M’Cheyne Bible Reading Plan
मूसा इस्राएल क लोगन क आसीर्बाद देत ह
33 मरइ क पहिले परमेस्सर क मनई मूसा इस्राएल क लोगन क इ वरदान दिहस: 2 मूसा कहेस,
“यहोवा सिनाइ स आवा।
यहोवा सेईर क भिन्सारे क रोसनी क नाई चमका।
उ पारान पहाड़े स फूटइ वाला प्रकास क नाई रहा।
यहोवा दस हजार पवित्तर लोगन क संग आवा।
ओकरी दाहिन कइँती बलवान सिपाही रहेन।
3 हाँ, यहोवा पिरेम करत ह मनइयन स
सबहिं पवित्तर मनइयन ओकरे हथवन मँ अहइँ अउर चलत हीं
उ ओकरे पद चीन्हन पइ हर एक मनई अंगीकार करता ओकर उपदेस।
4 मूसा दिहस नेमन हम पचन्क उ सबइ-जउन अहइँ
याकूब क सबहिं लोगन क।
5 उहइ समइया, इस्राएल क लोग अउ नेता लोग मिलेन
अउ यहोवा भवा यसूरुन क राजा।
रूबेन क आसीर्बाद
6 “रूबेन जिअत रहइ, उ न मरइ होइ सकत ह रूबेन जिअत रहा उ न मरइ,
मुला ओकर बंस मँ मनइयन अधिक न होब।”
यहूदा क आसीर्बाद
7 मूसा यहूदा क परिवार समूह बरे इ सबइ बातन कहेस:
“यहोवा, सुन लेइ यहूदा क प्रमुख क जब उ माँगइ मदद लिआवइ ओका
आपन लोगन मँ सक्तीसाली बनावइ ओका,
करइ मदद ओकर
दुस्मन क हरावइ मँ!”
लेवी क आसीर्बाद
8 मूसा लेवी क बारे मँ कहेस:
“तोहार मनवइयन सच्चा लेवी धारण करत ऊरीम-तुम्मीम,
मस्सा पइ तू लेवी क परीच्छा लिहा,
तोहार विसेख मनई राखत रहा ओनका।
लड़ा तू रह्या ओकरे बरे मरीबा क जलासयन पइ।
9 लेवी बताएस आपन महतारी-बाप क बारे मँ:
मइँ न करब ओनकइ परवाइ,
मानेस नाहीं उ आपन भाई क,
या जानेस आपन गदेलन क;
लेवीबंसियन पालेन आदेस तोहार,
अउर निभाएन वाचा तोहसे जउन।
10 उ पचे सिखइहीं याकूब क नेम तोहार
अउर इस्राएल क व्यवस्था जउन तोहार।
उ पचे सुलगइहीं सुगन्धि तोहार आगे अउ तोहार सारी होमबलि वेदी क जगह पइ।
11 “यहोवा, ओकर धन क आसीर्बाद द्या
अउर ओकर काम क अंगीकार किहेस।
उ ओका नास कइ द्या जउन उ पइ हमला किहेस अउ ओका हराइ द्या जउन
ओहस घृना किहेस इस प्रकार उ फुन हमला नाहीं कइ सकत।”
बिन्यामीन क आसीर्बाद
12 बिन्यामीन क बारे मँ मूसा कहेस:
“यहोवा क पिआरा ओकरे संग
सुरच्छित होइ।
यहोवा आपन पिआरा क रच्छा करत सारा दिन,
अउर बिन्यामीन क भुइँया पइ रहत यहोवा।”
यूसुफ क आसीर्बाद
13 मूसा युसुफ क बारे मँ कहेस:
“यहोवा द्या आसीर्बाद ओकरे देस क सरग क
उन्तिम बर्खा जहाँ होइँ;
अउ धरती क तले स पानी अउ ओस मिलइ।
14 सूरज क दीन्ह उत्तिम फल होइँ ओकर
अउर हर महीना मँ सब स बढ़िया फल होइँ।
15 पहाड़ियन अउ पुरान पहाड़न
सब स बढ़िया फल उपजावइँ।
16 धरती देइ सब स बढ़िया फल यूसुफ बरे
उ जउन भाइयन स अलगाइ दीन्ह ग रहा।
तउ परमेस्सर जउन बरत भइ झाड़ी मँ रहत ह
