Chronological
Yeshu kinutza Shaul
9 Ne Shaul kenhayuk nemituya tapitza iwan kwalan wan kinekituya kinmiktia ne imujmumachtiani ne Tajtzin. Yajki itech ne weypalej 2 wan kitajtan se amat pal kiwika pal ne kajkalsennemit ipal Damashek ina ka asu kinhajsi takamet wan siwatket ipal ne Ujti, weli kinhilpia wan kalinwika Yerushalem. 3 Yajki yajki, wan kwak tzinkiski yajki Damashek, mutawiluj nemanhachin iwan se tawil kistuk ka ilwikak, 4 wan wetzki talchi wan kikakik se kilwia:
—Shaul Shaul, taika tinechtalultia?
5 Inak:
—Ká taja, tajtzin?
Inak:
—Naja ni Yeshu, ká ne tiktalultia. 6 Shimuketza wan shu tik ne techan wan yawit metzilwiat tay nemi pal tikchiwa.
7 Nakaket ne iwan pashaluat ken ka inte welituyat taketzat. Melka kikakit, inte aka welit kitat. 8 Shaul muketzki wan kitapuj ne ijish wan inte welituya tachia. Kiwikaket itech ne imey wan kikalaktijket tik Damashek, 9 wan nemik yey tunal wan te kita tatka, wan te takwa nian ati katka.
10 Nemik se mumachtiani tik Damashek itukay Hananya, wan ne Tajtzin kilwij tik se tachialis:
—Hananya!
Yaja inak:
—Nikan ninemi, Tajtzin.
11 Wan ne Tajtzin:
—Shimuketza wan shu tik ne ujti ne muilwia Ujtimelawak, wan shikishtemu ichan Yuda se itukay Shaul ipal Tarsos, ika né nemi kinujnutza ne Teut, 12 wan kitztuk kalaki se takat tik se tachialis itukay Hananya wan kiteuchiwa, pal ma tachia.
13 Nankilij Hananya:
—Tajtzin, nikaktuk miak taketzat ipanpa uni takat, ká ne sujsul inteyek kinchiwilijtuk ne metzyulmatit tik Yerushalem; 14 wan ka nikan kipia tatuktilis wan ne weypalejmet pal kinhilpia muchi ká kinutzat ne mutukay.
15 Ne Tajtzin kilwij:
—Shu, ika yajane nikishpejpentuk ken nutaiwan pal kiwika ne nutukay itech tejtechan wan tatuktianimet wan Israeltekat; 16 ika naja niaw nikilwitilia keski nemi pal taekua ipanpa ne nutukay.
17 Yajki Hananya tel wan kalak ka ichan wan kiteuchij. Inak:
—Shaul, nuiknew, nechtitanijtuk ne Tajtzin Yeshu, ká ne kiski muishpan tik ne ujti kanka tiwalajtuk, ma shitachia wan ma shitemi iwan ne Ijiutzin.
18 Nemanha wetzket sejse ken iejewayu ijpak ne ijish wan welik tachia, wan muketzki wan mumakak ulyuj, 19 wan kwak tamik takwa, kikwij itajpal.
Shaul tik Damashek
Yaja nakak ankakeski tunal iwan ne mumachtianimet tik Damashek, 20 nemanha pejki tanajnawatia tik ne kajkalsennemit ipanpa ne Yeshu, wan ina ka yaja ne Itelpuch ne Teut. 21 Ishpuyawit muchi ne kikakit, wan inat:
—Su ini ne kinhijtakuj tik Yerushalem ne kinutzat ini itukay, wan walaj ka nikan pal kinwika ijilpituk intech ne weypalejmet!
22 Shaul chikawayak yajki wan kinmamalij ne Yudayujmet muchantiat tik Damashek tailwitia ka yajuni ne Mawaltijtuk.
23 Kwak panutiwit miak tunal, tajtaketzket ne Yudayuj pal kitat ken yawit kichiwat pal kimiktiat. 24 Ne Shaul kimatki tay kinekit. Kipachiwiat katka ne tenkal ka tunal wan ka tayua pal kimiktiat. 25 Ne imujmumachtiani kikwijket ka tayua wan kitemultijket itech ne tepanti ijtik se chikiwit.
