Chronological
12 Wan kiski tik ne ilwikak se pal muishmati: se siwat takentijtuk iwan ne tunal, wan ne metzti itankupa ne ijikshi, wan ijpak ne itzuntekun se yawal ipal majtakti-ume sital, 2 wan yaja weyijti. Wan yaja tzajtzi ika sujsul kikua pal puni. 3 Wan kiski ukse pal muishmati tik ne ilwikak, wan né muitak se kuat majwey itachishka tit, kipia chikume itzuntekun wan majtakti cachoj, wan ijpak ne itzujtzuntekun chikume yawalilpika, 4 wan ne ikwitapil kitilana ne yeshtakutun ipal ne sitalmet ipal ne ilwikak wan kintamima talchi. Wan ne kuat majwey nakak ejkatuk tik itachialis ne siwat ne yawi puni pal kiane kwak puni ma kitulu ne ikunew. 5 Wan kipunij se ukichkunet ne nemi pal tajpia muchi ne tejtechan iwan itupil ipal tepusti. Wan muitzkij ne kunet wan muwikak itech ne Teut wan itech ne ikuijpal. 6 Wan ne siwat chuluj tik ne kojtan, kan ne Teut kiajshitilijtuya se kan nemiskia, pal ikuni yawit kitakwaltiat mil-ume-tzunti-yeshpual tunal.
7 Wan tasunket tik ne ilwikak: ne Mikael wan ne itajtanawatiani musumat iwan ne kuat majwey, wan ne kuat majwey musuma katka, wan ne itanajnawatiani nusan, 8 wan te welik, wan tea su nemik kan nakaskia tik ne ilwikak. 9 Wan kishtijket ne kuat majwey, ne kuat pal ikman panutuk, ne itukay ne Tamintuk wan ne Tenewani, ne kinshijshikua muchi ne taltikpakchanejket. Yaja kitaminket talchi wan ne itajtanawatiani iwan. 10 Wan nikakik se taketza wey tik ne ilwikak wan ina:
"Ashan ajsik ne tamakishtilis
wan ne itajpal
wan ne itatekimakalis ne tuTeut,
wan ne itatuktilis ne imawaltijtuk,
ika mutamin ne tatenewani
ne kintenewa ne tukniwan
tik itachialis ne tuTeut
ka tunal wan ka tayua.
11 Wan ijpak yaja weliket
ipanpa ne iesyu ne ichkakunetzin
wan ika inatuyat tay tejkia
wan te kitasujtaket ne inhajalmaj hasta mikilis.
12 Yajika shimuyulkwesukan,
ne ilwikak wan ne nepa muchantiat.
Ay ne tal wan ne at!
Ika waltemuk ne Tamintuk, ajsik tutech,
wan kwalani wey ika kimati
ka inte kipia wey tiempoj!
13 Wan kwak kitak ne kuat majwey ka kitaminket talchi, yajki mutalua ipan ne siwat ne kipunij ne ukich, 14 wan kinmakaket ne siwat ne ume iejejtapal ne wey kwawti pal weli patani tik ne kojtan hasta kan kipia pal mutakwaltia ikuni se shiwit wan uk shijshiwit wan uk se tajku shiwit wejka ne kuat. 15 Wan ne kuat kitamutak ijtik ne iten ipan ne siwat ne at wey ken se apan, pal ma kiwika ne tepeat ne siwat, 16 wan ne tal kipalewij ne siwat, wan kitapuj ne tal ne iten wan kiunik ne tepeat ne kitamutak ne kuat majwey ijtik ne iten; 17 wan kwalanik ne kuat majwey iwan ne siwat, wan yajki musuma iwan ne sejseuk ipal ne ishinach, ne tajpiat ne tay tatuktij ne Teut wan inat tejkia ipanpa Yeshu. 18 Wan nakak ijpak ne ashal ipal ne weyat.
13 Wan nikitak kisa tik ne weyat wan tejku se tekwani kipiatuya majtakti cachoj wan chikume itzuntekun wan ijpak ne icajcachoj majtakti yawalilpika, wan ijpak ne itzujtzuntekun itujtukay kukujtaketzalis. 2 Wan ne tekwani nikitak muita ken se uselut, wan ne ijikshi ken ne osoj, wan ne iten ken ne iten ne leon. Wan ne kuat majwey kimakak ne itajpal wan ne ikuijpal wan ne itatuktilis. 3 Wan se itzuntekun nemituya ken mutzuntektuk wan miktuk, wan ne chiraj ipal ne mikilis pajtituk.
