Chronological
1 Naja, Shimon Pedro, itekitini wan ititanijtuk Yeshu Mawaltijtuk, nikintajpalua ne tukniwan ne kikwijtiwit tayulmatilis kenha ken tejemet ipal ne yek ipal ne Teut tutamakishtiani Yeshu Mawaltijtuk. 2 Ma shikpiakan wey tetasujtalis wan nejmachnemilis tik taishmatilis ipal ne Teut wan ne tutajtzin Yeshu.
3 Ne itajpal Teut techtakulijtuk muchi tay timunekit pal tiyujyultuk wan pal tiyejyek ika tikishmatit ne Teut, ne technutztuk iwan itawilyu wan yek, 4 wan ijkiuni techtakulijtuk projpromesaj tetekia wey inpatiw, pal kiane welit ankipiat teukayu kwak tamit anchuluat wejka ne puliwis ipal ne taelewilis tik ne taltikpak.
5 Yajika, nusan shimutatemuilikan sujsul pal ankitaliat tik ne anmutayulmatilis ne yek; tik ne yek ne taishmatilis; 6 tik ne taishmatilis ne yek muwikalis; tik ne yek muwikalis ne tanejmachselilis; tik ne tanejmachselilis ne yulchipakayu; 7 tik ne yulchipakayu ne iknitasujtalis; tik ne iknitasujtalis ne tetasujtalis. 8 Ika asu ijtik anmejemet muchi ini muajsi wan tepewi, yawi kichiwa ka anmutekiw kipias ipatiw wan itakil iwan taishmatilis ipal tutajtzin Yeshu Mawaltijtuk; 9 wan ká ne inte ijkiuni se pupuyut ne inte tachia wan kielkawa ka mupupujket itajtateyekchijtuk ipal ikman. 10 Yajika nukniwan, yek ma shimutatemuilikan pal antajpiat ne anmutanutzalis wan anmuishpejpenka, ika asu uni ankichiwat te keman antatzunchalusket, 11 wan ijkiuni yawit metzinkalaktiat ijtik ne tatekimakalis pal senpa ipal ne tutajtzin wan tutamakishtiani Yeshu Mawaltijtuk.
12 Yajika senpa niaw nimetzinhelnamiktilia muchi ini, melka ankimatit yek ka tejkia. 13 Nina ka yek ma nimetzinhilwi pal te ankielkawat muchi ne tujtunal ne ninemiuk ijtik ini nuweyka, 14 ika nikmati ka nemanha niaw nikajkawa ini nutawipantzin ijkiuni ken ne tutajtzin Yeshu Mawaltijtuk nusan nechneshtilijtuk. 15 Nusan niaw nimutatemuilia pal anwelit kielnamikit ini sejsenpa kwak naja intea niaw ninemi.
16 Timetzinneshtilijtiwit ka ne tutajtzin Yeshu Mawaltijtuk weli wey wan yawi witz, tesu ken se cuentoj ne inte tejkia asunte ken tachianimet ne tikitztiwit ne iweykayu tejemetsan, 17 wan kikwij itech Teut tuteku honor wan wey tzitzinakalis kwak mukakik ina se ipal ne sujsul wejkapan wey tzitzinakalis:
"Yajini nutelpuch yektasujtatuk, yajini ká ne nikita yek."
18 Wan tejemet ká tinemituyat itech tik ne tepet ipal Teut tikakket uni tay kiski tik ne ilwikak, 19 wan tikmatit sujsul yek ne ipalabraj ne taketzani, wan ankichiwat yek su ankikejketzat ken se tawil tajtawia tik se kan kunyua hasta kwak yawi tanesi wan yawi kisa ne Neshtamalani tik ne tuyujyulu.
20 Ini achtu shikmatikan, ka muchi tay muijkwilujtuk, inte aka weli ina isel tay kineki ina, 21 ika nian se teutaketzalis kiski niakeman itech takat, asunte ne Ijiutzin kichijki ka tanutzket ne takamet wan inaket tay ne Teut kinekik.
2 Nusan nemiket tashijshikuanimet ijtik ne techan, kenha ken ijtik anmejemet nusan yawit muajsit sankatamachtianimet. Yejemet kishtukasket sejsectaj ipal tapululis, wan inasket ka ne tutekuyu ne mutemakak pal kinmakishtia inte yekkaya, wan kalwikasket inhijpak tapululis talul. 2 Wan miak yawit kimatit ka tejkia ne insusultailwitilis, wan inpanpa, sejse yawit kukujtaketzat ipanpa ne ujti ipal ne tejkia. 3 Wan ipanpa taelewilis, yawit metzinnamakat iwan sajsanka. Inpal ne juicioj pal ikman inte ishtuna wan ne inpuliwilis inte kuchi.
