Chronological
1 Naja, Pawlo, ne nutztuk pal nimuchiwa ititanijtuk ne Mawaltijtuk Yeshu ipanpa itaelewilis Teut, wan ne tuiknew Sostenes, 2 tiktuktiat ini tajkwilul itech ne sennemit tik Korinto, itech ne teujteuchijtuk tik ne Mawaltijtuk Yeshu, nujnutztuk pal tayulmatit, iwan muchi ne kinutzat ne itukay ne tutajtzin Yeshu Mawaltijtuk nujme, ijtik yejemet wan ijtik tejemet: 3 ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.
4 Senpa nikilwia ne Teut panpadiush anmupanpa ika ne Mawaltijtuk Yeshu metzinmakatuk ne itetasujtalis ne Teut, 5 pal kiane yaja yawi metzintepewilia muchi tik pajpalabraj wan tik tamatilis, 6 ijkiunisan ken tay ne inak wan kichijki ne Mawaltijtuk muilwitijtuk ka tejkia ijtik anmejemet. 7 Kiane, anmejemet inte metzinchiwa faltaj nian se tetakulis pal ma shikchiakan ne taneshtilis ipal tutajtzin Yeshu Mawaltijtuk. 8 Wan yaja inas ka anyejyek nian ankichijtiwit tatka tay teyek hasta ma tami muchi tik ne tunal ipal ne tutajtzin ne Mawaltijtuk Yeshu. 9 Yek ne Teut! Yajaya metzinnutztuk ma shisennemikan iwan ne ikunew Yeshu Mawaltijtuk, ne tutajtzin.
Ne sesankayu ipal ne sennemit itan Yeshu
10 Nimetzintajtani, nukniwan, ipanpa ne itukay ne tutajtzin Yeshu Mawaltijtuk, ma shinakan muchi kenha wan ma te shitzayanikan; ma shinakakan pijpiktuk ken sesan tik ne tay anmejemet yultaketzat wan inat.
11 Nukniwan, ne chanejket ipal ne ikal Kloe nechneshtilijtiwit ka anmusumat anmutzalan. 12 Nina uni ika sejse anmejemet ina: "Naja niipal Pawlo", "Naja niipal Apolos", "Naja niipal Kepas", "Naja niipal ne Mawaltijtuk". 13 Anka mutajkutijtuk ne Mawaltijtuk? Anka Pawlo mucruzpiluj anmumaku? Anka anmumakaket ulyuj tik itukay Pawlo? 14 Nikilwia ne Teut panpadiush ka te nikmakak ulyuj nian se anmejemet, semaya Crispus wan Gaius, 15 ma te aka weli ina ka anmumakaket ulyuj tik nutukay! 16 Nusan nikmakak ulyuj ne chanejket ipal ne ikal Estepanas. Te nikmati su nikmakak seuk ulyuj.
17 Ika ne Mawaltijtuk te nechtitanij pal nitamaka ulyuj sute pal nitayeknawatia; te tik itamatilis palabraj, pal te mukwepa te tatka ipatiw ne icruz ne Mawaltijtuk.
18 Ne palabraj ipal ne cruz, ipal ne puliwit yaja chachalakalis, wan tupal ne timupalewiat yaja itajpal Teut, 19 ika muijkwilujtuk:
"Niaw nikwilewa ne itamatilis ne kimatit wey,
wan ne tay kimatit ne mumachtijtiwit naja nikpulus."
20 Kan nemi ne kimati wey? Kan ne tajkwiluani? Kan ne tajtani wey ipanpa ini taltikpak? Anka ne Teut te kilwitijtuk ka chachalakalis ne tamatilis ipal ne taltikpak? 21 Ika, ipanpa ne itamatilis ne Teut ne taltikpak te kishmatki ne Teut iwan tamatilis, kitak yek ne Teut ma kipalewi ne tayulmatit iwan ne chachalakalis ipal ne tanajnawatilis. 22 Ika ne Yudayujmet tajtanit se pal muishmati wan ne Greciajtakamet kitemuat tamatilis. 23 Tejemet titanajnawatiat ne Mawaltijtuk cruzpilujtuk: ipal ne Yudayujmet tatzunchaluas, ipal ne tejtechan chachalakalis; 24 ipal ne nujnutztuk Yudayujmet wan Greciajtakamet, ne Mawaltijtuk itajpal ne Teut wan itamatilis ne Teut. 25 Ika ne tzuntet ipal ne Teut kimati mas que ne takamet, wan ne kukuyanit ipal ne Teut mas tajtajpaltik que ne takamet.