Wan ishpuyawik muchi ne tal ipan ne tekwani. 4 Wan mutankwaketzket iishpan ne kuat majwey ika kimakak ne tekwani tatuktilis, wan mutankwaketzket iishpan ne tekwani wan inat: "Ká kenha ken ne tekwani, wan ká weli musuma iwan?"
5 Wan kimakaket se iten tanutza wey wan kukujtaketza, wan kimakaket tatuktilis pal kichiwa ijtik unpual-ume metzti, 6 wan kitapuj ne iten kukujtaketza ne Teut, pal kukujtaketza ne itukay, wan ne itawipan, ne muchantiat tik ne ilwikak. 7 Wan kimakaket ma weli musuma iwan ne tayulmatit wan weli mas que yejemet wan kimakaket tatuktilis ijpak muchi ne trijtribuj wan tajtaketzalis wan tejtechan. 8 Wan iishpan mutankwaketzket muchi ne muchantiat pak ne tal ne itukay inte mujkwiluj tik ne iamaw yultuk ne ichkakunetzin kwak mutzintij ne taltikpak.
9 Asu aka kipia takakilis, ma takaki:
10 Asu aka nemi ilpituk,
ma ilpituk;
asu aka nemi pal mumiktia iwan espadaj,
ma mumikti iwan espadaj.
Nikan nemi ne tanejmachselilis wan ne tayulmatilis ipal ne yejyek.
11 Wan nikitak ukse tekwani kisa tik ne tal wan tejku, wan kipiatuya ume cachoj kenha ken se ichkakunetzin, wan tanutza ken se kuat majwey. 12 Wan kichiwa muchi tay ne itatuktilis ne achtu tekwani tik itachialis. Wan kichiwa ka ne tal wan ne muchantiat ijtik yaja mutankwaketzat iishpan ne achtu tekwani, ne pajtik ne ichiraj imikilis. 13 Wan kichiwa sejse wey pal muishmati, pal nusan kichiwa ka tit tik ne ilwikak waltemu talchi tik itachialis ne takamet, 14 wan kinshijshikua ne chanejket ijpak ne tal iwan sejse pal muishmati, ka kimakaket ma weli kichiwa iishpan ne tekwani, wan kinhilwia ne chanejket ijpak ne tal ma kichiwakan se tachialis ipal ne tekwani ne kipia ne ichiraj ne espadaj wan nemi yultuk.
15 Wan kimakaket ma weli kimaka iijiu ne tachialis ipal ne tekwani, pal nusan weli tanutza ne tachialis ipal ne tekwani wan weli kichiwa ma muchi tay inte mutankwaketzat iishpan ne tachialis ipal ne tekwani ma mikikan. 16 Wan kichiwa ka muchi, ne chijchikitik wan ne wejwey, wan ne kipiat wey wan ne munekit, wan ne isel itejtekuyu wan ne tepal tekitinimet, kikwit se kwikwil ijpak ne inmey inyekkan, wan asu inte ijpak ne inkwatapal, 17 wan ka inte aka weli takua nian tanamaka asu inte kipia wawasujtuk ne itukay ne tekwani o ne tapual ipal ne itukay.
18 Nikan nemi ne tamatilis: ká ne kipia tamatilis, ma tasenpua ne tapual ipal ne tekwani, ika yaja itapual takat, wan ne itapual yaja chikwasen-tzunti-yeshpual-chikwasen.
14 Wan nitachishki wan nikitak ne ichkakunetzin ejkatuk ijpak Tziontepet, wan iwan nemituyat se-tzunti-unpual-nawi-mil ne kipiatuyat ne itukay wan ne itukay ne iteku tajtawawasujtuk ijpak ne inkwajkwatapal. 2 Wan nikakik taketza tik ne ilwikak ne mukaki ken wejwey at wan ken wey tikwini, wan ne tay nikakik mukaki ken guitarrajtzutzunanimet kitzutzunat ne inguijguitarraj, 3 wan takwikat ken se yankwik takwikalis iishpan ne kuijpal wan inhishpan ne nawi tay yujyultuk wan ne noymet, wan te aka weli mumachtia ne takwikalis asunte ini sentzunti-unpual-nawi-mil ne mukujtiwit itech ne taltikpak.
