutejtepalewiani.
25 Ma nemi ne teutasujtalis ipal Yeshu Mawaltijtuk iwan anmuijiu.
Ne Bibliaj Tik Nawat · © 2008, 2012 Jan Morrow