Chronological

होसे क जरिये यहोवा परमेस्सर क सन्देस

1 इ यहोवा क उ सन्देस अहइ, जउन बेरी क पूत होसे क जरिये मिला रहा। इ सन्देस उ समइ आवा रहा जब यहूदा मँ उज्जियाह, योताम, आहाज अउ हिजकिय्याह क राज्ज रहा। इ ओन दिनन क बात अहइ जब इस्राएल क राजा योआस क पूत यारोबाम क समइ रहा।

² होसे बरे इ यहोवा क पहिला सन्देस रहा। यहोवा कहेस, “जा, अउर एक रण्डी स बियाह कइ ल्या जउन आपन रण्डीबाजी स संतान रखेस ह। काहेकि इ देस क लोग रण्डी क तरह बेउहार करत अहइँ। उ पचे यहोवा बरे अबिस्सासी रहेन ह।”

यिज्रेल क जनम

³ तउ होसे दिबलैम क बिटिया गोमेर स बियाह कइ लिहस। गोमेर गर्भवती भइ अउर उ होसे बरे एक ठु पूत क जनम दिहस। ⁴ यहोवा होसे स कहेस, “एकर नाउँ यिज्रेल राखा। काहे? काहेकि मइँ हाली ही यिज्रेल घाटी मँ कीन्ह गइन हत्या बरे येहू क परिवार क सजा देब फिन एकरे पाछे इस्राएल क बंस क राज्ज क खतम कइ देबउँ। ⁵ उहइ समइ यिज्रेल घाटी मँ, मइँ इस्राएल क धनुस क तोड़ देब।”

लोरुहामा क जनम

⁶ एकरे पाछे गोमेर फुन गर्भवती भइ अउर एक ठु कन्या क जन्म दिहस। यहोवा होसे स कहेस, “इ कन्या क नाउँ लोरुहामा राखा। काहेकि मइँ अब इस्राएल क लोगन पइ अउर जियादा दाया नाहीं देखाउब। मइँ ओनका छिमा नाहीं करब। ⁷ मुला मइँ तउ यहोवा क राज्ज पइ दाया देखाउब। मइँ यहूदा क लोगन क रच्छा करब। मुला ओकरी रच्छा बरे मइँ न तउ धनुस अउर तरवार क प्रयोग करब अउर न ही जुद्ध क घोड़न अउर फउजियन क। मइँ, यहोवा, खुद आपन सक्ती स ओनका बचाउब।”

लोअम्मी क जनम

⁸ गोमेर अबहीं लोरुहामा क दूध पिआउब तजे ही रही कि उ फुन गर्भवती होइ गइ। तउ उ एक ठु पूत क जनम दिहस। ⁹ एकरे पाछे यहोवा कहेस, “एकर नाउँ लोअम्मी धरा। काहेकि तू पचे मोर प्रजा नाहीं अहा अउर मइँ तोहार परमेस्सर नाहीं अहउँ।”

परमेस्सर यहोवा क बचन: इस्राएली बेगिनती क होइहीं

¹⁰ “तउ पइ भी, भविस्स मँ, इस्राएल मँ अनगिनत लोग होइहीं जइसा सागरे क रेत क कन जउन न तउ नापी जाइ सकत ह अउर न ही जेकर गनती कीन्ह जाइ सकत ह। अउर उहइ जगह पइ जहाँ ओनसे इ कहा ग रहा, ‘तू पचे मोर लोग नाहीं अहा।’ उ पचन्क कहा जाईहीं, ‘तू पचे जिअत परमेस्सर क संतान अहा।’

¹¹ “तउ फुन यहूदा अउ इस्राएल क लोग एक संग ऍकट्ठा होइ जइहीं। उ पचे आपन खातिर एक सासक क चुनाव करिहीं अउर ओकरे लगे आपन पहँटा होइहीं। यिज़्रेल क दिन असल मँ एक महान दिन होइ।”

2 “आपन भाइयन स कहा: ‘हम पचे एक ही लोग अहइ’ (अम्मी) अउर आपन बहिनियन क कहा, ‘यहोवा हम पचन पइ दयालु (रूहामा) अहइ।’”

