◀ All Reading Plans / M’Cheyne Bible Reading Plan / Family: Deuteronomy 19; Psalm 106. Secret: Isaiah 46; Revelation 16. (Awadhi Bible: Easy-to-Read Version)

Prev Day

June 14, 2025

Next Day

Use the calendar to view readings from this devotional.

June 2025
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

व्यवस्था विवरण 19

सुरच्छा बरे तीन ठु सहर

19 “यहोवा तोहार परमेस्सर तू पचन्क उ देस देत अहइ जउन दूसर रास्ट्रन क अहइ। यहोवा ओन रास्ट्रन क बरबाद करी। तू पचे हुआँ रहब्या जहाँ उ सबइ लोग रहत हीं। तू पचे ओनकइ सहरन अउर घरन क लइ लेब्या। जब अइसा होइ, ^2-3तब तू पचन्क भुइँया क तीन हींसा मँ बाँटइ चाही। तब तू पचन्क हर एक हींसा मँ सबहिं लोगन्क निअरे परइवाला सहर उ छेत्र मँ चुनइ चाही अउर तू पचन्क उ सहरन तलक सड़कन बनावइ चाही तब कउनो भी मनई जउन कउनो दूसर मनई क मारत ह हुआँ पराइके जाइ सकत ह।

⁴“जउन मनई कउनो क मारत ह उ सुरच्छा बरे इ तीन सहरन मँ स कउनो मँ भी पराइके पहोंच सकत ह। उ सुरच्छा पा सकत ह। जदि उ बिना इरादा क साथ कउनो मनई क मारि डावइ अउर उ ओसे पहिले स घिना नाहीं करत रहेन। ⁵एक ठु उदाहरण बा: कउनो मनई कउनो मनई क संग जंगल मँ लकड़ी काटइ जात ह। ओनमाँ स एक मनई लकड़ी काटइ बरे कुल्हरी क एक ठु बृच्छ पइ चलावत ह, मुला कुल्हरी हाथे स छूट जात ह। कुल्हरी क धार दूसर मनई पइ लग जात ह अउर ओका मार डावत ह। उ मनई जउन कुल्हरी चलाएस, ओन नगरन मँ पराइ सकत ह अउर आपन क सुरच्छित कइ सकत ह। ⁶मुला अगर सहर बहोत दूर होइ, तउ उ आवस्यकतानुसार तेज नाहीं पराइ सकी। मारा भवा मनई क कउनो नजदीक क रिस्तेदार^[a] ओकर पाछा कइ सकत ह अउर सहर मँ ओकरे पहोंचइ स पहिले ही ओका धरि सकत ह। रिस्तेदार आपन किरोध मँ उ मनई क कतल कइ सकत ह। मुला उ मनई क मउत क सजा उचित नाहीं अहइ। उ उ मनई स पहिले घिना नाहीं करत रहा जेका उ मारेस ह। ⁷एह बरे मइँ आदेस देत हउँ कि तीन खास सहरन क चुना।

⁸“यहोवा तोहार परमेस्सर तोहरे पुरखन क इ बचन दिहस कि मइँ तू पचन्क चउहद्दी क विस्तार करब। उ तू लोगन क सारा देस देइ जेका देइ क बचन उ तोहरे पुरखन क दिहस। ⁹उ इ करी, अगर तू ओन नेमन क पालन पूरी तरह करब्या जेनका मइँ तू पचन्क आजु दइ देत हउँ यानी अगर तू पचे यहोवा आपन परमेस्सर स पिरेम करब्या अउर ओकरे राहे पइ चलत रहब्या। अगर यहोवा तोहरे देस क बड़ावत ह तउ तू पचन्क तीन दूसर नगर सुरच्छा बरे चुनइ चाही। उ सबइ सुरच्छा बरे पहिले तीन सहरन क इलावा होइ चाही। ¹⁰तबहिं निर्दोख लोग उ देस मँ नाहीं मारा जइहीं जेका यहोवा तोहार परमेस्सर तू पचन्क आपन बनावइ बरे देत बाटइ अउर तू पचे कउनो भी मउत बरे अपराधी नाहीं होब्या।

