M’Cheyne Bible Reading Plan

⁴ कछू लोग अइसे रेगिस्तान मँ खोइ गए रहेन जहाँ कउनो लोग नाहीं।
    उ सबइ लोग अइसेन एक ठु नगर क खोज मँ रहेन।
    मुला ओनका कउनो अइसा नगर नाहीं मिला।
⁵ उ सबइ लोग भुखान अउ पियासा रहेन
    अउर उ पचे दुर्बल होत जात रहेन।
⁶ उ पचे संकट मँ रहेन, तउ उ पचे मदद पावइ क यहोवा क गोहराएन।
    उ ओन सबइ क आपन संकटन स बचाइ लिहस।
⁷ यहोवा ओनका सोझइ उ सहरन मँ लइ गवा जहाँ उ पचे बसि सकिहीं।
⁸ यहोवा क ओकरे विस्सस्नीय पिरेम बरे
    अउर ओन अद्भुत करमन बरे धन्यवाद द्या जेनका उ सबइ लोगन बरे करत ह।
⁹ पियासी व्यक्ति परमेस्सर क सन्तुट्ठी बरे
    अउर उत्तिम वस्तुअन स भूखी व्यक्ति क पेट भरत ह।

¹⁰ कछू लोगन क कारावासन मँ राखेन, जहाँ बहोत अँधियारा रहा।
    उ पचे कस्ट झेलेन, अउ जंजीर मँ बांध दीन्ह गएन।
¹¹ काहेकि उ पचे परमेस्सर क वचन क खिलाफ बिद्रोह किहेन
    अउर सर्वोच्च परमेस्सर क सलाह क सुनइ स नकारे रहेन।
¹² उ ओनका कठिनाइयन देइके
    उ पचन्क दिमाग क विनम्र बनाइ दिहेस।
उ पचे ठोकरन खाएन अउर उ पचे भहराइ पड़ेन,
    अउर ओनका सहारा देइ क कउनो भी नाहीं मिला।
¹³ उ पचे संकट मँ रहेन, तउ उ पचे मदद पावइ क यहोवा क गोहराएन।
    उ ओन सबइ क आपन संकटन स बचाइ लिहस।
¹⁴ परमेस्सर ओनका ओनकर अँधियारे जेलन स उबार लिहस।
    परमेस्सर उ सबइ जंजीरन, अउर बंधन क काटेस जेनसे ओनका बाँधा गवा रहा।
¹⁵ यहोवा क ओकरे बिस्सस्नीय पिरेम बरे
    अउर ओन अद्भुत करमन बरे धन्यवाद द्या जेनका उ सबइ लोगन बरे करत ह।
¹⁶ परमेस्सर हमार दुस्मनन क हरावइ मँ हमका मदद देत ह।
    ओनकर काँसे क दुआरन क परमेस्सर तोड़ गिराइ सकत ह।
    परमेस्सर ओनकर दुआरन पइ लगी भइ लोहा क आगल क छिन्न-भिन्न कइ सकत ह।

¹⁷ कछू मूरख लोग आपन अपराधन
    अउ पापन क कारण पीरा झेलेन ह।
¹⁸ ओन लोग खइया क इच्छा तजि दिहेन
    अउर उ पचे मरे भए स होइ गएन।
¹⁹ उ पचे संकट मँ रहेन, तउ उ पचे मदद पावइ क यहोवा क गोहराएन।
    उ ओन सबइ क आपन संकटन स बचाइ लिहस।
²⁰ परमेस्सर आदेस दिहस अउर लोगन क चँगा किहस।
    इ तरह उ पचन्क बर्बाद होइ स बच गएन।
²¹ यहोवा क ओकरे बिस्सस्नीय पिरेम बरे
    अउर ओन अद्भुत करमन बरे धन्यवाद द्या जेनका उ सबइ लोगन बरे करत ह।
²² ओनका यहोवा क धन्यवाद देइ बरे बलि अर्पित करइ द्या,
    उ जउन किहे अहइ ओन बातन क आनन्द क संग बखाना।

