Chronological

1 Ikman ne Teut kinnutzki ne tutejteku itech taketzanimet tik miak partej wan tik miak maneraj; ² tik ini tijtipan tunal pal ashkan, yaja technutztuk itech ne ipiltzin ká ne kimakak muchi ne iherenciaj wan ká ipanpa kichijki muchi. ³ Yaja ne itawil tzitzinaka wan ne techilwitia ken Yaja. Yaja kiselia muchi iwan ne ipalabraj wey itajpal. Yaja kipupujtuk tay ne titateyekchijtiwit. Mutalijtuk ka imayekkan ne Wey tik ne wejkapan. ⁴ Muchijtuk sujsul mas yek que ne tanawatianimet, yajika kipia itukay sea yek.

⁵ Katiawel ijtik ne tanawatianimet welit tinat ka ne Teut kilwij ka:

wan ukseujti:

⁶ Nusan kwak kikalaktia ne achtupunijtuk tik ne taltikpak, ina:

⁷ Yaja kinhilwia ne tanawatianimet ijkiuni:

⁸ Wan ini tay kilwia ne ipiltzin:

¹⁰ Wan:

¹³ Katiawel pal ne tanawatianimet kilwijtuk niakeman:

¹⁴ Anka kia muchi yejemet nawalmet tujtuktijtuk pal tekitit ipal yejemet ká yawit mumakishtiat?

2 Yajika tikejketzakan ne tay tikaktiwit ma inte keman tishipinukan; ² ika asu tay ne inatiwit ne tanawatianimet muchijki ijkiuni, wan muchi ká inte kichiwat kiane wan te kitakamatit mutashtawijtiwit melawak, ³ ken tichulusket asu inte tikchiwiliat casoj se tamakishtilis ijkiuni, ne achtu ne Tajtzin pejki tanutza wan ne takakket techilwijtiwit ka tejkia, ⁴ wan ne Teut nusan techneshtilia inwan sejse pal muishmati, wan sejse tetekia, wan ankakeski itajpal, wan tamajmaka ne Ijiutzin ken yaja kielewia?

⁵ Ika intesu ne tanawatianimet ne tatuktianimet ipal uni taltikpak yawi witz ne ipanpa tinat. ⁶ Se inatuk tik se amat:

Kwak kituktij muchi wan kitalij ka itan, inte kiajkaw tatka, muchi kitalij tik ijimey. Ashkan inteuk tikitat muchi tuktijtuk ka itan. ⁹ Tikitat Yeshu achi muchijtuk mas chikitik que ne tanawatianimet ipanpa ne itaekulis ne mikilis, wan kipishki tzitzinakalis wan honor, pal kiane, ipanpa ne itetasujtalis ne Teut, yaja kiejekua mikilis.

¹⁰ Ika ká ne muchi ipanpa muchiwa wan muchi ka imaku muchiwa, ká ne kalwika miak ipilawan tik tzitzinakalis, inak ka muneki ma taekua ne tatekimaka ipal ne tamakishtilis pal yaja yekawi. ¹¹ Ika yaja ká kinteuchiwa wan yejemet ká muteuchiwat muchi witzet itech sesan, wan yajika inte ishpinawa pal kinhilwia ikniwan ¹² wan ina:

¹³ Wan nusan:

Wan:

¹⁴ Ne kukunet, ipal iesyu wan inakayu. Yajika tel, yaja muchijki kenhaya pal kiane yaja yawi miki wan ijkiuni weli kipulua ne kipia itajpal ipal ne mikilis, yaja ne Tamintuk, ¹⁵ wan weli kinmakishtia muchi ká senpa nemit ijilpituk ika kipiat mawi ipal mikilis. ¹⁶ Te, yaja inte kikwi tay ipal tanawatianimet, asunte kikwi ne ishinach Abraham. ¹⁷ Ika muneki katka ma muchiwa ken ne tukniwan tik muchi, pal kiane yawi muchiwa se yek weypalej, ne kinpalewia muchi tik ne tay ipal ne Teut, ma kitapupulwi tay tateyekchijtuk ne techan, ¹⁸ ika yaja nusan muejekujtuk wan yajika weli kinpalewia muchi ne muejekujtiwit.

3 Yajika, nukniwan ne tayulmatit, ne kipiat ne tanutzalis ipal ne ilwikak ka ikajku, shikishketzakan ne titanijtuk wan weypalej ipal ne tutayulmatilis, Yeshu: ² yaja melawak ipal ne ká kituktij, ken Moshe ká nusan melawak katka ipal muchi ne ikal; ³ ika muita ka yajuni tzitzinaka mas que Moshe, ken ká ne kiketzki ne kal kipia mas wey honor que ne kal isel.

⁴ Ika muchi ne kajkal sesan kinketzki. Wan ne Teut, yaja kiketzki muchi. ⁵ Wan melka Moshe melawak katka tik muchi ne ikal ken tekitini pal tikmatit tay ne inaskiat nemanha, ⁶ ne Mawaltijtuk ijkiuni ijpak ne ikal, wan tejemetsan ne ikal.

