Revised Common Lectionary (Semicontinuous)

94 परमेश्वरा, तू लोकांना शासन करणारा देव आहेस.
    असा तू देव आहेस जो येतो आणि लोकांसाठी शासन आणतो.
² तू संपूर्ण पृथ्वीचा न्यायाधीश आहेस.
    गर्विष्ठ दुष्ट माणसांना योग्य अशी शिक्षा दे.
³ परमेश्वरा, दुष्ट लोक किती काळ मजा करीत राहाणार आहेत?
    परमेश्वरा किती काळ?
⁴ आणखी किती काळ हे गुन्हेगार त्यांनी केलेल्या
    गुन्ह्यांबद्दल गौरवोद्गार काढणार आहेत?
⁵ परमेश्वरा, ते तुझ्या माणसांना त्रास देतात.
    त्यांनी तुझ्या माणसांना यातना भोगायला लावल्या.
⁶ ते दुष्ट लोक विधवांना आणि आपल्या देशात आलेल्या परकीयांना ठार मारतात.
    ते अनाथ मुलांचा खून करतात.
⁷ आणि ते म्हणतात की या वाईट गोष्टी करताना परमेश्वर त्यांना बघत नाही.
    ते म्हणतात की जे काही घडते आहे ते इस्राएलाच्या देवाला माहीत नाही.

⁸ तुम्ही दुष्ट लोक, मूर्ख आहात.
    तुम्ही तुमचा धडा कधी शिकणार?
तुम्ही वाईट लोक किती मूर्ख आहात!
    तुम्ही समजण्याचा प्रयत्न केलाच पाहिजे.
⁹ देवानेच आपले कान केलेत
    तेव्हा त्यालाही कान असलेच पाहिजेत
आणि जे काही घडते ते तो ऐकू शकतो.
    देवानेच आपले डोळे केलेत.
तेव्हा त्यालाही डोळे असलेच पाहिजेत
    आणि जे काही घडते ते तो पाहू शकतो.
¹⁰ देव त्या लोकांना शिस्त लावेल.
    देव लोकांना काय करायचे ते शिकवेल.
¹¹ लोक काय विचार करतात ते देवाला माहीत असते.
    लोक म्हणजे वाऱ्याचा झोत आहे हे देवाला माहीत आहे.

¹² परमेश्वर ज्या माणसाला शिस्त लावेल तो सुखी होईल.
    देव त्या माणसाला जगण्याचा योग्यमार्ग शिकवेल.
¹³ देवा, तू त्या माणसाला संकटात शांत राहाण्यास शिकवशील.
    तू त्या माणसाला वाईट लोक थडग्यात जाईपर्यंत शांत राहाण्यास मदत करशील.
¹⁴ परमेश्वर त्याच्या माणसांना सोडून जाणार नाही.
    तो त्याच्या माणसांना मदत केल्याशिवाय सोडून जाणार नाही.
¹⁵ न्याय प्रस्थापित होईल आणि तो न्यायीपणा आणेल आणि
    नंतर प्रामाणिक आणि चांगले लोक तेथे येतील.

¹⁶ वाईट लोकांशी लढायला मला कोणीही मदत केली नाही.
    वाईट कृत्य करणाऱ्या लोकांशी लढण्यासाठी माझ्या बरोबरीने कोणीही उभे राहिले नाही.
¹⁷ आणि जर परमेश्वराने मला मदत केली
    नसतीतर मी मेलो असतो.
¹⁸ मी पडायला आलेलो आहे हे मला माहीत आहे,
    पण परमेश्वराने त्याच्या भक्तांना आधार दिला.
¹⁹ मी खूप चिंताग्रस्त आणि उदास होतो.
    परंतु परमेश्वरा, तू माझे सांत्वन केलेस.

²⁰ देवा, तू दुष्ट न्यायाधीशांना मदत करीत नाहीस.
    ते वाईट न्यायाधीश कायद्याचा दुरुपयोग करुन लोकांचे आयुष्य कठीण करतात.
²¹ ते न्यायाधीश चांगल्या माणसांवर हल्ला करतात.
    ते निरपराधी लोक अपराधी आहेत असे म्हणतात आणि त्यांना ठार मारतात.
²² परंतु परमेश्वर माझी उंच पर्वतावरची सुरक्षित जागा आहे.
    देव माझा खडक माझी सुरक्षित जागा आहे.
²³ देव त्या दुष्ट न्यायाधीशांना त्यांनी केलेल्या वाईटकृत्याबद्दल शिक्षा करेल.
    त्यांनी पाप केले म्हणून देव त्यांचा नाश करेल.
    परमेश्वर आपला देव त्या दुष्ट न्यायाधीशांचा सर्वनाश करेल.

³ हे परमेश्वरा, मला माहीत आहे की तुझ्या लोकांनी तुझ्याशी
    एकनिष्ठपणे वागायला हवे आहे.
तू यहूदातील लोकांना चोपलेस
    पण त्यांना काही वेदना झाल्या नाहीत.
तू त्यांचा नाश केलास,
    पण त्यांनी धडा शिकण्यास नकार दिला.
ते फार दुराग्रही झालेत.
    त्यांनी केलेल्या वाईट कृत्यांबद्दल त्यांना खेद वाटला नाही.

