Chronological

Tay ina ipanpa Abraham

4 Kiane tel, tay tiawit tinat ka kiajsik Abraham, ne tuachtuteku itech tunakayu? ² Ika asu Abraham yek ipanpa tay kichijki, melka kipia taika muweymatiskia, iishpan Teut inte! ³ Ika tay ina ne ijkwilujtuk?

⁴ Inte tinat ka mutashtawia ne ipatiw ne itekiw se ipanpa tetasujtalis, asunte ken jaranaj. ⁵ Su se inte kichiwa tatka wan kiyulmati ne ká ina ka yek ne inte kitasujta ne Teut, tikpuat ne itayulmatilis ken tamelakchiwalis. ⁶ Tikmatit ka Dawid nusan ina ka kipia suertej yajane ká ne Teut ina ka yek melka inte kichiwa tatka:

⁹ Kwakuni, uni suertej ipal ne yajyawaltektuk, o nusan ipal ne tzuntepulmet? Ika tinat ka ne itayulmatilis Abraham mupujki ken tamelakchiwalis. ¹⁰ Ken mupujki ijkiuni? Kwak muyawaltektuka? O kwak tzuntepul katka? Inte kwak muyawaltektuka asunte kwak tzuntepul. ¹¹ Wan kikwij tayawaltekilis pal muishmati, ken se selloj ipal ne itamelakchiwalis ne tayulmatilis kwak tzuntepul katka, ma muchiwa inteku muchi ká tayulmatit melka tzuntepulmet, pal mupuat yejemet nusan tik tamelakchiwalis, ¹² wan iteku ne tayawaltekilis ipal ká inte sema muyawaltektiwit asunte nusan taksat kan taksak tuteku Abraham kwak yaja inteuk muyawaltek wan tayulmatki.

¹³ Ne Teut tamakak ipromesaj ka muchi ne tal yawi ipal Abraham wan ne ishinach inte ipanpa ne tajtuli asunte ipanpa ne tamelakchiwalis ipal tayulmatilis, ¹⁴ ika asu yawi inpal ipanpa ne tajtuli, ne tayulmatilis te tatka ipatiw, wan ne promesaj pulijtuskia, ¹⁵ ika ne tajtuli kalwika kwalan. Kan te kanaj tajtuli, te aka weli mutenewa ika kichijki tay ina ne tajtuli ka te weli muchiwa. ¹⁶ Yajika, ipanpa tayulmatilis, pal kiane ipanpa tetasujtalis. Wan kiane, yek ne promesaj ipal muchi ne ishinach: te sema ipal ne kipiat ne tajtuli, nusan ne kipiat ne itayulmatilis Abraham, ne tuteku ipal muchi tejemet. ¹⁷ Ken nemi ijkwilujtuk:

Wan Abraham kiyulmatki, ika ne Teut kinyulkwepa ne miktiwit wan kinutza ne te kanaj wan nemia. ¹⁸ Abraham tejchishki kwak te welituya muita ken weliskia tejchia. Tayulmatki ka yaja yawi muchiwa inteku miak techan, ika inatuya:

¹⁹ Wan ipanpa itayulmatilis kimatki, melka yaja chulet, ne iweyka achka miktuka ka kipiaya sentzunti shiwit, wan melka ne ishinach Sara nusan palantuya. ²⁰ Kwak ne Teut kichijki uni promesaj, yaja te inak ka te weli, nian ka te kimati ka ijkiuni: chikawayak ipanpa itayulmatilis wan inak ka wey ne Teut; ²¹ temik iyulu wan kimati katka ka weli muchiwa ken ne Teut kilwij. ²² Neka mupujki ipal Abraham ken tamelakchiwalis.

²³ Inte muijkwiluj ka mupujki ken tamelakchiwalis semaya ipal Abraham. ²⁴ Nusan muijkwiluj tupanpa, ka nusan yawi mupua tupal su tejemet tikmatit ka Yeshu, ne tutajtzin, muketzki kwak miktuk, ²⁵ ka mutemakak ipanpa tay tikchijtiwit teyek wan muyulkweptuk ipanpa ne tutamelakchiwalis.

Ne mumelakchijtiwit

5 Yajika, timumelakchijtiwit ipanpa tutayulmatilis wan tinejmachnemit iwan ne Teut ipanpa ne tutajtzin Yeshu Mawaltijtuk, ² ika ipanpa yaja tikpishtiwit se ujti, iwan ne tayulmatilis, pal tikajsit ini tetasujtalis ne tikpiat wan timuweymatit ipanpa tejchialis ipal ne itawilyu ne Teut.

