M’Cheyne Bible Reading Plan
मोआब मँ वाचा
29 इ सबइ बातन उ वाचा क अंग अहइ जउन वाचा क यहोवा मोआब प्रदेस मँ इस्राएल क लोगन क संग मूसा स करइ क कहेस। यहोवा इ वाचा क उ बचन स अलवा किहस जेका उ इस्राएल क लोगन क संग होरेब पहाड़े पइ किहे रहा।
2 मूसा सबहिं इस्राएली मनइयन क बटोरिके बोलाएस। उ ओनसे कहेस, “तू पचे उ सब कछू लख्या ह जउन यहोवा मिस्र देस मँ किहस। तू पचे उ सब भी लख्या जउन फिरौन, फिरौन क प्रमुखन अउ ओकरे पूरे देस क संग किहस। 3 तू पचे ओन बड़की मुसीबतन क लख्या ह जउन उ ओनका दिहस। तू पचे ओकरे ओन चमत्कारन अउ बड़के अचरजन क लख्या ह जउन उ किहेस। 4 मुला आजु भी तू पचे नाहीं समझत्या कि का भवा। यहोवा सचमुच तू पचन्क नाहीं समझाएस जउन तू पचे लख्या अउ सुन्या ह। 5 मइँ तू पचन्क चालीस बरिस तलक रेगिस्ताने स होइके लइ जात रहा अउर उ लम्बे समइ क बीच तोहार पचन्क ओढ़ना अउ पनही फाटिके खतम नाहीं भएन। 6 तोहरे लगे कछू भी भोजन नाहीं रहा। तोहरे पचन्क लगे कछू भी दाखरस या कउनो उत्तेजित करइवाला पिअइ क चीज नाहीं रही। किन्तु यहोवा तोहार देख-रेख किहस। उ इ एह बरे किहस कि तू पचे समुझ पउब्या कि उ यहोवा तोहार सबन्क परमेस्सर अहइ।
7 “जब तू पचे इ ठउरे पइ आया तबहिं हेसबोन क राजा सीहोन अउ बासान क राजा ओग हम लोगन क खिलाफ लड़इ आएन। मुला हम पचे ओनका हरावा। 8 तब हम लोग इ सबइ पहँटा रूबेनियन, गादियन अउ मनस्से क आधे लोगन क ओनकइ कब्जा मँ दइ दीन्ह। 9 एह बरे, इ वाचा क आदेसन क पूरी तरह माना। तब जउन कछू तू पचे करब्या ओहमाँ सफल होब्या।
10 “आजु तू पचे सबहिं यहोवा आपन परमेस्सर क समन्वा ठाड़ अहा। तोहरे पचन्क प्रमुखन, तोहार परिवार समूहन, तोहार पचन्क अफसरन, तोहार पचन्क बुजुर्गन (प्रमुखन) अउर सबहिं दूसर लोग हिआँ अहइँ। 11 तोहार पचन्क पत्नियन अउ गदेलन हिआँ अहइँ अउर उ सबइ विदेसी भी हिआँ अहइँ जउन तोहरे बीच रहत हीं अउ तोहार लकड़िन क काटत अउर पानी भरत हीं। 12 तू पचे सबहिं हिआँ यहोवा आपन परमेसस्र क संग एक ठु वाचा करइवाला अहा। यहोवा तू लोगन क संग इ वाचा आजु करत अहइ। 13 इ वाचा क जरिये यहोवा तू पचन्क आपन खास लोग बनावत अहइ अउर उ खुद तोहार परमेस्सर होइ। उ तोहरे पुरखन इब्राहीम, इसहाक अउ याकूब क इ वचन दिहे रहा। 14 यहोवा आपन वचन दइके सिरिफ तू लोगन क संग ही वाचा नाहीं करत अहइ। 15 उ इ वाचा हम सबहिं क संग करत अहइ जउन हिआँ यहोवा आपन परमेस्सर क समन्वा ठाड़ अहइँ। मुला इ वाचा हमरे ओन संतानन क बरे भी अहइ जउन हिआँ आजु हम लोगन क संग नाहीं अहइँ। 16 तू पचन्क याद अहइ कि हम मिस्र मँ कइसे रहत रहेन अउ कइसे सारा रास्ट्रन क जात्रा कीन्ह ह जउन हिआँ तलक हमरे राहे पइ रहेन। 