Chronological
इस्राएल स नीक समइ क लइ लीन्ह जाइ
6 सिय्योन क तू पचन्क मँ स कछू क जिन्नगी बहोत अराम क अहइ।
सामरिया पर्वत क कछू लोग अपने क सुरच्छित महसूस करत हीं।
मुला तू पचन पइ अनेक मुसीबतन अइहीं।
रास्ट्रन क सब स उत्तिम नगर क तू पचे सम्मानित लोग अहा।
“इस्राएल क लोग” निआव पावइ बरे तोहरे पचन्क लगे आवत हीं।
2 जा अउ कलने क लखा।
हुआँ स बिसाल नगर हमात क जा।
पलिस्ती सहर गत क जा।
का तू पचे इ सबइ राज्यन स बढ़िया अहा? नाहीं।
ओनकर पहँटा तोहरे पचन्क देसे स बड़का अहइँ।
3 जब तू हिंसा क जरिये सासन करत ह
तउ तू सज़ा क दिना बरे सोचइ स इन्कार करत जउन कि आवत ह।
4 मुला तू पचे सबहिं बिलासन क भोगा करत अहा।
तू पचे हाथी दाँते क सेज पइ सोवत अहा अउर अपने बिछौना पइ आराम करत अहा।
तू पचे गोरूअन क झुण्ड मँ स नरम मेमनन
अउ बाड़न मँ स नवा बछवा खात अहा।
5 तू पचे आपन वीणन क बजावत अहा
अउर राजा दाऊद क नाईं संगीत क धन बनावत ह।
6 तू पचे सुन्नर पिआलन मँ दाखरस पिआ करत अहा।
तू पचे सब स उत्तिम तेलन मँ स आपन मालिस करत अहा
अउर तू पचन्क एकरे बरे घबराहट भी नाहीं
कि यूसुफ क परिवार नस्ट कीन्ह जात अहइ।
7 उ सबइ लोग अब बिछउना पइ अराम करत अहइँ। मुला ओनकर नीक समइ खतम होइ। उ पचे बन्दी क रूप मँ विदेसन मँ पहोंचावा जइहीं अउर उ पचे पहिले पकड़ा जाइवालन मँ स कछू होइहीं। 8 मोर सुआमी यहोवा आपन नाउँ स इ प्रतिग्या किहे रहा। सर्वसक्तीमान परमेस्सर यहोवा प्रतिग्या किहस ह:
“मइँ ओन बातन स घिना करत हउँ जेन पइ याकूब क गर्व अहइ।
मइँ ओकर मजबूत मीनारन स घिना करत हउँ।
एह वरे मइँ दुस्मन क सहर
अउर सहर क हर एक चीज लेइ देबउँ।”
तनिक इस्राएली जिअत बचिहीं
9 उ समइ, कउनो घरे मँ अगर दस मनई जिअत बचिहीं तउ भी उ पचे मरि जइहीं। 10 जब कउनो मरि जाइ तब कउनो संबंधी ल्हास लेइ आइ, जेहसे उ ओका बाहेर लइ जाइ सकइ अउर बारि सकइ। संबंधी घरे मँ हाड़न क लेइ आइ। लोग कउनो भी उ मनई स जउन घरे क भितरे छुपा होइ, पूछिहीं, “का तोहरे पचन्क लगे कउनो दूसर ल्हास अहइ?”