¹¹“किन्तु एक मनई कउनो मनई स घिना कइ सकत ह। उ मनई क मारइ बरे इन्तजार मँ लुका रहि सकत ह जेहसे उ घिना करत ह। उ उ मनई प हमला कइ सकत ह अउ ओका पीटइ अउर मारि सकत ह। ओकर पाछे सुरच्छा बरे चुने इ सहरन मँ पहोंच सकत ह। ¹²अगर अइसा होत ह, तउ उ मनई क सहर क मुखिया क, कउनो क ओका धरइ क अउर सुरच्छत क सहर स ओका बाहेर लिआवइ बरे पठइ चाहीं। सहर क मुखिया ओका मरे भए क नजिक क रिस्तेदारे क दइ चाहीं। हत्तियारा जरुर मारा जाइ चाही। ¹³ओकरे बरे तू पचन्क दुःखी नाहीं होइ चाही। तू पचन्क निर्दोख मनई क मारइ क अपराध क इस्राएल स हटावइ चाही। तब इ तोहरे बरे नीक रही।

जायदाद क चीन्हा

¹⁴“तू पचन्क पड़ोसी क जायदाद क चीन्हा क नाहीं हटावइ चाही। उ चउहद्दी उ समइ मँ स्थापित कीन्ह जात रहा जउन तू उ भुइँया मँ कब्जा कीन्ह रहा। यहोवा तोहार परमेस्सर तू पचन्क रहइ बरे देइ अउर जउन तोहार होई।

गवाह

¹⁵“अगर कउनो मनई कछु अन्याय या पाप क दोखी ठहरावइ जात ह जेका अपराध उ किहेस ह, तउ एक गवाह एक साबित करइ बरे काफी नाहीं होइ कि उ दोखी अहइ। उ सिद्ध करइ बरे दुइ या तीन गवाह जरुर होइ चाही।

¹⁶“कउनो झुठी गवाह कउनो मनई प झुठी मत क अपराध ठहरइ सकत ह। ¹⁷अगर अइसा होत ह तउ तहत्तुक करइवाले दुइनउँ मनई क यहोवा क मौजूदगी मँ खड़ा होइ चाही अउर ओनके मोकद्दमन क फइसला याजकन अउ उ समइ क मुख्य निआवाधीसन क जरिये होइ चाही। ¹⁸निआवाधीसन क होसियारी स पूछ-ताछ करइ चाही। उ पचे पता लगाइ सकत हीं कि गवाह दूसर मनई क खिलाफ झूठ बोलेस ह। अगर गवाह झूठ बोलेस ह तउ, ¹⁹तू पचन्क ओका सजा देइ चाही। तू पचन्क ओका उहइ हानि पहोंचावइ चाही जउन उ दूसर मनई क पहोंचावइ चाहत रहा। इ तरह तू पचे आपन बीच स कउनो भी बुरी बात निकारिके बाहेर कइ सकत ह। ²⁰दूसर सबहिं लोग ऍका सुनिहीं अउर डेराइ जइहीं, अउर तोहमाँ स कउनो भी फुन वइसी बुरी बात नाहीं करी।

²¹“तू पचे ओह पइ दाया-दृस्टि जिन कर्या जेका बुराई बरे तू पचे ओका सजा देत अहा। जिन्नगी बरे जिन्नगी, आँखी बरे आँखी, दाँत बरे दाँत, हाथ बरे हाथ अउर गोड़वा बरे गोड़ लीन्ह जाइ चाही।

भजन संहिता 106

¹यहोवा क बड़कई करा।
यहोवा क धन्यवाद करा काहेकि उ उत्तिम अहइ।
    परमेस्सर क पिरेम सदा ही रहत ह।
²फुरइ यहोवा केतॅना महान अहइ, एकर बखान कउनो मनई कइ नाहीं सकत।
    परमेस्सर क पूरी बड़कई कउनो नाहीं कइ सकत।
³जउन लोग परमेस्सर क आदेस क पालन करत हीं, उ पचे धन्न अहइ।
    उ पचे हमेसा उत्तिम करम करत हीं।

