Chronological

1 Ne taneshtilis ipal Yeshu Mawaltijtuk ne kimakak ne Teut, pal kinhilwitia ne itejtekitini tay nemi pal muchiwa nemanha. Wan pal taneshtia kititanij ne itanawatiani itech Yojan itekitini, ² ká inatuk ka tejkia muchi tay kitztuk: ne ipalabraj ne Teut wan ne tay inak Yeshu Mawaltijtuk. ³ Kipia suertej ne kita ini amat wan ne takakit ne pajpalabraj ipal ne teutaketzalis wan ne tajpiat tay nemi ijkwilujtuk ijtik yaja, ika ne tunal witzaya.

⁴ Naja, Yojan, nikintajpalua ne chikume sennemit ne nemit tik Asia: ma metzinmaka tetasujtalis wan nejmachnemilis yajane ká nemi wan nentuk wan yawi witz, wan ne chikume nawal nemit tik itachialis ne ikuijpal, ⁵ wan Yeshu Mawaltijtuk ne ina tay tejkia, ne achtupunijtuk ipal ne miktiwit wan ne achtu ipal ne tatuktianimet ipal ne taltikpak.

Ne techtasujta wan techishtilia ne tutajtateyekchijtuk iwan ne iesyu ⁶ wan techchijki se tatekimakalis wan palejmet ipal Teut, wan ne iteku, ma inakan ka wejwey wan ma kipiakan intajpal senpa wan senpa, amen.

⁷ Uni witz iwan ne mijmishti

wan n' ijish muchi kitasket,

wan yejemet ká kikuyunijket,

wan ipanpa chukasket muchi

ne trijtribuj ipal ne tal.

Ijkia, amen.

⁸ "Naja ne A wan ne Z" ina ne tajtzin Teut, ne nemik wan ne nemi wan ne witz, ne weli muchi.

⁹ Naja, ne anmuiknew Yojan, wan ikunpa ijtik ne uijkayu wan tatekimakalis wan tanejmachselilis iwan Yeshu, ninemik tik ne islaj itukay Patmos ipanpa ne ipalabraj ne Teut wan ne itaneshtilis Yeshu. ¹⁰ Nimuchijki iwan iijiu tik ne tunal ipal ne Tajtzin wan nikakik ka nuipan se tzajtzi wey ken se trompetaj, ¹¹ ina: "Shitajkwilu tay ne tikita tik se amat wan shiktukti itech ne chikume sennemit: Epesos, Smurna, Pergamos, Tuateyra, Sardis, Piladelpia wan Laodikea."

¹² Wan nimuishkwepki nitachia pal nikita ká nechnutza, wan kwak nimuishkwepki nikitak chikume tawilkal ipal teukwit, ¹³ wan tatajku ne tajtawilkal se kenha ken ne Itelpuch ne Takat, takentijtuk tik ikwajkwach ne ajsit ne ijikshi, wan yawalujtuk ne ielpan iwan se cinchoj ipal teukwit. ¹⁴ Ne itzuntekun wan ne itzunkal ijistak ken ne ichkat, istak ken ne nievej, wan ne iijish ken ne tit, ¹⁵ wan ne ijikshi kenha ken tumin wey ipatiw, ken tatatuk ijtik se hornilloj, wan kwak taketza mukaki ken wey at, ¹⁶ wan kipia ijtik imayekkan chikume sital, wan tik ne iten kisa se espadaj tzuntamej kipia ume itan, wan ne ishkalyu ken ne tunal tajtawia iwan itajpal.

¹⁷ Wan kwak nikitak nimutamutak itech ne ijikshi ken nimiktuk, wan kitalij ne imayekkan nujpak wan ina:

—Maka shimajmawi. Naja ne achtu wan ne tipan, ¹⁸ wan ne niyultuk wan nimiktuk, wan ashan niyultuk pal senpa wan senpa, wan nikpia ne tejtepusti ne iwan mutentzakwat ne mikilis wan ne miktan.

