Chronological

1 ^1-2 Naja, Pedro, ititanijtuk Yeshu Mawaltijtuk, nikintajpalua ne nukniwan musentalujtiwit tik Pontos, Galatia, Kapadokia, Asia wan Bitunia. Anmejemet muishpejpentiwit ipanpa tay achtutamati ne Teut tuteku wan ne Ijiutzin metzinteuchijtuk, pal ankitakamatit wan anmushiniat iwan iesyu Yeshu Mawaltijtuk. Ma shikpiakan sujsul wey tetasujtalis wan nejmachnemilis.

³ Yektenejtuk ne Teut,

n' iteku tutajtzin Yeshu Mawaltijtuk,

ká ne iwan wey tetasujtalis

techyulketzki senpa iwan tejchialis yultuk

ika muyulkwepki Yeshu Mawaltijtuk kwak miktuk

⁴ ipal n' iherenciaj inte wilewi,

nian mususulwia, nian kujkutia,

wan muantuk ne ilwikak anmupal

⁵ ká metzinpachiwia Teut iwan itajpal

ipanpa anmutayulmatilis ipal tamakishtilis

ken nemi pal muneshtia tik ne tijtipan tunal

⁶ wan yajika anpajpakit, melka ashkan, asu muneki,

miak anmutaejekulisyu ankipiat

⁷ pal kiane yawi muilwitia ne anmutayulmatilis

tay mas wey ipatiw que ne teukwit ne puliwi,

ne muejekujtuk tik tit wan yawi muajsi yek wan kipia honor

kwak yawi muneshtia Yeshu Mawaltijtuk.

⁸ Yaja ankitasujtat melka inte ankitztiwit,

wan melka ashan te kitat, kiyulmatit

wan sea pajpakit wan inat ka wey,

⁹ wan kalkwit ne tamilis ipal ne anmutayulmatilis,

ma mumakishtikan anmuajalmaj.

¹⁰ Ipanpa ini anmutamakishtilis mutajtanilijket wan tatejtemujket ne taketzanimet ne kimatket ka yawit ankipiat; ¹¹ tatejtemujket ká wan keman kinekituya ina ne iijiu Mawaltijtuk ijtik yejemet kwak tanawatij ka ne Mawaltijtuk yawi taekua wan tipan yawi tzitzinaka; ¹² wan mumachtijket ka inte inpal asunte tupal muchijki ne tay ashkan metzinneshtiliat ká ne metzinyeknawatiliat iwan ne Ijiutzin ne walmutitanijtuk tik ne ilwikak, wan hasta ne tanawatianimet kielewiat muishpiluat.

¹³ Shikajshitikan ne anmuyulu tel, shitejchiakan nejnejmach wan shikmatikan ka yawi walmuwika anmutech ne tetasujtalis kwak muneshtia Yeshu Mawaltijtuk. ¹⁴ Ken kukunet ne tetakamatit, maka shikchiwakan kenha ken ankielewiat katka kwak inte ankimatket tatka. ¹⁵ Mas yek shimuwikakan yek ijtik muchi tay ankichiwat ken yajane ká metzinnutzki, ¹⁶ ika nemi tajkwilujtuk:

¹⁷ Wan su ankinutzat anmuteku Yaja ká ina ka muchi tikenhat wan techchiwa juzgar sejse ken kichijtuk, shimuwikakan iwan mawi muchi ne tujtunal ipal ne anmumuchantilis, ¹⁸ ika ankimatit ka inte anmumakishtijtiwit itech ne anmumuwikalis inte tatka ipatiw, ken anmutejteku, iwan tumin wan teukwit, ne wilewit, ¹⁹ asunte iwan ne iesyu wey ipatiw ne Mawaltijtuk, ken se ichkakunet inte kipia nian se ipelech nian mususulwijtuk, ²⁰ ne muishmattuya kwak inteuk mutzintij ne taltikpak wan muneshtij tik ne tijtipan tunal ka anmumaku, ²¹ ika ipanpa ankimatit tik anmuyulu ne Teut ne kiketzki kwak miktuk wan kimakak tzitzinakalis pal ankiyulmatit Teut wan pal ankipiat tejchialis.

²² Ankipupujtiwit ne anmuajalmaj ika ankitakamatit ne tejkia pal yekkaya iknitasujtalis. Shimutasujtakan yek wan iwan muchi anmuyulu, ²³ wan shimuyulketzakan senpa, intesu itech se ishinach ne wilewi asunte iwan ne ipalabraj yultuk inte keman wilewi ipal ne Teut, ne naka senpa, ²⁴ ika:

Ini ne palabraj ne metzinyeknawatilijket.

