Chronological
Pedro wan Yojan iishpan ne Kalpuli
4 Kwak nemituyat kinutzat ne techan, ne palejmet wan ne teupantatuktiani wan ne Tzadukayujmet ajsiket intech 2 wan kintekukujmati tay ne kimachtiat ne techan, ika tanawatiat katka ka Yeshu muyulkwepki kwak miktuk, 3 wan kinhitzkijket wan kintzakket hasta ukse tunal ika teutaka. 4 Miak ká kinkakket tayulmatket, wan yejemet achka cinco mil.
5 Wan ne seuk tunal, musentepejket ne intajtatuktiani wan ne noymet wan ne tajkwiluanimet tik Yerushalem, 6 wan Hanan ne weypalej, wan Kayapa wan Yojan wan Aleksandro wan muchi ne weypalejtal. 7 Wan kintalijket tatajku wan kintajtaniliat:
—Iwan katiawel anmutajpal ankichijtiwit ini anmejemet, wan tik itukay ká?
8 Kwakuni Pedro temik iwan ne Ijiutzin wan kinhilwij:
—Tatuktianimet ipal ne techan wan noymet: 9 asu techtajtaniliat tik ini tunal ipanpa tay tikchijtiwit yek iwan se takat kukuya pal mupajtia, 10 ma shikmatikan muchi anmejemet wan muchi ne techan ipal Israel ka tik itukay Yeshu Mawaltijtuk ne Nazarayuj, ká ne ankicruzpilujket, ká ne Teut kiyulkwepki kwak miktuk, tik itukay yajuni naka yek anmuishpan ini takat. 11 Ini ne tet ne anhinat ka inte tatka ipatiw anmejemet ne kalketzanimet, wan mukweptuk itzinteu kal, 12 wan te kanaj seuk ká weli tamakishtia, nian muajsi ijtik takamet itan muchi ne ilwikak ukse itukay ká ipanpa tinemit pal timupalewiat.
13 Kwak kitaket ken mejmelaknaj ne Pedro wan Yojan wan kikejketzket ka yejemet takamet inte keman mumachtijtiwit wan melemet, ishpuyawit katka wan kishketzket ka yejemet nentuyat iwan Yeshu, 14 wan kwak kitat ne takat ejkatuk innawak pajtituk, inte kipiat tatka pal kinhijilwiat. 15 Kintuktijket ma kisakan ijtik ne Kalpuli wan yujyulmakat ijtik yejemet 16 wan inat:
—Tay tiawit tikchiwat inwan ini takamet? Ika muchi tik Yerushalem kimatit ka yejemet kichijtiwit se pal muishmati wan te tiwelit inat ka inte. 17 Melka uni, pal te tajtaketzat nujme ijtik ne techan, tikintuktikan ma intea tajtaketzakan iwan aka ipanpa ne itukay yajuni.
18 Wan kinnutzket wan kintuktijket ma inte inakan tatka wan ma inte tamachtikan ipanpa ne itukay ne Yeshu. 19 Pedro wan Yojan najnankilijket wan kinhilwijket:
—Shinakan anmejemet asu nemi yek ipal ne Teut ma timetzinkakikan ush mas yek ma tikakikan ne Teut, 20 ika inte weli ma inte titajtaketzakan ipanpa tay tikitztiwit wan titakaktiwit.
21 Kwak tamiket kintuktia chiupiuk, kinchulultijket wan te kiajsiket ken kinchiwiliskiat tatka ipanpa ne techan ika muchi inat katka ka wey ne Teut ipanpa tay ne kichijki, 22 ika kipiatuyaya unpual shiwit ne takat ká iwan muchijtuya uni tapajtilis pal muishmati.
Ne Cristianojmet kinutzat ne Teut tik Yerushalem
23 Kwak kinchulultijket, ajsiket intech ne inhikniwan wan kinhilwijket muchi tay kinhilwijtuyat ne weypalejmet wan ne noymet. 24 Kwak yejemet takakket, muchi pejket sentakwikat ipal ne Teut wan inaket:
—Tutekuyu,
taja ká tikchijki n' ilwikak wan ne tal wan ne at
wan muchi tay nemi ijtik yejemet,
25 tinak iwan ne Ijiutzin itech ne iten tutatanoy, mutekitini Dawid:
"Taika tzajtziket tejtechan wan sujsul ishpuyawket?