²³ कछू लोग आपन काम करइ
    आपन नइयन स समुद्दर पार कइ गएन।
²⁴ ओन लोगन अइसी बातन क लखेन ह जेनका यहोवा कइ सकत ह।
    उ पचे ओन अद्भुत बातन क लखेन ह जेनका यहोवा सागर पइ किहे रहा।
²⁵ परमेस्सर आदेस दिहस, फिन एक तेज हवा चलइ लाग।
    बड़की स बड़की लहरन आकार लेइ लागिन।
²⁶ लहरन ऍतना ऊपर उठिन
    जेतना अकास होइ
    तूफान ऍतना भयानक रहा कि लोग डेराइ गएन।
²⁷ लोग लड़खड़ात रहेन, भहरान जात रहेन जइसे नसा मँ धुत होइँ।
    खेवैया ओनकर बुद्धि जइसे बियर्थ होइ गइ होइ।
²⁸ उ पचे संकट मँ रहेन, तउ उ पचे मदद पावइ क यहोवा क गोहराएन।
    उ ओन सबइ क आपन संकटन स बचाइ लिहस।
²⁹ परमेस्सर तूफान क रोकेस
    अउर लहरन सान्त होइ गइन।
³⁰ खेवैया खुस रहेन कि सागर सांत भवा होइ गवा।
    परमेस्सर ओनका अहइ सुरच्छित ठउरे पइ लइ गवा जहाँ उ पचे जाइ चाहत रहेन।
³¹ यहोवा क ओकरे बिस्सस्नीय पिरेम बरे अउर ओन अद्भुत करमन बरे धन्यवाद द्या
    जेनका उ सबइ लोगन बरे करत ह।
³² महान सभा क बीच ओनका ऊँच होइ द्या।
    नेतन मिलन मँ ओकर बड़कई करइ द्या।

³³ उ नदियन क रेगिस्ताने मँ बदल दिहस।
    भुइँया सुखाइ बरे उ झरनन क प्रवाह क रोकेस।
³⁴ परमेस्सर उपजाऊ भुइँया क बेकार क रेही भुइँया मँ बदल दिहस।
    काहेकि हुआँ बसे दुट्ठ लोग बुरे करम किहे रहेन।
³⁵ अउर परमेस्सर मरूभूमि क झीलन क धरती मँ बदलेस।
    उ झुरान धरती स जल क स्रोत बहाइ दिहस।
³⁶ परमेस्सर भूखे लोगन क उ अच्छी धरती पइ लइ गवा
    अउर ओन लोग आपन रहइ बरे हुआँ एक ठु सहर बसाएन।
³⁷ फिन ओन लोग आपन खेतन मँ बीजन क रोप दिहन।
    अउर अगूंर क बगिया लगाएन, अउर उ पचे एक उत्तिम फसिल पाइ लिहन।
³⁸ परमेस्सर ओन लोगन क आसीर्बाद दिहस।
    ओनकर परिवार फलइ-फूलइ लोगन।
    ओनके लगे बहोत सारे पसु भएन।
³⁹ भयानक महामारी अउर संकट क कारण
    ओनकर परिवार नान्ह अउर कमज़ोर होइ गएन।
⁴⁰ परमेस्सर ओनकर प्रमुखन क कुचरि दिहस अउर बेज्जत किहे रहा।
    उ ओनका दिसाहीन रेगिस्ताने मँ भटकइ दिहेस।
⁴¹ मुला परमेस्सर तबहिं ओन दीन लोगन क ओनकर बिनती स बचाइके निकारि लिहस।
    अब तउ ओनकर घरानन बड़वार अहइँ, ओतना बड़वार जेतना भेड़िन क झुण्ड।
⁴² इमानदार मनइयन एका देखत हीं अउर आनन्दित होत हीं,
    किन्तु दुट्ठ लोग एका लखत हीं आपन मुँह बंद रखत हीं।
⁴³ एक विवेकी मनई ओन बातन क धियान देत ह।
    अउर जउन कउनो मनई बुद्धिमान अहइ, यहोवा के सच्चा पिरेम क बारे मँ जान जाइहीं।

⁴ “मोर लोग कहत हीं, ‘परमेस्सर हम लोगन क बचावत ह।
    ओकर नाउँ, इस्राएल क पवित्तर सर्वसक्तीमान अहइ।’

⁵ “हे बाबुल, तू बइठ जा अउर कछु भी जिन कहा।
    बाबुल क बिटिया, चली जा अँधियारा मँ।
    काहेकि अब तू अउर जियादा ‘राज्जन क रानी’ नाहीं कहवाई।

