M’Cheyne Bible Reading Plan
याजकन अउ लेवी बंसियन क मदद
18 “लेवी परिवार समूह क याजकन क इस्राएल मँ कउनो भुइँया क हींसा नाहीं पाइ। उ पचे आपन जीवन यापन उ भेंट क खाइके करिहीं जउन आगी पइ पाकी अउ यहोवा क चढ़ाई जाइ। उ ओकरे मीरास क हींसा अहइ। 2 उ सबइ याजक लोग भुइँया क कउनो हींसा दूसर परिवार समूहन क तरह नाहीं पइहीं। लेवी बंसियन क हींसा मँ खुद यहोवा अहइ। यहोवा ऍकरे बरे ओनका बचन दिहे अहइ।
3 “जब तू पचे कउनो बर्धा, या भेड़ी बलि बरे मारा तउ तू पचन्क इ सबइ हिंस्सन दइ देइ चाही: कांधा, दुइनउ गाल अउर पेट। 4 तू पचन्क याजकन क आपन पहली फसल क अनाज, नई दाखरस अउर आपन नई फसल क तेल देइ चाही। तू पचन्क याजकन क अपनी भेड़ी क पहिला काटा ऊन देइ चाही। 5 काहेकि यहोवा तोहार परमेस्सर तोहरे सबहिं परिवारे समूहन स ओनका सदा यहोवा बरे खड़ा होइ अउर सेवा करइ बरे चुनेस ह।
6 “लेवी बंसी जउन समूचइ इस्राएल मँ तोहरे सहरन मँ स कउनो मँ रहत ह, कउनो समइ मँ आपन घर तजि सकत ह अउर यहोवा क खास ठउर पइ जाइ सकत ह। 7 तब इ लेवी बंसी यहोवा आपन परमेस्सर क नाउँ पइ सेवा कइ सकत ह। ओका परमेस्सर क खास ठउर मँ वइसेन ही सेवा करइ चाही जइसे ओकर भाई दूसर लेवी बंसी करत हीं। 8 उ लेवी बंसी, आपन अधिकार क मिलइवाला हींसा क अलावा दूसर लेवी बंसियन क संग बराबर क हींसादार होइ।
इस्राएलियन क दूसर रास्ट्रन क नकल नाहीं करइ चाही
9 “जब तू पचे उ भुइँया मँ घुसब्या, जउन यहोवा तोहार पचन्क परमेस्सर तू पचन्क दइ देत अहइ, तब उ रास्ट्रे क लोग जउन खउफनाक काम हुआँ करत होइँ ओनका जिन सीखा। 10 आपन बेटवन अउ बिटियन क बलि आपन वेदी पइ आगी मँ जिन द्या। कउनो जोतिसी स बात कइके या कउनो जादूगर, डाइन या बाजीगर क लगे जाइके इ जिन सीखा कि भविस्स मँ का होइ? 11 कउनो भी मनई क जादू-टोना चलावइ क कोसिस न करइ द्या अउर तू पचन मँ स कउनो मनई ओझा या भूतसिद्धक नाहीं बनी। अउर कउनो मनई कउनो अइसे मनई स बात करइ क कोसिस न करी जउन मर चुका होइ। 12 यहोवा तोहार परमेस्सर ओन लोगन स घिना करत ह जउन अइसा करत हीं। इहइ कारण अहइ कि उ तोहरे समन्वा इ लोगन्क देस तजि देइ क मजबूर करी। 13 तोहे सबन्क यहोवा तोहार परमेस्सर पइ पूरा निस्ठावान जरूर होइ चाही।
यहोवा क खास नबी
