Chronological

1 Naja, Pawlo, ititanijtuk ne Mawaltijtuk Yeshu ipanpa itaelewilis Teut, niktuktia ini tajkwilul itech ne tukniwan ne kiyulmatit ne Mawaltijtuk Yeshu. ² Ma metzinmaka ne Teut ká ne tuteku, wan ne tajtzin Yeshu Mawaltijtuk, tetasujtalis wan nejmachnemilis.

Tayektenewalis

³ Yektenejtuk ne Teut,

n' iteku tutajtzin Yeshu Mawaltijtuk,

ne techteuchij iwan muchi ne tajtayektenewalis ipal n' Ijiutzin,

tik ilwikak ka ikajku,

tik ne Mawaltijtuk.

⁴ Techishpejpen ijtik yaja achtu ka mutzintij ne taltikpak

ma timuchiwakan ipal Teut,

ma inte tikpiakan nian se tupelech tik itachialis

ipanpa itetasujtalis.

⁵ Yaja tatuktij kwak pejki muchi

ka tiawit timuchiwat ikukunew

ipanpa Yeshu Mawaltijtuk

ken yaja kinekik wan kitak yek,

⁶ pal kiane inat ka yek

itawilyu n' itetasujtalis;

yajika techmakatuk itetasujtalis

ijtik ne tasujtatuk,

⁷ ká ipanpa tikpiat tamakishtilis tik n' iesyu,

wan tetapupulwilis ipal tay tikchijtiwit teyek,

ika sujsul wey n' itetasujtalis,

⁸ wan techtepewilijtuk iwan wey tamatilis

⁹ pal tikmatit ne ichtaka ipal n' itaelewilis,

ken yaja kitztuk yek wan inatuk ka yawi kichiwa

¹⁰ pal kiane, kwak yekajtiwit ne tujtunal,

ma kisentepewa, itech ne Mawaltijtuk,

muchi tay nemi tik ilwikak wan pak tal ijtik yaja.

¹¹ Tejemet nusan, inatuk ka yawi techtakulia se tay tupal,

ken itajshitilis ne ká kichiwa muchi,

ken yaja kinekik ika ijkiuni munawatijtuk,

¹² pal kiane tiawit tinemit pal tinat ka wey n' itawilyu

ne ajachtu ká kiyulmatket ne Mawaltijtuk,

¹³ ká ne anmejemet nusan antakaktiwit ne palabraj tejkia,

ne yeknawatilis ipal ne anmutamakishtilis,

wan ankiyulmatket,

wan anmutetilijket iwan n' Ijiutzin ken sentaketztuk,

¹⁴ ne achtu takutun ipal tay yawi tupal

hasta ma tikpiakan muchi

pal inat ka yek wan inat ka wey!

Tutajtzin Yeshu Mawaltijtuk

¹⁵ Neka naja, ashan ka nitakaktuk ken ankiyulmatit ne Tajtzin Yeshu, wan ken ankitasujtat muchi ne tukniwan ne tayulmatit, ¹⁶ nina senpa panpadiush anmupanpa wan nimetzinhelnamiki tik ne nuteujteutajtanilis, ¹⁷ ma metzinmaka ne Teut ipal ne tutajtzin Yeshu Mawaltijtuk, ne Teteku tzitzinaka, ne Ijiutzin pal ankishmatit iwan tamatilis wan taneshtilis ¹⁸ wan ma kitawilu ne anmuijish wan ne anmuyujyulu pal ankishmatit ne tejchialis ipal ne itanutzalis, wan ken sujsul wey tay yawi kinmaka ne tayulmatit, ¹⁹ wan ken tetekia wey ne itajpal tupal tejemet ká titayulmatit ipanpa ne itekiw ne kichijtuk iwan ne itajpal wey, ²⁰ tay yaja kichijki itech ne Mawaltijtuk: yajika kiyulkwepki kwak miktuk wan kitalij ka imayekkan tik ne ilwikak ka ikajku, ²¹ mas ikajku que muchi ne tatuktianimet, wan muchi tay yejemet welit wan tatuktiat, muchi ne intajtzinkayu wan muchi ne intujtukay ne mutaliliat, te semaya tik ini taltikpak, nusan hasta tik ne tujtunal pal ne musta. ²² Yaja muchi kituktijtuk itan ne ijikshi wan yajasan mutalij itzunpan muchi ne sennemit. ²³ Ne sennemit ne iweyka wan ne tepewilis ipal yajane ká kitema muchi ijtik muchi tejemet.

