Chronological

यहोवा हेरे रहा किन्तु कउनो भी,
    कहीं भी अच्छाई न मिल पाई।
¹⁶ यहोवा हेर लखेस किन्तु ओका कउनो मनई नाहीं मिला जउन लोगन क संग खड़ा होइ
    अउर ओनका सहारा देइ।
एह बरे खुद आपन सक्ति क अउर खुद आपन नेकी क प्रयोग किहस
    अउर यहोवा लोगन क बचाइ लिहस।
¹⁷ यहोवा नेकी क कवच,
    उद्धार क सिरस्त्रण (टोप),
दण्ड क वस्त्र,
    अउर आपन मज़बूत पिरेम क चोगा पहिरेस।
¹⁸ यहोवा आपन दुस्मन पइ कोहान अहइ तउ यहोवा ओनका अइसा दण्ड देइ जइसा ओनका मिलइ चाही।
    यहोवा आपन दुस्मनन स कोहान अहइ
तउ यहोवा सबहिं दूर-दूर क देसन क लोगन क सजा देइ।
    यहोवा ओनका वइसा दण्ड देइ जइसा ओनका मिलइ चाही।
¹⁹ फुन पच्छिम क लोग यहोवा क नाम क आदर देइहीं
    अउर पूरब क लोग यहोवा क महिमा स भय विम्हित होइ जइहीं।
यहोवा अइसे ही हाली आइ जाइ जइसे तेज नदी बहत भइ आइ जात ह।
    इ उ तेज हवा क रप्तार सा होइ जेका यहोवा उ नदी क तूफान बहावइ बरे पठवत ह।
²⁰ तब सिय्योन पर्वत पइ एक छुड़ावइवाला आइ।
    उ याकूब क ओन लोगन क लगे आइ जउन पाप तउ किहे
रहेन, किन्तु जउन परमेस्सर कइँती लउटि आए रहेन।
    यहोवा इ सबइ बातन क कहेस।

⁵ “अइसा भविस्स मँ होइ अउर अइसे समय मँ जब तू आपन लोगन क लखब्या
    तब तोहार मुँह खुसी स चमक उठिहीं।
पहिले तू उत्तेजित होब्या किन्तु फुन आनन्दित होब्या।
    समुद्र पार देसन क सारी
धन दौलत तोहरे समन्वा धरी होई।
    तोहरे लगे देसन क सम्पत्तियन अइहीं।
⁶ मिद्यान अउर एपा देसन क ऊँटत क झुण्ड तोहार धरती क ढाँपि लेइहीं।
    सिबा क देस स ऊँटन क लम्बी कतारन तोहरे हिआँ अइहीं।
उ पचे सोना अउर सुगन्ध लइहीं।
    लोग यहोवा क खुसी क गीत गइहीं।
⁷ केदार क भेड़िन एकट्ठी कीन्ह जइहीं
    अउर तोहका दइ दीन्ह जइहीं।
नबायोत क मेढ़न तोहरे बरे लिआवा जइही।
    उ पचे मोर वेदी पइ स्वीकार करइ क लायक बलियन बनिहीं
अउर मइँ आपन अद्भुत मन्दिर
    अउर जियादा सुन्नर बनाउबउँ।
⁸ एन लोगन क लखा!
    इ सबइ तोहरे लगे जल्दी मँ आवत अहइँ जइसे मेघ अकास क जल्दी पार करत हीं।
    इ सबइ अइसे देखात अहइँ जइसे आपन घोंसलन कइँती उड़त भए कपोत होइँ।
⁹ सुदूर देस मोरी प्रतीच्छा मँ अहउँ।
    तर्सीस क बड़के बड़के जलयान जाइ क तत्पर अहइँ।
इ सबइ जलयान तोहरे संतानन क दूर-दूर देसन स लिआवइ क तत्पर अहइँ।
    अउर एन जहाजन पइ ओनकर सुवर्ण ओनके संग आई अउर ओनकर चाँदी भी इ सबइ जहाज लिअइहीं।
अइसा एह बरे होइ कि तोहार परमेस्सर यहोवा क आदर होइ।
    अइसा एह बरे होइ कि इस्राएल क पवित्तर अद्भुत काम करत ह।
¹⁰ दूसर देसन क संतानन तोहार ढ़ेवारन फुन उठइहीं
    अउर ओनकर सासक तोहार सेवा करिहीं।