4 Yejemet ne inte mususulwijtiwit iwan siwatket ika takapipiltzitzin. Yejemet ne yawit ipan ne ichkakunetzin nujme yaja yawi. Yejemet ká ne Teut wan ne ichkakunetzin kinkujtiwit itech ne ajachtu takat, 5 wan tik ne inten inte muajsi nian se sanka; inte kipiat nian se inpelech.
6 Wan nikitak ukse tanawatiani patani tik itajku ne ilwikak, ne kipiatuya se yeknawatilis ipal senpa pal kinyeknajnawatia ne nemit ijpak ne tal wan muchi ne tejtechan wan trijtribuj wan tajtaketzalis. 7 Yaja tzajtzi wan ina:
"Shiktakamatikan ne Teut wan shinakan ka wey, ika ajsik ne horaj ipal ne ijuicioj, wan shimutankwaketzakan iishpan ne kichijki ne ilwikak wan ne tal wan ajat wan ajapunian."
8 Wan ukse tanawatiani walaj tipan ina:
"Wetzkia, wetzki ne wey Babelonia, ne kichijtuk ka muchi ne tejtechan kiunit ne atata ipal ne kwalan ipal ne itatzinhejenchiwalis."
9 Wan ukse tanawatiani, ne yey, walaj tzajtzi ka ipan, ina:
"Asu aka mutankwaketza iishpan ne tekwani wan ne itachialis wan kikwi se wawasujtuk ijpak ne ikwatapal o ijpak ne imey, 10 yaja nusan yawi kiuni ne atata ipal ne ikwalan ne Teut ne muekchijtuk iwan muchi itajpal tik ne atiluni ipal ne ikwalan, wan yawi chichinaka ijtik tit wan azufrej tik itachialis ne itajtanawatiani ne Teut wan tik itachialis ne ichkakunetzin; 11 wan ne ipukyu ne inchichinakalis pal senpa wan senpa yawi tejku, wan te yawit musewiat nian ka tunal nian ka tayua ne mutankwaketzat iishpan ne tekwani wan ne itachialis, wan su aka kikwi ne ikwikwil ne itukay. 12 Nikan nemi ne intanejmachselilis ne tayulmatit, ne tajpiat tay tatuktij ne Teut wan kiyulmatit Yeshu."
13 Wan nikakik se tik ne ilwikak ina: "Shitajkwilu: Kipiat suertej ne mikinimet ne ashan yawit mikit ipanpa ne Tajtzin. Ijkia, ina ne Ijiutzin, pal welit musewiat kwak kujkutiat, ika ne intejtekiw yawit nakat inwan."
14 Wan nitachishki wan nikitak se mishti istak, wan muetztuk ijpak ne mishti se muita ken ne Itelpuch ne Takat, ne kipia ijpak ne itzuntekun se yawal ipal teukwit, wan tik ne imey se machej tamej. 15 Wan ukse tanawatiani kiski tik ne teupantzin kitzajtzalia ne muetztuk ijpak ne mishti: "Shikwi ne mumachej wan shitapishka, ika ajsik ne horaj pal titapishkat ika waktuka ne tapishkal."
16 Wan ne muetztuk ijpak ne mishti kishtij ne imachej wan pejki tapishka, wan mupishkak ne tal.
17 Wan kiski ukse tanawatiani ijtik ne teupantzin tik ne ilwikak, ne kipiatuya nusan yaja se machej tamej. 18 Wan kiski ukse tanawatiani itech ne tikashit ne kipia tatuktilis ijpak ne tit, wan kitzajtzalij ne kipiatuya ne machej tamej ina: "Shikwi ne mumachej tamej wan shikululu ne igajgajoj ne shukumekat ipal ne tal, ika uksituka ne itakil." 19 Wan ne tanawatiani kishtij ne imachej wan pejki tekiti wan kiululuj ne shukumekat ipal ne tal, wan kitamutilij ne shaput kan muishtia ne iayu ne shukumekat, yaja ne shaput ipal ne ikwalan ne wey Teut. 20 Wan taksaket ijpak ne shukumekat ne tatenpan ne techan, wan kiski esti kan taksaket hasta ne intejtentepusti ne caballojmet, wan ne lagoj ajsik hasta yey tzunti kilometroj.
