Chronological

—Maka shikakasiwikan; ankiyulmatit ne Teut wan annechyulmatit. ² Ne ikal ne Nuteku techajsi, sujsul wey; asu inte, nimetzinhilwijtuskia ka niaw nimetzinhekchiwilia kan annemiskiat. ³ Wan asu niaw wan nikekchiwa anmupal, nalmukwepa senpa, wan nimetzinwikas nuwan, pal kan ninemi naja ma shinemikan anmejemet. ⁴ Wan kanka naja niasneki, ankimatisket ne ujti.

—Tajtzin, inte tikmatit kanka tiaw; ken welit tikmatit ne ujti?

—Naja ne ujti wan ne tejkia wan ne yulkwilis. Inte aka ajsi itech ne Teteku asu inte nuwan. ⁷ Asu annechishmatiskiat, nusan ankishmatisket ne Nuteku; wan nemanha ankishmatisket wan ankitasket.

—Tajtzin, shitechilwitili ne Teteku, wan techajsi.

—Keski tunal ninentuk anmunawak, wan inteuk tinechishmati Pilipo! Ká ne nechitztuk, kitztuk ne Teteku. Ken ka tina "Shitechilwitili ne Teteku"? ¹⁰ Anka inte tikmati ka naja ijtik ne Teteku ninemi, wan ne Teteku ijtik naja? Muchi tay nimetzinhilwia inte nitaketza nusel; ne Teteku nemi ijtik naja wan kichiwa ne itekiw. ¹¹ Shinechyulmatikan ika naja ninemi ijtik ne Teteku, wan ne Teteku ijtik naja. Wan asu inte, shitayulmatikan ipanpa ne itekiw isel. ¹² Ini tay nimetzinhilwia: ká ne nechyulmati, tay ne naja nikchiwa yaja nusan yawi kichiwa, wan mas wejwey yawi kichiwa ika naja niawa kan nemi Nuteku. ¹³ Wan tay ne antajtanit tik nutukay niaw nikchiwa, pal kiane inat ka wey ne Teteku ijtik ne Itelpuch. ¹⁴ Asu annechtajtanit se tik nutukay, naja niaw nikchiwa.

—Asu annechtasujtat, shitajpiakan tay ne nitatuktijtuk, ¹⁶ wan naja niaw niktajtani ne Nuteku wan yawi metzinmaka ukse walnutztuk pal senpa naka anmuwan: ¹⁷ ne iijiu ne tejkia, ká ne taltikpak inte weli ina ka yek ika inte kita nian kishmati; anmejemet kishmatit ika naka anmutech wan nemi anmuwan. ¹⁸ Inte niaw nimetzinhajkawa anmusel ken iknupipil; niaw nalmukwepa anmutech. ¹⁹ Kinekiuk chiupichin wan ne taltikpak intea yawi nechita. Anmejemet kia san nechitasket, ika naja niyultuk wan anmejemet anyawit yujyultuk. ²⁰ Tik uni tunal, yawit ankimatit ka ninemi ijtik ne Teteku, wan anmejemet ijtik naja, wan naja ijtik anmejemet. ²¹ Ká kipia tay nitatuktijtuk wan tajpia, yajaya ne nechtasujta. Ká ne nechtasujta, ne nuteku yawi kitasujta, wan naja nusan niaw niktasujta, wan niaw nimuneshtia ipal.

—Tajtzin, ken ijtuk ka tiaw timuneshtia tupal wan te ipal ne taltikpak?

—Asu aka nechtasujta kitajpias tay ninatuk, wan ne nuteku kitasujtas, wan tiajsisket itech wan tikchiwasket ne tukal iwan. ²⁴ Ká ne inte nechtasujta inte tajpias tay ninatuk; wan tay ne ninatuk wan antakaktiwit inte nupal, yaja ipal ne Teteku ne nechtuktijtuk.

—Naja ne shukumekat yekkaya wan ne Nuteku ne talchiwani. ² Ne mulinka nujpak ne inte kiwika itakil, yaja kishtia, wan ne kiwika itakil kiyektia ma kiwika ukchiupi. ³ Anmejemet metzinyektijtuka ne palabraj ne nitaketztuk anmuwan. ⁴ Shimukawakan nuwan wan naja anmuwan. Ijkiunisan ken ne mulinka isel inte weli kiwika itakil asu inte naka musalujtuk ijpak ne shukumekat, anmejemet kenhaya inte anwelit asu inte anmukawat nuwan.