26 Muketzket ne tatuktianimet ipal ne tal
wan musenputzujket iishpan Tutajwan wan iishpan Imawaltijtuk."
27 Ika tejkia ka musenputzujtiwit tik ini weytechan
pal kisumat ne mukunew ipal Teut, Yeshu, ká tikmawaltij,
Herodes wan Pontius Pilatus inwan ne tejtechan ipal Israel,
28 pal ma kichiwakan tay inatiwit ne mumey wan ne mutaelewilis ma yawi muchiwa.
29 Wan ashan, Tajtzin, shikita ken mukwalantiat,
wan shikajkawa ma inakan ne mutejtekitini ne mupalabraj melaknaj;
30 shikmelawa ne mumey pal titapajtia
wan pal ma muchiwakan sejse pal muishmati tetekia sea
iwan n' itukay ne mukunew ipal Teut, Yeshu.
31 Wan kwak mutajtaweliat nemit ulinik kan ne musentepejtiwit, wan temiket muchi iwan ne Ijiutzin, wan pejket tanutzat ne ipalabraj ne Teut melaknaj.
Tay kichiwat katka ne Cristianojmet
32 Muchi ne tayulmatit ipal sanse inyulu katka, wan nemituyat ken sechin, wan nian se yejemet ina katka ka tay ne kipiatuya ipal, asunte muchi ne inpalwan ipal muchi. 33 Wan iwan wey intajpal ne tijtitanijtuk inat katka ishpan muchi ka muyulkweptuk ne Tajtzin Yeshu. Wan nemituya wey tetasujtalis ijtik yejemet, 34 ika nian aka ijtik yejemet muneki katka, ika ká ne kipiatuya tajtal ush kajkal kinamaka katka wan kalwika katka ne ipatiw ne tay munamaka, 35 wan kitalia katka ishpan ne tijtitanijtuk. Mutakutuntia katka wan kimakat katka ne se wan ne seuk tay ne muneki.
Hananya wan Sapira
36 Yosep, ká ne tijtitanijtuk kitzuntukaytijtiwit Bar-Naba ne kineki ina Ikunew Tepalewilis, se Lewi ipal Kipre, 37 kipiatuya se tal wan kinamakak wan kalwikak ne ipatiw wan kitalij ishpan ne tijtitanijtuk.
5 Se takat itukay Hananya iwan Sapira ne isiwaw kinamakak ipalwan 2 wan kianki ichtaka se chiupi ipal ne ipatiw, wan ne isiwaw nusan kimati katka, wan kalwikak se takutun wan kitalij ishpan ne tijtitanijtuk. 3 Inak ne Pedro:
—Hananya, taika kitentuk ne muyulu ne Tenewani ma shikilwi sanka ne Ijiutzin wan ma shikana achi ipal ne ipatiw ne tal. 4 Kwak nakak, mupal nakak, wan kwak munamakak nemituya tik mutatuktilis. Ken ka mutalijtuk tik muyulu ma shikchiwa ijkiuni? Inte tikilwijtuk sanka takamet; tikilwijtuk sanka ne Teut.
5 Kwak Hananya kikakik, wetzki talchi wan mikik. Wan muchi ne kikakket mumutijket wey. 6 Muketzket ne pipilmet wan kitakentijket wan kiwikaket wan kitalpachujket.
7 Kwakuni kwak panutiwit achka yey horaj, nusan ajsik ne isiwaw wan te kimati tay panutuk. 8 Pedro kilwij:
—Shinechilwi, ini ne ipatiw ne tal?
Inak ne siwat:
—E, ini ne.
9 Wan Pedro:
—Taika anmukawket pal ankishijshikuat ne Iijiutzin ne Tajtzin? Né nemit ne ijikshi ne ká kitalpachujtiwit ne mushulejyu ka tenkal wan yawit metzwikat.
10 Nemanha wetzki talchi ishpan ne ijikshi Pedro wan mikik. Ne pipilmet kalakket wan kiajsiket miktuk, wan kiwikaket wan kitalpachujket inawak ne ishulejyu. 11 Wan muchi ne sennemit wan muchi ká takakket mumutijket sea.
