Chronological
1 Naja, Pawlo, titanijtuk, inte ipal takamet, nian itech imey se takat, asunte itech Yeshu Mawaltijtuk wan Teut iteku ne kiketzki kwak miktuk, 2 wan muchi ne tukniwan nuwan, tiktuktiat ini tajkwilul itech ne sejsennemit ipal Galatia.
3 Ma metzinmaka tetasujtalis wan nejmachnemilis ne Teut ká ne tuteku, wan ne tajtzin Yeshu Mawaltijtuk 4 ká mutemakak ipanpa ne anmutajtateyekchijtuk pal kiane ma techmakishti itech ini taltikpak teyek, ken kielewia ne Teut wan ne tuteku, 5 ne tzitzinaka pal senpa wan senpa, amen.
Sema se yeknawatilis nemi
6 Nishpuyawi! Sea talul ankiajkawtiwit ne ká metzinnutzki tik itetasujtalis ne Mawaltijtuk ipanpa ukse yeknawatilis!
7 Seuk te kanaj! Metzinkakasujtiwit sejse wan kinekit kipatat ne iyeknawatilis ne Mawaltijtuk. 8 Su tejemet, wan hasta su se tanawatiani ipal ilwikak, metzinmakaskia ukse yeknawatilis te kenha ken tay ne timetzinmakaket, ma muchiwa maldictar. 9 Ken tinatiwit achtu, nusan nina ashan: asu aka metzinmaka ukse yeknawatilis te kenha ken tay ne ankikwijket, ma muchiwa maldictar.
10 Yek, seman ká ipal nina? Ne takamet o ne Teut? Anka nimutatemulia nikpaktia takamet? Su kenhayuk nikinpaktiskia, inte niitekitini ne Mawaltijtuk.
Ken ajsik ne yeknawatilis itech Pawlo
11 Nukniwan, shikmatikan ka ne yeknawatilis ne nikyeknawatij naja inte walajtuk itech takamet, 12 ika nian nikwij naja itech takamet, nian nechmachtijket, sute nechneshtilij Yeshu Mawaltijtuk.
13 Ika antakaktiwita ken ikman nimuwikak ken Yudayuj: ken sujsul niktalultia katka ne sennemit ipal ne Teut wan nikijtakua katka, 14 wan niajki nuishpan ken Yudayuj mas que nukunpawan tik nutechan, ika nitajpia katka mas ne tay katka ne nunoywan kichiwat.
15 Kwak kitak yek ne Teut, ká nechishtemuj kwak kenhayuk ninemituya tik iijti ne nunan wan ká nechnutzki ipanpa itetasujtalis 16 pal kineshtia ne ikunew nutech ma nitamaka ne iyeknawatilis ijtik ne tejtechan, nemanha te niknawatij aka, 17 nian niajki tik Yerushalem itech ne muchijtiwit tijtitanijtuk nuishpan, sute niajki tik Arabia, wan senpa tik Damashek.
18 Tipan kwak panutiwit yey shiwit, niajki tik Yerushalem itech Kepas nitachia, wan ninakak ka ichan kashtul tunal. 19 Nian se pal ne sejseuk titanijtuk te nikitak, semaya Yakob ne iikaw ne Tajtzin. 20 Tay ne nikijkwilua wan nimetzinhilwia, nina iishpan ne Teut ka yaja tejkia.
21 Tipan niajsik hasta ne tajtal ipal Siria wan Kilikia. 22 Te nechishmatit katka ne sejsennemit ipal ne Mawaltijtuk tik Yudaya. 23 Sema takaktuyat ka ne ká niakeman kitalultia katka ashan kiyeknawatia nemi ne tayulmatilis ne ikman kijtakua, 24 wan nupanpa kiweychijket ne Teut.
Kanka witz ne iyeknawatilis Pawlo?
2 Tipan panuket majtakti-nawi shiwit wan senpa niajki tik Yerushalem iwan Bar-Naba. Nikwikak Titus nuwan nusan. 2 Niajki ipanpa se taneshtilis. Wan nikinhilwij ken ne yeknawatilis ne niknajnawatia ijtik ne tejtechan, ka ikwaj iwan ne wejwey inpatiw. Te niknekituya ma te kipia ipatiw pal tatka muchi tay nikujkutia wan nikujkutiatuk. 3 Melka uni, te kilwijket ma muyawalteki nian Titus, ne nemituya nuwan, ká Greciajtakat. 4 Ipanpa ne tesankakniwan ká kinkalaktijket ichtaka, ne kalakket pal ichtakatachiat ne tutamakishtilis ne tikpiat ipanpa ne Mawaltijtuk Yeshu, pal kiane ma techilpikan. 5 Inte timuajkawket nian se chiupi melka kinekituyat techtuktiat, pal ne tejkia ipal ne yeknawatilis naka anmutech.