Ne tanawatianimet kikushiniat ne wajwajkal
15 Wan nikitak tik ne ilwikak ukse pal muishmati sujsul wey pal tishpuyawit: chikume tanawatiani, ne kipiatuyat chikume kukulis, wan yejemet ne tijtipan chikume ika inwan tamik ne ikwalan ne Teut.
2 Wan nikitak ken se weyat ken vidrioj malijtuk iwan tit. Wan ne welitiwit mas que ne tekwani wan ne itachialis wan ne tapual ipal ne itukay nemituyat ejkatuk ijpak ne weyat ipal vidrioj, wan kipiatuyat iguijguitarraj ne Teut 3 wan takwikat ne itakwikalis Moshe ne itekitini ne Teut wan ne itakwikalis ne ichkakunetzin, inat:
Wejwey tetekia sea ne mutejtekiw,
Tajtzin Teut ne muchi weli!
Mejmelawak wan yejyekkaya ne mujmuuj,
taja ne miaktechantekimaka!
4 Ká inte yawi kitakamati, Tajtzin,
wan ina ka wey ne mutukay?
Ika sema taja tiyulchipawak!
Ka walasket muchi ne tejtechan
muishpan mutankwaketzat,
ika muchi ne mutajtamelakchiwalis muneshtijtiwit.
5 Wan tipan nitachishki wan tapuik ne teupantzin ipal ne tawipanti ipal ne yektaketzalis tik ne ilwikak, 6 wan kisket tik ne teupantzin ne chikume tanawatiani ne kipiat ne chikume kukulis, tajtakentijtuk iwan kwajkwachti ijistak chijchipawak, wan cijcinchoj ipal teukwit kiyawaluat ne iejelpan. 7 Wan se ipal ne nawi tay yujyultuk kinmakak ne chikume tanawatiani chikume wajkal tejtentuk iwan ikwalan ne Teut yultuk pal senpa wan senpa, 8 wan ne teupantzin temik iwan ne itzitzinakalis wey ne Teut wan ne itajpal, wan te aka welik kalaki ijtik ne teupantzin hasta tamiket ne chikume inkukulis ne chikume tanawatiani.
16 Wan nikakik se tzajtzi tik ne teupantzin, kinhilwia ne chikume tanawatiani: "Shumet shikishtapachukan talchi ne chikume wajkal ipal ne ikwalan ne Teut."
2 Wan yajki ne achtu wan kishtapachuj ne iwajkal tik ne tal, wan kiski se chiraj sujsul teyek ijpak ne takamet ne kipiat ne ikwikwil ne tekwani wan ne mutankwaketzat iishpan ne itachialis.
3 Wan ne seuk kishtapachuj ne iwajkal ijtik ne weyat, wan muchijki esti ken ipal se mikini, wan muchi tay yultuk tik ne weyat mikik.
4 Wan ne yey kishtapachuj ne iwajkal tik ne ajapan wan ne ajapunian, wan muchijki esti. 5 Wan nikakik ne tanawatiani ipal ne apan ina:
"Taja tiyek, ne nemi wan ne nentuk,
ne yulchipawak ika ijkini tikchijki juzgar,
6 ika kikushinijtiwit iesyu
tayulmatit wan taketzanimet,
wan esti tikinmakatuk pal kiunit.
Yek ma kikwikan."
7 Wan nikakik ne tikashit ina:
"Ijkia Tajtzin, ne Teut ne muchi weli;
yekkaya wan melawak tay tikchiwa juzgar."
8 Wan ne nawi kishtapachuj ne iwajkal ijpak ne tunal, wan kimakaket ma weli kinkalatatia ne takamet iwan tit, 9 wan kalatataket ne takamet iwan wey tutunka, wan kukujtaketzket ne itukay ne Teut ne kipia tatuktilis ijpak ini kujkukulis, wan te muyulpataket nian inaket ka yaja wey.
