Chronological

अहज्याह बरे सँदेसा

1 अहाब क मरइ क पाछे मोआब इस्राएल क हुकूमत स अजाद होइ गवा।

² एक दिना अहज्याह सोमरोन मँ अपने घरे क छत पइ क ऊपर क कमरा क जंगले मँ स गिर गवा। उ बुरी तरह घायल होइ गवा। अहज्याह सँदेसवाहक क बोलाएस अउ ओनसे कहेस, “एक्रोन क देवता बालजबूब क याजकन क लगे जा। ओनसे पूछा कि का मइँ अपनी चोटन स तन्दुरूस्त होइ सकब।”

³ किन्तु यहोवा क दूत तिसबी एलिय्याह स कहेस, “राजा अहज्याह सोमरोन स कछू सँदेसवाहक पठएस ह। जा अउर एन लोगन स मिला। ओनसे इ कहा, ‘इस्राएल मँ परमेस्सर अहइ। तउ तू लोग एक्रोन क देवता बालजबूब स सवाल करइ काहे जात अहा? ⁴ राजा अहज्याह स इ सबइ बातन कहा: यहोवा कहत ह: तू अपने बिछउना स उठि नाहीं पउब्या। तू मरब्यो।’” तब एलिय्याह चल पड़ा अउर उ अहज्याह क सेवकन स इहइ सब्द कहेस।

⁵ सँदेसवाहक अहज्याह क लगे लौटि आएन। अहज्याह सँदेसवाहकन स पुछेस, “तू लोग एँतना हाली काहे लउट्या?”

⁶ सँदेसवाहकन अहज्याह स कहेन, “एक ठु मनई हम स भेंटइ आवा। उ हम लोगन स उ राजा क लगे वापस जाइ क कहेस जउन हमका पठए रहा अउर ओहसे यहोवा जउन कहेस, उ कहइ क कहेस, ‘इस्राएल मँ एक परमेस्सर अहइ। तउ तू एक्रोन क देवता बालजबूब स सवाल करइ बरे सँदेसवाहकन क काहे पठया। काहेकि तू इ किहा ह इ कारण तू अपने बिछउना स नाहीं उठब्या। तू मरब्या।’”

⁷ अहज्याह सँदेसवाहकन स पूछेस, “जउन मनई तोहसे मिला अउर जउन तोहसे अइसा कहेस उ कइसा देखॉइ पड़ता रहा?” ⁸ सँदेसवाहकन अहज्याह स कहेन, “उ मनई क बदन पइ बहोत बार रहा अउर अपनी कमर मँ एक ठु चमड़ा क पेटी बाँधे रहा।”

तब अहज्याह कहेस, “इ तिसबी एलिय्याह अहइ।”

अहज्याह क जरिये पठए गए फउजियन क आगी नस्ट करत ह

⁹ अहज्याह एक ठु सेनापति अउर पचास मनइयन क एलिय्याह क लगे पठएस। सेनापति एलिय्याह क लगे गवा। उ समइ एलिय्याह एक ठु पहाड़ी क चोटी पइ बइठा रहा। सेनापति एलिय्याह स कहेस, “परमेस्सर क जन राजा क आदेस अहइ, ‘खाले आवा।’”

¹⁰ एलिय्याह पचास फउजियन क सेनापति क जवाब दिहस, “जदि मइँ परमेस्सर क जन हउँ तउ सरग स आगी भहराइ पड़इ अउर तोहका एवं पचास फउजियन क नस्ट कइ देइ।”

एह बरे सरग स आगी गिर पड़ी अउर उ सेनापति अउ ओकरे पचास मनइयन क नस्ट कइ दिहस।

¹¹ अहज्याह दूसर फउजी अउ पचास फउजियन क पठएस। सेनापति एलिय्याह स कहेस, “परमेस्सर क जन राजा क आदेस अहइ ‘हाली खाले आवा।’”

¹² एलिय्याह सेनापति अउर ओकरे पचास फउजियन स कहेस, “जदि मइँ परमेस्सर क जन हउँ तउ सरग स आगी भहराइ पड़इ अउर उ तोहका अउ तोहरे पचास फउजियन क बर्बाद कइ देइ।”

परमेस्सर क आगी सरग स गिर पड़ी अउर सेनापति अउ पचास फउजियन क बर्बाद कइ दिहस।

¹³ अहज्याह तीसरे सेनापति क पचास फउजियन क संग पठएस। पचास फउजियन क सेनापति एलिय्याह क लगे आवा। सेनापतियन घुटनन क बल झुक कइ पराथना किहस, “हे परमेस्सर क जन मइँ तोह स पराथना करत हउँ, कृपा कइके मोर जिन्नगी अउ मोर एन पचास सेवकन क जिन्नगी क अपनी निगाह मँ मूल्यवान मानइँ। ¹⁴ सरग स आगी गिर पड़ी अउर पहिले दुइ सेनापतियन अउ ओनके पचास फउजियन क उ बर्बाद कइ दिहस। किन्तु अब कृपा करइँ अउर हमका जिअत रहइ देइँ।”

