Chronological
1 Tejemet titakaktiwit ken pejki wan muchi tay muchijki, wan tikitztiwit iwan ne tujtuish, titachishtiwit, wan ne tujtumey tachijchintiwit, tay ipal ne Palabraj Yultuk. 2 Wan ne Yultuk muneshtij wan tikitaket, wan timetzinhilwiat wan timetzinneshtiliat tay ipal ne Senpa Yultuk ne nemik itech ne teteku wan muneshtijtuk tuishpan. 3 Tay ne tikitztiwit wan titakaktiwit nusan timetzinneshtiliat pal kiane anmejemet nusan welit musentepewat tuwan wan pal timusentepewat ken tekniwan iwan ne Tuteku wan iwan ne Itelpuch Yeshu Mawaltijtuk. 4 Wan tikijkwiluat ini anmupal pal yekawi ne tupakilisyu.
5 Wan ini ne tanawatilis ne itech titakakket wan ne timetzinneshtiliat: ka ne Teut tawil, wan nian se chiupi kunyua inte kanaj ijtik Yaja.
6 Asu tinat ka timusentepewat iwan wan asu tinejnemit ijtik ne kunyua, tinat sanka wan te tikchiwat ne tejkia. 7 Asu tinejnemit ijtik ne tawil ken yaja nemi ijtik ne tawil, timusentepewat sejse iwan sejse, wan ne iesyu Yeshu, ne ikunew, techpupua wan techishtilia muchi tay tikchijtiwit tay inteyek.
8 Asu tinat ka inte titateyekchijtiwit, timushijshikuat wan te kanaj tejkia ijtik tejemet. 9 Asu tinat ka titateyekchijtiwit, Yaja muwika yek tuwan wan weli techishtilia tay ne tikchijtiwit wan yawi techpupua wan kishtia muchi ne tay inteyek. 10 Asu tinat ka inte tikchijtiwit tay inte yek, tikchiwat tashijshikuani wan te nemi ne ipalabraj ijtik tejemet.
2 Nukukunetzitzin, nikijkwilua ini anmupal pal kiane inte anyawit kichiwat tay inte yek, wan asu aka tateyekchiwa tikpiat se walnutztuk itech ne tuteku yek Yeshu Mawaltijtuk, 2 wan yaja se pal mutapupulwia tay ne titateyekchijtiwit: intesu sema tejemet asunte nusan muchi.
3 Wan ijkini tiwelit tikmatit ka tikishmattiwit: asu titajpiat ne tay tatuktijtuk. 4 Ne ká ina: "Nikishmati", wan te tajpia tay tatuktijtuk, yaja sankataketza, wan ne tejkia inte kanaj ijtik yajane. 5 Ká ne ijkia tajpia ne ipalabraj, ijtik yajini nemi ne itetasujtalis ne Teut. Ijkiuni tiwelit tikmatit ka tinemit ijtik yaja. 6 Ne ká ina ka naka ijtik yaja, nemi pal muwika kenha ken muwikak yajasan.
7 Tajtasujtatuk, ne tatuktilis ne nikijkwilua anmupal inte se yankwik asunte se tatuktilis palikman ne ankipishketa kwak pejki. Ne tatuktilis palikman ne palabraj ne antakaktiwita. 8 Nusan se yankwik tatuktilis nikijkwilua anmupal, tay tejkia ijtik yajasan wan ijtik anmejemet, ika panu ne kunyua wan ne yekkaya tawil muitaya.
9 Ne ká ina ka nemi tik ne tawil wan kishijia ne iiknew nemi tik ne kunyua kenhayuk. 10 Ne ká kitasujta ne iiknew naka tik ne tawil wan te kanaj tatzunchaluas ijtik yajane. 11 Ne kishijia ne iiknew tik ne kunyua nemi wan tik ne kunyua nejnemi, wan te kimati kanka yawi, ika ne kunyua kikwepa ishpupuyut.