“जब मइँ तोहसे कोहान रहेउँ, मइँ तोहका दुःख दिहेउँ
    किन्तु अब मोर इच्छा अहइ कि तोह पइ कृपालु बनउँ।
    एह बरे मइँ तोहका चैन देबउँ।
¹¹ तोहार दुआर हमेसा ही खुला रहिहीं।
    उ सबइ दिन अथवा राति मँ कबहुँ बन्द नाहीं होइहीं।
    देस अउर राजा तोहरे पास धन लिअइहीं।
¹² कछू जाति अउर कछू राज्ज तोहार सेवा नाहीं करिहीं
    किन्तु उ सबइ जातियन अउर राज्ज नस्ट होइ जइहीं।
¹³ लबानोन क सबहिं महा वस्तुअन तोहका अर्पित कीन्ह जइहीं।
    लोग तोहरे लगे देवदार,
तालीसपत्र अउर सरन क बृच्छ लिअइहीं।
    इ ठउर मोरे सिंहासन क समन्वा एक चौकी सा होइ
    अउर मइँ एका बहोत मान देबउँ।
¹⁴ उ सबइ ही लोग जउन पहिले तोहका दुःख दिया करत रहेन,
    तोहरे समन्वा निहुरिहीं।
उ सबइ ही लोग जउन तोहसे घिना करत रहेन,
    तोहरे चरणन मँ निहुर जइहीं।
उ सबइ ही लोग तोहका कहिहीं,
    ‘यहोवा क नगर,’ ‘सिय्योन नगर इस्राएल क पवित्तर क बाटइ।’ नवा इस्राएल सान्ति क देस

¹⁵ “फुन तोहका अकेल्ला नाहीं छोड़ा जाइ।
    फुन कबहुँ तोहसे घिना नाहीं होइ।
तू फुन स कबहुँ भी उजड़बिउ नाहीं।
    तू महान रहबिउ, तू हमेसा अउर सर्वदा आनन्दित रहबिउ।
¹⁶ तोहार जरूरत क चिजियन तोहका जातियन प्रदान करिहीं।
    इ एतना ही सहल होइ जइसे दूध मुँह बच्चा क महतारी क दूध मिलत ह।
वइसे ही तू सासकन क सम्पत्तियन ‘पिउबीउ।’
    तब तोहका पता चली कि इ मइँ यहोवा हउँ जउन तोहार रच्छा करत ह।
    तोहका पता चल जाइ कि उ याकूब क महामहिम तोहका बचावत ह।

¹⁷ “फिलहाल तोहरे पास ताँबा अहइ
    परन्तु एकरी नगह मइँ तोहका सोना देब।
अबहिं तउ तोहरे लगे लोहा अहइ,
    पर ओकर जगह तोहका चाँदी देब।
तोहार लकड़ी क जगह मइँ तोहका ताँबा देबउँ।
    तोहार पाथरन क जगह तोहका लोहा देबउँ
अउर तोहका दण्ड देइ क जगह मइँ तोहका सुख चैन देबउँ।
    जउन लोग अबहिं तोहका दुःख देत हीं उ सबइ ही लोग तोहरे बरे अइसा काम करिहीं जउन तोहका सुख देइहीं।
¹⁸ तोहरे देस मँ हिंसा अउर तोहरी सबइ सीमा मँ तबाही अउर बरबादी कबहुँ नाहीं सुनाई पड़ी।
    तोहरे देस मँ लोग फुन कबहुँ तोहार वस्तुअन नाहीं चोरइहीं।
तू आपन परकोटन क नाउँ ‘उद्धार’ रखब्या
    अउर तू आपन दुआरन क नाउँ ‘स्तुति’ रखब्या।

¹⁹ “दिन क समय मँ तोहरे बरे सूरज क प्रकास नाहीं होइ
    अउर रात क समय मँ चाँद क प्रकास तोहार रोसनी नाहीं होइ।
काहेकि यहोवा ही सदैव तोहरे बरे प्रकास होइ।
    तोहार परमेस्सर तोहार महिमा बनी।
²⁰ तोहार ‘सूरज’ फुन कबहुँ भी नाहीं छुपी।
    तोहार ‘चाँद’ कबहुँ भी करिआ नाहीं पड़ी।
काहेकि यहोवा क प्रकास सदा सर्वदा तोहरे बरे होइ
    अउर तोहार दुःख क समय खतम होइ जाइ।

²¹ “तोहार सबहिं लोग उत्तिम बनिहीं।
    ओनका सदा बरे धरती मिलि जाइ।
मइँ ओन लोगन क रचा ह।
    उ सबइ अद्भुत पउधन
    मोर आपन ही हाथन स लगाए भए अहइँ।
²² छोटा स छोटा भी बिसाल घराना बन जाइ।
    छोटा स छोटा भी एक सक्तीसाली रास्ट्र बन जाइ।
जब उचित समय आइ,
    मइँ यहोवा हाली ही आइ जाब
    अउर मइँ इ सबइ बातन घटित कइ देबउँ।”

⁶ यरूसलेम क चारदीवारी पइ मइँ रखवारे (नवी) बइढाइ दिहेउँ ह कि ओकर धियान रखइँ।
    इ सबइ रखवारे मूक नाहीं रहिहीं।

इ सबइ रखवारे यहोवा क तोहरी पचन्क जरूरतन क याद दियावत हीं।
    हे रखवारो, तू पचन्क चुप नाहीं होइ चाही।
⁷ तू पचन्क यहोवा स पराथना करब बन्द नाहीं करइ चाही।
    तू पचन्क सदा ओकर पराथना करत ही रहइ चाही।
जब तलक उ फुन स यरूसलेम क निर्माण न कइ दे,
    तब तलक तू पचे ओकर पराथना करत रहा।
यरूसलेम एक अइसा नगर अहइ
    जेकर धरती क सबहिं लोग जस गइहीं।

