Chronological

हिजकिय्याह यहूदा पइ आपन सासन करब सुरू करत ह

18 आहाज क पूत हिजकिय्याह यहूदा क राजा रहा। हिजकिय्याह इस्राएल क राजा एला क पूत होसे क राज्जकाल क तीसरे बरिस मँ सासन करब सुरू किह्स। ² हिजकिय्याह जब सासन करब सुरू कहिसह, उ पच्चीस बरिस क रहा। हिजकिय्याह यरूसलेम मँ उनतीस बरिस तलक सासन किहस। ओकर महतारी जकर्याह क बिटिया, अबी रही।

³ हिजकिय्याह ठीक अपने पुरखा दाऊद क तरह उ सबइ कारज किहस जेनका यहोवा नीक बताए रहा।

⁴ हिजकिय्याह ऊँची जगहन क नस्ट किहस। उ स्मृति पाथरन अउ असेरा स्तम्भन क खंडित कइ दिहस। ओन दिनन इस्राएल क लोग मूसा क जरिये बनाए गए काँसे क साँप बरे सुगन्धि बारत रहेन। इ काँसे क साँप क नाउँ “नहुसतान” रहा। हिजकिय्याह इ काँसे क साँप क टूकन कइ डाएस काहेकि लोग उ साँपे क पूजा करत रहेन।

⁵ हिजकिय्याह यहोवा, इस्राएल क परमेस्सर मँ भरोसा रखत रहा। यहूदा क राजा लोगन मँ स कउनो क संग चाहे उ ओकर पहिले रहेन या ओकर पाछे रहेन हिजकियाह क समानता नाहीं कीन्ह जा सकत रहा। ⁶ हिजकिय्याह यहोवा क बहोत भक्त रहा। उ यहोवा क अनुसरण करब नाहीं तजेस। उ ओन आदेसन क पालन किहस जेनका यहोवा मूसा क दिहे रहेन। ⁷ यहोवा हिजकिय्याह क संग रहा। हिजकिय्याह जउन कछू किहस, ओहमाँ उ सफल रहा।

हिजकिय्याह अस्सूर क राजा क विरूद्ध विद्रोह किहस। हिजकिय्याह अस्सूर क राजा क सेवा करब बंद कइ दिहस। ⁸ हिजकिय्याह लगातार गाज्जा तलक अउर ओकरे चारिहुँ कइँती क पलिस्तियन क पराजित किहस। उ सबहिं नान्ह स लइके बड़के पलिस्ती नगरन क पराजित किहस।

यहूदा क राजा हिजकिय्याह

29 हिजकिय्याह जब पच्चीस बरिस क रहा, राजा भवा। उ उनतीस बरिस तलक यरूसलेम मँ हुकूमत किहस।। जकर्याह क बिटिया अबिय्याह ओकरी महतारी रही। ² हिजकिय्याह उहइ किहस जेका ओकर पुरखा दाऊद किहस अउर जेका यहोवा नीक समुझत अहा।