¹⁵ यहोवा क दूत एलिय्याह स कहेस, “सेनापति क संग जा। ओहसे डेराअ जिन।”

एह बरे एलिय्याह सेनापति क संग राजा अहज्याह क लखइ गवा।

¹⁶ एलिय्याह अहज्याह स कहेस, “इस्राएल मँ परमेस्सर अहइ ही, तउ भी तू सँदेसवाहकन क एक्रोन क देवता बालजबूब स सवाल करइ काहे पठया? काहेकि तू इ किहा ह, इ कारण तू अपने बिछउना स नाहीं उठब्या। तू मरब्या।”

यहोराम, अहज्याह क जगह लेत ह

¹⁷ अहज्याह वइसे ही मरा जइसा यहोवा एलिय्याह क जरिये कहे रहा। अहज्याह क कउनो पूत नाहीं रहा। एह बरे अहज्याह क पाछे यहोराम नवा राजा भवा। यहोराम यहूदा क राजा यहोसापात क पूत यहोराम क राज्जकाल क दूसरे बरिस हुकूमत करब सुरू किहस।

¹⁸ अहज्याह जउन दूसर कारज किहस उ सबइ इस्राएल क राजा लोगन क इतिहास क किताबे मँ लिखे गए अहइँ।

एलिय्याह क अपने लगे लेइ क यहोवा क जोजना

2 इ लगभग उ समइ रहा जब यहोवा एक हावाक चक्रवात क जरिये एलिय्याह क सरग मँ लइ जाइवाला रहेन। एलिय्याह एलीसा क संग गिलगाल गवा।

² एलिय्याह एलीसा स कहेस, “कृपा कइके हिअइँ रूका, काहेकि यहोवा मोका बेतेल जाइ क कहेस ह।”

किन्तु एलीसा कहेस, “मइँ यहोवा अउर तोहार जिन्नगी क किरिया खाइके प्रतिग्या करत हउँ कि तोहार क संग नाहीं छोड़ब।” एह बरे दुइनउँ लोग बेतेल तलक गएन।

³ बेतेल क नबियन क समूह एलीसा क लगे आवा अउर उ एलीसा स कहेस, “का तू जानत अहा कि आजु तोहरे सुआमी क यहोवा तोहसे अलग कइके लइ जाइ?”

एलीसा कहेस, “हाँ, मइँ एका जानत हउँ। इ बारे मँ बातन न करा।”

⁴ एलिय्याह एलीसा स कहेस, “मेहरबानी कइके हिअँर ठहरा काहेकि यहोवा मोका यरीहो जाइ क कहेस ह।”

किन्तु एलीसा कहेस, “मइँ यहोवा अउर तोहार जिन्नगी क किरिया खाइके प्रतिग्या करत हउँ कि मइँ तोहार संग नाहीं तजब।” एह बरे दुइनउँ लोग यरीहो गएन।

⁵ यरीहो क नबियन क समूह एलीसा क लगे आवा अउर उ पचे ओहसे कहेन, “का तोहका मालूम अहइ कि यहोवा आजु तोहरे सुआमी क तोहसे दूर लइ जाइ।”

एलिसा कहेस, “हाँ, मइँ एका जानत हउँ। इ बारे मँ बातन न करा।”

⁶ एलिय्याह एलीसा स कहेस, “मेहरबानी कइके हिअँइ ठहरा काहेकि यहोवा मोका यरदन नदी तलक जाइ क कहेस ह।”

एलीसा जवाब दिहस, “मइँ यहोवा अउर तोहार जिन्नगी क किरिया खाइके प्रतिग्या करत हउँ कि मइँ तोहार क संग नाहीं तजब।” एह बरे दुइन मनई चलत रहेन।

⁷ नबियन क समूह मँ स पचास मनइयन ओनकर अनुसरण किहन। एलिय्याह अउर एलीसा यरदन नदी पइ रूक गएन। पचास मनई एलिय्याह अउ एलीसा स कछू दूर खड़े रहेन। ⁸ एलिय्याह आपन अगंरखा उतारेस, ओका तह किहेस अउर ओहसे पानी पइ चोट किहस। पानी दाईं कइँती बाईं कइँती क फट गवा। एलिय्याह अउ एलीसा झुरान भुइँया पइ चलिके नदी क पार किहेस।

⁹ जब उ पचे यरदन नदी क पार कइ लिहन तब एलिय्याह एलीसा स कहेस, “एहसे पहिले कि परमेस्सर मोका तोहसे दूर लइ जाइ, तू का चाहत अहा कि मइँ तोहरे बरे करउँ।”

एलीसा कहेस, “मोका तोहार आतिमा क दुईगुणा हींसा द्या।”

