Chronological

5 Ika tikmatit ka su ini tawipanti tay tikpiat ijpak ne taltikpak mutajkali, ne Teut techmaka se kal ne te tikchijtiwit iwan ne tujtumey, ne welit tikpiat pal senpa tik ne ilwikak, ² wan tik yajini tijiumikit pal tikpiat ne kan tiawit timuchantiat tay ipal ne ilwikak wan tikelewiat timutzakwat ka né, ³ su kwak timutzakwat te tiawit timuajsit pejpetznaj. ⁴ Ika tejemet ká tinemit tik ne tawipanti tijiumikit itan tukimil, ika te tiknekit timupetztiliat sute ma timutzakwakan pal ne yultuk ma kitulu ne tay puliwi. ⁵ Ne ká techchijtuk ipal ini, yaja Teut, ne techmaka ne achtu ipal ne Ijiutzin.

⁶ Yajika senpa tiyulpakit wan tikmatit ka su timuchantiat ijtik ne tuweyka timuchantiat wejka ne Tajtzin, ⁷ ika tinejnemit ipanpa tayulmatilis, tesu ipanpa tachialis. ⁸ Tiyulpakit wan tikitat mas yek ma tikajkawakan ne tuweyka wan tiawit timuchantiat itech ne Tajtzin. ⁹ Neka tikchiwat tay tiwelit pal su timuchantisket kan tinemit wan su tiasnekit, ma timuchiwakan yejyek ipal. ¹⁰ Ika muchi tejemet tinemit pal timuneshtiat iishpan ne itepatznaj ne Mawaltijtuk pal sejse kikwi tik iweyka tay ipal, wan yawi muita su kichijtuk tay yek o tay te yek.

¹¹ Kiane tel, tikmatit ne mawi ipal ne Tajtzin. Iwan takamet, tikchiwat muchi tay tiwelit pal ma tayulmatikan. Iishpan Teut, tejemet timuneshtijtiwita. Nitejchia ka nusan ijtik ne anmutajtamatilis antechishmattiwit. ¹² Uksenpa, te kineki ina ka timetzinhilwiat ka tejemet tiyejyek, sute pal kiane timetzinmakat taika welit anmuweymatit tupanpa, pal ankipiat se ipal ne muweymatit tik iishkalyu wan tesu tik iyulu. ¹³ Ika su tishpuyawit, ipal Teut; su tikpiat ne tutzuntekun yek, anmupal. ¹⁴ Ika ne itetasujtalis ipal ne Mawaltijtuk techmalachua, ika ini tay tinat: ka sesan mikik ka inmaku muchi; su ijkiuni, muchi mikiket; ¹⁵ wan yaja miktuk ka inmaku muchi pal ne yujyultuk tea yujyultuk ipal yejemetsan, sute ipal yajane ká miktuk wan muyulkweptuk inpal.

¹⁶ Yajika ashan tejemet te tikishmatit aka tik inakayu. Hasta su tikishmatket tik inakayu ne Mawaltijtuk, ashan intea tikishmatit. ¹⁷ Yajika, su se ijtik ne Mawaltijtuk, se yankwik; ne palikman muelkaw, muchijki yankwik.

¹⁸ Muchi kisa itech ne Teut. Ne Teut techpata ipal, itech ne Mawaltijtuk, wan techmaka tekitilis ipal tapatalis. ¹⁹ Kiane, ne Teut kipatak yajki ne taltikpak ijtik ne Mawaltijtuk. Yaja tesu kinhilwia keski kiwikiliat; tuwan kichijtuk ne sentaketzat ipal tapatalis. ²⁰ Yajika, titanawatiat ipanpa ne Mawaltijtuk, ken su ne Teut mutajtaweliskia tutech. Titajtanit ipanpa ne Mawaltijtuk: shimupatakan ipal ne Teut. ²¹ Ne te kishmatki tateyekchijtuk, kikweptuk tateyekchijtuk tupanpa, pal tejemet timuchiwat tamelakchiwalis ipal Teut ijtik yaja.

6 Tisentekitit, wan timetzintajtanit ma te shikwikan ne teutasujtalis ken su te tatka, ² ika ina:

Nemia ashanchin ne shiwit kwak yek, nemia ashanchin ne tunal ipal tamakishtilis!