14 “तू पचन्क उ रास्ट्रन क लोगन्क बल क जरिये आपन देस स हटाइ देइ चाहीं। उ रास्ट्रन क लोग जोतिसियन अउर जादूगरन क बात मानत हीं। मुला यहोवा तोहार परमेस्सर तू पचन्क वइसा नाहीं करइ देइ। 15 यहोवा तोहार परमेस्सर तोहारे लगे आपन नबी पठई। इ नबी तोहरे आपन लोगन मँ स आइ। उ मोरी नाई होइ। तू पचन्क इ नबी क बात मानइ चाही। 16 यहोवा तोहरे लगे इ नबी क पठइ काहेकि तू पचे अइसा करइ क बरे ओहसे कहया ह। उ समइ जब तू पचे होरेब पहाड़े क चारिहुँ कइँती बटुरा रह्या, तू पचे यहोवा क अवाज अउ पहाड़े पइ खउफनाक आगी क लखिके डेरान रह्या। एह बरे तू पचे कहे रह्या, ‘हम पचे यहोवा आपन परमेस्सर क अवाज फुनि न सुनी। हम लोग उ खउफनाक आगी क फुनि न लखी। हम मरि जाब।’
17 “यहोवा मोसे कहेस, ‘उ पचे जउन चाहत हीं, उ ठीक बाटइ। 18 मइँ तोहरी नाई क एक ठु नबी ओनके बरे पठइ देब। इ नबी ओन लोगन मँ स कउनो एक होइ। मइँ ओकर मुख मँ आपन बात डालब। उ लोगन स उहइ कही जउन मोर हुकुम मानी। 19 इ नबी मोरे नाउँ पइ बोली अउर जब उ कछू कही तब अगर कउनो मनई मोरे हुकुमन क सुनइ स इन्कार करी, तउ मइँ खुद उ मनई क जिम्मेदार होब।’
लबार नबियन क कइसे पहिचाना जाइ?
20 “मुला कउनो नबी कछू अइसा कहि सकत ह जेका करइ क बरे मइँ ओसे नाहीं कहेउँ ह अउर उ लोगन स कहि सकत ह कि उ मोरे जगह पइ बोलत अहइ। अगर अइसा होत ह तउ उ नबी क मारि डावइ चाही या कउनो अइसा नबी होइ सकत ह जउन दूसर देवतन क नाउँ पइ बोलत ह। उ नबी क भी मारि डावइ चाही। 21 तू पचे सोच सकत ह, ‘हम कइसे पहिचान सकित ह कि नबी क कहब, यहोवा क नाहीं अहइ?’ 22 अगर कउनो नबी कहत ह कि उ यहोवा कइँती स कछू कहत बाटइ, मुला ओकर कहब फुर साबित नाहीं होत, तउ तू पचन्क पहिचान लेइ चाही कि यहोवा वइसा नाहीं कहेस। तू पचे समुझ जाब्या कि इ नबी अभिमान पूर्वक बात करत रहा। तू पचन्क ओसे डेराइ क जरुरत नाहीं।
1 यहोवा क धन्यवाद करा, ओकरे नाउँ क पुकारा।
रास्ट्रन क ओकरे अदभुत कारजन क बारे मँ बतावा।
2 यहोवा बरे तू गावा, तू ओकर बड़कई क गीत गावा।
ओन सबहिं अचरज स भरी बातन कर वर्णन करा जेनका उ करत ह।
3 यहोवा क पवित्तर नाउँ पइ गर्व करा।
ओ सबहिं लोगो जउन यहोवा क उपासक अहा, तू पचे खुस होइ जा।
4 सामरथ पावइ क तू यहोवा क लगे जा।
सहारा पावइ क तू ओकरे लगे जा।
5 ओन अद्भुत बातन क सुमिरा जेनका यहोवा करत ह।
ओकरे अचरज कर्म अउर ओकर विवेक स भरा फइसला क याद राखा।
6 तू परमेस्सर क सेवक इब्राहीम क संतान अहा।
तू याकूब क संतान अहा, उ मनई जेका परमेस्सर चुने रहा।
7 यहोवा ही हमार परमेस्सर अहइ।
सारे संसार पइ यहोवा क सासन अहइ।
8 उ आपन करार क सदा याद रखत ह।
