◀ All Reading Plans / M’Cheyne Bible Reading Plan / Family: Deuteronomy 23; Psalms 112–113. Secret: Isaiah 50; Revelation 20. (Awadhi Bible: Easy-to-Read Version)

Prev Day

June 18, 2025

Next Day

Use the calendar to view readings from this devotional.

June 2025
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

व्यवस्था विवरण 23

उ सबइ लोग उपासना मँ सामिल होइ सकत हीं

23 “इ सबइ लोग इस्राएल क लोगन क संग यहोवा क उपासना करइ बरे नाहीं आइ सकतेन: उ मनई जउन आपन क बधिया कराइ लिहस ह, उ मनई जउन आपन जनन अंग कटवाइ लिहस ह ²या उ मनई जउन बिना बियाहे भए महतारी-बाप क सन्तान होइ। इ मनई क परिवार क कउनो मनई दसईं पीढ़ी तलक भी यहोवा क लोगन मँ यहोवा क उपासना करइ बरे नाहीं गना जाइ सकत।

³“कउनो अम्मोनी या मोआबी यहोवा क लोगन स सम्बंध रखत भवा नाहीं होइ सकत अउर दस पीढ़ियन तलक ओनकर कउनो सन्तान भी यहोवा क लोगन क हींसा यहोवा क उपासना करइ बरे नाहीं बन सकत। ⁴काहेकि अम्मोनी अउर मोआबी लोग मिस्र स बाहेर आवइ क जात्रा क समइ तू लोगन क रोटी अउ पानी देइ स इन्कार किहे रहेन। उ सबइ यहोवा क लोगन क हींसा एह बरे भी नाहीं होइ सकतेन काहेकि उ पचे बिलाम क तू पचन्क अभिसाप देइ बरे मुकरर्र किहे रहेन। (बिलाम अरम्नहरैम मँ पतोर सहर क बोर क पूत रह।) ⁵मुला यहोवा परमेस्सर बिलाम क एक नाहीं सुनेस। यहोवा अभिसाप क तोहरे बरे बरदान मँ बदल दिहस। काहेकि यहोवा तोहार परमेस्सर तू पचन्स पिरेम करत ह। ⁶तू पचन्क अम्मोनी अउ मोआबी लोगन्क संग सान्ति रखइ क कोसिस कबहुँ नाहीं रखइ चाही। जब तलक तू लोग रहा, ओनसे मिताई जिन राखा।

इ सबइ जेनका इस्राएलियन क अपने मँ मिलावइ चाही

⁷“तू पचन्क एदोमी स घिना नाहीं करइ चाही। काहेकि उ तोहार सभ्बंधी अहइ। तू पचन्क कउनो मिस्री स घिना नाहीं करइ चाही। काहेकि ओनके देस मँ तू पचे अजनबी रह्या। ⁸एदोमी अउर मिस्री लोगन स पइदा तीसरी पीढ़ी क गदेलन यहोवा क लोगन क हींसा बन सकत हीं।

फउज क छाउनी क स्वच्छ रखब

⁹“जब तोहार फउज दूस्मन क खिलाफ जाइ, तब तू पचे ओन सबहिं चीजन स दूर रहा जउन तू पचन्क बे पवित्तर बनावत हीं। ¹⁰अगर कउनो अइसा मनई अहइ जउन इ कारण पवित्तर नाहीं अहइ कि रात मँ सपनदोस होइ गवा बाटइ तउ ओका छाउनी क बाहेर चला जाइ चाही। ओका छाउनी स दूर रहइ चाही। ¹¹मुला जब साँझ होइ तब उ मनई क पानी स नहाइ चाही अउर जब सूरज बूड़इ तब ओका छाउनी मँ आवइ चाही।

¹²“तू पचन्क छाउनी क बाहेर दिसा फरागत बरे जगह बनवइ चाही। ¹³अउर तू पचन्क आपन हथियार क संग खनइ बरे एक ठु खन्ती रखइ चाही। एह बरे जब तू पचे फरागत करब्या तब तू एक ठु गड़हा खना अउर ओका ढाँकि द्या चाही। ¹⁴काहेकि यहोवा तोहार परमेस्सर तोहरे डेरन मँ दुस्मनन क हरावइ मँ तोहार मदद करइ बरे तोहरे संग अहइ। एह बरे डेरा पवित्तर रहइ चाही। तब यहोवा तू पचन मँ कछू भी अनुचित न लखी अउर तोहे सबन्स आँखी न फेरी।