2 Yajika, shikajkawakan muchi tay teyek, wan muchi teshijshikulis wan kwalan wan tatejtenewalis; ² ken yajyankwik shulut, shikunikan ne chipawak chichiwal ipal ne palabraj ma iwan shiweyakan pal anmumakishtiat, ³ su ankimatket wan ankitaket ka yek ne Tajtzin.

⁴ Shiajsikan itech yaja ká se tet yultuk, tejtenejtuk ipal takamet, ipal Teut ishpejpentuk ika wey ipatiw, ⁵ wan anmejemet nusan, ken tejtet yultuk, shimuketzakan ken se kal ipal tuijiu, se palejtal ipal Teut, pal ankalwikat tejtetakulis ipal tuijiu yejyek ipal ne Teut ipanpa Yeshu Mawaltijtuk.

⁶ Ika nemi tajkwilujtuk:

⁷ Anmupal ne tayulmatit kipia ipatiw. Ipal ne inte tayulmatit, yaja

⁸ wan

ipal ne mukshichaluat wan ne inte kiyulmatit ne palabraj ne mutalilijket. ⁹ Anmejemet ne techan ishpejpentuk, ne palejtal ipal ne tatekimaka, ne techan ipal Teut, ne ipal pal kiane welit antaneshtiat ken yek ne ká walmetzinnutzki pal ankisat tik ne takumi wan anhajsit itech ne itawilyu galantzin. ¹⁰ Anmejemet katka inte techan, ashkan itechan Teut; inte ankimattuyat itetasujtalis, ashkan ankimatketa.

¹¹ Yejyektasujtatuk, nimetzintajtani ken ejkunimet wan pashaluanimet ma inte shikchiwakan tay kielewia ne anmunakayu ne musuma iwan ne anmualmaj. ¹² Shimuwikakan yek ijtik ne tejtechan, pal kiane kwak metzintejtenewat pal inat ka anmejemet inte yejyek, yawit kitat ne anmutejtekiw yek, wan inasket ka wey ne Teut tik ne tunal ipal tapachiwilis.

¹³ Shiktakamatikan muchi tay kiketztiwit takamet ipanpa ne Tajtzin: asu tatuktiani ken ne mas wey, ¹⁴ asu ne tatekimakat ká yaja kintitanijtuk pal kintzunkwit tateyekchiwat wan pal inat ka yejyek ne kichiwat tay yek, ¹⁵ ika ijkiuni kineki ne Teut, pal ankichiwat tay yek wan pal te welit inat tatka ne melemet inte kimatit tatka; ¹⁶ pal ankichiwat ken sejse welit kichiwat tay kinekit: intesu pal welit ankichiwat ichtaka ne tay teyek, asunte ken itejtekitini Teut. ¹⁷ Shikchiwakan respetar muchi, shiktasujtakan ne iknikayu, shiktakamatikan ne Teut, shikmakakan honor ne tatuktiani.

¹⁸ Ne kaltekitinimet, shinakakan itan itajpal ne anmutejtekuyu wan shiktakamatikan, tesu sema ne yejyek wan yajyamanik, nusan ne majmalintuk, ¹⁹ ika uni kipia ipatiw, asu se inte kichijki tatka wan tajselia ika kimati Teut tik iyulu. ²⁰ Ika tay tiawit titaketzat su antajseliat kwak ankichiwat tay te yek wan metzinmakat? Pero su ankichiwat tay yek wan antajseliat nejnejmach, uni kipia wey ipatiw ipal Teut.

²¹ Yaja taika metzinnutztiwit, ika ne Mawaltijtuk nusan taekuj ka anmumaku wan metzinhajkawilij se ejemploj pal annejnemit ka ipan kan yaja taksatuk. ²² Yaja inte kichijki tatka tay inte yek, nian muajsik sechin teshijshikulis ijtik ne iten. ²³ Kwak kitejtenejket, yaja inte najnankilia katka iwan kwalan, inte ina katka ka yawi kinchiwilia tay kinkukua: yaja mutemakak iwan ne kichiwa juzgar ken yek. ²⁴ Yaja isel kiwikak tik ne iweyka, ijpak ne cruz, ne tay tejemet tikchijtiwit tay te yek pal tejemet ká tipulijtiwit ipanpa ne tajtateyekchijtuk tiwelit tiyujyultuk ipanpa ne tamelakchiwalis. Yaja mushutak pal anmejemet pajtit. ²⁵ Melka anmejemet ken ichkamet ne anpulijtiwit, ashan anmukweptiwit itech ne tajpiani wan tapachiwiani ipal ne anmuajalmaj.

