M’Cheyne Bible Reading Plan

योसिय्याह फसह पर्व मनावत ह

35 यरूसलेम मँ राजा योसिय्याह यहोवा क बरे फसह पर्व मनाएस। पहिले महीने क चौदहवे दिन फसह पर्व क मेमना मारा गवा। ² योसिय्याह आपन-आपन कार्य करइ बरे याजकन क चुनेस। उ याजकन क उत्साहित किहस, जब उ पचे यहोवा क मन्दिर मँ सेवा करत रहेन। ³ योसिय्याह ओन लेवीबंसियन स बातन किहस जउन इस्राएल क लोगन क उपदेस देत रहेन अउ जउन यहोवा क बरे पवित्तर बनाए गए रहेन। उ ओन लेवीबंसियन स कहेस: “पवित्तर सन्दूख क उ मन्दिर मँ रखा जेका दाऊद क पूत, इस्राएल क राजा सुलैमान बनाए रहा। पवित्तर सन्दूख क अपने काँधे पइ फुन एक जगह स दूसरे जगह पइ जिन लइ जा। अब यहोवा आपन परमेस्सर क सेवा करा अउर परमेस्सर क लोग, इस्राएलियन क सेवा करा। ⁴ अपने क, अपने परिवार समूहन क अनुसार मन्दिर क सेवा बरे तइयार करा। ओन कार्यन क करा जेनका राजा दाऊद अउ ओकर पूत राजा सुलैमान तोहका करइ क निर्देस लिखित रूप मँ दिहे रहा। ⁵ हरेक परिवार समूहन, पवित्तर ठउर मँ लेविबंसियन क परिवार समूह क संग खड़ा भवा ताकि तू पचे आपन देस क बचा भवा लोगन क प्रस्तुत कइ सकब। ⁶ फसह पर्व क मेमनन क मारा अउर यहोवा क बरे अपने क पवित्तर करा। मेमनन क अपने भाई इस्राएलियन क बरे तइयार करा। सब कछू वइसे ही करा जइसा करइ क आदेस यहोवा मूसा क जरिये दिहे रहा।”

⁷ योसिय्याह इस्राएल क लोगन क तीस हजार भेड़ी-बोकरियन फसह पर्व क बलि बरे दिहस। उ लोगन क तीन हजार गोरु भी दिहस। इ सबइ सबहिं जनावर राजा योसिय्याह क अपने जनावरन मँ स रहेन। ⁸ योसिय्याह क अधिकारियन भी, स्वेच्छा स लोगन क, याजकन क अउर लेवीबंसियन क फसह पर्व मँ उपयोग करइ बरे जनावरन अउ चिजियन दिहन। प्रमुख याजक हिल्किय्याह, जकर्याह अउ यहीएल मन्दिर क उत्त्तरदायी अधिकारी रहेन। उ पचे याजकन क दुई हजार छ: सौ मेमनन अउ बोकरन अउ तीन सौ बर्धन फसह पर्व बलि क बरे दिहन। ⁹ कोनन्याह भी समायाह, नतनेल अउ ओकरे भाइयन क संग अउ हसब्याह, यीएल अउ योजाबाद पाँच सौ भेड़िन-बोकरियन, पाँच सौ बर्धन फसह पर्व बलि क बरे लेवीबंसियन क दिहन। उ सबइ लोग लेवीबंसियन क प्रमुख रहेन।