26 Shikitakan ne anmutanutzalis, nukniwan: ka te mijmiak ne kimatit wey tik inweyka; te mijmiak ne welit wey; te mijmiak ne wejweymet. 27 Ne Teut kishpejpentuk tay ne tzuntet tik ne taltikpak pal kichiwa ma ishpinawakan ne kimatit wey, wan ne Teut kishpejpentuk ne kukuyanit ipal ne taltikpak pal kichiwa ma ishpinawakan ne tajtajpaltik, 28 wan ne Teut kishpejpentuk ne chijchikitik ipal ne taltikpak wan ne muilwiat ka te tatka inpatiw, yejemet ká te tatka, pal kinpulua ne ká nemit, 29 pal kiane ma te muweymati nian se ká kipia iweyka tik itachialis ne Teut; 30 wan ipanpa, anmejemet nemit ijtik ne Mawaltijtuk Yeshu, ká tupal ne Teut kikweptuk tamatilis, wan tamelakchiwalis wan tateuchiwalis wan tamakishtilis, 31 pal muchiwa ijkiunisan ken muijkwilujtuk: "Ká ne muweymati, tik ne Tajtzin muweymatis."
2 Kwak naja niajsik anmutech, nukniwan, te iwan pajpalabraj wey o wey tamatilis nimetzinnawatij ne ichtaka ipal ne Teut, 2 ika ninak ka te niaw nikmati tatka ijtik anmejemet, sema Yeshu Mawaltijtuk wan yajaya cruzpilujtuk. 3 Wan naja nikukushki wan nimajmawki wan nijtzilikak sujsul anmutech, 4 wan ne nupalabraj wan ne nutanajnawatilis te nimetzinhilwij iwan pajpalabraj ipal tamatilis sute sema nimetzinhilwitilij iijiu wan itajpal, 5 pal kiane ma shitayulmatikan te ipanpa itamatilis takamet sute ipanpa itajpal Teut.
6 Ijtik ne ujuksituk kia titanutzat iwan tamatilis: ne itamatilis ini taltikpak te, nian ne itamatilis ne tatuktianimet ipal ini taltikpak ká puliwit, 7 sute titanutzat iwan ne itamatilis Teut ken se ichtaka, ken se inashtuk, tay ne tatuktij ne Teut kwak teuk pejki muchi, pal titzitzinakat, 8 wan nian se ipal ne tatuktianimet ipal ne taltikpak kimati katka, ika su kimattuskiat, te kicruzpilujtuskiat ne Tajtzin tzitzinaka.
9 Wan ken muijkwilujtuk:
"tay ne te aka kitztuk iwan iish nian kikaktuk iwan itakakilis wan nusan te muishtukak tik iyulu takat, tay ne kiekchijtuk ne Teut ipal ká ne kitasujtat",
10 tejemet techneshtilijtuk ne Teut itech ne Ijiutzin, ika ne Ijiutzin kimati muchi hasta ne tay muilwia ne Teut tik iyulu. 11 Ika ká kimati tay kipia se takat tik iyulu, sute ne iijiu uni takat ne nemi ijtik yaja? Wan ijkiuni te aka kimati tay kipia ne Teut tik iyulu sute ne iijiu ne Teut. 12 Tejemet te tikwijtiwit ne iijiu ne taltikpak sute ne Ijiutzin ne kistuk itech ne Teut, pal tikishmatit ne tay techtakulijtuk ne Teut.
