Chronological
4 Iwan senyajki Sopatros ikunew Purros ipal Beroya, Aristarkos wan Secundus ipal Tesalonika, Gaius ipal Derbe, wan Timoteo, wan ipal Asia Tukikos wan Tropimos. 5 Yejemet yajket achtu wan techchishket tik Troyas. 6 Tejemet ajkewket ka Pilipoy kwak tamik ne ilwit kwak te mukwa ne tay kipia shukutishti, wan tiajsiket kan nemituyat tik Troyas tik makwil tunal, wan tinakaket ka né chikume tunal.
7 Tik ne achtu tunal ipal ne semanaj kwak tisentepejket muchi titamalpitzakuat, ne Pawlo tajtaketza nemi. Ne ukse tunal yaja yawi kisa, yajika nakak tajtaketza hasta tajkuyua; 8 nemituyat miak tawil tik ne cuartoj ka ikajku tik ne kal kan tisennemituyat. 9 Nemik se takapiltzin itukay Ewtukos muetztuk itech ne tentzin, wan kukuchki kwak tajtaketza nemi ne Pawlo, wan kwak yaja kuchi wetzki sujsul wejka talchi wan kwak kianket yaja miktuk. 10 Ne Pawlo temuk wan wetzki ijpak wan kinapaluj, wan inak:
—Maka shimukumuntikan, ika nemiuk ne yulkwilis ijtik yaja.
11 Tejkuk wan kipitzakuj ne tamal wan kiejekuj, wan tajtaketzki wey hasta taneski. Ijkiuni yajki. 12 Kalwikaket ne takapiltzin yultuk wan pakiket inte chiupi.
13 Tejemet tiajsiket achtu tik ne barcoj wan tiajket ka Asos pal tikanat Pawlo ka ikuni, ika ijkiuni tatuktij ika yaja yawi nejnemi ikshipan. 14 Wan kwak technamik tik Asos tikanket wan tiajsiket tik Mitulene. 15 Tikisket wan tiajket tik ne barcoj wan ne ukse tunal tiajsiket imelawka Kios, wan ne seuk tiejkuket tik Samos, wan tik ne seuk tiajsiket ka Miletos. 16 Ika ne Pawlo inatuya ka yawi panu iishpan Epesos pal inte ishtuna tik Asia, ika ijisiwi katka pal kita su weli nemi tik Yerushalem tik ne ilwit ipal ne Tunal Unpual Majtakti.
Pawlo kinnutza ne noymet ipal ne sennemit ipal Epesos
17 Tik Miletos yaja tatuktij ka Epesos kalinnutza ne noymet ipal ne sennemit, 18 wan kwak ajsiket, yaja kinhilwij:
—Anmejemet kimatit ken ninentuk anmuwan senpa, tik ne achtu tunal ka niajsik tik Asia wan hasta ashan; 19 ken nitekittuk ipal ne Tajtzin iwan kanawakmatilis hasta nichukak wan nechejekujket ika ne Yudayujmet kinekituyat nechitzkiat; 20 wan ken inte nimukawtuk pal nimetzinnawatia wan nimetzinmachtia muchi tay weli metzinpalewia, ishpan muchi wan ka ichan sejse; 21 wan ken nikinnawatijtuk Yudayujmet wan Greciajchanejket ma muyulpatakan ipal Teut wan ma kiyulmatikan ne Tutajtzin Yeshu.
22 Wan ashan ne Ijiutzin kineki ma niaw ka Yerushalem, wan te nikmati tay iwan niaw nimunamiki ka né. 23 Semaya nikmati ka ne Ijiutzin nechnawatia witz tik muchi ne tejtechan wan ina ka nupal nakat ijilpika wan pejpenaj. 24 Melka uni, inte nimajmawi nian tatka ipanpa ne nuweyka, mas yek nikelewia ma niktami ne nuuj wan ne nutekiw tay ne nikwij itech ne Tajtzin Yeshu pal nitanawatia ne yeknawatilis ipal teutasujtalis.
25 Ashan nikmatiaya ka muchi anmejemet intea keman anyawit nechitat, ká nipanutuk nitanajnawatia ne tatekimakalis anmutzalan. 26 Yajika tik ini tunal nina anmuishpan ka inte nikpia culpaj ipanpa ne iesyu muchi, 27 ika inte nimukawtuk pal nimetzinnawatia muchi tay kineki ne Teut. 28 Shiktalikan cuidadoj anmupanpa wan ipanpa muchi ne tepewatzin ká ijpak metzintalijtuk ne Ijiutzin ma shikinpachiwikan pal ankitakwaltiat ne sennemit ipal ne Teut, tay ne yaja kipalewij iwan ne iesyu.
