Chronological
10 Najasan, Pawlo, iwan wey iyulyamanikayu ne Mawaltijtuk nimetzintajtani, naja ká melka nikanawak kwak ninemi anmuishpan nichikawaya nimetzinnutza kwak te ninemi anmuwan, 2 ashan kwak teuk ninemi, nimetzintajtani ma te niaw nimuneki nichikawaya kenha ken nikishketza ka nikchiwa iwan ne techijilwiat ka timuwikat ken tunakayu. 3 Melka ijkia tinejnemit tik tunakayu, tesu timusumat ken kichiwat ne muwikat ken innakayu.
4 Ika ne tajtaiwan ipal ne tutasumalis tesu ipal tuweyka sute kipiat intajpal ipanpa Teut. Ne tutajtaiwan welit kitajkalit cajcastilloj, welit nankiliat tajtaika, 5 welit kitemultiat muchi wejkapan tay kitejtenewa ne taishmatilis ipal Teut, welit kikwit tik tailpilis muchi yultaketzalis pal kitakamati ne Mawaltijtuk, 6 wan techajshitia pal tiktzunkwit muchi ká te tetakamatit kwak yekawi ne anmutetakamatilis.
7 Ankitat ne nemi anmuishpan. Su aka kimati ka yaja ipal ne Mawaltijtuk, ma kishkejketza ini, ka ijkiunisan ken yaja ipal ne Mawaltijtuk, tejemet nusan kiane. 8 Wan melka nimuweymati sea ipanpa ne tutatuktilis ne techmakatuk ne Tajtzin pal timetzinhiskaliat wan tesu pal timetzintajkalit, te niaw nishpinawa. 9 Ma te aka kikejketza ken su nimetzinmutiskia iwan ne tajtajkwilul, 10 ika inat: melka ne ajamat ejetek wan tajtajpaltik, kwak walajsi kukuya iweyka; kwak taketza te tatka ipatiw! 11 Ma se ijkiuni kishketza ini, ka ken titajkwiluat ijtik ajamat kwak te tinemit, ijkiuni titekitit kwak tiajsit.
12 Tejemet te timukejketzat ken ankakeski tukniwan ká inat insel ka yejemet yejyek, nian timusenpepetat inwan; yejemet mutamachiwat ijtik yejemet wan musenpepetat ne sejse iwan ne sejseuk wan te kimatit tatka.
13 Tejemet te timuweymatit iwan se tamachijka ne te tupal, sute iwan ne tamachijka ipal ne tajshitilis ne techmakak ne Teut, se tamachijka pal tiejkut hasta anmejemet. 14 Te timukujkutilanat sujsul ken te tiejkuskiat anmutech, ika tiajsitiwita anmutech titamakat ne iyeknawatilis ne Mawaltijtuk. 15 Te timuweymatit iwan se tamachijka ne semaya yek ipal tepal tejtekit. Tejemet tikpiat tejchialis ka kwak weya ne anmutayulmatilis, tiawit timuchiwat sujsul wejwey anmupanpa ken ne tutajshitilis, 16 pal titayeknawatiat tik talmet mas wejka; tesu pal timuweymatit iwan tepal tajshitilis ne nemia.
17 "Su ajaka muweymati, ma muweymati ipanpa ne Tajtzin."
18 Ika tesu muita yek yajuni ká kineki tailwitia ka yaja yek sute ká ne Tajtzin ina ka yek.
11 Niknekiskia ma shikselikan achi nutzuntekayu. Shinechselikan! 2 Nimetzinhishpelwia ken se Teut taishpelwia, ika nimetzinnamiktij iwan se anmushulejyu ma nimetzinhishpanu ipal ne Mawaltijtuk ken se chipawak siwapil. 3 Nimajmawi ika ken ne kuat kishijshikuj Jawa iwan se itajpewal, weli muishpulua ne anmutamatilis pal ankiajkawat ne kanawakayu wan ne chipawakayu ipal ne Mawaltijtuk. 4 Ika kwak se witz wan tanawatia ukse Yeshu ne te titanawatijket, su ankikwit ukse iijiu ne te ankikwijtuyat wan ukse yeknawatilis ne te ankiululujket, ankiseliat yek.
