Chronological
Tik ne ujti ka Roma
27 Kwak inaket ma tikisakan pal tiawit ka Italia tik se barcoj, kintemakat ne Pawlo wan uksejse ilpituk iwan se sentzuntuktiani itukay Yulius, ipal ne bandaj itukay Augustaj. 2 Tikalakket tik se barcoj ipal Adramuteo ne yasneki nepa itech ne Asia, wan tiajkewket. Tuwan nemituya Aristarkos, se Tesalonikajtakat ipal Macedonia.
3 Ne ukse tunal tiajsiket Tzidon. Wan Yulius muwikak yek iwan Pawlo wan kiajkaw ajsi itech ne ikniwan ma kitajpiakan yek. 4 Wan tikisket iwan ne barcoj wan tipanuket inawak Kipre ika kishpitza nemi ka ukse ladoj. 5 Wan tipanuket ne at itech Kilikia wan Panpulia hasta tiajsiket tik Mura, ijtik ne tal ipal Lukia, 6 wan ka ikuni ne sentzuntuktiani kiajsik se barcoj ipal Aleksandria ne yawi ka Italia, wan techkalaktij.
7 Miak tunal tiajket chiujchiupika; sujsul uij ika ne ejekat inte techajkawa katka. Yajika kwak tiajsiket inawak Knidos, timuishkwepket pal titzinkisat ka Salmone tik Creta. 8 Weliket tipanut, melka uij, wan tiejkuket kan itukay Kaloy Limenes, ne nemi inawak ne techan itukay Lasaya.
9 Panuket miak tunal, wan tesajsay katka ma kisakan ka alamal ika walajtuya ne shupan, wan ne Pawlo kinhajajwak, 10 kinhilwia:
—Nukniwan, nikmati ka asu tikisat, yawi muchiwa wey teijtakulis wan wey puliwilis, inte sema ipal ne tukimil wan ne barcoj asunte nusan ipal ne tujtuweyka.
11 Ne sentzuntuktiani kichiwilij casoj tay inat ne capitan wan ne itekuyu ipal ne tubarcoj, wan te kichiwilij casoj tay ina Pawlo, 12 wan ken inte nemituya yek ne puertoj pal panut ne shupan ka né, muchi tanawatijket ma kisakan pal welit ajsit ka Poyniks; yaja se puertoj tik Creta ne tachia ka suroeste wan ka noroeste. 13 Kwak kishpitzki yulik ka tatzinu, kikejketzket ka kipiatuyat tay munekit; ajkewket wan pejket yawit inawak Creta.
14 Tipan pejki kishpitza se ejekat sujsul wey ipal noreste wan kintaski sea, 15 wan kwak mukwij ne barcoj wan te welituya tatka iwan ne ejekat, timuajkawket timuwikat, 16 wan tipanuket yajket itech se chikitik islaj itukay Kawda. Kinekik chiupi pal ma tikpulukan ne barcojtzin; 17 weliket kianat, wan kikwijket sejse pal kilpiat ne barcoj. Majmawit ma inte kinwika ne ejekat hasta musalua ne barcoj tik ne shaltal itech Libia. Kitemultijket ne tepusti wan muajkawat yawit.
18 Sujsul techtaski ne shupanhejekat. Se tunal, kitamutilijket ne at tay ne kisajsakat, 19 wan ne seuk, kitaminket ne tajtaiwan ipal ne barcoj. 20 Te muitak nian tunal nian sitalmet ijtik miak tunal wan ne shupan techpitzinij wey. Muchi ne tejchialis ka tiawit timupalewiat kiski yajki tutech.
21 Kwakuni kwak tajselijtiwit wey, muketzki ne Pawlo itzalan yejemet wan inak:
—Mas yek su annechkaktuskiat, nukniwan, wan te tikistuskiat Creta. Su ijkiuni, te muchijtuskia ini teijtakulis wan puliwilis! 22 Wan ashan nimetzinhilwia ma shiyulchikawayakan, ika te yawi puliwi nian se anmejemet, sema ne tubarcoj, 23 ika kiski nuishpan ashan ka tayua se tanawatiani ipal ne Teut ká ne naja niipal wan ká ne niitekitini, 24 ina:
"Maka shimajmawi Pawlo, tinemi pal timuishpanua itech ne taltikpaktuktiani ipal Roma, wan ne Teut metztakulijtuk muchi ne senyawit muwan tik ne barcoj."
25 Yajika shiyulchikawayakan, nukniwan, ika nikmati tik nuyulu ka muchi yawi muchiwa ken nechilwijtuk ne Teut, 26 melka nemi pal tiwetzit tik se islaj.