¹⁰ एलिय्याह कहेस, “तू कठिन चीज माँग्या ह। जदि तू मोका उ समइ लखब्या जब मोका लइ जावा जाइ तउ उहइ होइ। किन्तु जदि तू मोका नाहीं लखि पउब्या तउ उ नाहीं होइ।”

परमेस्सर एलिय्याह क सरग मँ लइ जात ह

¹¹ एलिय्याह अउ एलीसा एक संग बातन करत भए टहरत रहेन। अचानक कछू घोड़न अउ एक ठु रथ आवा अउर उ पचे एलिय्याह क एलीसा स अलग कइ दिहेन। घोड़न अउ रथ आगी क तरह रहेन। तब एलिय्याह एक ठु बौवन्डर मँ सरग क चला गवा।

¹² एलीसा एका लखेस अउ जोर स गोहराएस, “मोर बाप। मोर बाप। इस्राएल क रथ अउर ओकर घोड़सवार फउजी।”

एलीसा एलिय्याह क फुन कबहुँ नाहीं लखेस। एलीसा आपन ओढ़नन क मूठी मँ भरेस, अउर आपन सोक परगट करइ बरे, ओनका फार डाएस। ¹³ एलिय्याह क अंगरखा भुइँया पइ गिर पड़ा रहा। एह बरे एलीसा ओका उठाइ लिहस। फुन उ वापिस आएन अउर यरदन नदी क किनारे पइ खड़ा होइ गवा। ¹⁴ एलीसा एलिय्याह क अंगरखा लिहेस, जउन भूइँया पइ गिर गवा रहा। एलीसा एका पानी पइ चोट किहस अउर कहेस, “एलिय्याह क परमेस्सर यहोवा, कहाँ अहइ?” जइसेन ही एलीसा पानी पइ चोट किहस, पानी दाईं अउ बाईं कइँती फट गवा अउ एलीसा नदी पार किहेस।

नबी एलिय्याह क माँग करत हीं

¹⁵ जब यरीहो क नबियन क समूह एलीसा क लखेस, उ पचे कहेन, “एलिय्याह क आतिमा अब एलीसा पइ अहइ।” उ पचे एलीसा स मिलइ आएन। उ पचे एलीसा क समन्वा खाले भुइँया तलक प्रणाम करइ निहुरेन। ¹⁶ उ पचे ओहसे कहेन, “लखा, हम अच्छे खासे पचास मनई अही। मेहरबानी कइके एका जाइ द्या अउर अपने सुआमी क हेरइ द्या। होइ सकत ह यहोवा क सक्ती एलिय्याह क ऊपर लइ लिहे होइ अउर ओका कउनो पर्वत या घाटी मँ भहराइ दिहे होइ।”

मुला एलीसा जवाब दिहस, “नाहीं, एलिय्याह क खोज बरे मनइयन क जिन पठवा।”

¹⁷ नबियन क समूह एलीसा स एतना जियादा पराथना किहस, कि उ उलझन मँ पड़ गवा। तब एलीसा कहेस, “ठीक अहइ, एलिय्याह क खोज मँ मनइयन क पठइ द्या।”

नबियन क समूह पचास मनइयन क एलिय्याह क खोज बरे पठएस। उ पचे तीन दिन तलक खोज किहेन मुला उ पचे एलिय्याह क न पाइ सकेन। ¹⁸ एह बरे उ सबइ लोग यरीहो गएन जहाँ एलीसा ठहरा रहा। उ ओन लोगन स कहस, “का मइँ तोहसे न खोजइ बरे नाहीं कहे रहा।”

एलीसा पानी क सुद्ध करत ह

¹⁹ नगर क बसइया लोग एलीसा स कहेन, “महोदय, आप अनुभव कइ सकत हीं कि इ नगर सुन्दर ठउर मँ अहइ। किन्तु हिआँ पानी बुरा अहइ। इहइ कारण अहइ कि भुइँया मँ फसल क उपज नाहीं होत।”

²⁰ एलीसा कहेस, “मोरे लगे एक ठु नवा खोरा लिआवा अउर ओहमा नून रखा।”

लोग नवा खोरा क एलीसा क लगे लइ आएन। ²¹ तब एलीसा उ ठउरे पइ गवा जहाँ पानी भुइँया स निकरत रहा। एलीसा नून क पानी मँ लोकाइ दिहस। उ कहेस, “यहोवा कहत ह, ‘मइँ इ पानी क सुद्ध करत हउँ। अब, मइँ इ पानी स कउनो क मरइ नाहीं देब, अउर न ही भुइँया क अच्छी फसल देइ स रोकब।’”

²² पानी सुद्ध होइ गवा अउर पानी अब तलक भी सुद्ध अहइ। इ वइसा ही भवा जइसा एलीसा कहे रहा।