12 Anmupal nitajkwilua, kukunetzitzin, ika mutapupulwijtuk tay ankichijtiwit tay inteyek ka imaku ne itukay.
13 Anmupal nitajkwilua, tejteteku, ika ankishmattiwit yajane ká nemituya kwak pejki muchi.
Anmupal nitajkwilua, pipilmet, ika anwelitiwit ijpak ne inteyek.
14 Anmupal nitajkwilujtuk, kukunet, ika ankishmattiwit ne teteku.
Anmupal nitajkwilujtuk, tejteteku, ika ankishmattiwit yajane ká nemituya kwak pejki muchi.
Anmupal nitajkwilujtuk, pipilmet, ika ankipiat anmutajpal wan ne ipalabraj ne Teut naka ijtik anmejemet wan anwelitiwit ijpak ne inteyek.
15 Maka shiktasujtakan ne taltikpak nian ne tay nemi ijtik ne taltikpak. Asu aka kitasujta ne taltikpak, inte nemi ijtik yaja ne itetasujtalis ne teteku, 16 ika muchi tay nemi ijtik ne taltikpak, ne tay kielewia ne tunakayu wan ne tay kielewia ne tujtuish wan ne tay ne yujyultuk timuweytenewat, inte kisa itech ne teteku asunte itech ne taltikpak, 17 wan panu ne taltikpak wan ne itaelewilis, wan naka pal senpa ne ká kichiwa tay kineki ne Teut.
18 Kukunetzitzin, tinemit ne tipan horaj, wan ijkiunisan ken antakakket ka witz se sankamawaltijtuk, ashkan nusan muchijtiwit miak sankamawaltijtuk, yajika tikmatit ka tinemit ne tipan horaj. 19 Melka kisket tutech, yejemet inte tupal, ika asu tupal, naktuskiat tuwan; yaja pal muneshtia ka muchi yejemet inte kistiwit tutech. 20 Wan anmejemet ankipiat tamawaltilis itech ne Wey, wan muchi anmejemet tamatit.
21 Inte nitajkwilujtuk anmupal ika inte ankimatit asunte ika kia ankimatit, wan ika muchi tay sanka inte kisa tik ne tejkia.
22 Ká ne tashijshikuani? Yaja ne ká ina ka Yeshu inte ne Mawaltijtuk. Yajuni ne sankamawaltijtuk, ká inte kikwi ne Teteku wan ne Kunet. 23 Muchi ká inte kikwit ne Kunet, nusan inte kipiat ne Teteku. Ká ne kikwi ne Kunet nusan kipia ne Teteku.
24 Tay ne anmejemet takaktiwit kwak pejki muchi, ma naka ijtik anmejemet. Asu naka ijtik anmejemet ne tay takaktiwit kwak pejki, anmejemet nusan yawit nakat ijtik ne Kunet wan ijtik ne Teteku. 25 Wan ini ne promesaj ne techchiwilij prometer pal tiyujyultuk senpa.
26 Nikijkwilua ini anmupal inpanpa ne metzinshijshikuskiat; 27 wan anmejemet, ne tamawaltilis ne itech ankikwijtiwit naka ijtik anmejemet wan te anmunekit ma metzinmachti aka. Mas yek, ken ne itamawaltilis metzinmachtia muchi, wan yaja tejkia wan inte sanka, ijkiunisan ken metzinmachtijtuk shinakakan ijtik yajane.
28 Wan ashkan, kukunetzitzin, shinakakan ijtik yaja pal kiane, asu walmuneshtia, inte tiawit timajmawit nian tiawit tishpinawat iishpan kwak witz. 29 Asu ankimatit ka yaja yek, ankimatit ka nusan itech nestiwit muchi ká kichiwat tay yek.
3 Shikitakan keski techtasujta ne Tuteku, ma timunutzakan ikukunew Teut, wan kiane. Yajika ne taltikpak inte techishmati, ika inte kishmatki Yajane.
