Chronological

Ne ichkakunetzin kintapua ne sajsajti

6 Wan nikitak ka ne ichkakunetzin kitapuj se ipal ne chikume sajti. Wan nikakik se ipal ne nawi tay yujyultuk tzajtzi ken tikwini, ina: "Shiwi." ² Wan nitachishki, wan nikitak se caballoj istak, wan ne ijpak muetztuk kipiatuya se imit. Wan kimakaket se yawal, wan kiski ken se weli, pal weli.

³ Wan kwak kitapuj ukse sajti, ne seuk tay yultuk ina: "Shiwi." ⁴ Wan kiski ukse caballoj chiltik, wan kimakaket ne ijpak muetztuk ma yaja weli kishtilia ne taltikpak ne nejmachnemilis, wan ma sejse kimiktikan sejseuk ijtik yejemet, wan kimakaket se wey espadaj.

⁵ Wan kwak kitapuj ukse sajti, ne yey, nikakik ukse tay yultuk ina: "Shiwi." Wan nitachishki wan nikitak se caballoj tiltik, wan ne ijpak muetztuk kipiatuya tik ne imey se tepustamachiwa. ⁶ Wan nikakik se tatajku ne nawi tay yujyultuk ina: "Se libraj trigoj ka se tumin, wan yey libraj cebadaj ka se tumin, wan maka shikchiwili tatka ne tumakka wan ne atata.

⁷ Wan kwak kitapuj ukse sajti, ne nawi, nikakik ne tipan tay yultuk ina: "Shiwi." ⁸ Wan nitachishki wan nikitak se caballoj tultik, wan ne ijpak muetztuk itukay Ne Mikilis, wan ne Miktan yawi iwan. Wan kinmakaket tatuktilis ijpak se nawtakutun ipal ne tal pal kinmiktiat iwan espadaj, mayan wan kukulis wan pal ne tekwanimet ipal ne tal kinmiktiat.

⁹ Wan kwak kitapuj ukse sajti, ne makwil, nikitak itan ne tikashit ne inhajalmaj ne mumiktijtiwit ipanpa ne ipalabraj ne Teut wan ipanpa ne tay inaket ka tejkia; ¹⁰ wan tzajtziket wey wan inat: "Taja titutekuyu wey wan yekkaya: hasta keman inte tikchiwa juzgar ne muchantiat tik ne tal wan tiktzunkwi ne tuesyu?" ¹¹ Wan kinmakaket sejse iwipil istak wan kinhilwijket ma musewikan chiupiuk hasta ma yekawi nusan iwan ne insejsentekitini wan inhikniwan ne yawit mumiktiat kenha ken yejemet."

¹² Wan nitachishki kwak kitapuj ukse sajti, ne chikwasen, wan ulinik sujsul, wan tiltiak ne tunal ken se kushtal, wan ne metzti muchi muchijki ken esti, ¹³ wan ne sitalmet ka ikajku wetzket talchi ken se kuyu kitamima itajtakil selek kwak se wey ejekat kitzejtzelua; ¹⁴ wan ne ilwikak puliwik ken mukukulua se amat, wan muchi ne tejtepet wan ne ijislaj mijkwanket ka senkak.

¹⁵ Wan ne tatuktianimet ipal ne taltikpak, wan ne weymet, wan ne miaktuktianimet, wan ne kipiat wey, wan ne tajtajpaltik, wan muchi ne tepaltekitinimet wan muchi ne insel intejtekuyu minashket ijtik ne ujustut wan ijtik ne tejtesual ipal ne tejtepet, ¹⁶ wan kinhilwiat ne tejtepet wan ne tejtesual: "Shiwetzikan tujpak wan shitechinayakan ma inte techita ne muetztuk ijpak ne kuijpal wan itech ne ikwalan ne ichkakunetzin, ¹⁷ ika ajsik ne wey tunal ipal ne inkwalan, wan ká weli naka ejkatuk?

7 Tipan nikitak nawi tanawatiani ejejkatuk tik ne nawi itzun ne taltikpak kipachuat ne nawi ejekat ipal ne taltikpak pal se ejekat inte yawi kishpitza ne tal nian ne at nian muchi ne kwajkwawit.