उ मनई जवाब देइ, “नाहीं…”
तब मनई क संबंधी कइहीं, “चुप। हम पचन्क यहोवा क नाउँ नाहीं लेइ चाही।”
11 लखा, परमेस्सर यहोवा हुकुम देइ
अउर बिसाल महल टूका-टूका कीन्ह जइहीं
अउर नान्ह घर नान्ह नान्ह टूकन मँ तोरा जइहीं।
12 का घोड़न सिलाखंडन पइ दउड़त हीं? नाहीं।
का लोग समुदर क बर्धन स जोत सकत हीं? नाहीं।
तउ भी तू पचे हर चीज क उलट-पलट देत अहा।
तू पचे अच्छाई अउ निआव क जहर मँ बदल देत अहा।
13 तू पचे लौ-देवरे मँ खुस अहा, तू पचे कहत अहा,
“हम पचे करनैम क आपन सक्ति स जीता ह।”
14 “किन्तु इस्राएल, मइँ तू पचन्क खिलाफ एक रास्ट्र क पठउब। उ रास्ट्र तोहरे पचन्क समूचे देस क, लेबो-हमात स लइके अराबा नाले तलक मुसीबते मँ डइहीं।” सर्वसक्तीमान परमेस्सर यहोवा उ सबइ कहेस।
दर्सन मँ टिड्डियन
7 यहोवा मोका इ देखाएस: उ दूसर फसिल उगर क समइ टिडडी दलन क बनउब सुरू किहेस। राजा क जरिये पहिली फसल काट लीन्ह जाइके पाछे इ दूसर फसल रही। 2 टिड्डियन देस क सारी घास खाइ डाएन। ओकरे पाछे मइँ कहेउँ, “मोर सुआमी यहोवा, मइँ पराथना करत हउँ, हम पचन क छिमा करा। याकूब जी नाहीं सकत, ओकर लगे बहोत सक्ति नाहीं अहइ।”
3 तब यहोवा एकरे बारे मँ विचार बदलेस। यहोवा कहेस, “अइसा नाहीं होइ।”
दर्सन मँ आगी
4 मोर सुआमी यहोवा मोका इ चिजियन देखाएस: मइँ लखेउँ कि यहोवा परमेस्सर आगी क नाई बरसइ बरे बोलावत बाटइ। आगी बिसाल गहिर समुद्दर क नस्ट कइ दिहस। आगी भुइयाँ क चट करइ लाग। 5 मुला मइँ कहेउँ, “हे परमेस्सर यहोवा, मइँ तोहसे पराथना करत हउँ, ठहरा। याकूब बच नाहीं सकत। उ बहोतइ नान्ह अहइ।”
6 तब यहोवा एकरे बारे मँ आपन विचार बदलेस। परमेस्सर यहोवा कहेस, “अइसा नाहीं होइ।”
दर्सन मँ साहुल
7 यहोवा मोका इ देखाएस: यहोवा एक ठु देवारे क सहारे एक साहुल हाथे मँ लइके खड़ा भवा रहा। (देवार साहुल स सोझ कीन्ह गइ रही।) 8 यहोवा मोसे कहेस, “आमोस, तू का लखत अहा?”
मइँ कहेउँ, “साहुल।”
तब मोर सुआमी कहेस, “लखा मइँ आपन इस्राएल क लोगन पइ साहुल क उपयोग करब। मइँ अब अउर अगवा ओनकर टेढ़ेपने क नजरन्दाज नाहीं करब। मइँ ओन ‘बुरे हींसन’ क काट लोकाउब। 9 इसहाक क ऊँच ठउर नस्ट कीन्ह जइहीं। इस्राएल क पवित्तर ठउर चट्टाने क ढेर मँ बदल दीन्ह जइहीं। मइँ हमला करब अउर यारोबाम क परिवारे क तरवारे क घाट उतारब।”