उ आपन आदेसन क हजार पीढ़ियन तलक याद रखत ह।
9 इब्राहीम क संग परमेस्सर करार बाँधे रहा।
परमेस्सर इसहाक क वचन दिहे रहा।
10 उ याकूब क आपन करार क कानून क रूप मँ दिहे रहा।
परमेस्सर इस्राएल क संग करार किहस।
इ सदा सदा ही बना रही।
11 परमेस्सर कहे रहा, “मइँ कनान क भुइँया क
तोहका आपन सम्पत्ति क रूप देब।”
12 जब इब्राहीम क परिवार छोटा रहा,
अउर उ पचे हुवाँ महज़ ही बिदेसी रहेन।
13 उ पचे एक रास्ट्र स दूसर रास्ट्र मँ,
एक राज्ज स दूसर राज्ज मँ घूमत रहेन।
14 मुला परमेस्सर उ घराने क दूसर लोगन स नस्कान नाहीं पहोंचइ दिहस।
परमेस्सर राजा लोगन क सावधान किहस कि उ पचे ओका हानि न पहोंचावइ।
15 उ ओनका चेताउनी दिहे रहेन, “मोर अभिसिक्त भवा क[a] तू नस्कान जिन पहोंचावा।
तू मोर कउनो नबियन क बुरा जिन करा।”
16 परमेस्सर उ देस मँ अकाल पठएस।
अउर लोगन क लगे खाइ क खूब भोजन नाहीं रहा।
17 मुला यहोवा एक मनई क ओनके लगे जेकर नाउँ यूसुफ रहा, ओनका अगवा मिस्र तलक पठएस।
यूसुफ क एक ठु दास क नाई बेचा ग रहा।
18 उ पचे यूसुफ क गोड़ मँ जंजीर डालेन, अउर उ ओका विनम्र बनाएस।
उ पचे ओकरी गटइ मँ एक लोहे क कड़ा डाइ दिहन।
19 यूसुफ क कैद मँ रखा गवा रहा जब तलक उ पचे बातन जउन उ कहे रहा फुरइ घटि नाहीं गइन।
यहोवा सुसन्देस स प्रमाणित कइ दिहस कि यूसुफ नीक रहा।
20 मिस्र क राजा, आग्या दिहन कि यूसुफ क बंधनन स अजाद कइ दीन्ह जाइ।
उ रास्ट्र क एक नेता ओका कैद स आजाद कइ दिहस।
21 यूसुफ क आपन घर बार क अधिकारी बनाइ दिहन।
यूसुफ राज्ज मँ हर बात क धियान रखइ लाग।
22 यूसुफ आपन राजकुमार क वइसा ही निर्देस देत रहा जइसा उ चाहेन।
यूसुफ राजा क सलाहकारन क सिच्छा दिहे रहा।
23 जब इस्राएल मिस्र गवा,
याकूब हाम क देस[b] मँ रहइ लाग।
24 याकूब क सन्तानन बहोत स होइ गएन।
उ पचे मिस्र क लोगन स जियादा बलवान बन गएन।
25 एह बरे मिस्री लोग याकूब क घराना स घिना करइ लागेन।
मिस्र क लोग आपन दासन क खिलाफ कुचक्र रचइ लागेन।
26 एह बरे यहोवा निज सेवक मूसा
अउर हारून जेका उ चुने रहा, पठएस।
27 उ हाम क भुइँया मँ अचरज
अउ अद्भुत करम किहेस।
28 परमेस्सर गहिरा अँधियारा पठए रहा,
मुला मिस्रियन ओकर नाहीं सुनेन।
29 तउ फुन परमेस्सर पानी क खून मँ बदल दिहस,
अउर ओनकर सबइ मछरियन मरि गइन।
30 बाद मँ, मिस्री लोगन क भुइँया मेघन स भरि गवा।
हिआँ तलक कि मेघन राजा क सयन कच्छ तलक भरि गएन।
31 यहोवा आदेस दिहा,