³ Inte sema uni: nusan timuweymatit tik ne tupejpenaj, ika tikmatit ka ne penaj kichiwa tanejmachselilis; ⁴ ne tanejmachselilis techejekua wan techmachtia; ne taejekulis techmaka tejchialis; ⁵ wan ne tejchialis inte tashijshikua, ika ne Ijiutzin ne techmakatiwit kikushinijtuk ne itetasujtalis ne Teut ijtik ne tuyujyulu.

⁶ Ika ne Mawaltijtuk, kenhayuk kwak inteuk tiwelituyat tatka, mikik ka imaku ne inte kitasujtat ne Teut. ⁷ Ika uij ma miki se ka imaku se ká yulmelawak. Anka weli nemi se ká inte majmawi miki ka imaku se ká yek. ⁸ Ne Teut kilwitia ka yek ne itetasujtalis tupanpa, ika kwak tejemet kenhayuk titateyekchiwanimet katka, ne Mawaltijtuk mikik ka tumaku.

⁹ Yajika, sujsul mas timumelakchijtiwit ashan iwan ne iesyu, wan san timupalewisket ipanpa iishpan ne kwalan, ¹⁰ ika su kwak timusumat katka timupataket ipal ne Teut ipanpa ne imikilis ne ikunew, ashan sujsul mas kwak timupatatiwita tiawit timupalewiat ika yaja yultuk. ¹¹ Inte sema uni: nusan timuweymatit iwan ne Teut ipanpa ne tutajtzin Yeshu Mawaltijtuk, ika ipanpa yaja tiweliket timupatat ashan.

¹² Yajika, kenha ken ipanpa se takat kalak ne tateyekchiwalis tik ne taltikpak, wan ipanpa ne tateyekchiwalis kalak ne mikilis, wan ijkiuni ne mikilis panuk itech muchi ne takamet ika muchi tateyekchijtiwit, ¹³ ika achtu ka ne tajtuli melka nemituya tateyekchiwalis tik ne taltikpak, te mupua katka ne tateyekchiwalis ika te kanaj tajtuli; ¹⁴ melka uni, pejki tatuktia ne mikilis iwan Adam wan hasta Moshe nusan ijpak ne takamet ne inte tateyekchijket ken Adam, ne kichijki tay te nemituya pal kichiwa, ká se figuraj ipal ne yawi witz.

¹⁵ Melka uni, ne tay muchijki teyek inte kenha ken ne tetakulis. Ika su ipanpa ne itateyekchiwalis se mikiket miak, sujsul mas tepewik ipal miak ne itetasujtalis ne Teut wan ne tetakulis ipanpa teutasujtalis, ipal sanse takat: Yeshu Mawaltijtuk. ¹⁶ Nusan ne tetakulis inte kenha ken su yaja ipanpa sema se ká tateyekchijtuk; ika kwak muchijki juzgar, yaja ipanpa tay kichijki sesan, wan muitak ka te yejyek; ne tetakulis, yaja ipanpa tay kichijket miak teyek, wan mumelakchijket. ¹⁷ Ika su iwan ne tateyekchiwalis ipal se tatuktij ne mikilis ipanpa sesan, sujsul mas ne kikwit muchi ne tetasujtalis wan ne tetakulis ipal ne tamelakchiwalis yawit tatuktiat yultuk ipanpa sesan: Yeshu Mawaltijtuk.

¹⁸ Kiane tel, ijkiuni ken ipanpa se tay teyek muitak ka muchi ne takamet te yejyek, kenhaya ipanpa se tay yek mumelakchijket muchi ne takamet pal yujyultuk. ¹⁹ Ika kenha ken ika se takat inte tetakamatki miak mukwepket tateyekchiwanimet, kenhaya ika sesan tetakamatki miak mukwepasket yejyek.

²⁰ Walaj ne tajtuli pal ma tepewi ne tateyekchiwalis. Kan ne tepewik ne tateyekchiwalis, samawak mas ne tetasujtalis, ²¹ pal kiane, kenha ken ne tateyekchiwalis tatuktij tik ne mikilis, kenhaya ne tetasujtalis nusan tatuktia, ipanpa tamelakchiwalis, pal tiyujyultuk senpa ipanpa Yeshu Mawaltijtuk, ne tutajtzin.

Ne teulyujmakalis

6 Tay tinasket tel? Anka tiawit tinakat titateyekchiwat pal ma tepewi ne teutasujtalis? ² Intesu! Su timiktiwit ipal ne tateyekchiwalis, ken tiawit timukwepat tiyujyultuk ijtik yaja?

