Chronological
7 Ini Malkitzedek, tatuktiani ipal Shalem, ipalej ne Wejkapan Teut, munamik iwan Abraham ká mukwepki walaj kwak panuk ne tamiktilis ipal ne tatuktianimet, wan yaja kiteuchij, 2 wan Abraham kijkwan se majtaktakutun ipal. Yaja achtu ne tatuktiani ipal tamelakchiwalis, ken kineki ina ne itukay Malkitzedek, wan tipan yaja ne tatuktiani ipal Shalem, kineki ina ne tatuktiani ipal nejmachnemilis. 3 Inte tikmatit ká ne iteku, nian ne inan, nian ne inoywan, nian keman nesik wan mikik. Melka uni, yaja ken ne itelpuch ne Teut. Yaja naka ken se palej senpa.
4 Shikitakan ken wey yajini, ka hasta tutatanoy Abraham temakak ne majtaktakutun ipal ne yejyek tay kalkwij yajki. 5 Ne takamet ká ipilawan Lewi, ne muchijket palejmet, kipiat se tatuktilis ma kikwikan se majtaktakutun itech ne techan ken ina ne tajtuli, melka yejemet ikniwan wan muchi kistiwit itech ishinach Abraham. 6 Wan Abraham temakak ne majtaktakutun iwan se ká inte tikishmatit inoywan, wan yajuni kiteuchij Abraham, ne kipiatuya projpromesaj. 7 Ká ne wey senpa kiteuchiwa ká ne chikitik: muchi tikmatit uni. 8 Wan melka nikan takamet ká mikit kikwit majmajtaktakutun, ikuni se ká tikmatit ka yultuk. 9 Ma tinakan, itech Abraham hasta Lewi ká kikwi majmajtaktakutun temakak imajtaktakutun, 10 ika Lewi nakatuya ijtik ishinach ne iteku kwak Abraham kinamik Malkitzedek.
11 Asu ijkiuni, wan timuteuchiwat itech ne palejtal ipal Lewi, ika ne techan kikwij ne tajtuli itech, taika muneki ma muketza ukse palej ken ne ipalejtal Malkitzedek? Taika inte muilwia ne ipalejtal Aaron? 12 Ika asu mupata ne palejtal, muneki ma mupata nusan ne tajtuli. 13 Ika yajane ká ipanpa titaketzat se ipal ukse tribuj, wan te aka ipal uni tribuj tekittuk itech ne tikashit tik ne teupantzin. 14 Ika tikmatit ka ne tutajtzin kistuk itech Yuda, wan Moshe inte inak ken ijtuk iwan palejmet ipal ini tribuj.
15 Wan tikmatit sujsul mas, asu muketza ukse palej ken Malkitzedek, 16 ne muchijki intesu ipanpa tajtuli ipal tatuktilis ipal tunakayu asunte ipanpa itajpal nemilis inte keman mutajkali. 17 Ika ina:
Taja tipalej pal senpa ken ne ipalejtal Malkitzedek.
18 Muajkawa ne tatuktilis pal ikman, tel, ika inte kipia itajpal wan te techpalewia, 19 ika iwan ne tajtuli inte yektiak tatka; wan mukalaktia se tejchialis mas yek, wan iwan tiajsit itech ne Teut mas.
20 Wan muchijki iwan se juramentoj. Yejemet muchijket palejmet wan te muchiwa katka jurar. 21 Yaja iwan se juramentoj ipal yajane ká kilwij:
Tutajwan kichijki jurar wan te kipatas iyulu:
taja tipalej pal senpa.
22 Yajika, Yeshu muchijtuk se pal tikmatit ka tiawit tikpiat se sentaketzat sea yek.
23 Ne palejmet nemit mijmiak ika inte welit nakat pal senpa ika mikit; 24 yajini naka pal senpa, yajika inte keman panus ne ipalejkayu. 25 Yajika yaja weli kinmakishtia sujsul ne ajsit itech ne Teut ipanpa, ika senpa yawi yultuk pal kitajtani ne Teut ka inmaku.