अमस्याह आमोस क भविस्सवाणी करइ स रोकइ क जतन करत ह
10 बेतेल क याजक अमस्याह इस्राएल क राजा यारोबाम क इ सँदेसा पठएस: “आमोस तोहरे खिलाफ सडयंत्र रचत अहइ। उ इस्राएल क लोगन क तोहरे खिलाफ जुद्ध बरे भड़कावत ह। उ एतना जियादा कहत अहइ कि ओकर सब्द पूरा देस मँ भी समाइ नाहीं सकतेन। 11 आमोस कहेस ह, ‘यारोबाम तरवारे क घाट उतरी अउ इस्राएल क लोगन क बन्दी बनाइके आपन देस स बाहेर लइ जावा जइहीं।’”
12 अमस्याह भी आमोस स कहेस, “हे दर्सी यहूदा जा अउर हुअँइ आपन भोजन करा। आपन उपदेस हुअँइ द्या। 13 मुला हिआँ बेतेल मँ अउर जियादा उपदेस जिन द्या। इ यारोबाम क पवित्तर ठउर अहइ। इ इस्राएल क मंदिर अहइ।”
14 तब आमोस अमस्याह क जवाब दिहस, “मइँ पेसेवर नबी नहीं हउँ अउर मइँ नबी क परिवार क नाहीं हउँ। मइँ गोरू पालत हउँ अउर गूलर क बृच्छन क देखरेख करत हउँ। 15 मइँ गड़रिया रहेउँ अउर यहोवा मोका भेड़िन क चरावइ स अजाद किहेस। यहोवा मोहसे कहेस, ‘जा मोर लोग इस्राएलियन मँ भविस्सवाणी करा।’ 16 एह बरे यहोवा क सँदेस क सुना। तू मोहसे कहत अहा, ‘इस्राएल क खिलाफ भविस्सवाणी जिन करा। इसहाक क परिवारे क खिलाफ उपदेस जिन द्या।’ 17 मुला यहोवा कहत ह, ‘तोहार पत्नी सहर मँ रण्डी होइ हीं। तोहार पूतन अउ बिटियन तरवारे स मारा जइहीं। दूसर लोग तोहार भुइँया क खिलाफ आइहीं अउर एका कब्जा कइ लेइहीं। अउर आपुस मँ बँटिहीं अउर तू बिदेस मँ मरब्या। इस्राएल क लोग निहचइ ही, इ देस स बन्दी क रूप मँ लइ लीन्ह जइहीं अउर देस स निस्कासित कीन्ह जाइ।’”
दर्सन मँ पके भए फल
8 यहोवा मोका इ देखाएस: मइँ गर्मी क फलन क एक टोपा लखेउँ: 2 यहोवा पुछेस, “आमोस तू का लखत अहा?”
मइँ कहेउँ, “गर्मी क फलन स भरा भवा एक ठु टोकरी।”
तब यहोवा मोहसे कहेस, “मोर लोग इस्राएलियन क अंत आइ मँ अहइ। मइँ ओनके पापन क अउर बर्दास्त नाहीं कइ सकतेउँ। 3 मन्दिर क गीत सोक गीत बन जइहीं। मोर सुआमी यहोवा इ सब कहेस। सब जगह ल्हासन ही होइहीं। सन्नाटे मँ लोग ल्हासन क लइ जइहीं अउर ओनकर ढेर लगाइ देइहीं।”
इस्राएल क बइपारी सिरिफ धन बनाबइ मँ लगे रहब चाहत हीं
4 मोर सुना।
लोगो तू पचे बेसहारा क कुचरत अहा।
तू पचे इ देस क गरीबन क नस्ट करइ चाहत अहा।
5 बइपारियो तू पचे कहत अहा,
“नवा चंदा कब बीती जेहसे हम पचे अन्न बेचि सकी?
सबित कब बीती,
जेहसे हम पचे आपन गोहूँ बेचइ क लिआइ सकी?