³ Inte ankimatit ka muchi tejemet ká timumakaket ulyuj tik ne Mawaltijtuk Yeshu timuulyujmakaket tik ne imikilis? ⁴ Timusentalpachujket iwan, ika timumakaket ulyuj tik ne mikilis, pal kiane kenha ken muyulkwepki ne Mawaltijtuk kwak miktuk, ipanpa ne itawilyu ne Teteku, nusan tejemet tiawit tiyulyankwikisat, ⁵ ika su tisentakatit iwan ne tachialis ipal ne imikilis, kenhaya tiawit timuchiwat iwan ne ipal ne imuyulkwepalis.

⁶ Tikmatikan ka ne takat o siwat ká tupal katka ikman musencruzpiluj iwan, pal puliwi ne iweyka ne tateyekchiwalis, ma intea keman titekitikan ipal ne tateyekchiwalis. ⁷ Ika ká ne mikik mumelakchijtuk, intea kipia tateyekchiwalis.

⁸ Asu timiktiwit iwan ne Mawaltijtuk, tikmatit ka nusan tiawit tiyujyultuk iwan, ⁹ ika tikmatit ka kwak ne Mawaltijtuk muketzki kwak miktuk, intea miki: ne mikilis intea weli tatuktia ijpak. ¹⁰ Ika ken mikik, mikik ipal ne tateyekchiwalis pal senpa; hasta kan yultuk, yultuk ipal ne Teut. ¹¹ Anmejemet kenhaya, shikishketzakan ka anmiktiwit ipal ne tateyekchiwalis, melka anyujyultuk ipal ne Teut itech ne Mawaltijtuk Yeshu.

¹² Yajika, ma inte tatukti ne tateyekchiwalis ijtik ne anmuweyka ne yawi puliwi, ma inte shiktakamatikan ne itajtaelewilis. ¹³ Wan maka shikishpanukan ne tajtakutun ipal ne anmuweyka ken tajtaiwan ipal ne inteyek. Shikishpanukan ipal ne Teut, ken sejse miktiwit wan muyulkweptiwit, wan ne anmuwejweyka ken tajtaiwan ipal tamelakchiwalis ipal ne Teut. ¹⁴ Ika ne tateyekchiwalis inte yawi tatuktia anmujpak, ika inte annemit itan tajtuli sute itan teutasujtalis.

Tejemet titekitinimet ipal ne tamelakchiwalis

¹⁵ Tay tinasket tel? Anka tiawit titateyekchiwat ika inte tinemit itan tajtuli asunte itan teutasujtalis? Intesu! ¹⁶ Inte ankimatit ka su anmuishpanuat ken itejtekitini se, nemi pal ankitakamatit ne anmutekuyu? Su anmutekuyu ne tateyekchiwalis, yawi metzintashtawa iwan mikilis. Su ne tetakamatilis, iwan tamelakchiwalis. ¹⁷ Tashtawi! Ka melka anhitejtekitini katka ne tateyekchiwalis, ankitakamattiwit iwan anmuyulu ne tamachtilis ne iwan metzinmakaket, ¹⁸ wan metzinmakishtijket itech ne tateyekchiwalis wan anmuchijket itejtekitini ne tamelakchiwalis. ¹⁹ Ken takat nina, ipanpa ne ikutialis ne anmunakayu. Ika kenha ken ankishpanujtiwit ne anmuweyka ken tekitinimet ipal tay susul wan tay inte nemi yek, ma muchiwa tay inte nemi yek, ashan kenhaya ankishpanuat anmuweyka ken tekitinimet ipal ne tamelakchiwalis, ma muchiwa tay ipal ne Teut.

²⁰ Ika kwak anhitejtekitini katka ne tateyekchiwalis, inte annemituyat itan ne tamelakchiwalis. ²¹ Kiane tel, katiawel ne itakil ne ankipishket? Ashan anhishpinawat ipanpa, ika muchi uni tami kwak timikit. ²² Ashan intea annemit itan ne tateyekchiwalis, anhitejtekitini ne Teut, wan ankipiat ne anmutakil ipal tay ipal Teut, wan anyawit tamit yujyultuk senpa. ²³ Ika ipatiw ne tateyekchiwalis ne mikilis; ne itetakulis ne Teut yaja ma tiyujyultuk senpa itech ne Mawaltijtuk Yeshu, tutajtzin.

Achtu tinemit katka tik tunakayu, ashan tik ne Ijiutzin

7 Te ankimatit, nukniwan ká kishmatit ne tajtuli, ka ne tajtuli tatuktia ijpak ne takat sema kwak yaja yultuk? ² Ken se siwat munamiktijtuk: ne tajtuli ina ma nemi iwan ne ishulejyu hasta ma yaja miki. Su miki ne takat, ne tajtuli intea kilpia ne siwat. ³ Yajika, kwak ne ishulejyu yultuk, inat ka mawiltia asu ukse takat kipia. Wan su ne ishulejyu mikik, ne tajtuli ina ka weli nemi iwan seuk wan te muilwia mawiltiani.