³ हिजकिय्याह यहोवा क मन्दिर क दरवाजन क जोड़ेस अउर ओनका मज़बूत किहस। हिजकिय्याह मन्दिर क फुन खोलेस। उ राजा होइ क पाछे, बरिस क पहिले महीने मँ इ किहस। ⁴ हिजकिय्याह याजकन अउ लेवीबंसियन क एक बैठक मँ एक संग बइठाएस। उ मन्दिर क पूरब क दिसा मँ खुले अँगना मँ ओनके संग बैठक मँ सामिल भवा। ⁵ हिजकिय्याह ओनसे कहेस, “मोर सुना, लेवीबंसियो। पवित्तर सेवा बरे अपने क तइयार करा। आपन आपका अउर यहोवा आपन पुरखन क परमेस्सर क मन्दिर क पवित्तर सेवा बरे तइयार करा। असुद्ध चिजियन क पवित्तर जगह स हटाइ द्या। ⁶ हम लोगन क पुरखन, यहोवाह हम लोगन क परमेस्स्स्सर क धोखा दिहन। उ पचे उ काम किहेन जेका उ बुरा समुझेन। उ पचे ओका छोड़ दिहेस अउर आपन मुँह यहोवा क मन्दिर क ओर स दूर फरि लिहस। उ पचे आपन पीठ ओकर कइँती कइ दिहस। ⁷ उ पचे मन्दिर क सुआगत कच्छ क दरवाजे क बन्द कइ दिहन अउर दीपकन क बुझाइ दिहन। उ पचे सुगन्धि क बारब अउर इस्राएल क परमेस्सर क पवित्तर ठउर मँ होमबलि भेंट करब बन्द कइ दिहन। ⁸ एह बरे, यहोवा यहूदा अउ यरूसलेम क लोगन पइ बहोत किरोधित भवा। यहोवा ओन लोगन क भयभीत अउर चकित दण्ड दिहस। तू अपनी आँखिन स एका लखि सकत ह। ⁹ इहइ कारण अहइ कि हमार पुरखन जुद्ध मँ मारे गएन। हमरे पूत, बिटियन अउर मेहररुअन बन्दी बनाई गइन। ¹⁰ एह बरे मइँ हिजकिय्याह इ निहचइ किहेउँ ह कि मइँ यहोवा, इस्राएल क परमेस्सर क संग एक वाचा करउँ। तब उ हम लोगन पइ आगे किरोधित नाहीं होब। ¹¹ एह बरे मोर पूतन तू लोग सुस्त जिन ह्वा या अउर जियादा समइ नस्ट न करा। यहोवा तू लोगन क अपनी सेवा करे चुनेस ह। तू पचन्क ओकर सेवा करइ चाही अउर ओकरे बरे सुगन्धि बारइ चाही।”

^12-14 ओन लेवीबंसियन क इ सूची अहइ जउन हुवाँ रहेन अउर जउन कार्य सुरू किहन।

¹⁵ तब एन लेवीबंसियन अपने भाइयन क एकट्ठा किहन अउर मन्दिर मँ पवित्तर सेवा बरे अपने क तइयार किहस। उ पचे राजा क ओन आदेसन क पालन किहन जउन यहोवा क लगे स आए रहेन। उ पचे यहोवा क मन्दिर मँ ओका स्वच्छ करइ गएन। ¹⁶ याजक यहोवा क मन्दिर क भीतरी भाग मँ ओका स्वच्छ करइ गएन। उ पचे सभी असुद्ध चिजियन क बाहेर निकारेन जेनका उ पचे मन्दिर मँ पाएन। उ पचे असुद्ध चिजियन क यहोवा क मन्दिर क आँगन मँ लइ आएन। तब लेवीबंसी असुद्ध चिजियन क यहोवा क मन्दिर क अंगना मँ लइ आएन। तब लेवीबंसी असुद्ध चिजियन क किद्रोन क घाटी मँ लइ गएन। ¹⁷ पहिले महीने क पहिले दिन लेवीबंसी अपने आपका पवित्तर करइ सुरू कइ दिहन। महीने क अठएँ दिन लेवीबंसी यहोवा क मन्दिर क दुआर मण्डप मँ आएन। आठ दिन अउर, उ पचे यहोवा क मन्दिर क पवित्तर करइ क कार्य जारी रखेन। उ पचे पहिले महीने क सोलहवें दिन इ काम पूरा किहन।

¹⁸ तब उ पचे राजा हिजकिय्याह क लगे वापिस गएन। उ पचे ओहसे कहेन, “राजा हिजकिय्याह, हम लोग यहोवा क पूरे मन्दिर क साथ ही होमबलि चढ़ावइ बरे वेदी क भी ओकर सबइ बरतन क संग सुद्ध कइ दिहेन। हम लोग पवित्तर रोटी प्रदर्सित करइवाले मेज अउ ओकरे बरे उपयोग मँ आवइवाली सबहिं चिजियन क स्वच्छ कइ दिहन। ¹⁹ ओन दिनन जब आहाज राजा रही उ परमेस्सर क बरे विरोध किहस। उ बहोत स चिजियन हटाइ दिहे रहेन जउन मन्दिरे मँ रहिन। मुला हम लोग फुन ओन चिजियन क रख दिहा ह अउर ओनका पवित्तर कार्य बरे सुद्ध कइ दिहा ह। उ पचे अब यहोवा क वेदी क समन्वा अहइँ।”

