Chronological

1 Tejemet, Pawlo wan Timoteo, itejtekitini ne Mawaltijtuk Yeshu, tiktuktiat ini tajkwilul itech muchi ne tukniwan ne kiyulmatit ne Mawaltijtuk Yeshu ká nemit tik Pilipoy, iwan ne tapachiwianimet wan ne tekitinimet. ² Ma metzinmaka ne Teut ká ne tuteku, wan ne tajtzin Yeshu Mawaltijtuk, tetasujtalis wan nejmachnemilis.

³ Senpa nikilwia ne Teut padiush kwak nimetzinhelnamiki, ⁴ tik muchi ne nuteujteutajtanilis anmupanpa, wan niktajtani ne Teut iwan pakilis, ⁵ ipanpa ne anmumusentepewalis ipal ne yeknawatilis kwak tipejket wan senpa hasta ne tunal pal ashan. ⁶ Nikmati ini, ka ne ká kitzintij se yek itekiw anmuwan yawi kitamia yek hasta ne tunal ipal ne Mawaltijtuk Yeshu.

⁷ Yek ma nimumati ijkiuni anmupanpa, ika nimetzinpia tik nuyulu muchi anmejemet, kwak ninemi ilpituk wan kwak nina wan nikilwitia ka tejkia ne yeknawatilis, ken nukunpalejwan tik teutasujtalis; ⁸ ika ne Teut kimati ken nimetzinneki muchi anmejemet iwan ne iyulkukulis ne Mawaltijtuk Yeshu, ⁹ wan niktajtani ne Teut ma tepewi sujsul sujsul ne anmutetasujtalis tik taishmatilis wan tachialis, ¹⁰ pal ankitat yek tay ne wey ipatiw, pal ma shimuchiwakan yujyulchipawak wan yejyek ipal ne tunal ipal ne Mawaltijtuk, ¹¹ wan tejtentuk iwan itakil tamelakchiwalis ipanpa Yeshu Mawaltijtuk pal inat ken wey wan yek ne Teut.

¹² Niknekiskia ma shikmatikan, nukniwan, ka tay ne muchijki nuwan mas yek kipalewijtuk ne yeknawatilis, ¹³ ken ne nuijilpika ipanpa ne Mawaltijtuk muneshtijtiwit tik muchi ne wey kal wan nujme, ¹⁴ wan muchi tukniwan kiyulmatit mas ne Tajtzin ipanpa ne nuijilpika wan sujsul mas yawit tanutzat ne palabraj wan te yawit majmawit.

¹⁵ Nusan tejkia ka sejse tanajnawatiat ipal ne Mawaltijtuk ipanpa envidiaj wan tasumalis, wan sejseuk ika yejemet kitat yek. ¹⁶ Tejkia ka ne sekit kichiwat ika kimatit ka ninemi pal ninankilia ipanpa ne yeknawatilis, ¹⁷ wan ne sekit tanawatiat ipanpa ne Mawaltijtuk pal muishtemuat tay kinekit, wan te iwan yulchipakayu, ika inat ka kiane yawit kipitziniat chiupiuk ne nuijilpika. ¹⁸ Melka ijkiuni, tay kineki ina? Anka kimatit ka yawit muitat yek, anka tik yekkaya, pero tanawatiat ipanpa ne Mawaltijtuk wan yajika nipaki wan nipakis nusan, ¹⁹ ika niaw nimupalewia ipanpa muchi uni, iwan ne anmuteutajtanilis wan iwan tay nechpalewia ne iijiu Yeshu Mawaltijtuk, ²⁰ ken nitejchia wan nikmati ka te niaw nishpinawa ipanpa tatka, sute ashan ken senpa, iishpan muchi, inasket ka wey ne Mawaltijtuk su nuweyka yultuk wan nusan su miki, ²¹ ika su niyultuk, kineki ina ne Mawaltijtuk, wan su nimiki, nupal yek! ²² Su yultuk nuweyka, uni kineki ina itakil nutekiw, wan tay nikishpejpenas inte nikmati: ²³ ne ujume nechmalachuat, ika melka niknekiskia niaw ninemi iwan ne Mawaltijtuk, ika sujsul mas yek, ²⁴ anmejemet munekit mas ma ninaka yultuk; ²⁵ wan yajika, nikmati ka niaw ninaka wan nimukawas anmupal, pal nimetzinpalewia wan ipal ne pakilis ipal ne tayulmatilis, ²⁶ pal ma shikweymatikan mas ne Mawaltijtuk Yeshu nupanpa kwak niajsi anmutech uksenpa.