Shaul tik Yerushalem
26 Kwak ajsik Yerushalem, yaja kinekik musalua itech ne mumachtianimet, wan muchi majmawit ika inte kimatit ka yaja se mumachtiani. 27 Bar-Naba kikwij wan kiwikak intech ne tijtitanijtuk wan kinneshtilij ken tik ne ujti kitak ne Tajtzin wan kinutzki wan ken tik Damashek tanawatij melaknaj tik itukay Yeshu. 28 Wan nakak inwan wan yawi katka wan witz katka tik Yerushalem, wan tanutza katka melaknaj tik itukay ne Tajtzin, 29 wan tanutza katka wan kintajtanilia ne Greciajtaketzat. Yejemet kiejekuat kitat ken yawit kimiktiat.
30 Ne tekniwan kishkejketzat katka wan kalkwijket ka Kaysarea wan kititanijket wejka hasta Tarsos.
31 Tik uni tujtunal muchi ne Sennemit nejmachnemi katka nujme Yudaya wan Galilaya wan Shamarea wan muishketza, wan yawi katka iwan mawi ipal ne Tajtzin, wan ne Ijiutzin kipalewia katka wan tepewik.
Pedro tik Lod wan Yapo
32 Pedro yajki pashalua nujme wan nusan ajsik intech ne tayulmatit ne nemit tik Lod. 33 Kiajsik ka ikuni se takat itukay Ayneas, inte welituya mijkwani wan kipiatuya chikwey shiwit wetztuk ijpak se tapech, 34 wan Pedro kilwij:
—Ayneas, Yeshu Mawaltijtuk metzpajtia. Shimuketza wan shitachayawa.
Wan muketzki nemanha, 35 wan muchi ne chanejket ipal Lod wan Sharon kitaket wan muishkwepket itech ne Tajtzin.
36 Tik Yapo, nemik se mumachtiani, se siwat itukay Tabita (kineki ina gacelaj), ká kichiwa katka miak itekiw yek wan tetasujtatakulis. 37 Tik uni tujtunal yaja kukushki wan mikik, wan kipakaket wan kitekaket tik se cuartoj. 38 Ken Lod inte nemi wejka Yapo, kwak ne mumachtianimet takakket ka Pedro nemituya ka né, kintitanijket ume takat itech kitajtanit:
—Maka shishtuna tiajsi tutech.
39 Pedro muketzki wan yajki inwan. Kwak ajsik, kikalaktijket tik ne cuartoj, wan muchi ne lamajtzitzinmet nakaket inawak chukat wan kilwitiliat ne wijwipil wan kwajkwachti ne kichiwa katka ne Tabita kwak nemituya inwan. 40 Ne Pedro kintuktij kisat muchi, wan mutankwaketzki wan kinutzki ne Teut, wan muishkwepki itech ne mikini wan inak:
—Tabita, shimuketza!
Yaja kitapuj ne ijish wan kitak Pedro; 41 kimakak ne siwat ne imey wan kiketzki. Kinnutzki ne tayulmatit wan ne lajlamajtzitzinmet, wan kishpanuj ne siwat yultuk. 42 Uni mumatki nujme Yapo, wan miak kiyulmatket ne Tajtzin. 43 Mukawki tik Yapo miak tunal ichan se kwetashchiwani itukay Shimon.
Cornelius
10 Nemik se takat tik Kaysarea itukay Cornelius, sentzuntuktiani ipal ne bandaj muilwia "Italica", 2 ká yek wan kitakamati ne Teut wan muchi tik ne ikal kenhaya, ne kichiwa katka miak tetasujtatakulis iwan ne techan wan mutajtawelia iwan ne Teut senpa. 3 Achka yey horaj ka teutak, yaja kitak tik se tachialis se tanawatiani ipal ne Teut ká ajsik itech wan kilwij:
—Cornelius!