26 Yek nemik ma tikpiakan se palej ijkiuni, se ká yulchipawak, ne inte kipia tatka tay teyek nian susul, ne kupewik itech ne tateyekchiwanimet wan muchijki wejkapan ijpak ne ilwikak; 27 ne inte muneki kalwika tejtetakulis mujmusta ken kichiwat ne weypalejmet ipanpa ne tay yejemetsan tateyekchijtiwit, pal tipewat; tipan ka imaku ne techan. Ika yaja kichijki uni seujti kwak mutemakak. 28 Ne tajtuli kichiwa ka sejse takat muchiwat palejmet melka kipiat kujkukulis. Ne palabraj ipal ne juramentoj, ne walajtuk ipan ne tajtuli, kichiwa ka yek ne ipiltzin pal senpa.
8 Ini ne tay sujsul wey ipal muchi tay tinatiwit: tikpiata se weypalej ijkiuni, muetztuk ka imayekkan ne ikuijpal ne Wey tik ne ilwikak; 2 se tekitini ipal ne teupantzin wan ne yekkaya tawipanti ne kikunaktij ne Tajtzin, intesu se takat.
3 Muchi ne weypalejmet mutalijtiwit pal kalwikat tejtetakulis ipal Teut; neka muneki ma yajini nusan kipia se pal kitakulia. 4 Asu yaja nemiskia ijpak ne taltikpak, inte muchiwaskia se palej, ika nemit palejmet ne tetakuliat ken ina ne tajtuli, 5 ne tekitit ken se tamachtilis wan iekawyu ipal ne tay ipal ne ilwikak ka ikajku, ijkiunisan ken mutukaytij Moshe kwak yaja yawia kitamia ne tawipanti.
Shikita —inak— ma shikchiwa muchi ken ne ejemploj ne muneshtij muishpan ijpak ne tepet.
6 Ashkan kiajsituk se tekitilis te kenha wan yaja tajkutaketzani ipal se sentaketzat mas yek ne mutajtulchijki iwan projpromesaj mas yejyek.
7 Asu uni achtu nentuskia yek, te aka kipiaskia taika kitemuskia ukseuk. 8 Ne Teut inak ka kichijtuyat tay inte nemituyat pal kichiwat, wan:
Witzet tujtunal —ina Tutajwan— keman nikchiwas iwan ne ikal Israel wan iwan ne ikal Yuda se yankwik sentaketzat, 9 ne inte ken ne sentaketzat nikchijki iwan ne innoywan tik ne tunal kwak nikitzkij ne inmey wan nikinhishtij tik Egipto, ika yejemet inte tajpishket ne nusentaketzat, wan naja inte nikinchiwilij casoj —ina Tutajwan—; 10 ika, ini ne sentaketzat niaw niktalilia ne ikal Israel kwak panut uni tujtunal —ina Tutajwan—. Niaw niktalia nutajtuli tik ne intamatilis wan niaw nikinhijkwilua ijpak inyujyulu, wan nimuchiwas Teut inpal, wan yejemet muchiwasket nutechan; 11 wan te inas pal kimachtia sejse ne itechanchanej wan sejse ne iiknew: "Shikishmati ne Tutajwan", ika muchi, chijchikitik wan wejwey, nechmatisket, 12 ika nikintasujtas wan niktapupulwis tay kichijtiwit tay inteyek wan tea nikelnamikis.