कछू लरिकन एलीसा क मजाक उड़ावत हीं

²³ उ नगर स एलीसा बेतेल गवा। एलीसा नगर कँइती पहाड़ी पइ चलत रहा जब कछू लरिकन नगर स खाले आवत रहेन। उ पचे एलीसा क मजाक उड़ावइ लागेन अउर उ पचे कहेन, “हे गंजे, तू ऊपर च़ढि जा। हे गंजे तू ऊपर चढ़ि जा।”

²⁴ एलीसा मुड़िके ओनका लखेस। उ यहोवा स बिनती किहेस कि ओनके संग बुरा होइ। उहइ समइ जंगल स दुइ ठु रीछ आइके ओन लरिकन पइ हमला किहन, हुवाँ बयालीस लरिकन रीछन क जरिये फार दीन्ह गएन।

²⁵ हुवाँ स एलीसा कर्म्मेल पर्वत पइ गवा, ओकरे पाछे उ वापिस सोमरोन क गवा।

यहोराम इस्राएल क राजा बना

3 अहाब क पूत यहोराम सोमरोन मँ इस्राएल क राजा बना। यहोसापात क यहूदा पई राजकाल क अट्ठारहवें बरिस मँ यहोराम राज्ज करब सुरू किहेस। यहोराम बारह बरिस तलक इस्राएल पई राज किहेस। ² यहोराम उ सब किहेस जउन यहोवा क निगाह मँ बुरा अहइ। परन्तु यहोराम अपने महतारी बाप क तरह न रहा काहेकि उ उ स्तम्भ क दूर कइ दिहस जउन ओकर बाप बाल क पूजा बरे बनवाए रहा। ³ परन्तु उ नबात क पूत यारोबाम क अइसे पापन क, जइसे उ इस्राएल स भी कराएस, करत रहा अउर ओनसे न फिरा।

मोआब इस्राएल स अलग होत ह

⁴ मेसा मोआब क राजा रहा। ओकरे लगे बहोत बोकरियन रहिन। मेसा एक लाख मेमनन अउर एक लाख भेड़ा क ऊन इस्राएल क राजा क भेटेंस। ⁵ मुला अहाब क मउत क पाछे मोआब क राजा इस्राएल क राजा क बिरूद्ध बिद्रोह कई दिहेस।

⁶ तब राजा यहोराम सोमरोन क बाहेर निकरा अउ उ इस्राएल क सबहिं मनइयन क बटोरेस। ⁷ यहोराम यहूदा क राजा यहोसापात क लगे संदेसवाहक पठएस। यहोराम कहेस, “मोआब क राजा मोर बिरूद्ध विद्रोह कई दिहा ह। का तू मोआब क खिलाफ जुद्ध करइ मोरे संग चलब्या?”

यहोसापात कहेस, “हाँ, मइँ तोहरे संग चलब। हम दुइनउँ एक फउज क तरह मिल जाब। मोर फउज तोहकरे फउजियन जइसे होइहीं। मोर घोड़न तोहरे घोड़न जइसे होइहीं।”

एलीसा स तीन राजा सलाह माँगत हीं

⁸ यहोसापात यहोराम स पूछेस, “हमका कउने राहे स चलइ चाही?”

यहोराम कहेस, “एदोम क मरूस्थल क रास्ता स।”

⁹ एह बरे इस्राएल क राजा यहूदा अउ एदोम क राजा लोगन क संग गवा। उ पचे सात दिना तलक चारिहुँ कइँती घूमत रहेन। सेना व ओनके गोरूअन बरे पर्याप्त पानी नाहीं रहा। ¹⁰ आपिर मँ इस्राएल क राजा यहोराम कहेस, “ओह, यहोवा फुरइ ही हम तीनहुँ राजा लोगन क एक संग एह बरे बोलाएस कि मोआबी हम लोगन क हरावइँ।”

¹¹ मुला यहोसापात कहेस, “का हिआँ यहोवा क नबी नाहीं अहइ? हम लोग नबी स पूछी कि यहोवा हम क का करइ क बरे कहत ह।”

इस्राएल क राजा क सेवकन मँ स एक ठु कहेस, “सापात क पूत एलीसा हिआँ अहइ। एलीसा, एलिय्याह क सेवक रहा।”^[a]

¹² यहोसापात कहेस, “यहोवा क वाणी एलीसा क लगे अहइ।”

एह बरे इस्राएल क राजा (यहोराम), यहोसापात अउर एदोम क राजा एलीसा स मिलइ गएन।

¹³ एलीसा इस्राएल क राजा (यहोराम) स कहेस, “तू मोहसे का चाहत अहा? आपन बाप अउर महतारी क नबियन क लगे जा।”

इस्राएल क राजा एलीसा स कहेस, “नाहीं, हम लोग तोहसे मिलइ आए अही, काहेकि यहोवा हम तीन राजा लोगन क एह बरे एक संग हिआँ बोलवा ह कि मोआबी हम लोगन क हरावइ।”