स सब स बढ़िया बरदान देइ यूसुफ क।
17 यूसुफ आपन गोरु क पहिला पइदा भवा क गौरव पाइ।
ओकर दुइनउँ बेटवन बर्धा क सींगे क तरह अहइँ।
उ पचे रास्ट्रन क धरती क आखिरी छोर तलक छेद देब।
ओन मँ स हजारन क हजार मनस्सप स अहइ
अउर ओन मँ स दसन हजार एप्रैम स ह।”
जबूलून क आसीर्बाद
18 जबूलून क बारे मँ मूसा कहेस:
“जबूलून, खुस रहा जा जब बाहेर
अउर इस्साकार, खुस रहइ आपन सिबिर पइ।
19 उ पचे लोगन क न्यौतिहीं आपन पहाड़े पइ
हुआँ करिहीं भेंट सबहिं सच्ची बलि
काहेकि उ पचे लोग सागर स निकारत हीं धन
अउर पइहीं बालू मँ छिपा भवा जउन धन अहइ।”
गाद क आसीर्बाद
20 मूसा गाद क बारे मँ कहेस:
“स्तुति करा परमेस्सर क जउन गाद क बढ़ावत ह।
गाद ओलरा रहत अउ जोहत सिंह क नाई,
उ फड़ि देत ह बाजु अउ मूँड़े क टूकन मँ।
21 आपन खातिर चुनत ह उ,
सब स खास हींसा राजा बरे सुरच्छित रहब।
मनइयन क नेतन आवत हीं ओकरे लगे।
उ करत ह उहइ जउन परमेस्सर क इच्छा बा।
अउर यहोवा बरे इस्राएलियन क संग निआव करत ह।”
दान क आसीर्बाद
22 दान क बारे मँ मूसा कहेस:
“दान सेरे क बच्चा अहइ
जउन बासान स उछरा करत ह।”
नप्ताली क आसीर्बाद
23 नप्ताली क बारे मँ मूसा कहेस:
“नप्ताली, तू बहोतइ बढ़िया चीजन क रखब्या।
यहोवा क आसीर्बाद तोहरे बारे भरपूर अहइ,
लइ ल्या पच्छिम अउ दक्खिन क प्रदेस।”
आसेर क आसीर्बाद
24 मूसा आसेर क बारे मँ कहेस:
“आसेर क पूतन मँ सब स जियादा अहइ आसीर्बाद,
ओका आपन भाई लोगन मँ सब स पियारा होइ द्या
अउ ओका आपन गोड़ तेल स धोवइ द्या।
25 तोहरे फाटकन क ताला होइहीं लोहा अउ काँसा क
तू जिन्नगी भइ सक्ती स भरपूर रहब्या।”
मूसा परमेस्सर क स्तुति करत ह
26 “यसूरुन, परमेस्सर क नाई नाहीं अहइ
अउर कउनो परमेस्सर आपन महिमा मँ चलत ह चढ़िके बदरा पइ,
अकासे स होइके आवत ह मदद करइ तू पचन्क।
27 परमेस्सर सास्वत अहइ तोहार सरण सुरच्छित अहइ।
परमेस्सर क सक्ती सास्वत अहइ उ तोहार सुरच्छा करत ह
अउर बल स हटावत ह दुस्मनन क,
कहत ह उ ‘नास करा दुस्मनन क।’
28 तउ इस्राएल सुरच्छित रही सदा
याकूब क जलस्रोत सुरच्छित अहइ धरती मँ।
अन्न अउ नइ दाखरस क पइहीं सुन्नर धरती मँ
अउ उ भुइँया सूबइ पाइ।
29 इस्राएलियो, तू पचे आसीस पाए अहा तोहार जइसा कउनो रास्ट्र नाहीं।
तू यहोवा क दुआरा सुरच्छा पाउब्या।
उ तोहार सुरच्छा ढाल अहइ।
यहोवा अहइ विजय तरवार तोहार करइ वाली।
तोहार दुस्मनन तोहसे डेरइहीं,
अउर तू रउँद देब्या ओनकइ लबार देवतन क ठउरन क।”
मूसा क मउत