⁸ यहोवा खुद आपन सक्ति क प्रमाण बनावत भए वाचा कइँती यहोवा आपन सक्ति क प्रयोग स ही उ वाचा क पाली।
    यहोवा कहे रहा, “मइँ तू पचन्क बचन देत हउँ
कि मइँ तोहरे पचन्क खइया क कबहुँ तोहरे पचन्क दुस्मनन क न देबउँ।
    मइँ तू पचन्क बचन देत हउँ कि तोहार पचन्क बनाई दाखरस तोहार पचन्क दुस्मनन कबहुँ नाहीं लइ पाई।
⁹ जउन मनई खाना जुटावत ह, उहइ ओका खाई अउर उ मनई यहोवा क गुण गाई।
    उ मनई जउन अंगूर बीनत ह, उहइ ओन अंगूरन क बनी दाखरस पिई।
    मोर पवित्तर धरती पइ अइसी बातन हुआ करिहीं।”

¹⁰ दुआरे स होत भए आवा।
    लोगन बरे राहन साफ करा।
मारग क तइयार करा।
    राहे पइ क पाथर हटाइ द्या,
लोगन बरे संकेत क रूप मँ झण्डा उठाइ द्या।

¹¹ यहोवा सबहिं दूर देसन बरे
    बोलत अहइ।
“सिय्योन क लोगन स कहि द्या,
    ‘लखा, तोहार पचन्क उद्धारकर्ता आवत अहइ।
उ तोहार पचन्क प्रतिफल लिआवत अहइ।
    उ अपने संग तोहरे बरे प्रतिफल लिआवत अहइ।’”
¹² ओकर लोग बोलावइ जाइ: “पवित्तर जन,” “यहोवा क सुरच्छित लोग।”
    यरूसलेम बोलावइ जाइ:
“उ नगर जेसे यहोवा पिरेम करत ह,”
    “उ नगर जेका अउर तजि नाहीं जाइ।”

² “तू अइसे वस्त्र जउन लाल धब्बन स युक्त अहइँ, काहे पहिरत अहा?
    तोहार वस्त्र अइसे लाल काहे अहइँ जइसे उ मनई क जउन अंगुर स दाखरस बनावत ह”

³ उ जवाब देत ह, “दाखरस क कुण्डे मँ मइँ अकेले ही दाख रौंदेउँ।
    कउनो भी मोका मदद नाहीं दिहस।
मइँ कोहान रहेउँ अउर मइँ लोगन क रौंढेउँ जइसे अंगूर दाखरस बनावइ बरे रौंदा जात हीं।
    रस छिटके मोरे ओढ़ना मँ लाग।
⁴ मइँ रास्ट्रन क दण्ड देइ बरे एक समय चुनेउँ।
    मोर उ समय आइ गवा कि मइँ आपन लोगन क बचाउँ अउर ओनकर रच्छा करउँ।
⁵ मइँ चकित भएउँ कि कउनो भी मनई मोर समर्थन नाहीं किहस।
    एह बरे मइँ आपन सक्ति क प्रयोग
आपन लोगन क बचावइ बरे किहेउँ।
    खुद मोर आपन किरोध ही मोर समर्थन किहस।
⁶ जब मइँ कोहान रहा, मइँ लोगन क रौंद दिहे रहेउँ।
    जब मइँ किरोध मँ पागल रहा, मइँ ओनका दण्ड दिहेउँ।
    मइँ ओनकर लहू धरती पइ उड़ेर दिहेउँ।”

¹¹ किन्तु यहोवा अब भी पहिले क समय याद करत ह।
    यहोवा मूसा क अउर ओकर लोगन क याद करत ह।
यहोवा उहइ रहा जउन लोगन क सागर क बीच स निकारि के लिआवा।
    यहोवा आपन भेड़िन क अगुवाई क बरे आपन चरवाहन क प्रयोग किहस।
किन्तु अब उ यहोवा कहाँ अहइ
    जउन आपन आतिमा क मूसा मँ रख दिहे रह्या।
¹² यहोवा आपन दाहिन हाथे स मूसा क अगुवाई किहस।
यहोवा आपन अद्भुत सक्ति स मूसा क राह देखाएस।
    यहोवा जल क चीर दिहे रहा।
जेहसे लोग सागर क पैदल पार कइ सके रहेन।
    इ अद्भुत कार्य क कइके यहोवा आपन नाउँ प्रसिद्ध किहे रहा।
¹³ यहोवा लोगन गहिर सागर क बीच स पार किहेस।
    उ पचे अइसे चला रहेन
    जइसे रेगिस्तान क बीच स घोड़ा बिना लड़खड़ाए चला जात ह।
¹⁴ जइसे मवेसी घाटियन स उतरत
    अउर आराम क ठउर पावत हीं वइसे ही यहोवा क प्राण हमका विस्राम क जगहिया दिहेस ह।
हे यहोवा, इ ढंग स तू आपन लोगन क राह देखाया
    अउर तू आपन नाउँ अद्भुत कइ दिहा।