¹⁰ जब हर एक चीज फसह पर्व क सेवा सुरू करइ स पहिले तइयार होइ गइ, तउ याजक अउर लेवीबंसी लोग जगहन पइ गएन। इ उहइ भवा जउन राजा क आदेस रहा। ¹¹ फसह पर्व क मेमनन मारे गएन। तब लेवीबंसियन जनावारन क खाल उतारेन अउ याजकन क रक्त दिहन। याजक लोग रक्त क वेदी पइ छिछकारेन। ¹² तब उ पचे जनावरन क अलग-अलग परिवार अमूहन क होमबलि मँ उपयोग क बरे दिहस। इ एह बरे कीन्ह गवा कि होमबलि उ तरह दीन्ह जाइ सकइ जउने तरह मूसा क नेमन सिखाए रहेन। ¹³ लेवीबंसियन फसह पर्व क बलियन क आगी पइ इ तरह भूँजेन जइसा ओनका आदेस दीन्ह गवा रहा अउर उ पचे पवित्तर भेटन क हाँड़ी, डेग अउ कड़ाहियन मँ पकाएन। तब उ पचे लोगन क हाली स माँस दिहन। ¹⁴ जब इ पूरा भवा तब लेवीबंसियन क अपने बरे अउर ओन याजकन क बरे माँस मिला जउन हारून क संतान रहेन। ओन याजकन क काम करत करत भए अँधियारा होइ तलक काम मँ बहोत जियादा लगाए गवा रखा। उ पचे होमबलि अउर बलिदानन क चर्बी क बारत भए कड़ी मेहनत किहन। ¹⁵ आसाप क परिवार क लेवीबंसी गायक ओन जगहन पइ पहोंचेन जेनका राजा दाऊद ओनके खड़े होइ क बरे चुने रहा। उ पचे आसाप, हेमान अउर राजा क नबी यदूतून रहेन। हर एक दुआरे पइ दुआरपाल अपनी जगह नाहीं छोड़ सकत रहेन काहेकि ओनकर लेवीबंसी भाइयन हर एक चीज ओनके फसह पर्व क बरे तइयार कइ दिहे रहेन।

¹⁶ उ दिन सब कछू यहोवा क उपासना क बरे वइसा ही कीन्ह गवा रहा जइसा राजा योसिय्याह आदेस दिहेस। फसह पर्व क त्यौहार मनावा गवा अउर होमबलि यहोवा क वेदी पइ चढ़ाई गइ। ¹⁷ इस्राएल क जउन लोग हुवाँ रहेन उ पचे फसह पर्व मनाएन अउर अखमीरी रोटी क पर्व सात दिन तलक मनाएस। ¹⁸ समूएल नबी दिन स ही फसह पर्व इ तरह नाहीं मनावा गवा रहा। इस्राएल क कउनो राजा कबहुँ इ तरह फसह पर्व नाहीं मनाए रहेन। राजा योसिय्याह, याजक, लेवीबंसी अउर इस्राएल अउ यहूदा क लोग, यरूसलेम मँ सबहिं लोगन क संग, फसह पर्व क बहोत ही बिसेस रुप म मनावा। ¹⁹ इ फसह पर्व योसिय्याह क राज्जकाल क अट्ठारहवे बरिस मनावा गवा।

योसिय्याह क मउत

²⁰ योसिय्याह जब मन्दिर क ओन अच्छे कामन क कइ चुका, तउ उ समइ मिस्र क राजा नको जुद्ध करइ बरे आपन फउज क परात नदी क बगल मँ स्थित ककमीस नगर पइ लइके आवा। नको मिस्र क राजा रहा। राजा योसिय्याह नको क खिलाफ लड़इ बाहेर निकरा। ²¹ किन्तु नको योसिय्याह क लगे दूत पठएस।

उ पचे कहेन, “राजा योसिय्याह, इ जुद्ध तोहरे बरे समस्या नाहीं अहइ। मइँ तोहरे बिरुद्ध लड़इ नाहीं आवा हउँ। मइँ अपने दुस्मनन स लड़इ आवा हउँ। परमेस्सर ओका हाली करइ क कहेस ह। परमेस्सर मोरी कइँती बाटइ एह बरे मोका परेसान करा। जदि तू मोरे खिलाफ लड़ब्या, परमेस्सर तोहका नस्ट कइ देइ।”

²² मुला योसिय्याह हटा नाहीं। उ नको स जुद्ध करइ क निहचइ किहस, एह बरे उ आपन भेस बदलेस अउ जुद्ध करइ गवा। योसिय्याह ओका सुनइ स इन्कार कइ दिहस जउन नको परमेस्सर क आदेस क बारे मँ कहेस। योसिय्याह मगिद्दो क मइदान मँ जुद्ध करइ गवा। ²³ जउने समइ योसिय्याह जुद्ध मँ रहा, उ बाणन स बेध दीन्ह गवा। उ अपने सेवकन स कहेस, “मोका दूर लइ चला। मइँ बुरी तरह घायल हउँ।”