दूसर नेमन

¹⁵“अगर कउनो दास आपन मालिक क हिआँ स पराइके तोहरे लगे आवत ह तउ तू पचन्क उ दास क ओकरे मालिक क नाहीं लउटावइ चाही। ¹⁶इ दास तोहरे संग जहाँ चाहे हुआँ रहि सकत ह। उ जउने भी सहर क चुन लेइ ओहमाँ रहि सकत ह। तू पचन्क ओका परेसान नाहीं करइ चाही।

¹⁷“कउनो इस्राएली मेहरारु या मनसेधू क कबहुँ देवदासी या देवदास नाहीं बनइ चाही। ¹⁸देवदास या देवदासी क कमावा भवा धन तोहरे परमेस्सर क मन्दिर मँ नाहीं लिआवा जाइ चाही। कउनो मनई दीन्ह भए बचन क कारण यहोवा क दीन्ह जाइवाली चीज क बरे इ धने क उपयोग नाहीं कइ सकत। यहोवा तोहार परमेस्सर सबहिं मन्दिरन क देवदास-देवदासियन स घिना करत ह।

¹⁹“अउर तू पचे कउनो इस्राएली क उधार द्या तउ तू पचे ओह पइ बियाज जिन ल्या। तू पचे उधार मँ लीन्ह गवा सिक्कन, भोजन या कउनो अइसी चीज पइ बियाज मँ न ल्या। ²⁰तू पचे बिदेसियन स बियाज लइ सकत ह। मुला तू पचन्क दूसर इस्राएली स बियाज नाहीं लेइ चाही। अगर तू पचे इ नेमन क मनब्या तउ यहोवा तोहार परमेस्सर उ देस मँ, जहाँ तू पचे रहइ जात अहा, जउन कछू तू पचे करब्या ओहमाँ आसीस देइ।

²¹“जब तू पचे यहोवा आपन परमेस्सर क बचन द्या, तउ जउन तू पचे देइ क कहा ओन सब क देइ मँ ढीला जिन ह्वा। अगर तू बचन दीन्ह गइ चीजन क नाहीं देब्या तउ पाप क अपराध करब्या। यहोवा तोहार परमेस्सर चाहत ह कि तू निहचय ही आपन वचन क जरूर पूरा करा। ²²अगर तू बचन नाहीं देब्या तउ तू पचे पाप नाहीं करत अहा। ²³मुला तू पचन्क उ चीजन क करइ चाही जेका करइ बरे तू पचे कहया ह कि तू करब्या। जब तू पचे अजादी स यहोवा आपन परमेस्सर क बचन द्या तउ, तू पचन्क बचन दीन्ह गइ बात क पूरी करइ चाही।

²⁴“अगर तू दूसर मनई स अंगूर क बगिया स होइके जात अहा, तउ तू जेतना चाहा ओतना अंगूर खाइ सकत ह। मुला तू कउनो अंगूर आपन टोकरी मँ नाहीं रख सकब्या। ²⁵जब तू दूसर क पका भवा अनाज क फसल क खेते स होइके जात अहा तउ तू आपन हाथे स जेतना उजारा, खाइ सकत ह। मुला तू हँसिया क उपयोग दूसर क अनाज क काटइ अउर लेइ बरे नाहीं कइ सकत्या।

