Chronological

1 Naja, Pawlo, ititanijtuk ne Mawaltijtuk Yeshu ipanpa itaelewilis Teut, wan ne tuiknew Timoteo, tiktuktiat ini tajkwilul itech ne sennemit ipal ne Teut ne nemi tik Korinto iwan muchi ne tayulmatit ne nemit tik muchi Akaia: ² ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.

³ Yektenejtuk ne Teut,

n' iteku tutajtzin Yeshu Mawaltijtuk,

n' iteku muchi ne ejekneli

wan Teut ipal muchi tepalewilis.

⁴ Techpalewia tik muchi ne tuuijkayu

pal tejemet welit tikpalewiat ká nemit tik uijkayu

iwan ne tepalewilis ne tikwit tejemetsan itech ne Teut,

⁵ ika ijkiunisan ken tepewit ne itajtaekulis ne Mawaltijtuk ijtik tejemet,

nusan ipanpa ne Mawaltijtuk tepewi ne tutepalewilis.

⁶ Asu timupitziniat, yaja pal ma shimupalewikan wan ma shimumakishtikan; wan asu timupalewiat, yaja pal ma shimupalewikan ika ankinejmachseliat uni tajtaekulis kenha ken tejemet nusan titaekuat, ⁷ wan tikpiat wey tejchialis anmupal ika tikmatit ka kenha ken anmejemet tukunpawan tik ne tajtaekulis, nusan antukunpawan tik ne tepalewilis.

⁸ Tiknekit tel ma shikmatikan, nukniwan, keski timupitzinijtiwit tik Asia: ne tuujuijkayu muchijket sujsul ejetek hasta kan tinat katka ka tiawit timikit. ⁹ Melka uni, tejemet tikpiatuyat ne condenaj ipal mikilis ijtik tejemetsan pal kiane te talnamikit ka tiwelit tatka tusel wan pal tikyulmatit ne Teut, ká kiketza ne mijmiktuk, ¹⁰ wan yaja techmakishtij itech sujsul wey mikilis, wan techmakishtia, wan yaja ká titejchiat ka nusan yawi techmakishtia senpa, ¹¹ su anmejemet nusan mutajtaweliat pal tasenpalewiat ka tumaku, pal kiane, itech ne intetakulis muchi ka tumaku, ma inakan miak panpadiush tupanpa.

¹² Timuweymatit ipanpa ne tutasenmatilis ka timuwikatiwit tik ne taltikpak iwan kanawakayu wan yulchipakayu, tesu iwan ne tamatilis ipal ne tuweyka sute iwan ne tetasujtalis ipal Teut, wan sujsul mas anmuwan, ¹³ ika sema titajkwiluat pal timetzinhilwiat ne tay antakaktiwita o ankimatit. Nitejchia ma shikelnamikikan senpa, ¹⁴ ijkiunisan ken ankishmatketa se chiupi: ka tejemet tianmumuweymatilis, kenha ken anmejemet nusan tumuweymatilis, tik ne tunal ipal ne tutajtzin Yeshu.

¹⁵ Wan iwan ini tayulmatilis niknekituya niajsi anmutech achtu pal ankipiat ukse tetasujtalis, ¹⁶ wan nipanu anmutech pal niaw Macedonia, wan senpa nikisa Macedonia wan niajsi anmutech pal annechtuktiat tik Yudaya. ¹⁷ Kiane tel, kwak niknekituya uni, anka anhinat ka ninak ken se tay ajkatik, o ka kwak nitanawatia pal nikchiwa se, nitanawatia pal ma su ijkia, ijkia, wan su inte, inte? ¹⁸ Kimati ne Teut ka ne palabraj ne timetzinmakat tesu ijkia wan inte.

¹⁹ Ika ne ikunew ne Teut, Yeshu Mawaltijtuk, ne timetzinnajnawatijtiwit naja wan Silvanus wan Timoteo, tesu katka ijkia wan inte, sute ijkia muchijki ijtik yaja, ²⁰ ika muchi tay sentaketza ne Teut ipanpa yaja, ijkia. Neka nusan ijtik yaja tinat "amen" pal inat ka wey ne Teut tupanpa. ²¹ Ne techtalia yek anmuwan tik ne Mawaltijtuk wan techmawaltij, yaja Teut. ²² Yajaya nusan ne techtetilijtuk wan techmakatuk ne achtu ipal ne Ijiutzin tik tuyujyulu.

²³ Niknutza ne Teut pal ina ka tejkia ipanpa ne nualmaj ka teuk niajsituk Korinto ika niknekik nimetzinpalewia, ²⁴ tesu ika titatuktiat ijpak ne anmutayulmatilis, sute titepalewianimet ipal ne anmupakilis, ika annakat ijtik tayulmatilis.