Ne itetasujtalis ne Mawaltijtuk techpalewia

2 Anmejemet nusan! Achtu anmiktuyat ipanpa muchi tay ankichijket tay teyek, ² ika anmuwikaket ken muchi tay ipal ini taltikpak, ken ne ká tatuktia iwan ne itajpal ne ejekat ipal ne iijiu ne ashan tekiti ijtik yejemet ká inte tayulmatit, ³ wan tejemet kenhaya timukweptuyat niakeman, itzalan yejemet, tikchiwat tay kielewia ne tunakayu wan tay tikpiatuyat tik tuyulu, wan tejemet, kenha ken ne sekit, tinestiwit ken kukunet ipal ikwalan Teut. ⁴ Melka uni, ne Teut kineki techpalewia ika techtasujta iwan wey tetasujtalis. ⁵ Yajika, kwak timiktuyat ipanpa tay tikchijket tay teyek, yaja techyulkweptuk iwan ne Mawaltijtuk. Ne itetasujtalis metzinpalewijtuk. ⁶ Wan iwan ne Mawaltijtuk Yeshu, techketztuk wan techtalijtuk tik ne ilwikak ka ikajku, ⁷ pal kiane, tik tujtunal witzet, ma muilwiti ka tetekia wey ne itetasujtalis wan yajika techchiwilijtuk tay yek itech ne Mawaltijtuk Yeshu, ⁸ ika iwan tetasujtalis anmupalewijtiwit ipanpa tayulmatilis, wan te anmusel, sute ne Teut metzintakulij, ⁹ tesu ipanpa anmutekiw, pal te aka muweymati, ¹⁰ ika tejemet techchijtiwit wan techketztiwit itech ne Mawaltijtuk Yeshu ipal ne yejyek tutekiw ne kiekichijtuk ne Teut ken yaja inatuk ka tiawit tikchiwat.

Ken sesan tik ne Mawaltijtuk

¹¹ Yajika, shikelnamikikan ka anmejemet, ne tejtechan tik anmunakayu, ká ne metzinhilwiat katka "tzuntepulmet" ne muilwiat "yajyawaltektuk" ipanpa tay kichijtuk se imey tik innakayu, ¹² ikman te ankipiatuyat Mawaltijtuk, teuk ankishmatit katka Israel, wan te annemituyat ijtik ne sentaketzat ipal ne promesaj, nian ankipiatuyat tejchialis nian Teut tik ne taltikpak. ¹³ Ashan, anmejemet ká ikman nemituyat wejka ne Mawaltijtuk Yeshu anmuchijtiwit sejse ká nemit inawak, iwan ne iesyu ne Mawaltijtuk, ¹⁴ ika yajaya ne tunejmachnemilis, ne kikweptuk ne ujume ken sesan, ne kitajkaltuk ne tapepechul tik itajku, kineki ina ne taishijialis, tik ne iweyka ¹⁵ wan kipulujtuk ne tajtuli ipal tajtatuktilis ne mutuktijtiwit, pal kiane kinketza ne ume ijtik yajasan ken sanse yankwik takat wan kalwika nejmachnemilis, ¹⁶ wan pal techsenputzua ne tuumeshtin tik sanse tuweyka iwan ne Teut, itech ne cruz, wan kimiktia ne taishijialis ijtik yajasan, ¹⁷ wan walaj metzinmaka ne yeknawatilis ipal nejmachnemilis anmupal, ne nemituyat wejka, wan nusan ipal ne nemituyat inawak; ¹⁸ ika ijtik yaja, ne tuumeshtin tikpiat ne ujti tik sanse Ijiutzin pal tiajsit itech ne Teteku.