2 Yejyektasujtatuk, ashkan tiikukunew Teut wan teuk muneshtijtuk tay tiawit timuchiwat. Tikmatit ka asu walmuneshtia, tiawit kenhat ken yaja, ika tiawit tikitat ken nemi. 3 Wan muchi ne takamet ne kipiat ini tejchialis ijtik yaja mupupuat, ijkiunisan ken yaja.
4 Muchi ká kichijtiwit tay inte yek nusan kichijtiwit tay inte tinemit pal tikchiwat, wan ne tateyekchijtuk ne tay inte nemi pal muchiwa; 5 wan ankimatit ka yajuni walmuneshtij pal kishtia ne tateyekchijtuk, wan te nemi nian se tateyekchijtuk ijtik yajasan. 6 Muchi ká nakat ijtik yaja inte tateyekchiwat; muchi ká tateyekchiwat inte kitztiwit nian kishmattiwit.
7 Kukunetzitzin, ma inte mushijshiku aka: yek ne ká kichiwa tay yek, kenha ken yajane yek; 8 ne ká kichiwa tay teyek, yaja kiski itech ne Tamintuk, ika ne Tamintuk tateyekchijkia kwak pejki muchi. Yajika walmuneshtij ne Itelpuch ne Teut, pal yaja yawi kitajkali ne itekiw ne Tamintuk. 9 Muchi ká nestiwit itech ne Teut inte kichiwat tay teyek, ika naka ijtik yejemet ne ishinach ne Teut, wan te welit tateyekchiwat ika nestiwit itech ne Teut. 10 Ijkini muita ká ne ikukunew ne Teut wan ká ne ikukunew ne Tamintuk: muchi ká inte kichiwat tay yek inte kistiwit itech Teut, wan ne inte kitasujtat ne iiknew nusan inte.
11 Ika ini ne tanawatilis ne ankikakket kwak pejki muchi: ma shimutasujtakan, 12 inte ken Kain, ká kiski itech ne teyek wan kimiktij ne iikaw; wan taika kimiktij? Ika inte yejyek ne itejtekiw, wan yek ne itekiw ne iikaw.
13 Wan maka shishpuyawikan, nukniwan, su ne taltikpak metzinhishijia. 14 Tejemet tikmatit ka intea tiawit timikit, tiawit tiyujyultuk, ika tiktasujtat ne tukniwan; ká ne inte kitasujta naka tik ne mikilis. 15 Muchi ká kishijiat ne iiknew takamiktianimet, wan ankimatit ka muchi ne takamiktianimet inte kipiat ijtik yejemet pal yawit yujyultuk senpa. 16 Welit tikishmatit kienej ne tetasujtalis, ika yajuni tupanpa temakak ne ialmaj wan tinemit pal tikchiwat kenha ipal ne tukniwan. 17 Ká ne kipia pal mutekipanua tik ne taltikpak wan tachia wan kita ka ne iiknew muneki wan te kikukua ipanpa ne iiknew, ken yawi naka ijtik yaja ne itetasujtalis ne Teut?
18 Kukunetzitzin, inte tiktasujtakan tukniwan sema iwan ne palabraj nian ne tunenepil asunte iwan tutekiw wan ma tejkia.
19 Wan san tikmatisket ka tejemet tiipal ne tejkia wan talnamikisket tik tuyulu 20 ika asu techajwa tuyulu, ne Teut mas wey que ne tuyujyulu wan muchi kimati. 21 Tajtasujtatuk: asu ne tuyulu inte techajwa, inte timunekit timajmawit itech ne Teut, 22 wan tay ne tiktajtanit, tikwit itech imey, ika tejemet titajpiat ne tay techtuktij wan tikchiwat ne tay yek tik itachialis.
23 Wan ini tay yaja techtuktia: ma tikyulmatikan ne ikunew Yeshu Mawaltijtuk wan ma timutasujtakan ijkiunisan ken yaja techtuktijtuk, 24 wan ká ne tajpia tay tatuktijtuk, yajuni ijtik Yaja naka, wan Yaja ijtik yajuni, wan tikishmatit ka Yaja naka ijtik tejemet ika Yaja techmakak ne Ijiutzin.
