Chronological
Tay ipal ne Ijiutzin: miak takutun, sanse iweyka
12 Nikneki nimetzinmachtia sejse ipanpa tay ipal ne Ijiutzin. 2 Ankimatit ka katka kwak antejtechan, anmuajkawket muwikat itech ne teujteutzitzin ne te welit taketzat. 3 Neka shikmatikan ka te aka su tanutza tik Iijiutzin Teut weli kichiwa maldictar Yeshu, wan se semaya weli ina "ne Yeshu tajtzin" su tik ne Ijiutzin.
4 Wan nemit tejtetakulis tekenhat; sanse Ijiutzin nemi. 5 Wan nemit tejtekitilis tekenhat; sanse Tajtzin nemi. 6 Wan nemit tutejtekiw tekenhat; sanse Teut tekiti wan kichiwa muchi ijtik muchi tejemet.
7 Ne Ijiutzin muneshtilia sejse ken yek ipal sejse: 8 mutakulia ne se ipanpa ne Ijiutzin pajpalabraj ipal tamatilis, wan ne seuk pajpalabraj ipal taishmatilis, wan sanse Ijiutzin senpa; 9 seuk weli tayulmati ipanpa ne Ijiutzin, wan seuk mutakulijtuk ma weli tapajtia, nusan ipanpa uni Ijiutzin; 10 se weli kichiwa sejse tay wey; seuk weli taketza ipal Teut; se weli ina katiawel ne nawalmet tekenhat; seuk, ken ne tajtaketzalis; wan ukseuk weli kipata tay kinekit inat. 11 Sanse Ijiutzin kichiwa muchi ini; yaja kimajmaka sejse ken yaja kita yek.
12 Ika tikmatit ka tikpiat sanse tuweyka wan yaja kipia miak takutun, wan muchi ne tajtakutun ipal ne tuweyka, melka muchi, yejemet sanse tuweyka. Nusan ne Mawaltijtuk ijkiunisan; 13 ika muchi tejemet nusan timumakatiwit ulyuj tik sanse iweyka melka ti Yudayujmet wan melka ti Greciajtakamet, su titepaltekitinimet wan su te tikpiat tutekuyu, wan kichijtiwit ka muchi tiatit tik sanse Ijiutzin.
14 Nusan ne tuweyka tesu sanse takutun sute miak. 15 Su ne tukshi inaskia: "Naja te se imey, te niipal ne iweyka!", anka yajika yaja te ipal ne tuweyka? 16 Wan su ne tunakas inaskia: "Naja te se iish, te niipal ne iweyka!", anka yajika yaja te ipal ne tuweyka? 17 Su muchi ne tuweyka tuish, ken titakakiskiat? Su muchi tunakas, taiwan titajnekuskiat? 18 Ashan kitalijtuk ne Teut ne tajtakutun sejse ken kinekik tik tuweyka. 19 Su muchi sanse takutun, kan nemiskia ne tuweyka? 20 Mas yek, mijmiak ne tajtakutun, ne tuweyka sesan. 21 Ne tuish te weli kilwia ne tumey: "Taja te timuneki!" Wan ne tutzuntekun nusan te weli kilwia ne tukshi: "Te timuneki!" 22 Wan ne tajtakutun ipal ne tuweyka ne muitat ka welit chiupi, hasta mas timunekit, 23 wan ne tajtakutun ne tinat ka te muitat yek, yejemet tikinyawaluat iwan mas respetoj, wan ne tutajtakutun ne te yejyektzin mukwepat chijchipawak. 24 Ne tutajtakutun yektzin te munekit tatka, wan kwak ne Teut kipikik ne tuweyka kimakak mas wey honor ne takutun mas chiupi ipatiw, 25 pal kiane te mukwalantiat ne tajtakutun ipal tuweyka, sute sejse tajpia sejse, 26 wan su se takutun te nemi yek, muchi ne tajtakutun te nemit yek, wan su muweychiwa se takutun, muchi ne tajtakutun yulpakit iwan.
27 Anmejemet iweyka ne Mawaltijtuk, wan sejse anmejemet itajtakutun; 28 wan ká ne Teut kitalijtuk tik ne sennemit, achtu tijtitanijtuk, ne ume taketzanimet, ne yey tamachtianimet, tipan ne welit wey, tipan tejtetakulis ipal tapajtilis, tepalewilis, tatuktilis, tajtaketzalis tekenhat. 29 Anka muchi yejemet tijtitanijtuk? Anka muchi taketzanimet? Anka muchi tamachtianimet? Anka muchi welit wey? 30 Anka muchi kipiat tejtetakulis ipal tapajtilis? Anka muchi welit tajtaketzalis? Anka muchi kipatat tay kinekit inat? 31 Ankitemuat ne mas yejyek tetakulis.