5 Nina ka uni tijtitanijtuk tetekia te mas wey inpatiw que naja: 6 melka nimele tik ne nupalabraj, tesu tik ne nutamatilis, wan tik muchi tay weli, timetzinneshtilijtiwita.
7 Anka nikchijki tay teyek kwak nimutemultij pal anmejemet muajkukiat, wan nimetzinmakak ne yeknawatilis ipal ne Teut wan te antashtawket tatka? 8 Nikinhishtilij tumin uksejse sennemit kwak nechmakaket nupatiw pal nitekiti anmupal. 9 Wan kwak ninemituya anmutech wan nimunekik, te nimetzinkakasuj pal tatka; ika tay ne nimuneki, ne nukniwan ne walajket Macedonia kalwikaket wan te nimetzintakimiltij ika nimetzintajpia, wan nusan te niaw nimetzintakimiltia ashan. 10 Ken nemi ne tejkia ipal ne Mawaltijtuk ijtik naja, te niaw nimukawa nimuweymati tik ne tajtal ipal Akaia. 11 Taika? Ika te nimetzintasujta? Ne Teut kimati.
12 Nikchiwa ijkiuni wan ijkiuni nikchiwas pal te welit kichiwat tatka yejemet ká muweymatit wan kinekit muitat kenhat ken tejemet, 13 wan yejemet sema sajsankatitanijtuk; melka tekitit, yejemet tashijshikuanit wan inat ka tijtitanijtuk ipal ne Mawaltijtuk, 14 wan uni te se pal tishpuyawit, ika nusan ne Tenewani muneshtia ken se tanawatiani ipal tawil; 15 kiane tel, te tatka su ne itejtekitini nusan muneshtiat ken su tekitinimet ipal tamelakchiwalis. Su ne intekiw teyek, nusan yawi teyek ne intamilis.
16 Nina senpa: ma te aka kikejketza ka nimele. Wan su te, shinechkwikan melka ken nimele, pal naja nusan nimuweymati achi. 17 Tay ne nina, te nina ken itech ne Tajtzin sute ken se mele ká muweymati wan ina ka ijkia. 18 Miak muweymatit ken innakayu; naja nusan ma nimuweymati tel!
19 Ika anmejemet ká kimatit, kiseliat ne melemet iwan pakilis. 20 Ika ankiseliat su ajaka metzinhilpia, su ajaka metzinkwa, su ajaka kitzkia tay anmupal, su ajaka muajkukia, su ajaka metzinkamawiteki. 21 Nina ken su te nemiskia yek, ken su ankukuyaskiat. Melka uni, su aka weli muweymati, nina ken se mele ka naja nusan nimuweymati:
22 Yejemet Ebrayujmet?
Naja nusan.
Sejse ipal Israel?
Naja nusan.
Ishinach Abraham?
Nusan naja.
23 Su yejemet itejtekitini ne Mawaltijtuk,
nitanutza ken se mele wan nina ka naja mas:
chiupiuk nikutiatuk,
chiupiuk nechtentzaktiwit,
chiupiuk nechtzuntektiwit
hasta achka nimiki,
24 ne Yudayujmet makwil wipta nechmakatiwit unpual sute se,
25 yeshpa nechchalujket iwan kwajkwawit,
seujti nechtejteminket,
yey wipta nubarcoj puliwik,
se tayua wan se tunal nipanuk tik miktan at;
26 nipashalujtuk seujseujti
wan nikishmattuk iujuijkayu ajapan,
iujuijkayu techtekinimet,
iujuijkayu tukniwan,
iujuijkayu tejtechan,
ujuijkayu tik ne weytechan,
ujuijkayu tik ne kojtan,
ujuijkayu tik ne weyat,
ujuijkayu ijtik sankakniwan;
27 nimukakasujtuk wan nikujkutiatuk,
inte niwelik nikuchi seujseujti,
nimayantuk wan niamiktuk,
nikselijtuk mayan seujseujti,
nisekmiktuk wan ninakatuk petztik;
28 muchi ne panutuk niksejselijtuk
wan nusan, mujmusta,
nimukakasujtuk ipanpa muchi ne sejsennemit.