²⁰ राजा हिजकिय्याह नगर अधिकारियन क एकट्ठा किहेस अउर अगले भिंसारे उ यहोवा क मन्दिर गवा। ²¹ उ सबइ सात ठु बर्धा, सात ठु भेड़न, सात ठु मेमनन अउ सात ठु नान्ह बोकरन लिआएन। उ सबइ जनावर यहूदा क राज्ज क पापबलि बरे पवित्तर जगह अउ यहूदा क लोगन बरे रहेन। राजा हिजकिय्याह याजकन क जउन हारून क संतान रहेन, आदेस दिहस कि उ पचे ओन जनावरन क यहोवा क वेदी पइ चढ़ावइँ। ²² एह बरे याजक लोग बर्धन क मार डाएन अउर ओनकर रक्त धइ लिहन। तब उ पचे बर्धन क रकत वेदी पइ छिछकारेन। तब याजक लोग भेड़न क मारेन अउर वेदी पइ भेड़न क रक्त छिछकारेन। तब याजक लोग मेमनन क मारेन अउर ओनकर रक्त वेदी पइ छिछकारेन। ^23-24 तब याजक लोग बोकरन क राजा अउर एक संग एकट्ठे लोगन क समन्वा लिआएन। बोकरन पापबलि रहेन। याजक लोग अपने हाथे बोकरन पइ धरेन अउर ओनका मारेन। याजक लोग बोकरन क रकत स वेदी पइ पापबलि चढ़ाएन। उ पचे इ एह बरे किहन कि यहोवा इस्राएल क लोगन क छिमा कइ देइ। राजा कहेस कि होमबलि अउ पापबलि इस्राएल क सबहिं लोगन क बरे होइहीं।

²⁵ राजा हिजकिय्याह लेवीबंसियन क यहोवा क मन्दिर मँ मंजीरन, तम्बूरन अउ वीणा क संग रखेन जइसा दाऊद, राजा क द्रस्टा गाद अउर नातान नबी आदेस दिहे रहा। इ आदेस यहवो क हिआँ स ओकर नबियन क जरिये स आवा रहा। ²⁶ इ रतह लेवीबंसी, दाऊद क गीत क बाजन क संग, अउर याजक अपनी तुरहियन क संग खड़े भएन। ²⁷ तब हिजकिय्याह होमबलि क बलि वेदी पइ चढ़ावइ क बरे आदेस दिहस। जब होमबलि देब सुरू भवा, यहोवा बरे गायन भी सुरू भवा। तुरहियन बजाई गइन अउर इस्राएल क राजा दाऊद क वाद्ययंत्र बजेन। ²⁸ सारी सभा दण्डवत किहस, गायकन गाएन अउर तुरही वादकन अपनी तुरहियन तब तलक बजाएन जब तलक होमबलि क चढ़ावा जाब पूरा नाहीं भवा।

²⁹ बलिदानन क पूरे होइ क पाछे राजा हिजकिय्याह अउर ओकरे संग क सबहिं लोग निहुरेन अउर उ पचे उपासना किहन। ³⁰ राजा हिजकिय्याह अउर ओकर अधिकारि लोग लेवीबंसियन क यहोवा क स्तुति क आदेस दिहन। उ पचे ओन गीतन क गाएन जेनका दाऊद अउर द्रस्टा आसाप लिखे रहा। उ पचे यहोवा क स्तुति किहन अउर प्रसन्न भएन। उ पचे सबहिं निहुरेन अउर उ पचे यहोवा क उपासना किहस। ³¹ हिजकिय्याह कहेस, “यहूदा क लोगो, अब तू लोग खुद क यहोवा क अर्पित कइ चुका अहा। निचके आवा, बलि अउ धन्यवाद क भेंट यहोवा क मन्दिर मँ लिआवा।” तब लोग बलि अउ धन्यवाद क भेंट लिआएन। कउनो मनई, जउन चाहत रहा, उ होमबलि भी लिआवा। ³² सभा क जरिये मन्दिर मँ लाइ गइ होमबलियन क संख्या इ रहा: सत्तर बर्धा, सौ भेड़न अउर दुई सौ मेमनन। इ सबइ सबहिं जनावर यहोवा क होमबलि क रुप मँ बलि कीन्ह गएन। ³³ यहोवा क बरे पवित्तर भेटंन छ: सौ बर्धन अउर तीन हजार भेड़ी बोकरन रहेन। ³⁴ मुला हुवाँ होमबलि बरे चढ़ावा गवा जनावरन क खाल उतारइ अउर ओका काटइ बरे प्रयाप्त याजकन नाहीं रहेन। एह बरे ओनकर सम्बन्धी लेवीबंसियन ओनकर मदद तब तलक किहन जब तलक काम पूरा न भवा अउर जब तलक दूसर याजक अपने क पवित्तर फउज क बरे तइयार न कइ सकेन। लेवीबंसी यहोवा क सेवा बरे अपने क तइयार करइ मँ जियादा याजकन क अपेच्छा जियादा लगनसील रहेन। ³⁵ हुवाँ अनेक होमबलि, मेलबलि क चबीर् अउ पेय भेंट चढ़िन। इ तरह यहोवा क मन्दिर मँ सेवा फुन सुरु भइ। ³⁶ हिजकिय्याह अउर सबहिं लोग ओन चिजियन क बरे खुस रहेन जेनका यहोवा अपने लोगन क बरे बनाएस अउर उ सबइ खुस रहेन कि उ पचे ओनका ऍतनी हाली स किहन।