¹⁴ एलीसा कहेस, “मइँ यहूदा क राजा यहोसापात क सम्मान करत हउँ अउर मइँ सर्वसक्तीमान यहोवा क सेवा करत हउँ। उ निहचइ ही जिअत अहइ, एह बरे मइँ फुरइ कहत हउँ: मइँ न तउ तोह पइ दृस्टि डावत अउर न ही तोह पइ धियान देत, जदि यहूदा क राजा यहोसापात हिआँ न होत। ¹⁵ किन्तु अब एक अइसे मनई क मोरे लगे लिआवा जउन वीणा बजावत होइ।”

जब उ मनई वीणा बजाई तउ यहोवा क सक्ती एलीसा पइ उतरी। ¹⁶ तब एलीसा कहेस, “यहोवा इ कहत ह, ‘घाटी मँ गड़हा खना।’ ¹⁷ यहोवा इहइ कहत ह: तू हवा क अनुभव नाहीं करब्या, तू बरखा भी नाहीं लखब्या। मुला उ घाटी जल स भरि जाइ। तू, तोहार गइयन अउ दूसर जनावरन क पानी पिअइ क मिली। ¹⁸ यहोवा क बरे इ करब सहल अहइ। उ तोहका मोआबियन क भी पराजित करइ देइ। ¹⁹ तू हर एक सुदृढ़ नगर अउर प्रमुख सहर पर आक्रमण करब्या। तू हर एक अच्छे बृच्छ क काट डउब्या। तू सबहिं पानी क सोतन क रोक देब्या। तू हरेक हरियर खेत क पाथरन स भरके नस्ट कइ देब्या।”

²⁰ भिंसारे सुबह क बलि क समइ, एदोम क कइँती स पानी बहइ लाग अउर घाटी पानी स भर ग रहा।

²¹ मोआब क लोग सुनेन कि इस्राएल, यहूदा अउर एदोम क राजा लोग ओनके खिलाफ लड़इ बरे आए अहइँ। एह बरे मोआब क लोग कवच धारण करइवाला उमिर क सबहिं मनइयन क बटोरेन। ओन लोग जुद्ध बरे तइयार होइके चउहद्दी पइ प्रतीच्छा किहेन। ²² मोआब क लोग भी बहोत भिंसारे उठेन। उगत भवा सूरज घाटी क जल पइ चमकत रहा अउर मोआब क लोगन क उ खून क नाईं देखाइ देत रहा। ²³ मोआब क लोग कहेन, “खून क धियान स लखा। राजा लोग जरूर ही एक दूसर क खिलाफ जुद्ध किहे होइहीं। उ पचे एक दूसर क जरूर नस्ट कइ दिहे होइहीं। हम चली अउर ओनके ल्हासन स कीमती चिजियन लइ लेइ।”

²⁴ मोआबी लोग इस्राएली डेरे तलक आएन। किन्तु इस्राएली बाहेर निकरेन अउर उ पचे मोआबी फउज पइ आक्रमण कइ दिहन। मोआबी लोग इस्राएलियन क समन्वा स भाग खड़े भएन। इस्राएली मोआबियन स जुद्ध करइ ओनके पहँटा मँ घुस आएन। ²⁵ उ नगरन क बर्बाद किहन। अउ उ पचे अच्छे खेत क हर एक फउजी दुआरा फेंकइ गवा पाथरन स भर दिहेस। उ पचे सबहिं पानी क सोतन क रोक दिहन अउर सबहिं नीक बृच्छन क काट डाएन। अउर र्कीहरेसेत मँ सिरिफ पाथर रहे गएन जउन ओनकर गुलेलन स फेंकइ गवा रहेन जउन नगर क घेर रखा रहेन।

²⁶ मोआब क राजा लखेस कि जुद्ध ओकरे बरे बहोत जियादा प्रबल अहइ। एह बरे उ तरवार धारी सात सौ मनइयन क एदोम क राजा क बध करइ बरे सोझ फउज भेद क खातिर पठइ दिहेस। किन्तु उ पचे एदोम क राजा तलक फउज भेद नाहीं कइ पाएन। ²⁷ तब मोआब क राजा अपने जेठ पूत क लिहस जउन ओकरे पाछे राजा होत। नगर क चारिहुँ कइँती क देवार पइ मोआब क राजा आपन पूत क भेंट होमबलि क रूप मँ दिहस। अउर हुआँ इस्राएल क विरुद्ध बहोत जियादा कोहान रहा। एह बरे इस्राएल क लोग मोआब क राजा क तजेन अउर अपने देस क लउट गएन।

एक ठु नबी क राँड़ मेहरारू एलीसा स मदद माँगत ह

4 नबियन क समूह मँ स एक ठु मनई क मेहरारू रही। उ मनई मर गवा। ओकर मेहरारू एलीसा क समन्वा आपन दुखड़ा रोएस, “मोर भतार तोहरे सेवक क नाईं रहा। अब मोर भतार मर गवा ह। तू जानत ह कि उ यहोवा क सम्मान करत रहा। किन्तु ओह पइ एक मनई क करजा रहा अउर अब उ मनई मोर दुइ लरिकन क आपन दास बनावइ बरे लेइ आवत अहइ।”

² एलीसा पूछेस, “मइँ तोहार मदद कइसे कइ सकत हउँ? मोका बतावा कि तोहरे घरे मँ का अहइ?”