4 Tajtasujtatuk, maka shikyulmatikan ne iijijiu muchi, mas yek ma shitachiakan pal ankitat su ne iijijiu se ipal ne Teut, ika miak sankataketzani kistiwit nujme. 2 Niaw nimetzinhilwia ken welit ankishmatit ne Iijiutzin ne Teut: ne iijijiu muchi ká inat ka Yeshu Mawaltijtuk walaj tik iweyka, yejemet kisket itech ne Teut, 3 wan muchi ká inte inat ka Yeshu walaj itech ne Teut, inte; wan yajane ipal ne sankamawaltijtuk ne ankikaktiwit ka yaja witz wan ashan nemia ijtik ne taltikpak.
4 Anmejemet ipal ne Teut, kukunetzitzin, wan anwelitiwit inhijpak, ika ne nemi ijtik anmejemet mas wey que ne nemi ijtik ne taltikpak. 5 Yejemet ipal ne taltikpak, yajika tanutzat itech ne taltikpak wan ne taltikpak kinkaki. 6 Tejemet ipal ne Teut; ká kishmati ne Teut techkaki, ká inte ipal ne Teut inte techkaki. Ijkiuni tikishmatit ne iijiu ne tejkia wan ne iijiu ne tashijshikulis.
7 Tajtasujtatuk, timutasujtakan ne sejse iwan ne sejseuk, ika ne tetasujtalis kisa itech ne Teut wan muchi ká tetasujta nestuk itech ne Teut wan kishmati ne Teut. 8 Ká ne inte tetasujta inte kishmattuk ne Teut, ika ne Teut tetasujtalis. 9 Ijkini muneshtijtuk ne itetasujtalis ne Teut itzalan tejemet: ka ne Teut kititanijtuk ne ikunew ne isel kipishki ijtik ne taltikpak pal kiane, ipanpa, tejemet tiwelit tiyujyultuk. 10 Uni nemi ne tetasujtalis: intesu achka tejemet tiktasujtatiwit ne Teut asunte ka yaja techtasujtak wan kititanij ne ikunew pal mutapupulwia muchi tay titateyekchijtiwit.
11 Tajtasujtatuk: asu ne Teut techtasujtak ijkiuni, tejemet nusan tinemit pal timutasujtat. 12 Inte keman kitztuk aka Teut. Asu timutasujtat, ne Teut naka ijtik tejemet wan ne itetasujtalis naka yekajtuk tutech. 13 Ijkiuni tikmatit ka tinakat ijtik Yaja, wan Yaja ijtik tejemet, ika Yaja techmakatuk tay ipal ne iijiu, 14 wan tejemet titachishtiwit wan tinat ka ne Teteku kititanijtuk ne ikunew kimakishtia ne taltikpak.
15 Ká ne ina ka ijkia ka Yeshu ne ikunew ne Teut, ne Teut naka ijtik yajane wan yajane ijtik ne Teut, 16 wan tejemet tikishmattiwit wan tikyulmattiwit ne tetasujtalis ne kipia tupal ne Teut.
Ne Teut tetasujtalis, wan ne ká naka ijtik ne tetasujtalis, yaja naka ijtik ne Teut, wan ne Teut naka ijtik yaja.
17 Tutech yekawi ne tetasujtalis kwak inte tiawit timajmawit tik ne tunal ipal ne juicioj, ika kenha ken yajuni nemi tejemet nusan tinemit tik ini taltikpak. 18 Mawi inte kanaj tik ne tetasujtalis. Mas yek, ne tetasujtalis yekajtuk kitamuta wejka ne mawi, ika ne mawi techkukua; se ká majmawi inte yekawi tetasujta. 19 Tejemet tiktasujtat ika yaja techtasujtak achtu. 20 Asu aka ina: "Naja niktasujta ne Teut", wan kishijia ne iiknew, inak sanka, ika ká ne inte kitasujta ne iiknew ne kitztuk inte weli kitasujta ne Teut ne inte kitztuk. 21 Wan ini techtuktijtuk pal kiane ká ne kitasujta ne Teut nusan ma kitasujta ne iiknew.