अउर माखियन अउ पिस्सू आएन
अउर उ सबइ हर कतहूँ फइल गएन।
32 परमेस्सर बर्खा क ओलन मँ बदलि दिहस।
मिस्रियन क देस मँ हर कतहूँ आगी अउ बिजुरी गिरइ लाग।
33 परमेस्सर मिस्रियन क अंगूरे क ब्गिया अउ अंजीर क बृच्छ बर्बाद कइ दिहस।
परमेस्सर ओनकर देस क हर बृच्छ क तहस नहस कइ दिहस।
34 परमेस्सर हुकुम दिहस अउर टिड्डी दल आइ गएन।
टिड्डी आइ गइन अउर ओनकर गनती अनगिनत रहीं।
35 टिड्डी दल अउ टिड्डीयन उ देस क सबहिं पैाधन चट कइ गएन।
उ सबइ धरती पइ जउन भी फसलन ठाड़ रहिन, सबहिं क खाइ डाएन।
36 फिन परमेस्सर मिस्रियन क पहिलउटी सन्तान क मार डाएस।
परमेस्सर ओनकर सब स बड़कन पूतन क मारेस।
37 बाद मँ परमेस्सर निज सेवकन क मिस्र स बाहेर निकारेस।
उ पचे आपन संग सोना अउ चाँदी लइ आएन।
परमेस्सर क कउनो भी सेवक नाहीं लड़खड़ान।
38 ओन लोगन क जात भए लखिके मिस्र आनन्द मँ रहा,
काहेकि उ पचे ओनसे डेराइ ग रहेन।
39 परमेस्सर ओनके ऊपर कमरी जइसा एक बादर फइलाएस।
उ राति मँ उजियारा देइ क बरे आगी क खम्भा क काम मँ लिआएस।
40 लोग खाइ क माँग किहन अउ परमेस्सर ओनके खातिर बटेरन क लइ आवा।
परमेस्सर अकास स ओनका भरपूर खइया क दिहस।
41 परमेस्सर चट्टान क फाड़ेस अउर जल उछरत भवा बाहेर फूटि पड़ा।
उ रेगिस्ताने क बीच एक ठु नदी बहइ लाग।
42 उ आपन पवित्तर वचन सुमिरेस
जउन उ आपन दास इब्राहीम क संग किहे रहा।
43 परमेस्सर आपन खास क मिस्र स बाहेर निकारि लिआवा।
लोग खुसी क गीत गावत भए अउर खुसियन मनावत भए बाहेर आइ गएन।
44 फिन परमेस्सर निज भगतन क उ देस दिहस जहाँ अउर लोग रहत रहेन।
परमेस्सर क भगतन उ सबइ चिजियन क पाइ लिहन जेनके बरे अउर लोग मेहनत किहे रहेन।
45 परमेस्सर अइसा एह बरे किहस ताकि लोग ओकर व्यवस्था मानइँ।
परमेस्सर अइसा एह बरे किहस ताकि उ पचे ओकरी सिच्छा पइ चलइँ।
यहोवा क गुण गावा।
परमेस्सर कुसू क इस्राएल क मुक्ति बरे चुनत ह
45 इ सबइ उ बातन अहइँ जेनका यहोवा आपन चुने भए राजा कुसू कहत ह,
“मइँ कुसू क दाहिन हाथ थामव।
मइँ राजा लोगन क सक्ति छोरइ मँ ओकर मदद करब।
नगर दुआर कुसू क रोक नाहीं पइहीं, मइँ नगर क दुआर खोल देब, अउर कुसू भीतर चला जाइ।
2 कुसू, तोहार फउजन अगवा बढ़िहीं अउर मइँ तोहरे अगवा चलब।
मइँ पर्वतन क समथर कइ देब।
मइँ काँसे क नगर-दुआर क तोड़ डाउब।
मइँ दुआरे पइ लगी लोहा क आँगल क काट डाउब।
3 मइँ अँधियारा कमरा मँ रखी भइ दौलत तोहका देब।
मइँ तोहका उ छिपा भवा धन देब।