3 Ijkiasan ne siwatket: shimutalikan itankupa ne anmushujshulejyu, pal kiane asu sejse yejemet inte kiyulmatit ne palabraj, ne inmuwikalis ne siwatket yawi weli kinpalewia, melka te ankinhilwiat tatka, ² kwak kipachiwiat ken anmuwikat iwan tetakamatilis chipawak. ³ Pal anmuekchiwat, inte muneki ma shiktajkwiltikan anmutzunkal, ma shimuyawalukan iwan teukwit wan ma shimutakentikan pal anmuitat gajgalantzin; ⁴ mas yek yajane tay ichtaka ijtik anmuyulu, se muijiu yulyamanik, ipal nejmachnemilis, ne inte wilewi, uni kipia wey ipatiw tik itachialis ne Teut, ⁵ ika ijkiuni muekchiwat ikman ne yejyek siwat ne kichiat Teut wan kitakamatit inshujshulejyu, ⁶ ken Sara kitakamatki ne Abraham wan kinutzki "tajtzin". Anmejemet ikukunew, ankichiwat tay yek wan te anmajmawit ipanpa tatka tay tamutia.

⁷ Ne takamet kenhaya: shisennemikan wan shikmatikan ka ne siwat weli chiupi. Shimuwikakan yek iwan, ika ne anmuumeshtin yawit yujyultuk ipanpa teutetasujtalis, pal te mutzakwat ne anmutajtajtanilis.

⁸ Pal tami, shikpiakan muchi sanse taelewilis, shimuchiwakan tasenhekuanimet, shikintasujtakan anmukniwan, shiyujyulyamanik, shimuwikakan yek iwan muchi; ⁹ maka shiktashtawikan teyek iwan teyek nian shiktejtenewakan ne metzintejtenewa, mas yek shikteuchiwakan, ika yaja taika metzinnutzket, pal ankipiat se bendicion. ¹⁰ Ika:

¹² ika

¹³ Wan ká yawi metzintateyekchiwilia asu senpa ankitemuat ne tay yek? ¹⁴ Wan asu nusan antaekuat ika ankichijtiwit tay yek, suertej! Maka shimajmawikan inpanpa, maka shikakasiwikan. ¹⁵ Shinakan ijtik anmuyulu ka wey ne Tajtzin Mawaltijtuk, wan shimuekchiwakan pal annankiliat senpa kwak metzintajtaniliat ipanpa ne anmutejchialis. ¹⁶ Shinankilikan iwan yulyamanikayu, nejnejmach, wan shikpiakan se yek tasenmatilis, pal kiane, kwak metzintejtenewat, ma ishpinawakan ne metzinhijilwiat ipanpa anmumuwikalis yek itech ne Mawaltijtuk, ¹⁷ ika mas yek ma shikchiwakan tay yek, su ne itaelewilis ne Teut kineki, que su ankichiwat tay teyek.

¹⁸ Ika nusan ne Mawaltijtuk seujti taekuj ipanpa ne tajtateyekchijtuk,

ne yek ka inmaku ne te yejyek,

pal metzinwika itech ne Teut,

wan melka mumiktijtuk anmuweyka

muyulkweptuk anmuijiu.

¹⁹ Wan yajika nusan yajki kinnajnawatia ne nawalmet tzajtzaktuk, ²⁰ ne niakeman te tetakamattiwit, kwak ne Teut tejchia katka iwan weytejchialis tik ne tujtunal ipal Noa kwak muajshitij se takukal kan chiupi mumakishtijket itech ne at, semaya chikwey almaj. ²¹ Wan ashan ne at metzinmakishtia, ini ne teulyujmakalis, tesu ika kishtia ne puknaj sute yaja kineki ina ne yek tasenmatilis iwan Teut ika Yeshu Mawaltijtuk muyulkwepki, ²² wan yajki ka ilwikak, wan nemi ka imayekkan ne Teut, wan tanawatianimet wan tatuktianimet wan ne welit sujsul wey kitakamatit.

4 Ne Mawaltijtuk taekuj ijtik iweyka. Anmejemet nusan shimumatikan ken yaja pal anmupalewiat. Ika kwak titaekujtiwit tik tuweyka, tamik ne tateyekchijtuk, ² pal kiane intea yawi panu ne tujtunal nakat ken kielewiat takamet asunte ken kineki Teut. ³ Ika techajsik ne panutuk pal tikchiwat ne tay ajwiak pal ne tejtechan kwak tinejnentiwit ijtik susultailwitilis, taelewilis, mutawantilis, yujyualu kan antawanket, wan teutzintankwaketzalis teyek, ⁴ wan yejemet te kimatit taika te anmusenputzuat kan yawit kichiwat muchi tay te yek, wan kukujtaketzat. ⁵ Yejemet yawit nankiliat iishpan yajane ká nemi pal kichiwa juzgar ne yujyultuk wan ne mijmiktuk, ⁶ wan yajika nusan muyeknawatilijtiwit ne mijmiktuk, pal yawit muchiwat juzgar ken takamet kipiat inweyka wan pal muwikat ken iijiu Teut.

