Chronological
Ne sujsulin wan ne wejwey
4 Nina: kwak se ká yawi kipia se herenciaj kenhayuk sulin, melka yaja itekuyu muchi, kenha ken se tekitini: 2 nemi pal kintakamati kalpianimet wan tamachtianimet hasta ma ina ne iteku. 3 Ijkiuni nusan tejemet, kwak tichijchichin katka ka itan muchi tay nemi tik ne taltikpak, tiitejtekitini katka. 4 Kwak ajsik ne yekawilis, ne Teut kaltitanij ne itelpuch, ká muchijtuk itech siwat, muchijtuk itan tajtuli, 5 ma kinmakishti ne nemit itan tajtuli pal timuchiwat ken ipilawan. 6 Ken ankukunet, ne Teut kaltitanij ne iijiu ne ikunew ijtik tuyujyulu tzajtzi: "Aba! Nutata!" 7 wan ashan intea tiitekitini asunte tiikunew wan tikpiaya ne muherenciaj ipanpa ne Teut.
8 Achtu, inte ankishmatit katka Teut wan antekitket ipal sejse ká inte teujteut yekkaya, 9 wan achtu kwak ankishmattiwit Teut, o mas yek kwak ne Teut metzinhishmattuk, ken ka anmuishkwepat senpa itech ne tay inte weli tatka wan te kipia tatka wan ankinekit mukwepat tekitit inpal, 10 wan antajpiat tujtunal wan ijilwit wan mejmetzti wan shijshiwit? 11 Nimajmawi ka tay ne nikujkutiatuk anmuwan te kipishki ipatiw pal tatka!
12 Shimuchiwakan ken naja, kenha ken naja ken anmejemet, nukniwan, nitajtani anmuwan. Inte annechchiwilijtiwit tatka, 13 ankimatit ka ipanpa se nukukulisyu ipal nuweyka nimetzinmakak yeknawatilis achtu, 14 wan uni anmutaejekulis ijtik nunakayu te anhinaket ka te tatka ipatiw nian antachijchaket ijpak, sute annechkwijket ken su naja niitanawatiani ne Teut, ken su ne Mawaltijtuk Yeshu. 15 Yajika tel, kanka ne anmupajpakilis? Ika nimetzinhilwia ka, su welituskiat, ankishtijtuskiat anmujmuish pal annechmakat! 16 Kiane tel, anka anhinat ka nikneki nimetzinhijtakua kwak nitaketza tejkia anmuwan?
17 Metzintemuat inte ipal yek asunte kinekit metzinkupewat pal ma shiktemukan yejemet. 18 Yektzin ma kitemukan se ipal yek senpa, wan te sema kwak ninemi anmuwan. 19 Nukukunew ká nechkukua pal nimetzinpunia senpa hasta ma muketza ne Mawaltijtuk ijtik anmejemet: 20 niknekiskia ninemi anmuwan seman wan nimetzinnutzaskia ken muneki, ika nishpuyawi anmupanpa.
Ipilawan Abraham
21 Shinechilwikan, anmejemet ká kinekit nakat itan tajtuli: anka te ankikakit tay ina ne tajtuli? 22 Ika muijkwilujtuk ka Abraham ume piltzin kipishki, ne se iwan ne isiwatekitini, wan ne se iwan ne isiwaw te kipia itekuyu. 23 Wan ne ikunew ne kipishki iwan ne tekitini, takatki itech nakat; ne kipishki itech ne te kipia itekuyu, ipanpa promesaj.
24 Muchi ini kineki ina se: ka nemit ume sentaketzat. Ne se kiski tik Sinaytepet wan tapunia ipal tekitilis: yaja Hagar. 25 Hagar kineki ina Sinaytepet, tik ne tal ipal Arabia; nusan kineki ina Yerushalem pal ashan, ika yaja tekitini, iwan ne ikukunew. 26 Ne Yerushalem ka ikajku, yaja te kipia itekuyu wan yaja tunan, 27 ika muijkwilujtuk:
"Shimuyulkwesu taja ká inte weli puni;
shitzajtzi iwan pakilis, ká te tapunia;
ika mijmiak ne ikukunew ne te kipia tatka,
mas que n' ipilawan ne kipia ishulejyu."