मइँ अइसा करब ताकि तोहका पता चलि जाइ कि मइँ यहोवा इस्राएल क परमेस्सर हउँ,
अउर मइँ तोहका तोहार नाउँ स पुकारेस हउँ।
4 मइँ इ सबइ बातन आपन सेवक याकूब बरे करत हउँ।
मइँ इ सबइ बातन इस्राएल क आपन चुने भए लोगन बरे करत हउँ।
कुसू, यद्यपि तू मोका नाहीं जानत अहा, किन्तु मइँ तोहका तोहार नाउँ स पुकारे हउँ,
यहाँ तलक कि तोहार आपन नाउँ स पुकारे हउँ।
5 मइँ यहोवा हउँ, मइँ सिरिफ परमेस्सर हउँ।
मोरे सिवा दूसर कउनो परमेस्सर नाहीं अहइ।
मइँ तोहका मज़बूत बनाए हउँ,[a]
यद्यपि तू मोका नाहीं पहिचानत ह।
6 मइँ इ काम करत हउँ ताकि सब लोग जान जाइँ
कि मइँ ही परमेस्सर हउँ।
पूरब स पच्छिम तलक सबहिं लोग इ सबइ जानिहीं कि मइँ यहोवा हउँ
अउर मोरे सिवा दूसर कउनो परमेस्सर नाहीं।
7 मइँ प्रकास क बनाएउँ अउर मइँ ही अँधियारा क रचेउँ।
मइँ सान्ति क सृजेउँ अउर विपत्तियन भी मइँ ही बनाएउँ ह।
मइँ यहोवा हउँ, मइँ ही इ सबइ बातन करत हउँ।
8 “ऊपर अकासे मँ निआव अइसे बरसब
जइसे मेघ स बर्खा बरसत ह।
धरती खुल जात ह।
मुक्ति अइसा फलब फूलब जइसा कउनो पउधा धरती स उगत ह।
पुण्य कर्म आपन चारिहुँ कइँती बढ़ब!
मइँ यहोवा ही इ सबइ कइ क कारण हउँ।
परमेस्सर आपन सृस्टि क नियन्त्रण करत ह
9 “धिक्कार अहइ ऍन लोगन क, इ सबइ उहइ स बहस करत अहइँ जउन ऍतका बनाएस ह। इ सबइ कउनो टूटे भए घड़े क ठीकरन जइसे अहइँ। कोहार नरम गीली माटी स घड़ा बनावत ह पर माटी ओहसे नाहीं पूछत, ‘अरे, तू का करत अहा?’ वस्तुअन जउन बनाई गइ अहइँ, उ सबइ इ सक्ति नाहीं रखतिन कि आपन बनावइवाले स सवाल पूछइ। इ सबइ लोग भी माटी क टूटे घड़न क ठीकरन क जइसे अहइँ। 10 या, बच्चा आपन बाप स इ नाहीं पूछ सकतेन कि ‘तू हमका जिन्नगी काहे देत अहा?’ बच्चा आपन महतारी स इ सवाल नाहीं कइ सकत हीं कि ‘तू हमका काहे पइदा करति अहा?’”
11 यहोवा इस्राएल क परमेस्सर पवित्तर अहइ। उ इस्राएल क बनाएस। यहोवा कहत ह,
“का तू मोहसे मोरे बच्चन क बारे मँ पूछब्या अथवा
तू मोका आदेस देब्या ओनके ही बारे मँ जेका मइँ आपन हाथन स रचेउँ।
12 तउ लखा, मइँ धरती बनाएउँ
अउर उ पचे सबहिं लोग जउन एह पइ रहत हीं, मोर बनाए भए अहइँ।
मइँ खुद आपन हाथन स अकासन क रचना किहेउँ,
अउर मइँ अकास क सितारन क आदेस देत हउँ।
13 मइँ हउँ जउन वास्तव मँ ओका इ काम करइ बरे उकसाएस ह।
मइँ ओकर रास्ता क सहल बनाउबउँ।
मइँ आपन नगर क फुन स बनाब।
उ मोरे क लोगन बिना किसी रिस्वत दिए या बिना कउनो मोल चुकाए अजाद कइ देइ!”