6 Ne muitat ka wejwey inpatiw (maka shitajtanikan ká yejemet, ika ne Teut inte kishkejketza ká se takat), naja tel, ne wejwey inte nechnawatijket tatka; 7 inte ijkiuni! Kitaket ka yaja nutekiw ma nikinmaka ne yeknawatilis ne tzuntepulmet, ijkiunisan ken Pedro ne yajyawaltektuk, 8 ika ne ká tekiti katka ijtik Pedro ken titanijtuk ipal ne yajyawaltektuk, yaja nusan tekiti ijtik naja ipal ne tejtechan; 9 wan kwak Yakob wan Kepas wan Yojan, ká muitat ka ne tajtaketzal wey, kimatket ne nupatiw ne nikwijtuk, yejemet techmakaket naja wan Bar-Naba ne inmayekkan ipal tasentepewalis, pal tejemet ma tiajsikan itech ne tejtechan, yejemet itech ne yajyawaltektuk; 10 sema ma tikelnamikikan ne te kipiat tatka, wan ijkia nimutatemulijtuk pal nikchiwa uni.
11 Saman kwak ajsik Kepas tik Antiokea, ninankilij ika nemituya se pal nikajwa ipanpa. 12 Ika achtu ka walajket sejse itech Yakob, yaja iwan ne tejtechantakamet sentakwa katka; wan kwak walajket, mukawa katka ka ikwaj wan walkupewi katka ika majmawi ipanpa ne yajyawaltektuk, 13 wan iwan nusan tashijshikuat katka ne uksejse Yudayujmet, hasta Bar-Naba nusan muajkaw muwika iwan ne intashijshikulis. 14 Wan kwak nikitak ka te taksat yek tik ne ujti ipal ne tejkia ipal ne yeknawatilis, nikilwij ne Kepas iishpan muchi:
—Su taja, ká ne Yudayuj, timuwika ken ne techantakamet wan te ken ne Yudayujmet, ken weli tikinhilwia ne tejtechan ma muwikakan ken Yudayujmet?
15 Tejemet, ká ti Yudayujmet wan te titateyekchiwanimet ipal ne tejtechan, 16 tikmatit ka sé te muchiwa yek ipanpa tay ina ne tajtuli ma tikchiwakan sute iwan itayulmatilis Yeshu Mawaltijtuk, wan tejemet nusan tikyulmattiwit ne Mawaltijtuk Yeshu pal kiane timuchiwat yejyek ipanpa itayulmatilis ne Mawaltijtuk wan te ipanpa tay ina ne tajtuli ma tikchiwakan, ika ipanpa tay ne ina ne tajtuli ma tikchiwakan te aka yawi muchiwa yek. 17 Su kwak timutatemuiliat timuchiwat yejyek ipanpa ne Mawaltijtuk, muchiwa ka tejemet nusan titateyekchijtiwit, anka ne Mawaltijtuk tekiti ipal ne tateyekchiwalis? Tesu kiane! 18 Ika su tay ne niktajkaltuk senpa niketza, nina ka najasan nikchijtuk tay teyek, 19 ika naja, ipanpa ne tajtuli, nimiktuk ipal ne tajtuli pal ma niaw niyultuk iwan Teut; iwan ne Mawaltijtuk nimusencruzpilujtuk. 20 Intea naja niyultuk: ne Mawaltijtuk ne yultuk ijtik naja. Tay ne niyultuk ashan ijtik nunakayu, niyultuk tik tayulmatilis ipal ne ikunew ne Teut ká nechtasujtak wan mutemakak ka numaku. 21 Inte nina ka inte nikneki ne itetasujtalis ne Teut, ika su ne tamelakchiwalis yaja ipanpa ne tajtuli, kineki ina ka ne Mawaltijtuk inte kipishki taika mikiskia.
Ne tajtuli o ne tayulmatilis?
3 Melemet ipal Galatia! Ká metzinshuchiwijtuk, kwak ishpan anmujmuish muneshtijtuka Yeshu Mawaltijtuk cruzpilujtuk? 2 Sema ini nikneki nimumachtia anmutech: ankikwijket ne Ijiutzin itech itekiw ne tajtuli, o ika antakakket ne tayulmatilis? 3 Anka anmelemet, ken anpejket iwan ne Ijiutzin wan ashan tamit iwan ne nakat? 4 Ankiekujket muchi uni pal te-tatka, su yaja ijkia pal te-tatka? 5 Yajika, ne ká metzinmaka ne Ijiutzin wan kichiwa sejse tay wey ijtik anmejemet, ken? Iwan itekiw ne tajtuli, o ika antakakket ne tayulmatilis?
