Chronological
Felix kikaki Pawlo wan kitzakwa
24 Kwak panutiwit makwil tunal, walajsik ne weypalej Hananya iwan sejse pal ne noymet wan se tajtuani itukay Tertulus, wan kineshtilijket ne gobernador tay kichijtuk ne Pawlo. 2 Kinutzket ne Pawlo ma muishpanu, wan ne Tertulus pejki kitenewa. Kinutza ne tatuktiani wan ina:
—Achtu timetzmakat padiush ika mupanpa tinejmachnemit wan ne tutechan sujsul yektiatuk ipanpa tay tikchijtuk ka tumaku, 3 yajika tinat panpadiush Tajtzin Felix, ika titechpalewia senpa wan nujme. 4 Ma inte nimetzkakasu mas, nimetztajtani ma shitakaki chiupi tay tinat wan ma te shikwalani tuwan. 5 Ika ini takat se kukulis tupal, se takumuntia ijtik muchi ne Yudayujmet nujme ne taltikpak, wan yaja se capitan ipal ne sectaj pal ne Nazarayujmet. 6 Yaja nusan kinekik kichiwa tay te weli kichiwa tik ne teupan, wan tikpachujketa. (7) . 8 Ashan tajasan weli tikpepeta pal tikmati muchi ini taika tejemet tiktenewat.
9 Ne Yudayujmet nusan inaket ka ijkia ken yaja inatuk. 10 Nankilij ne Pawlo kwak ne gobernador kishnutzki ma taketza:
—Nikmati ka taja tikpia miak shiwit ken juez ipal ini techan. Yajika nipaki nimetzilwia tay nikpia pal nina. 11 Ken tikmati, sema kichiwa majtakti tunal ka niajsik Yerushalem nimutankwaketza, 12 wan te nechitaket nikajajwa aka, nian nikumuntia ajaka, nian tik ne kalsennemit nian ijtik ne techan. 13 Nusan te kipiat tatka pal metzilwitiliat pal tikmati ka nikchijtuk tay ashan inat. 14 Tejkia ka tik ne Ujti, ne kilwiat se sectaj, naja nitekitini ipal ne Teut ipal nutatanoywan, wan nikyulmati muchi ne tajtuli wan tay ne tajkwilujtiwit ne taketzanimet. 15 Nikpia tejchialis tik ne Teut kenha ken yejemetsan kipiat; muchi tejemet tikmatit ka yawit muyulkwepat ne yejyek wan ne inte yejyek. 16 Yajika nikchiwa tay niweli pal nikpia yek muchi tay nikmati senpa ipal ne Teut wan ipal ne takamet.
17 Panutiwit miak shiwit, wan niajsik pal nikchiwa tetasujtatakulis wan pal niktakulia ne nutechan sejse. 18-19 Kwakuni sejse Yudayuj ipal Asia nechnamikket pupujtuk ka teupan, inte inawak miaktal nian iwan kumunilis; yejemetsan nemituyat pal ajsit mutech metzilwiat asu kipiaskiat taika nechtenewat. 20 Su te, ma inakan ne nikan nemit tay kiajsiket tay te yek kwak ninemituya iishpan ne kalpuli; 21 semaya kiajsiket ini, ka nitzajtzik, kwak ninemituya intzalan, ka ashan nechtenewat anmuishpan ipanpa ne muyulkwepalis ipal ne miktiwit.
22 Ne Felix kimati katka ken ijtuk iwan ne Ujti. Yaja inak ma tejchiakan. Kinhilwij:
—Kwak witz ne miaktuktiani Lusias, niaw nikita tay nikchiwas anmuwan.
23 Kituktij ne sentzuntuktiani ma kitajpia Pawlo wan ma weli kichiwa tay kineki, wan ma kiajkawa ma ajsikan ka né ne ikunpawan kipalewiat. 24 Kwak panuket sejse tunal, ne Felix ajsik iwan Drusila, ne isiwaw, ká Yudayuj katka. Kalnutzki ne Pawlo wan kikakik ipanpa ne tayulmatilis ipal ne Mawaltijtuk Yeshu, 25 wan kwak yaja tajtaketza ipanpa ken muneki ma tikchiwakan tay yek, wan ma inte tikchiwakan tay tikelewiat su te yek, wan ken yawi witz ne tunal kwak techchiwasket juzgar, ne Felix kipishki mawi wan nankilij:
—Ashan shu. Kwak weli niaw nimetznutza.