⁴यहोवा, जब तू आपन भगतन पइ कृपा करा मोका याद करा।
    मोर भी उद्धार करइ बरे याद करा।
⁵यहोवा, मोका भी ओन भली बातन मँ हींसा बटावइ द्या
    जेनका तू आपन लोगन बरे करत अहा।
तू आपन रास्ट्रन क संग मोका भी खुस होइ द्या।
    तोह पइ तोहार लोगन क संग मोका भी गर्व करइ द्या।

⁶हम पचे वइसेन ही पाप किहेन ह जइसे हमार पुरखन किहेन ह।
    हम गलत किहेन।
    हम बुरा काम किहे अही।
⁷हे यहोवा, मिस्र मँ हमार पुरखन तोहार अचरज कर्मन स कछू भी नाहीं सीखेन।
    उ पचे तोहरे पिरेम क
अउर तोहार करुणा क याद नाहीं रखेन।
    हमार पुरखन हुआँ लाल सागर क किनारे तोहरे खिलाफ भएन।

⁸मुला परमेस्सर निज नाउँ क कारण ओनका बचाए रहा।
    उ आपन सक्ति क परगट किहेस।
⁹परमेस्सर हुकुम दिहस अउर लाल सागर झुरान होइ गवा।
    उ ओनका उ गहिर समुद्दर स अइसा निकारि चला जइसे कउनो रेगिस्तान होइ।
¹⁰परमेस्सर हमरे पुरखन क ओनकर दुस्मनन स बचाएस।
    उ ओनका आपन दुस्मनन स आजाद किहस।
¹¹अउर फिन ओनकर दुस्मनन क उहइ सागर क बीच ढाँपिके बोर दिहस।
    ओनकर एक दुस्मन बचिके निकर नाहीं पाएस।

¹²तब हमार पुरखन परमेस्सर क वचन पइ बिस्सास किहन।
    उ पचे ओकर गुण गाएन।
¹³मुला हमार पुरखन ओन बातन क हाली बिसरि गएन जउन परमेस्सर किहे रहा।
    उ पचे परमेस्सर क सम्मति पइ कान नाहीं दिहन।
¹⁴उ पचे दूसर चिजियन क कामना किहेन।
    रेगिस्तान मँ उ पचे परमेस्सर क परखेन।
¹⁵मुला हमार पुरखन जउन कछू भी माँगेन परमेस्सर ओनका दिहस
    मुला परमेस्सर ओनका एक महामारी भी दइ दिहस।
¹⁶लोग मूसा स डाह रखइ लागेन
    अउर हारून स उ पचे डाह रखइ लागेन जउन यहोवा क पवित्तर याजक रहा।
¹⁷एह बरे धरती फट गई अउ दातान क निगल गवा।
    अउर उ अबिराम क समूह क निगल लिहस।
¹⁸फिन आगी ओन
    दुट्ठ लोगन क बारि दिहस।
¹⁹ओ लोग होरब क पहाड़े पइ एक ठु सोना क बछवा बनाएन।
    उ पचे उ मूरति क पूजा करइ लागेन।
²⁰उ पचे आपन महिमावान परमेस्सर क
    एक घास खाइवाला बछवा क प्रतिमा स बदल डालेन।
²¹हमार पुरखन परमेस्सर क बिसरि गएन जउन ओनका मुक्ति दियाए रहा।
    उ पचे परमेस्सर क बिसरि गएन जउन मिस्र मँ अचरज भरा करम किहे रहा।
²²परमेस्सर हाम क देस मँ अचरज भरा करम किहे रहा।
    परमेस्सर लाल सागर क लगे भय विस्मय भरा काम किहे रहा।

²³परमेस्सर ओन लोगन क नस्ट करइ चाहत रहा।
मुला परमेस्सर क चुना भवा सेवक मूसा,
परमेस्सर क समन्वा ओन लोगन क नास करइ स
बचाइ बरे बीच मँ आइ गएन।