⁶ “मइँ आपन लोगन पइ किरोध किहे रहेउँ।
    इ सबइ लोग मोर आपन रहेन,
किन्तु मइँ कोहान रहेउँ, एह बरे मइँ ओका अपमानित किहेउँ।
    मइँ ओनका तोहका दइ दिहेउँ, अउर तू ओनका दण्ड दिहा।
तू ओन पइ कउनो करुणा नाहीं दर्साया
    अउर तू ओन बूढ़न पइ भी बहुत कठिन काम क जुआ लाद दिहा।
⁷ तू कहा करत रहिउ, ‘मइँ अमर हउँ मइँ सदा रानी रहब।’
    किन्तु तू ओन बुरी बातन पइ धियान नाहीं दिहा
जेनका तू ओन लोगन क संग किहे रह्या।
    तू कबहुँ नाहीं सोच्या कि पाछे का होइ।
⁸ एह बरे अब, ओ ‘मनोहर मेहरारू,’ मोर बात तू सुन ल्या।
    तू आपन क सुरच्छित जाना अउर अपने आप स कहा।
‘केवल मइँ ही महत्वपूर्ण मनई हउँ, मोरे समान कउनो दूसर बड़का नाहीं अहइ।
    मोका कबहुँ भी विधवा नाहीं होब अहइ, मोरे सदैव बच्चन होत रहिहीं।’
⁹ इ सबइ दुइ बातन तोहरे संग मँ घटित होइहीं:
    पहिले, तोहार बच्चन तोहसे छूट जइहीं अउर फुन तोहार पति भी तोहसे छूट जाइ।
हाँ, इ सबइ बातन तोहरे संग जरूर घटिहीं।
    तोहार सबहिं जादू अउर सक्तीसाली टोनन तोहका नाहीं बचाइ पइहीं।
¹⁰ तू बुरे काम करति अहा, फुन भी तू आपन क सुरच्छित समुझति अहा।
    तू कहा करति अहा कि तोहार बुरे काम क कउनो नाहीं लखत।
तू बुरे काम करति अहा किन्तु तू सोचति अहा कि तोहार बुद्धि अउर तोहार गियान तोहका बचाइ लेइहीं।
    तू खूद क सोचति अहा कि बस एक तू ही महत्वपूर्ण अहा।
    तोहरे जइसा अउर कउनो भी दूसर नाहीं अहइ।

¹¹ “किन्तु तोह पइ बिपत्तियन अइहीं।
    तू नाहीं जानतिउ कि उ कब होइ जाइ, किन्तु बिनास आवत अहइ।
तू ओन बिपत्तियन क रोकइ बरे कछू भी नाहीं कइ पउबिउ।
    तोहार बिनास ऍतना हाली होइ कि तोहका तक भी न चली कि का कछू तोहरे संग घट गवा।
¹² जादू अउर टोना क सीखइ मँ
    तू कठिन मेहनत करत भए जिन्नगी बिताइ दिहा।
तउ अब आपन जादू अउर टोना क चला।
    संभव अहइ टोने टोटके तोहका बचाइ लेइँ।
    समंव अहइ-ओनसे तू कउनो क डेराइ द्या।
¹³ तोहरे लगे बहोत स सलाहकार अहइँ।
    का तू ओनकर सलाहन स तंग आइ चुकी अहइ?
तउ फुन ओन लोगन क जउन सितारन बाँचत ही, बाहेर पठवा।
    जउन बताइ सकत हीं महीना कब सुरू होत ह।
    तउ संभव अहइ उ पचे तोहका बताइ पाँवइ कि तोह पइ कब विपत्तियन पड़िहीं।
¹⁴ किन्तु उ सबइ लोग तउ खुद आपन क बचाइ नाहीं पइहीं।
    उ पचे घासे क तिनकन जइसे भक स बरि जइहीं।
उ पचे ऍतना हाली बरिहीं कि अंगार तलक कउनो नाहीं बची जेहमाँ रोटी सेकी जाइ सकइ।
    कउनो आगी तलक नाहीं बची जेकरे लगे बइठिके उ पचे खुद क गर्माइ लेइँ।
¹⁵ अइसा ही हर वस्तु क साथ मँ घटी जेनके बरे तू कड़ी मेहनत किहा।
    तोहरे जिन्नगी भइ जेनसे तोहार वइपार रहा,
उ पचे ही मनइयन तोहका तजि देइहीं, हर कउनो आपन-आपन राह चला जाइ।
    कउनो भी मनई तोहका बचावइ क नाहीं बची।”