29 Naja nikmati ka kwak niajtuka ajsisket anmutech kuyumet wan tekwanimet wan kiwilewasket ne tepewatzin, 30 wan hasta ijtik anmejemet sejse muketzasket tanutzat sejse kwejkwelnaj pal kiajkewat mumachtianimet inhipan. 31 Neka shikishpelwikan wan shikelnamikikan ka inte nimuketztuk nian ka tayua nian ka tunal ijtik yey shiwit pal nimetzinnawatia muchi anmejemet hasta nichuka katka; 32 wan ashan, nukniwan, nimetzinhishpanua ne Teut wan ne palabraj ipal ne itetasujtalis, ká ne weli kiketza wan metzinmaka se tay anmupal ijtik muchi ne teujteuchijtuk.
33 Inte niktajtanilijtuk aka nian tumin nian teukwit nian kwajkwachti. 34 Ankimatit yek ka ini nujnumey tekittiwit insel pal tamakat tay ne nimuneki wan tay ne munekit katka nukunpawan. 35 Muchi nimetzinmachtijtuk ka ijkiuni nemi pal ankujkutiat pal ankinpalewiat ne kukuyat wan ankielnamikit ne ipajpalabraj ne Tajtzin Yeshu, ká inak:
"Nemi yek ma titamakakan mas que ma titakwikan."
36 Wan kwak inatuk ini, mutankwaketzki inwan muchi wan kinutzki ne Teut. 37 Muchi chukaket wey wan kinapalujket wan kitejtennamikket, 38 wan sea kinkukua katka ika inak ka intea keman yawit kitat, wan walajket iwan hasta ne barcoj.
Pawlo tik Yerushalem
21 Kwak tikalaktiwit ijtik ne barcoj wan tiajkewtiwit, tiajket melaknaj wan tiajsiket tik Kos. Ne ukse tunal tiajsiket Rodos, wan ka ikuni tikisket pal tiawit ka Patara, 2 wan tikajsiket se barcoj ne yawi katka Poynikia, wan tikalakket wan tipejket yawit. 3 Muneshtij Kipre, wan tikajkawket ka tumayekkan wan tiajket Siria wan tiajsiket Tzor, ika ne barcoj nemituya pal kishtia ne ikimil unisan.
4 Tikajsiket ne mumachtianimet wan tinakaket chikume tunal. Yejemet ipanpa ne Ijiutzin kitajtanket ne Pawlo ma inte yawi ka Yerushalem.
5 Kwak panutiwit uni tujtunal, tikisket wan tiajket tik ne ujti, wan muchi walajket wan ne insiwawan wan ne inpilawan hasta tatenpan ne techan, wan timutankwaketzket iten ne at wan tiknutzket ne Teut. 6 Timutajpalujket wan tikalakket tik ne barcoj. Yejemet mukwepket ka inchan.
7 Tikisket Tzor wan tiktamijket ne ujti hasta tiajsiket Ptolemais, wan ajsiket techtajpaluat ne tukniwan ka né, wan tinakaket se tunal inwan. 8 Ne ukse tunal, tikisket wan tiajsiket Kaysarea, wan tikalakket ka ichan Pilipo ne tayeknawatiani, ne se ipal ne chikume, wan tinakaket ka ichan. 9 Yaja kipiatuya nawi siwapipil inte munamiktijtiwit wan taketzanimet katka.
10 Tinakaket ankakeski tunal, wan walajsik se pal ne Yudayujmet, se taketzani itukay Hagab, 11 wan ajsik tutech wan kikwij ne icinchoj ne Pawlo tik ijimey wan kilpij ne ijikshi wan ne ijimey wan inak:
—Ini tay ina ne Ijiutzin: ne takat ká ipal ini cinchoj, ijkini yawit kilpiat tik Yerushalem ne Yudayujmet wan yawit temakat tik ijimey ne tejtechan.
12 Kwak tikakket uni, tejemet tipejket titajtanit, wan muchi ká nemituyat ka ne, ma inte yawi tik Yerushalem. 13 Kwakuni inak Pawlo:
—Tay ankichiwat? Taika anchukat wan ankipayanat ne nuyulu? Ika naja ninemi muekchijtuk inte semaya ma nechilpikan, nusan ma nimiki tik Yerushalem ipanpa ne itukay ne Tajtzin Yeshu.