Tay kichijket wan ne tijtitanijtuk
12 Itech inmejmey ne tijtitanijtuk muchijket miak pal muishmati wan miak tetekia sea ijtik ne techan.
Wan senpa sennemituyat muchi itech ne Tenkal ipal Shalomo. 13 Ne sekit majmawit katka wan te aka musalua katka inwan; muchi ne techan ina katka ka yejemet wejwey. 14 Melka uni, senpa mutaliliat miak takat wan siwat ne kiyulmatit ne Tajtzin, 15 ken hasta kalinwikat katka ne kukuyat ijtik ne ujujti wan kintaliat ijpak pejpetat wan tajtapech pal kwak ajsi Pedro ma kikimilu ne iekawyu se yejemet. 16 Nusan kisat katka ne tejtechan inawak Yerushalem miak kisajsakat kukuyanimet wan sejse kipiat nawalmet inteyek, wan muchi yejemet mupajtiat katka.
17 Muketzki iwan kwalan ne weypalej, wan muchi ne iwan nemituyat ipal ne sectaj pal ne Tzadukayujmet, 18 wan kinhitzkijket ne tijtitanijtuk wan kintalijket ijtik tapachiwilis ipal ne techan. 19 Ne tayua, se tanawatiani ipal ne Tajtzin kitapuj ne tejtentzakka kan kinpachiwiat, wan kinhishtij wan inak:
20 —Shumet, shimutalikan iten ne teupan wan shikilwikan ne techan muchi ipanpa ini nemilis.
21 Kwak kikakket, yajket peyna ka tapuyawa iten ne teupan wan pejket tamachtiat.
Ajsik ne weypalej, wan ne iwan nemituyat, wan kalnutzket ne Kalpuli wan muchi ne chuletket ipal Israel, wan tatuktijket ma yawikan ne tetzakwiluyan kalinwikat. 22 Kwak ajsiket ne takamet, inte kinhajsiket ijtik ne tatzakwiluyan. Mukwepket 23 wan inaket:
—Tikajsiket ne tetzakwiluyan tzaktuk yek wan ne taishpelwianimet ejejkatuk itech ne tentzakka. Tiktentapujket wan kalijtik inte tikajsiket aka.
24 Kwak takaktiwit ne teupantatuktiani wan ne weypalejket, mutajtaniliat ken weli ijkiuni. 25 Ajsik ajaka intech wan kinhilwij:
—Ne takamet tikintentzak né nemit iten ne teupan tamachtiat!
26 Kwakuni yajki ne teupantatuktiani iwan ne takamet, wan kalinwikaket nejnejmach ika majmawit ka ne techan weli kintejtemima. 27 Kalinwikaket wan kintalijket tik ne Kalpuli, wan ne weypalej kintajtanilij, 28 ina:
—Ankimatit ka timetzintuktijket ma inte shitamachtikan tik itukay yajuni, wan né ankitentiwit Yerushalem iwan anmutamachtilis wan ankinekit techtamutiliat ne culpaj ipanpa ne iesyu uni takat.
29 Pedro wan ne tijtitanijtuk nankilijket wan inaket:
—Tinemit pal tiktakamatit ne Teut mas que ne takamet. 30 Ne Teut ipal ne tunoywan kiketzki Yeshu, ká anmejemet kimiktijket wan kipilujket ijpak se kwawit. 31 Ne Teut kiajkukij yajuni iwan ne imayekkan ken tutekuyu wan tutamakishtiani, pal kimaka Israel yulpatalis wan pal kitapupulwia tay tateyekchijtuk. 32 Anmejemet kimatit muchi ini, wan ne Ijiutzin ne kinmakak ne kitakamatit ne Teut.