2 Ika ini ninak tik nuyulu: ka te niaw niajsi anmutech senpa iwan yulkukulis. ² Ika su naja nikchiwa ka metzinkukua anmuyulu, ká nechyulkwesua sute ne yulkukujtuk nupanpa? ³ Wan nikijkwiluj yajini pal te niaw nikpia yulkukulis anmutech kwak annemit pal nechmakat pakilis. Nikmati tik nuyulu ka su nipaki, muchi anmejemet yawit pakit. ⁴ Nimetzinnutzki tik nutajkwilul iwan wey penaj wan sujsul yulpitzinijtuk wan nichukak, tesu pal metzinkukua anmuyujyulu sute pal kiane ankimatit keski nimetzintasujta anmejemet mas que muchi.

⁵ Su aka tayulkukujtuk, tesu naja nechyulkukujtuk sute achi (ma te nimetzinkechtanu sujsul) muchi anmejemet. ⁶ Techajsi ipal se ijkiuni uni castigoj ne kichiwiliat miak, ⁷ yajika mas yek ma shiktasujtakan wan shikpalewikan, ka su te, ne ipenaj sujsul wey weli kitulua. ⁸ Neka nimetzintajtani ma shikmakakan tetasujtalis, ⁹ ika yaja nusan taika nitajkwiluj, pal nimetzintalilia se taejekulis pal nikita su annechtakamatit ijtik muchi. ¹⁰ Su ankitapupulwiat se ipanpa tatka, naja nusan, ika naja nusan nitetapupulwijtuk, su niktapupulwijtuk tatka, ka anmumaku tik itachialis ne Mawaltijtuk, ¹¹ pal kiane ne Tenewani te techshijshikua, ika tikmatit tay yaja kineki.

¹² Kwak niajsik Troyas pal nitamaka ne iyeknawatilis ne Mawaltijtuk wan tapuik ne tentzakka nupal ipanpa ne Tajtzin, ¹³ te welik ninejmachnemi ika te nikajsik ne nuiknew Titus, wan nikinhajkaw wan nikiski wan niajki Macedonia.

¹⁴ Tashtawi ne Teut, ká senpa techmaka ne victoriaj ipanpa ne Mawaltijtuk, wan tutech taneshtia nujme ken puputuka ne itamatilis; ¹⁵ ika tejemet tiipuputuka ajwiak ne Mawaltijtuk ipal ne Teut, ijtik ne mupalewiat wan ijtik ne puliwit; ¹⁶ ipal se, tejemet tiijiu mikilis wan kineki ina mikilis, ipal seuk tejemet tiipuputuka yulkwilis wan kineki ina yulkwilis.

Wan ká weli muchi uni? ¹⁷ Tejemet te tikenhat ken miak ne nujme pashaluat kinamakat ne ipalabraj ne Teut, tejemet te titashijshikuat, sute titanutzat ken itech Teut, tik itachialis Teut, tik ne Mawaltijtuk.

3 Anka tipewat titaneshtiat senpa ka tiyejyek? Anka timunekit, ken sejseuk, ajamat ne metzinhilwiat ka tiyejyek, o ma anmejemet shikijkwilukan sejse ijkiuni tupal? ² Anmejemetsan ne tuamaw, ne muijkwilujtuk ijtik ne tuyujyulu pal muchi kishmatit wan kitat; ³ anmuneshtijtiwit ken iamaw ne Mawaltijtuk iwan ne tutekitilis, ijkwilujtuk tesu tik tintaj sute tik ne Iijiutzin ne Teut yultuk, wan tesu ijpak pajpatznaj tet sute ijpak ne tejtepatznaj ipal nakat tik ne tuyujyulu.

⁴ Tikpiat tayulmatilis ijkiuni ipanpa ne Mawaltijtuk iishpan ne Teut, ⁵ tesu ika tikpiat tupatiw tusel pal tiyultaketzat tatka ken su tupal, sute ne tupatiw ne Teut techmaka, ⁶ wan nusan yajaya ne techmakatuk tupatiw pal titekitit ipal ne yankwik sentaketzat: tesu tik amat sute tik Ijiutzin, ika ne amat tamiktia, ne Ijiutzin tayulkwepa.

⁷ Su tzitzinakak ne tekitilis ipal mikilis ijkwilujtuk ijtik tejtet hasta te weliket nakat tachiat ne ipilawan Israel iishpan ne iishkalyu Moshe ipanpa ne itawilyu ne iishkalyu, ne puliwi, ⁸ ken te yawi tzitzinaka sujsul mas ne tekitilis ipal ne Ijiutzin? ⁹ Ika su tzitzinaka ne tekitilis ne ina ka se teyek, sujsul mas tzitzinaka ne tekitilis ipal tamelakchiwalis. ¹⁰ Ika hasta ne tay tzitzinakatuk tea tzitzinakatuk kwak muita inawak tay ne tzitzinaka mas; ¹¹ wan su tzitzinaka ne tay puliwi, sujsul mas tzitzinaka ne tay naka.