⁵ Naja ne shukumekat; anmejemet ne mujmulinka. Ká ne mukawa nuwan wan naja iwan, yajane kiwika wey itakil, ika asu inte ninemi inte welit ankichiwat tatka. ⁶ Asu se inte mukawa nuwan, muishtia ken ne mulinka wan wajwaki wan kitepewat wan kimutiliat ne tit wan tata. ⁷ Asu anmukawat nuwan wan tay ne ninatuk naka ijtik anmejemet, san antajtanisket muchi tay ankinekit wan yawi muchiwa. ⁸ Tik ini mumati ka wey ne Nuteku: ma shikwikakan wey anmutakil, wan anmuchiwasket numujmumachtiani. ⁹ Kenha ken nechtasujtatuk ne Nuteku, ijkiuni nimetzintasujtatuk. Shimukawakan tik nutetasujtalis. ¹⁰ Asu ankitajpiat tay ne nitatuktijtuk, anmukawasket tik nutetasujtalis, kenha ken naja niktajpishtuk tay ne tatuktijtuk ne nuteku wan nimukawa tik itetasujtalis. ¹¹ Nimetzinhilwijtuk ini pal ma nemi ne nupakilis ijtik anmejemet wan ma yekawi ne anmupakilis.

¹² Ini tay nimetzintuktijtuk: ma shimutasujtakan ken nimetzintasujtatuk. ¹³ Inte aka kipia tetasujtalis mas wey que ini: ma ajaka temaka ialmaj ka inmaku ne ikniwan. ¹⁴ Anmejemet annukniwan asu ankichiwat tay ne nimetzintuktijtuk. ¹⁵ Intea nimetzinhilwia tekitinimet, ika ne tekitini inte kimati tay kichiwa nemi ne itekuyu. Anmejemet nimetzinhilwijtuk nukniwan ika muchi tay nitakaktuk itech nuteku nimetzinneshtilijtuk. ¹⁶ Inte annechishpejpentiwit, naja nimetzinhishpejpentuk wan nimetzintalijtuk ma shumet shikpiakan anmutakil wan ma naka ne anmutakil pal kiane muchi tay ankitajtanit ne Teteku tik nutukay yawi metzinmaka. ¹⁷ Ini tay nimetzintuktia: ma shimutasujtakan.

—Asu ne taltikpak metzinhishijia, shikmatikan ka nechishijishtuk naja achtu. ¹⁹ Asu anhipal ne taltikpak, ne taltikpak kitasujtaskia ká ipal. Ika inte anhipal ne taltikpak asunte naja nimetzinhishpejpen ijtik ne taltikpak, neka ne taltikpak metzinhishijia. ²⁰ Shikelnamikikan tay nimetzinhilwij: se tekitini inte mas wey que itekuyu. Asu nechtalultijtiwit, anmejemet nusan metzintalultisket. Asu yejemet kitajpishtiwit tay ne ninatuk, san kitajpiasket tay ne anmejemet inat nusan. ²¹ Yawit kichiwat muchi uni nupanpa, ika inte kishmatit ne nechtuktijtuk.

²² Asu inte niwalajtuskia nian nitaketztuskia inwan, inte tateyekchijtuskiat. Ashan inte welit inat tatka ipanpa tay tateyekchijtiwit. ²³ Ká ne nechishijia nusan kishijia ne nuteku. ²⁴ Asu inte nikchijtuskia ijtik yejemet sejse tay inte aka kichijki, inte tateyekchijtuskiat. Ashan, kitztiwit wan nusan nechishijishtiwit naja wan ne nuteku kenhaya. ²⁵ Ijkiuni pal ma yekawi tay nemi ijkwilujtuk tik ne intajtuli: ka yawit nechishijiat wan te kipiat taika.

²⁶ Kwak yawi witz ne walnutztuk ne naja niktuktis anmutech —ne iijiu ne tejkia ne witz itech ne Teteku— yajuni yawi taketza nupanpa, ²⁷ wan anmejemet nusan, ika annentiwit nuwan kwak pejki.