¹⁹ Shitajkwilu, tel, tay tikitztuk wan tay nemi wan tay yawi muchiwa tipan: ²⁰ ne ichtaka ipal ne chikume sital ne tikitak ijpak ne numayekkan, wan ne chikume tawilkal ipal teukwit. Ne chikume sital tanawatianimet ipal ne chikume sennemit, wan ne chikume tawilkal ne chikume sennemit.

Tay tajkwiluj ipal ne chikume sennemit

2 Shitajkwilu ipal ne tanawatiani ipal ne sennemit tik Epesos:

"Ini tay ina ne kipia ne chikume sital tik imayekkan, ne nejnemi tatajku ne chikume tawilkal ipal teukwit: ² Nikmati ka titekiti wan tikujkutia wan titejchia nejnejmach, wan ka inte tiweli tikselia ne inte yejyek wan tikejekuj ne ká inat ka yejemetsan tijtitanijtuk wan te ijkia, wan tikajsit ka taketzat sanka; ³ wan tikpia tanejmachselilis wan tikselij ka numaku wan te tikujkutiak. ⁴ Melka uni, nikpia se ipanpa nimetzajwaskia: tay ne achtu tiktasujtak, intea tiktasujta kenha. ⁵ Shikelnamiki tel ken tinentuk achtu wan ashan tiwetztuk, wan shimuyulpata, wan shikchiwa ne mutekiw ken achtu. Asu inte, niaw niajsi mutech nikijkwani ne mutawilkal asu inte timuyulpata. ⁶ Melka ini, tikpia se tay yek, ka tikishijia ne itekiw ne itepewa Nikolaos; naja nusan nikishijia. ⁷ Ká ne kipia takakilis, ma takaki tay ne Ijiutzin kinhilwia ne sejsennemit. Niktakwaltis ne welituk tay ipal ne kwawit yultuk ne nemi tik ne iyekmil ne Teut."

⁸ Shitajkwilu ipal ne tanawatiani ipal ne sennemit tik Smurna:

"Ini tay ina ne achtu wan ne tipan ne mikik wan muyulkwepki: ⁹ Nikmati ka tikpia uij wan timuneki, melka tikpia wey, wan ka kukujtaketzat yejemet ká inat ka Yudayujmet wan te ijkiuni, yejemet se sennemit ipal ne Tenewani. ¹⁰ Maka shimajmawi ika weli titaekua. Ashan ne Tamintuk yawi kintzakwa sejse anmejemet pal anmuejekuat wan anyawit kipiat uij ijtik majtakti tunal. Shimuchiwa yek hasta mikilis wan niaw nimetzmaka ne yawal yultuk. ¹¹ Ká ne kipia takakilis, ma takaki tay ne Ijiutzin kinhilwia ne sejsennemit. Iwan ne welituk inte yawi muchiwa tatka tik ne ukse mikilis."

¹² Shitajkwilu ipal ne tanawatiani ipal ne sennemit tik Pergamos:

"Ini tay ina ne kipia ne espadaj kipia ume itan tik ne iten: ¹³ Nikmati kan timuchantia, kan nemi ne ikuijpal ne Tenewani, wan tinechpalewia, wan titayulmatki ka numaku nusan tik ne tujtunal ipal Antipas, ne tanutzki yek nupanpa, wan kimiktijket tik anmutechan kan ne Tenewani muchantia. ¹⁴ Melka uni, nikpia sejse ipanpa nimetzajwaskia: tikpia ikuni ankakeski ne yawit iwan ne itamachtilis Balaam, ne kimachtij Balak ma kitali se tatzunchaluas tik itachialis ne ipilawan Israel, ma kikwa ne tay mutakulijtuk ne teujteutzitzin wan ma tatzinhejenchiwa. ¹⁵ Ijkiasan tikpia taja nusan sejse yawit iwan ne intamachtilis ne itepewa Nikolaos. ¹⁶ Shimuyulpata tel, asu inte niaw nimunelwia niajsi mutech nimusuma inwan iwan ne espadaj ipal ne nuten. ¹⁷ Ká ne kipia takakilis, ma takaki tay ne Ijiutzin kinhilwia ne sejsennemit. Nikmakas ne welituk chiupi manaj inashtuk wan nikmakas se kusti istak, wan ijpak ne kusti ijkwilujtuk se itukay ne inte weli aka, sema ne kikwijtuk."