हम कीमतन क बढ़ाइ सकी,
बाटन क हल्का कइ सकी,
अउर हम पचे तराजुअन क अइसा इंतजाम कइ लेइ
कि लोगन क ठगि सकी।
6 गरीब आपन कर्जा वापस नाहीं कइ सकतेन।
एह बरे हम ओनका दास क रूप मँ खरीदब।
हम ओन गरीबन क
एक जोड़ी पनही क कीमत मँ खरीदब।
अहो! हम पचे ओन खराब गोहूँ क भी बेचि सकित ह,
जउन फर्स पइ छितराइ गवा होइ।”
7 यहोवा प्रतिग्या किहेस। उ “याकूब क गर्व” क आपन नाउँ बरे उपयोग किहेस अउर इ प्रतिग्या किहेस कि:
“मइँ ओन लोगन क कीन्ह करमन बरे ओनका छिमा नाहीं कइ सकत।
8 तोहार ओन करमन क कारण पूरा देस काँपि जाइ।
इ देस क हर एक निवासी मरे भए के लिए रोइ।
पूरा देस मिस्र मँ उड़त होइ
नील नदी क तरह कपकपाहीं।
पूरा देस उठिहीं अउर फुन गरिहीं।”
9 यहोवा इ सबइ बातन भी कहेस:
“उ समइ मइँ सूरज दुपहर मँ ही बूड़ि देब।
मइँ उजियारा भरे दिन मँ पृथ्वी क अंधियारा स भरि देब।
10 मइँ तोहार पचन्क पवित्तर दिनन क मरे भए लोगन बरे सोक दिवस मँ बदलब।
तोहार पचन्क सबहिं मरे भए लोगन बरे सोक गीत बनिहीं।
मइँ हर एक क सोक ओढ़ना पहिराउब।
मइँ हर एक क मूँड़ मुड़वाइ देब।
मइँ अइसा गहिर सोक स भरा रोउब बनाउब
माना उ एकलौती क पूत क होइ।
इ एक कड़ुआ अन्त होइ।”
परमेस्सर क संसार बरे भयंकर भुखमरी स भरा भविस्स
11 यहोवा कहत ह:
“लखा मइँ देस मँ भुखमरी लिआउब
अउर उ सबइ दिन निचके आवत अहइँ।
इ रोटी या पानी क भुखमरी नाहीं होइहीं
बल्कि यहोवा क बचन क भुखमरी होइहीं।
12 लोग एक सागरे स दूसर सागर तलक भटकिहीं।
उ पचे उत्तर स दक्खिन तलक भटकिहीं।
उ सबइ लोग यहोवा क सँदेसा बरे
अगवा बढ़िहीं पाछे हटिहीं,
मुला उ पचे ओका पइहीं नाहीं।
13 उ समइ सुन्नर मेहररूअन अउ नउजवान
पिआव क कारण बेहोस होइ जइहीं।
14 ओन लोग सोमरोन क पाप क नाउँ पइ प्रतिग्यन किहेन।
उ पचे कहेन, ‘दान तोहरे पचन्क देवता क सत्ता निहचइ फुरइ बाटइ,
एहसे हम पचे प्रतिग्या करत अही, अउर बेर्शेवा क सत्ता क सत्ता निहचइ फुरइ बाटइ,
एहसे हम पचे प्रतिग्या करत अही’
एह बरे ओन लोगन क पतन होइ
अउर उ पचे फुन कबहुँ उठिहीं नाहीं।”
दर्सन मँ यहोवा क वेदी क सहारे खड़ा होब
9 मइँ आपन सुआमी क वेदी क सहोर खड़ा लखेउँ। उ कहेस,
“खम्भन क सिरे पइ प्रहार करा,
अउर पूरी इमारत क डेहरी तलक कँाप उठी।
कम्भन क मनइयन क मूँड़े पइ गिरावा।
अगर कउनो जिअत बचइ,
तउ ओका तरवारे स मारा।
कउनो मनई पराइ सकत ह,
मुला उ बचि नाहीं सकी।
मनइयन मँ स कउनो भी मनई बचिके नाहीं निकरी।
2 अगर उ पचे पाताल मँ खनिके जइहीं,
मइँ ओनका हुआँ स हींच लेबउँ।
अगर उ पचे ऊपर आकासे मँ जइहीं
मइँ ओनका हुआँ स खाले लिआउब।
3 अगर उ पचे कर्मेल क घाटी पइ जाइके छुपिहीं,
मइँ ओनका हुआँ हेरब अउर मइँ ओनका उ जगहिया पइ लइ आउब।
अगर उ पचे समुद्दर क तले मँ छुपइ चाहत हीं,
मइँ सरप क हुकुम देब अउर उ ओनका डसि लेइ।
4 अगर उ पचे धरा जइहीं अउर आपन दुस्मन क जरिये लइ जावा जइहीं,