⁴ पण मी (यिर्मया) मनाशी म्हणालो,
“गरीब लोकच एवढे मूर्ख असले पाहिजेत.
    परमेश्वराच्या चालीरिती ते शिकलेले नाहीत.
    त्यांना, त्यांच्या देवाची शिकवण माहीत नाही.
⁵ म्हणून मी यहुदाच्या नेत्यांकडे जाऊन त्यांच्याशी बोलेन.
    नेत्यांना परमेश्वराच्या चालीरिती नक्कीच माहीत असतात.
त्यांना त्यांच्या देवाचे नियम माहीत असतात.
    ह्याची मला खात्री आहे!”
पण परमेश्वराच्या सेवेतून मुक्त होण्यासाठी
    सर्व नेते एकत्र जमले होते.
⁶ ते देवाच्या विरुद्ध् गेले म्हणून जंगलातील सिंह त्यांच्यावर हल्ला करील.
    जंगलातील लांडगा त्यांना ठार मारील.
चित्ता त्यांच्या शहराजवळ लपला आहे.
    शहरातून बाहेर येणाऱ्या प्रत्येकाचे तो तुकडे तुकडे करील.
यहूदातील लोकांनी पुन्हा पापे केल्याने हे घडून येईल.
    ते, अनेक वेळा, देवापासून दूर भटकत गेले आहेत.

⁷ देव म्हणाला, “यहूदा, मी तुला क्षमा करावी म्हणून तू मला एक तरी सबळ कारण सांग.
    तुझ्या मुलांनी माझा त्याग केला.
    त्यांनी मूर्तींपुढे शपथा वाहिल्या.
    पण त्या मूर्ती म्हणजे खरे देव नव्हेत.
तुझ्या मुलांना पाहिजे ते सर्व मी दिले.
    पण तरी त्यांनी माझा विश्वासघात केला.
    त्यांनी आपला बराच वेळ वारांगनेबरोबर घालविला.
⁸ ते लोक, भरपूर खाद्य खाणाऱ्या व समागमाला तयार असणाऱ्या घोड्यांप्रमाणे आहेत.
    शेजाऱ्याच्या बायकोला वासनेने हाका मारणाऱ्या घोड्यांप्रमाणे ते आहेत.
⁹ ह्या कर्मांबद्दल मी यहूदातील लोकांना शिक्षा करावी का?”
हा परमेश्वराकडून आलेला संदेश आहे.
“हो! अशा रीतीने जीवन जगणाऱ्या राष्ट्राला मी शिक्षा करीनच, हे तू जाणतेस.
    त्यांच्या लायकीप्रमाणे मी त्यांना शिक्षा करीन.

¹⁰ “यहूदाच्या द्राक्षवेलींच्या रांगातून जा.
    वेली तोडून टाका (पण त्यांचा संपूर्ण नाश करु नका)
    त्यांच्या फांद्या तोडा.
    का? ह्या फांद्या परमेश्वराच्या मालकीच्या नाहीत.
¹¹ यहूदा व इस्राएल येथील घराणी, प्रत्येक बाबतीत,
    माझा विश्वासघात करीत आली आहेत.”
हा परमेश्वराचा संदेश आहे.

¹² “हे लोक परमेश्वराबद्दल खोटे बोलले.
ते म्हणाले आहेत, ‘परमेश्वर आम्हाला काही करणार नाही.
    आमचे काही वाईट होणार नाही.
    आमच्यावर हल्ला झालेला आम्ही कधी पाहणार नाही.
    आम्ही कधी उपाशी राहणार नाही.’
¹³ खोटे संदेष्टे पोकळ वाऱ्या प्रमाणे आहेत.
    देवाचे शब्द त्यांच्याजवळ नाहीत ^[a] त्यांचे वाईट होईल.”

¹⁴ सर्वशक्तिमान परमेश्वराने पुढील गोष्टी सांगितल्या.
“मी त्यांना शिक्षा करणार नाही असे ते लोक म्हणाले म्हणून,
यिर्मया, मी जे शब्द तुला देतो, ते आगीप्रमाणे असतील,
    ते लोक लाकडाप्रमाणे असतील,
ती आग त्यांना पूर्णपणे जाळून टाकील.”
¹⁵ इस्राएलच्या वारसांनो हा परमेश्वराचा संदेश आहे.
“दूरवरच्या राष्ट्राला मी, तुमच्यावर हल्ला करण्यासाठी लवकरच आणीन.
ते शक्तिशाली राष्ट्र आहे.
    ते प्राचीन राष्ट्र आहे.
त्या राष्ट्रांतील लोक तुम्हाला माहीत नसणारी भाषा बोलतात.
    ते काय बोलतात ते तुम्ही समजू शकणार नाही.
¹⁶ त्यांचे भाते उघड्या थडग्यांप्रमाणे आहेत.
    त्यांची सर्व माणसे शक्तिशाली सैनिक आहेत.
¹⁷ तुम्ही गोळा केलेले सर्व धान्य ते खातील.
    ते तुमचे सर्व अन्न खाऊन टाकतील.
ते तुमच्या मुलामुलींना खाऊन टाकतील (त्यांचा नाश करतील) ते तुमची गुरे, शेळ्या, मेंढ्या खातील.
    ते तुमची द्राक्षे आणि अंजिरे फस्त करतील.
त्यांच्या तलवारीच्या जोरावर ते तुमच्या मजबूत शहरांचा नाश करतील.
    तुम्ही ज्या शहरांवर विसंबता ती भक्कम शहरे ते नष्ट करतील.”