Chronological
1 Naja, Pawlo, ititanijtuk ne Mawaltijtuk Yeshu ipanpa intatuktilis Teut tutamakishtiani wan ne Mawaltijtuk Yeshu tutejchialis, 2 niktuktia ini tajkwilul itech Timoteo nukunew yekkaya tik tayulmatilis. Ma metzinmakakan ne Teut tuteku wan ne Mawaltijtuk Yeshu tutajtzin tetasujtalis, tepalewilis wan nejmachnemilis.
3 Ijkiunisan ken nimetztajtan kwak niajki Macedonia, ma shinaka tik Epesos pal tikintuktia sejse ma inte tamachtikan te kenha, 4 ma inte kitalilikan cuidadoj cuejcuentoj wan ma inte nakakan kikejketzat ká ne itatanoy se wan ne inoya seuk. Kitaliat achtu tajtajtanilis kiane, wan tesu tajpiat tay ipal Teut iwan tayulmatilis. 5 Ne tamilis ipal ne tatuktilis, yaja tetasujtalis ne kisa itech tuyujyulu yek wan tasenmatilis ipal tay yek wan tayulmatilis yekkaya. 6 Sejse kiajkawtiwit ne ujti, muishkweptiwit wan tanutzat tay te tatka; 7 kinekit muchiwat tajtultamachtianimet, wan te kimatit nian tay inat nian tay ipanpa tajtaketzat.
8 Tikmatit ka yek ne tajtuli asu mukwi ken muneki 9 wan su tikmatit ka ne tajtuli te nemi ipal ne yujyulmelawak sute ipal ne tateyekchiwat, ne te tetakamatit, ne te kitasujtat ne Teut, ne te yujyulchipawak, ne kichiwat tay te muneki, ne tekumiktianimet wan nanmiktianimet wan iknichaluanimet, 10 tatzinhejenchiwanimet, ukichsenkuchinimet, takaichtekinimet, sankataketzat, tashijshikuat, wan su nemit sejseuk tay te ipal yek tamachtilis, 11 ken ina ne yeknawatilis tzitzinaka ipal ne Teut tasujtatuk ne nechmakatiwit pal nitajpia.
12 Nikilwia panpadiush ne Mawaltijtuk Yeshu tutajtzin ká nechmakatuk nutajpal ika nechmatki yek wan nechmakak tekitilis 13 naja, ká katka se kukujtaketza wan se tetalultiani wan se teijilwiani; melka uni nimupalewij ika keman nikchijki te nikmati tatka nian nikpiatuya tayulmatilis. 14 Sujsul tepewik ne itetasujtalis ne Tutajtzin iwan tayulmatilis wan tetasujtalis ne ijtik ne Mawaltijtuk Yeshu.
15 Tejkia wan nemi pal muchi tikmatit ka walaj ne Mawaltijtuk Yeshu hasta ne taltikpak ma kinpalewi tateyekchiwanit, wan naja mas que ajaka, 16 wan yajika nimupalewij, pal kiane ne Mawaltijtuk Yeshu weli tailwitia keski tejchia, pal kimatit muchi ká kinekiskiat kiyulmatit ma yujyultuk senpa.
17 Ne Teut, ne tatuktiani ipal senpa, ne inte wilewi, inte muita, isel nemi, ma kipia honor wan ma inakan ka yaja wey senpa wan senpa. Amen.
18 Ini tatuktilis nimetztalilia, nukunew Timoteo, ipanpa ne teujteutaketzalis ne yajket muishpan, ma shitasuma inwan tik ne yek tasumalis; 19 ma shikpia tayulmatilis wan se yek tasenmatilis. Sejse kiajkawtiwit yajini wan pulijtuk ne barcoj ipal ne tayulmatilis, 20 wan ijtik yejemet nemi Humenayos wan Aleksandro, ká nikintemakatuk iwan ne Tenewani ma mumachtikan pal te kukujtaketzat.