¹⁸ Shitajkwilu ipal ne tanawatiani ipal ne sennemit tik Tuateyra:

"Ini tay ina ne Itelpuch ne Teut ne kipia ne iijish ken tit wan ne ijikshi kenha ken tumin wey ipatiw: ¹⁹ Nikishmati mutekiw wan mutetasujtalis wan mutayulmatilis wan mutekitilis wan mutanejmachselilis, wan nikmati ka ne tipan mas wey que ne achtu. ²⁰ Melka uni, nikpia se ipanpa nimetzajwaskia: tikajkawa ne siwat itukay Izebel, ne ina ka yaja taketzani, kinmachtia wan kinshijshikua ne nutejtekitini, tatzinhejenchiwa wan kikwa tay mutakulijtuk ne teujteutzitzin, ²¹ wan nikmakak tiempoj pal muyulpata wan te kinekik kiajkawa itatzinhejenchiwalis. ²² Ashan niktamuta pak se petat wan muchi ká mawiltiat iwan yawit kipiat miak penaj asu inte muyulpatat ipanpa tay kichijtiwit, ²³ wan niaw nikmiktia ne ipilawan, wan muchi ne sejsennemit yawit kimatit ka naja ne ká niktejtemua tik ne inyujyulu ne takamet, wan niaw nimetzinmaka muchi sejse ken itekiw. ²⁴ Anmejemet ne sekit tik Tuateyra ne inte yawit iwan uni tamachtilis wan te kishmattiwit miktan ipal ne Tenewani, ken inat, naja nimetzinhilwia ka inte nimetzintamutilia ukse kimil; ²⁵ sema shikitzkikan tay ankipiat hasta ma niwiki. ²⁶ Wan ne welituk wan ne tajpia itekiw hasta ma tami, nikmaka tatuktilis ijpak ne tejtechan, ²⁷ wan yawi kintekimaka iwan itupil ipal tepusti; ken kujkumit ipal sukit yawit kelunit, ²⁸ ken naja nusan nikwij itech ne nuteku, wan nikmakas ne sital ipal tapuyawa. ²⁹ Ká ne kipia takakilis, ma takaki tay ne Ijiutzin kinhilwia ne sejsennemit."

3 Shitajkwilu ipal ne tanawatiani ipal ne sennemit tik Sardis:

"Ini tay ina ne kipia ne chikume nawal ipal Teut wan ne chikume sital: Nikishmati ne mutejtekiw. Inat ka taja tiyultuk, wan taja miktuk. ² Shipewa tikishpelwia wan shikmaka ifuerzaj ne tay nakat wan yawit mikit, ika inte nikita ka ne mutejtekiw yekajtiwit tik itachialis ne nuTeut. ³ Shikelnamiki tel ken tikwij wan titakakik, wan shitajpia wan shimuyulpata, ka asu inte tikishpelwia niaw niwitz ken se techtekini wan te tikmati tay horaj niaw niajsi mutech. ⁴ Melka uni, tikpia ankakeski tik Sardis ne inte kisusulwijtiwit ne inkwajkwach wan nejnemisket nuwan tik istak ika yejyek. ⁵ Ne welituk ijkiuni yawi mutakentia tik ikwajkwach istak, wan te niaw nikishtia ne itukay tik ne amat yultuk, wan niaw nina ka yek ne itukay tik itachialis ne nuteku wan tik itachialis ne itajtanawatiani. ⁶ Ká ne kipia takakilis, ma takaki tay kinhilwia ne Ijiutzin ne sejsennemit."