4 Su ne Teut kinwilej ne tanawatianimet ne kichijtiwit tay te yek, wan kintemakak ijilpituk kan kunyua, tik Miktan, ma nakakan ka né hasta ne juicioj; 5 su ne Teut kiwilej ne taltikpak palikman, wan semaya kipalewij yajane ká tanawatia katka tay yek, Noa, wan uk chikume, wan kalkwij se tepeat ijpak ne taltikpak ika ne taltikpak inte kitasujta ne Teut; 6 su Yaja nusan kinkwepki neshti ne tejtechan ipal Sodom wan Gomora, wan inak ma muishtapachukan ken se tamachtilis ipal muchi ká kinekiskiat kielkawat Teut; 7 wan su Yaja kichiwilij tay yek ne yulmelawak Lot, wan kimakishtij itech ne inte yejyek ne muwikat ken inte muneki: 8 ika ne yulmelawak muchantia ijtik yejemet wan tachia wan takaki muchi ne tujtunal wan kikukua ialmaj yek iwan muchi tay muchiwa tay te yek; 9 su ijkiuni tel, ne Teut kimati ken yawi kinmakishtia ne yejyek itech taejekulis wan ken yawi tajpia ne inte yejyek pal muwitekit tik ne tunal ipal juicioj, 10 wan keski mas ne nejnemit ipan innakayu ne kielewiat tay susul wan kijilwiat ne Tajtzin.
Yejemet inte ishpinawat, kichiwat muchi tay kinekit, kukujtaketzat ne weymet wan te ijtzilikat: 11 inte ijkiuni ne tanawatianimet, ká inte kinhijilwiat iishpan Tutajwan melka yejemet kipiat mas wey intajpal.
12 Yejemet ken kojtantekwanimet ne inte yultaketzat, ne nemit pal mupewiat wan muwilewat. Kukujtaketzat ne tay inte kimatit. Yawit wilewit, 13 wan yawit kipiat tay inte yek ken inpatiw ika yejemet inte yejyek. Ingustoj ne muyulkwesulis ka tunal. Yejemet takapalamet, tijtilkwijtuk, pajpakit teshijshikuat kwak sennemit anmuwan tik yujyualu. 14 Senpa kinekit mawiltiat iwan siwatket wan te keman mukawat kichiwat muchi tay te yek. Kipewiat ne ajalmaj ne inte kimatit tay kinekit. Kipiat inyulu tentuk iwan teshijshikulis. Kukunet ipal maldicion!
15 Kiajkawtiwit ne yek ujti wan pulijtiwit. Yajket tik ne ujti ipal Balaam, ne ikunew Beor, ne kichijki tay teyek ipanpa tumin, 16 wan kiajajwaket ipanpa uni tay kichijki, hasta se burroj te weli taketza tanutzki ken se takat wan te kiajkaw ma muchiwa ken inatuya ne tzuntet taketzani.
17 Yejemet ken se ishat waktuk wan se mishti ne muishtupewa tik ne ejekat. Yawit kipiat wey kunyua. 18 Inat ne tay suluntuk wan te tatka ipatiw, wan kipewiat iwan ne sujsusul taelewilis ipal inweyka sejse ká achka welit chuluat intech yejemet ká muwikat tik mushijshikulis. 19 Melka inat ka yawit kinmakishtiat, yejemetsan tepaltekitinimet itan puliwilis, ika su aka kitzkia se, se mukwepa ne itekitini.
20 Asu yejemet chulujtiwit itech ne tay susul tik ne taltikpak ika kishmattiwit ne tutajtzin wan tutamakishtiani Yeshu Mawaltijtuk, wan neman mukwelpachujtiwit wan muitzkiat senpa, tipan yawit kipiat mas uij que achtu, 21 ika mas yek inpal su te kishmattuskiat ne ujti ipal ne tamelakchiwalis que su kwak tamit kishmatit muishkwepat wan kiajkawat ne tatuktilis ipal Teut ne mutemakak inpal. 22 Inwan panutuk tay ina ne taketza yekkaya, ina: Se pelu muishkwepa itech ne tay yaja misutak, wan ne kuyamet kwak tami mupaka mukwepa muishmimilua ijtik ne kwitat.