Tetasujtalis
Mas yek naja nimetzinhilwitia se ujti sujsul yek:
13 Melka weli nitanutza
tik ne tajtaketzalis ipal takamet
wan hasta tanawatianit,
su te nikpia tetasujtalis
nitzilini ken se tepusti,
nitzalani ken se kumit!
2 Wan melka nitaketza ipal Teut
wan nikmati muchi n' ijichtaka
wan muchi ne taishmatilis,
wan melka nikpia muchi ne tayulmatilis
hasta weli nikulinia tejtepet,
su te nikpia tetasujtalis, nian tatka nupatiw!
3 Melka nitamaka muchi nupalwan
pal niktakwaltia ne munekit
wan nitemaka ne nuweyka
pal nimuweymati,
su te nikpia tetasujtalis
te tatka nechpalewia!
4 Ne tetasujtalis kiselia muchi; wey iyulu!
Ne tetasujtalis te kwalani, te muweynutza, te muishpitza,
5 te muwika ken te nemi yek,
te kitemua tay ipal,
te muajkawa mukwalantia,
te kishkejketza tay te yek,
6 te paki ipanpa se tay te melawak
sute yulpaki iwan ne yekkaya;
7 muchi kiselia, muchi kiyulmati,
muchi tejchia, muchi kiwika.
8 Ne tetasujtalis te keman wetzi:
su teujteutaketzalis, puliwisket,
su tajtaketzalis, musewisket,
su tajtaishmatilis, mupulusket.
9 Ika sema se takutun tikishmatit
wan se takutun titaketzat ipal Teut.
10 Kwak yawi ajsi ne yekajtuk,
tay sema tajtakutun yawit panut.
11 Kwak nisulin katka, nitanutza ken se sulin,
niyultaketza ken se sulin, nikishkejketza ken se sulin;
kwak niweyki hasta nitakat,
nikpuluj tay ipal ne sulin.
12 Ika ashan titachiat ijtik se vidrioj ken se tay yuaki;
kwakuni, melawka ishpan tuish;
ashan nikishmati sejse takutun,
kwakuni, nikishmatis yek ken yaja nechishmati.
13 Ashan nakat yey:
tayulmatilis, tejchialis, tetasujtalis.
Ipal muchi, ne mas wey
yaja ne tetasujtalis.
Ne tajtaketzalis wan ne teutaketzalis
14 Shumet iipan ne tetasujtalis. Shiktemukan tay ipal tuijiu. Sea yek ma shitaketzakan ipal Teut, 2 ika ká ne tanutza tik se taketzalis tesu kinutza takamet sute Teut; te aka kikaki, ina ijichtaka itech ne iijiu. 3 Ne taketza ipal Teut kinnutza takamet pal muskaliat wan mupalewiat wan yulchikawayat.
4 Ne ká tanutza tik se taketzalis isel muskalia; ne ká taketza ipal Teut kiskalia ne sennemit. 5 Yek ma shitanutzakan muchi tik tajtaketzalis; nikneki mas ma shitaketzakan ipal Teut. Ne teutaketzani mas wey que ne tanutza tik tajtaketzalis su yajini te kinhilwia sejseuk tay kineki ina pal kiane muskalia ne sennemit.
6 Ashan nukniwan, su ajsi anmutech se tanutza tik tajtaketzalis, ken yawi metzinpalewia su te metzinnutza pal metzinneshtilia, o pal ankishmatit, o teutaketza o metzinmachtia? 7 Nusan ne tay te yultuk wan tzalani ken se pitujchin wan se guitarraj, su te niktzutzuna pal tiwelit tikishmatit ne nojnotaj, ken yawi kimati se tay niktzutzuna o tay nikpitza? 8 Wan su niktzutzuna se trompetaj ken te mukaki tay niktzutzuna, ká yawi kikwi ajarmaj pal musuma? 9 Ijkiunisan, su anmejemet nusan te antaketzat iwan ne taketzalis ne muneki pal muchi kimatit, ken yawi kimati se tay antanutzat? Antanutzasket ipal ne ejekat!
10 Tinakan ka sujsul mijmiak te kenhat ne ikupak pak ne taltikpak, wan muchi kipiat inpatiw. 11 Yajika, su te nikmati tay kineki ina ne ikupak, naja nimele ipal ne tanutza wan mele ne tanutza nupal. 12 Ijkiuni anmejemet nusan, ká kitemuat tay ipal ne iijiu pal muskalia ne sennemit, shimutatemuilikan ma wey anmupatiw. 13 Yajika, su se tanutza tik se taketzalis, ma kitajtani ne Teut ma weli ina tay kineki ina.