13 Wan tay ne titanutzat, te tinat tik pajpalabraj timumachtijtiwit itech itamatilis takat sute tay ne timumachtijtiwit itech Ijiutzin, wan tiksenpepetat tay ipal tuijiu iwan tay ipal tuijiu. 14 Ne takat ne isel itunal kipia te kikwi tay ipal ne Iijiutzin ne Teut, ika ina ka ipal melemet, nian weli kishmati, ika sema iwan tuijiu weli muishketza. 15 Ká ne kipia iijiu kishketza muchi; wan yajane te aka weli kishketza.
16 Ká weli kishmati ne itamatilis ne Teut pal ma kilwiti?
Tejemet tikpiat ne itamatilis ne Mawaltijtuk.
3 Nukniwan, naja te niwelituya nimetzinnutza ken sejse kipiat iijiu sute ken sejse ipal innakayu, ken sujsulin ipal ne Mawaltijtuk; 2 nimetzinchichik, te nimetzintakwaltij ika te anwelituyat, wan teuk anwelit ashan, 3 ika anmejemet sejse ipal anmunakayu kenhayuk. Ika kan nemi anmutzalan kwalan wan musumalis, muita ka anmejemet sejse ipal anmunakayu wan anmuwikat ken takamet, 4 ika kwak ne se ina: "Naja niipal Pawlo", wan ne seuk: "Naja niipal Apolos", kineki ina ka antakamet.
5 Ká tel Apolos? Ká Pawlo? Titekitinimet. Tupanpa tayulmatket, sejse ken ne Tajtzin kimakatuk. 6 Naja nitatukak, Apolos atek. Ká ne tiskalij, yaja ne Teut. 7 Yajika, te tatka nian ne ká tatuka nian ne ká ateki, sute ne tiskalia: ne Teut. 8 Ne tatuka wan ne ateki sesan. Yawit kikwit sejse ipatiw ipatka ne itekiw sejse, 9 ika tiisejsentekitini Teut. Imil Teut, ihaciendaj Teut anmejemet.
10 Iwan ne tay ne Teut nechtakulijtuk, ken se wey kalketzani niktukak se tetzilnaj. Seuk kiketza ne kal. Ma kita sejse ken kalketza. 11 Te aka weli kituka ukse tetzilnaj, sema ne mutukak. Yaja Yeshu Mawaltijtuk. 12 Su aka kiketza ijpak ne tetzilnaj iwan teukwit, tumin, kujkusti, kwawit, sakat o ijikshi tatuk, 13 ne itekiw sejse yawi muita ika ne tunal yawi kineshtia: yawi muneshtia tik tit, wan tit yawi kiejekua pal muita ken ne itekiw sejse. 14 Su naka ne itekiw se, ne kalketzani yawi kikwi ipatiw. 15 Su tata ne itekiw se, ne kalketzani yawi kipulua. Yaja yawi mumakishtia sema ijkiuni, iwan tit.
16 Te ankimatit ka anmejemet iteupantzin Teut wan ne Teut muchantia ijtik anmejemet? 17 Su aka kishpulua ne iteupantzin ne Teut, ne Teut kishpulus yajane, ika uni tay ipal ne Teut uni teupantzin, wan anmejemet ne.
18 Ma te aka mushijshikua: su se anmejemet muita ka kimati wey tik ini taltikpak, ma muchiwa tzuntet pal mukwepa se ká kimati, 19 ika ne tamatilis ipal ini taltikpak, ipal ne Teut yaja chachalakalis. Ika muijkwilujtuk:
"Kinhitzkia ne tamatinit ijtik intajtajpewal."
20 Wan ukseujti:
"Tutajwan kimati ka te tatka tay ne mutajtaniliat ne tamatinit."
21 Yajika, ma te aka muweymati ipanpa takamet. Ika muchi anmupal, 22 su Pawlo, su Apolos, su Kepas, su taltikpak, su nemilis, su mikilis, su ne ashkan, su ne musta, muchi anmupal. 23 Anmejemet ipal ne Mawaltijtuk. Ne Mawaltijtuk ipal Teut.