17 तू पचे ओनकइ घिनौनी चिजियन यानी काठ, पाथर, चाँदी अउ सोना क बनी देवमूरतियन लखेन। 18 ठान ल्या कि आजु हिआँ हम लोगन मँ कउनो अइसा मनसेधू, मेहरारु, परिवार या परिवार समूह नाहीं अहइ जउन यहोवा, आपन परमेसस्र क खिलाफ जात होइ। कउनो भी मनई ओन रास्ट्रन क देवतन क सेवा करइ नाहीं जाइ चाही। जउन लोग अइसा करत हीं उ पचे उ पौधन क नाई अहइँ जउन करुआ, जहरीला फल पइदा करत होइ।
19 “कउनो मनई इ अभिसापन क सुन सकत ह अउर आपन क संतोख देत भवा कहि सकत ह, ‘मइँ जउन चाहत हउँ करत रहब। मोर कछू भी बुरा भी नाहीं होइ।’ उ मनई आपन ऊपर ही मुसीबत नाहीं बोलाइ मुला उ सबन क ऊपर, अच्छे लोगन प भी बोलाइ।[a] 20-21 यहोवा उ मनई क छिमा नाहीं करी। नाहीं, यहोवा उ मनई पइ कोहाइ जाइ अउर ओका सजा देइ। इ किताबे मँ लिखे भए सबहिं अभिसापन ओह पइ पड़िहीं। यहोवा ओका इस्राएल क सबहिं परिवार समूहन स निकारिके बाहेर करी। यहोवा ओका पूरी तरह बरबाद करी। सबहिं आपत्तियन जउन इ किताबे मँ लिखी गइ अहइँ, ओह पइ अइहीं। उ सबइ सबहिं बातन उ वाचा क हींसा अहइँ जउन व्यवस्था क किताब मँ लिखी गइ अहइँ।
22 “भविस्स मँ, तोहार सन्तानन अउ बहोत दूर क देसन स आवइवाले विदेसी लोग लखिहीं कि देस कइसे बरबाद होइ गवा अहइ। उ पचे ओन बेमारियन क लखिहीं जेनका यहोवा ओन लोगन मँ लिआइ। 23 सारा देस बरत भए गन्धक अउ जोन स ढका भवा बेकार होइ जाइ। भुइँया मँ कछू भी बोवा भवा नाहीं रही। कछू भी, हिआँ तलक खर-पतवार भी हिआँ नाहीं उगिहीं। इ देस ओन नगरन-सदोम, अमोरा, अदमा अउर सबोयीम क तरह बरबाद कइ दीन्ह जाइ। जेनका यहोवा, तब बरबाद किहे रहा, जब उ बहोत कोहान रहा।
24 “सबहिं दूसर रास्ट्र पूछिहीं, ‘यहोवा इ देस क संग अइसा काहे किहस? उ ऍतना कोहान काहे रहा?’ 25 उ इ जबाब देइ, ‘इस्राएली लोग उ करार क सम्मान नाहीं किहेस जेका यहोवा ओकर बापन स किहेस अहइ। उ पचे उ वाचा क मानब बन्द कइ दिहेन जेका यहोवा ओनके संग तब किहे रहा जब उ ओनका मिस्र देस स बाहेर लिआए रहा। 26 इस्राएल क लोग अइसे दूसर देवतन क पूजा, सेवा अउ मानवइ सुरु किहेन जेनकर पूजा क गियान ओनका पहिले कबहुँ नाहीं रहा। यहोवा आपन लोगन स ओन देवतन क पूजा करब मना किहे रहा। 27 इहइ कारण अहइ कि यहोवा इ लोगन क खिलाफ बहोत कोहाइ ग रहा। एह बरे उ इ किताब मँ लिखे भए सबहिं अभिसापन क ऍन पइ लागू किहस। 28 यहोवा ओन पइ बहोत कोहाइ गवा अउर ओन पइ बउखलाइ उठा। एह बरे ओनके देस स ओनका बाहेर किहस। उ ओनका दूसर देस मँ पठएस जहाँ उ पचे आजु अहइँ।’