3 Nuyejyektasujtatuk, ashan nimetzintitania ini ukse tajkwilul, wan tik yejemet nikishatia ne anmuyulu chipawak pal anwalisat 2 wan ankielnamikit tay inatuyat ne taketzanimet ipal Teut wan tay tatuktij ne tajtzin wan tamakishtiani itech ne anmutijtitanijtuk. 3 Shikmatikan ini achtu: tik ne tijtipan tunal walasket ajkawetzkanimet ne muwikat ken yejemetsan kielewiat, 4 wan inasket: "Ken ijtuk iwan ne promesaj ka yawi walmuneshtia yajane? Ika ne tejteteku kuchket wan muchi naka kenha ken kwak pejki!" 5 Ika kinekit kielkawat ka ikman nemituya ne ilwikak, wan kiski ne tal ijtik at wan itech at, ika inak ne Teut kiane. 6 Inpanpa, ne taltikpak pal ikman puliwik ijtik weyat. 7 Wan ne ipalabraj ne Teut kiantuk ne ilwikak pal ashan, wan ne tal, wan tajpia iwan tit hasta se tunal kwak ne takamet te yejyek yawit muchiwat juzgar wan yawit puliwit.
8 Nuyejyektasujtatuk, semaya ini nikneki ma inte shikelkawakan: ka se tunal ipal ne Teut ken mil shiwit, wan mil shiwit ken sanse tunal. 9 Tutajwan inte ishtuna tajpia ne projpromesaj, ken inat ajaka, asunte yaja techchia senpa, ika inte kineki ma puliwi aka, yaja kineki ma welikan muyulpatat muchi.
10 Ne tunal ipal ne Tajtzin yawi witz ken se techtekini. Tik uni tunal ne ilwikak yawi panu iwan wey chachalaka, muchi tay ashan nemi yawi muchichinua wan musentalua, wan ne tal wan muchi tay muchijtuk ijtik yaja yawi muajsi.
11 Kwak muchi uni musentalua, shikejketzakan ken muneki ma shimuchiwakan wan ma shimuwikakan yek, 12 wan ma shikchiakan wan ma shiknelwikan ne tunal ipal ne Teut. Yaja yawi kichiwa ma tata wan ma musentalu ne ilwikak, wan ma muchichinu wan ma pati muchi tay ashan nemi. 13 Tikchiakan tel ne yankwik ilwikak wan ne yankwik tal kan muchantia tamelakchiwalis ken Yaja kichijki prometer.
14 Neka, yejyektasujtatuk, shikchiakan muchi ini; shimunelwikan, maka shimususulwikan, maka shikpiakan nian se anmupelech, ma Yaja metzinhajsi nejmachnemit. 15 Wan shikajsikan tamakishtilis ijtik ne iweytejchialis ne Tajtzin, ken techilwijtuk ne tuiknew tasujtatuk Pawlo ne tajkwiluj iwan ne tamatilis ne kikwij, 16 ken nusan yaja tanutza tik muchi ne tajtajkwilul wan tik yejemet ina ijkiuni, kan nemit sejse ujuij pal tikmatit, wan kimajmalinat sekit ne inte mumachtijtiwit wan te kimatit tay kinekit, ken nusan kichiwat iwan ne sejseuk tay muijkwilujtiwit, wan yajika yawit puliwit.
17 Yajika tel, yejyektasujtatuk, anmejemet ká kimatit ini achtu, shikishpelwikan pal te metzinwikat ijtik ne mushijshikulis ipal ne inte yejyek wan welit ankipuluat anmuvalor.
18 Shiweyakan tik tetasujtalis wan tik taishmatilis ipal ne tutajtzin wan tutamakishtiani Yeshu Mawaltijtuk, ne yawi tzitzinaka senpa, amen.
1 Naja, Yuda, itekitini Yeshu Mawaltijtuk wan iechkaw Yakob, nimetzintajpalua muchi ká ne Teut kintasujta wan munutztiwit pal Yeshu Mawaltijtuk ma tajpia. 2 Ma metzinpalewi ne Teut wan ma shikpiakan nejmachnemilis wan wey tetasujtalis.
3 Yejyektasujtatuk, nijisiwi nitajkwilua pal nimetzinhilwia ipanpa ne tutamakishtilis tupal muchi, wan muneki ma nimutajtaweli anmuwan ma shimutatejtemuilikan ipanpa ne tayulmatilis ne ikman mutemakak inwan ne tayulmatit, 4 ika kalaktiwit sejse ne ikman muijkwilujtuyat tik ne amat pal muchiwat juzgar, ne inte kitasujtat ne Teut, ne kipatat ne itetasujtalis ne Teut ipatka susultailwitilis, wan ne inte kikwit ne tutekuyu ne isel tikpiat, Yeshu Mawaltijtuk.