इस्राएल क जाति स यहोवा क कहब

² “आपन महतारी क खिलाफ एक सिकायत करा, काहेकि उ मोर पत्नी नाहीं अहइ अउर न ही मइँ ओकर भतार अहउँ। ओका अदालत मँ लइ जा, तउ उ रण्डी जइसा बेउहार करइ छोड़ देइ अउर ओकरे प्रेमियन क ओकरे छातियन क बीच स दूर हटाइ देइ। ³ अगर उ आपन इ रण्डीबाजी क छोड़इ स इन्कार करी, तउ मइँ ओका एकदम्मइ नंगा कइ देब। मइँ ओका वइसा ही प्रदर्सित करब जइसा उ पइदा भए का दिना रहेन। मइँ ओका सूखा रेगिस्तान क जइसा बनाब अउर मइँ ओका पिआसा मार देब। ⁴ मइँ ओकरी संतानन पइ कउनो दाया नाहीं देखाउब काहेकि उ पचे रण्डीबाजी क संतान होइहीं। ⁵ ओनकर महतारी रण्डी क नाई आचरण किहस ह। उ जउन ओनका गरभधारन किहेस ह मोर बरे लज्जा लिआएस, काहेकि उ कहेस, ‘मइँ आपन प्रेमियन क संग चलब जउन मोका उ सबइ चिजियन देब जेकर मोका जरूर अहइँ। उ पचे मोका रोटी, पानी, ऊन, अउर सन, तेल अउ दाखरस देत हीं।’

⁶ “एह बरे, मइँ तोहार रास्ता काँटन स बन्द करब! मइँ ओकरे रास्ता क रोकइ बरे एक ठु देवार खड़ी करब, जेहसे उ आपन रस्ता ही नाहीं पाइ सकिहीं। ⁷ जदपि उ आपन प्रेमियन क पाछे भागिहीं, लेकिन उ ओन तक नाहीं पहोंच सकिहीं। जदपि उ ओनका हेरिहीं, लेकिन उ ओनका नाहीं पाइ सकिहीं। फुन उ कहिहीं, ‘मइँ आपन पहिले क भतार क लगे लौटि जाब काहेकि मोर पहिले क जिन्नगी मोजूदा जिन्नगी स बहोत अच्छा रहेन।’

⁸ “किन्तु उ नाहीं जानत रही कि उ मइँ ही रहा जउन ओका अन्न, दाखरस अउ तेल देत रहेउँ। मइँ ओका बहोत सारा चाँदी अउ सोना देत रहत रहेउँ, किन्तु ओकर प्रयोग बाल क मूर्तियन बनावइ मँ किहन। ⁹ एह बरे मइँ वापस आउब अउर आपन अनाज क उ समइ लइ लेब जब उ काटइ बरे तइयार होइ अउर मइँ आपन दाखरस क काटइ क मोसम मँ लेब। अउर मइँ आपन ऊन अउ सन क ओढ़ना क भी वापस लइ लेब जेका मइँ ओकरे नंगेपन क ढकि बरे दिहे रहेन। ¹⁰ अब मइँ ओका बेवस्त्र कइके नंगा कइ देब ताकि ओकर सबहिं पिरेमी ओका देखि सकइँ। कउनो भी मनई ओका मोर सक्ति स बचाइ नाहीं पाई। ¹¹ मइँ ओहसे ओकर सारी हँसी खुसी छीन लेब। मइँ ओकर सालाना उत्सवन, नवा चाँद क दावतन अउ हफ्ता क साबित क उत्सवन क खतम मँ लइ आउब। मइँ ओकर सबहिं खास दावतन क रोक देब। ¹² मइँ ओकर सबइ अंगूर क बेल अउर अंजीर क बृच्छन क भी नस्ट कइ देब। उ कहे रहेस, ‘इ सबइ चिजियन मोर पिरेमी लोगन मोका दिहे रहेन।’ मुला अब मइँ ओकरे बगियन क रेगिस्तान बदल देब। ओन बृच्छन स जंगली जानवर आइके आपन भूख मिटावा करिहीं।

¹³ “उ बाल क सेवा किया करत रही, एह बरे मइँ ओका दण्ड देब। उ बाल देवतन क अगवा धूप बारत रही। उ गहनन स सजत अउर नथुनी पहिरा करत रही। फिन उ आपन पिरेमियन क लगे जात रही अउ मोका बिसर जात रही।” इ उ अहइ जउन यहोवा कहे रहा।