13 Kwak yaja ina "se yankwik", kineki ina ka palanik ne achtu. Tay ne palani wan chulejtia, yawia puliwi.
9 Ne achtu nusan kipiatuya sejse tay mutuktijtuyat ipal tekitilis tik ne teupan wan nusan ipal ne teupantzin. 2 Muekchijki se tawipanti, ne achtu, wan ijtik yaja nemituyat ne tawilkal wan ne tepatznaj wan tajtamal ishpanujtuk; uni muilwia ne Teupan; 3 wan kan tipanut ijtik ukse kwachtzakka, se tawipanti ne muilwia ne Teupantzin, 4 ne kipia se pupuchkashit ipal teukwit wan ne takukal ipal ne sentaketzat ishtzaktuk nujme iwan teukwit, wan ijtik uni ne kumit ipal teukwit ne kipia ne manaj wan ne itupil Aaron ne mulinik, wan ne tejtepatznaj ipal ne sentaketzat. 5 Ijpak uni, kerubmet tzitzinakat, wan tik inhekawyu nemi ne tapupulwian. Ashkan inte welit titaketzat ipanpa muchi uni.
6 Kwak muekchijtuk ijkiuni, ne palejmet kalakit katka sejsenpa tik ne achtu tawipanti pal kichiwat ne tejtekitilis; 7 tik ne ukse tawipanti isel ne weypalej seujti tik ne shiwit, wan nemi pal kishinia esti ipanpa yajasan wan ne mujmuishpululisyu ne techan. 8 Ini tay kineki ina ne Ijiutzin: inteuk muneshtijtuk ne ujti ipal ne tayulmatit kwak kenhayuk naka ejkatuk ne achtu tawipanti. 9 Yajini se casoj ipal ne tujtunal pal ashkan, kan walmuwikat tejtetakulis ne inte welit kiyektiat tik itasenmatilis ká ne kichiwa uni tekitilis, 10 ne tachiat sema tay ipal ne takwal, ne tay tikunit, wan tajtapakalis wan tay ne mutuktijtuk ipanpa tuweyka, hasta ne tujtunal ipal tamelawalis.
11 Kwak ajsik ne Mawaltijtuk ken weypalej ipal muchi ne yek tay muchijtuk iwan se tawipanti mas wey wan mas yek, ne inte kichijtiwit ne ijimey aka, ne kineki ina ka inte ipal muchi ini tay muchijtuk, 12 intesu kalwikak iesyu cabrajmet wan wakashmet pal kalaki ijtik ne Teupan asunte iesyu yajasan, kwak tamik kiajsi tamakishtilis pal senpa; 13 ika asu ne iesyu cabrajmet wan tujturuj wan ineshyu wajwakashkunet shinijtuk ijpak ne tay mususulwijtuk tateuchiwa pal tikpupuat ne tunakayu, 14 keski mas ne iesyu ne Mawaltijtuk, ká inte kipiatuya nian se ipelech wan mutakulij ipal ne Teut ipanpa se iijiu inte miki, yawi kipupua ne tutasenmatilis pal tikajkawat tutejtekiw ne inte yujyultuk, pal titekitit ipal ne Teut yultuk!
15 Wan yajika yaja tajkutaketzani ipal se yankwik sentaketzat pal kiane, ken mikik pal kinmakishtia ne tateyekchijtiwit itan ne achtu sentaketzat, ne munutztiwit yawit kikwit ne tay muchijki prometer. 16 Ika kan se kiajkawa se testamentoj, muneki ma miki ne ká kiajkawa, 17 ika se testamentoj mukejketza yek kwak timiktiwit: ne testamentoj inte weli tatka kwak ne ká kichiwa kenhayuk yultuk. 18 Neka inte muyankwilijtuk ne achtu asunte iwan esti, 19 ika kwak Moshe tamik kilwia muchi ne techan muchi ne tajtatuktilis ken ina ne tajtuli, kikwij ne iesyu ne wajwakash wan ne cajcabraj iwan at wan chiltik ichkat wan se majtzal, 20 wan inak: "Ini ne esti ipal ne sentaketzat ne metzintuktij ne Teut." 21 Yaja nusan kishinij ne esti ijpak ne tawipanti wan muchi ne tajtaiwan ipal ne tekitilis kenhaya, 22 wan ajatzika muchi mupupua iwan esti ken ina ne tajtuli, wan te nemi tetapupulwilis asu inte mushinia esti.