10 Wan ne makwil kishtapachuj ne iwajkal ijpak ne ikuijpal ne tekwani, wan kiski ne intatekimakalis kunyua wan kichajchankwajket ne innenepil ipanpa ne yulpitzinilis, 11 wan kukujtaketzket ne Teut ipal ne ilwikak ipanpa ne inyulpitzinilis, wan ipanpa ne inchijchiraj, wan te muyulpataket ipanpa ne intejtekiw.
12 Wan ne chikwasen kishtapachuj ne iwajkal ijpak ne wey apan itukay Perat, wan ishwakik ne apan pal kiane muajshitia ne ujti ipal ne tatuktianimet ipal ne kan nesi ne tunal. 13 Wan nikitak kisat ijtik ne iten ne kuat majwey wan ne iten ne tekwani wan ne iten ne sankataketzani yey nawal te yejyek ken kajkalat, 14 ika yejemet inhijijiu nawalmet ne kichiwat sejse pal muishmati, wan kisat yawit tik ne talmet ipal muchi ne taltikpak kinsentepewat pal musumat tik ne wey tunal ipal ne Teut weli muchi: 15 "Niaw niwitz ken techtekini. Suertej yawi kipia ká ne kishpelwia wan tajpia ne ikwajkwach pal te yawi nejnemi petznaj wan yawit kitat ne iishpinawalis." 16 Wan kinsentepew né kan itukay Har-Megidon tik itaketzalis ne Yudayujmet.
17 Wan ne chikume kishtapachuj ne iwajkal tik ne ejekat, wan mukakik ka tik ne teupantzin ipal ne kuijpal tzajtzi se wan ina: "Muchijkia." 18 Wan takipinik wan tzalanik wan tikwinik, wan ulinik sujsul wey ken inte keman ulinik kwak nemia ne takat ijpak ne tal, pal tikmatit keski ulinik. 19 Wan ne weytechan muchijki yey takutun wan tepal tejtechan wetzket; wan ne Teut kielnamik ne wey Babelonia wan kimakak ne atiluni iwan ne atata pal ne ikwalan wey; 20 wan muchi ne ijislaj chulujket wan tejtepet intea muajsiket. 21 Wan shinik se wey tesijkwiltal, muchi ne tejtesijkwil ejetek katka ken se toneladaj, wan ne takamet kukujtaketzket ne Teut ipanpa ne kukulis ipal ne tesijkwiltal, ika yaja wey tetekia.
Ne wey Babelonia
17 Wan walaj se pal ne chikume tanawatiani ne kipiatuyat ne chikume wajkal, wan nechnutzki. Ina: "Shiwi, niaw nimetzilwitia ne juicioj ipal ne wey siwapala ne nemi muetztuk ijpak miak at; 2 iwan yajane tatzinhejenchijket ne tatuktianimet ipal ne taltikpak wan tawanket ne taltikpakchanejket iwan ne atata ipal ne itatzinhejenchiwalis." 3 Wan nechwikak ka kojtan iwan se iijiu.
Wan nikitak se siwat muetztuk ijpak se chiltik tekwani tentuk iwan kukujtaketzalis, ne kipiatuya chikume itzuntekun wan majtakti icachoj. 4 Wan ne siwat nemituya takentijtuk tik moradoj wan chiltik, wan kitalijtuya teukwit wan kujkusti wan pejperlaj, wan kipiatuya tik ne imey se atiluni ipal teukwit tentuk iwan sejse tay ijijyak, wan susul iwan ne itajtatzinhejenchiwalis, 5 wan ijpak ne ikwatapal muwawasujtuk: Ichtaka, ne wey Babelonia, ne inan ne siwapalamet wan muchi tay ijyak tik ne taltikpak. 6 Wan nikitak ne siwat tawantuk iwan ne inhesyu ne tayulmatit wan ne inhesyu yejemet ká taketztiwit ka imaku Yeshu. Wan nishpuyawik tetekia sea kwak nikitak.
7 Wan nechilwij ne tanawatiani:
"Taika tishpuyawik? Naja niaw nimetzilwia ne ichtaka ipal ne siwat wan ne tekwani ne kiwika ne kipia ne chikume itzuntekun wan ne majtakti icachoj. 8 Ne tekwani ne tikita nemik wan te nemi. Wan yawi tejku tik ne miktan, wan nemi pal puliwi. Wan ne taltikpakchanejket yawit ishpuyawit, ne intujtukay inte mujkwilujket ijpak ne amat yultuk kwak pejki ne taltikpak, ika kitat ne tekwani ne nemik wan te nemi, wan yaja nemi né. 9 Ka nikan ne tamatilis pal tikmatit.
