Chronological
Tik Kipre
13 Nemiket tik ne Sennemit tik Antiokea taketzanimet wan tamachtianimet: Bar-Naba, wan Shimon ne muilwia Tiltik, wan Lucius ipal Kurene, wan Menajem ne takutuntuktiani ipal Herodes. 2 Yejemet tekitit katka ipal ne Tajtzin wan kisejseliat katka mayan. Kwakuni ne Ijiutzin inak:
—Shalinkupewakan nupal ne Bar-Naba wan ne Shaul ipal ne intekiw ne ipal nalinnutztuk.
3 Kwakuni, kwak tamiket kisejseliat mayan wan kinujnutzat ne Teut wan kinteuchiwat, kintitanijket.
4 Ijkiuni tel, kwak ne Ijiutzin kintitanij, yajket Seleucia wan ka né kisket tik se barcoj pal yawit Kipre. 5 Wan kwak ajsiket Salamis, pejket tanawatiat ne ipalabraj ne Teut ijtik ne kajkalsennemit ipal ne Yudayujmet. Nusan kipiatuyat Yojan pal tekiti inwan. 6 Kwak panutiwit ijtik muchi ne islaj ipal Kipre hasta ajsiket Papos, kiajsiket se takat Yudayuj ká magoj wan tashijshikuani itukay Bar-Yeshu 7 ká nemituya iwan ne itepalewiani ne tatuktiani, Sergio Pawlo, se takat mumachtijtuk wey. Yajini kalinnutzki Bar-Naba wan Shaul ika kielewij takaki ne ipalabraj ne Teut. 8 Elumas ne magoj (ika ini kineki ina ne itukay) inte kinekituya kinhajkawa, wan mutatemulia katka kishkwepa ne tatuktiani pal inte tayulmati.
9 Shaul, ká nusan yaja itukay katka Pawlo, tentuk iwan ne Ijiutzin, tachishki 10 wan kilwij:
—Ay! Taja titentuk iwan teshijshikulis wan tajtajpewal! Tiikunew ne Tamintuk! Tikneki tikijtakua tay yek! Senpa tikmajmalia ne mejmelawak ujti ipal ne Tajtzin! 11 Wan ashan shikita imey Tajtzin mujpak wan timuchiwas pupuyut. Intea tikitas ne tunal hasta se ratoj.
Wan nemanhachin kiski se icatarataj wan ne itachialis kunyuakiski, wan pejki nejnemi nujme kitemua ká kimakaskia se imey pal kiwika. 12 Kwakuni ne tatuktiani kitak tay panutuk wan tayulmatki, wan ishpuyawik ipanpa ne tamachtilis ipal ne Tajtzin.
Tay inak Pawlo tik Antiokea Pisidia
13 Pawlo wan ne kiyawaluat kalakket tik ne barcoj wan kisket Papos, wan ajsiket Perga tik Panpulia. Yojan kinhajkaw wan mukwepki Yerushalem. 14 Ne sejseuk kisket Perga wan ajsiket ka Antiokea Pisidia. Wan kalakket ijtik ne sennemit tik ne tunal ipal sewilis, wan mutalijket. 15 Kwak tamiket amataketzat tay ina tik ne Tajtuli wan ne Taketzanimet, ne sennemituktianimet tatuktijket intech inat:
—Tukniwan, asu ankipiat tatka pal ankilwiat ne techan pal ankipalewiat, shinakan.
16 Muketzki Pawlo wan taishnutzki iwan ne imey, wan inak:
—Nukniwan ipal Israel wan kitakamatit ne Teut, shitakakikan: 17 ne Teut ipal ini techan ipal Israel kinhishpejpen ne tunoywan, wan kiajkukij ne techan kwak nemik tik Egipto, wan kinhishtij iwan itajpal imajkul, 18 wan kiekuj muchi tay kichiwat anka unpual shiwit tik ne kojtan. 19 Wan kintajkal chikume techan tik ne tal ipal Kanaan ma tikpiakan muchi ini tal tupal, wan techmakak 20 ijtik nawtzunti-unpual-majtakti shiwit, wan tipan kinmakak juejjuezmet hasta ne taketzani Shamuel; 21 wan kwakuni kinekiket se tatuktiani, wan ne Teut kinmakak ne Shaul ikunew Kish, se takat ipal ne tribuj ipal Ben-Yamin, ijtik unpual shiwit; 22 wan kwak kishtij, kiskalij inpal ne Dawid ken tatuktiani wan inak:
"Nikajsituk Dawid ikunew Yeshay, takat ne nikita yek ká kichiwas muchi tay nikelewia."
23 Ne Teut kishtij tik ne ishinach yajuni, ken inatuya ka yawi kichiwa, se tamakishtiani ipal Israel: Yeshu. 24 Yojan tanajnawatij ka yawi witz wan kilwij ne techan ipal Israel ma mumaka ulyuj ipal yulpatalis. 25 Kwak yekawi ne itekiw Yojan, inak:
"Tay ne ankikejketzat ka naja né, inte naja. Yawi witz se nuipan ká naja inte niyek nian pal niksutuma ne ikak."