5 Muchi ká kimatit ka Yeshu ne Mawaltijtuk nestiwit itech ne Teut, wan muchi ká kitasujtat ne ká kichijki kitasujta nusan ne itech nestuk. 2 Ijkini ken tikishmatit ka tiktasujtat ne ikukunew ne Teut: kwak tiktasujtat ne Teut wan tikchiwat tay yaja tatuktijtuk. 3 Ika ini ne itetasujtalis ne Teut, ma titajpiakan ne tay tatuktij, wan ne tay tatuktij inte etek, 4 ika muchi tay nestuk itech ne Teut weli mas que ne taltikpak, wan ini ne victoriaj ne weli ijpak ne taltikpak: ne tutayulmatilis.
5 Ká ne weli ijpak ne taltikpak? Ne kimati ka Yeshu ne ikunew ne Teut, yaja ne! 6 Ini ne witz itech at wan esti, Yeshu Mawaltijtuk; inte semaya itech at, asunte ne at wan ne esti; wan ne Iijiu ne ina tejkia, ika ne Iijiu ne tejkia. 7 Ika nemit yey ká inat tejkia: 8 ne Iijiu wan ne at wan ne esti, wan ne yey nemit ijtik ne sechin. 9 Asu tikakit ne takamet, mas tinemit pal tikakit ne Teut ika ini tay ina ne Teut ká inatuk tay ipal ne ikunew. 10 Ká ne kiyulmati ne ikunew ne Teut kipia ne tejkia ijtik yajasan. Ká ne inte kiyulmati ne Teut, ina ka Yaja ina sanka, ika inte kimati tik iyulu tay inatuk ne Teut ipal ne ikunew.
11 Wan tay inatuk, ka ne Teut techmakatuk ma tiwelikan tiyujyultuk pal senpa, wan yaja ipanpa ne ikunew: 12 ká kipia ne ikunew yawi yultuk; ká inte kipia ne ikunew, inte yawi yultuk.
13 Nikijkwilujtuk ini anmupal, ne kiyulmatit ne itukay ne ikunew ne Teut, pal ankimatit ka anyawit yujyultuk senpa. 14 Wan ini tay tikmatit ipal Teut: ka asu tiktajtanit se tay yaja kita yek, yaja techkaki, 15 wan asu tikmatit ka yaja techkaki kwak tiktajtanit se, tikmatit ka tay ne tiktajtanit, uni tikpiat.
16 Asu aka kita se iiknew kichiwa se tay teyek, ne inte se pal miki, ma kitajtani wan yawi weli yultuk ken kinmaka ne tateyekchiwat asu inte se pal miki. 17 Muchi tay inte nemi pal tikchiwat yaja tateyekchijtuk, wan nemi sejse tateyekchijtuk ne inte pal miki se.
18 Tikmatit ka asu se nestuk itech ne Teut, inte tateyekchiwa, wan ká ne Teut kichijtuk tajpia wan ne inteyek inte kitalia ne imey ijpak. 19 Tikmatit ka tikistiwit itech ne Teut wan muchi ne taltikpak muajsi ijtik ne inteyek. 20 Tikmatit ka ne ikunew ne Teut walajtuk wan techmakatuk tamatilis pal tikishmatit ne tay tejkia; wan tinemit ijtik ne tay tejkia, ijtik ne ikunew Yeshu Mawaltijtuk. Ini ne yekkaya Teut wan ne nemilis pal senpa.
21 Kukunetzitzin, shimuishpelwikan itech ne sajsankateutzitzin!
Ne Bibliaj Tik Nawat · © 2008, 2012 Jan Morrow