34 मूसा मोआब क समतल पहँटा स नबो पहाड़े पइ गवा जउन यरीहो क पार पिसगा क चोटी पइ रहा। यहोवा ओका गिलाद स दान तलक सारा प्रदेस देखाएस। 2 यहोवा ओका सारा नप्ताली, जउन एप्रैम अउ मनस्से क रहा, देखाएस। उ पस्चिमी सागर तलक यहूदा क प्रदेस देखाएस। 3 यहोवा मूसा क खजूरे क बृच्छन क सहर सोअर स यरीहो तलक फइली घाटी अउर नेगेव देखाएस। 4 यहोवा मूसा स कहेस, “इ उ देस अहइ जेका मइँ इब्राहीम, इसहाक, अउर याकूब क बचन दिहे रहेउँ कि, ‘मइँ इ देस क तोहरे सन्तानन क देब। मइँ तू पचन्क इ देस देखाउब। मुला तू पचे हुआँ जाइ नाहीं सकत्या।’”
5 तब यहोवा क सेवक मूसा मोआब देस मँ उहइँ मरा। यहोवा मूसा स कहे रहा कि अइसा होइ। 6 यहोवा बेतपोर क पार मोआब प्रदेस क घाटी मँ मूसा क दफनाएस। मुला आजु भी कउनो नाहीं जानत कि मूसा क कब्र कहाँ बाटइ। 7 मूसा जब मरा उ एक सौ बीस बरिस क रहा। ओकर आँखिन कमजोर नाहीं रहिन। उ तब भी बलवान रहा। 8 इस्राएल क लोग मूसा बरे मोआब क खाले प्रदेस मँ तीस दिना तलक रोवत पीटत रहेन। इ सोक मनावइ क पूरा समइ रहा।
यहोसू मूसा क जगह लेत ह
9 तब नून क पूत यहोसू बुध्दिमत्ता क आतिमा स भरपूर रहा काहेकि मूसा ओह पइ आपन हाथ धइ दिहे रहा। इस्राएल क मनइयन यहोसू क बातन मानेन। उ पचे वइसा ही किहन जइसा यहोवा मूसा आदेस दिहे रहा।
10 मुला उ समइ क पाछे, मूसा क नाईं कउनो नबी नाहीं भवा। यहोवा परमेस्सर मूसा क प्रत्यक्ष जानत रहा। 11 कउनो दूसर नबी उ सारे चमत्कार अउ अचरज भरा काम नाहीं देखाएन जेनका करइ बरे यहोवा मूसा क मिस्र क भुइँया मँ पठए रहा। उ पचे चमत्कार अउ अचरज, फिरौन, ओकर सबइ सेवकन अउ मिस्र क सबहिं वस्तुअन बरे करइ ग रहेन। 12 कउनो दूसर नबी कबहुँ ओतना सक्तीसाली अउ अचरज भरा चमत्कार नाहीं किहस जउन मूसा किहस अउर जेनका इस्राएल क सबहिं लोग लखेन।
कोफ़
145 सम्पूर्ण मन स यहोवा मइँ तोहका गोहरावत हउँ, मोका जवाब द्या।
मइँ तोहरे आदेसन क पालन करत हउँ।
146 हे यहोवा, मोर तोहसे बिनती बाटइ।
मोका बचाइ ल्या।
मइँ तोहरी करार क पालन करब।
147 यहोवा, मइँ तोहरी पराथना करइ क भोर क तड़के उठा करत हउँ।
मोका ओन बातन पइ भरोसा अहइ, जेनका तू कहत ह।
148 पूरी रात मइँ तोहरे वचन पइ
बिचार करइ बरे बइठा रहत हउँ।
149 हे यहोवा, तू आपन पूरे पिरेम स मोह पइ कान द्या,
तू वइसा ही करा जेका तू ठीक कहत ह, अउर मोर जिन्नगी बनाए राखा।
150 लोग मोरे बिरूद्ध कुचक्र रचत अहइँ अउर मोर कइँती आवत हीं।
अइसे इ सबइ लोग तोहरी सिच्छन पइ चला नाहीं करतेन।
151 मुला तू मोरे लगे अहा।
तोहरे सबइ आग्यन पइ बिस्सास कीन्ह जाइ सकत ह।
152 बहोत दिनन पहिले ही तोहार करार दुआरा मइँ सीख लिहे रहेउँ
कि ओकर नींव सदा बरे डाली गइ अहइ।
रेस
153 हे यहोवा, मोर यातना क लखा अउर मोका बचाइ ल्या,