⁷ Shitajkwilu ipal ne tanawatiani ipal ne sennemit tik Piladelpia:

"Ini tay ina ne ipal Teut, ne yekkaya, ne kipia ne itepus Dawid, ne tatentapua wan te aka weli kitentzakwa, wan tatentzakwa wan te aka weli kitentapua: ⁸ Nikishmati ne mutejtekiw. Ashan niktalijtuk muishpan se tentzakka tapujtuk ne inte aka yawi weli kitzakwa, ika tikpia chiupi mutajpal wan titajpishki ne nupalabraj wan te inak ka inte ne nutukay. ⁹ Ashan niaw nimetzmaka sejse ipal ne isennemit ne Tenewani, ne inat ka yejemet Yudayujmet wan inte tejkia, yejemet inat sanka; ashan niaw nikchiwa ma wikikan mutankwaketzat ishpan mujmukshi wan ma kimatikan ka naja nimetztasujta; ¹⁰ ika titejchishki nejnejmach ken ninak, wan naja nusan niaw nikchiwa se mupal, niaw nimetzishtilia ne horaj ipal taejekulis ne yawi ajsi ipal muchi ne tajtal kinhejekua ne chanejket ipal ne tal. ¹¹ Niaw niwitz nemanha. Shikitzki ne tay tikpia pal te aka yawi kikwi ne muyawal. ¹² Ne welituk niaw nikchiwa se taketzal tik ne iteupantzin ne Teut, wan intea yawi kisa tatenpan, wan niaw nitajkwilua ijpak ne itukay ne nuTeut wan ne itukay ne itechan ne nuTeut, ne yankwik Yerushalem, ne kutemutuk tik ne ilwikak itech ne nuTeut, wan ne nutukay yankwik. ¹³ Ká ne kipia takakilis, ma takaki tay ne kinhilwia ne Ijiutzin ne sejsennemit."

¹⁴ Shitajkwilu ipal ne tanawatiani ipal ne sennemit tik Laodikea:

"Ini tay ina ne Amen, ne tanutzki yek wan ina tejkia ne iwan pejki muchi tay kichijki ne Teut. ¹⁵ Nikishmati ne mutejtekiw, ka taja nian tisesek nian titutunik. Niknekiskia ma shisesek o ma shitutunik. ¹⁶ Ijkiuni, ika nian tisesek nian titutunik asunte tiyamanka, niaw nimetzisuta tik ne nuten, ¹⁷ ika tina: 'Nikpia wey, wan wey nutumin, wan te nimuneki tatka', wan te tikmati ka tajasan ne ká nechkukua nuyulu wan tamaka lastimaj wan te kipia tatka wan pupuyut wan petznaj. ¹⁸ Naja nimetzilwia ma shinechkuili teukwit tatatuk tik tit pal tikpia, wan mukwajkwach istak pal timutzakwa wan te timuilwitia wan tishpinawa ipanpa ne mupetztikayu, wan ma shikmawalti ne mujmuish iwan ishpajti pal tiweli titachia. ¹⁹ Muchi ká nikintasujta naja nikinhajwa wan nikinhiskalia; shikishpelwi tel wan shimuyulpata. ²⁰ Nikan ninemi itech ne tentzakka niktujtunwia. Asu aka nechkaki wan kitapua, niaw nikalaki ka ichan wan niaw sentakwa iwan wan yaja nuwan. ²¹ Ne welituk niaw nikajkawa mutalia nunawak tik nukuijpal, ken naja nusan niwelik wan nimutalijtuk inawak ne nuteku tik ne ikuijpal. ²² Ká ne kipia takakilis, ma takaki tay kinhilwia ne Ijiutzin ne sejsennemit."

Ne ikuijpal ne Teut

4 Tipan nitachishki wan nikitak ka tapuik tik ne ilwikak wan ne kupak ne nikakik achtu ken se trompetaj nechnutza wan ina: "Shaltejku ka nikan wan niaw nimetzilwitia tay ne yawi muchiwa tipan."