¹² Tejemet tikpiat ini tejchialis wan yajika titanutzat melaknaj, ¹³ wan tesu ken Moshe kitalia se ikwenyu ijpak ne iishkalyu pal ma te tachiakan ne Israeltakamet ka yawi tami tay ne puliwi, ¹⁴ wan takwawayatiwit ne intamatilis, ika hasta ne tunal pal ashan uni ikwenyu kwak amataketzat ne sentaketzat palikman naka wan te muishtia (ika tik ne Mawaltijtuk tami). ¹⁵ Wan hasta ashan, kwak amataketzat tay ipal Moshe, naka se ikwenyu ijpak ne inyulu. ¹⁶ Melka uni, kwak muishkwepa itech ne Tajtzin, ne ikwenyu muishtis. ¹⁷ Ne Tajtzin ne Ijiutzin. Kan ne iijiutzin ne Tajtzin, tamakishtilis. ¹⁸ Ijtik muchi tejemet ká te tiktzaktiwit tuishkalyu, muita ken tik se vidrioj ne itawilyu ne Tajtzin, wan timupatat wan timukwepat ken sanse tutachialis tzitzinaka mas wan mas ken su kisa itech Tajtzin Ijiutzin.

4 Yajika, tikpiat ini tekitilis ika techpalewijtiwit, wan te tikutiat, ² sute tinatiwit ka te tiawit tikinayat tatka nian tishpinawat, nian tiawit timuwikat iwan tajtajpewal nian teshijshikulis ipanpa tay ne ipalabraj ne Teut; tiawit tikneshtiat ne tejkia wan ijkiuni muchi yawit kimatit ka tiyejyek tik itachialis ne Teut.

³ Wan su mutzaktuk ne tuyeknawatilis, mutzaktuk ijtik ne puliwit, ⁴ ika ne Teut ipal ini taltikpak kichijtuk ka pupuyut ne intamatilis ne te tayulmatit, pal kiane te yawi kintawilua ne itawilyu ipal ne yeknawatilis ipal ne Mawaltijtuk tzitzinaka, ká ne itachialis ne Teut.

⁵ Ika te titanajnawatiat ka tumaku sute ka imaku Yeshu Mawaltijtuk tutajtzin, wan tejemet tianmutejtekitini itech Yeshu. ⁶ Ika ne Teut ijtik takumi inak ma tatawi wan tatawij tik tuyujyulu pal kitawilua ne itaishmatilis ne Teut tik iishkalyu Yeshu Mawaltijtuk.

⁷ Tikpiat ini chalchiwit ijtik kajkashit ipal sukit, pal kiane muita ka ne itajpal sujsul wey ipal ne Teut wan tesu tupal. ⁸ Melka tik muchi timupitziniat, tesu tijiumikit; melka te tikmatit tay tikchiwaskiat, tesu tishpuyawit; ⁹ techtalultiat, wan tesu timuajkawat; techtamimat, wan tesu tiwilewit. ¹⁰ Senpa tiksajsakat tik tuweyka ne tamiktilis ipal Yeshu pal nusan ne Yeshu yultuk muneshtia tik tuweyka, ¹¹ ika senpa tejemet ne yujyultuk timutemakat pal timikit ipanpa Yeshu, pal ne Yeshu yultuk muneshtia tik ne tunakayu ne miki, ¹² wan kiane ne mikilis tekiti ijtik tejemet, wan ne nemilis ijtik anmejemet.

¹³ Tikpiat ini tayulmatilis ken ne tay mujkwilujtuk:

Tejemet nusan titayulmatit; neka titanutzat. ¹⁴ Tikmatit ka ne ká kiyulkwepki ne tajtzin Yeshu nusan yawi techyulkwepa iwan Yeshu, wan techtalis anmuwan. ¹⁵ Ika muchi ka anmumaku, pal kiane yawi tepewi ne tetasujtalis ika miak inat panpadiush pal inat ka wey ne Teut.

¹⁶ Neka te tikutiat, ika melka kwalu ne tuweyka, ne ká tikpiat kalijtik yankwikisa mujmusta; ¹⁷ ika ini tukimil ajkatik ne ashan tikpiat nemi pal ma tikpiakan se tukimil sujsul etek ipal wey tzitzinakalis ne yawi naka pal senpa; ¹⁸ ika te titachiat pal tikitat tay ne muita sute tay ne te muita; ika tay ne muita panu, tay ne te muita naka pal senpa.