6 Ijkiunisan ken Abraham kiyulmatki ne Teut, wan mupujki ken tamelakchiwalis, 7 shikmatikan tel ka ne ká kipiat tayulmatilis, yejemet ipilawan Abraham. 8 Ne ijkwilujtuk achtutachishki ka ne tejtechan yawit muchiwat yek ipanpa tayulmatilis, wan ne Teut kimakak Abraham ne yeknawatilis ka ipanpa yawit muteuchiwat muchi ne tejtechan. 9 Kiane, ne kipiat tayulmatilis muteuchiwat iwan Abraham ne tayulmati.
10 Ika muchi ká ipal itekiw tajtuli nemit itan se maldicion, ika muijkwilujtuk:
"Tetekia iwan muchi ká inte tajpiat muchi tay mutajkwilujtiwit ijtik ne ajamat ipal ne tajtuli wan kichiwat muchi."
11 Muita ka te aka yek ipal ne Teut ipanpa ne tajtuli, ika:
"Ká ne yulmelawak, ipanpa tayulmatilis yaja yawi yultuk."
12 Ne tajtuli te ipal tayulmatilis,
"ne ká mumelakchiwa ijtik ne tajtuli, yawi yultuk ijkiuni".
13 Ne Mawaltijtuk techmakishtij itech ne imaldicion ne tajtuli, yaja muchijki maldicion ka tumaku, ika muijkwilujtuk:
"Tetekia iwan muchi ká mukupiluat ijpak kwawit."
14 ma wiki ijpak ne tejtechan ne iteteuchiwalis Abraham ipanpa ne Mawaltijtuk Yeshu, pal tikwit ne ipromesaj ne Ijiutzin ipanpa ne tayulmatilis.
Abraham wan ne Mawaltijtuk
15 Nukniwan, ken takat nina, kenha ken se sentaketzat ipal se, kwak inatuk ka yek, te aka weli kielkawa nian weli kitalilia tatka. 16 Ne projpromesaj, ne Teut kilwij ne Abraham wan ne ishinach. Te ina: "ne ishijshinach", ken ipanpa miak, sute ken ipanpa sesan: "...wan ne mushinach"; kineki ina ne Mawaltijtuk. 17 Ini tay nina: se sentaketzat ne achtu inak ne Teut ka yek, kwak panutiwit nawtzunti wan senpual-majtakti shiwit ka yaja muchijtuk tajtuli, yaja te ina ka te tatka ipatiw wan ma puliwi ne promesaj, 18 ika su ne herenciaj ipal tajtuli, intea ipal promesaj, wan ne Teut kimakak ne Abraham ken promesaj.
19 Taika ne tajtuli tel? Mutalilij ipanpa tay ne muchiwa teyek, hasta ma wiki ne shinachti ká ne ipal muchijki prometer, tuktijtuk itech tanawatianimet tik ijimey se tajkutaketzani. 20 Ne tajkutaketzani ipal sesan inte kanaj, wan ne Teut sesan!
21 Anka kineki ina ka ne tajtuli inte senyawi iwan ne ipromesaj ne Teut? Intesu, ika su muchijtuskia se tajtuli ne weli tayulkwepa, ijkia kisaskia ne tamelakchiwalis itech ne tajtuli. 22 Pero ne tay nemi ijkwilujtuk kitzaktuk muchi itan ne tateyekchijtuk pal kiane ne tayulmatit yawit kikwit ne promesaj ipanpa itayulmatilis Yeshu Mawaltijtuk.
23 Achtu ka walaj ne tayulmatilis, tinemituyat pajpachiwijtuk, tzajtzaktuk ipal ne tayulmatilis ne teuk muneshtijtuya. 24 Ijkiuni ne tajtuli muchijki tutamachtiani pal techwika itech ne Mawaltijtuk, ma timuchiwakan yejyek ipanpa tayulmatilis. 25 Kwak walaja ne tayulmatilis, intea tinemit itan ne tamachtiani.
26 Ika, muchi anhipilawan Teut ipanpa ne itayulmatilis ne Mawaltijtuk Yeshu, 27 ika muchi ká mumakatiwit ulyuj tik ne Mawaltijtuk, anmutakentijtiwit iwan ne Mawaltijtuk. 28 Inte kanaj Yudayuj nian Greciajtakat, inte kanaj tepaltekitini nian isel itekuyu, inte kanaj ukich nian siwat, ika muchi anmejemet sesan ijtik ne Mawaltijtuk Yeshu. 29 Asu anmejemet ipal ne Mawaltijtuk, yajika anhishinach Abraham wan anyawit kipiat ken inak ne promesaj.
Ne Bibliaj Tik Nawat · © 2008, 2012 Jan Morrow