Revised Common Lectionary (Semicontinuous)

⁶ परमेश्वरा, ती दुष्ट माणसे सिंहासारखी आहेत.
    म्हणून परमेश्वरा तू त्यांचे दात पाड.
⁷ ते लोक वाहून जाणाऱ्या पाण्याप्रमाणे नाहीसे होवोत.
    ते रस्त्यातल्या गवताप्रमाणे तुडवले जावोत.
⁸ चालताना विरघळून जाणाऱ्या गोगलगायी प्रमाणे ते विरघळून जावोत.
    जन्मत: मेलेल्या व दिवसाचा प्रकाश न पाहिलेल्या बाळा प्रमाणे त्यांचे होवो.
⁹ भांडे तापविण्यासाठी काट्या पेटवितात.
    तेव्हा त्यात चटकन् जळणाऱ्या काट्यांप्रमाणे त्यांचे होवो.

¹⁰ वाईट लोकांनी केलेल्या दुष्कृत्यांबद्दल जर त्यांना शिक्षा झाली
    तर चांगल्या माणसाला आनंद होईल,
तो त्या दुष्टांच्या रक्तात आपले पाय धुवेल.
¹¹ असे जेव्हा घडेल तेव्हा लोक म्हणतील “चांगल्या माणसांना त्यांचे फळ मिळाले,
    जगाला न्याय देण्यासाठी देव खरोखर आहे.”

²⁶ “चोराला लोकांनी पकडताच
    तो शरमिंदा होतो.
त्याचप्रमाणे इस्राएलचे लोक झाले आहेत.
    राजे आणि नेते, याजक आणि संदेष्टे लज्जित झाले आहेत.
²⁷ ते लाकडाच्या तुकड्याशी बोलतात त्याला
    ‘माझे वडील’ म्हणतात.
ते खडकाशी बोलतात. ते म्हणतात,
    ‘तू मला जन्म दिलास.’
त्या सर्व लोकांना शरमेने मान खाली घालायला लागतील.
ते लोक माझ्याकडे पाहत नाहीत.
    त्यांनी माझ्याकडे पाठ फिरविली आहे.
पण जेव्हा यहूदातील लोक संकटात सापडतात, तेव्हा ते मला म्हणतात,
    ‘ये आणि आम्हाला वाचव.’
²⁸ त्या मूर्तींना येऊ देत आणि तुम्हाला वाचवू देत.
तुम्ही स्वतः घडविलेल्या त्या मूर्ती कोठे आहेत?
    तुम्ही संकटात असताना त्या मूर्ती येऊन तुम्हाला सोडवितात का ते पाहू या.
यहूदा, तुला तुझ्या शहरांइतक्या मूर्ती आहेत!

²⁹ “तुम्ही माझ्याशी वाद का घालता?
    तुम्ही सर्व माझ्याविरुद्ध गेलात.”
हा परमेश्वराकडून आलेला संदेश होता.
³⁰ “यहूदातील लोकांनो, मी तुम्हाला शिक्षा केली,
    पण त्याचा काही फायदा झाला नाही.
तुम्हाला शिक्षा झाल्यावरही तुम्ही परत आला नाहीत
    तुमच्याकडे आलेल्या संदेष्ट्यांना तुम्ही तलवारीने मारले.
तुम्ही धोकादायक सिंहासारखे होता.
तुम्ही संदेष्ट्यांना ठार मारले.”
³¹ ह्या पिढीतील लोकांनो, परमेश्वराच्या संदेशाकडे लक्ष द्या.

“इस्राएलच्या लोकांना मी वाळवंटासारखा आहे का?
    मी काळोखी आणि धोकादायक प्रदेशासारखा त्यांना वाटतो का?
माझे लोक म्हणतात, ‘आमच्या मार्गाने जायला आम्ही स्वतंत्र आहोत.
    परमेश्वरा आम्ही तुझ्याकडे परत येणार नाही.’
ते असे का म्हणतात.?
³² तरुण स्त्री आपले दागिने विसरत नाही.
    वधू आपला कमरपट्टा विसरत नाही.
पण माझे लोक मला असंख्य वेळा विसरले आहेत.

³³ “यहूदा, प्रियकरांचा (खोट्या देवांचा) पाठलाग कसा करायचा हे तुला बरोबर माहीत आहे.
    दुष्कृत्ये करायला खरोखरच तू शिकली आहेस.
³⁴ तुझ्या हातांना रक्त लागले आहे.
    ते रक्त गरीब व निष्पाप माणसांचे आहे.
तुझे घर फोडताना तू त्यांना पकडले नाहीस.
    तू कारण नसताना त्यांना ठार मारलेस.
³⁵ पण तरी तू म्हणतेस, ‘मी निरपराध आहे.
    परमेश्वर माझ्यावर रागावलेला नाही.’
मी तुला खोटे बोलल्याबद्दलही दोषी ठरवीन.
    का? कारण तू म्हणतेस, ‘मी काहीही चूक केलेली नाही.’
³⁶ मन बदलणे तुला अगदी सोपे आहे.
    अश्शूरने तुझी निराशा केली, म्हणून तू अश्शूरला सोडले
आणि मदतीसाठी तू मिसरला गेलीस.
    पण मिसरसुध्दा् तुझी निराशा करील.
³⁷ मग अखेरीला तुला मिसरलाही सोडावे लागेल
    आणि लाजेने तोंड लपवावे लागेल.
तू त्या देशांवर विश्वास ठेवलास.
    पण परमेश्वराने त्या देशांना नाकारले.
    म्हणून जिंकण्यासाठी ते तुला मदत करु शकत नाहीत.