मइँ तोहरे उपदेसन क बिसरा नाहीं अहउँ।
154 हे यहोवा, मोरे मुकदद्मा बरे बहस करा अउर मोका छुरावा।
कृपा कइके मोका तोहार वाचा क अनुसार जिअइ द्या।
155 दुट्ठ बिजयी नाहीं होइहीं।
काहेकि उ पचे तोहरे विधान पइ नाहीं चलत अहइँ।
156 हे यहोवा, तू बहोत दयालु अहा।
आपन नीक सासन क अनुसार मोका फुन स जिन्नगी द्या।
157 मोर बहोत स सत्रु अहइँ जउन मोका हानि पहोंचावइ बरे जतन करतेन;
मुला मइँ तोहरी करार क अनुसरण नाहीं तजेउँ।
158 मइँ ओन बिस्सासघातियन क लखत हउँ।
उ पचे तोहरे बचन क पालन नाहीं करतेन।
मइँ ओनका तजि दिहेउँ ह।
159 लखा, मइँ तोहार उपदेसन स पिरेम करत हउँ।
हे यहोवा, कृपा कइके मोका तोहरे दयालु पिरेम स जिअइ द्या।
160 सुरू स ही तोहार सबहिं वचन बिस्सास क जोग्ग रहेन ह।
अउर तोहार खरा फइसलन सदा बरे रहिहीं।
सीन
161 सक्तिसाली नेता मोह पइ बियर्थ ही वार करत हीं,
मुला मइँ डेरात हउँ अउर बस तोहरे वचन क मइँ आदर करत हउँ।
162 तोहार बचन मोका वइसेन आनन्दित करत हीं,
जइसा एक जोद्धा आनन्दित होत ह, जेका अबहुँ अबहुँ कउनो जुद्ध क लूट क माल मिल गवा होइ।
163 मइँ झूठ क नकारत हउँ। मइँ ओहसे घिना करत हउँ।
किन्तु, मइँ तोहरी सिच्छन स पिरेम करत हउँ।
164 मइँ दिन मँ सात दाई तोहरे उत्तिम फइसला बरे
तोहार स्तुति करत हउँ।
165 उ पचे लोगन बहोत सान्ति पइहीं, जउन तोहार सिच्छन स पिरेम करत हीं।
ओका कछू भी गिराइ नाहीं पाई।
166 हे यहोवा, मइँ तोहरी प्रतीच्छा मँ हउँ कि तू मोर रच्छा करा।
मइँ तोहरे आग्यन क पूरा किहेउँ ह।
167 मइँ तोहरी करार पइ चलत रहत हउँ।
हे यहोवा, मोका तोहरे विधान स गहन पिरेम अहइ।
168 मइँ तोहरी करार क अउ तोहरे उपदेसन क पालन किहेउँ ह।
तू सब कछू जानत ह जउन मइँ किहेउँ ह।
ताव
169 हे यहोवा, मदद बरे लगावा गवा मोर उँच गोहार तोहे तलक पहोंचइ
मोका बुद्धिमान बनावा जइसा तू वचन दिहा ह।
170 हे यहोवा, मोर बिनती सुना।
तू जइसा वचन दिहा मोर उद्धार करा।
171 मइँ बड़कई क गुण गावत हउँ।
काहेकि तू मोका आपन कानून सिखाया ह।
172 मोका तू आपन गीत गावइ द्या।
काहेकि तोहार सबइ आग्यन सच्चा अहइँ।
173 तू मोरे लगे आवा, अउर मोका सहारा द्या
काहेकि मइँ तोहरे आदेसन पइ चलब चुन लिहेउँ ह।
174 हे यहोवा, मइँ इ चाहत हउँ कि तू मोर उद्धार करा,
तोहार सिच्छन मोका खुस करत हीं।
175 मोका जिअइ द्या तउ मइँ तोहार स्तुति कइ सकेउँ।
तोहार आदेस स मोका मदद मिलइ द्या।
176 एक ठु खोइ भइ भेड़ क तरह,
मइँ आपन रास्ता भटक गएउँ ह।
आपन सेवक, मोका तलास करा,
अउर मइँ तोहरे आग्यन क बिसरा नाहीं हउँ।