हिजकिय्याह फसह पर्व मनावत ह

30 हिजकिय्याह इस्राएल अउ यहूदा क सबहिं लोगन क सँदेसा पठएस। उ एप्रैम अउ मनस्से क लोगन क भी पत्तर लिखेस। हिजकिय्याह ओन सबहिं लोगन क यरूसलेम मँ यहोवा क मन्दिर मँ आवइ बरे न्यौतेस जेहसे उ सबइ सबहिं फसहपर्व यहोवा, इस्राएल क परमेस्सर बरे मनाइ सकइँ। ² हिजकिय्याह आपन सबहिं अधिकारियन अउ यरूसलेम क सभा क संग फसह पर्व दूसरे महीने मँ मनावइ बरे राज़ी होइ गएन। ³ उ सबइ फसह पर्व क नियमित समइ स न मनाइ सकइँ। काहे काहेकि प्रायाप्त संख्याँ मँ याजक पवित्तर सेवा बरे अपने आप क तइयार नाहीं किहे रहा अउर दूसर कारण इ रहा कि लोग यरूसलेम मँ एकट्ठे न होइ सके रहेन। ⁴ इ सुझाव राजा हिजकिय्याह अउर पूरी सभा क सन्तुट्ठ किहस। ⁵ एह बरे उ पचे इस्राएल मँ बेर्सेबा नगर स लइके लगातार दान तलक हर एक जगह पइ घोसणा किहन। उ पचे लोगन स कहेन कि उ पचे यरूसलेम मँ यहोवा, इस्राएल क परमेस्सर बरे फसह पर्व मनावइ आवइँ। इस्राएल क बहोत बड़का समूह बहोत समइ स फसह पर्व उ तहर नाहीं मनाए रहा, जउने तरह मूसा क नेमन एका मनावइ क कहे रहेन। ⁶ एह बरे दूत राजा क पत्तर पूरे इस्राएल अउर यहूदा मँ लइ गएन। ओन पत्रन मँ इ लिखा रहा:

“इस्राएल क सन्तानों, इब्राहीम, इसहाक अउर इस्राएल, जउन यहोवा, परमेस्सर क आग्या मानत रहेन ओकरे निअरे लोउटा। तब यहोवा तू लोगन क लगे वापस आइ जउन अस्सूर क राजा लोगन स बच गएन ह अउर अबहिं तलक जिअत अहइँ। ⁷ अपने पुरखन अउर भाइयन क तरह न बना। यहोवा ओनका परमेस्सर रहा, मुला उ पचे ओका धोखा दिहेन। ऍह बरे उ ओन लोगन क बर्बाद होइ दिहस। तू खुद अपनी आँखी स इ लखि सकत ह। ⁸ अपने पुरखन क तरह हठी जिन बना। अपितु सच्चे हिरदइ स यहोवा क आग्या माना। सब स जियादा पवित्तर जगह पइ आवा। यहोवा सब स जियादा पवित्तर जगह क सदा ही क बरे पवित्तर बनाएस ह। अपने यहोवा, परमेस्सर क सेवा करा। तब यहोवा क डरावना किरोध तोह पइ स हट जाइ। ⁹ जदि तू यहोवा क लगे लउटब्या अउर ओकरे आग्या मनब्या तब तोहार सम्बन्धी, भाइयन अउर बच्चन ओन लोगन क दाया पइहीं जउन ओनका बन्दी बनाएन ह अउर तोहार सम्बन्धी अउर बच्चन इ देस मँ लउटिहीं। यहोवा, तोहार परमेस्सर कृपालु अउ दयालु अहइ। जदि तू ओकरे लगे लउटब्या तउ उ तोहसे नाहीं मुरब्या।”