23 Yajika munekik ma mupupukan muchi ne tay ken tay nemi tik ne ilwikak, wan ne tay ipal ne ilwikak iwan tejtetakulis mas yejyek. 24 Ne Mawaltijtuk inte kalaktuk ijtik ne teupan ne kichijtiwit ne ijimey sejse tay ken tay nemi tik ne ilwikak wan yekkaya, asunte kalaktuk ijtik ne ilwikak pal muneshtia ashkan tik itachialis ne Teut ka tumaku: 25 intesu ma muishpanu yajasan seujseujti ken ne weypalej ne kalaki tik ne teupan muchi ne shijshiwit iwan iesyu sejseuk; 26 kwakuni nemiskia pal yaja pewa taekua kwak pejki ne taltikpak wan hasta ashkan. Sema seujti muneshtijtuk ashkan kwak tami yawi ne taltikpak pal muelkawa ne tay muchijtuk tay teyek. 27 Wan kenha ken nemi pal mikit seujti ne takamet, wan tipan yawi muchiwa juzgar, 28 ne Mawaltijtuk nusan ijkiuni, seujti mutemakak pal kiwika ne tajtateyekchijtuk. Tipan yawi muita senpa kwak inte kipia tajtateyekchijtuk pal mumakishtiat ne kichiat.
10 Ne tajtuli kipia se iekawyu ipal ne yawit witzet tay yejyek, intesu ne itachialis ne tay muchiwas yajasan. Melka kalwikat sejsenpa intejtetakulis muchi ne shijshiwit, te keman weli kinkwepa yejyek ká ajsit, 2 ika asu ijkiuni, anka inte kiajkawtuskiat kalwikat? Ne kichijtiwit uni tekitilis intea kipiaskiat tasenmatilis ipal ne tay kichijtiwit tay inteyek, kwak tamit mupupuat. 3 Inte ijkiuni ika kwak kichiwat kiane muchi ne shijshiwit kielnamikit tay kichijtiwit, 4 ika ne iesyu tujturuj wan cajcabraj inte weli techishtilia ne tay titateyekchijtiwit.
5 Neka kwak yaja kalaki tik ne taltikpak ina:
Inte tikelewij ma nalwika nutetakulis,
melka tipikik nuweyka nupal;
6 inte tikitak yek ma niktati
se ipanpa tay nitateyekchij.
7 Kwakuni ninak: Nikan niwitz!
Ijtik ne amat mujkwiluj nupanpa.
Ma nikchiwa mutaelewilis, Teut!
8 Né ikajku kan ina "inte tikelewij nian tikitak yek ma nalwika tejtetakulis wan ma niktati sejse ipanpa ne tay nitateyekchij", uni tay ne kalwika ne tajtuli; 9 kwakuni inak: "Nikan niwitz ma nikchiwa mutaelewilis!" Kishtia ne achtu pal kitalia ne seuk. 10 Tik uni taelewilis timuteuchijtiwit, ipanpa ne tetakulis ipal ne iweyka Yeshu Mawaltijtuk, seujti pal senpa.
11 Wan muchi ne palejmet mutaliat kichiwat mujmusta sanse tekitilis, wan senpa wan uksenpa kalwikat tejtetakulis ne inte keman welit techishtiliat tay tikchijtiwit tay inteyek. 12 Wan yajini inte: kwak yaja tamik kalwika se tetakulis ipanpa ne tay tikchijtiwit tay inteyek pal senpa, mutalij ka imayekkan ne Teut, 13 wan tejchia ka né hasta ma mutalikan ká ne kinekit kijtakuat ken se kuijpal ka itan ijikshi, 14 ika iwan sema se tetakulis kinyektijtuk pal senpa ne tayulmatit. 15 Ne Ijiutzin nusan techilwia kiane, ika kwak inatuk:
16 Ini ne sentaketzat ne niaw nikintalilia kwak panut uni tujtunal —ina Tutajwan—. Niaw niktalia nutajtuli ijpak inyujyulu wan niaw nikinhijkwilua tik ne intamatilis,
17 nusan ina:
Wan ne tay kichijtiwit tay inteyek wan te nemi pal muchiwa tea nikejketzas.