29 Ká kujkutia
wan anka naja inte?
Ká mutekukujmati
wan naja inte nitata?
30 Su nemi pal nimuweymati, ipanpa tay ipal nukutialis niaw nimuweymati. 31 Ne Teut wan iteku ne Tajtzin Yeshu kimati, yaja ká yektenejtuk pal senpa, ka te nina sanka. 32 Tik Damashek ne techantuktiani ipal ne tatuktiani Aretas kipajpachiwij ne techan ipal ne Damashektakamet pal nechpewia, 33 wan nechtemultijket tik ne tentzin ijtik se chikiwit itech ne tapepechul wan nichuluj.
12 Nemi pal nimuweymati, melka te nechpalewia; wan niaw niajsi ka itajtachialis wan itajtaneshtilis ne Tajtzin. 2 Nikishmati se takat ijtik ne Mawaltijtuk: ashan majtakti-nawi shiwit, su tik iweyka te nikmati, su tesu tik iweyka te nikmati, ne Teut kimati, yajane muitzkij wan ajsik ka wejkapan ilwikak. 3 Wan nikmati ka uni takat, su tik iweyka, su tesu tik iweyka, te nikmati, ne Teut kimati, 4 muitzkij wan muwikak hasta ne Yekmil wan takakik pajpalabraj ne te aka weli ina. 5 Ipanpa se ijkiuni nimuweymati; nupanpa tesu nimuweymati sute tik ne kujkutialis, 6 ika su nikneki nimuweymati te niaw nitzuntet ika niaw nina ne tejkia. Te nikchiwa, ma te aka yawi nechpua ken mas que tay nechita o takaki nutech 7 ipanpa ne wey taneshtilis.
Yajika pal te nimuajkuki sujsul, nechmakatuk se witzti tik nunakayu, se tanawatiani ipal ne Tenewani ma nechchajchalu, pal kiane inte niaw nimuajkukia sujsul. 8 Ipanpa uni yeshpa nimutajtawelijtuk ne Tajtzin ma nechishtili 9 wan nechilwijtuk:
—Metzajsi ne nutetasujtalis, ika ne nutajpal tik kutialis yekawi.
Yajika, iwan pakilis nimuweymati mas yek ipanpa ne nukujkutialis pal ma naka nujpak ne itajpal ne Mawaltijtuk. 10 Neka nikita yek kujkutialis, tejteijtakulis, tajtapachulis, tajtaejekulis, wan ijijiumikilis ka imaku ne Mawaltijtuk, ika kwak nikutia, kwakuni nikpia fuerzaj.
11 Nimuchijtuk ken se tzuntet; ankichijket ma nikchiwa; niknektuskia ma shinakan ka niyek, ika tesu mas chiupi nupatiw que ne tijtitanijtuk sea tetekia, melka te nitatka. 12 Muchi tay muneki pal muishmati se titanijtuk muchijki ijtik anmejemet, iwan muchi tanejmachselilis: sejse pal muishmati wan sejse tay tetekia wan tay wejwey. 13 Tay metzchijtuk faltaj mas que ne uksejse sennemit; anka ika najasan te nimetzinkakasujtuk iwan nukimil? Shinechtapupulwikan ipanpa tay nimetzinchiwilij!