भजन संहिता 112-113

¹यहोवा क बड़कई करा।

अइसा मनई जउन यहोवा स डेरात ह अउर ओकर आदर करत ह उ बहोत सफल होइ।
    परमेस्सर क आदेस अइसे लोग क भावत हीं।
²धरती पइ अइसे मनई क संतानन मज़बूत होइहीं।
    अच्छे मनई क संतानन आसीर्बाद पाइहीं।
³अइसे मनई क परिवार बहोत धनवान होइ।
    ओकर नीक करम सदा सदा बनी रही।
⁴सच्चे लोगन बरे परमेस्सर अइसा होत ह जइसे अँधियारा मँ चमकत प्रकास होइ।
    उ सच्चा अहइ, अउर करुणा स भरा बाटइ अउर दाया स भरा बा।
⁵इ मनई बरे नीक बाटइ कि उ दयालु अउर उदार होइ।
    मनई क इ उत्तिम अहइ कि उ आपन वादा मँ खरा रहइ।
⁶अइसा मनई क पतन कबहुँ नाहीं होइ।
    एक सच्चा मनई क सदा याद कीन्ह जाइ।
⁷सज्जन व्यक्ति बुरी खबरन स नाहीं डेरात।
    अइसा मनई यहोवा क भरोसे अहइ अउर आस्वस्त रहत ह।
⁸अइसा मनई आस्वस्त रहत ह उ ससान नाहीं रहत।
    उ आपन दुस्मनन क हराइ देइ।
⁹अइसा मनई दीन जनन क मुक्त दान देत ह।
    ओकर नीक करम जेका उ दीन लोगन बरे दिखावत ह उ सदा सदा बना रइहीं।
    उ बहोत सम्मानित कीन्ह जाइ।
¹⁰कुटिल लोग ओका लखिहीं अउर कुपित होइहीं।
    उ पचे किरोध मँ आपन दाँतन क पिसिहीं अउर फुन लुप्त होइ जइहीं।
    दुट्ठ लोग ओका कबहुँ नाहीं पइहीं जेका उ सब स जियादा पावइ चाहत हीं।

¹यहोवा क स्तुति करा,

हे यहोवा क सेवकन, ओकर स्तुति करा।
    यहोवा क नाउँ क बड़कई करा।
²यहोवा क नाउँ अबहुँ
    अउर सदा सदा बरे आसीसित होइ।
³मोर इ कामना अहइ, यहोवा क नाउँ क गुण पूरब स जहाँ सूरज उगत ह,
    पच्छिउँ तलक उ ठउरे मँ जहाँ सूरज बूड़त ह गावा जाइ।
⁴यहोवा सबहिं रास्ट्रन स महान अहइ।
    ओकर महिमा अकासे तलक उठति ह।
⁵यहोवा हमरे परमेस्सर क नाई कउनो भी मनई नाहीं अहइ
    जउन ऊँचाइ पइ विराजमान अहइ।
⁶भले ही उ सबइ बातन क जउन धरती अउर आकासे पइ घटत ह,
    लखइ बरे उ नीचे झुकिके निगाह डावइ ह।
⁷परमेस्सर गरीब मनइयन क धूरि स उठावत ह।
    उ ओनका क गन्दगी स निकारत ह।
⁸परमेस्सर ओनका महत्वपूर्ण बनावत ह।
    परमेस्सर ओन लोगन क महत्वपूर्ण मुखिया बनावत ह।
⁹कउनो मेहरारू बे औलाद होइ सकत ह, किन्तु परमेस्सर ओका बच्चा स आसीसित करी,
    अउर ओका खुस करी।

यहोवा क गुणगान करा।

यसायाह 50

इस्राएल क ओकरे पापन्क दण्ड

50 यहोवा कहत ह,
“हे इस्राएल क लोगो, तू पचे कहा करत रह्या कि मइँ तोहार महतारी यरूसलेम क तलाक दिहेउँ।
    किन्तु उ तलाकपत्र कहाँ अहइ जउन साबित कइ देइ कि मइँ ओका तलाक दिहेउँ ह।
हे मोरे गदेलो, का मइँ कउनो क कर्जदार अहउँ?
    का आपन कउनो कर्ज चुकावइ बरे मइँ तोहका बेचेउँ ह?
नाहीं, तू बिका रह्या एह बरे कि तू बुरे करम किहे रह्या।
    एह बरे तोहार महतारी दूर पठइ गइ रही काहेकि तू बुरा करम किहे रह्या।
²जब मइँ घरे आवा रहेउँ, मइँ हुआँ कउनो क नाहीं पाएउँ।
    मइँ बार-बार गोहराएउँ किन्तु कउनो जबाव नाहीं दिहस।
का तू पचे सोचत अहा कि तोहका मइँ नाहीं बचाइ सकत हउँ?
    मइँ तोहार बिपत्तियन स तोहका पचन्क बचावइ क सक्ति धरत हउँ।
लखा, जदि मइँ समुद्दर क झुराइ क आदेस देउँ
    तउ उ झुराइ जाइ।
मछरियन परान तजि देइहीं काहेकि हुवाँ जल न होइ
    अउर ओनकर देह सड़ि जाइ।
³मइँ अकासन क करिआ कइ सकत हउँ।
    अकास वइसे ही करिआ होइ जइहीं जइसे सोक वस्त्र होत हीं।”