²⁴ एह बरे सेवकन योसिय्याह क रथे स बाहेर निकारेन, अउर ओका दूसरे रथ मँ बइठाएन जेका उ अपने संग जुद्ध मँ लिआवा रहा। तब उ पचे योसिय्याह क यरूसलेम लइ गएन। राजा योसिय्याह यरूसलेम मँ मरा। योसिय्याह क हुवाँ दफनावा गवा जहाँ ओकरे पुरखन दफनाए गए रहेन। यहूदा अउ यरूसलेम क सबहिं लोग योसिय्याह क मरइ पर बहोत दुःखी रहेन। ²⁵ यिर्मयाह योसिय्याह क बरे कछू बहोत जियादा करुण गीत लिखेस अउर गाएस। आग भी सबहिं मेहरारु-मनसेधू गाएक ओन करूण गीतन क गावत हीं। योसिय्याह क दुःखी क गीतन इस्राएलियन बरे रीति बन गवा। उ पचे गीत करूण गीतन क संग्रह मँ लिखे अहइँ।

^26-27 दूसर जउन कछू योसिय्याह अपने राज्जकाल मँ, हुकुमत क सरू स आखीर तलक किहस, उ यहूदा अउर इस्राएल क राजा लोगन क इतिहास नाउँ क किताबे मँ लिखा गवा अहइ। उ किताब यहोवा क बरे ओकर भक्ति अउर उ यहोवा क नेमन क पालन कइसे किहस, हम लोगन क बतावत ह।

नवा यरुसलेम

21 फिन मइँ एक नवा सरग अउर नवा धरती देखेउँ। काहे बरे पहिला सरग अउर पहली धरती खतम होइ ग रहेन। अउर कब क समुद्दर उ नाहीं रहा। ² मइँ यरुसलेम क उ पवित्तर नगरी नवा यरुसलेम क आकास क बाहर निकरिके परमेस्सर कइँती स नीचे उतरत देखेउँ। उ नगरी क अइसे सजावा ग रहा जइसे कउनो दुलहिन क ओकरे पति स मिलइ क बर सजावा ग होइ।

³ तबइ मइँ आकास मँ एक जोरदार आवाज़ सुनेउँ। उ कहत रही, “देखा अउर परमेस्सर क मन्दिर आदमियन क बीच मँ अहइ अउर उ ओनही क बीच मँ रही। उ पचे ओकर लोग रइहीं अउर परमेस्सर ओनकइ परमेस्सर होइहीं। अउ खुदइ परमेस्सर ओनकइ परमेस्सर होइहीं। ⁴ ओनकी आँख क एक-एक आँसू उ पोंछ ड़ाई। अउर हुवाँ अउर न तउ कबहुँ मउत होई न सोक इ बजह स केहू क रोवइ धोवइ क न पड़ी। काहे बरे कि उ सब पुरानी बात अब खतम होइ चुकी बाटिन।”

⁵ एकरे ऊपर जउन सिंहासन प बइठा रहा, उ बोला, “देखा मइँ सब कछू नवा कइ देत अहउँ।” उ फिन कहेस, “एका लिख ल्या काहे बरे कि इ वचन विसवास लायक अहइ अउर इ सच्चा अहइ।”

⁶ फिन उ मोसे बोला, “सब कछू पूरा होइ चुका अहइ। मइँ अलफा अहउँ अउर मइँ ओमेगा अहउँ। मइँ आदि अहउँ अउर मइँ अन्त अहउँ। जउन मनई जे पिआसा अहइ, मइँ ओका जीवन-जल क झरना स सेंत-मेत मँ खुले मन स जल पिआउब। ⁷ जउन विजयी होई, उ सब चीज क मालिक बनी। मइँ ओकर परमेस्सर होब अउर मोरे पूत होई, ⁸ मुला कायरन, अबिसवासियन, मूरखन, हत्यारन, व्यभिचारिय, जाद-टोना करइवालेन, मूरति क पूजा करइवालेन अउर झूठ बोलइवालन क भभकत गंधक क जलत झील मँ आपन हिस्सा बँटावइ क होई। इ दूसरी मउत बाटइ।”