5 Nimetzinhelnamiktiliskia ne tay ankimatket, ka kwak seujti ne Tutajwan tamik kimakishtia ne techan tik Egipto, tipan kinwilej ne inte tayulmatit; 6 nusan ne tanawatianimet ne inte tajpishket tay ipal kwak pejki wan kinaktijket kan muchantiat katka, yaja tajpishtuk tik kunyua ijilpituk pal senpa hasta ne juicioj ipal ne wey tunal; 7 ken Sodom wan Gomora wan ne tejtechan innawak kenhaya ne kisket kitemuat tepal inakayu muishpanujket ken se ejemploj wan kiselijket tit pal senpa.
8 Melka uni, kenhaya ini temikinimet kisusulwiat innakayu, kielkawat tajtzinkayu wan kukujtaketzat ne tay wey. 9 Ne Mikael, ne weytanawatiani, kwak muijilwia nemi iwan ne Tamintuk wan tajtaketzat ipanpa ne iweyka ne Moshe, ipanpa mawi inte kinekik kitenewa ika kukujtaketzki, asunte inak: "Tutajwan ma metzajwa!"
10 Muchi tay inte kimatit yejemet kukujtaketzat, wan muchi tay kimatit insel ken ne takwalmet inte welit taketzat, iwan muchi uni wilewit. 11 Ay pobrejchichin, ika nejnemit tik ne iuj Kain, wan mushijshikuat ken Balaam kan mukushiniat ipal inpatiw, wan puliwit iwan ne inajnankilis Koraj.
12 Yejemet kwak sentakwat tik ne anmuyujyualu ipal tetasujtalis inte majmawit wan yejemet ken tejtet itan at; insel mutakwaltiat; mijmishti wajwaktuk ne kinhishpitzat ne ejejekat; kwajkwawit kwak inteuk wetztuk ne at ne inte kipiat intakil, miktiwit ume wipta wan mutzinwiwittiwit; 13 at kwalani sea, pupusuka iwan ishpinawalis; sijsital muyawaluat nujme, ne inpal naka ne tiltik kunyua pal senpa.
14 Hanok, ne chikume ipal ne ijishwiu Adam, kinhilwij tay yawi muchiwa, ina:
"Né ajsik Tutajwan iwan sujsul miak santoj 15 kichiwat ne injuicioj muchi, wan kinhajajwaket muchi ne ajalmaj ipanpa muchi ne intejtekiw inte yejyek ipal Teut, wan ipanpa muchi ne tajtakwawak tay inaket ipanpa ne tateyekchiwat ne inte kitasujtat ne Teut."
16 Yejemet kikinakanimet, tejteijilwiat, ne nejnemit ken kielewiat; suluni ne inten iwan pajpalabraj; inat tay yektzin pal kinhishtiliat miak tay kinekit.
17 Anmejemet, tajtasujtatuk, shikelnamikikan ne pajpalabraj ne metzinhilwijket ne itijtitanijtuk ne tutajtzin Yeshu Mawaltijtuk 18 ká inat katka ka tik ne tijtipan tunal yawit nemit ajkawetzkanimet muwikat ken kielewiat wan te kitasujtat ne Teut. 19 Yejemet tetakutuntianimet, ajalmaj inte kipiat iijiu.
20 Anmejemet, tajtasujtatuk, shimuketzakan ijpak ne anmutayulmatilis wey wan shiktajtanikan ne Ijiutzin. 21 Shinemikan yek iwan itetasujtalis Teut, wan shikchiakan ma yawi techpalewia ne tutajtzin Yeshu Mawaltijtuk pal tiyujyultuk senpa. 22 Shikinpalewikan sejse ijishtemujtuk, 23 shikinhishtikan sejse tik tit pal ankinpalewiat, wan sejse shikinpalewikan iwan mawi, melka ankijiat ne inwipil tilwijtuk itech ne innakayu.
24 Wan ne weli metzintajpia pal te antatzunchaluat wan weli metzinhishpanua ken inte ankipiat nian se ipelech tik itachialis ne itzitzinakalis yajane, iwan pakilis, 25 ne Teut wan tutamakishtiani isel tikpiat, ipanpa Yeshu Mawaltijtuk ne tutajtzin, ma inakan ka wey, iwan itajpal wan itatuktilis pal senpa, tik ne tujtunal pal ashan wan pal senpa, amen.
Ne Bibliaj Tik Nawat · © 2008, 2012 Jan Morrow