29 “कछू अइसी बातन अहइँ जेनका यहोवा हमार परमेस्सर छुपाए रखेस ह। ओन बातन क सिरिफ उ ही जानत ह। मुला यहोवा हमका आपन नेमन क जानकारी दइ दिहस ह! इ व्यव्सथा हमरे बरे अउ हमरे संताने बरे अहइ। हम पचन्क ऍका सदा मानइ चाही।
जैन
49 हे यहोवा, कृपा कइके आपन बचन क याद रखा, जउन तू मोहसे किह्या ह।
उहइ बचन मोका आसा देत ह।
50 जब मइँ झेलत रहेउँ, तू मोका चइन दिहा।
तोहार वचन मोका जीवन देत ह।
51 लोग जउन खुद क मोहसे उत्तिम सोचत हीं, निरन्तर मोर अपमान करत अहइँ।
मुला हे यहोवा मइँ तोहार सिच्छन पइ चलब नाहीं तजेउँ।
52 मइँ तोहरे ओन फइसलन क याद करत हउँ जेका तू बहोत पहिले दिहा ह,
अउर मइँ मोका चइन देत अहइँ।
53 जब मइँ अइसे दुट्ठ लोगन क लखत हउँ,
जउन तोहरी सिच्छन पइ चलब तजेन ह, तउ मइँ बहोत कोहाइ जात हउँ।
54 तोहार सबइ कानून मोर बरे आनन्दित भजन होत
जहाँ कहिउँ भी मइँ रहत हउँ।
55 हे यहोवा, राति मँ मइँ तोहरे नाउँ क धियान
अउर तोहरी नेमन क पालन करत हउँ।
56 इ मोर अभ्यास होत रहत ह।
मइँ होसियारी स तोहरे उपदेसन क मानत हउँ।
ख़ेथ
57 हे यहोवा, तू मोर अंग अहइ, एह बरे मइँ तोहार आग्यन क पालन करब।
58 हे यहोवा, मइँ पूरी मन स तोहार खोज किहेउँ ह,
जइसा बचन तू दिहा मोह पइ दयालु ह्वा।
59 मइँ आपन राहे पइ बहोत धियान दिहेउँ ह,
ताकि मइँ तोहरी करार क मुताबिक चल सकउँ।
60 मइँ बिना देरी किहे
तोहरे आग्यन पइ चलइ क इच्छुक अहउँ।
61 दुट्ठन आपन फन्दन मोका फंसाइ लिहेन ह।
मइँ तोहरी सिच्छन क कबहुँ नाहीं बिसरेउँ।
62 तोहरे सच्चा फइसलन क तोहका धन्यवाद देइ बरे
मइँ आधी रात क बीच जगत हउँ।
63 जउन कउनो मनई तोहसे डेरात ह तउ मइँ ओकर मीत अहउँ।
अगर कउनो मनई तोहरे उपदेसन पइ चलत ह, मइँ ओकर मीत अहउँ।
64 हे यहोवा, इ समूचइ धरती तोहरी बिस्ससनीय पिरेम स भरी भइ बा।
मोका तू मोका अपने विधान क सिच्छा द्या।
टेथ
65 हे यहोवा, तू आपन दास बरे अच्छा काम किहे अहा।
तू ठीक वइसा ही किहा जइसा तू करइ क वचन दिहा रह्या।
66 हे यहोवा, मोका सही बुद्धि अउ गियान द्या
कि मइँ तोहार आदेसन पइ बिस्सास करेउँ।
67 पीड़ित होइ स पहिले मूरखता स मइँ बुरे करम किहे रहेउँ।
मुला अब, मइँ धियानपूर्वक तोहरे आग्यन क पालन करत हउँ।
68 तू अच्छा अहइ, अउर अच्छा काम करत अहा।
मोका आपन कानून क सिच्छा द्या।
69 घमण्डी लोग मोरे बरे बहोत सारा झूठी बात बोलत हीं।
किन्तु यहोवा मइँ आपन पूर्ण वचन बद्धता स तोहरे उपदेसन क पालन करब।
70 उ लोगन क दिमाग तोहार उपदेसन क नाहीं समुझ सकतेन।
मुला, मइँ तोहरी उपदेसन क अध्ययन कइके बहोत खुसी पावत हउँ।
71 हिआँ तलक कि कस्ट भी मोर बरे बढ़िया बनि गवा रहा।
उहइ तरह मइँ तोहरी कानून क सीख लिहेउँ।