Ken nemi pal muwika ne Sennemit
2 Achtu tel nitajtani ma muchi mutajtawelikan, ma kitajtanikan ne Teut, ma kilwikan panpadiush, ka inmaku muchi ne takamet: 2 ka inmaku tatuktianimet wan muchi ká wejwey, ma tiwelikan tinejmachnemit wan tinemit yek wan tiyujyultuk yek. 3 Uni kita yek wan ken muneki ne Teut tutamakishtiani, 4 ká kineki ma mupalewikan muchi ne takamet wan ma ajsikan kishmatit ne tejkia; 5 ika Teut nemi sesan wan sanse tajkutaketzani itzalan Teut wan takamet: se takat, ne Mawaltijtuk Yeshu, 6 ne mutemakak ipatka muchi, ken yawi inat kwak ajsi ne tunal. 7 Wan naja yajika nechtalijtuk ken tanawatiani wan titanijtuk. Nina tay tejkia, tesu nina sanka. Nitamachtiani ipal tejtechan ijtik tayulmatilis wan tejkia.
8 Yajika, nikneki ma kitajtanikan ne Teut nujme, ma kiajkukikan inmejmey chipawak wan ma te aka kwalani wan ma te aka mutajtanili. 9 Wan kenha, ma muekchiwakan siwatket nusan iwan inkwajkwach ken muneki, iwan pinawalis wan tamatilis, tesu iwan tajtajkwil wan tumin wan kujkusti wan ikwajkwach wey ipatiw, 10 sute ken munekit siwatket ká inat ka kitasujtat ne Teut: iwan intekiw yektzin.
11 Ne siwat ma mumachti takaktuk wan iwan tetakamatilis. 12 Se siwat te nikajkawa tamachtia nian kituktia se takat, sute ma nemi takaktuk. 13 Ika achtu muchijki Adam, tipan Jawa, 14 wan Adam te mushijshikuj: mushijshikuj ne siwat wan kichijki tay te yek. 15 Yawi mupalewia ika tapunia, asu nakat iwan tayulmatilis wan tetasujtalis wan tateuchiwalis ken muneki.
Ne weymet ipal ne Sennemit
3 Tejkia ka su aka kineki muchiwa tapachiwiani, kielewia itekiw yek. 2 Yajika tel, ne tapachiwiani muneki ma yaja se ká te aka weli kijilwia tatka; ishulejyu sanse isiwaw; kiuni chiupi; kipia itzuntekun yek; mutakentia ken muneki; muwika yek iwan ne ejkunimet; wan weli tamachtia. 3 Ma inte tawanani nian tasumani, sute yulyamanik; ma inte musuma; ma inte kitasujta ne tumin. 4 Se ká tatuktia yek tik ne ikal; se kipia ipilawan ká kitakamatit tik muchi ken muneki. 5 Asu se te weli tatuktia tik ne ikal, ken yawi tajpia ne sennemit ipal ne Teut? 6 Tesu se yankwik ne pejki tayulmati yewa, ika weli tzunsuluni wan wetzi tik imey ne Tamintuk. 7 Nusan muneki ma kitakan yek ne sejseuk ne tatenpan pal te yawit kilwiat tatka, wan yawi wetzi tik itajpewal ne Tamintuk.
8 Wan ne tekitinimet ipal ne Sennemit kenhaya: ma inakan tay muneki, ma te kipiakan ume innenepil, ma te ingustoj sujsul ne atata, ma te tuminhishtemuanimet. 9 Ma tajpiakan ne ichtaka ipal ne tayulmatilis iwan chipawak tasenmatilis. 10 Achtu, ma muejekukan yejemet, wan tipan ma tekitikan su te kichijtiwit tatka tay teyek.
11 Ne siwatket kenhaya: ma taketzakan ken muneki, ma te tatenewat; ma kiunikan chiupi wan ma tayulmatikan ijtik muchi.
12 Ne tekitinimet ma yejemet ishujshulejyu sanse isiwaw wan ma tatuktikan yek ijpak inpilawan wan tik ne inkal, 13 ika ká ne tekittiwit yek kipiasket se yek nivel wan wey melaknajyu tik tayulmatilis ipal ne Mawaltijtuk Yeshu.