² Wan nikitak ukse tanawatiani kutejku kan kisa ne tunal, wan kipiatuya ne isaj ne Teut yultuk. Wan se kintzajtzalij ne nawi tanawatiani ne kinmakaket ma welit kijtakuat ne tal wan ne at, ³ ina: "Maka shikchiwili tatka ne tal nian ne at nian ne kwajkwawit hasta ma tiktalilikan ne tekitinimet ipal ne tuTeut se sajti pak ne inkwatapal."

⁴ Wan nitakakik keski ne musajtalilijket: nemiket sentzunti unpual wan nawi mil ne musajtalilijtiwit ipal muchi ne trijtribuj ipal ipilawan Israel:

⁵ ipal itribuj Yuda, majtakti-ume mil musajtalilijket;

ipal itribuj Reuben, majtakti-ume mil;

ipal itribuj Gad, majtakti-ume mil;

⁶ ipal itribuj Asher, majtakti-ume mil;

ipal itribuj Naptalim, majtakti-ume mil;

ipal itribuj Manashe, majtakti-ume mil;

⁷ ipal itribuj Shimon, majtakti-ume mil;

ipal itribuj Lewi, majtakti-ume mil;

ipal itribuj Isakar, majtakti-ume mil;

⁸ ipal itribuj Zebulun, majtakti-ume mil;

ipal itribuj Yosep, majtakti-ume mil;

ipal itribuj Ben-Yamin, majtakti-ume mil musajtalilijket.

⁹ Tipan nitachishki wan nemik se wey miaktal inte aka weli kipua ipal muchi ne tejtechan, trijtribuj, tajtal wan tajtaketzalis ejejkatuk ishpan ne kuijpal wan tik itachialis ne ichkakunetzin ijtik ijistak wipil iwan pajpalmaj ijtik inmejmey, ¹⁰ wan tzajtzit:

¹¹ Wan muchi ne tanawatianimet kiyawalujket ne kuijpal, ne noymet wan ne nawi tay yujyultuk; wan mutamutaket talchi iishpan ne kuijpal wan mutankwaketzket iishpan ne Teut ¹² wan inat:

¹³ Wan nankilij se pal ne noymet, yaja nechilwia: "Ini ká mutakentijtiwit ijtik inwijwipil istak, ká yejemet wan kanka walajtiwit?" ¹⁴ Wan nikilwij: "Tajtzin, anka taja tikmati." Wan nechilwij:

Tatzutzunat ne tanawatianimet

8 Wan kwak kitapuj ne tipan sajti, ne chikume, tzitzikayak nujme ne ilwikak achka tajku horaj.

² Wan nikitak ne chikume tanawatiani ne nemituyat iishpan ne Teut, wan kinmakaket chikume trompetaj.

³ Wan ukse tanawatiani ajsik wan mutalij itech ne tikashit. Kipiatuya se pupuchkumit ipal teukwit wan kimakaket wey tapupuch pal kitatia iwan ne teujteutajtanilis ipal muchi ne tayulmatit ijpak ne tikashit ipal teukwit ne nemi iishpan ne kuijpal. ⁴ Wan ne ipukyu ne tapupuch iwan ne teujteutajtanilis ipal ne tayulmatit kiski tik imey ne tanawatiani wan tejkuk tik itachialis ne Teut. ⁵ Wan ne tanawatiani kikwij ne pupuchkumit wan kiten iwan ne tit ipal ne tikashit wan kitamutak talchi. Wan tikwinik wan tzalanik wan takipinik wan ulinik.

⁶ Wan ne chikume tanawatiani ne kipiatuyat ne chikume trompetaj kiajshitijket pal tatzutzunat.

⁷ Wan tatzutzun ne achtu wan tepewket ne tejtesijkwil wan shinik tit malijtuk iwan esti wan mutamin ijpak ne tal, wan muchichinuj ne yeshtakutun ipal ne taltikpak wan mutatijket ne yeshtakutun ipal ne kwajkwawit, wan tatak muchi ne sakat shushuik.