⁹ फिन उ सात सरगदूतन मँ स एक, जेनके लगे सात आखिरी विनास क कटोरा रहेन्न, एक ठु आगे आवा अउर मोसे बोला, “हिआँ आवा! मइँ तोहका उ दुलहिन देखाइ देइ जउन मेमना क दुलहिन अहइ।” ¹⁰ अबहीं मइँ आतिमा क आवेस मँ रहे कि उ मोका एक बिसाल अउर ऊँचे पर्वत प लइ गवा। फिन उ मोका यरुसलेम क पवित्तर नगरी क दर्सन कराएस। उ परमेस्सर क तरफ स आकास स नीचे उतरत रहीं।

¹¹ उ परमेस्सर क महिमा स चमकत रही। उ बिल्कुल निर्मल यसब नामक महामूल्यावान रत्नन तरह चमकत रही। ¹² नगरी क चारिहुँ कइँती एक बड़ा क ऊँचा परकोटा रहा जेहमाँ बाहर दरवाजा रहेन। उ बारहउँ दरवाजन प बारह सरगदूत रहेन। अउर बारहउँ दरवाजा प इस्राएल क बारह कुलन क नाउँ छपा रहेन। ¹³ एहमाँ स तीन दरवाजन पूरब क तरफ रहेन, तीन दरवाजन उत्तर कइँती तीन दरावाजन दच्छिन कइँती अउर तीन दरवाजन पच्छिम कइँती रहेन। ¹⁴ नगर क परकोटा बारह नीव प बनावा ग रहा अउर ओनके ऊपर मेमना क बारह प्रेरितन क नाउँ छपा रहेन।

¹⁵ जउन सरगदूत मोसे बतियात रहा, ओकरे लगे सोना क बनी नापइ क एक छड़ी रही जउने स उ नगर क फाटक अउर परकोटा क नाप सकत रहा। ¹⁶ नगर क वर्गाकार बसावा ग रहा। इ जेतना लम्बा रहा, ओतना चौड़ाई रहा। उ सरगदूत उहइ छड़ी स नगर क नापेस। ओकर लम्बाई करीब बारह हजार स्टोडिया पाई गइ। ओकर लम्बाई, चौड़ाई अउर ऊँचाई एकई तरह रही। ¹⁷ सरगदूत फिन ओकरे परकोटा क नापेस। उ करीब 144 हाथ रहा। ओका मनई क हाथन क लम्बाई स नापा ग रहा जउन हाथ सरगदूतन क हाथ अहइ। ¹⁸ नगर क परकोटा यसब नाउँ क रत्नन क बना रहा अउर नगर क काँच क तरह चमकत सुद्ध सोना स बनावा ग रहा।

¹⁹ नगर क परकोटे क नींव हर तरह क बेसकीमती रत्नन स सुसज्जित रहिन। नींव क पहला पाथर यसाब क बना रहा, दूसरा नीलम स, तीसरा स्फटिक स, चउथा पन्ना स, ²⁰ पाँचवा गोमेद स छठा मानक स सातवाँ मणि स, आठवाँ पेरोज स, नवाँ पुखराज स, दसवाँ लहसनिया स, ग्यारहवाँ धूम्रकान्त स अउर बारहवाँ चन्द्रकान्ता मणि स बना रही। ²¹ बारहउँ दरवाजा, बारह मोतियन स बना रहेन, हर दरवाजा एक एक मोती स बना रहेन। नगर क गलियन साफ काँच जइसे सुद्ध सोने स बनी रहिन।