4 Yaja tachishki wan inak iwan mawi:
—Tay, Tajtzin?
Kilwij:
—Ne mumujmutajtawelilis wan ne mutejtetasujtatakulis tejkutiwit ma muelnamikikan tik itachialis ne Teut. 5 Wan ashan, shiktukti takamet ka Yapo wan shalnutza se itukay Shimon wan itzuntukay Pedro. 6 Yaja mutakewa ichan ukse itukay Shimon ká kwetashchiwani wan kipia ne ikal itech ne weyat.
7 Kwak yajtuk ne tanawatiani ká ne kinutza, yaja kinnutzki ume kaltekitini wan se tasumani ká kitajpia katka, 8 wan kinneshtilij muchi, wan kintitanij ka Yapo.
9 Ne ukse tunal kwak yejemet yajket tik ne ujti wan pejket ajsit itech ne techan, kutejkuk Pedro itzunpan ne kal kinujnutza ne Teut achka tajkutunal. 10 Yaja sujsul mayana wan kinekituya takwa. Kwak nemituyat tamanat, walaj ijpak yaja se ishpuyawilis, 11 wan tachishki ka ikajku wan mutapuj ne ilwikak wan waltemuk se ken se wey kwachti temultijtuk itech ne nawi itzun, 12 wan ijtik yaja nemituyat muchi ne nawikshimet wan ulininimet ipal ne tal wan tujtutut ipal ne ilwikak. 13 Wan kikakik se ina :
—Shimuketza Pedro, shitamikti wan shitakwa!
14 Ne Pedro inak:
—Tesu Tajtzin, ka inte keman nikwajtuk tatka tay susulnaj wan te yek pal mukwi.
15 Wan senpa takakik ina:
—Tay ne Teut kipupujtuk, ma taja inte shikilwi susul!
16 Uni muchijki yeshpa wan nemanha mukwij ka ikajku ne taijtik.
17 Kwak ne Pedro mutajtanilia nemi tay kineki ina uni tachialis, né ajsiket ne takamet ne kintuktij ne Cornelius tajtanit kan nemi ne ikal Shimon, wan nakaket tik ne tenkal 18 wan tzajtzit pal tajtanit asu mutakewa ka né Shimon ne munutza Pedro. 19 Ne Pedro nemituya yultaketza ipanpa ne tachialis, wan ne Ijiutzin kilwij:
—Nikan nemit yey takat metztemuat. 20 Shimuketza, shikutemu wan shu inwan. Maka shimajmawi; naja nikintitanijtuk.
21 Pedro kutemuk, yajki itech ne takamet wan inak:
—Naja annechtemuat. Taika anwalajtiwit?
22 Inaket:
—Ne sentzuntuktiani Cornelius, se takat yek ne kitakamati ne Teut ká ne kishmatit muchi ne techan ipal ne Yudayujmet, kitztuk se tanawatiani ipal ne Teut ká kilwij ma walmetznutza ka ichan wan ma takaki mutech tay ne tikilwia.
23 Kilwij ma kalakikan tel, wan kintakejki.
Ne ukse tunal kiski inwan, wan sejse pal ne tekniwan ipal Yapo yajket nusan. 24 Ne ukse tunal ajsiket Kaysarea. Ne Cornelius nemituya kinchia wan kalinnutztuya ne imiakwan wan ne iajamigojwan yek. 25 Kwakuni kalakik Pedro pal kinamiki, wan ne Cornelio mutamutak talchi itech ne ijikshi mutankwaketza. 26 Ne Pedro kiketzki wan ina:
—Shimuketza, naja nusan nitakat!
27 Wan pejki tajtaketza iwan wan kalak, wan kalijtik kitak miak ká ajsitiwit, 28 wan kinhilwij:
—Ankimatit ka se Yudayuj inte nemi pal musalua nian musentepewa iwan se ipal tepal techan. Melka uni, naja nechmachtijtuk ne Teut ma inte nikilwi aka ka susulnaj nian ka inte yek pal mukwi. 29 Neka inte ninak tatka wan niwalaj kwak walnechnutzket. Taika tel anwalnechnutztiwit?