14 Nitajkwilua pal nimetzilwia ini kwak nikmati ka niaw niajsi mutech talul, 15 wan su nishtuna, pal tikmati ken muneki ma timuwikakan ijtik ikal Teut. Yaja iteupan ne Teut Yultuk: ne taketzal wan ne tetzilnaj ipal ne tejkia. 16 Muchi tikmatit ka wey ne ichtaka ipal ne tay yek. Yaja muneshtij tik inakayu; kilwitij ka yek tik iijiu; tanawatianimet kitaket; munajnawatij ijtik tejtechan; muyulmatki ijtik taltikpak; mukwij tik tzitzinakalis.
Ne tajpialis ipal ne tejkia tik ne Sennemit
4 Ne Ijiutzin ina melaknaj ka tik ne tijtipan tunal, sejse yawit kiajkawat ne tayulmatilis, wan yawit kikejketzat najnawal tashijshikuat wan tajtamachtilis ipal najnawal teyek 2 ne tashijshikuat wan inat sajsanka. Ne intasenmatilis muchichinujtuk. 3 Inat ma te timunamiktikan; ma te tikwakan tajtakwal ne kichijtuk ne Teut pal tikwikan wan pal tinat panpadiush tejemet ká titayulmatit wan tikmatit ne tejkia, 4 ika muchi tay kichijki Teut yaja yek, wan te nemi pal tinat inte tiknekit su tinatiwit panpadiush kwak tikwit, 5 ika muteuchiwa iwan ipalabraj Teut wan teutajtanilis.
6 Su tikinhelnamiktilia ini ne tukniwan, tiaw tiyek tekitini ipal ne Mawaltijtuk Yeshu, iskalijtuk tik ne pajpalabraj ipal tayulmatilis wan ne yek tamachtilis ne tiktakamattuk. 7 Maka shikaki ne cuejcuentoj te tatka ipatiw ipal lamatket. Shimuejeku pal shimuchiwa yek, 8 ika ne muejekulis ipal ne tuweyka techpalewia chiupi, wan su timuwikat yek, uni kia techpalewia pal muchi wan techmaka ka tiwelit tiyujyultuk ashan wan tik ne tujtunal witzet. 9 Ini tejkia wan nemi pal muchi tikmatit. 10 Yaja taika tikujkutiat wan timutatejtemuiliat, ika tikpishtiwit tejchialis tik ne Teut yultuk ne kinmakishtia muchi ne takamet, wan ne tayulmatit sujsul mas.
11 Shitatukti wan shitamachti ini. 12 Ma te aka metzijilwi ika taja sea tipiltzin, sute shimuchiwa se ejemploj ipal ne tayulmatit tik mupalabraj, tik mumuwikalis, tik mutetasujtalis, tik mutayulmatilis, tik muchipawaknemilis. 13 Hasta ma niajsi, shiktali cuidadoj ma shiamatachia, ma shitanawati, ma shitamachti. 14 Shikwi ne tetakulis ne metzmakatiwit iwan teutaketzalis kwak mutalijket mujpak ne inmejmey ne noymet. 15 Muchi uni shikejketza wan shikchiwa pal kiane muchi yawit kitat ken metzpalewijtuk. 16 Shimutajpia wan shiktajpia ne tamachtilis; shikchiwa senpa ijkiuni; ika su kiane, taja tiaw timumakishtia wan nusan tiaw tikinmakishtia ne metzkakisket.
Ne tukniwan ijtik ne Sennemit
5 Maka shikajwa se chulet sute shiknutza ken muteku, wan ne piltzinmet ken muikawan, 2 ne lamajtzitzinmet ken munajnan, ne siwapipil ken mueltiwan, senpa chipawak.