¹⁹ Kiane tel, teuk anhejkunimet, ashan antechanchanejket iwan ne tayulmatit, anmejemet sejse ipal ne ikal ne Teut ²⁰ ne muketztiwit ijpak ne tetzilnaj ipal ne tijtitanijtuk wan taketzanimet, wan ne Mawaltijtuk Yeshu ne tzintet ²¹ pal ijpak, asu mupiki yek, muchi ne kal yawi weya wan mukwepa se teupan ipal ne Tajtzin Teut, ²² wan pal anmejemet nusan yawit muketzat wan mukwepat se muchantiluyan ipal ne Teut ijtik ne Ijiutzin.

Pawlo tajpia ne teutasujtalis ipal ne tejtechan

3 Ipanpa uni, naja, Pawlo ne ilpituk ipal ne Mawaltijtuk, anmupal, ne tejtechan, nina:

² Asu antakaktiwit ken nechmakaket ne tajpialis ipal ne teutasujtalis anmupal, ³ ken nechneshtilijtiwit pal nikmati ne ichtaka, ken ninak achtu ⁴ pal kiane, kwak anhamataketzat, welit ankimatit ken ka naja nikishmati ne ichtaka ipal ne Mawaltijtuk, ⁵ se tay te kinneshtilijket ne takamet wan siwatket pal ikman ijkiuni ken ashan kinneshtilijket ne tijtitanijtuk ipal Teut wan ne taketzanimet itech ne Ijiutzin: ⁶ ka ne tejtechan nemit pal kipiat tay ipal, wan yejemet ipal sanse inweyka wan muchi yejemet tukunpawan ipal ne promesaj ipanpa ne Mawaltijtuk Yeshu, ika tikpiat ne yeknawatilis. ⁷ Yaja taika nitekiti, ika ne Teut tik itetasujtalis nechtakulij nutekiw ma nikchiwa wan ma nechpalewi; ⁸ melka te nitatka ijtik muchi ne takamet wan siwatket ipal Teut, naja nechmakak uni teutasujtalis, ma nikinmaka ne tejtechan ne yeknawatilis ipanpa muchi tay ipal ne Mawaltijtuk ne inte aka weli kimati, ⁹ wan ma nikintawilu muchi pal kitat ne tajpialis ipal ne ichtaka ne minashtuk ikman wan hasta ashan ijtik ne Teut ne kichijki muchi, ¹⁰ pal kiane welit kinneshtiliat ne tatuktianimet wan ne tatekimakat tik ne ilwikak ka ikajku, itech ne sennemit, ne itamatilis ne Teut ipanpa muchi, ¹¹ ken itajshitilis pal senpa, itech ne Mawaltijtuk Yeshu, ne tutajtzin, ¹² ká iwan tikmatit ka tikpiat ne ujti melaknaj hasta yaja ika tikyulmatit.

¹³ Neka niktajtani ma inte shikakasiwikan ipanpa ne nupejpenaj ka anmumaku; anyawit tzitzinakat inpanpa.

Se teutajtanilis

¹⁴ Yajika nimutankwaketza iishpan ne Teteku ¹⁵ ká itech kisket wan mutukaytiat muchi ne tejtechan tik ne ilwikak wan pak ne tal, ¹⁶ ma kichiwa, ken yaja kipia muchi itawilyu, ma shichikawayakan iwan itajpal ipanpa ne iijiu tik ne takat o siwat ne tikpiat ijtik tejemet, ¹⁷ pal kiane yawi muchantia ne Mawaltijtuk, ipanpa tayulmatilis, ijtik anmuyujyulu wan yawi kipia inelwayu wan itetzilnaj tik tetasujtalis, ¹⁸ pal welit ankishkejketzat yek, iwan muchi ne tayulmatit, ken yaja patawak, wan weyak, wan kojtik wan miktan, ¹⁹ wan pal welit ankishmatit ne itetasujtalis ne Mawaltijtuk ne inte weli mumati ken wey, pal ma shitemikan iwan muchi ne itepewilis ne Teut.