14 Ken inte weliket tikilwiat ma inte yawi, timukawket tajtakaktuk wan tinaket:
—Ma muchiwa ne itaelewilis ne Tajtzin.
15 Kwak panutiwit uni tujtunal tikwijket tay timunekit wan tiajket ka Yerushalem. 16 Sejse pal ne mumachtianimet ipal Kaysarea walajket tuwan, wan kalwikaket se takat ne itech tiawit timutakewat, itukay Mnason ipal Kipre, se mumachtiani pal ikman.
17 Kwak tiajsiket ka Yerushalem, techkwijket ne tukniwan iwan pakilis. 18 Ne ukse tunal ne Pawlo yawi katka tuwan titachiat ichan Yakob, wan ajsiket muchi ne noymet, 19 wan kintajpaluj wan kwakuni kinneshtilij muchi tajtay ne kichijtuk ne Teut ijtik ne tejtechan tik ne itekitilis. 20 Yejemet kwak kikaktiwit inat katka ka wey ne Teut, wan kilwijket:
—Tuiknew, tikita ka sujsul miak ne Yudayujmet ká tayulmatit wan muchi yejemet tajpiat ne tajtuli. 21 Mupanpa kinmachtijtiwit ka tikinmachtia muchi ne Yudayujmet nemit itzalan ne tejtechan ma kiajkawakan ne itajtuli Moshe wan ka tikinhilwia ma inte kinyawaltekikan ipilawan wan ma inte muwikakan ken katka. 22 Tay tel? Ka yawit takakit ka tiwalajtuk. 23 Yajika, shu-shikchiwa ini tay timetzilwiat: tikpiat nawi takat kichijtiwit se promesaj. 24 Shikinkwi muwan wan shimupupu inwan, wan shitashtawi ipatiw ma mutzunshimakan, wan muchi yawit kimatit ka tay ne tamachtijtiwit mupanpa inte tejkia asunte taja nusan titaksak ken muneki wan titajpia ne tajtuli. 25 Inpanpa ne tejtechan ne tayulmatit, tejemet titajkwilujketa wan tikinhilwijtiwit ma inte kikwakan tay mutakulijtuk ne teujteutzitzin, nian esti nian kejkechpachujtuk, wan ma inte tatzinhejenchiwakan.
26 Kwakuni Pawlo kikwij ne takamet iwan wan ne ukse tunal mupupuj inwan wan yajki ka teupan tanajnawatia keman yawi tami ne tapupulis hasta kwak nemi pal mutakulia se ipal sejse yejemet.
27 Kwak yawita tamit ne chikume tunal, ne Yudayujmet ipal Asia, kwak kitaket, kinmamalijket muchi wan kitzkijket, 28 wan tzajtzit:
—Nukniwan ipal Israel, shitechpalewikan! Yajini ne takat ne kinmachtia katka tay ne te ipal ne techan wan ne tajtuli wan kan tinemit muchi nujme, wan hasta kinkalaktijtuk Greciajchanejket tik ne teupan wan kisusulwijtuk ini kan ipal ne Teut.
29 Ika achtu kitztiwit Tropimos, se ipal Epesos, tik ne techan wan kishketzat katka ka ne Pawlo kikalaktijtuya tik ne teupan. 30 Wan kumunik muchi ne techan, wan musenputzujket muchi wan kitzkijket Pawlo wan kishtijket tik ne teupan wan mutentzak; 31 wan kinekituyat kimiktiat, wan kilwijket ne miaktuktiani ipal ne bandaj ka mumamalia muchi Yerushalem. 32 Yaja kikwij tasumanimet wan sentzuntuktianimet nemanhachin wan kiski mutalua kinnamiki, wan yejemet kwak kitaket ne miaktuktiani wan ne tasumanimet kiajkawket kitasat ne Pawlo. 33 Kwakuni tzinkiski ne miaktuktiani itech wan kitzkij wan tatuktij ma kilpikan iwan ume tepusti, wan kitajtanilij ká yaja wan tay kichijtuk. 34 Seki tzajtzit nemit se ijtik muchi ne takamet, wan seki tzajtzit seuk. Ken inte welituya kimati ne tejkia ipanpa ne kumunilis, tatuktij ma kiwikakan tik ne cuartel. 35 Kwak ajsik ne gradaj, ne tasumanimet munekit kisajsakat ipanpa ne ikwajsiwis ne miaktal, 36 ika muchi ne techan tzajtzit witzet ka iipan:
—Shikwikakan!