² Nemanha nimuchijki iwan iijiu, wan né nemituya se kuijpal tik ne ilwikak, wan se muetztuk ijpak ne kuijpal, ³ wan ne itachialis ne muetztuk ken kujkusti wejwey ipatiw, wan se kusamalut kiyawalua ne kuijpal, ne muita ken se esmeraldaj.

⁴ Wan ne kuijpal nemituya yawalujtuk iwan senpual-nawi kuijpal, wan ijpak ne kujkuijpal senpual-nawi noymet muejmuetztuk, tzajtzaktuk iwan inkwajkwach istak, wan ijpak intzujtzuntekun nemituyat yajyawal ipal teukwit.

⁵ Wan tik ne kuijpal kisat sejse ken takipini, wan mukakit sejse ken tzalani wan tikwini, wan chikume tawil tatat iishpan ne kuijpal, yejemet ne chikume nawal ipal ne Teut, ⁶ wan iishpan ne kuijpal ken se at chipawak ipal vidrioj, wan nemit tik itajku ne kuijpal wan kiyawaluat ne kuijpal nawi tay yujyultuk, tejtentuk iwan inhijish ka ishpan wan ka ipan.

⁷ Wan ne achtu tay yultuk ken se leon, wan ne ukse tay yultuk ken se turuj, wan ne yey kipiatuya ne iishkalyu ken se takat, wan ne nawi ken se kwawti patani. ⁸ Wan ne nawi tay yultuk kipiatuyat sejse chikwasen iejtapal. Tatenpan wan taijtik tejtentuk iwan inhijish, wan te muketzat inat ka tunal wan ka tayua:

⁹ Wan kwak ne tay yujyultuk yawit inat ka wey wan yawit kimakat respetoj wan panpadiush ne muetztuk ijpak ne kuijpal ne yultuk senpa wan senpa, ¹⁰ yawit wetzit talchi ne senpual-nawi noymet iishpan ne muetztuk ijpak ne kuijpal, wan yawit mutankwaketzat tik itachialis ne senpa wan senpa yultuk, wan yawit kitamutat ne inyajyawal iishpan ne kuijpal inat:

5 Wan nikitak ka iyekkan ne muetztuk ijpak ne kuijpal se amat kululujtuk tajkwilujtuk taijtik, wan ka ipan piktuk iwan chikume sajti, ² wan nikitak se tanawatiani hombron tanajnawatia wan tzajtzi:

⁶ Wan nikitak, tatajku ne kuijpal wan ne nawi tay yujyultuk wan tatajku ne noymet, se ichkakunetzin ejkatuk ken miktijtuk; wan kipiatuya chikume cachoj wan chikume ijish, yejemet ne chikume nawal ipal ne Teut; ⁷ wan ajsik wan kikwij itech ne imayekkan ne muetztuk ijpak ne kuijpal.

⁸ Wan kwak kikwijtuya ne amat, ne nawi tay yujyultuk wan ne senpual-nawi noymet mutamutaket talchi tik itachialis ne ichkakunetzin. Muchi kipiatuyat sejse iguitarraj wan wajwajkal tejtentuk iwan teukwit wan tapupuch, yejemet ne inteujteutajtanilis ne tayulmatit, ⁹ wan takwikaket se yankwik takwikalis, ina:

¹¹ Wan nikitak wan nikakik taketzat miak tanawatiani ne kiyawaluat ne kuijpal wan ne tay yujyultuk wan ne noymet, wan tepewit ne tajtanawatianimet hasta kan te welituskiat mupuat, sujsul sujsul mijmiak. ¹² Wan tzajtzit:

¹³ Wan muchi tay muchijki ne nemi tik ne ejekat wan ijpak tal wan itan tal wan ijpak at wan muchi tay nemi nujme nikinkakik inat:

¹⁴ Wan ne nawi tay yujyultuk inaket:

Wan ne noymet mutamutaket talchi wan mutankwaketzket.