Chronological
Maka shimutenewakan
14 Shikwikan yek ne teuk ujuksituk tik intayulmatilis, wan maka shinajnankilikan ipanpa tajtajtanilis.
2 Ne tayulmati, welit tinat ka yaja ken se weli kikwa muchi. Ne te uksituk, ken se kukuya ne sema weli kikwa kilit. 3 Ne takwa, ma te ina ka te tatka ipatiw ne te takwa, wan ne te takwa, ma te ina su yek ne takwa, ika ne Teut kikwijtuk yek.
4 Ká taja pal tina su yek ne tepal kaltekitini? Semaya ne itekuyu yawi kita su naka o su wetzi. Wan yawi naka, ika ne itekuyu kipia itajpal pal kiselia ejkatuk.
5 Sejse inat ka te kenhat muchi ne tujtunal ipal ne shiwit pal titajpiat ne ijilwit, wan sejse inat ka muchi ne tujtunal kenhat. Ma muchi kimatikan tay kimatit. 6 Ká ne kishkejketza ne tunal, kishkejketza ipanpa ne Teut; nusan ne takwa, takwa ipanpa ne Teut, ka kilwia panpadiush; wan ne te takwa nusan te takwa ipanpa ne Teut wan kilwia panpadiush!
7 Ika nian se pal tejemet yultuk ipal isel, nian aka miki ipal isel: 8 su tiyujyultuk, tiyujyultuk ipal ne Tajtzin, wan su timikit, timikit ipal ne Tajtzin. Yajika, su tiyujyultuk wan su timikit, tejemet tiipal ne Tajtzin. 9 Yaja taika ne Mawaltijtuk mikik wan muketzki, pal muchiwa tajtzin ipal ne miktiwit wan ne yujyultuk.
10 Taja taika tina su yek ne muiknew? Wan taja nusan, ken ka tiaw tina ka te tatka ipatiw ne muiknew? Su muchi tiawit timutaliat iishpan ne ikalpuli ne Teut, 11 ika muijkwilujtuk:
"Ken naja niyultuk," ina Tutajwan,
"nuishpan mutankwaketzasket muchi
wan muchi inasket ka yek ne Teut!"
12 Yajika tel, muchi tejemet tiawit timuishpanuat iwan ne Teut, sejse ika, pal yaja kita tay tikchijtiwit.
13 Yajika nina ma intea timutenewakan ne se iwan ne seuk, mas yek shiktenewakan su aka kitalilia ne iiknew se kan yaja weli mukshichalua wan tatzunchalua. 14 Nikmati, wan ne tajtzin Yeshu kichijtuk ka nikmati yek, ka te nemi tatka tay susulnaj isel, wan semaya ne tay muishkejketza susulnaj, yaja susulnaj. 15 Su kikukua ne muiknew ipanpa ne takwal, kineki ina ka tea timuwika iwan tetasujtalis. Maka shikpulu ipanpa ne mutakwal se ká mikik ne Mawaltijtuk ka imaku. 16 Ma te kukujtaketzakan, tel, ipanpa tay tikchijtuk melka yek. 17 Ika ne itatekimakalis ne Teut te tay tikwat wan tay tikunit, yaja tamelakchiwalis wan nejmachnemilis wan pakilis ipanpa ne Ijiutzin. 18 Ne ká tekiti ijkiuni ajwiak ipal ne Teut, wan ne takamet nusan kitat yek.
19 Kiane tel, tiakan ipan ne tay ipal ne nejmachnemilis wan ne kalketzalis ijtik muchi. 20 Maka shiktajkali ipanpa takwal ne itekiw ne Teut! Melka muchi pupujtuk, te yek ma se takwa ken kichiwa ka seuk mukshichalua; 21 yek ma te tikwakan nakat wan ma te tikunikan atata nian tatka taika weli mutasa ne muiknew.
22 Su taja tikpia tayulmatilis, shikpiaya tik itachialis ne Teut. Suertej kipia ne ká inte mutenewa ipanpa tay ne ipal ajwiak; 23 ne ká takwa iwan mawi, yaja te, yaja mutenejtuk ika te muwika iwan tayulmatilis; muchi tay te muchiwa iwan tayulmatilis, te nemi yek.
Tikinselikan ne inte chikawayatiwit
15 Muneki ma tikselikan tejemet ká tikpiat fuerzaj ne inkujkukulisyu ne te chikawayatiwit, wan te ma timupaktikan tejemetsan. 2 Tikpaktikan muchi tejemet ne tuiknew pal yek, pal muskalia. 3 Ne Mawaltijtuk nusan te mupaktij isel, sute, ken muijkwiluj:
"Ne mujmutajtawelilis ipal ne metzijilwiat wetzket nujpak."
4 Ika ne tay muijkwiluj achtu, muijkwiluj ma timumachtikan, pal kiane ma titanejmachselikan wan ma techpalewikan ne ijijkwilujtuk, wan ijkiuni ma tikpiakan tejchialis. 5 Ma metzinpalewi ne Teut ipal tanejmachselilis pal anmuwikat yek sejse iwan sejse ken ina ne Mawaltijtuk Yeshu, 6 pal anhinat, ken sesan, ka wey ne Teut wan iteku ne tutajtzin Yeshu Mawaltijtuk.