72 तोहरी सीखन मोरे बरे भली होत अहइँ।
तोहार सीखन हजारन सोना अउ चाँदी क टूकन स उत्तिम अहइँ।
सबहिं जातियन यहोवा क अनुसरण करिहीं
56 यहोवा इ सबइ बातन कहे रहा, “सब लोग क साथ उहइ काम करा जउन निआव स पूर होइ। काहेकि मोर उद्धार हाली ही तोहरे पचन्क लगे आवइ क अहइ। सारे संसार मँ मोर छुटकारा हाली ही परगट होइ।” 2 अइसा मनई जउन सबित क दिन क पालन एका बिना दूसित कइ भए करत ह अउर उ मनई जउन बुरा नाहीं करी आसीर्बाद पाइहीं।
3 उ गैर यहूदी लोग जउन यहोवा क लोगन मँ सामिल होइ पसन्द करत ह। अइसे मनइयन क इ नाहीं कहइ चाही: “यहोवा मोर संग आपन ‘वास्विक’ लोगन अलग थलग जइसा बेउहार करब्या। उ असल मँ मोका आपन अपना लोगन मँ स एक क रूप मँ स्वीकार नाहीं करब्या!” कउनो हिंजड़े क इ नाहीं कहइ चाही: “मइँ काठे क एक झुरान टुका हउँ अउर मइँ कउनो गदेला क बाप नाहीं बन सकब।”
4-5 एन हिंजड़न क अइसी बातन नाहीं कहइ चाही काहेकि यहोवा कहे रहा: “एनमाँ स कछू हिंजड़े सबित क नेमन क पालन करत हीं अउर जउन मइँ चाहत हउँ, उ पचे वइसा ही करइ चाहत हीं। उ पचे सच्चे मन स मोरी वाचा क पालन करत हीं। एह बरे मइँ आपन मंदिर मँ ओनके बरे यादगार क एक ठु पाथर लगाउब। मोरे नगर मँ ओनके नाउँ क याद कीन्ह जाइ। हाँ! मइँ ओनका पुत्र-पुत्रियन स भी कछू अच्छा देबउँ। ओन हिंजड़न क मइँ एक नाउँ देबउँ जउन सदा-सदा बना रही। मोर लोगन स उ पचे काटिके अलग नाहीं कीन्ह जइहीं।”
6 कछू अइसे लोग जउन यहूदी नाहीं अहइँ, अपने आप क यहोवा स जोरिहीं। उ पचे अइसा एह बरे करिहीं कि यहोवा क सेवा अउर यहोवा क नाउँ क पिरेम कइ पावइँ। यहोवा क सेवक बनइ बरे उ पचे खुद क ओहसे जोड़ लेइही। उ पचे सबित क दिन क उपासना क एक बिसेस दिन क रूप मँ माना करिहीं अउर उ पचे मोर करार क गंभीरता स पालन करिहीं। 7 यहोवा कहत ह, “मइँ ओन लोगन क आपन पवित्तर पर्वत पइ लिआउब। आपन पराथना भवन मँ मइँ ओनका आनन्द स भरि देब। उ पचे जउन भेंट अउर बलियन मोका अर्पित करिहीं, मइँ ओनसे खुस होब। काहेकि मोर मंदिर सबहिं रास्ट्रन क लोगन क पराथना क घर कहावा जाइ।” 8 इ उह अहइ जउन मोर सुआमी करत ह,
“मइँ उहइ हउँ जउन देस निस्कासित कीन्ह भवा इस्राएलियन क जेका सताया गवा अहइ एकट्ठा किहेउँ ओनकर संग ओन सबहिं बिदेसियन क जोड़इ जउन बिदेसियन ओकर संग एकट्ठा भए अहा।” परमेस्सर क आपन सेवा बरे सबन्क बोलावा
9 हे वन क पसुओ।
तू पचे सबहिं खइया पइ आवा।
10 इ सबइ धरम क रखवारे (नबी) सबहिं नेत्रहीन अहइँ।
ओनका पता नाहीं कि उ पचे का करत अहइँ।
उ पचे उ गूँगे कूकुर क नाई अहइँ जउन नाहीं जानत कि कइसे भौवां जात ह?