¹⁴ “एह बरे, मइँ ओका लुभावइ बरे जात हउँ। मइँ ओका रेगिस्तान मँ लइ जाब अउर मइँ खुद ओह पइ जीतब। ¹⁵ मइँ ओन रेगिस्तान मँ ओकरे बरे अंगूरे क बगियन बनाउब। मइँ आकोर क घाटी क आसा क दुआर बनाइ देब। फुन उ मोका उहइ तरह उत्तर देइ जइसे उ समइ दिया करत रही जब उ जवान रही अउर जब मइँ ओका मिस्र स बाहेर लिआए रहेस।” ¹⁶ यहोवा कहत ह:

“उ अवसर पइ, तू मोका ‘मोर भतार’ कहिके पुकरब्या। तब तू जियादा समइ तलक मोका ‘मोर सुआमी’ नाहीं कहबू।^{[a] 17} मइँ बाल देवतन क नामन क ओकरे मुँह पइसे दूर हटाइ देब। फुन एक भी मनई बाल देवतन क नाउँ नाहीं लिया करिहीं।

¹⁸ “फुन, मइँ इस्राएल क लोगन बरे जंगल क जनावरन, आकासे क पंछियन, अउर धरती पइ रेंगइवालन प्राणियन क संग एक वाचा करब। मइँ धनुस, तलवार अउर जुद्ध क अस्त्रन क तोड़ पेंकब। कउनो अस्त्र-सस्त्र उ भुइँया पइ नाहीं बचि रहइँ। मइँ उ भुइँया क सुरच्छित बनाइ देब जेहसे इस्राएल क लोग सान्ति क संग विस्राम कइ सकिहीं। ¹⁹ मइँ तोहका सदा-सदा बरे आपन दुलहिन क रूप मँ लइ लेब। मइँ प्रतिग्या करत हउँ कि तोहका नेकी, खरेपन, पिरेम अउर दयालुता क संग आपन दुलहिन बनाइ लेब। ²⁰ मइँ तोहका आपन बिस्सासी दुलहिन बनाइ लेब अउर मइँ तोहार बिस्सासी होइ बरे प्रतिग्या करब। तब तू सचमुच यहोवा क जान जाबू।” ²¹ यहोवा कहत ह,

होसे क गोमेर क गुलामी स छोड़ाउब

3 तउ यहोवा मोसे कहेस: “फुन जा अउर उ बिभिचारी मेहरारू स पिरेम कर जउन कउनो दूसर क प्रेमी अहइ। ठीक इसी तरह यहोवा इस्राएलियन क परिम करत ह भले ही उ पचे दूसर देवतन क तरफ मुरत हीं अउर किसमिस देइ पसंद करत हीं।”

² यह बरे मइँ ओका पन्द्रह चाँदी क सिक्कन अउर तीन सौ किलोग्राम जौ देइके खरीद लिहेस ह। ³ तउ मइँ ओसे कहा: “तोहका मोरे संग बहोत अधिक समइ तलक रहइ चाही। तोहका कउनो रण्डी जइसा हरकत नाहीं करइ चाही अउर कउनो दूसर मनइ क संग नाहीं रहइ चाही। मइँ अकेल्ला ही तोहार भतार होब।”

⁴ इहइ तरह, इस्राएल क लोग बहोत दिनन तलक बिना कउनो राजा या मुखिया क रइहीं। उ पचे बिना कउनो बलिदान क रहिहीं अउर उ पचे कउनो पाथर क खम्भा खड़ा नाहीं करिहीं। उ पचे भविस्सवाणी करइ बरे कउनो एपोद क प्रयोग नाहीं करिहीं अउर ओनकर लगे कउनो गृह देवता भी नाहीं होइहीं। ⁵ ऍकरे बाद इस्राएल क लोग वापस लउटि अइहीं अउ यहोवा आपन परमेस्सर क खोजिहीं अउर आपन राजा जउन राजा दाऊद क परिवार समूह स आएस, खोज करिहीं। भविस्य मँ, उ पचे आपन आपका यहोवा समर्पित करिहीं अउर ओकरे आसीर्बादन क लेइहीं।