²⁴तब ओन लोग उ अद्भुत देस कनान मँ जाइ स मना कइ दिहन।
    उ पचे ओकरे वाचा क बिस्सास नाहीं किहेस।
²⁵आपन तम्बुअन मँ उ पचे सिकाइत करत रहेन।
    हमार पुरखन परमेस्सर क बात मानइ स नकारेन।
²⁶तउ परमेस्सर किरिया खाएस
    कि उ पचे रेगिस्तान मँ मरि जइहीं।
²⁷परमेस्सर किरिया खाएस कि ओनकर सन्तानन क दूसर लोगन क हरावइ देइ।
    परमेस्सर कसम खाएस कि उ हमरे पुरखन क देसन मँ छितराइ।

²⁸बाद मँ परमेस्सर क लोग “बाल-पिऑर” मँ “बाल” क पूजइ करइ सुरू कइ दिहेन।
    उ पचे उ माँस खाइ लागेन जेका निर्जीव देवतन पइ चढ़ावा ग रहा।
²⁹यहोवा ओन लोगन क करमन पइ बहोत कोहाइ गवा।
    अउर उ ओन लोगन क खिलाफ महामारी लिआएन।
³⁰मुला पीनहास बिनती किहस
    अउ परमेस्सर उ बियधि क रोकेस
³¹परमेस्सर इ काम क ओकरे बरे आवइवालन
    पीढ़ियन बरे बहोत उत्तिम करम समझेस।

³²लोग मरिबा मँ यहोवा क किरोध भड़काएन,
अउर ओकरे कारण मूसा स बुरा काम कराएन।
³³उ सबइ लोग मूसा क बहोत उदास किहन।
तउ मूसा बिना ही बिचारे बोल उठा।

³⁴तउ उ कनान क रास्ट्र क नस्ट नाहीं किहेस,
    हाँलाकि यहोवा ओनका इ करइ बरे कहे रहा।
³⁵इस्राएल क लोग दूसर लोगन स हिल मिल गएन,
    अउर उ पचे भी वइसेन काम करइ लागेन जइसे दूसर लोग करत रहेन।
³⁶उ सबइ दूसर लोग परमेस्सर क जनन बरे फंदा बन गएन।
    परमेस्सर क लोग ओन देवन क पूजइ लागेन जेनकर उ पचे दूसर लोग पूजा करत रहेन।
³⁷हिआँ तलक कि परमेस्सर क जन आपन ही गदेलन क हत्या करइ लागेन।
    अउर उ पचे ओन गदेलन क ओन दानवन क प्रतिमा पइ अर्पित करइ लागेन।
³⁸परमेस्सर क लोग निर्दोख गदेलन क हत्या किहन।
    उ पचे आपन ही गदेलन क मारि डाएन अउर ओनका कनान क देवन क अर्पित किहेन।
    उ पचे खून स धरती क दूसित किहेन।
³⁹उ पचे आपन कामन स असुद्ध भएन
    अउर आपन कार्यन दुआरा अबिस्सासी बन गए रहेन।
⁴⁰परमेस्सर आपन ओन लोगन पइ कोहाइ गवा।
    परमेस्सर ओनसे तंग आइ चुका रहा।
⁴¹तब परमेस्सर आपन ओन लोगन क दूसर जातियन क दइ दिहस।
    परमेस्सर ओन पइ ओनकर दुस्मनन क हुकूमत करवावइ दिहस।
⁴²ओनकर दुस्मनन ओन पइ अत्याचार किहन
    अउ ओनकर जिअब बहोत कठिन कइ दिहन।
⁴³परमेस्सर आपन लोगन क बहोत बार बचाएस।
    मुला उ पचे ओनका स मुँह मोड़ लिहन।
    अउर उ पचे अइसी बातन करइ लागेन जेनका उ पचे करइ चाहत रहेन।
    एह बरे उ पचे आपन पाप क कारण हराइ दीन्ह गवा रहेन।
⁴⁴मुला जब कबहूँ परमेस्सर क जनन पइ विपद पड़ी उ पचे सदा ही मदद पावइ क परमेस्सर क गोहराएन।
    परमेस्सर हर दाईं ओनकर सबइ पराथना क सुनेस।
⁴⁵परमेस्सर सदा आपन करार क याद राखेस।
    परमेस्सर आपन महा पिरेम स ओनका सदा ही सुख चैन दिहस।
⁴⁶परमेस्सर ओन लोगन बरे
    दूसर कैदियन क समन्वा दयालुता दिखाएस।
⁴⁷यहोवा हमार परमेस्सर, हमार रच्छा किहस।
    परमेस्सर ओन दूसर देसन स हमका ऍकट्ठा कइके लइ आवा,
ताकि हम ओकरे पवित्तर नाउँ क गुणगान कइ सकी;
    तकि हम ओकर बड़कई क गीत गाइ सकी।
⁴⁸इस्राएल क परमेस्सर यहोवा क धन्य कहा।
    परमेस्सर सदा ही जिन्दा रहत आवा ह।
उ सदा ही जिन्दा रही।

