Chronological
1 Yek, Teopilos, achtu nimetzilwija muchi tay pejki kichiwa wan tamachtia ne Yeshu 2 hasta ne tunal kwak tamik kintuktia ne tijtitanijtuk iwan ne Ijiutzin, ne yaja kinhishpejpentuya, wan mukwij ka ikajku. 3 Nusan muishpanuj yultuk kwak tamik taekua wan kinmakak miak pal kimatit, wan muilwitij inhishpan ijtik unpual tunal wan tanutza ipanpa ne itatekimakalis ne Teut, 4 wan kwak musenputzua inwan, kintuktij:
—Maka shikisakan Yerushalem; shikchiakan ne isentaketzat ne Teut ne annechkaktiwit. 5 Ika Yojan tamakak ulyuj iwan at. Anmejemet yawit anmumakat ulyuj iwan ne Ijiutzin.
6 Ne musentepejtiwit kitajtaniliat:
—Tajtzin, tik ini tujtunal tiaw tikektalia ne tatekimakalis ipal Israel?
7 Kinhilwij:
—Inte anmutekiw ma shikmatikan ne tujtunal wan shijshiwit tay ne Teteku weli wey kitalijtuk pal muchiwa; 8 san ankikwisket anmutajpal kwak ejkutuk anmutech ne Ijiutzin, wan anmuchiwasket sejse pal kimatit tik Yerushalem wan ijtik muchi Yudaya wan Shamarea wan nujme ne tal.
9 Wan kwak tamik ina ini, muajkukij tik intachialis wan se mishti kitejkultij wan tea kitaket, 10 wan kwak nakat tachiat kan yajtuk ka ilwikak, né innawak kisket ume takat kipiat inkwajkwach istak, 11 wan inaket:
—Takamet ipal Galilaya, taika annemit tachiat ilwikak? Ini Yeshu ká mukwijtuk ka ikajku ilwikak anmuishpan, ijkiuni yawi witz ken ankitztiwit yawi ilwikak.
12 Kwakuni kisket ne tepet inawak Yerushalem itukay Olivajtepet wan mukwepket Yerushalem, se ujti ipal Sewilis, 13 wan kwak kalakket tejkuket tik ne cuartoj kan ne muchantiat katka Pedro wan Yojan wan Yakob wan Andreas Pilipo wan Tomas Bar-Tolmay wan Matay Yakob Halpay wan Shimon ne Zelotes wan Yuda ikunew Yakob. 14 Muchi yejemet ken sesan mutalijket kichiwat teutajtanilis iwan ne siwatket, wan ne Maryam ne inan Yeshu, wan ne iikawan.
Kishpejpenket Matia
15 Wan tik uni tujtunal muketzki Pedro tatajku ne tekniwan wan inak, wan nemituyat takamet wan siwatket kan yaja nemituya achka chikwasen pual:
16 —Nukniwan: nemik pal yekawi tay nemi ijkwilujtuk, tay ne inak ne Ijiutzin ka yawi muchiwa itech iten Dawid ipanpa Yuda, ká ne muchijki ne kintekimaka ne kitzkijket Yeshu, 17 ika yaja mupua katka itzalan anmejemet wan kiski ka kipiatuya uni itekiw. 18 Yek, yajuni kikujki se tal iwan ne ipatiw ne tay kichijki inteyek, wan kuwetzki tik itzuntekun wan tapanik tik itajku ne iweyka wan mushinijket muchi iyujyulmekaw, 19 wan muchi ne Yerushalem chanejket kimatket, yajika uni tal muilwia tik intaketzalis Hakal-Dema, kineki ina Esmil, 20 ika muijkwilujtuk tik ne amat ipal ne sajsalmoj:
"Ma inte takati tatka né ichan
wan ma inte kipia aka ikal ka né"
wan:
"Ma kikwi ukseuk ne itapachiwilis."
21 Yajika, ijtik ne takamet ne musentepejtiwit tuwan tik muchi ne tujtunal kan walajtuk wan yajtuk ne Tajtzin Yeshu, 22 pewa kwak kimakak ulyuj ne Yojan wan hasta ne tunal kwak techajkaw, ma muchiwa se yejemet se pal ma mumati ka Yeshu muyulkweptuk.