⁸ Wan tatzutzun ukse tanawatiani wan ken se tepet wey chichinujtuk tik tit mutamutak ijtik ne weyat, wan ne yeshtakutun ipal ne weyat muchijki esti, ⁹ wan mikik ne yeshtakutun ipal muchi tay muchijtuya yultuk tik ne weyat, wan ne yeshtakutun ipal ne bajbarcoj pulijket.

¹⁰ Wan tatzutzun ukse tanawatiani, ne yey, wan kiski ka ikajku wan wetzki talchi se wey sital ken se ukut tata, wan wetzki ijpak ne yeshtakutun ipal ne ajapan wan ijpak ne ijishat kan punit ne ajat. ¹¹ Wan ne sital itukay ne Chichikwawit, wan ne yeshtakutun ipal ne ajat mukwepket chichikwawit wan ne takamet mikiket ipanpa ne at ika muchijki achichik.

¹² Wan tatzutzun ukse tanawatiani, ne nawi, wan kwaluk ne yeshtakutun ipal ne tunal, ne yeshtakutun ipal ne metzti wan ne yeshtakutun ipal ne sitalmet. Kunyuakisket ne yeshtakutun inpal, wan ne tunal inte tajtawij se yeshtakutun, wan ne tayua kenhaya.

¹³ Wan nitachishki wan nikakik se kwawti tik itajku ne ilwikak tzajtzi wan ina: "Ay, ay, ay, ne taltikpak chanejket, kwak yawi mukaki ne intrompetaj ne uksejse yey tanawatiani ne yawit tatzutzunat!"

9 Wan tatzutzunki ukse tanawatiani, ne makwil, wan nikitak se sital kistuk tik ne ilwikak wan wetztuk talchi. Wan kimakaket ne taiwan mutentzakwa wan mutentapua ne shaput ipal ne miktan, ² wan kitapuj ne shaput ipal ne miktan, wan se kiski tik ne shaput wan waltejkuk ken pukti ipal se wey hornilloj, wan kunyuakiski ne tunal wan ne ejekat iwan ne ipukyu ne shaput, ³ wan kisket tik ne pukti se chapulintal nujme, wan kinmakaket tatuktilis kenha ken ne tatuktilis ipal ne kujkulut ipal ne tal, ⁴ wan kinhilwijket ma inte kichiwilikan tatka ne sakat ipal ne tal, nian muchi tay shushuik, nian muchi ne kwajkwawit, ma kinchiwilikan sema ne takamet ne inte kipiat ne isaj ne Teut ijpak inkwatapal. ⁵ Wan kinmakaket ma inte welikan kinmiktiat asunte ma kichiwakan ma kikukua sejse makwil metzti, wan yaja ken techkukua kwak tatzupina se kulut. ⁶ Wan tik uni tujtunal ne takamet yawit kitemuat mikilis, wan te yawit kiajsit, wan yawit kielewiat mikit wan ne mikilis chulua wejka.

⁷ Wan ne chapulin muita kenha ken se caballoj ne muajshitijtuk pal tasuma, wan ijpak ne intzujtzuntekun ken yajyawal ne kenha ken teukwit, wan ne inhijishkalyu ken inhijishkalyu takamet. ⁸ Wan kipiatuyat itzunkal ken itzunkal ne siwat, wan ne intajtan ken itajtan se leon. ⁹ Wan ne inhejelpan ken ipal tepusti, wan kwak patanit ne ikuskus ne inhejtapal ken ne chachalaka ipal ne tajtawikani ne kisajsakat miak caballoj kwak mutaluat yawit tasumat. ¹⁰ Wan kipiat inkwijkwitapil kenha ken kujkulut, wan kipiat tzujtzupinka, wan ijtik ne inkwijkwitapil kipiat ne intatuktilis pal kinchiwiliat tay teyek ne takamet ijtik makwil metzti. ¹¹ Kintekimaka se tatuktiani; yaja ne tanawatiani ipal ne miktan, tik itaketzalis ne Yudayujmet itukay Abadon, wan tik Nawat itukay Teijtakuani.

¹² Kiski se Ay. Tipan witzet uk ume Ay.