¹⁰ दूत एप्रैम अउ मनस्से क पहँटन क सबहिं नगरन मँ गएन। उ पचे लगातार पूरे जबूलून देस मँ गएन। किन्तु लोग दूतन क हँसी उड़ाएन अउर ओनकर मजाक उड़ाएन। ¹¹ मुला आसेर, मनस्से अउ जबूलून देस क कछू लोग आपन क बिनम्र बनाएन अउर यरूसलेम गएन। ¹² यहूदा मँ परमेस्सर क सक्ती लोगन क संगठित किहस ताकि उ पचे राजा हिजकिय्याह अउ ओकरे अधिकारियन क आग्या क पालन कइ सकत हीं। इ तरह उ पचे यहोवा क आग्या क पालन किहन।

¹³ बहोत स लोग एक संग यरूसलेम, दूसरे महीने मँ अखमोरी रोटी क उत्सव मनावइ आएन। इ बहोत बड़ी भीड़ रही। ¹⁴ ओन लोग यरूसलेम स लबार देवतन क वेदियन क हटाइ दिहन। उ पचे लबार देवतन क बरे सुगन्धि भेंट क वेदियन क भी हटाइ दिहन। उ पचे ओन वेदियन क किद्रोन क घाटी मँ लोकाइ दिहन। ¹⁵ तब उ पचे फसह पर्व क मेमने क दूसर महीने क चौदहवें दिन मारेन। याजक अउ लेवीबंसी लज्जित भएन। ऍह बरे उ पचे अपने क पवित्तर सेवा बरे तइयार किहन। याजक अउर लेवीबंसी होमबलि यहोवा क मन्दिर मँ लइ आएन। ¹⁶ मन्दिर मँ अपने बरे मुकर्रर जगह पइ उ पचे वइसे ही बइठेन जइसा परमेस्सर क मनई मूसा क नेम मँ कहा गवा रहा। लेवीबंसी लोग याजकन क रक्त दिहन। तब याजक लोग रक्त क वेदी पइ छिछकारेन। ¹⁷ उ समूह मँ बहोत स लोग अइसे रहेन जउन अपने क पवित्तर सेवा क बरे तइयार नाहीं किहे रहेन एह बरे उ पचे फसह पर्व क मेमने क मारइ क मँजूरी नाहीं पाइ सकेन। इहइ कारण रहा कि लेवीबंसी ओन सबहिं लोगन क बरे फसह पर्व क मेमने क मारइ क जिम्मेदार रहेन जउन सुद्ध नाहीं रहेन। लेवीबंसी हर एक मेमना क यहोवा क बरे पवित्तर बनाएन।