23 Wan kitalijket ume: Yosep ne muilwia Bar-Saba ká itzuntukay Yustus, wan Matia, 24 wan kinujnutzket ne Teut, wan inaket:
—Tajtzin, taja tikmati tay kipiat muchi tik inyujyulu, shikilwiti katiawel tikishpejpentuk ijtik ne inhumeshtin 25 pal kikwi ini itekiw wan pal muchiwa titanijtuk ipatka Yuda ká kiajkaw pal yawi ka ukse ipuestoj.
26 Wan kinmakaket chivos wan kiski ka Matia, wan kipujket ijtik ne majtakti-se titanijtuk.
Ne tijtitanijtuk mumakaket ulyuj iwan ne Ijiutzin
2 Wan kwak ajsik ne ilwit ipal ne Tunal Unpual Majtakti, kenhaya sennemituyat ka né muchi, 2 wan nemanhachin mukakik tzalani ka ilwikak kenha ken kalwikaskia se ejekat tapitza iwan fuerzaj, wan temik muchi ne kal kan nemituyat; 3 wan kitaket miak nenepilchin ken su tit wan mutalij ijpak muchi yejemet, 4 wan muchi temiket iwan Ijiutzin, wan pejket taketzat tajtaketzalis tekenhat, ken kikwi ne sé wan ne seuk iijiu ne kichiwa ma tanutza.
5 Wan nemituyat tik Yerushalem Yudayujmet, takamet kitakamatit muchi tay nemi ijkwilujtuk, kistiwit tik muchi ne tejtechan pal nujme ne tal. 6 Kwak mukakik tzalani, musentepejket muchi wan mumamalijket ika ne sé wan ne seuk muchi kinkakket tanutzat sejse tik ne itaketzalis. 7 Ishpuyawit wey, wan inat:
—Ken weli?! Muchi ká taketzat, yejemet ipal Galilaya! 8 Su ijkiuni, ken ka tikakit muchi tik ne tajtaketzalis ipal ne tajtal kan tinestiwit? 9 Sejse tejemet tiwalajtiwit Partia, wan Media, wan Elam; sejse timuchantiat Mesopotamia, Yudaya wan Kapadokia, Pontos wan Asia, 10 Prugia wan Panpulia, Egipto wan ne takutun ipal Libia inawak Kurene, wan nusan nemit ne ejkunimet ipal Roma; 11 Yudayujmet wan walmupatatiwit, ne ipal Kreta wan ipal Arabia: wan muchi tikakket tanutzat tik ne tutajtaketzalis ipanpa tay kichijtuk ne Teut tay wey.
12 Muchi ishpuyawit wan ne sé kilwia ne seuk:
—Tay kineki ina ini?
13 Seki semaya ajkawetzkat katka, wan inat:
—Tawantiwit!
Tanutza Pedro
14 Ne Pedro muketzki inwan ne majtakti-se wan pejki tanutza, wan kinhilwij:
—Nukniwan Yudayujmet wan muchi ne muchantiat Yerushalem: shikmatikan ini wan shitakakikan tay nina, 15 ka yejemet inte tawantiwit ken ankimatit, ka peynayuk semaya chiknawi horaj, 16 asunte ini tay ne inak ne taketzani Yoel:
17 "Tik ne tijtipan tunal ina ne Teut: Nikushinis chiupi nuijiu ijpak muchi tay kipia iweyka, wan ne anmupilawan wan anmusijsiwakunew taketzasket ipal ne Teut, wan ne anmukukunew kitasket tajtachialis wan ne anmunoywan kitemikisket tejtemikilis, 18 wan nusan ijpak muchi ne nutejtekitini tik uni tujtunal nikushinis chiupi nuijiu wan taketzasket ipal ne Teut, 19 wan nitamakas sejse tay tetekia tik ne ilwikak ka ikajku, wan sejse pal muishmati ijpak ne tal katani: esti wan tit wan mishti ipal pukti; 20 ne tunal mukwepas kunyua wan ne metzti esti achtu ma wiki muneshtia ne wey tunal ipal ne Tajtzin. 21 Wan muchi ne kinutzat ne itukay Tutajwan mupalewisket."
22 Nukniwan ipal Israel, shinechkakikan: Yeshu ne Nazarayuj, ká ne Teut inak ka yek wan nemik ijtik anmejemet iwan itajpal wan sejse tay tetekia wan sejse pal muishmati tay ne kichijki ne Teut itech yaja itzalan anmejemet ken anmejemet kimatit, 23 ne Teut ká kielewij ijkiuni wan achtutamatki, yaja temakak wan anmejemet kichijket tay inteyek, ankikwijtiwit wan ankikunaktijtiwit tik se cruz wan ankimiktijtiwit. 24 Ne Teut kitamij ne itakukulis ipal mikilis wan kiketzki ika ne mikilis inte welik kipachua, 25 ika ina Dawid ipanpa:
"Senpa nikita nuishpan Tutajwan
ika nemi ka numayekkan pal te nijtzilika.