²⁷ Sema shinejnemikan iwan ne iyeknawatilis ne Mawaltijtuk ken muneki, pal kiane naja su niajsi wan nimetzinhita wan su te niajsi ma nitakaki ka annakat tik sanse anmuijiu wan sanse anmuyulu musenhejekuat ipanpa ne tayulmatilis ipal ne yeknawatilis, ²⁸ wan ma te shimuishmutikan ipanpa tatka tay kichiwat ká ne metzintejtenewat. Uni kinhilwitia ka pulijtiwit, wan anmejemet mumakishtijtiwit, wan ne Teut kichijtuk muchi. ²⁹ Ika tay ne metzintakulijtiwit ipanpa ne Mawaltijtuk, te semaya ma shikyulmatikan, nusan ma shitaekukan ka imaku, ³⁰ tik sanse tasumalis, kenha ken annechitztiwit nutech wan ashan antakakit nutech.

2 Yajika, su nemi tepalewilis tik ne Mawaltijtuk, wan tetasujtalis pal timumatit yek, wan tasentepewalis ipal ne Ijiutzin, wan yulkukulis wan taeknelilis, ² shinechtemakan iwan pakilis, ma shikishkejketzakan kenha, ma shitatasujtakan kenha, ma shimumatikan kenha. ³ Te tatka pal kitemua tay kineki sejse, te tatka sema pal muweymati, sute iwan kanawakmatilis ma kita sejse ka ne seki mas wey que yaja. ⁴ Ma te kishkejketza sejse tay ipal, sute tay tepal nusan. ⁵ Shimumatikan ijtik anmejemet, tay ne nusan ijtik Mawaltijtuk Yeshu, ⁶ ká:

¹² Kiane, nukujkunpawan yektasujtatuk, ijkiunisan ken senpa annechtakamattiwit, te sema ken kwak ninemik anmuwan sute sujsul mas ashkan kwak te ninemi, shimajmawikan wan shijtzilikakan pal anmupalewikan, ¹³ ika ne Teut ká ne tekiti ijtik anmejemet pal ma shiknekikan wan ma shikchiwakan ne tay yaja kita yek.

¹⁴ Muchi tay ankichiwat, maka shikikinakakan nian shitajtanikan tatka kwak ankichiwat, ¹⁵ pal anmuchiwat ikujkunew Teut yujyulyamanik ká inte kichijtiwit tatka tay teyek wan inte kipiat nian se ipelech tik itajku muchi ne majmalintuk wan kwejkwelnaj, ma shikawanikan intzalan ken tajtawil tik ne taltikpak, ¹⁶ wan ma shitajpiakan ne palabraj yultuk pal nikpia taika nimuweymatiskia tik ne tunal ipal ne Mawaltijtuk, ika kipishtuk ipatiw tay ne nitekitki wan nikujkutiak. ¹⁷ Melka uni, su mushinia nuesyu ken se tetakulis wan se tekitilis ipanpa ne anmutayulmatilis, nipaki, wan niyulpaki anmuwan, ¹⁸ wan anmejemet kenha anpakit wan anyulpakit nuwan.

¹⁹ Nitejchia ma nechajkawa ne tajtzin Yeshu niktuktia Timoteo anmutech talul, pal naja nusan nishpajpaki kwak nikmati ken ijtuk anmuwan, ²⁰ ika te nikpia aka ká kipia iyulu kenha ne kimati ken annemit wan yulkakasiwi, ²¹ ika muchi kitemuat tay inpal, te tay ipal Yeshu Mawaltijtuk. ²² Ankishmatit ne itaejekulis: yaja nechpalewijtuk iwan ne yeknawatilis ken se kunet kipalewia iteku. ²³ Yajini tel nikneki niktuktia anmutech nemanhachin kwak nikita ken ijtuk nuwan. ²⁴ Nikmati ka ne Tajtzin yawi kichiwa ma niajsi naja nusan talul.