परमेस्सर क सेवक परमेस्सर क भरोसे

⁴मोर सुआमी यहोवा मोका सीख देइ क जोग्यता दिहस ह। ऍह बरे मइँ थका भवा लोगन क प्रोत्साहित करत हउँ अउर ससकत बनावत हउँ। हर भिंसारे उ मोका जगावत ह अउर एक छात्र क नाईं सिच्छा देत ह। ⁵मोर सुआमी यहोवा सीखइ मँ मोर सहायक अहइ अउर मइँ ओकर विरोधी नाहीं बना अहउँ। मइँ ओकरे पाछे चलब नाहीं तजब। ⁶ओन लोगन क मइँ आपन पिटाइ करइ देब। मइँ ओनका आपन दाढ़ी क बार नोचइ देबउँ। उ सबइ लोग जब मोरे बरे अपसब्द कइहीं अउर मोह पइ थूकिहीं तउ मइँ आपन मुँह नाहीं मोड़ब। ⁷मोर सुआमी, यहोवा मोर मदद करी। एह बरे ओनकर अपसब्द मोका दुःख नाहीं पहोंचइहीं। मइँ सुदृढ़ रहब। मइँ जानत हउँ कि मोका निरास नाहीं होइ पड़ी।

⁸एक उ जउन कउनो मोका दोख रहित बनाएस ह उ मोर संग अहइ, एह बरे कउन मनई मोका अपराधी साबित कइ सकत ह। जदि कउनो मनई सोचत ह कि उ मोर खिलाफ कउनो सिकायत रखत ह, तउ उ मनई क मोरे लगे आवइ द्या अउर अपना तर्क रखइ द्या। ⁹किन्तु लखा, मोर सुआमी यहोवा मोर मदद करत ह। ऍह बरे कउन मनई अहइ जउन इ सिद्ध कइ सकी कि मइँ दोखी हउँ? उ सबइ सबहिं लोग वइसे ही बाहर फैंकइ जाइ जइसे पुरान कपड़न क जेका किरवन चट कइ जातहीं।

¹⁰अगर कउनो मनई जउन यहोवा क आराधना करत ह अउर ओकर सेवक क संदेस भी सुनत ह, मगर अबहुँ तलक अंधेरे मँ बिना प्रकास क चलत ह, एका अपने यहोवा क नाउँ मँ बिस्सास रखइ चाही अउर ओका आपन परमेस्सर पइ जरूर भरोसा रखइ चाही।

¹¹“लखा, तू लोग आपन ही ढंग स जिअइ चाहत अहा। आपन आगी अउर आपन मसालन क तू पचे खुद बारत अहा। तू पचे आपन ही ढंग स रहइ चाहत अहा। किन्तु तू पचन्क सजा दीन्ह जाइ। तू पचे आपन ही आगी मँ भहराब्या अउर तोहार पचन्क आपन ही मसालन तू पचन्क बारि डइहीं। अइसी घटना मइँ घटवाउब।”

प्रकासित वाक्य 20

हजार साल

20 फिन आकास स मइँ एक सरगदूत क नीचे उतरत देखेउँ। ओकरे हाथ मँ पाताल क चाभी अउर एक बड़ी संकरी रही। ²उ पुरान महासांप क पकड़ लिहेस जउन कि दैत्य यानी सइतान बाटइ फिन ओका एक हजार साल क बरे संकरी मँ बाँध दिहेस। ³तउ उ सरगदूत ओका अथाह कुंड मँ डाइके बन्द कइके परदार साँपे प मुहर लगाइ दिहेस जेहसे जब तलक हजार साल पूरा न होइ जाइ, उ कउनो मनई क धोखा न दइ सकत। हजार साल पूरा होइ जाइ क पाछे ओका कछू समइ क बरे छोड़ा जाइ क अहइ।