26 Neka nimuyulkwesuj wan pajpakik nunenepil,
wan hasta ne nuweyka musewis iwan tejchialis,
27 ika inte tikajkawas ne nualmaj tik Miktan
nian tikajkawas palani ne mupal tay yek.
28 Tinechneshtilij ne ujujti ipal nemilis;
ne muishkalyu nechtemas iwan pakilis."
29 Nukniwan, ma nimetzinhilwi melaknaj: ne tutatanoy Dawid mikik wan kitalpachujket, wan nemi ne shaput kenhayuk. 30 Ken yaja taketzani katka wan kimati katka ka kichijki jurar ne Teut se juramentoj ka yawi kisa sé ijtik itakil ne ishinach mutalia ijpak ne ikuijpal, 31 yaja achtutachishki wan taketzki ipanpa ne muyulkwepalis ipal ne Mawaltijtuk ka nian mukawki ka Miktan nian palanik inakayu. 32 Ini Yeshu ne Teut kiyulkwepki, ken muchi tejemet tikmatit. 33 Yajika, yaja muajkukijtuk ka imayekkan ne Teut, wan kikwijtuk ne sentaketzat ipal ne Ijiutzin itech ne Teteku, wan kikushinijtuk ini tay ankitat wan antakakit. 34 Ika Dawid inte tejkuk ka ilwikak; yajasan ina, ika inak:
"Ne Nuteku kilwij ne nutajtzin:
Shimutali ka nuyekkan 35 hasta ma niktali ká ne kinekit metzijtakuat ken se kuijpal ka itan mujmukshi."
36 Yajika, ma kimati yek muchi ne kal ipal Israel ka ne Teut kichijki Tajtzin wan Mawaltijtuk ini Yeshu ká ankicruzpilujtiwit anmejemet.
37 Kwak kikakket, kinkukuj tik inyulu wan kinhilwijket ne Pedro wan ne ujukseuk titanijtuk:
—Tay tiawit tikchiwat, tukniwan?
38 Wan Pedro:
—Shimuyulpatakan —inak— wan shimumakakan ulyuj muchi anmejemet tik itukay Yeshu Mawaltijtuk tik tapupulwilis ipal tay ne antateyekchijtiwit, wan shikwikan ne tetakulis ipal ne Ijiutzin. 39 Ika ne sentaketzat yaja anmupal wan pal anmupilawan wan muchi ká nemit wejka ká Tutajwan ne Teut yawi kalinnutza.
40 Wan ijkiuni tanutzki wan inak miak wan kinhilwij:
—Shimupalewikan, ika ne takamet pal ashan sea malintiwit!
41 Ne kikwijtiwit tay inak mumakaket ulyuj, wan ne mutalilijket tik uni tunal achka tres mil.
Muchi sennemit ken tekniwan
42 Mutalijket mumachtiat mujmusta ne intamachtilis ne tijtitanijtuk wan sennemit ken tekniwan kipitzakuat ne tamal wan kitajtanit ne Teut. 43 Muchi majmawit, wan ne tijtitanijtuk kichiwat katka miak tay tetekia wan miak pal muishmati. 44 Muchi ká tayulmatit sennemituyat wan nemituyat ken tekniwan, 45 wan kinamakat katka muchi inpalwan wan muchi tay kipiatuyat tik ne tiankis wan kitakutuntiat katka ijtik muchi, wan kinmakat katka ne sé wan ne seuk tay muneki sejse. 46 Wan mujmusta muchi nakat katka tik ne teupan, wan kipitzakuat katka ne tamal tik muchi ne kajkal wan takwat katka iwan pakilis wan pejpetznaj inyujyulu, 47 wan inat katka ka yek ne Teut wan nakat katka yejyek iwan muchi tik ne techan. Wan ne Tajtzin kitalilijket mujmusta ne mupalewiat kan nemituyat.