इस्राएल पइ यहोवा क किरोध

4 हे इस्राएल क लोगो, यहोवा क सँदेस क सुना। यहोवा इ देस मँ रहइवालन क अदालत लइ जात हीं काहेकि उ पचे परमेस्सर संग कीन्ह भवा करार क प्रति विस्सासी अउ वफ़ादार नाहीं रहेस ह। वास्तव मँ इ देस क लोगन परमेस्सर क जानतेन ही नाहीं। ² उ पचे सराप, झूठ, चोरी, बिभिचारी, अहिंसा अउर रक्तपात मँ मसगूल अहइँ। ³ परिणाम, भुइँया विलाप करब्या, अउर एकरे सबहिं निवासियन नस्ट कीन्ह जाब्या। जंगल क जनावरन, आकास क पंछियन अउर सागर क मछरियन तलक भी नस्ट कीन्ह जाब्या। पापी याजकता क खिलाफ यहोवा क बिरोध ⁴ मइँ कउनो दूसर पइ आरोप जिन लगावत हउँ! हे याजकन, मइँ इ सबइ बातन बरे तोह पइ आरोप लगात हउँ। इहइ कारण मोर मुकद्दमा तोहार खिलाफ अहइ।^{[b] 5} हे याजकन, तू दिना मँ ठोकर खाउब्या, किन्तू तू अउर नबी दुइनउँ रात क समइ मँ ठोकर खाउब्या। तू आपन लोगन क ही बर्बाद कइ दिहेस ह।^[c]

⁶ “मोर प्रजा क बिनास भवा काहेकि ओन लोग मोका यहोवा क रूप मँ स्वीकार नाहीं किहेस, कारण याजक मोका स्वीकार करइ स इन्कार किहेस। यह बरे मइँ तोहका आपन याजक क रूप मँ स्वीकार नाहीं करब। तू आपन परमेस्सर क बिसरि दिहा ह एह बरे मइँ तोहरी संतानन क बिसरि जाब। ⁷ उ पचे मोर खिलाफ जेतॅना पाप किहेस ओतॅना ही घमण्डी होइ गएन। यह बरे मइँ ओनकर महिमा क लज्जा मँ बदल देब।

⁸ “याजक क रूप मँ, उ पचन्क लोगन क पाप भेंटन क खाएस ह। उ पचे चाहेस कि लोग जियादा स जियादा पाप करी। ⁹ याजकन अउर लोगन क संग एक ही तरह क बेउहार कीन्ह जाब्या। मइँ ओनका ओकरे पाप क कारण सजा देबउँ। मइँ ओनसे ओनकर बुरे करमन क बदला लेबउँ। ¹⁰ उ पचे खइहीं मुला उ पचे संतुट्ठ न होइ। उ पचे रण्डीबाजी करिहीं, मुला ओनकइ आबादी न बढ़िहीं। काहेकि उ पचे यहोवा क तजेन ह, अउर उ पचे अबिस्सासी होइके आपन क दूसर देवतन क समर्पित कइ दिहेस ह।

¹¹ “नई दाखरस अउर पूराना दाखरस ओन लोगन स ओनकर तर्क-सक्ति क लइ लेत ह। ¹² मोर लोग काठे क मूरती स राय माँगत हीं। ओकर बिस्सास अहइँ कि जादूई छड़ी ओकरे भविस्य क बारे मँ बताई सकत ह। ओन देवतन क संग ओकरे बिभिचारी ओनका भटकइ दिहस ह। उ पचे रण्डी क रहइ बरे उ पचे आपन परमेस्सर क तजि दिहेन। ¹³ उ पचे पहाड़न क चोटियन पइ बलि चढ़वत ह। उ पचे बलूत, चिनार अउ दूसर लम्बा बृच्छन क तरे धूप बारत ह। ओन बृच्छन क तरखाले क छाया नीक दॅखाँत रही। एह बरे तोहार बिटियन ओन बृच्छन क तरे खूद रण्डीबाजी करइ बरे सोअत ह अउर तोहार बहुअन हुआँ पापे स भरा यौनाचार करत हीं।