²⁵ Ninak ka muneki ma niktukti anmutech nuiknew Epaproditos, ne nechpalewia wan tasuma nuwan, wan ká anmupal se titanijtuk ne tekiti nupal wan kichiwa tay nimuneki, ²⁶ ika yaja metzintasujta muchi wan tajselia ika antakaktiwit ka yaja kukushki, ²⁷ wan nusan ijkia, yaja kukushki hasta achka yawi miki. Melka uni, kipalewij ne Teut, inte yaja isel, naja nusan ne Teut nechpalewij, pal te nikpia tay nechkukuskia nuyulu chiupiuk. ²⁸ Yajika niktuktia nejnejmach pal kiane ma shikitakan wan ma shipakikan senpa, wan ma intea nechkuku nuyulu. ²⁹ Shikwikan tel anmutzalan tik itukay ne Tajtzin iwan muchi ne pakilis, wan shiktasujtakan sejse ijkiuni, ³⁰ ika ipanpa ne itekitilis ne Mawaltijtuk yaja muajshitij itech mikilis, wan te mutajpishki pal weli kichiwa tay ne kinekiuk ipal anmutekitilis nupal.

3 Pal tami, nukniwan, nimetzintajpalua tik ne Tajtzin. Naja te nishtuna nimetzinhilwia ijkiuni, wan anmejemet kimatit yek.

² Cuidadoj iwan ne pejpelumet. Cuidadoj iwan ne tekitinimet ipal teyek. Cuidadoj iwan ne nakatekinimet. ³ Ika anmejemet ne tayawaltekilis, ká tekitit ipal ne Teut iwan ne anmuijiu, wan muweymatit ipanpa ne Mawaltijtuk Yeshu wan te kiyulmatit ne anmuweyka. ⁴ Melka naja niweliskia nikyulmati ne tuweyka: su seki ina ka anka kiyulmati ne tuweyka, naja mas! ⁵ Shikelnamikikan ka naja nimuyawaltek iwan chikwey tunal; ni Israeltakat ipal ne tribuj ipal Ben-Yamin, ni Ebrayuj ikunew Ebrayujmet, itan ne tajtuli ni Parishayuj, ⁶ niktalultia katka ne tusennemit iwan kwalan, wan te nikchijtuya tatka tay teyek ken ina wan tatuktia ne tutajtuli!

⁷ Wan muchi tay nikpiatuya pal niyek, uni nikmati ipal ne Mawaltijtuk ken puliwilis. ⁸ Mas yek, hasta muchi nusan nikmati ken puliwilis, ika mas wey ne tamatilis ipal ne Mawaltijtuk Yeshu, nutajtzin: ka imaku naja nikpulujtuk muchi, wan nina ka kupajsul ika niaw nikpia ne Mawaltijtuk ⁹ wan niaw nimuajsi ijtik yaja. Naja nusel te niyek ipanpa ne tajtuli, sema ika nikyulmati ne Mawaltijtuk; sema ne Teut nechekchiwa ipanpa ne tayulmatilis, ¹⁰ pal nikishmati yaja, wan ne itajpal ika yaja muyulkweptuk, wan ne tasentepewalis ipal ne itaekulis, muchijtuk ken ne imikilis, ¹¹ su niakeman niweli niajsi nalmuketza kwak nimiktuk.

¹² Te nina ka nikajsituka o niuksituka. Niktemua pal nikita su nikitzkia, ika ne Mawaltijtuk Yeshu nusan nechitzkijtuk. ¹³ Nukniwan, naja te nikishkejketza ka nikitzkijtuka. Sema ini: nikelkawa tay nemi nuipan wan nimumelawa ka nuishpan, ¹⁴ nimutalua niaw hasta niajsi kanka muneki pal nikana tay niktemua: ma nechnutza ne Teut ka ikajku itech ne Mawaltijtuk Yeshu. ¹⁵ Yajika, muchi ká tiuksitiwit, tikishkejketzakan ijkiuni, wan su ankishkejketzat ukseuk, uni nusan ne Teut yawi metzinneshtilia. ¹⁶ Sema ka né kan talejkutiwita, nepa titaksakan.

¹⁷ Nukniwan, shimuchiwakan muchi ken naja wan shikishkejketzakan ne ká nejnemit kenha ken tejemet ká antechpiat pal ankitat ken, ¹⁸ ika nejnemit miak ká nimetzinhilwia katka senpa, wan ashan hasta nichuka nimetzinhilwia, ka yejemet kinekit kijtakuat ne icruz ne Mawaltijtuk: ¹⁹ ka ne intamilis puliwilis; ka kipiat ken teut ne inhijti; wan tzitzinakat tik inhishpinawalis ika kishkejketzat ne tay ipal ne taltikpak. ²⁰ Tejemet titechantakamet ipal ne ilwikak, wan ikuni tikpiat tutamakishtiani, ne tajtzin Yeshu Mawaltijtuk, ²¹ ne yawi kipata ne tuweyka te tatka ipatiw pal muchiwa ken ne iweyka tzitzinaka iwan ne itajpal ne iwan weli tatuktia tik muchi.