मइँ आपन तरवार क हुकुम देब
अउर उ ओनका हुअँइ मारी।
हाँ, मइँ ओन पइ सावधानी पूर्वक निगाह रखब
उहइ दौरान मइँ ओन पइ मुसीबत लिआवइ बरे रास्ता खोजब।
ओनके बरे नीक काम करइ क तरीकन पइ नाहीं।”
देस क लोगन क सजा नस्ट करी
5 मोर सुआमी सर्वसक्तीमान यहोवा, उ पहँटा क छुइ
अउर उ टेघर जाइ
तब उ देस क सबहिं निबासी मरे भए लोगन बरे रोइहीं।
इ पहँटा मिस्र क नील नदी क नाई
ऊपर उठी अउर खाली गिरी।
6 यहोवा आपन ऊपर क निवास अकासे क ऊपर बनाएस।
उ आपन आकास क पृथ्वी पइ धरेस।
उ सागरे क जल क बोलाइ लेत ह,
अउर देस पइ ओकर बर्खा करत ह।
ओकर नाउँ यहोवा अहइ।
यहोवा इस्राएल क नस्ट करइ क प्रतिग्या करत ह
7 यहोवा इ कहत ह:
“इस्राएल तू मोरे बरे कूसियन क नाई अहा।
मइँ इस्राएल क मिस्र स निकारिके लाएउँ।
मइँ पलिस्तियन क भी कप्तोर स लाएउँ
अउर अरामियन क भी कीर स।”
8 मोर सुआमी यहोवा पापे स भरा राज्ज पइ दृस्टि रखे अहइ।
यहोवा इ कहत ह,
“मइँ पृथ्वी पइ स इस्राएल क नस्ट करब।
मुला मइँ याकूब क परिवार क पूरी तरह नस्ट नाहीं करब।
9 मइँ इस्राएल क घराना क तितर-बितर कइके दूसर रास्ट्रन मँ
छितरावइ क आदेस देत अहउँ।
इ उहइ तरह होइ जइसे कउनो मनई अनाजे क छननी स छान देत ह।
नीक आटा ओहसे निकरि जात ह, मुला बुरा अंस फँस जात ह।
याकूब क परिवारे क संग अइसा ही होइ।
10 “मोरे लोगन क बीच पापी कहत हीं,
‘हम लोगन क संग कछू भी बुरा नाहीं घटित होइ।’
मुला उ पचे सबहिं लोग तरवार स मारि दीन्ह जइहीं।”
परमेस्सर राज्ज क फुन स स्थापना क प्रतिग्या करत ह
11 “दाऊद क डेरा गिर गवा ह, मुला उ समइ इ डेरे क मइँ फुन खड़ा करब।
मइँ देवारन क छेदन क भरि देब।
मइँ नस्ट इमारतन क फुन स बनाउब।
मइँ एका अइसा बनाउब जइसा इ पहिले रहा।
12 फुन उ पचे एदोम मँ जउन लोग बचि गवा अहइँ,
ओनका अउर ओन जातियन क जउन मोरे नाउँ स जानी जात हीं, लइ जाइ।”
यहोवा इ सबइ बातन कहेस,
अउर उ सबइ ओनका घटित कराई।
13 यहोवा कहत ह, “उ समइ आवत अहइ,
जब हर तरह क भोजन क बहोतयात होइ।
अबहिं लोग पूरी तरह फसल काटि नाहीं पाए होइहीं
कि जोताइ क समइ आइ जाइ।
लोग अबहिं अंगूरन क रस निकारि ही रहा होइहीं
कि अंगूरन क रोपाइ क समइ फुन आइ पहोंची।
पर्वतन स दाखरस क धार बही
अउर उ पहाड़ियन स बरसी।
14 मइँ आपन लोगन इस्राएलियन क
देस निकारइ स वापस लिआउब।
उ पचे नस्ट भए सहरन क फुन स बनइहीं
अउर ओन सहरन मँ रइहीं।
उ पचे अंगूरे क बेलन क बाग लगइहीं
अउर उ पचे ओन बागन स मिला भवा दाखरस पीइहीं।
उ पचे बाग लगइहीं
अउर उ पचे ओन बागन क फलन क खइहीं।
15 मइँ आपन लोगन क ओनकी भुइँया पइ जमाउब
अउर उ पचे फुन उ देस स उखाड़ा नाहीं जइही जेका मइँ ओनका दिहेउँ ह।”
यहोवा तोहार पचन्क परमेस्सर इ सबइ बातन कहेस।
Awadhi Bible: Easy-to-Read Version. Copyright © 2005 Bible League International.