²⁰ Ne weli muchi wan weli kichiwa sujsul mas que tay ne tiktajtaniliat wan tiyultaketzat iwan ne tutajpal ne tekiti ijtik tejemet, ²¹ ma tzitzinaka tik ne sennemit wan tik ne Mawaltijtuk Yeshu ashan wan senpa. Amen!

Tiktajpiakan ne tusesankayu

4 Nimetzintajtani naja tel, ne ilpituk ka imaku ne Tajtzin, ma shimuwikakan ken munekit ne munutztiwit, ika anmejemet kikwijtiwit ne tanutzalis: ² iwan kanawakmatilis wan yulyamanikayu wan weytejchialis; shimuselikan sejse iwan sejse ipanpa tetasujtalis; ³ shimutatemuilikan pal mutajpia ne imusentalilis ne Ijiutzin ijtik ne ilpika ipal ne nejmachnemilis, ⁴ sanse iweyka, sanse iijiu, ijkiunisan ken anmunutztiwit iwan sanse tejchialis ipal ne anmutanutzalis; ⁵ sanse tajtzin, sanse tayulmatilis, sanse teulyujmakalis; ⁶ sanse Teut wan Teteku ipal muchi ká nemi ijpak muchi, wan ka inmaku muchi, wan ijtik muchi.

Ne tutejtetakulisyu

⁷ Muchi tejemet techmakatiwit tay tikpiat, melka te tikenhat, wan ne se wan ne seuk kipia tay ipal ken kitakulij ne Mawaltijtuk. ⁸ Neka ina:

⁹ Kan ina ka tejkuk, kineki ina ka nusan temuk katani hasta ne tal itankupa. ¹⁰ Yajika, ne ká waltemuk, yajasan tejkuk ka né itzunpan muchi ne ilwikak pal ma yekawi muchi, ¹¹ wan yajasan techmakak ne tijtitanijtuk, ne taketzanimet, ne tayeknawatianimet, ne tajpianimet wan ne tamachtianimet, ¹² pal ma yekawikan ne tayulmatit ipal ne intekiw, pal tikishketzat tiawit ne iweyka ne Mawaltijtuk, ¹³ hasta timunamikit muchi iwan ne musentalilis ipal ne tayulmatilis wan ne taishmatilis ipal ne ikunew ne Teut, iwan ne takat yekajtuk, wan iwan ne tamachijka ipal ne iyekawilis ne Mawaltijtuk, ¹⁴ pal tea techtzejtzelu ne ejekat ken su timelemet kwak se tamachtia witz pal kishijshikua takamet wan siwatket ken weli. ¹⁵ Titaketzakan tejkia iwan tetasujtalis wan tiweyakan hasta ma mukwepa ne muchi tik ne ká ne itzuntekun: ne Mawaltijtuk, ¹⁶ ne ipanpa muchi ne iweyka, piktuk wan senputzujtuk itech muchi ne tajtakutun ken sejse weli wan kipia itekiw, yawi weya wan muishketza tik tetasujtalis.