4 Ma techishkejketza se ken itejtekitini ne Mawaltijtuk wan kalpianimet ipal ijichtaka Teut. 2 Nikan mutemua ijtik ne kalpianimet ma se muajsi melawak. 3 Nupal tel, su anhinat su naja niyek o te, te kineki ina tatka, nian su ina se kalpuli ipal takamet; naja nusan te nimupepeta nusel, 4 ika naja te nimumaka cuentaj, melka uni te kineki ina ka naja niyek! Ká ne ina su niyek, yaja ne Tajtzin. 5 Yajika maka shikchiwakan juzgar achtu ma wiki ne Tajtzin, ká yawi kitawilua tay minashtuk tik takumi wan yawi kineshtia tay kinekit ne tuyujyulu, wan kwakuni ne Teut yawi ina ka tiyejyek sejse ika.
6 Muchi uni, nukniwan, ninatuk nupanpa wan ipanpa Apolos ka anmumaku pal anmumachtiat tuwan ini: ma te shiktalikan tatka ijpak ne tay muijkwilujtuk, pal te anmuishpitzat ne se ijpak ne seuk pal ankitenewat ne sekit. 7 Ika ká metzishtemua? Tay tikpia tay te metzmakatiwit? Taika timuweymati ken su te metzmakatuskiat?
8 Anhishwitiwita! Ankipiata wey! Anmukweptiwit tatuktianimet wan tejemet inte!
Naja niknekiskia ma ijkia, ika su anmejemet tatuktiskiat, tejemet nusan titatuktiskiat anmuwan!
9 Ika nimutajtanilia su ne Teut techilwitijtuk ne tijtitanijtuk ken ne tijtipan wan ne yawit mikit, ika timuchijtiwit sejse pal muchi tachiat wan techpakiliat, tanawatianimet wan takamet kenha: 10 tejemet timejmelemet ipal ne Mawaltijtuk, anmejemet ne kimatit tay muneki muchiwa ipal ne Mawaltijtuk; tejemet te tiwelit tatka, anmejemet ne tajtajpaltik; anmejemet ne yejyek, tejemet te! 11 Hasta seman kenhayuk timayanat wan tiamikit wan tipejpetznaj wan techchajchaluat wan te tikpiat kal 12 wan tikujkutiat titekitit iwan tujtumey; techtejtenewat, wan tinat ka wey; techtalultiat, wan muchi tikseliat; 13 inat tay teyek tupanpa, wan timutajtaweliat; timuchijtiwit ken ijijishtuk ipal muchi wan tajtalmatznaj hasta ashan.
14 Te nikijkwilua ini ma shishpinawakan sute pal nimetzinnawatia ken nupilawan ká niktasujta, 15 ika melka ankipiat miak tamachtiani ipal ne Mawaltijtuk, chiupi anmuteku ankipiat. Naja nimetzinpunijtuk itech ne Mawaltijtuk Yeshu iwan ne yeknawatilis. 16 Nimetzintajtani tel ma shimuchiwakan ken naja. 17 Yajika niktuktijtuk Timoteo anmutech. Yaja nukunew tasujtatuk, wan yulmelawak tik ne Tajtzin. Yaja yawi metzinneshtilia nujnuuj tik ne Mawaltijtuk Yeshu, kenha ken nujme nitamachtia tik muchi ne sejsennemit.
18 Ken su te niajsiskia anmutech muishpitztiwit sejse. 19 Niaw niajsi anmutech talul, su ne Tajtzin kineki, wan niaw nikishmati te ne inpajpalabraj ne muishpitztiwit sute ne intajpal, 20 ika te tik pajpalabraj nemi ne itatekimakalis ne Teut sute tik itajpal. 21 Tay ankinekit? Ma niajsi anmutech iwan se kwawit o iwan tetasujtalis wan se nuijiu yulyamanik?
Ne Bibliaj Tik Nawat · © 2008, 2012 Jan Morrow