सर्वसक्तीमान यहोवा इ सबइ बातन कहेस।
14 यहोवा कहत ह, “मिस्र अउ क्रुस बहोत वस्तुअन रचेस रहेन,
किन्तु हे इस्राएल, तू उ सबइ वस्तुअन पउब्या।
सेबा क लम्बे लोग तोहार होइहीं।
उ पचे आपन गर्दन क चारिहुँ कइँती जंजीर लिए भए तोहरे पाछे-पाछे चलिहीं।
उ सबइ लोग तोहरे समन्ना निहुरिहीं,
अउर उ पचे तोहसे बिनती करिहीं।
‘इस्राएल, परमेस्सर तोहरे संग अहइ,
अउर ओका तजिके कउनो दूसर परमेस्सर नाहीं अहइ।’”
15 हे परमेस्सर, तू उ परमेस्सर अहा जेका लोग लख नाहीं सकतेन।
तू ही इस्राएल क उद्धार कर्त्ता अहा।
16 बहोत स लोग मिथ्या देवता बनावा करत हीं।
किन्तु उ सबइ लोग तउ निरास ही होइहीं।
उ सबइ सबहिं लोग तउ लजाइ जइहीं।
17 किन्तु इस्राएल यहोवा क जरिये बचाइ लीन्ह जाइ।
उ मुक्ति जुगन तलक बनी रही।
फुन इस्राएल कबहुँ भी लज्जित नाहीं होइ।
18 यहोवा ही परमेस्सर अहइ।
उ अकास रचेस ह, अउर अहइ धरती बनाएस ह।
यहोवा ही धरती क अपने जगहिया पइ टेकाएस ह।
जब यहोवा धरती बनाएस उ इ सबइ नाहीं चाहेस कि धरती खाली रहइ।
उ एका रचेस ताकि एहमाँ जिन्नगी रहइ।
मइँ यहोवा हउँ।
मोरे अलावा कउनो दूसर परमेस्सर नाहीं अहइ।
19 मइँ अकेल्ले इ सबइ बातन नाहीं किहेउँ, मइँ अजाद भाव स कहेउँ ह।
संसार क कउनो भी अँधियारा मँ मइँ आपन बचन नाहीं छुपावत।
मइँ याकूब क लोगन स नाहीं कहेउँ कि
उ पचे मोका बीरान जगहन पइ हेरइँ।
मइँ परमेस्सर हउँ अउर मइँ फुरइ बोहात हउँ।
मइँ उहइ बातन कहत हउँ जउन फुरइ अहइँ।
यहोवा सिद्ध करत ह कि उ ही परमेस्सर अहइ
20 “तू लोग दूसरी जातियन स बच पराया। तउ आपुस मँ बटुर जा अउर मोरे समन्वा आवा। (इ सबइ लोग अपने संग मिथ्या देवन क मूरतियन रखत हीं अउर एन बेकार क देवतन स पराथना करत हीं। किन्तु इ सबइ लोग इ नाहीं जानतेन कि उ पचे का करत अहइँ? 21 एन लोगन क मोरे लगे आवइ क कहा। एन लोगन क आपन तर्क पेस करइ द्या।)
“उ पचे बातन बहुत दिनन पहिले घटी रहिन, ओनके बारे मँ तू पचन्क कउन बोलाएस? बहोत-बहोत दिनन पहिले ही एन बातन क लगातार कउन बतावत रहा? उ मइँ यहोवा ही हउँ जउन इ सबइ बातन बताए रहा। मइँ ही एकमात्र यहोवा हउँ। मोरे अलावा कउनो अउर परमेस्सर नाही अहइ? का अइसा कउनो अउर अहइ जउन आपन लोगन क रच्छा करत ह नाहीं, अइसा कउनो दूसर परमेस्सर नाहीं अहइ। 22 हे हर कतहुँ क लोगो, तू पचन्क एन लबार देवतन क पाछे चलब छोड़ देइ चाही। तू पचन्क मोर अनुसरन करइ चाही अउर होइ जाइ चाही। मइँ परमेस्सर हउँ। मोहसे दूसर कउनो दूसर परमेस्सर नाहीं अहइ। परमेस्सर केवल मइँ ही हउँ।