26 Nukniwan, ijishwiu Abraham wan ne kitakamatit ne Teut ijtik anmejemet, tutech mutuktij ne palabraj ipal ini tamakishtilis, 27 ika ne muchantiat tik Yerushalem wan ne intajtatuktiani inte kishmatket, wan kichijket ma yekawi tay inat ne taketzanimet wan tay amataketzat muchi ne sejsewilis, ika kitenejket, 28 wan melka inte kiajsiket taika mikiskia kitajtanket Pilatus ma kimikti. 29 Kwak kitamijtuyat muchi tay muijkwiluj ipanpa, kikutemultijket wan kitalijket ijtik se shaput. 30 Mikik wan ne Teut kiyulkwiltij, 31 wan ijtik sejse tunal kenhayuk kitaket ne nejnentuyat iwan tik Galilaya wan senyajtuyat Yerushalem, ká ne ashan kineshtiliat ne techan. 32 Wan tejemet timetzinmakat ne yeknawatilis ka ne sentaketzat ne muchijki iwan ne noymet 33 tamik yekawi ipal ne inhijishwiu ika ne Teut kiketzki Yeshu ijkiunisan ken muijkwilujtuk tik ne Salmoj Ume:
"Taja tinukunew, tik ini tunal nimetzpunijtuk."
34 Ika mikik wan kiketzki pal intea mukwepa palani; yajika inak ka:
"Nimetzinmakas ne tay yek ipal Dawid."
35 Neka ina nusan tik ukse salmoj:
"Inte tikajkawas ma pewa palani ne mupal ká yek."
36 Ika kwak Dawid tamik tekiti ipal ne ipunilis, ne Teut kichijki ma kuchi, wan yaja yajki itech inoywan, wan palanik. 37 Ká ne kiyulkwiltij ne Teut inte palanik. 38 Shikmatikan tel, nukniwan, ka ipanpa yajini metzinnawatiliat tetapupulwilis ipanpa tay ankichijtiwit tay teyek, wan tik muchi tay inte welit metzinhilwiat ka nemi yek tay nemi tik ne tajtuli ipal Moshe, 39 muchi ká tayulmatit muilwiat ka nemi yek. 40 Yajika, shiktalikan cuidadoj ma inte ejku anmutech tay inatiwit ijtik ne taketzanimet:
41 "Shikitakan teijilwianit, wan shishpuyawikan wan shipuliwikan! Ika naja nikchiwa se nutekiw tik ini tujtunal wan anmejemet inte tayulmatit melka se metzinneshtilia."
42 Kwak kisket tik ne kalsennemit, pejket mutajtaweliat inwan ma tanutzakan ipanpa ini ne tunal witz ipal sewilis. 43 Kwak tamik musentalua ne sennemit, yajket inwan Pawlo wan Bar-Naba miak ipal ne Yudayujmet wan ne tayulmatit ká walmupatatiwit, wan kinnutzket wan kinhilwijket ma nakakan tik itetasujtalis ne Teut.
44 Ne ukse sewilis, ajatzika muchi ne techan musentepew takaki ne ipalabraj ne Teut. 45 Ne Yudayujmet, kwak kitaket ne miaktal, kwalanket wan kishtenewat katka tay ina Pawlo wan kukujtaketzat, 46 wan ne Pawlo wan ne Bar-Naba tanawatijket melaknaj, inaket:
—Muneki katka achtu ma metzinhilwikan ne ipalabraj ne Teut. Anmejemet inte kinekiket wan anmuilwijket ka inte anhajsit pal ma shiyujyultuk senpa; yajika ashan timuishkweptiwit intech ne tepal tejtechan, 47 ika ijkini techtuktij ne Tajtzin:
"Nimetztalijtuk nikan ma shikintawilu ne tejtechan,
ma shikwika tamakishtilis ka nujme ne tal."
48 Ne tejtechan takakket wan pakiket wan inaket ka wey ne ipalabraj ne Tajtzin, wan tayulmatket muchi ká yawit yujyultuk senpa.
49 Muwikak ne ipalabraj ne Tajtzin nujme uni tal. 50 Ne Yudayujmet kinkumuntijket ne siwatket ne tayulmatit wan yejyek, wan ne achtumet ipal ne techan, wan kichijket ka kiejekujket Pawlo wan Bar-Naba wan kinhishtijket tik uni tal. 51 Yejemet kitzejtzelujket ne tejti tik ne inhijikshi wan yajket ka Ikonion, 52 wan ne mumachtianimet pajpakiket wan mutenket iwan Ijiutzin.
Tik Ikonion
14 Tik Ikonion, kalakket ne ujume ijtik ne kalsennemit ipal ne Yudayujmet, wan kwak tanutzket, tayulmatket miak ipal ne Yudayujmet wan miak ipal Grecia.