उ मेहरारू कहेस, “मोरे घरे मँ कछू नाहीं। मोरे लगे सिरिफ जइतून क तेल क गगरी अहइ।”

³ तब एलीसा कहेस, “जा अउर आपन सब पड़ोसियन से खोरन उधार ल्या। उ सबइ खाली होइ चाही। बहोत स खोरन उधार ल्या। ⁴ तब अपने घरे जा अउर दरवाजन बन्द कइ ल्या। सिरिफ तू अउर तोहार पूत घरे मँ रहिहीं। तब एन सबइ खोरन मँ तेल नावा जब उ खोरन भर जाइ तउ ओनका एक अलग ठउरे पइ धरा।”

⁵ अब उ मेहरारू एलीसा क हिआँ स चली गइ, आपन घरे पहोंची अउर दरवाजन बंद कइ लिहस। सिरिफ उ अउर ओकर पूत घरे मँ रहेन। ओकर पूतन खोरन ओकरे लगे लिआएन अउर उ तेल नाएस। ⁶ उ बहोत स खोरन भरेस। आखिर मँ उ अपने पूत स कहेस, “मोरे लगे दूसर खोरन लिआवा।”

मुला सभी खोरन भर चुका रहेन। पूतन मँ स एक ठु मेहरारू स कहेस, “अब कउनो खोरा नाहीं रहि गवा ह।” उ समइ गगरी क तेल खतम होइ चुका रहा।

⁷ तब उ मेहरारू आइ अउर उ परमेस्सर क जन (एलीसा) स इ घटना बताएस। एलीसा ओहसे कहेस, “जा, तेल क बेच द्या अउर आपन करजा लउटाइ द्या। जब तू तेल क बेच चुकब्यू अउ अपना करजा लउटाइ देब्यू तब तोहार अउ तोहरे पूतन क गुजारा बची रकम स होइ।”

सूनेम मँ एक ठु मेहरारू एलीसा क कमा देत ह

⁸ एक दिना एलीसा सूनेम क गवा। सूनेम मँ एक ठु महत्वपूर्ण मेहरारू रहत रही। इ मेहरारू एलीसा स कहेस कि उ ठहरइ अउर ओकरे घरे खइया क खाइ। एह बरे जब भी एलीसा उ ठउरे स होइके जात रहा तब भोजन करइ बरे हुवाँ रुकत रहा।

⁹ उ मेहरारु अपने भतार स कहेस, “लखा मइँ समुझत हउँ कि एलीसा परमेस्सर क जन पवित्तर जन अहइ। उ सदा हमरे घरे होइके जात ह। ¹⁰ मेहरबानी कइके हम लोग एक ठु कमरा एलीसा बरे छते पइ बनाई। ओहमाँ हम लोग एक ठु बिछउना, एक ठु मेज, एक कुर्सी अउर एक ठु डीबट रख देइ। जब जब उ हमरे घर आवइ तउ उ इ कमरा क आपन रहइ बरे प्रयोग कइ सकत ह।”

¹¹ एक दिना एलीसा उ मेहरारू क घरे आवा। उ उ कमरे मँ गवा अउर हुवाँ आराम किहेस। ¹² एलीसा अपने सेवक गेहजी स कहेस, “सूनेमिन मेहरारू क बोलावा।”

सेवक सूनेमिन मेहरारू क बोलाएस अउर उ ओकरे समन्वा आइ खड़ी भइ। ¹³ एलीसा अपने सेवक स कहेस, “अब इ मेहरारू स कहा, ‘लखा हम लोगन क देखभाल बरे तू यथासंभव नीक किहा ह। हम लोग तोहरे बरे का करी? का तू चाहति अहा कि हम लोग तोहरे बरे राजा या सेना क सेनापति स बात करी?’”

उ मेहरारू जवाब दिहस, “मइँ हिआँ बहोत अच्छी तरह अपने लोगन मँ रहत हउँ।”

¹⁴ एलीसा गेहजी स कहेस, “हम ओकरे बरे का कइ सकित ह?”