¹⁸ एप्रैम, मनस्से, इस्साकार अउर जबूलून क बहोत स लोग फसह पर्व उत्सव क बरे अपने क ठीक तरह स तइयार नाहीं किहे रहा। उ पचे फसह पर्व क मेमनन क खाएन जब कि उ पचे मूसा क नेम क अनुसार असुद्ध रहेन। मुला हिजकिय्याह ओन लोगन बरे पराथना किहस। एह बरे हिजकिय्याह इ पराथना किहस, “यहोवा, तू अच्छा अहा। ¹⁹ इ सबइ लोग तू यहोवा हम लोगन क पुरखन क परमेस्सर क सेवा करइ बरे आपन पूरे दिल स तइयार रहेन। किन्तु उ पचे अपने क पवित्तर सेवा मँ भाग लेइ बरे नेम क अनुसार सुद्ध न कइ सकेन। ऍह बरे कृपा कइके ओन लोगन बरे प्रायस्चित करा।” ²⁰ यहोवा राजा हिजकिय्याह क पराथना सुनेस। यहोवा लोगन क छिमा कइ दिहस। ²¹ इस्राएल क संतानन यरूसलेम मँ अखमीरी रोटी क उत्सव सात दिन तलक मनाएन। उ पचे बहोत खुस रहेन। लेवीबंसी अउ याजक लोग अपनी पूरी सक्ती स हर एक दिन यहोवा क स्तुति किहन। ²² राजा हिजकिय्याह ओन सबहिं लेवीबंसियन क उत्साहित किहस जउन अच्छी तरह समुझ गए रहेन कि यहोवा क सेवा कइसे कीन्ह जात ह। लोग सात दिन तलक पर्व मनाएन अउर मेलबलि च़ढ़ाएन। उ पचे अपने पुरखन क यहोवा परमेस्सर क धन्यवाद दिहन अउर ओकर स्तुति किहन।

²³ सबहिं लोग सात दिन अउर ठहरइ क सहमत होइ गएन। एह बरे उ पचे सात अउर दिना तलक बहोत खुसी स फसह पर्व मनाएन। ²⁴ यहूदा क राजा हिजकिय्याह उ सभा क एक हजार बर्धन अउ सात हजार भेड़िन मारइ अउर खाइ क बरे दिहेस। प्रमुखन सभा क एक हजार बर्धन अउ दस हजार भेड़िन दिहन। बहोत स याजक लोग पवित्तर सेवा बरे अपने क तइयार किहन। ²⁵ यहूदा क पूरी सभा, याजक, लेवीबंसी, इस्राएल स आवइवाली पूरी सभा अउर उ सबइ यात्री जउन इस्राएल स आए रहेन अउ यहूदा पहोंच गए रहेन, सबहिं लोग बहोत जियादा खुस रहेन। ²⁶ इ तरह यरूसलेम मँ बहोत आनन्द रहा। इ पर्व क समान कउनो भी पर्व इस्राएल क राजा, दाऊद क पूत सुलैमान क समइ क बाद स नाहीं भवा रहा। ²⁷ याजक अउ लेवीबंसी खड़े भएन अउर यहोवा स लोगन क आसीर्वाद देइ क कहेन। परमेस्सर ओनकर सुनेस। ओनकर पराथना सरग मँ यहोवा क पवित्तर निवास तलक पहोंची।

राजा हिजकिय्याह सुधार करत ह

31 फसह पर्व क उत्सव पूरा भवा। इस्राएल क जउन लोग फसह पर्व क क बरे यरूसलेम मँ रहेन, उ पचे यहूदा क नगरन क चले गएन। तब उ पचे पाथर क ओन मूरतियन क नेस्तनाबूत किहन जउन ओन नगरन मँ रहिन। ओन पाथर क मूरतियन क पूजन लबार देवतन क रुप मँ होत रहा। ओन लोग असेरा क खम्भन क भी काट डाएन अउर उ पचे ओन ऊँची जगहियन अउर वेदियन क भी तोर डाएन जउन बिन्यामीन अउर यहूदा क पूरे देसन मँ रहेन। लोग एप्रैम अउर मनस्से क छेत्र मँ उहइ किहन। लोग इ तब किहन जब उ पचे लबार देवतन क पूजा क सबहिं चिजियन क नस्ट नाहीं किहन। तब सबहिं इस्राएली अपने नगरन क घर लउट आएन।

² राजा हिजकिय्याह फुन याजकन अउ लेवीबंसियन क समूहन मँ बाँटेस अउर हर एक समूह क आपना बिसेस कार्य करब होत रहा। एह बरे राजा हिजकिय्याह ओन समूहन क आपन कार्य फुन स करइ क कहेस। एह बरे याजकन अउ लेवीबंसियन क फुन स होमबलि अउ मेलबलि चढ़ावइ क काम रहा। ओन क काम मन्दिर मँ सेवा करब, गाना अउ यहोवा क भवन क दुआर पइ परमेस्सर क स्तुति करब रहा। ³ हिजकिय्याह अपने गोरुअन मँ स कछू क होमबलि बरे दिहस। इ सबइ गोरु हर रोज भिंसारे अउ साँझ क होमबलि बरे प्रयोग मँ आवत रहेन। इ सबइ गोरु सबित क दिनन मँ अउर नवचन्द्र क समइ अउर दूसर बिसेस उत्सवन पइ दीन्ह जात रहिन। इ वइसे ही कीन्ह जात रहा जइसा यहोवा क ब्यवस्था मँ लिखा अहइ।