परमेस्सर आवति अहइ
60 “हे यरूसलेम, हे मोर प्रकास, तू उठि जागा।
तोहार प्रकास (परमेस्सर) आवत रहा बाटइ।
यहोवा क मिहिमा तोहरे ऊपर चमकी।
2 आजु अँधियारा सारा जहान अउर ओकरे लोगन क ढक रखे अहइ।
मुला यहोवा क तेज परगट होइ
अउर तोहरे ऊपर चमकी।
ओकर तेज तोहरे ऊपर देखाई देइ।
3 उ समय सबहिं देस तोहरे प्रकास क लगे अइहीं।
राजा तोहरे भव्य तेज क लगे अइहीं।
4 आपन चारिहुँ कइँती लखा।
लखा, तोहरे चारिहुँ कइँती लोग एकट्ठा होत अहइँ अउर तोहरी सरण मँ आवत अहइँ।
इ सबइ सबहिं लोग तोहार पूत अहइँ जउन दूर बहोत दूर स आवत अहइँ
अउर ओनके संग तोहार बिटियन आवत अहइँ।
5 “अइसा भविस्स मँ होइ अउर अइसे समय मँ जब तू आपन लोगन क लखब्या
तब तोहार मुँह खुसी स चमक उठिहीं।
पहिले तू उत्तेजित होब्या किन्तु फुन आनन्दित होब्या।
समुद्र पार देसन क सारी
धन दौलत तोहरे समन्वा धरी होई।
तोहरे लगे देसन क सम्पत्तियन अइहीं।
6 मिद्यान अउर एपा देसन क ऊँटत क झुण्ड तोहार धरती क ढाँपि लेइहीं।
सिबा क देस स ऊँटन क लम्बी कतारन तोहरे हिआँ अइहीं।
उ पचे सोना अउर सुगन्ध लइहीं।
लोग यहोवा क खुसी क गीत गइहीं।
7 केदार क भेड़िन एकट्ठी कीन्ह जइहीं
अउर तोहका दइ दीन्ह जइहीं।
नबायोत क मेढ़न तोहरे बरे लिआवा जइही।
उ पचे मोर वेदी पइ स्वीकार करइ क लायक बलियन बनिहीं
अउर मइँ आपन अद्भुत मन्दिर
अउर जियादा सुन्नर बनाउबउँ।
8 एन लोगन क लखा!
इ सबइ तोहरे लगे जल्दी मँ आवत अहइँ जइसे मेघ अकास क जल्दी पार करत हीं।
इ सबइ अइसे देखात अहइँ जइसे आपन घोंसलन कइँती उड़त भए कपोत होइँ।
9 सुदूर देस मोरी प्रतीच्छा मँ अहउँ।
तर्सीस क बड़के बड़के जलयान जाइ क तत्पर अहइँ।
इ सबइ जलयान तोहरे संतानन क दूर-दूर देसन स लिआवइ क तत्पर अहइँ।
अउर एन जहाजन पइ ओनकर सुवर्ण ओनके संग आई अउर ओनकर चाँदी भी इ सबइ जहाज लिअइहीं।
अइसा एह बरे होइ कि तोहार परमेस्सर यहोवा क आदर होइ।
अइसा एह बरे होइ कि इस्राएल क पवित्तर अद्भुत काम करत ह।
10 दूसर देसन क संतानन तोहार ढ़ेवारन फुन उठइहीं
अउर ओनकर सासक तोहार सेवा करिहीं।
“जब मइँ तोहसे कोहान रहेउँ, मइँ तोहका दुःख दिहेउँ
किन्तु अब मोर इच्छा अहइ कि तोह पइ कृपालु बनउँ।
एह बरे मइँ तोहका चैन देबउँ।
11 तोहार दुआर हमेसा ही खुला रहिहीं।
उ सबइ दिन अथवा राति मँ कबहुँ बन्द नाहीं होइहीं।
देस अउर राजा तोहरे पास धन लिअइहीं।
12 कछू जाति अउर कछू राज्ज तोहार सेवा नाहीं करिहीं
किन्तु उ सबइ जातियन अउर राज्ज नस्ट होइ जइहीं।
13 लबानोन क सबहिं महा वस्तुअन तोहका अर्पित कीन्ह जइहीं।
लोग तोहरे लगे देवदार,
तालीसपत्र अउर सरन क बृच्छ लिअइहीं।