7 Yajika shimukwikan yek sejse wan sejse, ijkiunisan ken ne Mawaltijtuk metzinkwij pal ma inakan ka wey ne Teut, 8 ika nimetzinhilwia ka ne Mawaltijtuk tekitki ipal ne mujmuyawaltektuk ka imaku ne tejkia ipal Teut, pal kilwitia ka tejkia ne projpromesaj iwan ne tetekuwan, 9 wan pal inat ne tejtechan ka wey ne Teut ipanpa itetasujtalis, ijkiunisan ken muijkwilujtuk:
"Yajika niaw nina ka tiyek ijtik ne tejtechan
wan niaw nitakwika ipal ne mutukay."
10 Wan senpa ina:
"Shimuyulkwesukan, tejtechan, iwan n' itechan."
11 Wan senpa:
"Shinakan ka yek ne Tajtzin, tejtechan,
shinakan, muchi, ka yaja yek!"
12 Wan senpa ina Ishaya:
"N' inelwayu Yeshay mulinis,
muketzas kintuktia tejtechan
wan tejtechan kiyulmatisket."
13 Ne Teut, ne techmaka tejchialis, yawi metzintema iwan pakilis wan nejmachnemilis ika antayulmatit, pal antepewit iwan tejchialis ipanpa ne itajpal ne Ijiutzin.
Tamilis
14 Naja nina ka anmejemet, nukniwan, nusan annemit tejtentuk iwan yek wan muchi ne tamatilis, wan nikmati ka welit anmunawatiat anmusel. 15 Naja nikijkwilujtuk muchi ijkiunisan ken nikmati, melka anka nusan ankimatit anmejemet, pal ankielnamikit, wan niweli ipanpa ne tetasujtalis ne nechmakak ne Teut, 16 pal kiane nimuchiwa se itekitini ipal ne Mawaltijtuk Yeshu itzalan ne tejtechan wan pal nitamaka ne iyeknawatilis ne Teut, pal naka yek ne intetakulis ne tejtechan ipal ne Teut wan ne Ijiutzin.
17 Yajika nikpia ken tikweymatiskia ne Mawaltijtuk Yeshu ipal ne Teut. 18 Semaya niaw nimetzinhilwia ne tay nutech kichijki ne Mawaltijtuk pal ma kitakamatikan ne tejtechan: kineki ina ka niaw nimetzinhilwia tay inatuk wan tay kichijtuk, 19 iwan sejse pal muishmati wan sejse tay tetekia, itech ne Ijiutzin. Ijkiuni nipanutuk nitanajnawatia ipanpa ne Mawaltijtuk; nipejki tik Yerushalem wan nikiski pashalua hasta Iliria. 20 Ijkiuni nikchijki tay niweli pal nitayeknajnawatia nujme: te kan sekit tamachtijtiwita ipanpa ne Mawaltijtuk pal te niketza kal ijpak tepal tetzilnaj, 21 sute mas yek ken muijkwilujtuk:
"Ká ne inte muneshtilijtiwit ipanpa, yawit kitat,
wan ká ne inte takaktiwit yawit kishmatit."
22 Neka nishtuna wey niajsi anmutech. 23 Ashan tea nikpia nutekiw nikansan, wan kichiwa miak shiwit ka sujsul nikneki niaw nimetzinhita. 24 Kwak niaw nikisa nipashalua ka Espania, niknekiskia niaw anmutech nitachia wan ma shinechpalewikan pal niajsi ikuni, kwak tami nipanu anmuchan achtu.
25 Ashan niaw tik Yerushalem pal nitekiti ipal ne tayulmatit, 26 ika Macedonia wan Akaia kitaket yek ma kisentepewakan tumin ipal ne tayulmatit tik Yerushalem ne te kipiat tatka. 27 Yejemet kitaket yek; wan kinwikiliat, ika su kinpalewijtiwit ne tejtechan iwan ne tay kipiat ipal ne Ijiutzin, yek ma yejemet nusan kichiwakan achi pal kintakuliat tay munekit ipal ne tuweyka.
28 Kiane tel, kwak tami nikchiwa ini nutekiw wan nitemaka inwan uni tay kintakulijtiwit, niasneki tik Espania wan niaw panu kan annemit tik ne ujti. 29 Nikmati ka kwak niajsi anmutech, niaw niajsi iwan muchi ne iteteuchiwalis ne Mawaltijtuk.
30 Nimetzintajtani, nukniwan, ipanpa ne tutajtzin Yeshu Mawaltijtuk, wan ika ankitasujtat ne Ijiutzin, ma shimutatejtemuilikan nuwan pal ankitajtanit ne Teut 31 ma nechajkawa nichulua itech ijimey ne te tayulmatit tik Yudaya, wan pal ne tayulmatit tik Yerushalem ma kikwikan yek ne nutekiw, 32 pal weli niajsi anmutech ipanpa ne itaelewilis Teut nimusewia anmuwan.