Ne Cristianojmet nemit pal kipatat ne inmuwikalis

¹⁷ Yek, ini tay nimetzinhilwia wan nina ipanpa ne Tajtzin: makaya shimuwikakan ken muwikat ne tejtechan ne yultaketzat sejse tay te tatka ipatiw. ¹⁸ Yejemet kipiat kunyua ne intamatilis; te kishmatit ne yulkwilis ipal ne Teut ika te kimatit tatka wan ika takwawak ne inyulu. ¹⁹ Tea mumatit tatka, wan muajkawtiwit kichiwat ne tay susul ken muchi ne intajtaelewilisyu. ²⁰ Anmejemet te ijkiuni mumachtijtiwit itech ne Mawaltijtuk! ²¹ Asu ankikaktiwit wan anmumachtijtiwit itech Yeshu ijkiunisan ken tejkia, ²² nemit pal ankitamimat uni palantuk ne muwika ken ikman wan kielewia ne tay techshijshikua; ²³ nemit pal anmuyulyankwiliat tik anmutamatilis; ²⁴ wan nemit pal anmutakentiat iwan ne yankwik takat o siwat, ne muketztuk ken Teut: tik yekkaya tamelakchiwalis wan yulchipakayu.

Ken tinemit pal timuwikat

²⁵ Yajika, shikajkawakan ne sanka. Sejse anmejemet ma kilwi ne ikniwan sema ne tejkia, ika muchi tejemet titajtakutun ne se ipal ne seuk.

²⁶ Melka ankwalanit, maka shikchiwakan tay teyek.

Ma inte kalaki tunal achtu ma shikelkawakan ne anmukwalan, ²⁷ wan maka shikajkawakan kalaki mutech ne Tamintuk.

²⁸ Ne techtekini ma intea techteki asunte ma tekiti wan ma kichiwa tay yek iwan ijimey, pal kipia se chiupi pal kimaka ká muneki.

²⁹ Ma inte kisa tik anmuten nian se palabraj teyek, mas yek, su muneki, shinakan se tay yek wan weli tiskalia pal kinmaka ne takakit tetasujtalis, ³⁰ wan maka shikwalantikan ne Ijiutzin ipal Teut, ne iwan anmutetilijtiwit hasta ne tunal ipal tamakishtilis.

³¹ Muchi chichikayu, wan kwalan, wan teajwalis, wan tzajtzilis, wan kukujtaketzalis, ma muishti anmutech iwan muchi tay teyek; ³² shimuchiwakan yejyek wan yujyulyamanik iwan ne sekit, wan shimutapupulwikan kenha ken ne Teut metzintapupulwijtuk itech ne Mawaltijtuk.

5 Shimuchiwakan tel sejse ká kichiwat tay kichiwa ne Teut, ken kukunet yejyektasujtatuk, ² wan shimuwikakan iwan tetasujtalis kenha ken ne Mawaltijtuk ne techtasujtak wan mutemakak ka tumaku, pal kitakulia ne Teut se tay sea ajwiak.

³ Tatzinhejenchiwalis, wan muchi tay susul, wan tepalelewilis, ma inte keman mutukayti ijtik anmejemet, ken muneki iwan ne sejse ipal Teut, ⁴ nian se palabraj ne ipanpa welit tishpinawat, nian timeletaketzakan, nian se chuntal tay inte muneki, sema mas yek panpadiush, ⁵ ika shikmatikan ini: ka nian se tatzinhejenchiwani yawit kiajkawat kalaki tik ne itatekimakalis ne Mawaltijtuk wan ne Teut, nian se susul, nian se tepalelewiani, ika yajuni ken se ká kitennamiki teutzitzinmet.

⁶ Ma inte aka metzinshijshiku iwan pajpalabraj ne inte tatka ipatiw, ika yajika witz ne ikwalan ne Teut itech ne inte tetakamatit. ⁷ Kiane tel, maka shimuchiwakan inkunpalejwan, ⁸ ika ikman ankujkunyua katka; ashan anmejemet se tawil ipal ne Tajtzin. Shimuwikakan ken sejse ipal tawil! ⁹ Ika muita ne itakil ne tawil tik muchi yek wan tamelakchiwalis wan tejkia. ¹⁰ Shitachiakan tel tay ajwiak ipal ne Tajtzin. ¹¹ Wan maka shikunpachiwakan ne tejtekitilis ipal ne takumi ne inte tamakat tatka, mas yek shikajajwakan, ¹² ika se ishpinawa hasta su tinat ne tay yejemet kichiwat ichtaka. ¹³ Muchi tay ipanpa titeajajwat, ne tawil kineshtia, ¹⁴ ika muchi ne muneshtijtuk yaja tawil. Neka ina:

¹⁵ Shikitakan tel ken anyawit muwikat: inte ken melemet asunte ken sejse kimatit wey. ¹⁶ Maka shitunalpulukan ika ini tujtunal ipal teyek wey. ¹⁷ Yajika, maka shimuwikakan ken tzujtzuntet, shikmatikan tay ne itaelewilis ne Teut, ¹⁸ wan maka shimutawantikan iwan ne atata, ne kichiwa ka timuwikat ken te nemi yek, sute shimutemakan iwan ne Ijiutzin, ¹⁹ wan shitajtaketzakan iwan sajsalmoj wan tajtakwikalis ipal ne Teut; shitakwikakan wan shitatzutzunakan ipal ne Tajtzin ijtik anmuyulu; ²⁰ wan senpa shikilwikan ne Teut, ká ne Teteku, padiush ipanpa muchi, tik itukay ne tutajtzin Yeshu Mawaltijtuk.

Shiktasujta yek ne musiwaw!

²¹ Shimutakamatikan ne se iwan se seuk tik tetakamatilis ipal ne Mawaltijtuk. ²² Ne siwatket ma kitakamatikan ne inshujshulejyu ken kitakamatit ne Tajtzin, ²³ ika se takat kitekimaka ne isiwaw kenha ken ne Mawaltijtuk kitekimaka ne sennemit. Yajaya itamakishtiani ne iweyka. ²⁴ Wan ijkiunisan ken ne sennemit kitakamati ne Mawaltijtuk, ma kitakamatikan ne siwatket ne inshujshulejyu tik muchi.

²⁵ Ne takamet ma kitasujtakan ne isiwawan kenha ken ne Mawaltijtuk kitasujtak ne sennemit wan mutemakak ka imaku, ²⁶ pal ma kiekchiwa ipal Teut; yajika kiawij iwan ne pajpalabraj pal kipajtia, ²⁷ pal yajasan kishpanua iishpan yaja isel se sennemit tzitzinaka, nian tilwijtuk nian pustektuk nian tatka ijkiuni, pal naka yek ipal Teut wan inte kipia nian se ipelech.

²⁸ Ijkiuni ne takamet muneki ma kitasujtakan ne insijsiwawan, ken kitasujtat ne innakayu isel: ká kitasujta yek ne isiwaw, yajasan mutasujta; ²⁹ ika te aka kishijia ne iweyka, mas yek kitakwaltia wan kitajpia yek; wan ne Mawaltijtuk kichiwa kenhaya iwan ne sennemit, ³⁰ ika tejemet titajtakutun ipal ne iweyka.

³² Wey ini ichtaka! Naja nina ipanpa ne Mawaltijtuk wan ne sennemit. ³³ Melka uni, ma shiktasujtakan muchi anmejemet sejse isiwaw ijkiuni, ken yajasan mutasujta. Ne siwat, ma kitakamati ne ishulejyu.

Shiktasujta ne mutejteku wan ne mutekuyu

6 Ne kukunet, shiktamatikan ne anmutejteku ipanpa ne Tajtzin ika yaja tay yek. ² Ken nemi ijkwilujtuk:

Wan yaja ne achtu tuktijtuk iwan se promesaj, ika ina:

⁴ Wan ne tetekuwan, maka shikwalantikan ne anmukukunew; shikinhiskalikan wan shikinnawatikan yek."