⁷ Neka ijkiunisan ken ina ne Ijiutzin ipal Teut:

¹² Shiktalikan cuidadoj, nukniwan, ma nian se anmejemet kipia tik iyulu ne inteyek ipal inte-tayulmatilis ne kiajkawa ne Teut yultuk, ¹³ asunte shimutajtanikan anmejemetsan mujmusta, senpa ka munutza ne tunal pal ashkan, ma inte takwawaya se anmejemet wan ma inte mushijshikua iwan tay inteyek, ¹⁴ ika tikpiat ne Mawaltijtuk senpa asu tikmatit yek tik tuyulu hasta ma tami muchi, ¹⁵ wan asu tinat:

¹⁶ Ika kámet takakket wan teajwaket? Anka inte muchi ne kisket tik Egipto ipanpa Moshe? ¹⁷ Ká iwan kwalanik tik ume pual shiwit? Anka te ne tateyekchiwanit ne mikiket tik ne kojtan? ¹⁸ Ká ipanpa kichijki jurar ka inte kalakisket tik ne isewilis, asunte ne inte tayulmatket? ¹⁹ Tikitat tel ka yejemet inte weliket kalakit ika inte tayulmatket.

4 Yajika timajmawikan, ken kiajkaw se promesaj ka tiawit tikalakit tik ne isewilis, ma inte ina nian se anmejemet ka yawi kichiwa faltar, ² ika melka tejemet techmakaket ne yeknawatilis kenha ken yejemet, ne palabraj ne kikakket yejemet inte kinpalewij, ika inte mupikik iwan ne intayulmatilis ne takakinimet. ³ Ika tejemet ne titayulmatit tikalakit tik ne sewilis, ijkiunisan ken inatuk:

Muchi ne itekiw muchijkia kwak mutzintij ne taltikpak, ⁴ ika tik se inatuk ijkini ipanpa ne tunal chikume: "Ne Teut musewij tik ne tunal chikume kwak tamik muchi itekiw ne kichijki." ⁵ Wan tik ini, seuk: "Inte yawit kalakit tik ne nusewilis." ⁶ Ken muita tel, sejse kalakisket kalijtik, wan te kalakisket ne achtu muyeknawatijket ika inte tayulmatket. ⁷ Ukseujti kitukaytia se tunal: "Ashkan," ina itech Dawid kwak panutuk wey tiempoj, ken inatuya ikman:

⁸ Ika asu Yeshu kinmakatuskia sewilis, inte tanutztuskia ipanpa ukse tunal tipan. ⁹ Kiane, naka se sewilis ipal ne itechan ne Teut, ¹⁰ ika ká ne kalaki tik ne isewilis, yajane musewij kwak tamik kichiwa itekiw, kenha ken musewij ne Teut kwak tamik tay kichijki.

¹¹ Yajika timutatemuilikan pal tikalakit ijtik uni sewilis, ma inte aka yawi wetzi tik inte-tayulmatilis ijkiuni, ¹² ika yultuk ne ipalabraj ne Teut wan kipia itajpal wan mas tzuntamej que se espadaj kipia ume itan, wan takuyunia hasta kinkupewa almaj wan nawal; umit wan tutanoj; wan kita muchi tay nemi tik tuyulu, ¹³ wan te tatka muchijtuk ne inte weli kita yaja; muchi petznaj, wan muita, ishpan ne ijish.

¹⁴ Yajika, tikpiat se weypalej sujsul wey ne panutuk ijtik ne ilwikak: Yeshu, ne itelpuch ne Teut. Tikwikan ne tayulmatilis, ¹⁵ ika inte tikpiat se weypalej ne inte weli kimati ken mumatit ne tukujkukulis; yaja muejekuj iwan muchi kenha ken tejemet, sema ka yaja inte kichijki tatka tay inteyek. ¹⁶ Yajika, tiajsikan melaknaj hasta ne ikuijpal ne tetasujtalis pal techpalewiat kwak timunekit.

5 Senpa kwak se weypalej mupejpena ijtik takamet, mutalia ipatka takamet pal muchi tay ipal ne Teut, ma tamaka tejtetakulis ka inmaku tateyekchiwanimet. ² Yaja weli kipia wey iyulu iwan ne inte kimatit wan ne mushijshikuat ika yaja nusan muyawalua iwan yamanikayu. ³ Wan ipanpa uni, kenha ken tetakulia ipanpa ne tay tateyekchijtuk ne techan, nusan muneki ma kichiwa ipanpa yajasan. ⁴ Wan se inte kikwi ne honor yaja isel, asunte kwak ne Teut kinutza, kenha ken Aaron. ⁵ Nusan kiane ne Mawaltijtuk: yaja inte muweychijki isel pal muchiwa weypalej, asunte ne kilwijtuya:

⁶ Ijkiunisan ken ina nusan tik ukse amat:

⁷ Yaja, tik ne tujtunal kwak kipiatuya ne iweyka, tzajtzik wey wan chukak pal tajtani wan mutajtawelia iwan ne weli kimakishtia itech mikilis, wan yaja mukakik ika kitakamati tay nemi tuktijtuk. ⁸ Melka yaja ne ipiltzin, taekuj pal mumachtia ne tetakamatilis, ⁹ wan kwak yekawik, muchijki ne taika tiwelit timumakishtiat pal senpa muchi tejemet ká tiktakamatit, ¹⁰ wan ne Teut kinutzki pal muchiwa weypalej ken ne ipalejtal Malkitzedek.