¹⁴ “मइँ तोहार बिटियन अउ बहुअन क एह बरे सज़ा नाहीं देब कि उ पचे रण्डी क जइसा रहइ के बिभिचारी क काम किहेन ह। काहेकि मनइयन खुद ही रण्डियन क संग यौन सम्बंध बनाएस ह अउर मंदिर क रण्डियन दुआरा बलि चढ़ावत हीं। यह बरे इ कहावत सच अहइ: उ रास्ट्र जउन समझ नाहीं राखत ह ओका बर्बाद कइ दीन्ह जाब्या।

इस्राएल क लज्जा स भरा भवा पाप

¹⁵ “हे इस्राएल, तउ प भी तू एक ठु रण्डी क नाई रहत अहा, मोका आसा अहइ कि यहूदा कसूरवार भि नाहीं होइ। यहूदा, तू गिलगाल मँ दाखिल जिन भवा अउर बेतावेन तलक जिन जा। यहोवा क नाउँ पइ किरिया जिन खा इ जिन कहा: ‘यहोवा क जिन्नगी क किरिया, मइँ प्रतिग्या करत हउँ।’ ¹⁶ इस्राएल एक ठु जवान हट्टी गाय क नाईं बिद्रोह किहेन ह। हाली ही यहोवा ओनका चरागाह मँ गरेड़िया क नाईं लेइ जाइहीं आपन मेमना क बिसाल घास क मइदान मँ चरइ देत ह।

¹⁷ “एप्रैम भी ओकर मूरतियन मँ ओकर संगी बन गवा। तउ ओका अकेल्ले तजि द्या। ¹⁸ जब उ पचे दाखरस पिअइ खतम कइ देब, उ पचे आपन रण्डीपन क प्रथा जारी राखब; उ पचे आपन लज्जावाला कामन स बहोत खुस होब। ¹⁹ एक बवण्डर इस्राएल क आपन पाखन मँ उड़ाइ लेइ जाब, अउर ओका लेइ जाब काहेकि उ मूर्तियन क भेंट किहेस ह।

मुखिया लोग इस्राएल अउ यहूदा स पाप करवाएन

5 “याजकन, सुना! इस्राएल क परिवार, धियान दे! साही परिवार, सुना!

“जदपि तू पचे अइसा लुकान रहा जइसा कि मिसपा क फंदा मँ अहा अउर तू पचे ताबोर क धरती पइ फइलावा गवा फँदन क तरह अहा, मइँ तू सबइ क खिलाफ निआव करब। ² मइँ तू सबन क सजा देबउँ जदपि तू पचे सित्तम क गहरा खाई क नाईं होइ। ³ एप्रैम, मइँ जानत हउँ तू का करत ह। इस्राएल, तू मोसे छिपा भवा नाहीं बा। एप्रैम लखा, इस्राएल अपवित्तर अहइ काहेकि उ रण्डी क नाईं हरकत करत आवत ह। ⁴ इस्राएल इ सबइ कुकरम कइके आपन क परमेस्सर क लगे लउटइ स रोकत अहइँ। उ पचे मूरती पूजा करइ क मज़बूत इच्छा रखत ह^[d] उ पचे यहोवा क नाहीं जनतेन। ⁵ जउन बातन इस्राएल क गोरव बनावत रही उ ही ओकरे बरे लज्जा लाइहीं। इस्राएल आपन अपराध क कारण ठोकर खावत ह। यहूदा भी ओकरे संग ठोकर खावत ह।

⁶ “इस्राएल क लोग ‘भेड़िन’ अउर ‘गइयन’ क साथ लइके यहोवा क बलि चढ़ावइ बरे हेरइ बरे निकरि। मुला उ पचे ओका नाहीं पाइ सकिहीं। तउ जान जाइहीं कि उ ओनसे दूर चला गवा अहइँ। ⁷ यहोवा ओन पइ बिस्सास किहेन, मुला उ पचे ओकर संग धोखा किहेस। लखा, उ पचे अवैध गदेलन क जन्म दिहेस ह। हाली ही यहोवा ओनकर समुचइ फसलन क एक ठु महीना मँ ही दुस्मन क जरिये खतम करइ देब्या।”

इस्राएल क बिनास क भविस्सबाणी

यहोवा कइँती लउटि आवइ क प्रतिफल

लोग सच्चा नाहीं अहइँ

इस्राएल आपन नास स बेखबर