4 Kiane, nukniwan ká nikneki wan niktasujta, nupakilis wan nuyawal, shiyulchikawikan tik ne Tajtzin, yejyektasujtatuk.

² Nimutajtawelia iwan Ewodia wan nimutajtawelia iwan Suntuke ma kimatikan kenha tik ne Tajtzin. ³ Ijkiasan nimetztajtani nusan, nukunpalej yek, ma shikpalewi uni siwatket ká sentekitket nuwan wan nusan iwan Clemente, wan muchi nusejsentekitini. Muijkwilujtiwit ne intujtukay tik ne Amat Yultuk!

⁴ Shipajpakikan ipanpa ne Tajtzin senpa! Niaw nina senpa: shipajpakikan! ⁵ Ma muchi kimatikan ne anmuyulyamanikayu. Ne Tajtzin tunawak. ⁶ Ma te tatka metzinyulkakasu, sute tik muchi, pal ankineshtiliat ne Teut tay ankitajtaniliat, shiktajtanikan ne Teut wan shimutajtawelikan iwan, wan shikilwikan panpadiush. ⁷ Wan ne inejmachnemilis ne Teut, ne weli mas que muchi tutamatilis, ma tajpia ne anmuyujyulu wan ne anmutajtamatilis itech ne Mawaltijtuk Yeshu.

⁸ Pal tami, nukniwan, muchi tay tejkia, tay tinat ka nemi yek, tay yulmelawak, tay yek ipal Teut, tay galan, tay mukaki yek, su se muita yek wan su se muilwia yek, shikishkejketzakan yajane. ⁹ Tay ne anmumachtijtiwit wan ankikwijtiwit yek wan antakaktiwit wan ankitztiwit nutech, shikchiwakan yajane wan ne Teut ipal nejmachnemilis yawi nemi anmuwan.

¹⁰ Nipakik wey tik ne Tajtzin ika anmukwepketa nechelnamikit, melka senpa ankielnamikit wan te ankipiatuyat ken. ¹¹ Te nina ika kichijki faltaj, ika naja nimumachtijtuk ken nipanuskia nujme ninemi. ¹² Niweli nimutemultia wan niweli nisamawa, nikmati ken ninemiskia nujme wan tik muchi: weli nishwi wan nimayana, su nisamawa wan su nechchiwa faltaj. ¹³ Muchi niweli ika nechmaka nutajpal; ¹⁴ melka uni, yektzin ankichijket ika annechkunpachijket tik nutapitzinilisyu.

¹⁵ Anmejemet, takamet wan siwatket ipal Pilipoy, ankimatit ka kwak pejki ne yeknawatilis, kwak nikiski Macedonia, nian se sennemit nechpalewij iwan tumin sute anmejemetsan anmusel. ¹⁶ Nusan kwak ninemik tik Tesalonika wan nimunekik, annechtuktilijket seujti wan uksenpa. ¹⁷ Inte niktemua ne tetakulis; tay ne niktemua, yaja ma tepewi ne anmutakil ka anmumaku. ¹⁸ Nikpiaya muchi, wan nitepewi. Nishwituk: nikwijtuk itech Epaproditos anmupuputuka ajwiak, se yek tetakulis ken ajwiak ipal ne Teut. ¹⁹ Ne Teut yawi metzintepewilia muchi tay anmunekit, yawi metzinmaka ne itzitzinakalis wey ijtik ne Mawaltijtuk Yeshu. ²⁰ Ma inakan ka wey tuteku ne Teut senpa wan senpa, amen.

²¹ Shiktajpalukan muchi ne kiyulmatit ne Mawaltijtuk Yeshu. Ne tukniwan nuwan metzintajpaluat. ²² Metzintajpaluat muchi ne tayulmatit, wan mas que muchi, ne tayulmatit tik ne ikal ne Taltikpaktuktiani. ²³ Ma nemi ne itetasujtalis ne tajtzin Yeshu Mawaltijtuk iwan ne anmuijiu.