इ ठउर मोरे सिंहासन क समन्वा एक चौकी सा होइ
अउर मइँ एका बहोत मान देबउँ।
14 उ सबइ ही लोग जउन पहिले तोहका दुःख दिया करत रहेन,
तोहरे समन्वा निहुरिहीं।
उ सबइ ही लोग जउन तोहसे घिना करत रहेन,
तोहरे चरणन मँ निहुर जइहीं।
उ सबइ ही लोग तोहका कहिहीं,
‘यहोवा क नगर,’ ‘सिय्योन नगर इस्राएल क पवित्तर क बाटइ।’ नवा इस्राएल सान्ति क देस
15 “फुन तोहका अकेल्ला नाहीं छोड़ा जाइ।
फुन कबहुँ तोहसे घिना नाहीं होइ।
तू फुन स कबहुँ भी उजड़बिउ नाहीं।
तू महान रहबिउ, तू हमेसा अउर सर्वदा आनन्दित रहबिउ।
16 तोहार जरूरत क चिजियन तोहका जातियन प्रदान करिहीं।
इ एतना ही सहल होइ जइसे दूध मुँह बच्चा क महतारी क दूध मिलत ह।
वइसे ही तू सासकन क सम्पत्तियन ‘पिउबीउ।’
तब तोहका पता चली कि इ मइँ यहोवा हउँ जउन तोहार रच्छा करत ह।
तोहका पता चल जाइ कि उ याकूब क महामहिम तोहका बचावत ह।
17 “फिलहाल तोहरे पास ताँबा अहइ
परन्तु एकरी नगह मइँ तोहका सोना देब।
अबहिं तउ तोहरे लगे लोहा अहइ,
पर ओकर जगह तोहका चाँदी देब।
तोहार लकड़ी क जगह मइँ तोहका ताँबा देबउँ।
तोहार पाथरन क जगह तोहका लोहा देबउँ
अउर तोहका दण्ड देइ क जगह मइँ तोहका सुख चैन देबउँ।
जउन लोग अबहिं तोहका दुःख देत हीं उ सबइ ही लोग तोहरे बरे अइसा काम करिहीं जउन तोहका सुख देइहीं।
18 तोहरे देस मँ हिंसा अउर तोहरी सबइ सीमा मँ तबाही अउर बरबादी कबहुँ नाहीं सुनाई पड़ी।
तोहरे देस मँ लोग फुन कबहुँ तोहार वस्तुअन नाहीं चोरइहीं।
तू आपन परकोटन क नाउँ ‘उद्धार’ रखब्या
अउर तू आपन दुआरन क नाउँ ‘स्तुति’ रखब्या।
19 “दिन क समय मँ तोहरे बरे सूरज क प्रकास नाहीं होइ
अउर रात क समय मँ चाँद क प्रकास तोहार रोसनी नाहीं होइ।
काहेकि यहोवा ही सदैव तोहरे बरे प्रकास होइ।
तोहार परमेस्सर तोहार महिमा बनी।
20 तोहार ‘सूरज’ फुन कबहुँ भी नाहीं छुपी।
तोहार ‘चाँद’ कबहुँ भी करिआ नाहीं पड़ी।
काहेकि यहोवा क प्रकास सदा सर्वदा तोहरे बरे होइ
अउर तोहार दुःख क समय खतम होइ जाइ।
21 “तोहार सबहिं लोग उत्तिम बनिहीं।
ओनका सदा बरे धरती मिलि जाइ।
मइँ ओन लोगन क रचा ह।
उ सबइ अद्भुत पउधन
मोर आपन ही हाथन स लगाए भए अहइँ।
22 छोटा स छोटा भी बिसाल घराना बन जाइ।
छोटा स छोटा भी एक सक्तीसाली रास्ट्र बन जाइ।
जब उचित समय आइ,
मइँ यहोवा हाली ही आइ जाब
अउर मइँ इ सबइ बातन घटित कइ देबउँ।”
ईसू क कोढ़ी क चंगा करब
(मरकुस 1:40-45; लूका 5:12-16)
8 ईसू जबहिं पर्वते स खाली उतरा तउ बहोत बड़ी मनइयन क भीड़ ओकरे पाछे होइ चली। 2 हुँवई एक कोढ़ी भी रहा। उ ईसू क लगे आइ अउर निहुरिके बोला, “पर्भू, जदि तू चाहा तउ मोका चंगा कइ सकत ह।”