गेहजी कहेस, “मइँ जानत हउँ कि ओकर पूतन नाहीं अहइ अउर ओकर भतार बूढ़ा अहइ।”

¹⁵ तब एलीसा कहेस, “ओका बोलावा।”

एह बरे गेहजी उ मेहरारू क बोलाएस। उ आइ अउ ओकरे दरवाजे क लगे खड़ी होइ गइ। ¹⁶ एलीसा मेहरारू स कहेस, “अगले बसन्त मँ इ समइ तू अपने पूत क गले स लगाइ रही होइब्यू।”

उ मेहरारू स कहेस, “नाहीं महोदय! परमेस्सर क जन, मोहसे झूठ जिन बोला।”

सूनेमिन मेहरारू क पूत होत ह

¹⁷ मुला उ मेहरारू क गरभ भवा। उ अगले बसन्त मँ एक ठु पूत क जन्म दिहस, जइसा एलीसा कहे रहा।

¹⁸ लड़का बड़ा भवा। एक दिना उ लड़का खेतन मँ अपने बाप अउर फसल काटत मनइयन क लखइ गवा। ¹⁹ लड़का अपने बाप स कहेस, “ओह मोर मूँड़। मोर मूँड़ फटा जात अहइ।”

बाप अपने सेवक स कहेस, “एका अपनी महतारी क लगे लइ जा।”

²⁰ सेवक उ लरीका क ओकरी महतारी क लगे लइ गवा। लरिका दुपहर तलक अपनी महतारी क गोदी मँ बइठा। तब उ मरि गवा।

महतारी एलीसा स मिलइ जात ह

²¹ उ मेहरारू लरिका क परमेस्सर क जन क बिछउने पइ ओलराइ दिहस। तब उ दरवाजा बन्द किहस अउर बाहेर चली गइ। ²² उ अपने भतारे क बोलाएस अउ कहेस, “मेहरबानी कइके मोरे लगे सेवकन मँ स एक अउ गदहन मँ स एक क पठवा। तब मइँ परमेस्सर क जन स भेंटइ हाली जाबइ अउर लउटि अउबइ।”

²³ उ मेहरारू क भतार कहेस, “तू आज परमेस्सर क जन क लगे काहे जाइ चाहति अहा? इ नवचन्द्र या सबित क दिन नाहीं अहइ।”

उ कहेस, “परेसान जिन ह्वा। सब कछू नीक होइ।”

²⁴ तब उ एक गदहे पइ काठी धरेस अउ अपने सेवक स कहेस, “आवा चली अउ हाली करी। धीरे तबहिं चला जब मइँ कहउँ।”

²⁵ उ मेहरारू परमेस्सर क जन स भेंटइ कर्म्मेल पर्वत पइ गइ।

परमेस्सर क जन सूनेमिन मेहरारू क दूर स आवत लखेस। एलीसा अपने सेवक गेहजी स कहेस, “लखा, उ सूनेमिन मेहरारू अहइ। ²⁶ कृपा कइके अब दउड़ि के ओहसे भेंटा। ओहसे पूछा, ‘का सब कछू ठीक अहइ? का तू कुसल स अहा? का तोहार भतार कुसल स अहइ? का तोहार पूत कुसल ह?’” गेहजी उ सूनेमिन मेहरारू स इहइ पूछेस।

उ जवाब दिहस, “सब कुसल अहइ।”

²⁷ मुला सूनेमिन मेहरारू स पर्वत पइ चढ़िके परमेस्सर क जन क लगे पहोंची। उ प्रणाम करइ निहुरी अउर उ एलीसा क गोड़ धइ लिहेस। गेहजी सूनेमिन मेहरारू क दूर हींच लेइ बरे निअरे आवा। किन्तु परमेस्सर क जन गेहजी स कहेस, “ओका अकेला छोड़ द्या। उ बहोत परेसान अहइ अउर यहोवा एकरे बारे मँ मोहसे नाहीं कहेस। यहोवा इ खबर मोहसे छुपाएस।”

²⁸ तब सूनेमिन मेहरारू कहेस, “महोदय, मइँ आप स पूत नाहीं माँगे रहेउँ। मइँ आप स कहे रहेउँ, ‘आप मोका मूर्ख न बनावइँ।’”

²⁹ तब एलीसा गेहजी स कहेस, “जाइ बरे तइयार होइ जा। मोर टहराइ क कुबरी लइ ल्या अउर जा। कउनो स बात करइ बरे न रूका। यदि तू कउनो मनई स मिला तउ ओका नमस्कार भी न कहा। जदि कउनो मनई नमस्कार करइ तउ तू ओकर जवाब भी न द्या। मोर टहरइ क कुबरी क बच्चा क चेहरा पइ रखा।”

³⁰ मुला बच्चा क महतारी कहेस, “जइसा कि यहोवा सास्वत अहइ अउर आप जिअत अहइँ मइँ प्रतिग्या करति अहइँ कि मइँ तोहार बिना हिआँ स नाहीं जाब।”

एह बरे एलीसा उठा अउर सूनेमिन मेहरारू क संग चल पड़ा।

³¹ गेहजी सूनेमिन मेहरारू क घर, एलीसा अउ सूनेमिन स पहिले पहोंचा। गेहजी टहरइ क कुबरी क बच्चा क चेहरे पइ धरेस। मुला बच्चा न कउनो बात किहस अउर न ही कउनो अइसा संकेत दिहस जेहसे इ लागइ कि उ कछु सुनेस ह। तब गेहजी एलीसा स मिलइ लउटा। गेहजी एलीसा स कहेस, “बच्चा नाहीं जगा।”