30 Wan ne Cornelius inak:
—Kichiwa nawi tunal, tik ini horaj, ninemituya niknujnutza ne Teut yey horaj ka teutak tik ne nukal, wan né nakak se takat nuishpan tik ikwajkwach yektzin, 31 wan inak:
"Cornelius, mukakik ne muteutajtanilis, wan ne mutejtetasujtatakulis muelnamiktiwit tik itachialis ne Teut. 32 Yajika, shitatukti ka Yapo wan shalnutza Shimon ne munutza Pedro. Yaja mutakewa ichan Shimon ne kwetashchiwani itech ne weyat."
33 Yajika nemanhachin nitatuktij mutech, wan tikchijki tay yek wan tiajsituk. Ashan tel muchi tejemet talejkutiwit iishpan ne Teut pal titakakit muchi tay ne metztuktijtuk ne Tajtzin.
34 Pedro mutenpeluj wan inak:
—Ashan nikejketza ka tejkia ka ipal ne Teut muchi tikenhat: 35 tik muchi ne tejtechan Yaja kikwi ká ne kitakamati wan ká kichiwa tay yek. 36 Yajini ne palabraj ne kititanij intech ne Israeltekat kwak tayeknawatij nejmachnemilis iwan Yeshu Mawaltijtuk. Yajuni ne Tajtzin ipal muchi. 37 Anmejemet kimatit tay muchijki nujme Yudaya: pejki tik Galilaya iwan ne teulyujmakalis ne tanawatij Yojan; 38 nusan ankimatit ken ne Teut kimawaltij Yeshu ipal Nazaret iwan ne Ijiutzin wan ne itajpal, wan yajaya panuk nujme kichiwa tay yek wan kinpajtia muchi ne nemituyat itan itajpal ne Tamintuk ika ne Teut nemituya iwan; 39 wan tikmatit muchi tay kichijki ijtik ne tal ipal ne Yudayujmet wan tik Yerushalem, wan ka kipilujket ijpak se kwawit wan kimiktijket. 40 Wan ne Teut kiyulkwiltij kwak panutiwit yey tunal, wan kiajkaw walmuneshtia, 41 inte iishpan muchi ne techan, semaya intech yejemet ká ne Teut kishpejpentuya achtu pal kitat wan inat ka ijkia, tejemet ká tisentakwajket wan tiatiket iwan kwak tamik miki wan walmuketztuk, 42 wan techtuktij ma tiknajnawatikan ne techan wan ma tikilwikan ka yajaya ne tuktijtuk ipal ne Teut ma kichiwa juzgar ne yujyultuk wan ne miktiwit. 43 Muchi ne taketzanimet inaket ipanpa ka ijtik ne itukay mutapupulwia tay tateyekchijtiwit muchi ká kiyulmatit.
44 Kwak Pedro tanutza nemi wan ina ini, wetzki ne Ijiutzin inhijpak muchi ne kikakit ne palabraj, 45 wan ishpuyajket ne tayulmatit yajyawaltektuk ne ajsitiwit iwan Pedro ika nusan ijpak ne uksejse techan mukushinijtuya ne tetakulis ipal ne Ijiutzin, 46 ika kikakket tanutzat tik tajtaketzalis wan inat ka wey ne Teut. Kwakuni inak Pedro:
47 —Tay anhinat? Weli aka ina ka inte yawi kinmaka at pal mumakat ulyuj ká ne kinkwijtuk ne Ijiutzin kenha ken metzinkwijtuk anmejemet?
48 Kintuktij ma mumakakan ulyuj tik ne itukay Yeshu Mawaltijtuk. Kwakuni kitajtanket ma mukawa inwan ankakeski tunal.
Ne Bibliaj Tik Nawat · © 2008, 2012 Jan Morrow