Chronological

1 Naja, Pawlo, ititanijtuk ne Mawaltijtuk Yeshu ipanpa itaelewilis Teut ipanpa ne promesaj ipal yulkwilis ijtik ne Mawaltijtuk Yeshu, ² niktuktia ini tajkwilul itech Timoteo nukunew tasujtatuk. Ma metzinmakakan ne Teut tuteku wan ne Mawaltijtuk Yeshu tutajtzin tetasujtalis, tepalewilis wan nejmachnemilis.

³ Tashtawi ne Teut, ká ipal naja wan nunoywan pal ikman titekitit iwan chipawak tasenmatilis, ken inte nimukawa nimetzelnamiki kwak niktajtani ne Teut ka tayua wan ka tunal. ⁴ Nikelewia nimetzita ika nikelnamiki ken tichukak, pal nitemi iwan pakilis. ⁵ Nikelnamiki ne yekkaya tayulmatilis ijtik taja, ne nemik achtu ijtik ne munoya Lois wan ne munan Ewnike, wan nikmati ka nusan ijtik taja.

⁶ Yajika nimetzelnamiktilia ma mimilaka ne itetakulis ne Teut ne muajsi ijtik taja ika niktalij nujnumey mujpak, ⁷ ika ne Teut tesu techmakatuk se tuijiu ipal mawi sute se tuijiu ipal tutajpal wan tetasujtalis wan pal tikpiat yek tutzuntekun.

⁸ Yajika, maka shishpinawa ipanpa ne taneshtilis ipal ne Tutajtzin nian nupanpa naja, ne iilpituk; shikeku tay te yek taja nusan ka imaku ne yeknawatilis iwan itajpal Teut. ⁹ Yaja techmakishtijtuk wan technutztuk iwan itanutzalis Teut, tesu ipanpa tay tejemet tikchijtiwit sute ipanpa itajshitilis wan itetasujtalis ne techmakak ipanpa ne Mawaltijtuk Yeshu kwak intea pejtuya muchi, ¹⁰ wan ashan muneshtija ika walaj ne tutamakishtiani ne Mawaltijtuk Yeshu, ká ne kipulua ne mikilis wan kitawilua ne nemilis wan yulkwilis pal senpa ipanpa ne yeknawatilis ¹¹ ne ipal nechtalijtuk ken tanawatiani wan titanijtuk wan tamachtiani, ¹² wan yajika nusan nitaekua; melka uni te nishpinawa ika nikishmati ne nikyulmattuk wan nikmati ka weli tajpia ne nutalilijtuk hasta uni tunal. ¹³ Shikwi ken ejemploj ne yejyek palabraj ne tikakik nutech iwan tayulmatilis wan tetasujtalis ne nemi ijtik ne Mawaltijtuk Yeshu. ¹⁴ Shitajpia ne yek talilijtuk iwan ne Ijiutzin ne muchantia ijtik tejemet.

¹⁵ Tikmati ken nechajkawtiwit muchi tik Asia; ijtik yejemet, Pugelos wan Hermogenes. ¹⁶ Ma kinpalewi ne Tajtzin muchi ichan Onesiporos ika seujseujti nechpalewij wan te ishpinajki ipanpa ne nutejtepusilpika; ¹⁷ kwak nemik tik Roma munelwij nechtemua wan nechajsik. ¹⁸ Ma kiajkawa ne Tajtzin ma kiajsi tepalewilis itech ne Tajtzin tik uni tunal, wan tikmati yek keski tekit kichijki tik Epesos.

2 Taja tel, nukunew, shichikawaya iwan ne tetasujtalis ne nemi ijtik ne Mawaltijtuk Yeshu, ² wan tay ne tikaktuk nutech tik itachialis miak, uni shikinhilwi takamet ne tayulmatit pal kiane yejemet nusan welit kinmachtiat sejseuk.

³ Shitaeku taja nusan ken se yek tasumani ipal ne Mawaltijtuk Yeshu. ⁴ Se tasumani te keman mukwelpachua ijtik ne tay kichiwat muchi ne takamet, pal kiane weli kipaktia ne kitekimaka. ⁵ Nusan se mutaluani su te muishnamiki ken muneki, te yawit kimakat premioj. ⁶ Ne talchiwani ne kujkutia, nemi pal kiejekua ne itakil ne achtu. ⁷ Shikejketza tay ne nina, ika ne Tajtzin metzmakas tamatilis tik muchi.