26 Nusan kimati katka ka ne Pawlo yawi kimaka tumin, yajika seujseujti kalnutza katka pal tajtaketzat. 27 Kwak panutiwit ume shiwit, Felix temakak ne itekiw iwan seuk, itukay Porcius Festus, wan ken kinekituya naka yek iwan ne Yudayujmet, ne Felix kiajkaw ne Pawlo tzaktuk.
Pawlo ishpan Festus wan Agripa
25 Festus ajsik tik ne provinciaj, wan kwak panutiwit yey tunal kiski Kaysarea wan yajki Yerushalem. 2 Wan walmuneshtijket ne weypalejmet wan ne achtumet ipal ne Yudayujmet kitenewat ne Pawlo wan kitajtanit, 3 wan kinekituyat kilwiat ma kalnutza ka Yerushalem, pal kipajpashuat wan kimiktiat tik ne ujti. 4 Kwakuni ne Festus nankilij ma mutajpia ne Pawlo tik Kaysarea, wan inak ka yaja yasneki ka né nemanha:
5 —Yajika —inak— su anwelit, shiwikikan nuwan wan su yaja kipia tatka tay te yek, shinakan ka né.
6 Nakak itzalan yejemet anka chikwey tunal, anka majtakti, wan yajki Kaysarea, wan ne ukse tunal mutalij tik ne kalpuli wan tatuktij ma wiki ne Pawlo. 7 Kwak kikalaktijket, ne Yudayujmet ne walajtiwit tik Yerushalem kiyawalujket, wan kichijket miak etek taishpanulis, melka te welituyat kilwitiat tatka. 8 Ne Pawlo inak ka inte kichijtuk tatka teyek ishpan ne tajtuli, nian ijtik ne teupan, nian iwan ne taltikpaktuktiani ipal Roma. 9 Ne Festus, pal naka yek iwan ne Yudayujmet, nankilij wan kilwij Pawlo:
—Tikneki titejku ka Yerushalem wan ma metzchiwakan juzgar ka ikuni ipanpa muchi ini nuishpan?
10 Inak ne Pawlo:
—Ninemi tik ne kalpuli ipal ne taltikpaktuktiani, kan ne nemi pal nechchiwat juzgar: te nikchijtuk tatka te yek iwan ne Yudayujmet, ken taja tikmati yek. 11 Asu nikchiwa tay teyek wan nemi pal nimiki ipanpa tay nikchijtuk, ma nimiki. Asu muchi tay ini takamet inat ka nikchijtuk inte tatka, kwakuni inte aka weli nechtemaka inwan. Ma ina ne taltikpaktuktiani.
12 Kwakuni ne Festus, kwak tamik kinnawatia ne tasennujnutzanimet, nankilij:
—Ne taltikpaktuktiani tikneki tikita? Itech ne taltikpaktuktiani tiasneki!
13 Panuket sejse tunal, wan Agripa, ne tatuktiani pal ne taltakutun, wan ne siwatatuktiani Berenike, ajsiket tik Kaysarea kitajpaluat ne Festus. 14 Kwak naktuyat ikuni miak tunal, ne Festus kilwij ne tatuktiani Agripa ken ijtuk iwan ne Pawlo, ina:
—Felix kiajkaw se takat tzaktuk, 15 wan kwak ninemik tik Yerushalem walejkuket nutech ne weypalejmet wan ne noymet ipal ne Yudayujmet ka kinekituyat ma muchiwa juzgar, 16 wan ninankilij ka ne Romajtakamet inte welit tatuktiat ma mumikti se takat achtu ma kipia ne tenejtuk ne tatenewanimet tik itachialis, wan ma kiajkawakan ina tay kineki ipanpa tay inat ka yaja kichijtuk. 17 Yajika, kwak walajket pal sennemit nikan, inte nishtunak nimutalia tik kalpuli wan nitatuktij ma wiki ne takat tik ne ukse tunal. 18 Ne tatenewanimet nemiket né wan te tamakaket nian se taika tay naja nikejketza te yek. 19 Sema kipiatuyat ankakeski tajtanilis ipanpa ne teumatilis wan ipanpa se itukay Yeshu ká miktuk wan ne Pawlo ina katka ka yaja yultuk. 20 Naja inte nikmati katka ipanpa uni tajtajtanilis wan niktajtanilij su kineki yawi tik Yerushalem wan ma kichiwat juzgar ka ikuni ipanpa muchi uni. 21 Kwak ne Pawlo tajtanki ma mupia tzaktuk hasta ma kikaki ne wey taltikpaktuktiani, nitatuktij ma mupia hasta niaw niktuktia ka Roma.