³ Inte tikchiwiliat aka tatka pal ma mutasa, ma te inakan tatka ipanpa ne tutekitilis; ⁴ tik muchi tikilwitiat ka tiyejyek ken itejtekitini Teut: iwan wey tanejmachselilis, iwan uijkayu, tik tajtapachulis, tik ijiumikilis, ⁵ melka techwitekit, melka techtzakwat, tik kumunilis, tik kujkutialis, su tikishpelwiat, su tikseliat mayan; ⁶ tiyujyulchipawak wan tikpiat taishmatilis; titejchiat wey wan sea tiyajyamanik; iwan ne Ijiutzin, iwan yekkaya tetasujtalis; ⁷ iwan ne tejkia, iwan itajpal Teut, iwan ne tajtaiwan ipal ne tamelakchiwalis ijtik ne se tumey wan ne seuk; ⁸ su inat ka tiyejyek o ka te, su tupanpa taketzat teyek o yek: ka titashijshikuat, melka tinat ne tejkia; ⁹ ka te aka techishmati, melka techishmatit muchi; ka timikit, melka ashan tiyujyultuk; ka techwitekit, melka te techmiktiat; ¹⁰ ka timutechtiat, melka senpa tipakit; ka timunekit, melka tiktepewiliat miak; ka te tikpiat tatka, melka muchi nemi tik ne tumey.

¹¹ Ne tuten tapuituk anmupal, nukniwan ipal Korinto! Ne tuyulu mupatajtuk! ¹² Tesu anmupitziniat tupanpa, anmupitziniat ipanpa ne anmuyujyulu. ¹³ Ka ipatka, nimetzinhilwia ken su annukukunew, shimupatawakan!

¹⁴ Maka shimusenhilpikan anmejemet iwan sejse te kipiat tayulmatilis, ika ken welit muchiwat inkunpawan ne tamelakchiwalis iwan ne teyek? Ken welit musentepewat tawil wan kunyua? ¹⁵ Ken yawit mukawa pal sentekiti ne Mawaltijtuk iwan ne Tatkaipatiw? Wan tay weli kichiwa se tayulmati iwan se te tayulmati? ¹⁶ Katiawel ne sentaketzat ipal ne iteupan Teut iwan teujteutzitzin? Ika tejemet ne iteupan ne Teut yultuk, ijkiunisan ken inak ne Teut, inak:

7 Yek, nuyejyektasujtatuk, tikpiat ini projpromesaj; yajika, timupupukan pal timuishtiliat muchi tay susul tik tunakayu wan tuijiu, wan timuchiwakan sujsul yejyek ika tiktakamatit Teut.

² Shitechkwikan tik anmuyujyulu. Te aka tikchiwilijtiwit tatka, te aka tikwilejtiwit, te aka tikshijshikujtiwit. ³ Tesu nina pal nina ka aka te yek, ika nimetzinhilwija ka annemit ijtik ne tuyujyulu, hasta ma timikikan anmuwan o tiyujyultuk. ⁴ Nimuwika sujsul melaknaj anmuwan; nimuweymati sujsul anmupanpa; nimuyultia iwan tepalewilis; nitepewi iwan pakilis hasta ijtik muchi ne tupejpenaj.

⁵ Kwak tejemet tiajsiket Macedonia, ne tuweyka te kipiatuya tatka tay muneki pal nemi yek. Tikpiatuyat miak penaj: tatenpan tajtasumalis, kalijtik mawi. ⁶ Melka uni, ne Teut ká kinpalewia ne kukunet techpalewij wan ajsik Titus, ⁷ wan te semaya ajsik tutech, nusan muyulpaktij anmupanpa wan techneshtilij ne anmutaelewilis, ne anmuijiumikilis wan ne anmudevocion ka numaku; yajika nipakik sujsul.