28 Anmejemet, nukniwan, anhikukunew ne promesaj ken Itzak. 29 Melka uni, kenha ken kwakuni ne nestuk itech nakat kitalultij ne nestuk itech iijiu, ashan nusan kiane. 30 Wan tay ina ne ijkwilujtuk?
"Shikishti ne tekitini wan ne itelpuch, ika ne ikunew ne siwatekitini inte kipias se itakutun ne herenciaj iwan ne ikunew ne inte kipia itekuyu."
31 Neka te tiipilawan ne tekitini, nukniwan, sute tiipilawan ne te kipia itekuyu.
Maka shimuyawaltekikan
5 Ne Mawaltijtuk techmakishtijtuk pal tikpiat tamakishtilis; yajika, shinakakan ejejkatuk wan maka shimuajkawakan muilpiat senpa tik tekitilis.
2 Shikita, naja Pawlo nimetzinhilwia ka asu anmuyawaltekit, ne Mawaltijtuk inte yawi metzinpalewia nian se chiupi. 3 Senpa nikinhilwia muchi ne takamet ka su se muyawalteki, nemi pal kichiwa muchi tay ina ne tajtuli. 4 Ankipulujtiwit ne Mawaltijtuk su anhinat ka anyejyek ipanpa ne tajtuli, anwetztiwit, tea metztasujta; 5 ika tejemet tikmatit ka tikpiat tejchialis ipal tamelakchiwalis ipanpa ne Ijiutzin; 6 ika iwan ne Mawaltijtuk Yeshu, te kipia ipatiw nian tayawaltekilis nian tzuntepul, semaya tayulmatilis, ne tekiti iwan tetasujtalis.
7 Anyawit katka yektzin: ká kichijki ka ankiajkawket kitakamatit ne tejkia? 8 Tay ne metzinhilwijtiwit inte witz itech ká ne metzinnutzki! 9 Chiupichin shukutishti kichiwa ma kukukisa muchi ne chipusti! 10 Naja nikyulmati ne Tajtzin anmupal, yajika nina ka ankishkejketzat kenha. Te nikmati ká ne metzinkakasua, pero yawi muchiwa juzgar wan yawi kitashtawia. 11 Naja, nukniwan, su niknajnawatiskia tayawaltekilis kenhayuk, taika nechtalultiskiat? Te tatka ne tatzunchaluas ipal ne cruz! 12 Mas yek ma muteksiskutunakan ne metzinhishtapachuat!
Shiktasujta ne muiknew ken timutasujta
13 Metznutztiwit pal anmumakishtiat, nukniwan; sema ini, ne tamakishtilis ma inte muchiwa pal ne anmuweyka, asunte ma shimupalewikan sejse iwan sejse ipanpa ne tetasujtalis, 14 ika muchi ne tajtuli yekajtuk ijtik sanse taketza: Shiktasujta ne muiknew ken timutasujta. 15 Asu anmutankwat wan asu ne sejse kikwat ne sejseuk, shikitakan ma inte shimuwilewakan.
16 Naja nina: shimuwikakan itech ne Ijiutzin, wan maka shikchiwakan tay ne tajtani ne taelewilis ipal ne anmuweyka, 17 ika ne tuweyka kielewia ne tay inte kineki ne tuijiu, wan ne tuijiu tay te kineki ne tuweyka, ika yejemet mutejtenewat pal ma inte shikchiwakan tay ne ankinekit. 18 Su ankiajkawat ma metzinwika ne Ijiutzin, inte annemit ka itan tajtuli.
19 Ne itekiw ne tuweyka muita: yaja tatzinhejenchiwalis, susulkayu, wan ma shikilwitikan tay susul, 20 teutzintankwaketzalis, kukuchpajti, taishijialis, musujsumalis, teyektachialis, kwajkwalan, ma shimusumakan pal muishtemuat tay ankinekit, ma shitzajtzayanikan wan ma shikchiwakan sejsectaj; 21 envidiaj, mutawantilis, yujyualu wan muchi ijkiuni. Naja nimetzinhilwia pal ankimatit, kenha ken nimetzinhilwija, ka ne ká kichiwat ijkiuni inte yawit kipiat ne itatekimakalis ne Teut.