¹³ Wan tatzutzun ukse tanawatiani, ne chikwasen, wan nikakik tzalani ken se ne nawi cachoj ipal ne tikashit ipal teukwit iishpan ne Teut ¹⁴ kinhilwiat ne tanawatiani chikwasen, ne kipiatuya ne trompetaj: "Shikinmakishti ne nawi tanawatiani ijilpituk itech ne wey apan Perat." ¹⁵ Wan mumakishtijket ne nawi tanawatiani ne muajshitijtiwit ipal ne horaj wan tunal wan metzti wan shiwit, pal kinmiktiat ne yeshtakutun ipal ne takamet, ¹⁶ wan ne tasumanimet ijpak caballojmet nemiket ume tzunti mil wipta mil; nitakakik ne tapual.

¹⁷ Wan ijkini nikitak ne itachialis ne caballojmet wan ne ijpak muejmuetztuk: kipiatuyat inhejelpan itachishka ne tit wan shushultik wan kustik, wan ne intzujtzuntekun ne caballojmet ken intzujtzuntekun lejleon, wan tik ne intejten kisa tit wan pukti wan azufrej. ¹⁸ Iwan ini yey, ne tit wan ne pukti wan ne azufrej, ne yeshtakutun ipal ne takamet mikiket, wan ne tay kisa tik ne intejten, ¹⁹ ika ijtik ne caballojmet tatuktiat ne inten wan ne inkwijkwitapil, ka ne inkwijkwitapil kenha ken kujkuat, kipiat intzujtzuntekun wan inwan tachaluat.

²⁰ Wan ne uksejse takat ne inte mikiket inpanpa yejemet nusan inte muyulpataket ipanpa tay yejemetsan kichijtuyat pal te mutankwaketzat inhishpan nawalmet wan teujteutzitzin ipal teukwit wan tumin wan tet wan kwawit, ne inte welit tachiat o takakit o nejnemit, ²¹ wan te muyulpataket ika tamiktiat wan mupajtiat wan tatzinhejenchiwat wan techtekit.

10 Wan nikitak ukse tanawatiani hombron temu tik ne ilwikak takentijtuk iwan se mishti, kipia ne kusamalut ijpak ne itzuntekun, wan ne iishkalyu ken ne tunal, wan ne ijikshi ken tajtaketzal ipal tit; ² wan kipiatuya tik ne imey se amatzin tapujtuk, wan kitalij ne ikshi iyekkan ijpak ne weyat wan ne ukse ikshi ijpak ne tal, ³ wan tzajtzik ken tzajtzi se leon, wan kwak tzajtzik tanutzket nusan ne chikume tikwinit iwan ne inkujkupak, ⁴ wan kwak tanutzket ne chikume tikwinit niknekituya nitajkwilua, wan nikakik se tik ne ilwikak ina: "Shiktzakwa tay ne tanutzket ne chikume tikwinit, maka shitajkwilu tay inatiwit."

⁵ Wan ne tanawatiani ne nikitak ejkatuk ijpak ne weyat wan ijpak ne tal kiajkukij ne imey iyekkan hasta ne ilwikak, ⁶ wan kichijki jurar ipanpa ne yultuk pal senpa wan senpa, ne kichijki ne ilwikak wan muchi tay nemi ijtik yaja, wan ne tal wan muchi nemi ijtik yaja, wan ne weyat wan muchi tay nemi ijtik yaja, ka "ne tujtunal intea kanaj, ⁷ wan tik ne tujtunal kwak yawi tanutza ne tanawatiani chikume, kwak yaja yawi tatzutzuna, yawi tami ne ichtaka ipal Teut ken kinyeknawatij ne itejtekitini wan itajtaketzani."

⁸ Wan yajane ne nikakik tik ne ilwikak nechnutzki senpa ina: "Shu shalkwi ne amatzin tapujtuk tik ne imey ne tanawatiani ne ejkatuk ijpak ne weyat wan ijpak ne tal!" ⁹ Wan niajki itech ne tanawatiani wan nikilwij ma nechmaka ne amatzin, wan nechilwia: "Shikwi wan shiktulu, wan yawi chichikisa ne muijti, wan melka uni ne muten yawi nemi tzupelek ken nekti."