23 “मइँ खुद आपन सक्ति क साच्छी कइके प्रतिग्या किहेउँ ह। इ एक उत्तिम बचन अहइ। इ एक आदेस अहइ जउन पूरा होइ ही। हर मनई मोर (परमेस्सर क) आगे निहुरी अउर हर मनई मोर अनुसरण करइ क बचन देइ। 24 यहोवा आपन आप स सपथ लेइ के मोसे वाचा किहेस, ‘अच्छाई अउर मज़बूती तोहमाँ आउब्या।’”
उ सबइ जउन ओहे (कुस्रू) पइ कोहाइ उ अपमानित होइ। 25 यहोवा अच्छे करम करइ बरे इस्राएल क लोगन क बिजयी बनाई अउर लोग ओकर तारीफ करिहीं।
आखिरी विनास क सरगदूतन
15 आकास मँ फिन मइँ एक अउर महान अचरज भरी निसानी देखेउँ। मइँ देखेउँ कि सात सरगदूतन अहइँ जउन सात आखिरी महाविनास लिहे भए अहइँ। इ सबइ आखिरी विनास अहीं, काहे बरे कि एकरे साथेन परमेस्सर क गुस्सा खतम होई जाई।
2 फिन मोका आग स मिला काँच क समुद्दर जइसा देखाइ पड़ा। अउर मइँ देखे कि उ पचे उ जनावर क मूरत प अउर ओनके नाउँ स जुड़ी संख्या प जीत हालिस कइ लिहे अहइँ, ओनहूँ काँच क समुद्दर प खड़ा अहइँ। उ पचे परमेस्सर क दीन्ह गइ वीणा लिहे रहेन। 3 उ पचे परमेस्सर क सेवकन मूसा अउर मेमना क इ गाना गावत रहेन:
“जउन काम तू करत रहत ह्या उ सबइ महान अहइँ।
तोहार काम करइ क ताकत अचरजभरी
अउर अनन्त अहइ हे सर्वसक्तिमान पर्भू परमेस्सर तोहार मार्ग धर्म संगत अउर सच्चे अहइँ।
तू सब जातिन क राजा अह्या,
4 हे प्रर्भू, तोहसे मनई हमेसा ड़ेरात रहिहइँ
तोहार नाउँ लइके, मनई स्तुति करिहइँ
काहे बरे कि तू अकेले पवित्तर अहा।
तोहरे समन्वा सब रास्ट्रन अहइँ अउर तोहार आराधना करिहइँ।
काहे बरे कि इ बात अउर पता चलि ग अहइ तू जउन करत ह्या उहइ, निआव अहइ।”
5 एकरे बाद मइँ देखेउँ कि सरग क मन्दिर मतलब करार क तम्बू क खोला गवा 6 अउर उ पचे सातउँ सरगदूतन जेनके लगे आखिरी साथ महामारी रहिन, मन्दिर स बाहर आएन। उ पचे चमकीले साफ मलमल क कपड़ा पहिने रहेन। अपने सीना प सोनेक पटका बाँधे रहेन। 7 फिन उ चार प्रनियन मँ स एक उ सताउँ सरगदूतन क सोना क कटोरा दिहेस जउन हमेसा हमेसा क बरे अमर परमेस्सर क गुस्सा स भरा रहेन। 8 उ मन्दिर परमेस्सर क महिमा अउर ओकरे सक्ति क धुँअन स भरा रहा जइसे कि जब तलक ओन सात सरगदूतन क सात माहमारी पूरा न होइ जाइँ, तब तलक मन्दिर मँ कउनउँ धुसइ न पावइ।
Awadhi Bible: Easy-to-Read Version. Copyright © 2005 Bible League International.