"Ne chikume itzuntekun chikume tepet kan ne ijpak mutalia ne siwat. Wan nemit chikume tatuktiani: 10 ne makwil wetzket, ne se nemi, ne seuk inteuk walaj, wan kwak witz nemi pal naka sema chiupi. 11 Wan ne tekwani ne nemik wan te nemi, yaja ne chikwey, wan yaja se pal ne chikume wan yawi puliwi.
12 "Wan ne majtakti cachoj tikitztuk, yejemet majtakti tatuktiani, ne inteuk pejket tatuktiat. Melka uni, kikwit tatuktilis ken tatuktianimet ijtik se horaj iwan ne tekwani. 13 Muchi yejemet inat kenha, wan temakat ne intajpal wan ne intatuktilis iwan ne tekwani. 14 Yejemet yawit musumat iwan ne ichkakunetzin, wan ne ichkakunetzin yawi weli mas ika yajaya ne tajtzin ipal tajtzitzinmet wan ne tatuktiani ipal tatuktianimet, wan muchi ká iwan nemit munutztiwit wan muishpejpentiwit wan tayulmatit."
15 Wan nechilwia:
"Ne ajat ne tikitak kan mutalia ne siwapala, yejemet tejtechan wan mijmiaktal wan tajtaketzalis. 16 Wan ne majtakti cachoj ne tikitak, wan ne tekwani, yejemet yawit kishijiat ne siwapala, wan kishtilisket muchi tay kipia wan kiajkawasket petznaj, wan kikwasket ne inakayu wan kitatisket tik tit. 17 Ika ne Teut kintalilij tik inyujyulu ma kichiwakan tay yaja inatuk wan ma kichiwakan muchi kenha, wan ma temakakan ne intatuktilis iwan ne tekwani hasta ma yekawikan ne ipajpalabraj ne Teut. 18 Wan ne siwat ne tikitztuk ne wey techan ne kipia tatuktilis ijpak ne tatuktianimet ipal ne taltikpak.
18 Tipan nikitak ukse tanawatiani kisa ne ilwikak, waltemu iwan tatuktilis wey, wan ne tal mutawiluj iwan ne itzitzinakalis wey, 2 wan tzajtzik iwan ikupak hombron, ina:
"Wetzkia, wetzki ne wey Babelonia wan muchijtuk se muchantiluyan ipal kujkulmet, wan ne tetzakwiluyan ipal muchi ne nawalmet susul, wan ne tetzakwiluyan ipal muchi ne tujtutut susul, wan ne tetzakwiluyan ipal muchi ne tekwanimet susul wan ijyak; 3 ika ne atata ipal ne kwalan ipal ne itatzinhejenchiwalis muchi ne tejtechan kiunitiwit, wan iwan ne tatuktianimet ipal ne taltikpak tatzinhejenchijtiwit, wan ne tanamakanimet ipal ne taltikpak kitepewtiwit wey tumin ipanpa ne itaelewilis wey."
4 Wan nikakik seuk tik ne ilwikak ina:
"Nutechan, shikisakan ka né pal te ankikunpachiwat ne itajtateyekchijtuk, wan pal te anyawit kipiat ne kujkukulis kenha ken yejemet. 5 Ika ne itajtateyekchijtuk tepewtiwit hasta ne ilwikak wan ne Teut kielnamiktuk tay kichijket. 6 Shikwepilikan kenha ken yaja metzinmakak, wan tay ne yaja kichijki shikchiwilikan ume wipta. Tik ne atiluni ne kimalij yaja, shikmalikan ipal sujsul mas. 7 Keski muweychijki wan pajpakik ken kielewij, shiktashtawikan ashan iwan chichinakalis wan mutechtilis, ika yaja tik iyulu ina: Naja nikan nitatuktia, naja inte se siwat kipuluj ishulejyu, te keman niaw nimutechtia. 8 Yajika ijtik se tunal yawit ajsit ne ikujkukulisyu ipal mikilis wan mutechtilis wan mayan, wan yawi tata tik tit ika se hombron ne tajtzin Teut ne yawi kichiwa juzgar."