¹¹ Tikpiat miak pal tinat ipanpa ini; uij ma tikneshtikan ika tatziwki ne anmutakakilis. ¹² Melka muneki ma shimuchiwakan tamachtianimet ipanpa ne tiempoj, anmunekit ma pewakan metzinmachtiat senpa ne ajachtu ipal ne tay ina ne Teut. Anmuchijtiwit ken sejse munekit ma metzintakwaltikan chichiayu, ne yek takwal inteuk welit ankikwat. ¹³ Ká ne kikwi chichiayu inte kimati ipanpa tamelakchiwalis ika yaja se sulin. ¹⁴ Ne yek takwal yaja ipal weymet, ne muejekujtiwit sujsul wan kimatit ipanpa ne inmuejekulis katiawel ne yek wan katiawel ne inteyek.

6 Yek, tikajkawakan ne ajachtu tay nemit pal timumachtiat ipal ne Mawaltijtuk, wan tiawit tikitat ne uij. Inte tiawit tiktekat senpa ne tetzilnaj ne mumatiaya: ka muneki ma timuyulpatakan itech ne tutekiw miktuk, wan ma tikyulmatikan ne Teut; ² ne tamachtilis ipanpa teulyujmakalis; wan ipanpa tay ne mutuktijtuk ipal ne tujtumey; wan ne muyulkwepalis kwak timiktiwit; wan nusan ka tiawit timuchiwat juzgar pal senpa. ³ Wan tiawit tikchiwat ijkiuni, asu kineki ne Teut.

⁴ Ika se ká mutawilujtuk seujti, wan kiejekuj ne itetakulis ne ilwikak ka ikajku wan kikwija ne Ijiutzin, ⁵ wan kishmatkia ne yek palabraj ipal Teut wan ne itajpal ne taltikpak witz, ⁶ asu yaja wetzi senpa, inte weli mukwepa muyulpata, ika yaja kicruzpilua ne itelpuch ne Teut wan kichiwa ka yawit tajtaketzat ken inte yek ipanpa. ⁷ Ika kwak ne tal tami kiuni ne ajat ne wetzit ijpak wan tamaka yejyek sakat ken kinekit ne tatukat, ne Teut kiteuchiwa; ⁸ asu waltakatit wijwitzti wan kijkilit te tatka ipatiw yaja inte yek wan achka muchiwa maldictar wan yawi tami tik tit.

⁹ Yejyektasujtatuk, melka titanutzat kiane, tikmatit muchi tay yek anmupanpa wan tay kipia tamakishtilis, ¹⁰ ika yek ne Teut, wan te yawi kielkawa ne anmutekiw, wan ken ankitasujtatiwit ne itukay, wan antekittiwit ipal ne tayulmatit, wan antekitit kenhayuk ashkan. ¹¹ Tikelewiat ma shimutatemuilikan muchi pal tajpiat ne tejchialis hasta kwak tami, ¹² ma inte shitatziwikan, asunte ma shinakakan iwan muchi ká yawit kipiat ipromesaj ipanpa tayulmatilis wan weytejchialis.

¹³ Kwak ne Teut kichiwilia Abraham se promesaj, ken inte kipiatuya aka mas wey que yaja, kichiwa katka jurar ipanpa yaja isel, ¹⁴ wan ina: "Ijkia, sujsul nimetzteuchiwas wan sea nimetztepewilis", ¹⁵ wan ijkiuni, kwak tamik tejchia wey, ajsik ne promesaj. ¹⁶ Ne takamet kichiwat jurar ipanpa ne tay sujsul wey, wan iwan ne juramentoj pal kimatit ka tejkia, tami ne najnankilis. ¹⁷ Kwakuni, kwak ne Teut ina ka yawi kinhilwitia ka yekkaya ne ipromesaj inpal, kichijki se juramentoj, ¹⁸ pal kiane, ipanpa ume tay inte keman yawit mupatat, ken ne Teut inte weli tashijshikua, tejemet tiawit tikpiat se wey tepalewilis pal kiane, kwak tiawit tichuluat, tiawit tikitzkiat ne tejchialis ne muishpanua. ¹⁹ Kenha ken se tepusti kitetilia se barcoj pal te mijkwani tik ne weyat, uni tejchialis tikpiat ijtik tuyulu, wan tikalakit kalijtik ne kwachtzakka ²⁰ kanka kalak tupal Yeshu, ne achtumutaluani, ká muchijtuk tupalej pal senpa ken ne ipalejtal Malkitzedek.