14 Niajsituka ukpa anmutech wan ashan niasneki uksenpa, wan te niaw nimetzinkakasua ika te niktemua tay anmupal, sute anmejemet ká nimetzintemua. Ika te yek ma tasentepewakan ne kukunet pal kinmakat ne intejteku, sute ne tetejteku nemit pal tasentepewat ipal ne kukunet. 15 Naja niaw nitemaka iwan pakilis tay nupal, wan najasan nusan niaw nimutemaka, ka imaku ne anmuajalmaj. Anka su nimetzintasujta mas, nemi pal annechtasujtat mas chiupi? 16 Ma naka. Naja te nimetzintakimiltijtuk. Melka uni, tinakan ka naja nimetzinshijshikujtuk pal nimetzinhitzkia. 17 Anka nimetzinhishtilijtuk tatka itech se ká niktitanij anmutech? 18 Niktajtan Titus wan niktitanij se tuiknew iwan: anka Titus metzinhishtilij tatka? Te timuwikatiwit kenha? Te titaksatiwit tik sanse ujti?
19 Ikman ankikejketzat ka tinat muchi sema pal tinakat yek anmuwan? Iishpan Teut tik ne Mawaltijtuk titanutzat. Muchi uni, nuyejyektasujtatuk, pal anmuskaliat. 20 Ika nimajmawi ka kwak niwitz te niaw nimetzinhajsi ken niknekiskia wan te anyawit nechajsit ken ankinekiskiat, sute musumalis, kwalan, tatejtenewalis, pupulukalis, muweymatilis, kumunilis; 21 ka kwak niajsi, ne Teut yawi nechtemultia senpa anmuishpan wan niaw nichuka ipanpa miak ká tateyekchijtiwit wan te muyulpatatiwit ipanpa ne susulkayu wan tatzinhejenchiwalis wan susultailwitilis ne kichijtiwit.
13 Ini kichiwa yey wipta ka niajsi anmutech. Su ume o yey inat, ma naka muchi ijkiunisan. 2 Kenha ken kwak ninemik né ukse wipta, nusan ashan kwak te ninemi né, nikinhilwijtuya wan nikinhilwia ne tateyekchijtiwit achtu wan muchi ne sejseuk, ka kwak niaw niajsi senpa, te niaw niktapupulwia aka, 3 ika ankitemuat se pal ankimatit ka ne Mawaltijtuk tanutza nutech, wan yaja tesu yamania sute anmujpak yaja weli; 4 melka mucruzpiluj ipanpa yamanikayu, yultuk ipanpa itajpal Teut; melka tejemet tikujkutiat ijtik yaja, tiawit tiyujyultuk iwan ipanpa itajpal Teut ijtik anmejemet.
5 Shimuejekukan pal ankimatit su antayulmatit. Shitachiakan anmejemetsan. Anka te anmuishmatit, wan te kimatit ka Yeshu Mawaltijtuk nemi ijtik anmejemet; semaya su te anyejyek, tesu. 6 Nitejchia ma te shimuajsikan te yejyek. 7 Niktajtani ne Teut ma te metzinchiwili tatka teyek, tesu pal ma timuitakan yek sute pal anmejemet kichiwat tay yek, melka tejemet timuitat ken te tiyejyek. 8 Ika te tiwelit tatka su te tinemit iwan ne tejkia, sema ka imaku ne tejkia; 9 ika tipakit kwak tejemet tikujkutiat, anmejemet chikawayat; nusan tiktajtanit uni, ne anmuyekawilis. 10 Neka niktuktia se tajkwilul anmutech kwak teuk niajsi ka né, pal kiane ma te niaw nikwalani ninemi kwak niajsi iwan ne tatuktilis ne nechmakatuk ne Tajtzin pal nitiskalia wan tesu pal nitetajkali.
11 Pal tami, nukniwan: ma shipajpakikan; ma shiyekawikan; shimupalewikan; shikishkejketzakan muchi kenha. Shinejmachnemikan, wan ne Teut ipal tetasujtalis wan nejmachnemilis nemis anmuwan.
12 Shimutajpalukan wan shimutennamikikan ken tayulmatinimet. Metzintajpaluat muchi ne tayulmatit
13 Ma nemi ne teutasujtalis ipal ne tajtzin Yeshu Mawaltijtuk wan ne itetasujtalis ne Teut wan ne tasentepewalis ipal ne Ijiutzin iwan muchi anmejemet.
Ne Bibliaj Tik Nawat · © 2008, 2012 Jan Morrow