18 Kan ne mutapupulwia muchi uni, intea muwika tetakulis ipanpa ne tay tikchijtiwit.
19 Kiane tel, nukniwan, welit tikalakit melaknaj ijtik ne teupan iwan ne iesyu Yeshu. 20 Yaja kichijki se ujti yankwik wan yultuk tupal ijtik ne kwachtzakka, kineki ina, itech ne iweyka. 21 Nusan kipiat se wey palej ijpak ne ikal ne Teut. 22 Tiajsikan iwan tuyulu yekkaya; titayulmatikan sujsul; ma nemikan ne tuyujyulu shijshinijtuk pal te tikpiat se tasenmatilis inteyek, wan ne tujtuweyka pajpaktuk iwan at pupujtuk. 23 Titajpiakan ne tayulmatilis ne senpa ipal tejchialis, ika tiwelit tikyulmatit ne ká kichijki ne promesaj, 24 wan timukejketzakan sujsul ne se iwan ne seuk pal tikpiakan tetasujtalis wan pal tikchiwat tay yek. 25 Ma inte tikajkawakan timusenputzuat, ken sejse kichiwat, asunte timupalewikan, wan keski mas kwak tikitat ka ne tunal unisan witz.
26 Asu titateyekchiwat ika tiknekit kwak tikmattiwita ne tejkia, intea kanaj tetakulis ipal ne tay tikchijtiwit, 27 sema ma timajmawikan wan ma tikchiakan tujuicioj, wan ne techtenewat yawit kwalanit tuwan ken ne tit. 28 Asu aka inte kinekik kichiwa tay ina ne itajtuli Moshe, asu ume, yey tukniwan inat ijkiuni, yaja miki katka wan inte aka kieknelia. 29 Shikishkejketzakan keski mas kichiwilisket se ká taksatuk ijpak ne itelpuch ne Teut, wan kisusulwijtuk ne esti ipal ne sentaketzat ne iwan muteuchij, wan kikwalantijtuk ne iijiu ne tetasujtalis! 30 Tikmatit ká inatuk:
Nupal ne tetzunkwilis,
najasan nitashtawis.
Wan nusan:
Ne Tajtzin yawi kichiwa juzgar ne itechan.
31 Ken tamujmutia ma tiwetzikan tik ijimey ne Teut yultuk!
32 Shikelnamikikan ne tujtunal pal ikman: tamik anmutawilujket wan ankiselijket se wey muishnamikilis ipal tajtaekulis: 33 anmutalijket tik itachialis muchi iwan mujmutajtawelilis wan tajtapitzinilis, wan nusan anmusentepejket iwan sejseuk ne mukweptuyat ijkiuni. 34 Ika ankimatket ken mumatit ne ijilpituk, wan ankikwijket iwan pakilis ma metzinhichtekilikan anmupalwan, ika ankimatit yek ka ankipiat se tay mas yek wan naka senpa. 35 Yajika maka shikutamimakan ne anmutejchialis; uni kipias wey ipatiw, 36 ika anmunekit tejchiat iwan nejmachnemilis pal kiane, kwak ankichijtiwit ne itaelewilis ne Teut, anyawit kikwit ne promesaj. 37 Ika kinekiuk se chiupichin wan ne ká witz yawi witz wan te ishtunas. 38 Ne nuyulmelawak yawi yultuk ika tayulmati, wan asu mukawa ka ipan inte nikitas yek tik nuyulu. 39 Tejemet inte sejse ká mukawat ka tuipan wan tipuliwit, asunte sejse ká kipiat tayulmatilis hasta ma tikpiakan tamakishtilis.
Ne Bibliaj Tik Nawat · © 2008, 2012 Jan Morrow