33 Ma nemi anmuwan ne Teut ipal nejmachnemilis, amen!
Sejseuk pal tami
16 1-2 Ini ne tuiknew Poybe. Nimetzintajtani ma shikwikan yek anmutzalan, ken sejse tayulmatit. Ini siwat tekiti ipal ne sennemit ipal Kenkreay. Shikpalewikan iwan muchi tay yaja metzinhilwia ka muneki, ika yaja kipalewijtuk muchi tukniwan, wan naja nusan nechpalewij.
3 Shiktajpalukan Prisca wan Aquila, nutejtepalewiani tik tutekiw ipal ne Mawaltijtuk Yeshu; 4 yejemet mutemakaket pal nechishtiat melka welituskiat mikit yejemet nupanpa. Tesu naja nusel nikinhilwia panpadiush, nusan muchi ne sejsennemit ipal ne tejtechan. 5 Shiktajpalukan ne sennemit tik ne inkal nusan.
Shiktajpalukan nukunpa yektasujtatuk, Epaynetos, ká se pal ne ajachtu Cristianoj tik Asia.
6 Shiktajpalukan Maryam, ne ká sujsul kujkutiatuk anmupal.
7 Shiktajpalukan Andronikos wan Yunia, nukniwan ká iwan ninentuk ilpituk; muchi kishmatit uni tijtitanijtuk, ká muchijket Cristianojmet hasta achtu ka naja.
8 Shiktajpalukan Ampliatus, nukunpalej yektasujtatuk tik ne Tajtzin.
9 Shiktajpalukan Urbanus, tutepalewiani tik ne Mawaltijtuk, wan nukunpalej yektasujtatuk Estakus.
10 Shiktajpalukan Apeles, ne iyekitztuk ne Mawaltijtuk.
Shiktajpalukan muchi ichan Aristobulos.
11 Shiktajpalukan nuiknew Heriodion.
Shiktajpalukan muchi ká ipal ne Tajtzin ichan ne Narciso.
12 Shiktajpalukan Tripayna wan Triposa ne kujkutiat tekitit ipal ne Tajtzin.
Shiktajpalukan Persis yektasujtatuk, ká kujkutia wey ipal ne Tajtzin.
13 Shiktajpalukan Rufus, ne ishpejpentuk ipal ne Tajtzin, wan ne inan, ká nusan nunan.
14 Shiktajpalukan Asunkritos, Plegon, Hermes, Patrobas, Hermas wan ne tekniwan ne iwan nemit.
15 Shiktajpalukan Pilologos wan Yulia, Nereus wan ne ieltiw, wan Olunpas, wan muchi ne tayulmatit ne nemit inwan.
16 Shimutajpalukan wan shimutennamikikan ken tayulmatinimet. Muchi ne sejsennemit ipal ne Mawaltijtuk metzintajpaluat!
17 Nimutajtawelia anmuwan, nukniwan, ma shikpajpachiwikan, ika nemit sejse ká kichiwat tzajtzayanilis wan tajtatzunchaluas ipatka ne tamachtilis ne anmumachtijtiwit. Shikinwejkaajkawakan, 18 ika yejemet inte tekitit ipal ne tutajtzin ne Mawaltijtuk, semaya tekitit ipal ne iijti, wan inat tay yektzin pal kishijshikuat ne melemet. 19 Ika kishmatit ne anmutetakamatilis nujme, wan naja nipaki. Melka uni, niknekiskia ma shikmatikan wey kwak annemit iishpan ne yek, wan ma te shimukwelpachukan iishpan ne teyek. 20 Ne Teut ipal nejmachnemilis yawia kichiwa ka antaksat ijpak ne Tenewani hasta ankimumushuat. Ma nemi ne teutasujtalis ipal tutajtzin Yeshu anmuwan!
21 Metzintajpaluat Timoteo ne nutepalewiani, wan nukniwan Lucius wan Yason wan Sosipatros. 22 Nimetzintajpalua naja, Tertius ne kijkwiluj ini amat, tik itukay ne Tajtzin. 23 Metzintajpalua Gaius ne ichan ninemi naja wan muchi ne sennemit. Metzintajpaluat Erasto, ne tuminpiani ipal ne techan, wan Quartus ne iikaw. (24) .
[Se teutajtanilis
25 Ma inakan senpa ka wey Yaja ká weli metzinmaka fuerzaj iwan ne nuyeknawatilis wan ne tanajnawatilis ipal Yeshu Mawaltijtuk, iwan ne taneshtilis ipal se ichtaka ne ikman te aka kimati katka; 26 ne muneshtijtuka ashan iwan ne tay kijkwilujket ne taketzanimet ika ne Teut pal senpa tatuktijtuk, pal takakit wan kitakamatit wan tayulmatit muchi ne tejtechan: 27 ne Teut, ne isel kimati muchi, itech Yeshu Mawaltijtuk, amen.]
Ne Bibliaj Tik Nawat · © 2008, 2012 Jan Morrow