9 Wan ipanpa chukasket wan mutajtawelisket ne tatuktianimet ipal ne taltikpak ne iwan tatzinhejenchijtiwit wan pajpakitiwit kwak kitat ne pukti kan tata 10 wan nakasket wejka ika majmawit ipanpa ne ichichinakalis, wan inasket:
"Ay ne weytechan pal ne wey Babelonia,
techan hombron,
ka ijtik se horaj walaj ne ijuicioj!"
11 Wan ne tanamakanit ipal ne taltikpak chukasket wan mutajtawelisket ipanpa, ika intea aka kinekis kikua ne ikimil, 12 ne ikimil tentuk iwan teukwit wan tumin, wan kujkusti wan pejperlaj, wan muchi ne gajgalantzin kwajkwachti moradoj wan chiltik wan sedaj, wan muchi ne ushit, wan muchi ne tajtaijtik ipal marfil wan muchi ne tajtaijtik ipal kwajkwawit wey ipatiw wan ipal tumin wan tepusti wan teskal, 13 wan canelaj wan shuchiajwiak wan tapupuch wan ushit wan kupal wan atata wan tumakka wan harinaj wan trigoj wan bujburroj wan ichkamet, wan ikimil ipal cajcaballoj wan cajcarroj wan inwejweyka sejse, wan nusan inhajalmaj takamet.
14 "Wan yajki n' itakil uksik
ipal n' itaelewilis ne mualmaj,
wan metzajkaw muchi
tay tzupelek wan yektzin,
wan tea keman yawit kiajsit."
15 Ne tanamakanit ne kinamakat muchi uni, ne kitepewket wey tumin iwan uni, nakasket wejka ika majmawit ipanpa ne chichinakalis, wan chukat wan mutajtaweliat, 16 inat:
"Ay ay, ne techan wey
takentijtuk tik kwajkwachti moradoj wan chiltik,
ne kiekchijket iwan teukwit,
kujkusti wan pejperlaj,
17 ika ijtik se horaj puliwik muchi ipatiw.
Wan muchi ne cajcapitan wan ne yawit ijtik bajbarcoj wan atakamet, wan muchi ká tekitit ijpak ne weyat, nakaket wejka, 18 wan pejket tzajtzit kwak kitaket ne pukti kan tatak, inat:
"Katiawel kenha ken ne techan wey!"
19 Wan kitamutaket tewti ijpak ne intzujtzuntekun wan tzajtzit wan chukat wan mutajtaweliat inat:
"Ay ay, ne techan wey
kan ne kitepewket wey tumin
muchi ne kipiat se barcoj tik ne weyat
ipanpa ne ipatiw wey,
ika ijtik se horaj puliwik."
20 Ilwikak, shimuyulkwesu ipanpa ini,
wan ne tayulmatit wan ne tijtitanijtuk wan ne taketzanimet,
ka itech yajane ne Teut metzintzunkwijtuk.
21 Wan se tanawatiani hombron kiajkukij se tet ken se wey metat wan kitamin tik ne weyat, wan ina:
Ijkiuni mutamimas Babelonia,
ne techan wey,
wan intea keman yawi muajsi,
22 wan guijguitirraj wan musicaj,
ne pifanoj wan ne trompetaj
intea keman yawit mutzutzunat ijtik taja,
wan nusan ijtik taja inte yawit muajsit
tekitinimet ipal muchi ne tejtekitilis,
wan nusan intea keman yawi mukaki ijtik taja se metat,
23 wan tea tajtawis ijtik taja
tawil tik se tawilkal,
wan tea mukakis ijtik taja
munamiktiat se munti wan isiwaw,
ika ne tanamakat muchijket
ne wejwey ipal ne taltikpak,
ika iwan ne mukukuchpaj
mushijshikujket muchi ne tejtechan,
24 wan ijtik yaja muajsik
iesyu taketzanimet wan tayulmatit
wan muchi ne mumiktijtiwit
nujme ne taltikpak.
Ne Bibliaj Tik Nawat · © 2008, 2012 Jan Morrow