22 Agripa kilwij Festus:
—Naja nusan niknekiskia nikaki ne takat.
—Musta —inak— tiaw tikaki.
23 Wan ne ukse tunal ajsik ne Agripa wan ne Berenike iwan wey fantasiaj tik ne takakiluyan, iwan miaktuktianimet wan wejwey takat ipal ne techan, wan tatuktij ne Festus wan kikalaktijket ne Pawlo, 24 wan inak ne Festus:
—Tatuktiani Agripa wan muchi ne nikan nemit: shikitakan yajini, ká muchi ne Yudayujmet nechtajtantiwit tik Yerushalem wan nikan kan tinemit, wan inat wan tzajtzit ma intea muajkawa yultuk. 25 Naja inte nikejketzki tatka pal welit titatuktiat ma mumikti, wan yaja tajtanki ma mutukti itech ne taltikpaktuktiani pal muchiwa juzgar. 26 Naja te nikmati yek tay nikijkwiluskia pal nikilwia nutekuyu. Neka nalwikatuk anmuishpan, wan keski mas muishpan taja, tatuktiani Agripa, ma tikitakan wan ma nikmati tay niktajkwiluskia, 27 ika te niweli niktuktia se ilpituk asu te nikneshtia ne tajtaika.
26 Agripa kilwij Pawlo:
—Weli titaketza mupanpa.
Kwakuni ne Pawlo kimelawki ne imey wan pejki ina:
2 —Ipanpa muchi tay inat ne Yudayujmet ka nikchijtuk, nimumati iwan suertej ika ashan niaw niweli ninankilia muishpan, tatuktiani Agripa; 3 keski mas ika taja tikmati ken muwikat ne Yudayujmet wan muchi ne tajtajtanilis. Neka nimutajtawelia ma shinechkaki nejnejmach.
4 Kwak nichikitik katka ninemik ka Yerushalem ijtik nutechan, wan muchi ne Yudayujmet kimatit ken nimuwikatuk senpa. 5 Yejemet nechishmatit yek kwak pejki wan hasta ashan wan kimatit, su kinekiskiat inat, ka naja ni Parishayuj katka, uni ne sectaj mas uchulnaj ipal ne tutayulmatilis. 6 Wan ashan nechchiwat juzgar ipanpa nutejchialis ipal ne sentaketzat tay kichijki ne Teut. 7 Muchi ne tribujmet ipal tutechan Israel tekitit katka sujsul, ka tayua wan ka tunal, ika kimatit ka yawi witz. Wan nechtenewat, tatuktiani, ipanpa ini tejchialis. 8 Taika anhinat ka inte weli ma kiketza ne Teut ne miktiwit?
9 Najasan ninak ka ninemituya pal nikchiwa miak pal niksuma ne itukay ne Nazarayuj Yeshu, 10 wan yaja tay nikchijki tik Yerushalem, wan nikwikak tzajtzaktuk sujsul miak takamet wan siwatket ipal ne Teut, iwan ne tatuktilis ne nechmakaket ne weypalejmet, wan kwak mumiktiat katka, naja ninak ka nemi yek; 11 wan tik muchi ne kajkalsennemit nikchiwa katka ka muwitekit sejsenpa, wan ka kukujtaketzat, wan sujsul nikwalani katka inwan wan nikintalultia katka hasta tik tepal tejtechan.