⁴ Kiane, nukniwan, anmejemet nusan anmiktiwit ipal ne tajtuli ipanpa ne iweyka ne Mawaltijtuk, ma shimuchiwakan ipal seuk ká muketzki kwak miktuk pal titakiltamakat ipal ne Teut. ⁵ Ika kwak tinemituyat tik tunakayu, ne tajtaelewilis ipal ne tajtateyekchiwalis tay nemit itech ne tajtuli tekitit katka tik tuweyka pal titakiltamakat ipal ne mikilis. ⁶ Ashan inte: ipal ne tajtuli timiktiwita wan tea weli techilpia. Intea tinemit tik ijimey, pal tiwelit titekitit tik tay yankwik ipal ne Ijiutzin, wan te tik tay palikman ipal ne ijkwilujtuk.

Ne tateyekchiwalis wan ne tajtuli

⁷ Tay tinasket tel? Anka ne tajtuli tateyekchiwalis? Intesu!

Sema ini, ka inte nikishmattuskia ne tateyekchiwalis asunte ipanpa ne tajtuli, nian nikmatiskia tay ne taelewilis su ne tajtuli inte inaskia: "Maka shitaelewi." ⁸ Ipanpa ne tay tuktijtuk, ne tateyekchiwalis kichijki ka nesik ijtik naja wey taelewilis. Ika su te kanaj tajtuli, te tatka ne tateyekchiwalis.

⁹ Niakeman naja inte ninemik iwan tajtuli. Walaj ne tay tuktijtuk, wan muyulkwij ne tateyekchiwalis. ¹⁰ Naja nimikik, wan mumatki ka ne tay tuktijtuk, ne nemituya pal niyultuk, yaja ipal mikilis. ¹¹ Ika ipanpa ne tay tuktijtuk nechshijshikuj ne tateyekchiwalis wan nechkwij pal nechmiktia.

¹² Ijkiuni tel: ne tajtuli, tikmatit ka ipal Teut, wan ne tay tatuktijtuk ne Teut, yaja ipal Teut wan melaknaj wan yek. ¹³ Su ijkiuni, anka ne tay yek muchijki mikilis nupal? Tesu kiane! Nimikik ipanpa ne tateyekchiwalis. Melka uni, ne tateyekchiwalis, pal muita ka tateyekchiwalis, kikwij ne tay yek pal nechpulua, pal ma sujsul teyek ne tateyekchiwalis ipanpa ne tay tuktijtuk.

¹⁴ Tikmatit ka ne tajtuli kisa itech ne Ijiutzin. Naja ninakat, namakatuk itan ne tateyekchiwalis. ¹⁵ Ika te nikmati tay nikchiwa: ka te nikchiwa tay ne nikneki, nikchiwa tay ne nikishijia. ¹⁶ Su nikchiwa tay ne te nikneki, nina ka ijkia, ka ne tajtuli yek. ¹⁷ Ashan tea najasan nikchiwa, sute ne tateyekchiwalis ne nemi ijtik naja, ¹⁸ ika nikmatiaya ka ne yek te nemi ijtik naja, tik ne nunakayu. Ika melka ne tanekilis ijtik naja nemi, ma niweli nikchiwa tay yek te nemi, ¹⁹ ika te nikchiwa ne tay yek tay nikneki; nikchiwa ne tay teyek tay te nikneki. ²⁰ Su nikchiwa tay ne te nikneki naja, tea naja nikchiwa sute ne tateyekchiwalis ne nemi ijtik naja. ²¹ Ijkini nikajsi ne tajtuli ka melka niknekiskia nikchiwa tay yek, nemi ne teyek ijtik naja, ²² ika melka ne itajtuli ne Teut sujsul nechajwiak, ²³ nikita ukse tajtuli tik nuweyka, ne musuma iwan ne tajtuli ipal ne nutamatilis wan nechkwi wan nechilpia tik ne itajtuli ne tateyekchiwalis ne nemi tik ne nuweyka. ²⁴ Ay! Nechkukua nuyulu! Ká weli kishtia itech ne nuweyka ini mikilis? ²⁵ Nikmaka panpadiush ne Teut itech Yeshu Mawaltijtuk tutajtzin. Kiane tel, naja iwan nutamatilis nitekiti ipal ne itajtuli Teut, wan iwan ne nunakayu ipal ne itajtuli ne tateyekchiwalis.