Tay kichijki Pedro iten ne teupan
3 Pedro wan Yojan tejkuket iten ne teupan tik ne horaj ipal teutajtanilis, ka yey horaj, 2 wan kalwikat se takat te keman welik nejnemi wan kitaliat mujmusta itech ne tentzakka ipal ne teupan itukay Yektzin pal kintajtanilia ne kalakit ka teupan ma kitakulikan chiupi tumin. 3 Kinhitak Pedro wan Yojan kwak yawit kalakit ka teupan, wan kintajtani, 4 wan Pedro nakak tachia iwan Yojan, wan inak:
—Shitechita.
5 Yaja kinhitak wan tejchia kikwi tumin intech. 6 Pedro inak:
—Tumin wan teukwit inte nikpia. Tay nikpia nimetzmaka. Tik itukay Yeshu Mawaltijtuk ne Nazarayuj, shimuketza wan shinejnemi.
7 Wan kitzkij ne imey wan kiketzki. Nemanhachin chikawayaket ne ijikshi wan ne ijish ijikshi, 8 wan pejki mutajtamuta wan nejnemi, wan kalak isel ka teupan inwan, nejnemi wan tzikwini wan ina ka yek ne Teut. 9 Wan muchi kitaket ken nejnemi wan ina ka yek ne Teut, 10 wan kishmatit ka yaja ne mutalia katka tajtani itech ne Yektzin Tentzakka ipal ne teupan, wan ishpuyawket tetekia sea ipanpa tay panuk iwan. 11 Yaja kinpachuj ne Pedro wan ne Yojan, wan muchi ne techan yajket mutaluat intech tik ne tenkal ne muilwia ipal Shalomo ishpuyawit.
Pedro tanutza itech ne teupan
12 Ne Pedro tachishki wan kilwia ne techan:
—Nukniwan ipal Israel, taika anhishpuyawit ipanpa ini wan antechitat ken tikchijtuskiat tusel iwan tutajpal ka weli nejnemi wan tiyejyek? 13 Ne Teut ipal Abraham wan ipal Itzak wan ipal Yakob, ne Teut ipal ne tutejteku, kiweychijki ne ikunew Yeshu ká anmejemet temakatiwit wan anhinatiwit ka inte anmupal iishpan Pilatus kwak kinekituya kichulultia. 14 Yaja katka ne yek wan ne ipal ne Teut wan anmejemet inaket inte, wan ankitajtanket se tamiktiani; 15 ankimiktijket ne itekuyu ne yulkwilis, ká ne Teut kiketzki kwak mikik, ken tejemet tikitztiwit, 16 wan ika kiyulmatket ne itukay, ne itukay kichijtuk ka chikawaya yajini ká ankitat wan ankishmatit, wan ne tayulmatilis ipanpa kipajtijtuk tik anmutachialis.
17 Wan ashan nukniwan, nikmatiaya ka ankichijket ijkiuni ika inte antamatket, wan ne anmutajtatuktiani kenhaya. 18 Wan ijkiuni yekawtuk tay ne inak ne Teut itech ne ijiten muchi ne taketzanimet ka yawi muchiwa: ka yawi taekua ne Mawaltijtuk. 19 Shimuyulpatakan tel, wan shimuishkwepakan, ma mupulu tay antateyekchijtiwit, 20 pal ma wikikan itech Tutajwan tujtunal pal timusewiat wan ma kititani anmutech ne ishpejpentuk Mawaltijtuk, Yeshu, 21 ká ne ilwikak nemi pal kikwi hasta kwak yawi muektalia muchi tay inatuk ne Teut itech inten muchi ne taketzanimet hasta ashan.
22 Inak Moshe ka Tutajwan ne Teut yawi kiketza se taketzani anmupal kistuk ijtik anmukniwan ken naja; shikakikan muchi tay metzinhilwia. 23 Muchi ká inte kikakit uni taketzani yawit muishtiat itech ne techan wan muishpuluat. 24 Wan muchi ne taketzanimet ne pewat iwan Shamuel, wan ne walajket tipan, tanawatijket ka walasket uni tujtunal: 25 anmejemet ne inpilawan ne taketzanimet wan ipal ne sentaketzat ne kitalij ne Teut inwan anmutejteku kwak kilwia katka Abraham:
"Wan tik ne mushinach yawit muteuchiwat muchi ne tejtechan ipal ne tal."
26 Ka anmumaku, achtu, kititanij ne Teut ne ikunew metzinteuchiwa kwak anmuishkwepat sejse wan ankiajkawat ne inteyek.
Ne Bibliaj Tik Nawat · © 2008, 2012 Jan Morrow