Book of Common Prayer

Совети за духовните пастири и за младите луѓе

5 Сакам да ги охрабрам црковните старешини. И јас сум старешина, сведок на страдањето на Христос и знам дека кога повторно ќе дојде и мене ќе ме огрее Неговата слава. ² Затоа ве молам, како што овчарот се грижи за своето стадо, така и вие да се грижите за оние што ви се од Бога доверени. Правете го тоа од се срце, а не безволно. Грижете се за нив ревносно, заради Бог, а не од желба за печалба. ³ Не господарете над луѓето што ви се доверени, туку бидете му пример на стадото. ⁴ А кога ќе дојде Христос, Врховниот Пастир, вие ќе добиете венец што никогаш не свенува - божествена слава^[a].

⁵ Вие што сте помлади, слушајте ги старешините. Всушност, сите треба понизно да си помагате еден на друг, зашто:

„Бог на горделивите им се противставува,

а спрема понизните е благонаклонет^[b].“

⁶ Бидете понизни пред Божјата моќна рака, за Бог да ве воздигне кога за тоа ќе дојде време. ⁷ Се што ве вознемирува препуштете Му го Нему. Тој се грижи за вас.

⁸ Бидете трезвени и постојано на штрек! Внимавајте! Вашиот непријател, Ѓаволот, како разјарен лав обиколува и си бара жртва за растргнување. ⁹ Спротивете му се, без да се колебате во верата. Вие знаете дека христијаните во целиот свет минуваат низ истите страдања! ¹⁰ Во Својата љубезност, Бог ве повика, преку Исус Христос, да бидете дел од Неговата вечна слава. Откако кратко време ќе истрпите, Тој ќе ве усоврши, ќе ве поткрепи, ќе ве направи цврсти и непоколебливи. ¹¹ Тој владее над се, сега и за вечни времиња. Амин.

За лажните пророци

(Лк.6:43-45) ¹⁵ „Чувајте се од лажни пророци; тие доаѓаат кај вас во овча кожа, но однатре се грабливи волци. ¹⁶ По нивните плодови ќе ги распознаете: трнот сигурно не раѓа грозје, ниту пак чичката раѓа смокви! ¹⁷ Секое питомо дрво раѓа питоми плодови, а секое диво дрво раѓа диви плодови. ¹⁸ Од питомото дрво не може да произлезе див плод, ниту пак од дивото дрво може да произлезе питом плод. ¹⁹ А дрвјата кои не раѓаат питоми плодови се сечат и се горат! ²⁰ Така, значи, по нивните плодови ќе ги распознаете.“

Вистински и лажни верници

(Лк. 6:47-49; 13:25-27) ²¹ „Во небесното царство нема да влезе секој човек што ми се обраќа со ,Господе, Господе‘, туку само оние кои го извршуваат она што од нив го бара Мојот небесен Татко. ²² Кога ќе дојде Судниот ден, мнозина ќе ми велат: ,Господе, Господе! Ние во Твое име пророкувавме, во Твое име демони протерувавме и во Твое име чуда правевме!‘ ²³ Тогаш Јас ќе им речам: ,Никогаш не Сум ве познавал! Тргнете се од Мене вие кои ги кршевте Божјите закони!‘“

²⁴ „Секој што ги слуша Моите зборови и ги извршува е мудар и може да се спореди со човек, кој си гради куќа врз камена подлога; ²⁵ кога ќе заврнат поројни дождови, ќе надојдат реките, или силен виор ќе ја погоди куќата, таа нема да се урне, бидејќи е изградена врз камена подлога.

²⁶ А секој што ги слуша Моите зборови, а не ги извршува е глупав и може да се спореди со човек, кој си гради куќа врз песок; ²⁷ кога ќе заврнат поројни дождови, ќе надојдат реките, или силен виор ќе ја погоди куќата, таа ќе се урне со стравотен тресок!“

²⁸ Кога Исус го заврши својот говор, народот беше восхитен од начинот на кој Тој го поучуваше, ²⁹ зашто, за разлика од вероучителите^[a], Тој го поучуваше со вистински авторитет.