⁸ Nikmati ka iwan ne amat nimetzinkwalantij. Tesu nimuyulpata, melka achtu nimuyulpatak ika nikita ka uni amat kwakuni metzinkwalantij. ⁹ Ashan nipaki, tesu ika ankwalanket sute ika ankwalanket hasta yulpatalis; ika ankwalanket itan Teut wan kiane te panuk tatka tay te yek tupanpa; ¹⁰ ika ne kwalan itan Teut tekiti pal ma nemi yulpatalis pal se mumakishtia wan te muyulpata mas. Ne kwalan ipal ne taltikpak, tesu: yaja tekiti pal kalwika mikilis. ¹¹ Tikitat ipanpa uni kwalan itan Teut keski anmunelwijtiwit, annankilijtiwit, anmumattiwit teyek, anmajmawtiwit, antaelewijtiwit, ankiejekujtiwit, anmutzunkwijtiwit. Ijtik muchi antaneshtijtiwit ka te ankichijtiwit tatka; ¹² yajika tel, su niktuktij anmutech uni amat, tesu ipanpa ne kichijki tay teyek nian ipanpa ká ne kichiwilijtiwit, sute pal kiane ma muneshti anmuishpan keski anmunelwiat ipanpa, tik itachialis ne Teut. ¹³ Ipanpa ini, niyulpakituk.

Nusan sujsul tiyulpakitiwit iwan ne pakilis ne techmakak Titus, ká nusan paki ika musewijtuk ne iyulu ipanpa muchi anmejemet; ¹⁴ ika su nikilwij se pal nimuweymati anmupanpa, te nishpinawa, wan ken muchi tay timetzinhilwijtiwit tejkia, nusan ijkiuni ne tumuweymatilis iishpan Titus muchijtuk tejkia, ¹⁵ wan yaja metzintasujta mas kwak kielnamiki ken muchi anmejemet kitakamatket wan kikwijket anmutzalan iwan mawi wan ijtzilikalis. ¹⁶ Nipaki ika tik muchi nikpia yulpakilis anmupanpa.

8 Shikmatikan, nukniwan, ka ne sejsennemit ipal Macedonia kikwijtiwit wey teutasujtalis. ² Nemit ijtik taejekulis wan tapitzinilis wey, wan iwan muchi inpakilis tamakatiwit wey iwan inyulu yek melka te kipiat tatka. ³ Weli nimetzinhilwia ka yejemet, ipanpa taishpejpenalis, kichijtiwit muchi tay welituyat wan mas. ⁴ Sujsul mutajtawelijket wan techtajtanket ma tikajkawakan techpalewiat tik ne tutekitilis ipal ne tayulmatit, ⁵ wan tesu semaya ken titejchiat katka: mutemakaket iwan ne Tajtzin achtu, wan tuwan iwan itaelewilis Teut, ⁶ wan kiane titajtanket iwan Titus, kenha ken pejki, ijkiunisan ma tami anmuwan uni tekitilis ipal tetasujtalis.

⁷ Kenha ken tik muchi antepewit: tik tayulmatilis wan taketzalis wan taishmatilis wan muchi taelewilis, wan tik ne anmutetasujtalis ne kistuk tutech, ma shitepewikan tik uni nusan; ⁸ tesu nina ken tatuktilis sute ma nikejeku ne anmutetasujtalis yekkaya ken sejseuk kitamachiwat.

⁹ Ankishmatit ne itetasujtalis ne tutajtzin Yeshu Mawaltijtuk wan ken ka anmumaku muchijki se te kipia, kwak yaja kipiatuya, pal anmejemet kipiat wey ika yajane te kipia. ¹⁰ Tik ini nimetzinhilwia tay nikmati, ika yek anmupal: ika anmejemet te sema ashan pejtiwit kichiwat, ne shiwit panutuk nusan anpejket kinekit kichiwat ijkiuni. ¹¹ Ashan tel shitamikan ankichiwat, pal kiane ken ankinektiwit nusan anyawit kitamiat iwan tay ne ankipiat, ¹² ika su ne taelewilis nemi, mukwi yek wey o chiupi ken tay ne kipia se, tesu ken tay ne te kipia se; ¹³ ika tesu nemi pal tiktakuliat ne sejseuk ma yejemet kipiakan wan ma anmejemet shimupitzinikan, sute pal muchi nemit kenhat. ¹⁴ Tay ne ashan anmupal tepewi, ma nemi pal ne tay yejemet munekit, pal kiane su se tunal tepewi inpal ma nemi pal ne tay anmejemet munekit, pal annakat kenhat, ¹⁵ ken muijkwilujtuk:

¹⁶ Tashtawi ne Teut: yajaya ne kichijtuk ka Titus kineki metzinpalewia ken tejemetsan. ¹⁷ Inak ka yek, wan yaja isel inak ka yawia kisa mutalua pal ajsi anmutech. ¹⁸ Tiktuktijtiwit iwan ne tuiknew ká ne muchi inat ka yek ipanpa ken tanajnawatia ne yeknawatilis, ¹⁹ wan te semaya uni: nusan yaja kitukaytijtiwit ne sejsennemit ma yawi pashalua tuwan pal titekitit pal titamakat ini tetasujtalis pal inat muchi ka wey ne Tajtzin, wan ijkiuni tiknekit tejemet. ²⁰ Tesu tiknekit ma inakan tatka tupanpa ika tikmajmakat wey tumin, ²¹ ika tikpachiwiat ken tikchiwat yek, tesu sema tik itachialis ne Tajtzin, nusan tik itachialis takamet.

²² Tiktuktijtiwit inwan ne tuiknew ká tikejekujtiwit seujseujti wan tikitztiwit ka wey ipatiw. Ashan hasta mas, ika metzinyulmati wey.

²³ Shikelnamikikan ka Titus nukunpa wan tusentekitini; wan ne tukniwan tijtitanijtuk ipal ne sejsennemit ma tzitzinaka ne Mawaltijtuk. ²⁴ Yajika, shikinhilwitikan ne anmutetasujtalis wan ka timuweymatit iishpan ne sejsennemit.

9 Te muneki ma nimetzinhilwi ka tinemit pal titekitit ipal ne tayulmatit, ² ika nikmati ka ankinekit kinpalewiat sujsul, hasta nimuweymati anmupanpa iwan ne tukniwan ipal Macedonia, nikinhilwia ka ne tukniwan ipal Akaia ashan se shiwit muajshitijtiwita; wan ne anmudevocion kichijtuk ka miak nusan kinekit muejekuat sea.

³ Niktuktijtuk ne tukniwan pal te yawi muchiwa ka muchi tay ninatuk ipanpa uni te tejkia, ma muita ka anmuajshitijtiwit ken ninatuk, ⁴ ma te yawit ajsit nuwan sejse ipal Macedonia wan kiajsit ka te anmuajshitijtiwit, wan su ijkiuni tejemet tiawit tishpinawat, ma te nina anmejemet, ika tinatiwit ka ijkia. ⁵ Yajika tel, ninak ka nimuneki niktajtani ne nukniwan ma ajsikan anmutech achtu pal kipikit ne teteuchiwalis ne anhinaket ka yawi muchiwa, ma muchiwa ken teteuchiwalis wan tesu ken se tay titajtanit pal tikpiat wey.

⁶ Ini tay nina: ká tatuka wan sema chiupi kituka, sema chiupi yawi tapishka; wan ká tatuka iwan wey teteuchiwalis, iwan tejteteuchiwalis yawi tapishka nusan. ⁷ Sejse tejemet ijkiunisan ken kielewia ne iyulu, tesu iwan yulkukulis nian tapachulis.

⁸ Ne Teut kipia itajpal pal weli metzintepewilia muchi ne tejtetakulis pal senpa ankipiat muchi tay ankinekit tik muchi, pal kiane anyawit kipiat ipal muchi anmutekitilisyu yek, ⁹ ken muijkwilujtuk:

¹⁰ Ne ká kimaka ijish ne tatuka wan itamal, yawi metzinmaka wey anmuish pal antatukat, wan yawi kichiwa ma weya ne tay tamaka ne anmutamelakchiwalis; ¹¹ anmupal muchi yawi tepewi pal antamakat muchi tay welit, wan ijkiuni tejemet tiwelit tikilwiat panpadiush ne Teut. ¹² Ika kwak ankichiwat ini anmutekiw, tesu sema ankimakat ne tayulmatit tay yejemet munekit, nusan wey ipatiw pal ankilwiat sujsul panpadiush ne Teut ¹³ iwan ne taejekulis ipal ini tekitilis; ijkiuni ankichiwat ma inakan ka wey ne Teut ika ankitakamatit wan ankikwit ne yeknawatilis ipal ne Mawaltijtuk, wan ika ankitakuliat muchi tay anwelit ipal yejemet wan ipal muchi, ¹⁴ wan ika yejemet mutajtaweliat ka anmumaku wan metzintasujtat ipanpa ne sujsul wey itetasujtalis ne Teut anmutech. ¹⁵ Tashtawi ne Teut ipanpa ne wey itetakulis ken nian weli muneshtia.