27 Kwak panutiwit majtakti-nawi tunal ka timuajkaniat nujme ijpak ne weyat ipal Adria, ka tajkuyua, ne atakamet pejket kikejketzat ka muajshitia ne tal, 28 wan kwak kitamachijket kiajsiket ka kipiatuya senpual imajkul miktan. Yajket achi wan kwak kitamachijket senpa kitaket ka ne miktan semaya kipiatuya kashtul imajkul. 29 Wan majmawit ka inat ka anka musalujtiwit tik tejtet, yajika kitaminket ipan ne barcoj nawi tepusti pal tea mijkwani hasta ma tatwi.
30 Ne atakamet pejket mutatemuliat pal kisat chuluat tik ne barcoj. Inaket ka yawit kiwikat mas wejka ne tejtepusti iishpan ne barcoj, pal tashijshikuat, wan kitemultijket ne barcojtzin pak ne at. 31 Ne Pawlo kinhilwij ne sentzuntuktiani wan ne tasumanimet:
—Asu yejemet inte nakat tik ne barcoj, anmejemet inte welisket mupalewiat.
32 Kwakuni ne tasumanimet kikutunket ne mejmekat ipal ne barcojtzin wan kiajkawket wetzi.
33 Kwak inteuk tanesi, ne Pawlo mutajtawelij inwan ma takwakan. Ina:
—Ashan majtakti-nawi tunal inte ankikwajtiwit tatka. 34 Neka nimetzintajtani ma shitakwakan, ika uni anmunekit; ika te yawi puliwi nian se tzunkaltzin ipal ne itzuntekun aka.
35 Kwak tamik ina uni, kikwij tamal wan inak panpadiush tik itachialis muchi, wan kipitzakuj wan pejket takwat. 36 Kwakuni muchi yulchikawayaket wan nusan takwajket.
37 Tinemituyat ume tzunti wan yeshpual-kashtul-se takat tik ne barcoj. 38 Kwak ishwitiwit, pal ma te akalaki ne barcoj, kishinijket ne tawial tik ne at.
39 Kwak tanesik wan kitaket ne tal, inte kimatit katka kan nemit. Kitaket né wejka se kan kalaki ne at wan kipiatuya ashal iten ne at, kan kinekituyat kishtiat ne barcoj su welit. 40 Wan kishtijket ne tejtepusti wan kiajkawket tik ne weyat, wan kikashanijket ne ijilpika ipal ne mejmelajkwawit, wan kiajkukijket ne wey kwachti kan kishpitza ne ejekat, wan pejket yawit ka tenhat. 41 Mutasket tik se kan munamikit ume at, wan kitalkalaktijket ne barcoj. Wan melka kunakak ne tzunbarcoj wan te weli mijkwani, ne weyat kichalua sujsul ka ipan hasta kitzitzinua.
42 Ne tasumanimet kinekituyat ma kinmiktikan ne ijilpituk pal ma inte weli se yejemet kisa chulua tik ne weyat. 43 Ne sentzuntuktiani kinekituya kipalewia ne Pawlo wan te kinhajkaw, wan kintuktij ne welit maneluat ma mutamimakan achtu pal yawit ka tal, 44 wan ne sejseuk ijpak kwajkwawit wan tajtakutun ipal ne barcoj, pal kiane nakaket muchi yek ijpak tal.
Tik Melite
28 Wan kwak tinakaket yek, kwakuni tikmatket ka uni islaj itukay katka Melite. 2 Wan ne Indiojmet ipal ne islaj muwikaket yek tuwan: kiuntuijket se tit wan techkwijket ka inchan ipanpa ne at, ika shupan, wan ne sesek.
3 Ne Pawlo kisenputzuj kwawit, wan kwak kitalij ijpak ne tit, kiski se kuat ipanpa ne tutunka wan musaluj itech ne imey. 4 Kwak ne indiojmet kitaket ne tekwani kupilujtuk itech ne imey, muilwijket:
—Muita ka yajini se tamiktiani, ka melka te mikik tik ne weyat, ne Yek inte kiajkawa ma yultuk.
5 Yaja kitzejtzeluj ne kuat hasta wetzki tik ne tit, wan nemik yek. 6 Yejemet tejchiat ka yawi suluni o wetzi miktuk nemanha, wan kwak tejchiat wey wan kitat ka te panuk tatka, kikejketzket ka yaja se teut.