⁸ Shikelnamiki ka Yeshu Mawaltijtuk muyulkwij kwak miktuya, ne ishinach Dawid, ken ina ne nuyeknawatilis. ⁹ Melka nitaekua ipanpa hasta ma nechilpijtiwit ken se tateyekchiwani, inte weli muilpia ne ipalabraj ne Teut. ¹⁰ Neka nikselia muchi ka inmaku ne ijishpejpentuk, pal kiane yejemet nusan yawit kipiat tamakishtilis ne nemi ijtik ne Mawaltijtuk Yeshu pal senpa tzitzinaka. ¹¹ Ini tejkia, ka:

¹⁴ Muchi ini shikinhelnamiktili wan shikinnawati tik itachialis ne Teut ma inte musumakan iwan pajpalabraj: te techpalewia pal tatka, sema pal muishtapachuat ne takakit. ¹⁵ Shimutatemuili pal tikisa iishpan ne Teut ken yaja kita yek, ken se tekitini ne te kipia taika ishpinawaskia, ne tamachtia ken melawak ne yekkaya palabraj. ¹⁶ Shikajkawa muchi tay tajtaketzat ne te kipia ipatiw, ika itech semaya yawi kisa mas tay teyek, ¹⁷ wan ne tay taketzat yawi mulini ken se gangrenaj. Uni muchijki iwan Humenayos wan Piletos, ¹⁸ ká ne kiajkawtiwit ne ujti ipal ne tejkia ika inat ka ne muyulkwepalis muchijkia, wan inpanpa tea tayulmatit sejse. ¹⁹ Melka uni, ne yek tetzilnaj ipal ne Teut naka ejkatuk wan kipia ini ken selloj: "Ne Tajtzin kishmati ká ne ipal", wan nusan: "Ma te kichiwakan tay teyek muchi ká kitukaytiat ne itukay ne Tajtzin".

²⁰ Tik se wey kal, te nemit semaya tajtaijtik ipal teukwit wan tumin, nusan nemit sejseuk ipal kwawit wan sukit, sejse ipal honor wan sejse inte. ²¹ Yajika tel, su se muishtilia ne tay te yejyek, yaja muchiwas se taijtik ipal honor, teuchijtuk, ne kipia ipatiw ipal ne itekuyu, ekchijtuk ipal muchi ne itekiw yejyek.

²² Shichulu itech ne intajtaelewilis piltzinmet; shiktemu tamelakchiwalis, tayulmatilis, yek, nejmachnemilis iwan yejemet ká kinutzat ne Tajtzin iwan inyujyulu yek. ²³ Maka shikaki ne intajtajtanilis ne melemet wan ne te kimatit tatka ika tikmati ka kichiwat kwajkwalan. ²⁴ Itekitini ne Tajtzin te nemi pal kwalani sute muneki ma muwika yek inwan muchi, ma kinmachti, ma kiseli melka te yek; ²⁵ ma kinhiskali iwan yulyamanikayu ne inte kinekit, wan anka ne Teut yawi kinmaka yulpatalis pal kishmatit ne tejkia, ²⁶ wan pal nejmachnemit wan pal chuluat tik ne itajpewal ne Tamintuk, ká ne kintilan ika yajuni kielewij.

3 Shikmati ini: ka tik ne tijtipan tunal walasket ujuij tiempoj, ² ika ne takamet yejemetsan insel mutasujtasket, muchiwasket tuminhelewianit, muweytenewasket, muweymatisket, kukujtaketzasket, te kitakamatisket intejteku, te inasket panpadiush, kichiwasket tay te muneki, ³ te kipiasket tetasujtalis, te kinekisket sentajtaketzat, tatejtenewasket, muajkawasket, muwikasket ken tekwanimet, te kielewisket tay yek, ⁴ muchiwasket temakanimet, tzunhejekamet, tzujtzunsuluntuk, sejse sema kinekit mukwesuat wan te kitasujtat ne Teut, ⁵ sejse kipiat tachialis ipal yek wan te kinekit kipiat itajpal. Maka shikpia tatka inwan.

⁶ Ijkiuni nemit ne kalakit tik ne kajkal wan kikwit ijilpituk siwatzitzin tajtakimiltijtuk iwan tajtateyekchijtuk ika ankakeski taelewilis kinwikatiwit. ⁷ Senpa mumachtiat nemit wan te keman welit ajsit ne yekkaya taishmatilis. ⁸ Ken Yanes wan Yambres ne kinajnankilijket Moshe, ijkiuni yejemet nusan nankilijket iishpan ne tejkia. Wilewik ne intamatilis, te yejyek pal tayulmatit. ⁹ Tea yasnekit inhishpan, ika muchi kimatisket ne inkwalan, ken muchijki iwan ne sejseuk.