3 ऍह प ईसू आपन हथवा बढ़ाइके कोढ़ी क छुएस अउर कहेस, “मइँ चाहत हउँ; चंगा होइ जा!” अउर फउरन कोढ़ी क कोढ़ पराइ गवा। 4 फिन ईसू ओसे कहेस, “देखा ऍकरे बारे मँ कउनो स कछू जिन कह्या। मुला याजक क लगे जाइके ओका आपन क देखावा। फिन मुसा क हुकुम क मुताबिक भेंट चढ़ावा जैसे लोगन्क तोहरे चंगा होइ क साच्छी मिलि जाइ।”
ईसू फऊजी नायक क नउकर क चंगा किहेस
(लूका 7:1-10; यूहन्ना 4:43-54)
5 फिन ईसू जब कफरनहूम गवा, तउ एक फऊजी नायक ओकरे नगिचे आवा अउर ओसे मदद बरे बिनती करत बोला, 6 “पर्भू, मोर एक सेवक मोरे घरवाँ मँ बिछउना प ओलरा बाटइ। ओका लकवा मारे बाटइ। ओका बहोत दर्द होत अहइ।”
7 तबहिं ईसू फऊजी नायक स कहेस, “मइँ आइके ओका चंगा करिहउँ।”
8 फऊजी नायक जवाब दिहेस, “पर्भू, मइँ इ जोग्ग नाहीं हउँ कि तू मोरे घर मँ आवा। यह बरे हुकुम दइ द्या। बस मोर नउकर चंगा होइ जाई। 9 इ मइँ जानत हउँ कि मइँ एक बड़का अधिकारी क नीचे काम करत अहउँ अउर मोरे नीचे दूसर सिपाही अहइँ। जबहि मइँ एक ठु सिपाही स कहत हउँ, ‘जा’ तउ उ चला जात ह अउर दूसर सिपाही स कहत हउँ, ‘आ’ तउ उ आइ जात ह। मइँ आपन सेवक स कहत हउँ, ‘इ करा’ तउ उ ओका करत ह।”
10 जब ईसू इ सुनेस तउ उ अचरजे मँ पड़ि गवा। जउन मनइयन ओकरे पाछे पाछे आवत रहेन ईसू ओनसे कहेस, “मइँ तोहसे सच कहत हउँ मइँ ऍतना गहरा बिसवास इस्राएल मँ भी कउनो मँ नाहीं पाएउँ। 11 मइँ तोहका इ अउ बतावत हउँ कि बहोत स पूरब अउर पच्छिम स अइहीं अउर उ सबइ भोजे मँ इब्राहीम, इसहाक अउर याकूब क संग सरगे क राज्य मँ आपन आपन ठउर प बैठ जइहीं। 12 मुला राज्य क आदिम प्रजा बाहेर आँधियारे मँ ढकेल दीन्ह जाई जहाँ उ पचे चिचियाइके नरियाइके दाँत पीसत रइहीं।”
13 तब ईसू उ फउजी नायक स कहेस, “जा वइसा ही तोहरे बरे होइ जइसा तोहार बिसवास अहइ।” अउर ओकर नउकर फउरन चंगा होइ गवा।
ईसू बहोतन क चंगा किहेस
(मरकुस 1:29-34; लूका 4:38-41)
14 जब ईसू पतरस क घरे पहुँच गवा, उ ओकरे सास क बुखार स दुःखी बिछउना प ओलरी देखेस। 15 तब ईसू ओका आपन हथवा स छुएस अउर ओकर बुखार उतर गवा। फिन उ उठी अउर ईसू क सेवा करय लाग।
16 जइसे साँझ होइ गइ तउ लोग ओकरे नगिचे बहोतन मनइयन क लइ आएन जेहमाँ दुस्ट आतिमन रहत रहीं। आपन एक ही हुकुम स उ दुस्ट आतिमन क निकारि दिहस। इ तरह स उ सबइ बेरमियन क नीक कइ दिहस। 17 इ यह बरे भवा कि परमेस्सर नबी यसायाह स जउन कछू कहेस, उ पूरा होइ जाइ:
“उ हमरे बेरमियन क लइ लिहस
अउर हमरे संतापे क ओढ़ लिहस।” (A)
ईसू क मनवइया बनइ क ललक
(लूका 9:57-62)