उ पचे धरती पइ लउटत हीं अउर सोइ जात हीं।
हाय! ओनका नींद पियारी अहइ।
11 उ सबइ लोग अइसे अहइँ जइसे भुखान कूकुर होइँ।
जेनका कबहुँ भी तृप्ति नाहीं होत।
उ पचे अइसे चरवाहन अहइँ जेनका पता तलक नाहीं कि उ पचे का करत अहइँ?
उ पचे ओकर आपन ओन भेड़िन जइसे अहइँ
जउन आपन रास्ता स भटकके कहूँ खोइ गइन।
उ पचे लालची अहइँ ओनका तउ बस आपन पेट भरब भावत ह।
12 उ पचे कहा करत हीं,
“आवा तनिक दाखरस ल्या
अउर ओका पिआ यव सुरा भरपेट पिआ।
हम भियान भी इहइ करब,
भियान तनिक अउर जियादा पिअब।”
ईसू क परिच्छा
(मरकुस 1:12-13; लूका 4:1-13)
4 फिन आतिमा ईसू क उसरे मँ लइ गइ, काहेकि सइतान क जारिये ओका परखा जाइ सकइ। 2 चालीस दिन अउर चालीस रात भुखिया क पाछे जब ओका भूख तड़पावइ लाग। 3 तउ ओका ललचावइ वाला ओकरे लगे आवा अउर कहेस, “जदि तू परमेस्सर क पूत बाट्या तउ इ सबइ पथरन स कहा कि इ सब रोटी बन जाईं।”
4 ईसू जवाब दिहस, “पवित्तर सास्तरन मँ लिखा वाटइ:
‘मनई सिरिफ रोटी स नाहीं जिअत मुला
उ हर एक सब्द स जिअत ह जउन परमेस्सर क मुँहे स निकरत ह।’” (A)
5 फिन सइतान ओका यरूसलेम क पवित्तर सहर मँ लइ गवा। हुआँ मंदिर क सब स ऊँचे बुर्ज प खड़ा होइके 6 उ ओसे कहेस, “जदि तू परमेस्सर क पूत बाट्या, तउ नीचे कूदि जा काहेकि पवित्तर सास्तरन मँ लिखा बाटइ:
‘उ तोहरे रखवारी बरे आपन दूतन क हुकुम देइ
अउर उ पचे तोहका हाथन स उठाइहीं
जेह बरे तोहरे गोड़े मँ कउनो पाथर ताईं न लगई।’” (B)
7 ईसू जवाब दिहेस, “मुला पवित्तर सास्तरन इहइ कहत ह, ‘अपने पर्भू परमेस्सर क परीच्छा मँ जिन डावा।’” (C)
8 फिन सइतान ईसू क बहुतइ ऊँच पहाड़े प लइ गवा। अउर ओका इ संसार क सब राज्य अउर ओनकइ माया वैभव देखाएस। 9 सइतान तब ओसे कहेस, “इ सब चीजन्क मइँ तोहका दइ देब जदि तू मोरे अगवा दण्डवत करा अउर मोर आराधना करा।”
10 फिन ईसू ओसे कहेस, “सइतान! दूर होइ जा। पवित्तर सास्त्र कहत ह:
‘आपन पर्भू परमेस्सर क आराधना अउर सिरिफ
ओकर सेवा करा।’” (D)
11 फिन सइतान ओका छाँड़ि के चला गवा। अउर सरगदूतन आइके ओकर सेवा करइ लागेन।
ईसू गलील मँ काम सुरू करेस
(मरकुस 1:14-15; लूका 4:14-15)