—Inte nitaketzki anmuwan ijkiuni kwak pejki ika ninemituya anmuwan. ⁵ Ashan niawa kan nemi ne nechtuktijtuk, wan te aka pal anmejemet nechtajtanilia: "Kan tiaw?" ⁶ Wan ika nimetzinhilwijtuk ini, metzinkukua anmuyulu. ⁷ Wan nimetzinhilwia tay tejkia: mas yek anmupal ma niaw. Ika asu inte niaw, ne walnutztuk inte walajsis anmutech. Wan asu niaw, niktuktis anmutech, ⁸ wan kwak witz, yawi kiajajwa ne taltikpak ipanpa ne tateyekchijtuk, wan ipanpa ne muchijtuk yek, wan ma muita ká yek wan ká inte. ⁹ Kia, ipanpa ne tateyekchijtuk ika inte nechyulmatket. ¹⁰ Ipanpa ne muchijtuk yek, ika niawa kan nemi nuteku wan intea annechitasket. ¹¹ Pal ma muita ká yek wan ká inte, ika muchijtuk juzgar ne tatuktiani ipal ne taltikpak. ¹² Nikpiayuk wey pal nimetzinhilwia wan te welit ankiseliat seman. ¹³ Kwak yawi witz yajuni, ne iijiu ne tejkia yawi metzinhilwitilia ne ujti tik muchi ne tejkia; ika inte taketzas ka isel: muchi tay takaki taketzas wan tay yawi witz metzinneshtilis. ¹⁴ Yaja yawi nechweychiwa, ika tik tay nupal kikwis wan metzinneshtilis. ¹⁵ Muchi tay kipia ne Teteku, nupal; neka ninak ka tik tay nupal kikwi wan metzinneshtilis.

—Kwak panu se chiupi, intea annechitasket, wan senpa ukse chiupi, wan san annechitasket.

—Tay uni techilwia: "yawi panu se chiupi wan tea annechitasket, wan senpa ukse chiupi wan san annechitasket", wan "niawa kan nemi ne Teteku"?

—Tay kineki ina "se chiupi"? Inte tikmatit tay ina nemi...

—Yajika anmutajtaniliat? Ika ninak "Kwak panu se chiupi, inte annechitasket, wan senpa ukse chiupi, wan san annechitasket"? ²⁰ Ini tay nimetzinhilwia: ka yawit anchukat wan yawit anmutechtiat, wan ne taltikpak yawi pajpaki. Yawi metzinkukua, wan ne anmupenaj yawi mukwepa pakilis. ²¹ Ne siwat kwak puni kikukua ika ajsik ne horaj; kwak tamik puni, intea kielnamiki ka muchijki uij ipanpa ne pakilis ika nestuk se takat tik ne taltikpak. ²² Anmejemet nusan tel, melka ashkan metzinkukua, niaw nimetzinhita uksenpa wan yawi paki anmuyulu, wan te aka yawi metzinhishtilia anmupakilis, ²³ wan tik uni tunal inte annechtajtanisket tatka. Ini tay nimetzinhilwia: asu ankitajtanit ne Teteku se, yawi metzinmaka tik nutukay. ²⁴ Hasta seman inte antajtantiwit tatka tik nutukay. Welit antajtanit wan yawit ankikwit pal ma shiishwikan iwan pakilis.

²⁵ Nimetzinhilwijtuk muchi ini tik tajtaketza, wan witzaya ne horaj pal intea nimetzinhilwia tik tajtaketza asunte niaw nimetzinhilwia melaknaj ipanpa ne Teteku. ²⁶ Tik uni tunal yawit antajtanit tik nutukay, wan te nimetzinhilwia ka niaw niktajtani ne Teteku anmupanpa, ²⁷ ika ne Teteku yajasan metzintasujta ika annechtasujtatiwit wan annechyulmattiwit ika niwalaj itech ne Teut. ²⁸ Nikistuk itech ne Teteku wan nalajsituk tik ne taltikpak; nikajkawa ne taltikpak uksenpa wan niaw itech ne Teteku.

—Shikita, ashan titaketza melaknaj wan te tina tajtaketza. ³⁰ Ashan tikmatit ka tikmati muchi wan te timuneki ma aka metztajtanili. Neka tikmatit ka tiwalajtuk itech ne Teut.

—Seman ankimatit tik anmuyujyulu? ³² Ashan ajsi ne horaj, wan walejkutuk, ma shimusentalukan sejse ka iladoj wan ma shinechajkawakan nusel. Wan te ninemi nusel ika ne Teteku nuwan nemi. ³³ Nimetzinhilwijtuk muchi ini pal annejmachnemit. Melka ijtik ne taltikpak san ankipiasket pejpenaj, makaya shiyulkakasiwikan. Naja niwelik mas que ne taltikpak!

—Nuteku: walajtuk ne horaj.