22 Ne itakil ne Ijiutzin yaja tetasujtalis, pajpakilis, nejmachnemilis, weytejchialis, yejyek tutekiw, yek, tayulmatilis, 23 yulyamanikayu, wan ma inte tikchiwakan tay tikelewiat su te yek. Te kanaj nian se tajtuli ina ka te tiwelit tikchiwat ijkiuni. 24 Ká ne ipal ne Mawaltijtuk Yeshu, yejemet kicruzpilujtiwit ne inweyka, iwan ne itajtaekulis wan ne itajtaelewilis.
25 Su tiyujyultuk iwan Ijiutzin, shimuwikakan nusan iwan Ijiutzin. 26 Ma inte timumatikan wejwey melka inte tiwejwey, ma inte timunutzakan iwan kwalan, nian tikpiakan envidiaj sejse iwan sejse.
Shikpalewi mukniwan
6 Nukniwan, melka se tay teyek kitzkia se wan yaja wetzi, anmejemet ká ipal ne Ijiutzin shikpalewikan yajuni pal mukwepa iwan se anmuijiu ipal yulyamanikayu, wan shimupajpachiwi ma te shimuejeku taja nusan. 2 Shiksajsakakan anmukijkimil ne sejse ipal ne sejseuk, wan kiane anmutemasket ne itajtuli ne Mawaltijtuk, 3 ika su se kimati ka yaja wey wan yaja te tatka, mushijshikua. 4 Ma igustoj sejse itekiw, wan kwakuni yawi kipia taika muweymatiskia yajasan wan te ne seuk, 5 ika sejse kisajsaka ne ikimil isel.
6 Ne mumachtia ne palabraj, ma kipalewi ne tamachtia iwan muchi tay yejyek.
7 Maka shimushijshikukan, ka te welit tiajkawetzkat iwan ne Teut, ika ne ká tatuka, ijkiuni yawi tapishka. 8 Ika ne ká tatuka tik ne iweyka yawi kipishka itech iweyka puliwilis. Ne ká tatuka tik ne iijiu, yawi tapishka itech ne iijiu ma yultuk pal senpa. 9 Tejemet ká tikchiwat tay yek, ma te tikutiakan, ika kwak ajsi ne tunal ipal, su te timusewiat, tiawit titapishkat. 10 Yajika, ken tiwelit tikchiwakan tay yek iwan muchi, wan keski mas iwan ne tumiakwan ipal ne tayulmatilis.
Pal tami
11 Shikitakan ken wejwey ini letraj ne nikijkwilua anmupal iwan ne numey. 12 Muchi ne ká kinekit muishyektzinchiwat tik inweyka, yejemet metzinhilwiat ma shimuyawaltekikan semaya pal te mutalultiat ipanpa ne icruz ne Mawaltijtuk, 13 ika nian yejemetsan ne muyawaltektiwit tajpiat ne tajtuli, sute yejemet kinekit ma shimuyawaltekikan pal muweymatit ipanpa ne anmunakayu. 14 Naja te keman nimuweymatis, sute sema ipanpa ne icruz ne tutajtzin Yeshu Mawaltijtuk. Ipanpa mucruzpilujtuk nupal ne taltikpak, wan naja ipal ne taltikpak nusan. 15 Ika ne tayawaltekilis yaja inte tatka, wan ne tzuntepul nusan inte tatka; ashan muchijtuk se ká yankwik, 16 wan muchi ká ne taksasket kan ina ini tajshitilis, ma nemikan yek wan ma mupalewikan, wan ne Israel ipal ne Teut kenhaya.
17 Pal tami, ma te aka nechkakasu, ika naja nikwika tik ne nuweyka ne ipejpelech ne Yeshu.
18 Ma nemi ne itetasujtalis ne tutajtzin Yeshu Mawaltijtuk iwan ne anmuijiu, nukniwan. Amen.
Ne Bibliaj Tik Nawat · © 2008, 2012 Jan Morrow