²² नगर मँ मइँ कउनो मन्दिर नाहीं देखाई पड़ा। काहे बरे कि सबसे सर्वसक्तिमान पर्भू परमेस्सर अउर मेमना ओकर मन्दिर मँ रहेन। ²³ उ नगर क कउनो सूरज या चाँद क जरुरत नाहीं रही जउन ओका रोसनी देइ काहे बरे कि उ परमेस्सर क महिमा स खुदइ प्रकासित रहा। अउर मेमना उ नगर क दिया बाटइ।

²⁴ सब जातियन क मनई इहइ दीपक क रोसनी क सहारे आगे बड़िहइँ। अउर इ धरती क राजा आपन सुन्दरता इ नगर मँ लइ अइहीं। ²⁵ दिन क समइ एकर दरवाजा कबहूँ बन्द न होइहीं अउ हुवाँ रात तउ कबहूँ होइ न करी। ²⁶ जातियन क वैभव अउर धन सम्पत्ति क उ नगर मँ लिआवा जाई। ²⁷ कउनो गन्दी चीज ओहमाँ घुसइ न पाई। अउर न तउ लज्जा भरा काम करइवालेन अउर झूठ बोलइवालेन ओहमाँ घुसइ न पाइही। ओहमाँ ओनहीं मनई घुसइ पाइहीं जउने क नाउँ मेमना जीवन क पुस्तक मँ लिख अहइ।

3 सर्वसक्तीमान यहोवा कहत ह, “लखा, मइँ आपन दूत पठवत हउँ। उ मोरे बरे मारग तइयार करी। यहोवा जेकरी खोज मँ तू पचे अहा, उ एकाएक आपन मंदिर मँ आइ। वाचा क सँदेसा लेवइया फुरइ आवत बा!

² “कउनो मनई उ समइ बरे तइयारी नाहीं कइ सकत। कउनो मनई ओकरे खिलाफ खड़ा नाहीं होइ सकत, जब उ आइ। उ बरत आगी क नाई होइ। उ बढ़िया रेह क तरह होइ जेका लोग चिजियन क स्वच्छ करइ उपयोग मँ बइपरत हीं। ³ उ लेवीबंस क संतानन क पवित्तर करी। उ ओनका अइसे सुद्ध करी जइसे आगी चाँदी क सुद्ध करत ह। उ ओनका सुद्ध सोना अउ चाँदी क समान बनाइ। तब उ पचे यहोवा क भेंट लइहीं अउर उ पचे ओन करमन क ठीक तरिके स करिहीं। ⁴ तब यहोवा यहूदा अउ यरूसलेम मँ भेंटन क अंगीकार करी। इ बीते काल क समान रही। इ पुरान लम्बा समइ क तरह होइ। ⁵ तब मइँ तोहरे लगे निआव बरे आउब। मइँ उ गवाह क तरह होब जउन लोगन क जरिये कीन्ह गए बुरे करमन क बारे मँ निआव क जज स कहत ह। कछू लोग बुरा जादू करत हीं। कछू लोग बिभिचार क पाप करत हीं। कछू लोग झूठी प्रतिग्यन करत हीं। कछू लोग आप मजदूरन क उगत हीं। उ पचे आपन वाचा क कीन्ह गइ रकम नाहीं देतेन। कछू लोग विधवा अउरत अउर अनाथन क मदद नाहीं करतेन। कछू लोग बिदेसियन क मदद नाहीं करतेन। कछू लोग मोसे नाहीं डरतेन अउर मोर सम्मान नाहीं करतेन।” सर्वसक्तीमान यहोवा इ सब कहेस।

परमेस्सर क हिआँ स चोरी

⁶ “मइँ यहोवा हउँ, अउर मइँ बदलत नाहीं। तू पचे याकूब क सन्तान अहा। सिरिफ मोर बिस्सासहीनता क कारण तू पचे पूरी तरह स नस्ट नाहीं कीन्ह जात्या। ⁷ मुला तू पचे मोरे नियमन क कबहुँ अनुपालन नाहीं किह्या। हिआँ तक कि तोहार सबन्क पुरखन मोर अनुसरण करब बंद कइ दिहन। मोरे लगे वापस लउटा अउर मइँ तोहरे पचन्क लगे वापस लउटब।” सर्वसक्तीमान यहोवा इ सब कहेस।

“तू पचे कहत अहा, ‘हम पचे वापिस कइसे लउटि सकित ह’

⁸ “परमेस्सर क लूटब बंद करा। लोगन्क परमेस्सर क चिजियन नाहीं चोरावइ चाही!