⁴ हिजकिय्याह यरूसलेम मँ रहइवाले लोगन क आदेस दिहस कि आपन अनाज क हींसा याजकन अउ लेवीबंसियन क देइँ। तबहिं याजक अउ लेवीबंसी आपन क यहोवा क नेम क अनुसार सेवा बरे देइ चाही रही। ⁵ देस क चारिहुँ कइँती क लोग इ आदेस क बारे मँ सुनेन। एह बरे इस्राएल क लोग अपने कटा भवा अन्न, अंगूर, तेल, सहद अउ जउन कछू भी उ पचे अपने खेतन मँ उगावत रहेन ओन सबहिं फसलन क पहिला हींसा दिहेस। उ पचे स्वेच्छा स एन सबहिं चिजियन क दसवाँ हींसा लिआएन। ⁶ इस्राएल अउ यहूदा क लोग जउन यहूदा क नगरन मँ रहत रहेन अपने गोरुअन अउ भेड़िन क दसवाँ हींसा भी लिआएन। उ पचे ओन चिजियन क दसवाँ हींसा भी लिआएन जेका अलगाइ दीन्ह ग रहेन अउर यहोवा ओनका परमेस्सर क अर्पित कीन्ह ग रहेन। उ पचे ओन सबहिं चिजियन क अपने यहोवा, परमेस्सर क बरे लइके आएन। उ पचे ओन सबहिं चिजियन क ढेरन मँ धरेन।

⁷ लोग तीसरे महीने मँ अपनी चिजियन क संग्रह क लिआउब सुरु किहन अउर उ पचे संग्रह क लिआउब सातवे महीने पूरा किहन। ⁸ जब हिजकिय्याह अउ प्रमुख लोग आएन तउ उ पचे संग्रह कीन्ह गइ चिजियन क ढेरन क लखेन। उ पचे यहोवा क स्तुति किहन अउर इस्राएल क लोगन अर्थात यहोवा क लोगन क बड़कई किहन।

⁹ तब हिजकिय्याह याजकन अउ लेवीबंसियन क ढेरन क सम्बंध मँ पूछेस। ¹⁰ सादोक परिवार क मुख्य याजक अजर्याह हिजकिय्याह स कहेस, “उ समइ स जब स लोग भेंटन क यहोवा क मन्दिर मँ लिआउब सुरू कइ दिहेन ह एह बरे हम लोगन क लगे खाइ बरे बहोत जियादा अहइ। हम लोग भर पेट खाए अउर अबहिं तलक हम लोगन क लगे बहोत बचा ह। यहोवा अपने लोगन क सच मँ आसीस दिहेस ह। एह बरे हम लोगन क लगे इ सब बचा ह।”

¹¹ तब हिजकिय्याह याजकन क आदेस दिहस कि उ पचे यहोवा क मन्दिर मँ भण्डार घर तइयार रखइँ। एह बरे इ कीन्ह गवा। ¹² तब याजक लोग उपहार, भेंटन क दसमांस अउर दूसर चिजियन लिआएन जउन सिरिफ यहोवा क दीन्ह जाब रहिन। उ पचे सबहिं संग्रह कीन्ह गइ चिजियन मन्दिर क भण्डार घरन मँ रख दीन्ह गइन। लेवीबंसि कोनन्याह सबहिं संग्रह कीन्ह गइ चिजियन क अधीच्छक रहा। कोनन्याह क भाई सिमी ओन चिजियन क उपाधीच्छक रहा। ¹³ कोनन्याह अउ ओकर भाई एन मनइयन क निरीच्छक रहेन: अहीएल, अजज्याह, नहत, असाहेल, यरीमेत, योजाबाद, एलीएल, यिस्मक्याह, महत अउर बनायाह। राजा हिजकिय्याह अउ यहोवा क मन्दिर क अधीच्छक अधिकारी अजर्याह ओन मनइयन क चुनेस।