¹⁰ Taja tikishmati yek nutamachtilis, numuwikalis, nutajshitilis, nutayulmatilis, nuweytejchialis, nutetasujtalis, nutanejmachselilis, ¹¹ ken nechtalultijtiwit wan ken nitaekujtuk tay muchijtuk nuwan tik Antiokea, tik Ikonion, tik Lustra. Muchi uni nitaekujtuk wan ne Tajtzin nechpalewij. ¹² Wan muchi ká kinekit nemit ken yek iwan ne Mawaltijtuk Yeshu, mutalultisket. ¹³ Takamet te yejyek wan tashijshikuanimet yawit mukwepat mas te yejyek; tashijshikusket wan mushijshikusket.

¹⁴ Taja tel shinaka iwan tay ne timumachtijtuk ika tikmati ká itech timumachtij, ¹⁵ wan hasta kwak tishulut katka tikmatki ne amamatilis ipal ne teupan ne weli metzmachtia ken welit timumakishtiat iwan tayulmatilis ipal ne Mawaltijtuk Yeshu. ¹⁶ Muchi tay ijkwilujtuk walaj itech Teut wan techpalewia pal titamachtiat, pal tikajsit tajtaika, pal tikmelawat tay muneki, pal titanawatiat tay yek, ¹⁷ pal muajshitia wan nemi ekchijtuk ne takat ipal ne Teut pal kichiwa muchi ne itekiw yek.

4 Nimetznawatia tik itachialis ne Teut wan ne Mawaltijtuk Yeshu ne yawi kichiwa juzgar ne yujyultuk wan ne miktiwit, wan nimetznawatia ipanpa ne imuneshtilis wan ne itatekimakalis: ² shiknajnawati ne palabraj; shikchiwa tay muneki su ne horaj yek wan nusan su te. Shiteajwa wan shimutajtaweli iwan weytejchialis wan tamachtilis senpa, ³ ika yawi ajsi ne horaj kwak te yawit kichiwiliat casoj ne yejyek tamachtilis; yawit kichiwat tay kinekit wan insel kintalisket tamachtianimet pal kikakit tay ne kinekit takakit; ⁴ yawit kishkwepat intakakilis, pal kiane te takakit ne tejkia sute sema cuejcuentoj. ⁵ Taja tel shinejmachnemi tik muchi; shikeku ne tay te yek; shikchiwa itekiw se tayeknawatiani wan ne itekitilis nusan shikchiwa yek.

⁶ Nuesyu yawia mushinia wan witzaya ne tunal pal niajkewi. ⁷ Nitasuntuk ne yek tasumalis, niktamij ne nutekiw, nitajpishki ne tayulmatilis; ⁸ ashan nechchia ne yawal ipal tamelakchiwalis ne yawi nechmaka ne Tajtzin, ne yek juez, tik uni tunal; tesu naja nusel, muchi ne kitasujtatiwit ne imuneshtilis.

⁹ Shimutatemuili pal tiajsi nutech talul, ¹⁰ ika Demas nechajkawtuk; sujsul kitasujta ne taltikpak pal ashan wan yajtuk tik Tesalonika, Kreskes tik Galatia, Titus tik Dalmatia. ¹¹ Nuwan naka isel Lukas. Shikwi Marcus wan shikwika muwan, ika nechpalewia sujsul iwan ne tekitilis. ¹² Niktitanijtuk Tukikos tik Epesos. ¹³ Ne nutaken ne nikajkaw tik Troyas ichan Karpos shalwika kwak tiwitz, wan ne ajamat, wan tay mas muneki, ne ajamatzitzin.

¹⁴ Aleksandro ne kashchiwani nechchiwilijtuk miak inteyek. Ma kitashtawi ne Teut ipanpa tay kichijtuk. ¹⁵ Taja nusan shikishpelwi, ika sujsul kinankilij ne tupajpalabraj.

¹⁶ Tik ne nuachtu juicioj, te aka ajsik nechpalewia, muchi nechnaktijket. Ma te mupua pal tashtawiat! ¹⁷ Ne Tajtzin nechpalewij wan kichijki ma nichikawaya pal kiane weli yekawi ne tanajnawatilis wan pal takakit muchi ne tejtechan. Wan nimumakishtij itech iten ne tekwani. ¹⁸ Ne Tajtzin yawi nechmakishtia itech muchi tay yawi muchiwa tay te yek, wan yawi nechtajpia ipal ne itatekimakalis tik ne ilwikak. Ma inakan ka wey senpa wan senpa, amen.

¹⁹ Shiktajpalu Prisca wan Aquila wan muchi ichan Onesiporos. ²⁰ Erasto nakatuk tik Korinto. Nikajkaw Tropimos tik Miletos ika kukuya. ²¹ Shimutatemuili pal tiwitz kwak teuk ajsi ne shupan. Metztajpalua Ewbulos wan Pudes wan Linos wan Claudia wan muchi ne tukniwan. ²² Ma nemi ne Tajtzin iwan ne muijiu. Ma nemi ne teutasujtalis anmuwan.