सूनेमिन मेहरारू क पूत फुन जिअत ह

³² एलीसा घरे स आवा अउर बच्चा अपने बिछउना पइ मरा पड़ा रहा। ³³ एलीसा कमरे मँ आवा अउर उ दरवाजा बन्द कइ लिहस। अब एलीसा अउर उ बच्चा कमरा मँ अकेल्ले रहेन। तब एलीसा यहोवा स पराथना किहेस। ³⁴ एलीसा बिछउना पइ गवा अउ बच्चा पइ ओलरा। एलीसा आपन मुँह बच्चा क मुँहे पइ धरेस। एलीसा आपन आँखिन बच्चा की आँखिन पइ धरेस। एलीसा आपन हाथन क बच्चा क हाथन पइ धरेस। एलीसा आपन क बच्चा क ऊपर फइलाएस। तब बच्चा क तन गरम होइ गवा।

³⁵ एलीसा उठा अउर कमरे मँ चारिहुँ कइँती घूमा। तब उ फुन बच्चा क ऊपर झुक गवा। तब बच्चा सात दाईं छींकेस अउर उ आँखिन खोलेस।

³⁶ एलीसा गेहजी क बोलाएस अउर कहेस, “सूनेमिन मेहरारू क बोलावा।”

गेहजी सूनेमिन मेहरारू क बोलाएस अउर उ एलीसा क लगे आइ। एलीसा कहेस, “अपने पूत क उठाइ ल्या।”

³⁷ तब सूनेमिन मेहरारू कमरा मँ गइ अउ एलीसा क चरणन पइ निहुरी। तब उ अपने पूत क उठाएस अउर उ बाहेर गइ।

एलीसा अउ जहरीला सुरवा

³⁸ एलीसा फुन गिलगाल आइ गवा। उ समइ देस मँ भुखमरी क समइ रहा। नबियन क समूह एलीसा क समन्वा बइठ गवा। एलीसा अपने सेवक स कहेस, “बड़के बर्तन क आगी पइ धरा अउ नबियन क समूह बरे कछू सुरवा बनावा।”

³⁹ एक ठु मनई खेतन मँ जड़ी-बूटी बटोरइ गवा। ओका एक जंगली बेल मिली। उ कछू जंगली लौकियन इ बेल स तोड़ेस अउ अपने लबादे क भर लिहस। तब उ आवा अउर जंगली लौकियन क बर्तन मँ डाइ दिहस। मुला न ओका अउर न ही दूसर नबियन क पता चला रहा कि उ कइसी लउकियन अहइँ?

⁴⁰ तब उ पचे तनिक सुरवा मनइयन क खाइ बरे दिहन। मुला जब उ पचे सुरवा क खाब सुरू किहन, तउ उ पचे एलीसा स चिचिआइके कहेन, “परमेस्सर क जन! बर्तन मँ जहर बाटइ।” उ पचे बर्तन स कछू नाहीं खाइ सकेन काहेकि खइया खाब खतरा स रहित नाहीं रहा।

⁴¹ मुला एलीसा स कहेस, “कछू आटा लिआवा।” उ पचे एलीसा क लगे आटा लइ आएन अउर उ पचे ओका बर्तन मँ नाइ दिहन।

तब एलीसा कहेस, “सुरवा क लोगन क बरे नावा जेहसे उ पचे खाइ सकइँ।” तब सुरवा मँ कउनो दोख नाहीं रहा।

एलीसा नबियन क समूह क खइया करावत ह

⁴² एक ठु मनई बालसालीसा स आवा अउर पहिली फसल स परमेस्सर क जन बरे रोटी लिआवा। उ मनई बीस ठु जौ क रोटियन अउ नवा अनाज क अपनी बोरी मँ लिआवा। तब एलीसा कहेस, “इ खइया लोगन क द्या जेका उ पचे खाइ सकइँ।”

⁴³ एलीसा क सेवक कहेस, “आप का कहेन? हिआँ तउ सौ मनई अहइँ। ओन सबहिं मनइयन क इ खइया मइँ कइसे दइ सकत हउँ?”

किन्तु एलीसा कहेस, “लोगन क खाइ बरे खइया द्या। यहोवा कहत ह, ‘उ पचे खइया कइ लेइहीं अउर खइया बच भी जाइ।’”

⁴⁴ तब एलीसा क सेवक नबियन क समूह क समन्वा भोजन परोसेस। नबियन क समूह क खाइ बरे भोजन पर्याप्त भवा अउर ओनके लगे भोजन बचा भी रहा। इ वइसा ही भवा जइसा यहोवा कहे रहा।