¹⁴ यिम्ना लेवी क पूत कोरे ओन भेंटन क अधीच्छक रहा जेनका लोग स्वेच्छा स चढ़ावत रहेन। उ ओन चिजियन क उत्तरदायी रहा जउन यहोवा क दीन्ह जात रहेन अउ उ ओन उपहारन क बाँटइ क जिम्मेदार रहा जउन यहोवा बरे पवित्तर बनाई जात रहिन। कोरे पूवीर् दुआर क दुआरपाल रहा। ¹⁵ एदेन, मिन्यामीन, येसू समायाह, अमर्याह अउ सकन्याह कोरे क मदद करत रहेन। उ सबइ लोग ईमानदारी स ओन नगरन मँ सेवा करत रहेन जहाँ याजक रहेत रहेन। उ पचे बहोत महत्त्वपूर्ण अउर कम महत्त्वपूर्ण दुइनँउ याजकन क समान मात्रा मँ चिजियन दिहेन।

¹⁶ इ सबइ लोग संग्रह कीन्ह भइ चिजियन क तीन बरिस अउ ओहसे जियादा उमिर क लरिकन अउर मनइयन क भी देत रहेन जेनकर नाउँ लेविबंस क इतिहास मँ लिखा भवा रहेन। एन सबहिं मनइयन यहोवा क मन्दिर मँ आपन हर दिन क सेवा अउर दूसर काम जेकर उ जिम्मेदार रहेन, बरे जाइ क रहेन। हरेक समूह क आपन नेतिक जिम्मेदारी रहेन। ¹⁷ याजकन क संग्रह कीन्ह भवा चिजियन स ओनकर हींसा दीन्ह जात रहेन। परिवारिक आधार पइ, परिवार क इतिहास मँ लिखित सूची अनुसार इ कीन्ह गए रहेन। बीस बरिस या ओहसे अधिक उमिर क लेवीबंसियन क संग्रह क ओनकर हींसा दीन्ह जात रहा। इ ओनकर जिम्मेदारी अउ वर्ग क अनुसार कीन्ह जात रहा। ¹⁸ लेवीबंसियन क बच्चन, मेहररुअन, पूत अउ बिटियन भी संग्रह चिजियन क आपन हींसा पावत रहेन। इ ओन सबहिं लेवीबंसियन क बरे कीन्ह जात रहा जउन परिवार क इतिहासन मँ अंकित रहेन। इ लेवीबंसियन बरे कीन्ह ग रहेन ताकि उ पचे आपन आप क बिस्सास क संग पवित्तर राखेन अउर सेवा करइ बरे तइयार रहेन।

¹⁹ याजक हारून क कछू संतानन क लगे कछू खेती जोग्ग नगर क लगे हुवाँ रहेन जहाँ लेवीबंसी रहत रहेन अउर हारून क संतानन मँ स कछू नगरन मँ भी रहत रहेन। ओन नगरन मँ स हर एक मँ हारून क एन संतानन क संग्रह चिजियन क हींसा देइ बरे मनई नामांकन क जरिये चुने जात रहेन। मनसेधू अउर उ सबइ सबहिं जेनकर नाउँ लेवीबंस क इतिहास मँ रहा सबहिं संग्रह चिजियन क हींसा पानत रहेन।

²⁰ इ तरह राजा हिजकिय्याह पूरे यहूदा मँ उ सबइ सब चिजियन क किहन। उ उहइ किहस जउन यहोवा, ओकरे परमेस्सर क दृस्टि मँ अच्छा, ठीक अउर बिस्सास जोग्ग रहा। ²¹ उ जउन भी कार्य परमेस्सर क मन्दिर क सेवा मँ, नेमन व सबइ आग्या क पालन करइ मँ अउर अपने परमेस्सर क अनुसरण करइ मँ किहेस ओहमाँ ओक कामयाबी मिली। हिजकिय्याह इ सबइ सबहिं कार्य अपने पूरे हिरदइ स किहस।

एक ठु भजन: कोरह परिवार क एक ठु पद।