37 Kwak nemituyat pal kikalaktiat ijtik ne cuartel, ne Pawlo kilwia ne miaktuktiani:
—Weli nimetzilwia se?
Yaja inak:
—Tiweli ne Greciajtaketzalis? 38 Inte tajasan tel ne Egiptojchanej ne taishtapachuj wan kinwikak cuatro mil takat ka kojtan ká tamiktianimet?
39 Inak ne Pawlo:
—Naja nitakat Yudayuj ipal Tarsos tik Kilikia, se techan wey. Nimutajtawelia muwan: shinechajkawa ma niknutza ne techan.
40 Kiajkaw, wan ne Pawlo, ejkatuk pak ne gradaj, taishnutzki iwan ne imey, wan kwak muchi tzitzikayatiwit, kinnutzki tik Ebrayuj.
22 (Inak:)
—Nukniwan wan noymet, ashan shitakakikan tay nimetzinhilwia nupanpa.
2 Kwak kikakket ka kinnutza tik Ebrayujtaketzalis, mas tentatziwket. Wan inak:
3 —Naja nitakat Yudayuj, nestuk tik Tarsos, Kilikia. Melka uni, nimuskalijtuk tik ini techan itech ne ijikshi Gamaliel; nimumachtijtuk yek ne itajtuli ne tatanoymet wan nitajpishtuk tay ipal ne Teut, kenha ken muchi anmejemet ashan, 4 wan ninejnenki tik uni ujti hasta mikilis, wan nikilpia katka wan niktzakwa katka takamet wan siwatket, 5 ken kimati ne weypalej ka tejkia, wan muchi ne noymet. Wan yejemet nechmakaket ajamat ipal ne tukniwan tik Damashek, wan niajki nikwika, wan ne ijilpituk ka ikuni nalinwikak ka Yerushalem pal muwitekit. 6 Kwakuni, kwak nitzinkisa niaw Damashek, ka tajkutunal, tik ne ilwikak nemanhachin waltemuk se wey tawil wan nechyawaluj; 7 wan niwetzki talchi, wan nikakik se nechilwia:
"Shaul Shaul, taika tinechtalultia?"
8 Naja ninankilij:
"Ká taja, Tajtzin?"
Nechilwij:
"Naja ni Yeshu ne Nazarayuj ká ne tiktalultia."
9 Ne nuwan nemituyat, melka kitaket ne tawil, inte kikakket ne nechnutza. 10 Ninak:
"Tay muneki ma nikchiwa, Tajtzin?"
Nechilwij:
"Shimuketza wan shu ka Damashek, wan ikuni san metzilwisket muchi tay nemi pal tikchiwa."
11 Ken inte welituya nitachia ika sujsul tzitzinakak uni tawil, ne nuwan nemit nechwikaket itech numey pal niajsi ka Damashek. 12 Nemituya se takat itukay Hananya, ká kitakamati katka tay nemi tuktijtuk tik ne tajtuli, wan muchi ne Yudayujmet ne muchantiat ka né kishmatit katka. 13 Yaja walaj wan nakak nutech wan nechilwij:
"Shaul nuiknew, shitachia."
Wan kwakuni nitachishki ka ikajku wan nikitak. 14 Inak yaja:
"Ne Teut ipal ne tunoywan metzishpejpentuk ma shikmati ne itaelewilis wan ma shikita ne Yek wan ma shikaki itech ne iten, 15 ika tiaw tikishmati pal tikilwia muchi tay ne tikitztuk wan tikaktuk. 16 Wan ashan, maka shishtuna! Shimuketza, shimumaka ulyuj wan shimuishpaka muchi tay tikchijtuk teyek, wan shiknutza ne itukay."
17 Kwakuni, kwak nalmukwepki tik Yerushalem wan niknutza ninemi ne Teut ka teupan, nishpuyawik 18 wan nikitak nechilwia:
"Shijisiwi, shikisa talul tik Yerushalem, ika inte yawit kikwit yek tay ne tina nupanpa."
19 Wan naja ninak:
"Tajtzin, yejemet kimatit ka naja niktzakwa katka wan nikwiteki katka ne metzyulmatit tik muchi ne kajkalsennemit; 20 wan kwak mukushinij ne iesyu Estepano, ne ká metzishmatki, najasan ninemik ka né, wan nikitak yek, wan nikanki ne inkwajkwach ne ká kimiktijket."
21 Wan nechilwij:
"Shu, ika naja nimetztitania wejka tik tejtechan."