Shikweychiwa ne mukunew pal ne kunet metzweychiwa,

² ijkiuni ken tikmakak tatuktilis ijpak muchi ká kipiat inweyka,

ma kichiwa ma yujyultuk senpa muchi ká tikintemakak.

³ Ma yujyultuk senpa pal kiane metzishmatit:

sema tajasan ti Teut yekkaya, wan ká ne tiktuktij:

Yeshu Mawaltijtuk.

⁴ Naja ninak ka tiwey pak ne tal;

niktamij ne nutekiw tinechmakak ma nikchiwa.

⁵ Wan ashan shinechweychiwa, Nuteku, munawak,

ma niwey ken katka kwak inteuk muchijki ne taltikpak.

⁶ Nikinneshtilijtuk mutukay ne taltikpaktakamet tikintemakak;

yejemet mupal katka wan tinechmakak, wan mupalabraj kitajpishtiwit.

⁷ Ashan kimatit ka muchi tay tinechmakak mutech witz,

⁸ ika tay ne tinechmachtij nikinmachtijtuk, wan yejemet kikwijtiwit

wan kishmattiwit ka mutech nikistuk,

wan kiyulmattiwit ka taja tinechtitanij.

⁹ Naja nimetztajtani ka inmaku,

inte ipanpa ne taltikpak,

nitajtani inpanpa ká tikintemakak nuwan

ika yejemet mupal.

¹⁰ Wan muchi tay nupal mupal,

wan tay mupal nupal,

wan muchi nechmatit wey inpanpa.

¹¹ Intea ninemi tik ne taltikpak,

wan yejemet tik ne taltikpak nemit

wan naja niaw mutech. Tekutzin,

ká ne nechmakak shikintajpia tik mutukay

ma muchiwakan sesan, ken tejemet.

¹² Kwak ninemituya inwan

ká ne tikintemakak nuwan,

nikintajpia katka tik mutukay

wan nikinhishpelwij wan te puliwik nian se,

semaya n' ikunew ne tapululis

pal ma yekawi tay ijkwilujtuk.

¹³ Ashan niaw mutech

wan ini nina tik ne taltikpak

ma kipiakan ne nupakilis

yekajtuk ijtik yejemet.

¹⁴ Naja nikinmakak ne mupalabraj

wan ne taltikpak kinhishijishki

ika yejemet inte ipal ne taltikpak

ken naja inte niipal ne taltikpak.

¹⁵ Te nimetztajtani ma shikinhishti tik ne taltikpak,

semaya ma shikintajpia ijtik ne taltikpak.

¹⁶ Yejemet inte ipal ne taltikpak

ken naja inte niipal ne taltikpak.

¹⁷ Shikinweychiwa tik ne tejkia;

ne mupalabraj yaja tejkia.

¹⁸ Ijkiuni ken nechtitanij tik ne taltikpak

naja nusan nikintitanij tik ne taltikpak,

¹⁹ wan ka inmaku nimuweychiwa

ma muweychiwakan tik tejkia kenhaya.

²⁰ Te nimetztajtani semaya inpanpa,

nusan inpanpa muchi ká nechyulmatit

ipanpa tay inasket yejemet,

²¹ pal muchi muchiwat sesan,

ken taja, Nuteku, ijtik naja

wan naja ijtik taja,

pal kiane yejemet nusan

muchiwat ijtik tejemet,

ma tayulmati ne taltikpak

ika taja nechtitanij.

²² Wan ne taweychiwalis ne tinechmakak nikinmakatuk

ma muchiwakan sesan, ken tejemet tisesan.

²³ Naja ijtik yejemet

wan taja ijtik naja,

ma sujsul muchiwakan sesan,

pal ma kimati ne taltikpak

ka taja tinechtitanij

wan tikintasujtak

ken tinechtasujtak.

²⁴ Nuteku,

ká ne titemakak

kan ninemi naja

nikneki ma nemikan

nusan yejemet nuwan,

pal ma kitakan

ne nutaweychiwalis

ne tinechmakatuk,

ika tinechtasujtak

kwak teuk mutzintij ne taltikpak.

²⁵ Nuteku yek,

ne taltikpak nusan inte metzishmatki;

naja kia nimetzishmatki,

wan yejemet metzishmatket

ika taja tinechtitanij,

²⁶ wan nikinneshtilijtuk mutukay

wan nikneshtis ma nemi ijtik yejemet

ne mutetasujtalis ne tinechtasujtak

wan ma ninemi ijtik yejemet.