⁷ Muchi yawia tami. Yajika, ma nemi yek anmutzuntekun wan shiktajtanikan Teut nejnejmach. ⁸ Ne achtu ipal muchi, ma shimutasujtakan sujsul sejse iwan sejseuk ika ne tetasujtalis kitzakwa miak tateyekchijtuk. ⁹ Shimupalewikan wey wan maka shikikinakakan. ¹⁰ Ijkiunisan ken sejse kikwij itetakulisyu, shitekitikan sejse ipal sejse ken yejyek kalpiani ne tajpiat muchi ne tekenha tay techtakulijtuk ne Teut. ¹¹ Asu aka tanutza, ken ipalabraj Teut. Asu aka tekiti, ken ne Teut kimaka itajpal, pal kiane tik muchi yawi mumati ka wey ne Teut itech Yeshu Mawaltijtuk ká ipal ne itzitzinakalis wey wan ne itajpal pal senpa wan senpa amen.

¹² Nuyejyektasujtatuk, maka shishpuyawikan ipanpa ne kutit pal metzinhejekua ken su panuskia se tay yankwik, ¹³ asunte shipakikan ika anmejemet ikunpawan iwan ne Mawaltijtuk tik itajtaekulisyu; shipakikan pal anwelit pajpakit sujsul mas kwak yawi muneshtia ne itzitzinakalis. ¹⁴ Su metzinhijilwiat tik itukay ne Mawaltijtuk, suertej ankipiat! Ika ne iijiu ipal tzitzinakalis wan ipal ne Teut anmujpak mukawa. ¹⁵ Ma inte taeku aka pal anmejemet ken tamiktiani nian techtekini nian tateyekchiwa nian ken chachalaka; ¹⁶ asu ken Cristianoj, ma inte ishpinawa: ma ina ka wey ne Teut ipanpa uni, ¹⁷ ika ajsik ne tunal pal pewa ne juicioj tik ne ikal ne Teut: su tejemet tiajachtu, ken yawit tamit ne inte kitakamatit ne iyeknawatilis ne Teut! ¹⁸ Wan

¹⁹ Kiane hasta ne taekuat iwan ne itaelewilis ne Teut ma kichiwakan tay yek wan ma temakakan ne inhajalmaj iwan ne yek Taltikpakketzani.

5 Nikintajtani ne noymet anmutzalan, naja ká nusan se pal ne noymet ne nikmati ken taekuj ne Mawaltijtuk wan nusan nikpia nutakutun ipal ne weytzizinakalis ne yawi muneshtia: ² shitajpiakan ne iichkatal ne Teut ijtik anmejemet wan shikpachiwikan, intesu ika metzinhilwijtiwit asunte ika ankinekit ipal Teut, nian pal ankishtemuat tumin asunte iwan pakilis. ³ Maka shimuchiwakan tajtzitzinmet ipal ne tay anmupal, mas yek shimuchiwakan ejejemploj ipal ne ichkatal, ⁴ wan kwak witz ne weytajpiani, anyawit kikwit ne yawal ne inte puliwi ipal ne wey tzitzinakalis. ⁵ Ijkiasan ne piltzinmet: shikintakamatikan ne noymet. Shimutakentikan muchi iwan kanawakmatilis sejse iwan sejse, ika ne Teut

⁶ Shimutemultikan, tel, itankupa ne imey chikawak ne Teut pal yaja yawi metzinhajkukia kwak ajsi ne tunal. ⁷ Shiktamutilikan muchi ne anmumujmukakasulis, ika yaja metzintasujta.

⁸ Shinejmachnemikan, shikishpelwikan! Ne anmukujkul, ne Tenewani, ken se tekwani tzajtzi, kiyawalua kan tinemit kitemua ká weli kitulua. ⁹ Shinankilikan iwan tayulmatilis, wan shikmatikan ka sejse kiekuat kenha nujme ijtik ne anmukniwan.

¹⁰ Ne Teut ipal muchi tetasujtalis, ká metzinnutzki pal ankipiat ne itzitzinakalis wey pal senpa itech ne Mawaltijtuk Yeshu kwak tamit antaekuat achi, yaja metzinpalewis, metzinmakas fuerzaj, kichiwas ma chikawayakan anmuyujyulu, metzintetzilnajtalilis; ¹¹ yajasan kipia itajpal pal senpa, amen.

¹² Itech Silvanus, ne nikmati ka nuiknew yek, nitajkwilujtuk achi anmupal, wan nimutajtawelia wan nitaneshtia ka yajini yekkaya teutasujtalis; shinakakan ijtik yaja.

¹³ Metzintajpaluat ne ijishpejpentuk ipal Babelonia wan Marcus nutelpuch. ¹⁴ Shimutajpalukan, shimutennamikikan, shimutasujtakan. Ma shinemikan yek muchi ne kiyulmatit ne Mawaltijtuk.