Ken ijtuk tik ne cuartel
22 Kikakket hasta nikan, wan pejket tzajtzit wan inat:
—Shikishti yajuni tik ne tal! Te nemi yek ma yultuk!
23 Wan yejemet tzajtzit wan kitzayanat ne inkwajkwach wan kishiniat tejti nujme, 24 wan ne miaktuktiani tatuktij ma yaja mukalakti ijtik ne cuartel, wan inak ma kiwitekikan pal kitajtaniliat pal weli kimati taika kitzajtzaliat ijkiuni.
25 Kwak kisujket iwan ijilpika, ne Pawlo kitajtanilij ne sentzuntuktiani ejkatuk itech yaja:
—Nemi yek ma shikwitekikan se Romajchanej su te inatiwit tay kichijtuk teyek?
26 Kwak kikakik, ne sentzuntuktiani ajsik itech ne miaktuktiani wan kilwij:
—Tay tiaw tikchiwa? Ini takat se Romajchanej.
27 Ne miaktuktiani ajsik itech Pawlo wan kilwij:
—Shinechilwi, taja ti Romajchanej?
Yaja inak:
—Ni Romajchanej.
28 Ne miaktuktiani inak:
—Naja niktashtaw wey tumin pal weli nimuchiwa techantakat.
Pawlo inak:
—Naja ninesik ijkiuni.
29 Yajika ne yawit kitajtaniliat kiajkawket nemanha, wan ne miaktuktiani majmawki kwak kimatki ka yaja Romajchanej wan kilpijtuya.
Pawlo iishpan ne kalpuli
30 Ne ukse tunal, ika kinekiskia kimati ne tejkia taika kitenewat ne Yudayujmet, kitujtun wan tatuktij ma musentepewakan ne weypalejmet wan muchi ne kalpuli wan kishpanuj ne Pawlo wan kitalij inhishpan.
23 Ne Pawlo nakak tachia ne kalpuli wan inak:
—Nukniwan, naja ninejnentuk iwan Teut iwan muchi nutamatilis hasta ini tunal.
2 Ne weypalej Hananya kintuktij ne nemituyat ka né kitasat ne iten. 3 Kwakuni ne Pawlo kilwij:
—Tapepechul neshpaktuk! San metztasas ne Teut! Né tinemi tinechtenewa ken ina ne tajtuli? Ne tajtuli te metzajkawa tinechtasa!
4 Ne nemituyat ka né inaket:
—Ken? Tiktejtenewa ne weypalej ipal ne Teut?
5 Wan inak Pawlo:
—Inte nikmatki ka yaja ne weypalej, nukniwan. Ika nemi tajkwilujtuk: "Maka shina tay inteyek ipanpa itatuktiani ne mutechan."
6 Ne Pawlo kimati katka ka ne se takutun ipal yejemet Tzadukayujmet wan ne ukse takutun Parishayujmet. Tzajtzik tik ne kalpuli:
—Nukniwan, naja ni Parishayuj, niikunew Parishayujmet, wan naja nina ka nikmati ka nemi tejchialis wan muyulkwepalis kwak timiktiwit, wan yajika yejemet nechtenewat.
7 Kwak inak uni, ne Parishayujmet wan ne Tzadukayujmet muketzket mutejtenewat wan mutakutuntijket muchi, 8 ika ne Tzadukayujmet kimatit katka ka inte kanaj nian muyulkwepalis, nian tanawatianimet nian nawalmet, wan ne Parishayujmet inat ka nemit. 9 Muchi mutalijket tzajtzit sujsul, wan muketzket sejse tajkwiluani ipal ne intakutun ne Parishayujmet musumat wan inat:
—Inte tikajsit tatka tay ini takat kichijtuk, su se iijiu kinutzki wan su se tanawatiani.
10 Kwak muchi muketzket, ne miaktuktiani pejki majmawi ka yawit kikelunat ne iweyka Pawlo, wan kintuktij ne tasumanimet ma ajsikan itech wan ma kishtikan tik itajku yejemet wan ma kiwikakan ijtik ne cuartel.
11 Ne ukse tunal, kiski ne Tajtzin inawak ka tayua wan inak:
—Maka shiyulkakasiwi, ika kenha ken titanawatijtuk nupanpa tik Yerushalem, nusan nemi pal titanawatia tik Roma.