33 Kwak kikakket kwalanket sujsul wan kinekituyat kinmiktiat. 34 Muketzki se Parishayuj tik ne Kalpuli, itukay Gamaliel, se tajtultamachtiani, ká ne muchi kitat katka yek, wan tatuktij ma muishtikan achi ne takamet. 35 Kwakuni kinhilwij:
—Nukniwan ipal Israel, shiktalikan cuidadoj iwan ini takamet tay kinekit kichiwat, 36 ika achtu muketzki se itukay Teudas ina ka yaja wey, wan sejse, achka cuatrocientos, musalujket itech; kimiktijket wan muchi ká kintekimaka katka musentalujket wan muchijket te-tatka. 37 Nemanha muketzki Yuda ne Galilayuj tik ne tujtunal ipal ne tapualis, wan kijkwan se miaktal ka iipan, wan yajuni mikik wan muchi ká ne kitakamatit musentalujket nusan. 38 Wan ashan nimetzinhilwia: maka shumet iwan uni takamet, shikinhajkawakan, ika asu uni intekiw tay kinekit kichiwat kistuk itech takamet, yawi mutajkali; 39 asu kistuk itech Teut, inte welisket ankitajkalit, pal inte anmuajsit kisumat ne Teut.
Inaket ka yek nemi, 40 wan kalinnutzket ne tijtitanijtuk wan kinwitekket, wan kinhilwijket ma inte tanutzakan ipanpa ne itukay Yeshu, wan kinchulultijket. 41 Yejemet tel kisket yajket itech ne Kalpuli wan pakiket ika muitak yek ma mutzuntekikan ka imaku ne itukay. 42 Wan mujmusta iten ne teupan, nian ka inchan, inte mukawket, senpa tamachtiat katka wan tamakat katka ne yeknawatilis ipal ne Mawaltijtuk Yeshu.
Estepano
6 Tik uni tujtunal kwak tepewit yawit ne mumachtianimet, ne Greciajtaketzat pejket kikinakat kitejtenewat ne Yudayujtaketzat ika mujmusta kwak kalwikat katka ne takwal kinhelkawat ne lajlamajtzitzinmet. 2 Ne majtakti-ume kalinnutzket muchi ne mumachtianimet wan inaket:
—Inte yek ma tiknaktikan ne ipalabraj ne Teut pal titakwaltiat ka mesaj. 3 Nukniwan, shiktemukan chikume takat honradoj tejtentuk iwan Ijiutzin wan tamatilis, ma tikintalikan tatekimakat tik uni intekiw, 4 wan tejemet timutalisket tiktajtanit ne Teut wan titekitisket ipal ne palabraj.
5 Wan muchi kitaket yek tay inaket, wan kishpejpenket Estepano, se takat tentuk iwan tayulmatilis wan Ijiutzin, wan Pilipo wan Prokoros wan Nikanor wan Timon wan Parmenas wan Nikolaos se walmupatatuk ipal Antiokea, 6 wan kintalijket ishpan ne tijtitanijtuk wan kinutzket ne Teut wan kinteuchijket.
7 Wan ne ipalabraj ne Teut weyak yajki, wan sujsul tepewit ne mumachtianimet tik Yerushalem, wan miak palej kitakamatit tik ne tayulmatilis. 8 Estepano, tentuk wan tetasujtalis wan itajpal, kichiwa katka wejwey ijtik ne techan tay tetekia wan pal muishmati. 9 Muketzket sejse ipal ne sennemit ne muilwia ipal ne libertinojmet, wan ipal sejse ipal Kurene wan ipal Aleksandria, wan sejse ipal Kilikia wan Asia, pal kitajtaniliat ne Estepano, 10 wan te weliket nankiliat tatka ika yaja tanutza katka iwan tamatilis wan iwan ne Ijiutzin. 11 Kwakuni kinkalaktijket sejse inat:
—Tikaktiwit kukujtaketza ipanpa Moshe wan ne Teut.
12 Kikumuntijket ne techan wan ne noymet wan ne tajkwiluanimet, wan ajsiket wan kitzkijket wan kiwikaket tik ne Kalpuli. 13 Kintalijket sankataketzat pal inat:
—Uni takat senpa kitejtenewa ne Teupantzin wan ne Tajtuli, 14 ika tikaktiwit ina ka ini Yeshu ne Nazarayuj yawi kitajkali muchi ini wan yawi kipata tay ne tikchiwat katka ken ne techmakak Moshe.
15 Wan muchi ne muejmuetztuk tik ne Kalpuli nakaket tachiat wan kitaket ne iishkalyu ken se iishkalyu se tanawatiani.
Ne Bibliaj Tik Nawat · © 2008, 2012 Jan Morrow