¹⁰ Wan nikwij ne amatzin tik ne imey ne tanawatiani wan niktuluj, wan yaja tik ne nuten ken nekti tzupelek, wan kwak nikwajtuya yaja mukwepki chichik tik nuijti, ¹¹ wan nechilwiat: "Tinemi pal titaketza senpa ishpan sujsul miak techan, tal, taketzalis wan tatuktiani."

11 Wan nechmakaket se uat ne muita ken se kwawit, wan ina: "Shu shiktamachiwa ne iteupantzin ne Teut wan ne tikashit wan ne mutankwaketzat kalijtik, ² wan shikajkawa ne tenkal tatenpan ne teupantzin, maka shiktamachiwa uni, ika yaja ipal ne tejtechan, wan yawit taksat ijpak ne itechan Teut ijtik unpual-ume metzti. ³ Wan nikinhajkawas ne ume ne taneshtiat ne tejkia nupanpa ma taketzakan ipal Teut mil-ume-tzunti-yeshpual tunal tajtakentijtuk tik kushtalkwachti."

⁴ Ini ne ume kuyuolivaj wan ne ume tawilkal ejejkatuk iishpan ne tajtzin ipal ne taltikpak. ⁵ Wan su aka kineki kinchiwilia tatka, yawi kisa tit tik intejten wan yawi kintulua ne kinekit kijtakuat. Wan su aka yawi kineki kinchiwilia tatka, ijkiuni yawit mikit. ⁶ Yejemet kipiat ne tatuktilis pal kitzakwat ne ilwikak pal kiane inte yawi wetzi at tik ne tujtunal ipal ne inteutaketzalis, wan kipiat tatuktilis ijpak ne at pal kikwepat esti wan pal kitasat ne tal iwan muchi ne kujkukulis keman kinekit.

⁷ Wan kwak yawit tamit taneshtiat ne tejkia, ne tekwani ne kisa ne miktan wan tejku witz, yaja yawi kinsuma wan yaja weli mas wan yawi kinmiktia; ⁸ wan ne inmijmikini muajsisket tik itajku ne weytechan ne munutza ma tinakan Sodom wan Egipto, kan ne nusan mucruzpiluj ne intajtzin; ⁹ wan sejse ipal ne tejtechan wan trijtribuj wan tajtaketzalis kinhitasket ne inmijmikini ijtik yey tunal wan tajku, wan ne mijmikini inte kinhajkawasket kintaliat ijtik se shaput, ¹⁰ wan pajpakisket ne chanejket pak ne tal inpanpa wan muyulkwesusket wan mutakulisket sejse wan sejse, ika uni ume taketzani kichijket ka kinkukua ne chanejket pak ne tal.

¹¹ Wan kwak panutiwit ne yey tunal wan tajku, se iijiu yultuk ne kiski itech ne Teut kalakik ijtik yejemet wan muketzket ikshipan wan mumutijket ne tachiat nemit, ¹² wan kikakket se tik ne ilwikak taketza wan ina: "Shitejkukan nikan!" Wan tejkuket ka ikajku ijtik ne mishti, wan tachishket ne kinekit kinhijtakuat. ¹³ Wan tik uni horaj ulinik sujsul, wan wetzki se majtaktakutun ipal ne techan, wan tik ne talulin mikiket chikume mil takat, wan ne sejseuk nakaket iwan mawi wan inaket ka wey ne Teut ipal ne ilwikak.

¹⁴ Yajki ne ukse Ay. Né witz ne yey talul.

¹⁵ Wan tatzutzun ne tipan tanawatiani, ne chikume, wan tzajtziket wey tik ne ilwikak inat:

¹⁶ Wan ne senpual-nawi noymet iishpan ne Teut, muejmuetztuk ijpak ne inkujkuijpal, mutamutaket talchi wan mutankwaketzket ishpan ne Teut, ¹⁷ wan inat:

¹⁹ Wan tapuik ne iteupantzin ne Teut ne nemi tik ne ilwikak, wan muitak ne takukal ipal ne isentaketzat tik ne iteupantzin. Wan takipinik wan tzalanik wan tikwinik wan ulinik wan tepewket wey tejtesijkwil.