⁵ Wan anmejemet ne tepaltekitinimet, shiktakamatikan ne ká anmutejtekuyu ipal anmuweyka iwan mawi wan ijtzilikalis, wan shimuchiwakan yujyulkanawak ken ne Mawaltijtuk. ⁶ Maka shitekitikan pal metzinhitat, ken kichiwa ne ká kineki ma kitakan yek ne sekit. Shimuchiwakan ken itejtekitini ne Mawaltijtuk, wan shikchiwakan ne itaelewilis ne Teut iwan muchi anmuyulu. ⁷ Shitekitikan iwan pakilis, ken antekitiskiat ipal ne Tajtzin wan tesu ipal tajtakamet, ⁸ wan shikmatikan ka tay ne se kichiwa tay yek, yaja tay yawi kikwi itech ne Tajtzin, su yaja tepaltekitini wan nusan su te. ⁹ Wan ne itejtekuyu tepaltekitinimet, shikchiwakan kenha inwan. Maka shikinmujmutikan. Shikmatikan ka ne ká nemi tik ne ilwikak yaja intajtzin wan anmutajtzin kenhaya, wan muchi ankenhat ipal.

Ken nemi pal titasumat

¹⁰ Pal tami, shichikawayakan iwan ne Tajtzin wan iwan ne itajpal. ¹¹ Shumet shimutzakwakan iwan muchi ne itajtaiwan ne Teut pal welit annakat ejkatuk iishpan ne itajtajpewal ne Tamintuk, ¹² ika te timutajtasat iwan se ken tuweyka ipal esti wan nakat sute iwan ne tatuktianimet, iwan ne tatekimakat, iwan ne kipiat intajpal ipal takumi ijtik ini taltikpak, iwan ne nawaltal teyek né tik ne ilwikak ka ikajku. ¹³ Yajika, shikanakan ne itajtaiwan ne Teut pal welit antasumat tik ne tunal teyek, wan pal welit annakat ejejkatuk kwak tamit ankichiwat muchi tay muneki.

¹⁴ Yajika tel, shimumashtatzakwakan iwan ne tejkia, wan tik anmuelpan shikwikakan ne tamelakchiwalis, ¹⁵ wan ne anmukak tik anmujmukshi, yaja ka anyawit muekchiwat iwan ne yeknawatilis ipal nejmachnemilis. ¹⁶ Shikanakan tik anmumey ne tepustzakka ipal ne tayulmatilis, pal iwan anwelisket kisewiat muchi ne mijmit tatat ipal ne inteyek, ¹⁷ wan shikwikan ne tzuntzakka ipal ne tamakishtilis wan ne espadaj ipal ne Ijiutzin, kineki ina ne ipalabraj ne Teut, ¹⁸ wan shitajtanikan wan shimutajtawelikan iwan ne Teut mujmusta, itech ne Ijiutzin, wan shikishpelwikan senpa wan shiteutajtanikan ipanpa muchi ne tayulmatit; ¹⁹ wan nusan nupanpa, shitajtanikan ma nikmati tay ninaskia kwak nimutenpelua ishpan muchi pal nitaneshtia ne ichtaka ipal ne yeknawatilis ²⁰ pal nikchiwa nutekiw, melka ninemi tepusilpituk, wan pal niweli nitanawatia melaknaj ken muneki.

Tami

²¹ Pal nusan anmejemet kimatit ken ijtuk nuwan wan tay nikchiwa, weli metzinhilwia muchi Tukikos, nuiknew yektasujtatuk, se yek tekitini ipal ne Tajtzin, ²² ká ne niktuktijtuk anmutech pal ma shikmatikan ken ijtuk tutech wan pal kinapalua anmuyujyulu.

²³ Tuteku ne Teut wan tutajtzin Yeshu Mawaltijtuk ma metzinmakakan nejmachnemilis, wan tetasujtalis iwan tayulmatilis. ²⁴ Ma kipiakan teutasujtalis muchi ne ká kitasujtat ne tutajtzin Yeshu Mawaltijtuk, ne te keman wilewi.