3 Shimuwika yek inwan siwatket ne nakatiwit insel ika mikik inshulejyu, su insel nemit. 4 Su se ijkiuni kipia ipilawan o imiakwan, ma mumachtikan ne achtu ka nemi pal timuwikat yek ka tuchan wan tikmakat ne tutejteku inpatiw, ika ijkiuni ne Teut kita yek. 5 Su tejkia ka se siwat kipulujtuk ishulejyu wan nakatuk isel, yaja yawi kipia tejchialis tik Teut wan senpa kitajtani wan mutajtawelia ka tayua wan ka tunal. 6 Ne siwat tea kipia ishulejyu su sema pajpaki, yaja miktuk melka yultuk. 7 Wan muchi ini shitamachti pal kiane yawit muwikat ken te aka welis kinhilwia tatka. 8 Su aka te tajpia yek imiakwan, wan ne kalchanejket sujsul mas, kinaktia ne tayulmatilis. Melka te yek ma se inte tayulmati, su kichiwa ijkiuni yaja ukchiupi teyek.
9 Se siwat ne intea kipia ishulejyu ma mupua semaya su kipiaya yeshpual shiwit wan su muchijtuk isiwaw sanse takat, 10 su tikmatit ka kichijtuk tay yek, su kiskalijtuk kukunet, su kikwijtuk ejkunimet tik ikal, su kikshipakatuk ne tayulmatit, su kinpalewijtuk ne mupitzinijtiwit, su kichijtuk muchi itekiw yek.
11 Te ijkiuni ne siwatket ne nakatiwit insel wan kipiat chiupi shiwit, ika kwak pewat kielewiat se takat yawit kinekit munamiktiat wan kiajkawat ne Mawaltijtuk: 12 yawit muchiwat juzgar ika kiajkawtiwit ne tayulmatilis ne kipiatuyat katka. 13 Nusan mumachtiat ma te tekitikan wan ma pashalukan tik se kal wan tik ukse kal, wan te sema ma te tekitikan sute nusan ma taketzakan tay te muneki pal chachalakat wan muishtukat tik tepal cuejcuentaj. 14 Yajika nikita yek ma munamiktikan ne siwatket kipiat chiupi shiwit, ma punikan wan ma muchiwakan itekuyu ikal, pal kiane te yawit kimakat ne kitejtenewa taika taijilwiskia. 15 Ika sejse muishkwepketa ipan ne Tenewani.
16 Su se tayulmati wan kipia siwatket nakatiwit insel, ma kintajpia wan ma te kitajtani ne sennemit ma kitashtawi, pal kiane weli kintajpia ne siwatket ne ijkia nemit insel.
17 Ne noymet ne tatuktiat yek ma kipiakan mas wey honor, wan ne kujkutiat tanutzat wan tamachtiat sujsul mas, 18 ika nemi ijkwilujtuk: "Ne wakash ne taksa nemi ijpak ne tawial, maka shiktentzakwa", wan nusan: "Yek ma kikwi ne tekitini ne ipatiw". 19 Su aka kijilwia se tatanoy, maka shitakaki sute su ume o yey inat kenha.
20 Ne kichiwat tay te yek, shikajwa tik intachialis muchi pal kiane ne sejseuk nusan yawit majmawit.
21 Nimetznawatia tik itachialis ne Teut wan ne Mawaltijtuk Yeshu wan ne tanawatianimet ijishpejpentuk ma shitajpia muchi ini. Maka shikpia prejuicioj, maka shikpalewi ne se mas que ne seuk. 22 Maka shijisiwi tiktalia mujmumey ijpak aka. Su ajaka kichiwa tay te yek, maka shikpalewi. Shinaka chipawak.
23 Ma intea shikuni isel at, sute shikwi chiupi atata ipal ne muijti wan ne mukujkukulisyu.
24 Ne tay kichiwat sekit tay te yek muita nemanha wan muchiwa juzgar talul; ne tay kichijtiwit sekit semaya mumati tipan. 25 Wan kenha, ne tay kichiwat sekit tay yek muita nemanha, wan ne tay kichijtiwit ne sekit nusan te weli minaya.
6 Muchi ne tekitinimet itan ikimil wey, ma kinmakakan ne intejtekuyu muchi ne honor pal kiane te aka yawi kukujtaketza ipanpa ne itukay ne Teut wan ne itamachtilis. 2 Ká ne kipia se itekuyu ne tayulmati, ma kimaka respetoj melka yaja iiknew wan ma tekiti mas ika yaja tayulmati wan tasujtatuk, wan ma kikwi ipatiw ne itejtekiw yek. Muchi ini shitamachti wan shitanawati.