12 Ne weypalejmet nechtekimakatiwit wan nechmakatiwit tatuktilis, wan kwakuni niajki tik Damashek, 13 tatuktiani, wan tajkutunal, tik ne ujti, kiski ka ilwikak se tawil mas wey que ne tunal wan nechtawiluj naja wan ne senyawit nuwan, 14 wan kwak muchi tiwetztiwit talchi, nikakik se nechilwia tik ne Ebrayuj taketzalis:
"Shaul Shaul, taika tinechtalultia? Uij ma shinechsuma!"
15 Naja ninak:
"Ká taja, Tajtzin?"
Ne Tajtzin inak:
"Naja ni Yeshu, ká ne taja tiktalultia. 16 Saman shimuketza wan shimutali ejkatuk, ika naja nalnestuk muishpan pal nimetzishpejpena pal nimetzmaka mutekiw wan pal tikinhilwia muchi ka tinechitztuk wan muchi tay niaw nimetzneshtilia. 17 Naja niaw nimetzmakishtia itech ne chinamit wan ne tejtechan kanka nimetztitania 18 pal tikinhishpelua, pal kiane ma kiajkawakan ne takumi wan ma muishkwepakan itech ne tawil, wan ma kiajkawakan ne itatuktilis ne Tenewani wan ma muishkwepakan itech ne Teut, pal kikwit tetapupulwilis ipal tay tateyekchijtiwit wan pal nechyulmatit wan nejnemit ijtik ne teujteuchijtuk."
19 Yajika, tatuktiani Agripa, niktakamatki ne tachialis ipal ne ilwikak, 20 wan nipejki nikinhilwia, achtu tik Damashek, neman tik Yerushalem wan nujme Yudaya wan ijtik ne sejseuk techan, ma muyulpatakan wan ma muishkwepakan itech ne Teut wan ma kichiwakan tay yek pal welit muyulpatat. 21 Ipanpa uni, ne Yudayujmet nechitzkijket kwak ninemituya itech ne teupan wan kinekit nechmiktiat. 22 Ne Teut nechpalewij, yajika nikan ninemi hasta ne tunal pal ashan. Nikilwia tay nikmati ne chijchikitik wan ne wejwey, wan te nina tatka sute tay ne inaket ka yawi muchiwa ne taketzanimet, wan Moshe nusan: 23 ka ne Mawaltijtuk yawi taekua; ka yaja ne achtu pal muyulkwepa kwak miktuk; ka yawi kinawatia ne tukniwan wan ne tejtechan.
24 Kwak yaja ina uni, ne Festus kitzajtzalij ina:
—Timele, Pawlo; timelekisa iwan ne wey amamatilis!
25 Wan Pawlo:
—Inte nimele —ina—, yek Festus, sute nina tay tejkia wan nutzuntekun nemi yek. 26 Ika niknutza melaknaj ne tatuktiani wan yaja kimatiaya tay muchi ini, ika nina ka te tatka pal muchi ini ichtaka ipal, ika te muchijki tik se tzinkal! 27 Tatuktiani Agripa, tikyulmati ne taketzanimet! Nikmati ka tikinyulmati.
28 Ne Agripa kilwia ne Pawlo:
—Chiupi kineki pal tinechkwepa Cristianoj!
29 Wan Pawlo:
—Niktajtaniskia ne Teut ma shimuchiwakan, ma kineki chiupi ma kineki wey, taja wan muchi ne nechkakit ashan, kenha ken naja, sema ma te shinemikan ijilpituk ken naja.
30 Wan muketzki ne tatuktiani wan nusan ne gobernador wan ne Berenike wan ne inwan sennemituyat, 31 wan yajket ka inkwaj wan pejket muilwiat:
—Ini takat te kichiwa tatka pal ma mumikti nian ma muilpi.
32 Agripa kilwij ne Festus:
—Weliskia mumakishtia yajini su te inatuskia ka kineki ma kichiwa juzgar ne taltikpaktuktiani.
Ne Bibliaj Tik Nawat · © 2008, 2012 Jan Morrow