2 Ne Yudayujmet ne inte tayulmatit kinkumuntijket ne uksejse techan wan kichijket ka kitenejket ne tukniwan. 3 Yajika, yejemet nakaket tanawatiat melaknaj ipanpa ne Tajtzin miak horaj, wan ne Tajtzin kiajkaw ma mumati ne palabraj ipal ne itetasujtalis wan tamakak sejse pal muishmati tetekia sea intech yejemet.
4 Mutakutuntijket muchi ijtik ne techan, wan mutalijket ne sejse inwan ne Yudayujmet wan sejseuk inwan ne tijtitanijtuk. 5 Kwak ne sejseuk techan wan ne Yudayujmet inwan ne intajtatuktiani pejket kinhijilwiat wan kinekituyat kintejtemimat, 6 mumakaket cuentaj wan chulujket hasta ne tejtechan ipal Lukaonia: Lustra wan Derbe wan ne tajtal unisan; 7 wan tayeknawatijket yajket ka ikuni.
Tik Lustra
8 Wan tik Lustra nemituya muetztuk se takat inte kipia yek ne ijikshi, ne kukuyaya kwak kiski ijtik ne iijti ne inan wan inte keman nejnentuk. 9 Yajuni kikakik ne Pawlo tanutza. Pawlo tachishki wan kitak ka ne takat kimati tik iyulu ka weli yektia, 10 wan kitzajtzalij:
—Shimuketza melaktik ijpak mujmukshi!
Wan tzikwinik wan pejki nejnemi. 11 Kwak muchi kitaket tay kichijtuya Pawlo, pejket tzajtzit tik ne taketzalis ipal Lukaonia, inat:
—Ne teujteut temutiwit tutech tik intachialis takamet!
12 Wan yejemet kinutzket ne Bar-Naba Zeus (ne itukay ne mas wey ipal ne inteujteut), wan ne Pawlo kilwijket Hermes, ne wey tanutzani. 13 Wan ne palej ipal Zeus ká nemituya iishpan ne techan kalwikak ujukichwakashmet wan shujshuchit itech ne tenkal, wan iwan muchi kinekituya kintakulia.
14 Wan kwak takakket ne tijtitanijtuk Bar-Naba wan Pawlo kitapanket ne inkwajkwach wan kisket mutaluat wan tzajtzit, 15 wan inat:
—Tajtzitzinmet, taika ankichiwat muchi ini? Tejemet nusan timumatit kenha ken anmejemet wan timetzinyeknawatiliat ma shimuishkwepakan, ma shikajkawakan ini tay inte tatka wan ma shikwikan ne Teut yultuk ká kichijki ne ilwikak wan ne tal wan ne at wan muchi tay nemi ijtik yejemet; 16 ká melka kiajkaw ma yawikan muchi ne tejtechan pal ikman sejse tik ne iuj, 17 yaja kia muneshtij ika kichiwa miak tay yek: anmupal kichiwa ka kisa tik ne ilwikak ne at wan ka wetzi tik ne tal, wan ka witz ne shupan kalwika ne itajtakil; yaja metzintepewilia anmutakwal wan ne ipakilis ne anmuyujyulu.
18 Wan melka inat ijkiuni, uij ma kichiwakan ma inte kimiktikan pal kintakuliat. 19 Kisket Antiokea wan Ikonion Yudayujmet wan walejkuket wan kinhilwijket muchi ma kitejtemimakan ne Pawlo. Kwakuni kitilanket Pawlo ika kimatit ka yaja miktuk, wan kishtijket tik ne techan. 20 Kwak ne mumachtianimet kiyawalujket, yaja muketzki wan kalak ijtik ne techan.
Wan ne ukse tunal, kiski iwan Bar-Naba wan yajket ka Derbe.
Mukwepa ka Antiokea
21 Kwak tamiket tayeknawatiat tik uni techan wan kichijtuyat miak mumachtiani, mukwepket Lustra wan Ikonion wan Antiokea. 22 Kinpalewiat katka ne mumachtianimet pal chikawayat ne inyujyulu wan kintajtanit ma inte kielkawakan ne intayulmatilis, wan inat ka tinemit pal tipanut tik miak penaj ma tiajsikan ne itatekimakalis ne Teut. 23 Tik muchi ne sejsennemit kintukaytijket nojnoymet, wan kinujnutzket ne Teut wan kisejselijket mayan wan kinhishpanujket ká kiyulmatket ipal ne Tajtzin.
24 Wan panuket ijtik Pisidia wan ajsiket tik Panpulia, 25 wan kwak tamiket tanutzat ipanpa ne palabraj tik Perga, temuket ka Atalea, 26 wan ka né kisket tik se barcoj wan ajsiket Antiokea, yaja ne techan kanka achtu mutemakatuyat iishpan ne Teut, tik ne itetasujtalis, ipal ne intekiw ne kichijket.
27 Ajsiket tel wan kisentepejket ne sennemit, wan pejket taneshtiat muchi tay kichijtuk ne Teut intech wan ken kintapuilij ne tejtechan ne itenkal ne tayulmatilis. 28 Nakaket miak tunal iwan ne mumachtianimet.
Ne Bibliaj Tik Nawat · © 2008, 2012 Jan Morrow