“‘मुला तू पचे मोर चिजियन चोराया?’

“तू पचन्क मोका आपन चिजियन क दसवाँ हींसा देइ चाही रहा। तू पचन्क मोका खास भेंट देइ चाही रही। मुला तू पचे उ सबइ चिजियन मोका नाहीं दिहा। ⁹ इ तरह तोहार पचन्क समूचा रास्ट्र मोर चिजियन क चोराएस ह। ऍहसे तू पचन्क समूचा रास्ट्र मोर चिजियन क चोराएस ह। ऍहसे बुरी सबइ घटना तू पचन्क संग घटति अहइँ।” सर्वसक्तीमान यहोवा इ सबइ कहत ह।

¹⁰ सर्वसक्तीमान यहोवा कहत ह, “इ परीच्छा क जाँचा। आपन चिजियन क दसवाँ हींसा मोका लिआवा। ओन चिजियन क खजाने मँ रखा। मोरे घरे खइया क लिआवा। एहका परखिके तउ लखा। तू पचे अगर ओन करमन क करब्या तउ मइँ, फुरइ ही, तू पचन्क आसीर्बाद देब। तू पचन्क लगे नीक चिजियन वइसे ही होइ जइहीं जइसे गगन स बर्खा होत ह। तू पचे हर चीज जरूरत स जियादा पउब्या। ¹¹ मइँ कीड़न क तू पचन्क फसलन क नस्ट नाहीं करइ देब। तोहरे पचन्क अंगूरे क सबहिं बेलन अंगूर पइदा करिहीं।” सर्वसक्तीमान यहोवा इ सबइ कहत ह।

¹² “दूसर रास्ट्रन क लोग तू पचन्क बरे भले रइहीं। तोहार सबन्क देस फुरइ अचरजे स भरा देस होइ।” सर्वसक्तीमान यहोवा इ सबइ कहत ह।

निआव क खास समइ

¹³ यहोवा कहत ह, “तू पचे मोहसे ओछी बातन कहया।”

मुला तू पचे पूछत अहा, “हम पचे तोहरे बारे मँ का कहा?”

¹⁴ तू पचे कह्या, “यहोवा क उपासना बेकार अहइ। हम पचे उ सबइ करम किहेन जउन यहोवा करइ क कहेस, मुला हम लोगन्क कछू नाहीं मिला। हम पचे आपन पापन बरे वइसे ही दुःखी रहेन जइसे मइयत मँ रोवत लोग। मुला एहसे कछू काम नाहीं निकरा। ¹⁵ हम समुझत रहेन कि घमंडी लोग सुखी रहत हीं। दुस्ट लोग सफल होत हीं। उ पचे परमेस्सर क धीरज क परीच्छा करइ बरे बुरे करम करत हीं, अउर परमेस्सर ओनका सजा नाहीं देत।”

¹⁶ उ लोगन क बीच मँ जउन ओकरे नाउँ क सम्मान किहेन आपुस मँ बतियानेन अउर यहोवा ओनका सुनेन। ओकरे समन्वा एक पुस्तक अहइ। उ किताबे म उ लोगन क नाउँ अहइ जउन यहोवा क नाउँ क सम्मान करत हीं।

¹⁷ यहोवा कहेस, “उ सबइ लोग मोर अहइँ। मइँ ओन पइ कृपालु रहब। मनई आपन ओन लरिकन पइ जियादा कृपालु रहत ह जउन ओकर आग्याकारी होत हीं। उहइ तरह मइँ आपन मनवइयन पइ कृपालु रहब। ¹⁸ हे लोगो, तू पचे मोरे निअरे वापिस लउटब्या अउर तू पचे नीक लोगन अउ बुरे लोगन क फरक जानब्या। तू पचे परमेस्सर क लोगन अउर दूसर लोगन क बीच क फरक समुझब्या।