18 जब ईसू आपन चारिहुँ कइँती भीड़ देखेस तउ उ आपन चेलन क हुकुम दिहेस कि उ सबइ झिलिया क ओह पार किनारे चलइँ। 19 तब एक धरम सास्तरी ईसू क निअरे आवा अउर कहेस, “गुरु, जहँ तहँ तू जाब्या, मइँ तोहरे पाछे चलब।”
20 ऍह प ईसू ओसे कहेस, “लोखरी क बिल अउर अकास क पंछीयन क घोंसला होत हीं मुला मनई क पूत[a] क लगे मूँड़ टेकावइ क कउनो ठउर नाहीं।”
21 ओकर चेलन मँ स एक ठु ईसू स कहेस, “पर्भू, मोका पहिले जाइके आपन पिता क गाड़इ क हुकुम द्या।”
22 मुला ईसू ओसे कहेस, “मोरे पाछे चला आवा अउर मरा भवा मुर्दन क आपन खुद गाड़इ द्या।”
ईसू तूफान क सांत किहेस
(मरकुस 4:35-41; लूका 8:22-25)
23 तब ईसू एक नाउ प बइठि गवा। ओकर चेलन भी पाछे पाछे गएन। 24 उहइ समइया झील मँ ऍतना भयंकर तूफान उठि गवा कि नाउ लहरन स दबी जात रही पर ईसू सोवत रहा। 25 तबहिं ओकर चेलन ओकरे लगे पहुँचेन अउर ओका जगाइके कहेन, “पर्भू, हमार रच्छा करा। हम पचे मरि जाब।”
26 तबहिं ईसू ओनसे कहेस, “अरे कम बिसवास करइवालो। तू पचे काहे ऍतना भयभीत अहा?” तब उ खड़ा होइके तूफान अउर झिलिया क डाटेस अउर चारिहुँ कइँती सांति छाइ गइ।
27 मनइयन अचरजे मँ पड़ि गएन। उ सबइ कहेन, “इ कइसा मनई बाटइ? अँधड़ तूफान अउर झिलिया तक ऍकर बतिया मानत हीं!”
दुइ मनई क दुस्ट आतिमन स छूटि जाब
(मरकुस 5:1-20; लूका 8:26-39)
28 जब ईसू झील क उ पार, गदरेनियोन क देस पहुँच गवा, तउ ओका कब्रे स निकरि के दुइ मनई आवत भए मिलेन, जेहमाँ दुस्ट आतिमन रहिन। उ पचे ऍतना खोफनाक रहेन कि उ रस्ता स कउनो निकरि तक नाहीं सकत रहा। 29 उ पचे चिचियानेन, “हे परमेस्सर क पूत! तू मोसे का चाहत बाट्या? का तू हियाँ ठीक समइ स पहिले हमका दंड देइ आइ अहा?”
30 हुवाँ तनिक दूरी प बहोत स सुअरन क झुँड चरत रहा। 31 तउ उ दुस्ट आतिमन ओसे बिनती करत भए कहेन, “जदि तोहका हम पचन क बाहेर निकारब ही बाटइ, तउ हमका सुअरन क झुंडे मँ पठइ द्या।”
32 तउ ईसू ओनसे कहेस, “चला जा!” तब उ सबइ ओन मनइयन मँ स बाहेर निकरि आइन अउर सुअरन मँ घुसि गइन। फिन समूचा झुंड ढलाने स लुढ़कत पुढ़कत पराइके ढालू किनारे स झिलिया मँ गिरि गवा अउ सबहिं सुअरन पानी मँ बूड़िके मर गएन। 33 सुअरन क झुंड क रखवालन भागत भागत हुआँ स सहर आएन अउर सुअरन क साथ तथा दुस्ट आतिमन स ग्रस्त ओन मनइयन क साथ जउन कछू भवा, कहिके सुनाएन। 34 फिन तउ सहर क सबइ मनइयन ईसू स भेंटइ बरे निकर पड़ेन। जब उ पचे ईसू क देखेन तउ ओसे बिनती किहेन कि उ ओनके हियाँ स कहुँ अउर ठउर चला जाइ।
Awadhi Bible: Easy-to-Read Version. Copyright © 2005 Bible League International.