7 Te wejka kan nemituyat, muajsit ne ipalwan ne wey ipal uni islaj, se itukay Publius. Yaja techkwij tik ne ikal wan techtakejki yek yey tunal. 8 Kukushki ne iteku ne Publius iwan tujtutunkayu wan apitzal. Ne Pawlo kalak kan nemituya wetztuk, wan kitajtan ne Teut wan kitalij ne ijimey ijpak, wan kipajtij. 9 Kwakuni ne sejseuk ne kipiatuyat ikujkukulisyu tik ne islaj pejket ajsit wan mupajtiat. 10 Yejemet techchiwilijket miak honor, wan kwak tiajkewket techmakaket muchi tay timunekit.
Pawlo ajsi Roma wan tanutza iwan ne Yudayujmet
11 Kwak panuket yey metzti, tikisket iwan se barcoj ipal Aleksandria ne nemituya tik ne islaj pal panu ne shupan ka né. Nemituya wajwawasujtuk ne teujteutzitzin itujtukay Castor wan Poluks ijpak itzun ne barcoj.
12 Timukawket tik Sirakusa wan tinakaket yey tunal ka né. 13 Tikisket ka ikuni wan tiajsiket Regium, wan kishpitzki ka tatzinu wan ne ukse tunal tiajsiket tik Puteoli. 14 Né tikajsiket sejse tukniwan wan techtajtanket ma tinakakan chikume tunal inwan.
Wan ijkiuni tiajsiket Roma, 15 wan ka ikuni ne tukniwan takakket wan walajket technamikit hasta ne Forum ipal Appius wan ne Yey Tabernaj. Kwak ne Pawlo kinhitak, inak panpadiush wan kipishki valor.
16 Kwak tikalakket Roma, kiajkawket ne Pawlo naka isel iwan ne tasumani ne kitajpia.
17 Kwak panutiwit yey tunal, yaja kalnutzki ne achtumet ipal ne Yudayujmet. Kwak ajsiket, kinhilwij:
—Nukniwan, naja melka te nikchiwilijtuk ne tukniwan tatka nian nikchijtuk tay ne tutatanoywan te kichiwat katka, nechishtijket tik Yerushalem wan nechtemakaket iwan ne Romajtakamet ilpituk. 18 Yejemet kinekituyat nechchulultiat ika te nemituya nian se taika ma nimiki. 19 Ne Yudayujmet inaket ka te, wan kichijket ka nimuneki niknutza ne taltikpaktuktiani. Te nikpiatuya tatka pal ma niktenewa ne nutechan. 20 Yajika tel niktajtan nimetzinhita wan nimetzinnutza. Ninemi tepuspilujtuk ika nikpia tejchialis ipal Israel.
21 Yejemet kilwijket:
—Tejemet nian tikwijtiwit amat itech Yudaya nian ajsik se pal ne tukniwan pal techilwia tatka, nian pal taketza tuwan wan ina sejse teyek mupanpa. 22 Tiknekiskiat timetzkakit pal tikmatit tay tina taja, ika tikmatit ka nujme kitenewat uni sectaj.
23 Kitalijket se tunal pal musenputzuat. Wan ajsiket miak itech tik ne kal kan nemituya, wan kinneshtilij wan kinnawatij ka yawi witz ne itatekimakalis ne Teut, wan taketzki inwan ipanpa ne Yeshu wan tay ina ipanpa tik ne tajtuli ipal Moshe wan ne taketzanimet. Pejki peyna wan tanutzki muchi ne tunal hasta teutak. 24 Wan sejse kiyulmatket tay inak, wan sejse inte; 25 muchi yejemet te inaket kenha. Pejket yawit, wan ne Pawlo kinhilwij se:
—Yek tanutzki ne Ijiutzin itech Ishaya ne taketzani, kwak kilwij ne tutejteku:
26 "Shu itech ini tukniwan wan shina: Antakakisket wan te ankimatisket tay antakakit, wan ankitasket wan te antachiasket, 27 ika ne iyulu ini techan mukwepki etek, tzukultik ne itakakilis wan muishtzak pal te tachia ne ijish nian takaki ne itakakilis nian tamati ne iyulu, nian muishkwepa ma nikpajti."
28 Shikmatikan tel ka ini tamakishtilis ipal ne Teut mutitanij itech ne tejtechan wan yejemet kia takakisket. (29) .
30 Pawlo nakak tik se kal ume shiwit wan kitak muchi ká yawit tachiat; 31 kiajkawket kichiwa tay kineki, wan yaja kinnawatia katka muchi ka yawi witz ne itatekimakalis ne Teut wan tamachtia katka ipanpa ne Tajtzin Yeshu Mawaltijtuk.
Ne Bibliaj Tik Nawat · © 2008, 2012 Jan Morrow