अउर सबइ जन बोलइँ, “आमीन।”

यहोवा क गुण गावा।

यसायाह 46

लबार देव बियर्थ अहइँ

46 बेल अउर नेबो तोहरे अगवा निहुराइ दीन्ह ह अहइँ। लबार देवता तउ बस केवल मूरति अहइँ। लोग एन बुतन क जानवरन क पीठ पइ लाद दिहेन ह। इ सबइ बुत बस एक बोझ अहइँ, जेनका ढोउब ही अहइ। इ सबइ लबार देवता कछू नाहीं कइ सकतेन। बस लोगन क थकाइ सकत हीं। ²एन सबहिं लबार देवतन क निहुराइ दीन्ह जाइ। इ सबइ बचिके कहुँ नाहीं पराइ सकिहीं। ओन सबहिं क बन्दियन क तरह लइ जावा जाइ।

³“याकूब क परिवार, मोर सुना। हे इस्राएल क लोगो जउन अबहिं जिअत अहा, सुना। मइँ तू पचन्क तब स धारण किहे अहउँ जब अबहिं तू पचे महतारी क गर्भ मँ ही रह्या। ⁴मइँ तू पचन्क तबइ स धारन किहे हउँ जब स तू पचन्क जन्म भवा ह अउर मइँ तू पचन्क तबइ भी धारण करब, जब तू पचे बुढ़वा होइ जाब्या। तोहार पचन्क बार सफेद होइ जइहीं, मइँ तब भी तू पचन्क धारण किहे रहब काहेकि मइँ तोहार पचन्क रचना किहेउँ ह। मइँ तू पचन्क धारण किहे रहब अउर तोहार पचन्क रच्छा करब।

⁵“केकर संग तू मोर तुलना कइ सकत ह? कउनो भी मनई नाहीं अहइ जेकर तुलना मोहसे कीन्ह जाइ सकी! तोहार तुलना मँ स कउनो भी मोर सही तरीका स वर्णन नाहीं कइ सकत हीं। ⁶कछू लोग सोना अउ चाँदी आपन थैलियन स निकालेस, उ पचे ओनका तराजुअन स तौलेस अउर ओनका लबार देवता बनावइ बरे सोनार जेका उ मजदूरी पइ आपन बरे मूर्तियन बनावइ बरे लाएस ह क देत हीं। तब फुन उ सबइ लोग उहइ लबार देवतन निहुरत हीं अउर ओकर सम्मान करत हीं। ⁷हाँ उ सबइ लोग लबार देवतन लेब्या अउर ओका आपन काँधन पइ रखिके लइ चलब्या। किन्तु जब उ पचे एका धरती पइ थापिब, इ न ही उठ सकत या हिल-डुल कइ पावत। इ नाहीं कइ सकत काहेकि इ मूर्ति अहइ! लोग आपन लबार देवतन क समन्वा मदद बरे चिचियात हीं, किन्तु इ कबहुँ जबाव नाहीं देइ। इ लोगन क ओनकर विपत्तियन अउर कस्टन स नाहीं उबार सकत।