⁴फिन मइँ कछू सिंहासन देखीउँ जउने प कछू मनई बइठा रहेन। ओनका निआव करइ क अधिकार दीन्ह ग रहा। अउर मइँ ओनकी आतिमा क देखेउँ जेनके सिर, उ सच्चाई क कारण, जउन ईसू स प्रमाणित अहइँ, अउर परमेस्सर क संदेस स, काट दीन्ह ग रहेन, जे उ जनावरन या ओकरी मूर्ति क कबहुँ पूजा नाहीं करे रहेन। जे अपने माथे प या अपने हाथे प ओकर निसानी कबहुँ धारण नाहीं किहे रहेन। उ पचे फिन स जिन्दा होइ गएन अउर उ मसीह क साथ एक हजार साल तक राज करेन। ⁵(बाकी मनई हजार साल पूरा होइ गए प फिन स जिन्दा नाहीं भएन।)

इ पहिला पुनरुत्थान बाटइ। ⁶उ धन्य अहइ अउर पवित्तर अहइ, जउन पहले पुनरुत्थान मँ भाग लेत अहइ। एन पइ दूसरी मृत्यु क कउनो अधिकार नाहीं अहइ। इ आदमियन प दूसर मउत क कउनो अधिकार नाहीं मिला अहइ। पर उ पचे तउ परमेस्सर अउर मसीह क आपन याजकन होइहीं अउर ओकरे साथे एक हजार साल तक राज करिहीं।

⁷फिन एक हजार साल पूरा होइ जाए प सइतान क ओकरी जेल स छोड़ दीन्ह जाई। ⁸अउर उ समूची धरती प फइली रास्ट्रन क छलइ क बरे निकर पड़ी। उ गोग अउर मागोग क छली। उ ओनका लड़ाई क बरे एकट्ठा करी। उ ओतनइ अनगिनत होइहीं जेतना कि समुद्दर क तट क रेतकण अहइँ।

⁹सइतान क सेना समूची धरती प फइल जाई अउर उ परमेस्सर क लोगन क छावनी अउर ओनकर प्यारी नगरी क घेर लेई। मुला आग जउन सरगे स उतरी अउर ओनका निगल जाई, ¹⁰एकरे पाछे सइतान क जउन ओनका धोखा देत रहा ह, भभकत गंधक क झील मँ फेंक दीन्ह जाई जहाँ उ जनावरन अउर झूठा नबी दुइनउँ डाला ग अहइँ। ओनका हमेसा हमेसा क बरे रात-दिन तड़पावा जाई।

दुनिया क मनइयन क निआव

¹¹फिन मइँ एक जबरदस्त सफेद सिंहासन कइँती ओह प विराजमान जे रहा, ओका देखेउँ। ओकरे सामने स धरती अउर आकास भाग खड़ा भएन। ओनका पता नाहीं चल पावा। ¹²फिन मइँ छोट अउर बड़ा मृतक मनइयन क देखेउँ। उ पचे सिंहासन क आगे खड़ा रहेन। कछू किताब खोली गइन। फिन एक अउर किताब खोली गई। उ रही जीवन क किताब अउर ओन किताबन मँ लिखी गई बातन क आधार प मृतकन क न्याय ओनके कामन क अनुसार कीन्ह गवा।

¹³जउन मृतक मनइयन समुद्दर मँ रहेन, ओनका समुद्दर दइ दिहेस, अउ मृत्युलोक अउ अधोलोक आपन आपन मृतक मनइयन क सौंप दिहेन। हर एक क निआव ओनके कर्मन क अनुसार कीन्ह गवा। ¹⁴एकरे बाद मउत क अउर अधोलोक क आग क झील मँ झोंक दीन्ह गवा। इ आग क झील दूसरी मउत बाटइ। ¹⁵जउन कउनो मनई क नाउँ जीवन क पोथी मँ न मिली तउ उहू क आग क झील मँ ढकेल दीन्ह गवा।

Awadhi Bible: Easy-to-Read Version (ERV-AWA)