Book of Common Prayer

Петар им се обраќа на насобраните

¹⁴ Тогаш стана Петар, заедно со другите единаесет апостоли, и гласно им се обрати на насобраните: „Луѓе, Евреи и сите други што живеете во Ерусалим! Ова треба да го знаете! Послушајте ме што ќе ви кажам:

²² Израелци, слушнете ги овие зборови: Бог јавно го поддржа Исуса од Назарет, со тоа што преку Него изврши многу чуда, несекојдневни работи и чудотворни докази. Тоа и самите добро го знаете. ²³ Но се случи онака како што беше определено и предвидено од сезнајниот Бог: вие Го предадовте Исуса и со помош на еден паганин^[a], Го распнавте на крст и Го убивте. ²⁴ Но Бог Го воскресна, ослободувајќи Го од смртта која очајнички настојуваше да Го задржи, но не можеше. ²⁵ За Него, Давид вели:

‚Знам дека Господ е постојано со мене,

Тој ми е оддесно -

нема да потклекнам!

²⁶ Поради тоа срцето ми е весело,

и душата ми се радува;

а и телото во надеж ќе ми почива,

²⁷ зашто Ти во гробот нема да ме оставиш,

ниту ќе дозволиш

Твојот Светец да доживее распаѓање.

²⁸ Ти ми го објави патот на животот,

Твоето присуство ќе ме исполни^[b] со радост.‘

²⁹ Луѓе, браќа, јасно е дека нашиот прататко Давид овде не зборува за себе, зашто тој умре, беше погребан и неговиот гроб е тука, меѓу нас, се до денешен ден. ³⁰ Но бидејќи беше пророк и знаеше дека Бог му се беше заколнал оти потомок од неговите бедра ќе седи на неговиот престол, ³¹ претскажувајќи за тоа, тој зборуваше за воскреснувањето на Христос^[c], Кој, ниту беше оставен во гробот, ниту Неговото тело доживеа распаѓање.

³² Бог Го воскресна Исуса и сите ние сме сведоци за тоа.

Исус

- патот кон Бог 14 „Не вознемирувајте се! Верувајте^[a] во Бог! Верувајте и во Мене! ² Во домот на Мојот небесен Татко има многу живеалишта. Ако не беше така, зар ќе ви речев дека одам да приготвам место за вас? ³ Откако ќе отидам и ќе ви приготвам место, повторно ќе се вратам и ќе ве земам кај Себе, за да бидете и вие таму каде што сум Јас. ⁴ Вие го знаете патот до местото каде што заминувам.“

⁵ Тома Му рече: „Господе, ние не знаеме ни каде заминуваш! Како, тогаш, можеме да го знаеме патот!?“

⁶ Исус му одговори: „Јас сум Патот, Вистината и Животот. Без Мене, никој не може да дојде кај небесниот Татко. ⁷ Ако Ме познавате^[b] Мене, Го познавате и Мојот Татко. Отсега Го знаете и сте Го виделе.“

⁸ Филип Му рече: „Господе, покажи ни Го небесниот Татко и тоа ќе ни биде доволно!“ ⁹ Исус му одговори: „Филипе, долго време сум со вас. Зар не знаеш кој сум Јас!? Секој што Ме видел Мене, Го видел небесниот Татко. Како можеш да кажеш: ‚Покажи ни Го небесниот Татко‘? ¹⁰ Зарем не веруваш дека Јас сум во Таткото и дека Таткото е во Мене? Зборовите што ви ги зборувам Јас не ги зборувам од Себе, туку небесниот Татко, Кој живее во Мене, ги врши Своите дела. ¹¹ Верувајте Ми дека Јас сум во Таткото и Таткото е во Мене, или барем верувајте заради чудата. ¹² Ве уверувам дека секој што верува во Мене ќе ги прави истите дела што ги правам Јас, а и поголеми од Моите, зашто Јас заминувам кај небесниот Татко. ¹³ Секоја ваша молба упатете ја до Мене и Јас ќе ви ја исполнам. На тој начин Синот ќе Му донесе слава на небесниот Татко. ¹⁴ Јас ќе направам се што ќе побарате во Мое име.