14 Su niknujnutza ne Teut tik se taketzalis, ne nuijiu kinutza; ne nutamatilis te kichiwa tatka. 15 Yajika tel, niaw niknujnutza ne Teut iwan ne nuijiu, niaw niknujnutza iwan ne nutamatilis nusan. Niaw nitakwika iwan ne nuijiu, niaw nitakwika iwan ne nutamatilis nusan. 16 Su te, kwak tiaw titateuchiwa iwan ne muijiu, ne nemi kan muajsit ne melemet ken weli ina amen kwak tami tina panpadiush, su yaja te kimati tay tina? 17 Melka yek ken taja tina panpadiush, ne seuk te muskalia. 18 Melka ne Teut kichijki ka weli nitanutza tik tajtaketzalis mas que muchi anmejemet, 19 tik ne sennemit niknekiskia nitanutza makwil palabraj iwan ne nutamatilis pal nikinmachtia sejseuk, wan te sujsul miak palabraj tik se taketzalis.
20 Nukniwan, maka shimuchiwakan ken kunetzitzin tik ne anmutamatilis, sute ipal ne tay teyek shimuchiwakan sujsulin, tik ne anmutamatilis shimuchiwakan wejweymet. 21 Tik ne tajtuli muijkwilujtuk:
"Tik tepal tajtaketzalis wan tik tepal tejtenshipal niknutzas ini techan, wan nian ijkiuni nechkakisket, ina Tutajwan."
22 Ne tajtaketzalis nemit pal muishmati, tesu ipal ne tayulmatit sute ipal ne te tayulmatit; ne teutaketzalis te nemi ipal ne te tayulmatit sute ipal ne tayulmatit. 23 Yajika su musentepewa muchi ne sennemit kan nemi wan muchi tanutzat tik tajtaketzalis, wan kalakit melemet wan sejse te tayulmatit, anka te yawit inat ka antzujtzunhejekat? 24 Pero su muchi taketzat ipal Teut wan kalaki se te tayulmati o se mele, muchi yawit kiajajwat, muchi yawit kitajtaniliat; 25 tay ne minashtuk tik ne iyulu yawi muneshtia, wan ijkiuni yawi mutamuta talchi, yawi mutankwaketza iishpan ne Teut wan yawi ina ka tejkia ka ne Teut nemi ijtik anmejemet.
26 Yajika tel, nukniwan, kwak anmusentepewat, sejse kipia se salmoj, kipia se tamachtilis, kipia se taneshtilis, kipia se taketzalis, kipia se tapatalis: ma muchi muchiwa pal tiskalia.
27 Su tanutzat tik tajtaketzalis, ma kichiwakan semaya ume wan anka yey, tesu mas, wan sejse ika, wan ma ina ajaka tay kineki ina. 28 Su te aka kimati tay kineki ina, ma takaktuk tik ne sennemit; ma tanutza ipal yaja isel wan ipal ne Teut.
29 Ma tanutzakan ume o yey teutaketzani wan ma taishtemukan ne sejseuk. 30 Su muneshtilia seuk ká nemi né, ma mukawa ne achtu, 31 ika muchi anwelit taketzat sejse ika pal muchi mumachtiat wan muchi mupalewiat, 32 wan taketzanimet kintuktiat inhijijiu taketzanimet, 33 ika ne Teut tesu se Teut ipal kumunilis sute ipal nejmachnemilis.
Ken tik muchi ne sejsennemit ipal ne tayulmatit, 34 ne siwatket tik ne sejsennemit ma tajtakaktuk, ika te kinhajkawat tanutzat; ma tetakamatikan ijkiunisan ken ina ne tajtuli. 35 Su se siwat kineki mumachtia se, ma kitajtanili ne ishulejyu ka ichan, ika nemi pal tishpinawat su se kinutza se siwat tik ne sennemit.
36 Anka anmutech kistuk ne ipalabraj ne Teut? Anka sema anmutech walajsituk? 37 Su se ina ka yaja teutaketzani o ka kipia Ijiutzin, ma kishkejketza tay ne nimetzinhilwia tik ini tajkwilul, ika ne Tajtzin tatuktij. 38 Su aka te kishmati, ma te kishmatikan.
39 Yajika nukniwan, shiktemukan ma shiteutaketzakan wan su sejse tanutzat tik tajtaketzalis maka shinakan ka te weli. 40 Ma muchiwa muchi ken yek wan ken muneki.
Ne Bibliaj Tik Nawat · © 2008, 2012 Jan Morrow