Revised Common Lectionary (Semicontinuous)

⁸ Ìwọ mú àjàrà jáde láti Ejibiti;
    ìwọ lé àwọn kèfèrí jáde, o sì gbìn ín.
⁹ Ìwọ ṣí ààyè sílẹ̀ fún un,
    ìwọ sì mu ta gbòǹgbò jinlẹ̀
ó sì kún ilẹ̀ náà.
¹⁰ A bò àwọn òkè mọ́lẹ̀ òkè pẹ̀lú òjìji rẹ̀,
    ẹ̀ka rẹ̀ dàbí kedari Ọlọ́run.
¹¹ O yọ ẹ̀ka rẹ̀ sínú Òkun,
    ọwọ́ rẹ̀ sí odò ńlá nì.

¹² Èéṣe tí ìwọ fi wó odi rẹ̀
    tí àwọn ènìyàn tí ó ń kọjá fi ń ṣa èso rẹ̀?
¹³ Ìmàdò láti inú igbó ń bá a jẹ́
    àti ẹranko igbó ń jẹ ẹ́ run.
¹⁴ Yípadà sí wa, àwa ń bẹ̀ ọ́, Ọlọ́run alágbára!
    Bojú wolẹ̀ láti ọ̀run kí o sì wò ó!
Kí o sì bẹ àjàrà yìí wò,
¹⁵ Gbòǹgbò èyí tí ọwọ́ ọ̀tún rẹ ti gbìn,
    àti ẹ̀ka tí ìwọ ti mú lágbára fún ara rẹ.

¹⁶ A gé àjàrà rẹ lulẹ̀, a ti fi iná sun ún;
    ní ìfibú, àwọn ènìyàn rẹ̀ ń ṣègbé.
¹⁷ Jẹ́ kí ọwọ́ rẹ kí ó wà lára ọkùnrin tí ó wà ní ọwọ́ ọ̀tún rẹ,
    ọmọ ènìyàn tí ìwọ tí gbé kalẹ̀ fún ara rẹ.
¹⁸ Nígbà náà àwa kí yóò yípadà kúrò lọ́dọ̀ rẹ;
    mú wa yè, àwa o sì máa pe orúkọ rẹ.

¹⁹ Tún wa yípadà, Olúwa Ọlọ́run alágbára;
    kí ojú rẹ̀ kí ó tan ìmọ́lẹ̀ sí wa,
    kí á ba à lè gbà wá là.

⁴ “Èmi ó sọ àwọn ọ̀dọ́mọkùnrin di aláṣẹ wọn,
    ọ̀dọ́mọdé lásán làsàn ni yóò sì
    máa jẹ ọba lórí i wọn.”

⁵ Àwọn ènìyàn yóò sì máa pọ́n
    ọmọnìkejì wọn lójú
ẹnìkan sí ẹnìkejì rẹ̀, aládùúgbò
    sí aládùúgbò rẹ̀.
Àwọn ọ̀dọ́ yóò gbógun ti àwọn àgbàgbà,
    àwọn mẹ̀kúnnù yóò dìde sí ọlọ́lá.

⁶ Ọkùnrin kan yóò di ọ̀kan nínú àwọn
    arákùnrin rẹ̀ mú,
nínú ilé baba rẹ̀, yóò sì wí pé,
    “Ìwọ́ ní aṣọ, ìwọ máa ṣe olórí wa,
    sì mójútó àwọn ahoro wọ̀nyí!”
⁷ Ṣùgbọ́n ní ọjọ́ náà ni yóò figbe bọnu pé,
    “Èmi kò ní àtúnṣe kan.
Èmi kò ní oúnjẹ, bẹ́ẹ̀ ni n ó ní aṣọ nílé,
    ẹ má fi mí ṣe olórí àwọn ènìyàn náà.”

⁸ Jerusalẹmu ń ta gbọ̀nọ́ngbọ̀nọ́n
    Juda ń ṣubú lọ,
ọ̀rọ̀ àti ìṣe wọn lòdì sí Olúwa,
    láti mú ojú ògo rẹ̀ bínú.
⁹ Ìwò ojú wọn ń jẹ́rìí lòdì sí wọn,
    wọ́n ń polongo ẹ̀ṣẹ̀ wọn bí i Sodomu;
wọn ò fi pamọ́!
    Ègbé ni fún wọn!
    Wọ́n ti mú ìparun wá sórí ara wọn.

¹⁰ Ẹ sọ fún olódodo pé yóò dára fún wọn,
    nítorí ní àjẹgbádùn ni wọn yóò jẹ èso iṣẹ́ ẹ wọn.
¹¹ Ègbé ni fún ènìyàn búburú! Ìparun wà lórí i wọn
    A ó sì san èrè iṣẹ́ tí ọwọ́ wọn ti ṣe fún wọn.

¹² Àwọn ọ̀dọ́mọdé ni o ń pọ́n àwọn ènìyàn mi lójú
    àwọn obìnrin ń jẹ ọba lé wọn lórí.
Háà! Ènìyàn mi àwọn afinimọ̀nà yín ti ṣì yín lọ́nà,
    wọn sì mú yín kúrò ní ipa ọ̀nà yín.

¹³ Olúwa bọ sí ipò rẹ̀ ní ìtẹ́ ìdájọ́
    Ó dìde láti dá àwọn ènìyàn lẹ́jọ́.
¹⁴ Olúwa dojú ẹjọ́ kọ
    àwọn àgbàgbà àti àwọn olórí àwọn ènìyàn rẹ̀.
“Ẹ̀yin ni ẹ ti run ọgbà àjàrà mi,
    ogún àwọn tálákà ń bẹ̀ nínú ilé yín.
¹⁵ Kín ni èrò yín láti máa run àwọn ènìyàn mi túútúú
    tí ẹ sì fojú àwọn tálákà ni gbolẹ̀?”
    ni Olúwa wí, Olúwa àwọn ọmọ-ogun.

¹⁶ Olúwa wí pé,
    “Àwọn obìnrin Sioni jẹ́ agbéraga,
wọn ń rìn lọ pẹ̀lú ọrùn tí ó nà tàntàn,
    tí wọn ń fojú pe ọkùnrin,
tí wọn ń sọ̀dí bí wọ́n ti ń yan lọ
    pẹ̀lú ohun ọ̀ṣọ́ tí ń mì wọnjanwọnjan lọ́rùn ẹsẹ̀ wọn.
¹⁷ Nítorí náà Olúwa yóò mú egbò wá sórí àwọn obìnrin Sioni,
    Olúwa yóò sì pá wọn ní agbárí.”