Ne Yudayujmet mutatemuiliat pal kimiktiat Pawlo
12 Kan tatwik, ne Yudayujmet musenputzujket wan kichijket jurar ka nian takwasket nian atisket hasta ma kimiktikan ne Pawlo. 13 Nemituyat mas que unpual ne kichijket ini juramentoj, 14 wan ajsiket itech ne weypalejmet wan ne noymet wan inaket:
—Tikchijtiwit se juramentoj, wan tikchijtiwit jurar ka inte tiawit tikwat tatka hasta ma tikmiktikan ne Pawlo. 15 Ashan tel, shikneshtilikan ne miaktuktiani wan ne kalpuli pal kalkwi tutech; shinakan ka anyawit tatejtemuat chiupiuk ipanpa. Tejemet, achtu ma waltzinkisa, tiawit tinemit ejekchijtuk pal tikmiktiat.
16 Kwak ne ikunew ne ieltiw Pawlo takakik ken kinekit kipajpashuat, ajsik wan kalakik tik ne cuartel wan kilwij ne Pawlo muchi. 17 Pawlo kinutzki se pal ne sentzuntuktianimet wan inak:
—Shikwika ini takapiltzin itech ne miaktuktiani, ika kipia se pal kilwia.
18 Yaja kikwij iwan wan kiwikak itech ne miaktuktiani, wan ina:
—Ne ilpituk Pawlo nechnutzki wan nechtajtan ma nalwika mutech ini takapiltzin ka kipia se pal metzilwia.
19 Ne miaktuktiani kikwij ne imey wan kiwikak ka ikwaj, wan kitajtanilij:
—Tay tikpia pal tinechilwia?
20 Inak:
—Ne Yudayujmet sentaketztiwit pal metztajtanit ma shikwika ne Pawlo tik ne kalpuli musta, ken kinekiskiat tatejtemuat chiupiuk ipanpa. 21 Taja shikmati ka inte tejkia, ika kipajpashuat mas que unpual takat, ká ne kichijtiwit jurar ka nian takwasket nian atisket hasta ma kimiktikan, wan ashan nemit ejekchijtuk wan tejchiat ma shikinmaka se musentaketzat.
22 Kwakuni ne miaktuktiani kiajkaw yawi wan kilwij ne takapiltzin:
—Maka shikilwi aka ka tinechneshtilijtuk uni.
Tik Kaysarea
23 Wan kalnutzki ume ipal ne sentzuntuktianimet wan inak:
—Shikekchiwakan ume tzunti tasumani pal yawit hasta Kaysarea ikshipan ka chiknawi horaj ne tayua, wan yeshpual-majtakti ijpak caballojmet wan ume tzunti kiwikat ajarmaj, 24 wan caballojmet pal ijpak mutalia ne Pawlo wan ma kiwikakan yek itech Felix ne gobernador.
25 Wan kijkwiluj se amat ijkini:
26 Claudius Lusias kitajpalua ne yek gobernador Felix!
27 Ne Yudayujmet kitzkijket ini takat pal kimiktiat, wan niajsik nalishtia iwan ne tasumanimet ika nikmatki ka yaja techantakat ipal Roma. 28 Ninak ka niaw nikishpanua tik ne kalpuli ipal ne Yudayujmet pal kiane weli nimumachtia tay inat ka yaja kichijtuk. 29 Nikajsik ka yejemet kitenewat ipanpa sejse tajtanilis ipal ne intajtuli, wan te kipiat nian se taika kimiktiskiat nian kilpiskiat. 30 Kwak nechneshtilijket ka sentaketztiwit pal kitzkiat ne takat, niktuktij mutech nemanhachin, wan nusan nikintuktijtuk ne tatenewanimet ma ajsikan mutech wan ma inakan.
31 Kwakuni ne tasumanimet, ken yaja kintuktijtuk, kalkwijket ne Pawlo wan kiwikaket tik Antipatris ka tayua. 32 Ne ukse tunal, kiajkawket iwan ne tasumanimet pak caballojmet, wan ne sekit mukwepket ka cuartel. 33 Ajsiket Kaysarea wan kimakaket ne amat ne gobernador, wan nusan kishpanujket ne Pawlo. 34 Kitak tay ina tik ne amat wan kitajtanilij katiawel ne provinciaj kan nestuk, wan mumachtij ka yaja witz Kilikia, 35 wan inak:
—San nimetzkakis kwak walajsit ne metztenewat nusan.
Tatuktij ma kishpelwikan tik ne praytorioj ipal Herodes.
Ne Bibliaj Tik Nawat · © 2008, 2012 Jan Morrow