12 जब ईसू सुनेस कि यूहन्ना पकड़ लीन्ह गवा ह, तउ उ गलील लौटि आवा। 13 मुला उ नासरत मँ नाहीं रुका अउर जाइके कफरनहूम मँ रहइ लाग जउन जबूलून अउर नप्ताली क पहटा मँ गलील झीले के नगिचे रहा। 14 इ एह बरे भवा कि परमेस्सर क नबी यसायाह जउन कहेस ह, उ पूरा होइ जाइ:
15 “जबूलून अउर नप्ताली क देस
सागर क राहे प, यरदन नदी क पच्छिम मँ
गैर यहूदियन क देस गलील मँ
16 जउन मनई आँधियारे मँ जिअत रहेन
उ सबइ एक भारी जोति देखेन
अउर जउन मउत क परिछाइँ क देस मँ रहत रहेन,
ओन प ज्योति क भिन्सारे क रोसनी फैलि गइ।” (E)
17 उ समई स ईसू सुसमाचार क प्रचार सुरू कइ दिहस, “मनफिराव करा काहेकि सरगे क राज्य नगिचे बाटइ।”
ईसू चेलन्क चुनेस
(मरकुस 1:16-20; लूका 5:1-11)
18 जब ईसू गलील झिलिया क नगिचे स जात रहा, उ दुइनउँ भाइयन क निहारेस समौन (जउन पतरस कहा गवा।) अउर ओकर भाइ आन्द्रियास। उ पचे झिलिया मँ जाल डारत रहेन। उ पचे मछुवारा रहेन। 19 ईसू ओनसे कहेस, “मोरे पाछे आवा, मइँ तोहका सिखाउब कि लोगन्क बरे मछरी पकड़इ क बजाय मनई रूप मँ मछरी कइसे बटोरी जात हीं?” 20 उ सबइ तुरतहिं आपन जाल छाँड़ि दिहन अउर ओकरे पाछे होइ गएन।
21 फिन उ हुवाँ स आगे चला गवा। उ देखेस कि जब्दी क बेटवा याकूब अउर ओकर भाई यूहन्ना आपन बाप क संग नाउँ मँ बैठिके आपन जालन्क मरम्मत करत रहेन। ईसू ओनका बोलाएस। 22 अउर उ पचे फउरन नाउ अउर बाप क छाँड़िके ओकरे पाछे चल दिहन।
ईसू क मनइयन क उपदेस अउर ओनका चंगा करब
(लूका 6:17-19)
23 ईसू समुच्चइ गलील पहँटा मँ यहूदी आराधनालय मँ सरगे क राज्य क सुसमाचार क उपदेस देत अउर हर तरह के बेरामी अउर घोर कस्टन क दूर करत घूमइ लाग। 24 समुच्चइ सीरिया देस मँ ओकरे बारे मँ खबर संचर गइ। यह बरे लोग अइसे मनइयन जउन खुब बेरमिया रहेन या जउन तरह के बेरामी अउर भारी बेदनन स पीड़ित रहेन। जेह प दुस्ट आतिमान सवार रहीं जेका मिर्गी आवत रही अउर जउन सुखंडी रहेन, ओनका ओकर पास लिआवइ लागेन। ईसू ओनका चंगा किहेस। 25 एह बरे गलील, दिकापुलिस,[a] यरूसलेम, यहूदिया अउर यरदन नदी क उ पार मनइयन क भारी भीड़ पाछे पाछे होइ लाग।
Awadhi Bible: Easy-to-Read Version. Copyright © 2005 Bible League International.