ईसू क कब्र खाली

(मत्ती 28:1-10; मरकुस 16:1-8; लूका 24:1-12)

20 सप्ताह क पहिले दिन धुर सबेरे जब थोरि क अँधेरा बचा रहा तउ मरियन मगदलीनी कब्र प आइ। अउर उ देखेस कि कब्र क पाथर हटा अहइ। ² फिन उ दौड़के समौन पतरस अउर ईसू क पियारा चेलन क लगे पहुँची। अउर ओनसे बोली, “उ पचे पर्भू क कब्र स निकालके लइ गएन। अउर हमका पचे इ पता नाहीं अहइ कि उ सबेन्ह ओका कहाँ रखेस अहइँ।”

³ फिन पतरस अउर उ दूसर चेला हुवाँ स कब्र क तरफ चल पड़ेन्ह। ⁴ उ दुइनउँ साथे साथे दउड़त रहेन मुला दूसर चेला पतरस स आगे चला गवा अउर कब्र प पहिले पहुँच गवा। ⁵ उ नीचे निहुरिके देखेस कि हुवाँ कब्र क कपरा परा अहइ, मुला उ भीतर नाहीं गवा।

⁶ उहइ समइ समौन पतरस जउन ओकरे पाछे आवत रहा, उहउ आइ पहुँचा अउर कब्र क अन्दर चला गवा। उ देखेस कि हुवाँ कफन क कपरन परा अहइँ। ⁷ अउर उ कपरा जउन गाड़त क समइ ओकरे मुड़े कइँती रहा, उ कफन क साथ नाहीं अहइ, उ अलग स दूसरी जगह प रखा रहा। ⁸ फिन दूसर चेला जउन कब्र प पहिले पहुँचा रहा, उहउ भीतर घुसा। उ देखेस अउर बिसवास करेस। ⁹ (उ पचे अबहुँ तलक पवित्तर सास्तर क इ बचन नाहीं समझे रहेन कि ओका मरा मनइयन स जी उठब एकदम पक्का अहइ।)

मरियम मगदलीनी क ईसू दर्सन दिहेस

(मरकुस 16:9-11)

¹⁰ फिन उ दुइनउँ चेलन अपने अपने घरे चला गएन। ¹¹ मरियम रोवत चिल्लात कब्र क बाहेर खड़ी रहि गइ। रोवत चिल्लात उ कब्र मँ अन्दर झाँकि क बरे नीचे झुकी। ¹² जउने जगह ईसू क ल्हास रखी रही, हुवाँ उ सफेद कपरा पहिरे दुइ ठु सरगदूत बइठा रहेन, ओहमाँ स एक ठु सिरहाने प बइठा रहा अउर दूसर पइताने प बइठा रहा।

¹³ उ पचे ओसे पूछेन, “ऐ स्त्री तू काहे क रोअति अहा?”

उ जवाब दिहेस, “उ पचे मोरे पर्भू क उठाइ लइ गवा अहइँ अउर मोका इ पता नाहीं बाटइ कि ओका कहाँ रखे अहइँ?” ¹⁴ ऍतना कहिके उ मुड़ी अउर देखेस कि ईसू खड़ा अहइ। मुला उ जानि नाहीं पाएस कि उ ईसू रहा।

¹⁵ ईसू ओसे कहेस, “ऐ स्त्री तू काहे रोवति अहा? तू केका खोजति अहा?”

उ इ जानेस कि पूछइवाला माली अहइ, उ ओसे कहेस, “महासय, जदि तू कबहूँ ओका उठाए होया तउ मोका बतावा कि तू ओका कहाँ रखे अहा? मइँ ओका लइ जाबइ।”

¹⁶ ईसू ओसे कहेस, “मरियम!”