⁸“तू लोग पाप किहा ह। तू पचन्क एन बातन क फुन स याद करइ चाही। एन बातन क याद करा अउर सुदृढ़ होइ जा। ⁹ओन बातन क सुमिरा जउन बहोत पहिले घटी रहिन। याद राखा कि मइँ परमेस्सर हउँ। कउनो दूसर अन्य परमेस्सर नाहीं अहइ। उ सबइ लबार देवता मोरे जइसे नाहीं अहइँ।

¹⁰“सुरू मँ मइँ तू पचन्क ओन बातन क बारे मँ बताइ दिहे रहेउँ जउन अंत मँ घटी। बहोत पहिले स ही मइँ तू पचन्क उ सबइ बातन बताइ दिहे हउँ, जउन अबहिं घटी नाहीं अहइँ। जब मइँ कउनो बात क कउनो जोजना बनावत हउँ तउ उ घटत ह। मइँ उहइ करत हउँ जउन करइ चाहत हउँ। ¹¹लखा, पूरब दिसा स मँ एक मनई क बोलावतहउँ उ मनई एक उकाब क समान होइ। उ एक दूर देस स आई अउर उ ओन कामन क करी जेनका करइ क जोजना मइँ बनाएउँ ह। मइँ तू पचन्क बतावत हउँ कि मइँ एका करब अउर मइँ ओका करब ही। काहेकि ओका मइँ ही बनाएउँ ह। मइँ ओका लिआउब ही।

¹²“तू पचन मँ स कछू सोचा करत हीं कि तू पचन सक्ति अहइ किन्तु तू पचे भले काम नाहीं करत अहा। मोर सुना। ¹³मइँ भले काम करब। मइँ हाली ही आपन लोगन क रच्छा करब। मइँ आपन सिय्योन अउर आपन अद्भुत इस्राएल क बरे उद्धार लिआउब।”

प्रकासित वाक्य 16

परमेस्सर क गुस्सा क कटोरा

16 फिन मइँ सुनेउँ कि मन्दिर मँ स एक जोर क आवाज़ ओन सात सरगदूतन स कहत अहइ, “जा अउर परमेस्सर क गुस्सा क सातउँ कटोरन क धरती प उड़ेर द्या।”

²इ बरे पहिला सरगदूतन गवा अउर उ धरती प आपन कटोरा उड़ेर दिहेस। एकइ नतीजा इ भवा कि उ मनई जेनके ऊपर जनावर क निसानी छपी रही अउर जउन ओकरी मूरती क पूजा करत रहेन, क ऊपर भयानक पीड़ा पइदा करइवाले छाला फूट आएन।

³एकरे बाद दूसर सरगदूतन आपन कटोरा समुद्दर मँ उड़ेर दिहेस अउर समुद्दर क पानी मरे भए मनई क खून मँ बदल गवा अउर समुद्दर मँ रहइवाले सब जीवजन्तु मरि गएन।

⁴फिन तीसरा सरगदूतन नदियन अउर पानी क झरनन पइ आपन कटोरा उड़ेर दिहेस अउर उ खून मँ बदल गएन। ⁵उहइ समइ प मइँ पानी सरगदूतन क इ कहत सुनेउँ:

“तू ही अहा उ, जउन पुण्यातिमा! जउन अहइ, जउन रहा
    सदा-सदा स तू ही अहा जउन अहइ
    एक ही पवित्तर, करत भए निआव ओनकर,
⁶ओन सबन पवित्तर लोगन
    अउर नबियन क खुन बहाए अहइ।
तू ओनका पिअइ क बरे केवल खून दिह्या।
    काहे बरे कि ओन इहइ क काबिल रहेन।”

⁷फिन मइँ वेदी स आवत आवाज़ सुनेउँ:

“हाँ, सर्वसक्तिमान प्रर्भू परमेस्सर,
तोहार निआव सच्चा अउर उचित अहइ।”

⁸फिन चौथा सरगदूत आपन कटोरा सूरज क ऊपर उड़ेर दिहेस। इ तहर ओका मनइयन क आग स जलावइ क ताकत दइ दीन्ह गइ। ⁹अउर मनई भयानक गरमी स झुलसइ लागेन। उ परमेस्सर क नाउँ क कोसइ लागेन काहे बरे कि इन जेका महमारी प क अधिकार अहइ। मुला उ पचे आपन मनफिरावा नाहीं किहेन अउर न जिन्नगी क बदलेन अउर परमेस्सर क महिमा किहेन।

¹⁰एकरे बाद पाँचवा सरगदूत आपन कटोरा उ जनावर क सिंहासन प उड़ेरे दिहेस अउर ओकर राज अँधेरे मँ डूब गवा। सब मनई तकलीफ क आपन जीभ काट लिहेन। ¹¹आपन आपन पीड़ा अउर छालन क कारण उ सरग क परमेस्सर क निन्दा तउ करइ लागेन मुला आपन मनफिरावा नाहीं किहेन।

¹²फिन छठवाँ सरगदूत आपन कटोरा फरात नाउँ क महानदी प उड़ेर दिहेस अउर ओकर पानी सूख गवा। एहसे पूरब दिसा क राजन क बरे रास्ता तइयार होइ गवा। ¹³फिन मइँ देखेउँ कि उ भयंकर अजगर क मुँहे स, उ जनावर क मुँह स, अउर कपटी नबियन क मुँहसे तीन दुस्ट आतिमन निकलिन, जउन मेड़क क तरह दिखाई पड़त रहिन। ¹⁴इ सब दुस्ट क आतिमन रहिन अउर ओनके मँ अदभुत कारजन करइ क ताकत रही। उ पूरी दुनिया क राजा लोगन मँ सबसे सर्वसक्तिमान परमेस्सर क महान दिन, जुद्ध करइ क बरे एकट्ठा करइ क निकल पड़ेन।

¹⁵“सावधान! मइँ चोर क समान आवत हउँ। उ धन्य अहइ जउन जागत रहत ह अउर अपने क परन क अपने साथे रखत ह जइसेन कि उ नंगा न घूमइ अउर मनई ओका लज्जित होत न देइँ।”

¹⁶इ तरह स उ दुस्ट आतिमन ओन राजन क एकट्ठा कइके उ जगह प लइ आएन जउने क इब्रानी भाखा मँ हर मगिदोन कहा जात ह।

¹⁷एकरे बाद सातवाँ सरगदूत आपन कटोरा हवा मँ उड़ेर दिहेस! अउर सिंहासन स पइदा भवा एक भयंकर आवाज़ मन्दिर मँ स कहत तिकरी, “इ खतम होइ गवा!” ¹⁸तबहि बिजली कउँधइ लाग, आवाज़ क अउर गरजन अउर एक ठू जर्बदस्त भूचाल आइ गवा। मनई क धरती प परगट होइ क बाद क इ सबसे भयानक भूचाल रहा। ¹⁹उ बड़ा सहर तीन टुकड़न मँ बिखर गवा, अउर अधर्मियन क रास्ट्रन नगरन क नस्ट होइ गए। परमेस्सर महानगरी बाबुल क दण्ड़ देइ क बरे याद करे रहा। आपन भयंकर प्रकोप क काटोरा मँ स ओका दइ दिहेस। ²⁰सब द्वीप गायब होई गएन। कउनो पहाड़ तक क पता नाहीं चल पावत रहा। ²¹पचास पचास किलो क ओला, आसमान स मनइयन क ऊपर बरसइ लागेन। ओलन क भयंकर विपत्ति क कारण सब मनई परमेस्सर क कोसत रहेन, काहे बरे कि इ भयानक आफत रही।

Awadhi Bible: Easy-to-Read Version (ERV-AWA)