3 Asu se tamachtia tay te kenha ne yejyek palabraj ipal ne tutajtzin Yeshu Mawaltijtuk wan ne yek tamachtilis, 4 yaja tzunsuluntuk wan te kimati tatka, wan semaya ajwiak ne tajtajtanilis wan ma musumakan ipanpa pajpalabraj. Itech nesi kwalan, musumalis, kukujtaketzalis, tajtakejketzalis te yejyek; 5 senpa muishtenewat nemit ken takamet ne kwaluk intamatilis wan kipulujtiwit ne tejkia, wan kimatit ka ne yek nemi pal tikpiat wey.
6 Melka uni, tejkia ka ne yek se pal tikpiat sujsul wey iwan pakilis, 7 ika te talwikaket tatka tuwan kwak tinesket, wan te welit tikwikat tatka kwak tiawit. 8 Su tikpiat ken tipanut wan tukwajkwach, tipakikan. 9 Ne kinekiskiat kipiat wey tumin, wetzit ijtik taejekulis wan tajtajpewal wan miak taelewilis ipal melemet ne te yejyek tupal, ne kimalachuat ne takamet wan kichiwat ka wilewit wan puliwit, 10 ika ne tuminhelewilis inelwayu muchi tay te yek, wan sejse muajkawat wan kipulujtiwit ne ujti ipal ne tayulmatilis wan kichijtiwit ijkiuni ka yawi kinkukua wey.
11 Ijkiuni tel,
taja ká titakat ipal Teut,
shichulu wejka muchi uni,
shiktemu tamelakchiwalis,
yek,
tayulmatilis,
tetasujtalis,
weytejchialis,
yulyamanikayu.
12 Shitasuma tik ne yek tasumalis,
shikwi ne tayulmatilis pal tiyujyultuk senpa;
metznutztiwit pal tikchiwa ijkiuni,
wan tinatuk ishpan miak ka tiaw tikchiwa ini tay yek.
13 Nimetztuktia tik itachialis ne Teut ne kinyulkwiltia muchi, wan ne Mawaltijtuk Yeshu ne nankilij yek iishpan Pontius Pilatus, 14 ma shitajpia ken nemi tuktijtuk ken te aka yawi weli metzilwia tatka hasta kwak yawi muneshtia ne tutajtzin Yeshu Mawaltijtuk, 15 wan kwak ajsi ne tunal yaja yawi kineshtia:
Yaja ne tasujtatuk
wan ne isel wey,
ne intatuktiani ne tatuktianimet
wan intajtzin ne tajtzinmet;
16 yaja isel te keman miki;
muchantia tik tawil te welit titzinkisat;
te aka ijtik takamet kitztuk nian weli kita;
yaja kipia honor wan itajpal ipal senpa, amen.
17 Shikintukti ne kipiat wey tik ini kan tinemit ma te mumatikan wejwey wan ma te tejchiakan ka ne tumin yawi kinmakishtia, ika tesu tikmatit hasta keman tikpiat. Mas yek ma tejchiakan ka yawi kinpalewia ne Teut ká techmaka muchi pal timukwesuat; yaja kipia sujsul mas. 18 Ma kichiwakan yejyek tekit, ma tepewikan intejtekiw yektzin, ma kimakakan ká ne ajsi tajtani wan ma kinpalewikan ne munekit. 19 Ijkiuni kia yawit kianat se chalchiwit inpal: yawit kichiwat se yek tetzilnaj ipal ne tujtunal witzet, pal welit yujyultuk senpa.
Tami
20 Timoteo, shitajpia ne talilijtuk. Maka shikaki tay inat sejse pal metztejtenewat; te tatka ipatiw, wan melka inat ka kipiat tamatilis, tesu ijkiuni. 21 Yejemet kipulujtiwit ne ujti. Ma shikpiakan teutasujtalis.
Ne Bibliaj Tik Nawat · © 2008, 2012 Jan Morrow