उ पाछे मुड़ी अउर इब्रानी मँ कहेस, “रब्बूनी” मतलब “गुरू।”

¹⁷ ईसू ओसे कहेस, “मोका जिन छुआ काहेकि मइँ अबहिं तलक परमपिता क पास ऊपर नाहीं पहुँचा अही। तू मोरे भाइयन क लगे जाइके बतावा, ‘मइँ अपने परमपिता अउर तोहरे परमपिता तथा अपने परमेस्सर अउर तोहरे परमेस्सर क पास ऊपर जात अही।’”

¹⁸ मरियन मगदलीनी आइके चेलन क समन्वा बताएस, “मइँ पर्भू क देखेउँ!” अउर उ मोका इ बात बताएस।

चेलन क दर्सन देब

(मत्ती 28:16-20; मरकुस 16:14-18; लूका 24:36-49)

¹⁹ उहइ दिन संझा क, उ हफ्ता क पहिला दिन रहा ओकर चेलन यहूदियन क डरके मारे आपन दरवाजा बन्द करे रहेन। उहइ समइ प ईसू आइके ओनके बीच मँ खड़ा होइ गवा अउर ओनसे कहेस, “तोहका सबका सान्ति मिलइ।” ²⁰ ऍतना कहिके उ ओनका सबेन्ह क आपन हाथ अउर आपन बगल देखॉएस। सब चेलन अपने पर्भू क देखके बहुत आनन्द मँ आइ गएन।

²¹ तउ ईसू ओनसे फिन कहेस, “तोहका सबका सान्ति मिलइ। वइसेन जइसेन परमपिता मोका भेजेस, मइँ तू पचे क भेजत अही।” ²² इ कहिके उ ओनके सबके ऊपर फूँक मारेस अउर ओनसे कहेस, “पवित्तर आतिमा क अपनाइ ल्या। ²³ जउने मनई क पाप क तू छमा करत ह, ओनका छमा मिलत ह अउर जउन मनई क पापन क तू छमा नाहीं करत्या, उ सब बिना छमा पाए रहत हीं।”

ईसू थोमा क दर्सन दिहेस

²⁴ थोमा जउन बारह मँ एक रहा अउर दिदिमस कहवावा जात रहा, जब ईसू आवा रहा तउ ओकरे साथे नाहीं रहा। ²⁵ दूसर चेलन ओसे कहत रहेन, “हम पर्भू क देखे अही।” मुला उ ओनसे कहेस, “जब उ तलक मइँ ओकरे हाथन मँ कील क निसानी न देख लेब अउर ओहमाँ आपन अंगुरी न डाइ लेब, तथा ओकरे पंजरे मँ आपन हाथ न डाइ लेब तब तक मइँ बिसवास न करब।”

²⁶ आठ दिन क बाद ओकर चेलन फिन एक दाईं घरे क भीतर रहेन। अउर थोमा ओऩके साथे रहा। दरवाजा प ताला लगा, रहा, मुला ईसू आवा अउर ओनके बीच मँ खड़ा होइके बोला, “तोहका सबन क सान्ति मिलइ!” ²⁷ फिन उ थोमा स कहेस, “हाँ आपन अंगुरी अब अउर मोर हाथ देख, आपन हाथ फैलाइके मोरे पंजरे मँ डावा। सन्देह करब छोड़ द्या अउर बिसवास करा।”

²⁸ एकर जवाब देत थोमा बोला, “मोर पर्भू, हे मोर परमेस्सर!”

²⁹ ईसू थोमा स कहेस, “तू मोका देखिके बिसवास करे अहा। मुला उ पचे धन्य अहइँ जउन बिना देखे बिसवास करत हीं।”

इ किताब यूहन्ना काहे लिखेस

³⁰ ईसू अउर तमाम चमत्कार चिन्ह अपने चेलन क देखाएस जउन इ किताब मँ नाहीं लिखी अहइँ। ³¹ अउर जउन बात हिआँ लिखी अहइँ। उ इ बरे लिखी अहइँ कि तू बिसवास करा कि ईसू ही परमेस्सर क पूत मसीह अहइ। अउर इही बरे कि बिसवास करत ओकरे नाउँ स तोहका सबन क अनन्त जीवन मिलइ।